1. ¿Tlen kichiua ma tiyolpakikan?

 JEHOVÁ kineki ma tiyolpakikan, ijkon tikmatij porque iespíritu santo kichiua ma tiyolpakikan (Gál. 5:22). Tiyolpakij ijkuak itlaj tiktemakaj, ik non, tiyolpakij titetlapouiaj uan ijkuak tikinpaleuiaj tokniuan (Hech. 20:35).

2, 3. (1) Ijkon ken kijtoua Gálatas 6:4, ¿tlen techpaleuis amo san ma timoyolkokokan? (2) ¿Tlen timomachtiskej?

² ¿Tlen techpaleuis amo ma timoyolkokokan? Apóstol Pablo okiteititi ome tlamantli tlen uelis techpaleuis, kajki itech Gálatas 6:4, (xiktlajtolti). Se, tla timochijchikauaj kuali tiktekichiuiliaj Jehová, tiyolpakiskej uan ijkon moneki tinochtin tikchiuaskej (Mat. 22:36-38). Ome, amo ma timokuayejyekokan tejuan okachi tikmatij itlaj tikchiuaskej uan oksekimej amo. Tla tichikajtokej uan oksekimej otechmachtijkej itlaj kuali ma tikchiuakan, ma tiktlasojkamatilikan Jehová porque ye nochi otechmakak. Tla tikitaj oksekimej tokniuan okachi kuali kimatij tetlapouiskej uan tlamachtiskej, ma tiyolpakikan tlen kimatij kichiuaskej para kiueyichiuaskej Jehová. Tikmatij ijkon kichiuaj amo para moueyinekiskej, ma timomachtikan ken kichiuaj uan amo inmiuan ma timotlatlanikan.

³ Axkan timomachtiskej tlen techpaleuis amo ma timosotlauakan ijkuak tikitaj amo tiktekichiuiliaj Jehová ken tiknekiskiaj. Noijki tikitaskej ken uelis okachi titlapaleuiskej ika tlen tikmatij tikchiuaskej uan tlen uelis techmachtiskej oksekimej.

4. ¿Tlen uelis techyolkokos? Xikijto tlen okipanok Carol.

⁴ Sekimej tokniuan yikipiaj miak xiuitl uan ayakmo okachi kitekichiuiliaj Jehová, ik non, moyolkokouaj. Ijkon okipanok se tokni tlen itoka Carol. Ye otetlapouiaya kanin okachi moneki, okinmachti 35, miakej okinpaleui ma motemakakan ixpan Jehová uan omoapolaktijkej, kuali tlen okichi. Pero satepan omokoko uan san omonekiaya yetos ikalijtik. Ye okijto: “Nikmati nimokokoua, ik non, amo ueli nikchiua ken oksekimej tokniuan uan nikmachilia amo ueli niktlakamati Jehová ken yejuan kichiuaj. Nimokuayejyekoua tlen niknekiskia nikchiuas pero noijki nikilnamiki tlen ayakmo niueli uan non nechyolkokoua”. Carol kineki okachi kitekichiuilis Jehová uan non kuali. Tikmatij ye kipatioita tlen kineki kichiuas.

5. (1) ¿Tlen moneki tikilnamikiskej tla timoyolkokouaj porque amo tikchiuaj nochi tlen tiknekiskiaj? (2) Ijkon ken mota itech fotos, ¿ken kiteititia tokni nochipa mochijchikaua kuali kitekichiuilia Jehová?

⁵ Tla ualeua timoyolkokouaj porque amo ueli tikchiuaj tlen tiknekiskiaj, ma timotlajtlanikan: “¿Tlen kineki Jehová ma nikchiua?”. Ye kineki ma tiktekichiuilikan ken moneki, kijtosneki kineki ma timochijchikauakan tiktekichiuiliskej. Ma timokuayejyekokan tlen kipanoua se tokni tlen yikipia 80 xiuitl. Moyolkokoua porque ayakmo uelis tetlapouia ken achto. Maski mokuayejyekoua mochijchikaua kitekichiuilia Jehová ika nochi iyolo, ye amo kiyolpaktia. Ma tikitakan kox non melauak. Tla kuali okitekichiuili Jehová ijkuak okipiaya 40 xiuitl uan axkan maski kipia 80 xiuitl ok ijkon kichijtok, kijtosneki ok kiyolpaktijtok Jehová. Tla timokuayejyekouaj tlen tikchiuaj amo kipatioita Jehová, ma tikilnamikikan ye kijtos tlen kipaktia uan tlen amo. Ye yolpakis tla timochijchikauaj tiktekichiuiliaj (noijki xikita Mateo 25:20-23).

6. ¿Tlen techmachtia tlen okichi María?

⁶ Tiyolpakiskej tla tikitaj tlen kema uelis tikchiuaskej uan ijkon amo timokuayejyekoskej tlen amo uelis tikchiuaskej. Ma tikitakan tlen okipanok María, ye mokokoua, ik non, amo ueli okachi tetlapouia. Omoyolkokouaya uan okimachiliaya amitlaj ipati. Pero okitak se tokni tlen iuan omonechikouaya omokokouaya, okitak ken kipaleuis. Ye okijto: “Onimokuayejyeko tlen tonal niaskia nitetlapouiti iuan tokni, ika teléfono noso ika cartas, ijkuak ijkon onikchiuaya oniyolpakiaya porque ueli onikpaleuiaya non tokni”. Tejuan noijki tiyolpakiskej tla timokuayejyekouaj tlen uelis tikchiuaskej uan amo tlen tiknekiskiaj tikchiuaskej. Pero ¿tla tikitaj itlaj okachi ueli tikchiuaskej para tiktekichiuiliskej Jehová?

7. ¿Tlen okinmilui tokniuan apóstol Pedro?

⁷ Ijkuak apóstol Pedro okijkuilo achto carta, okinmilui tokniuan ma kinyolchikauakan oksekimej ika tlen okimatiayaj kichiuaskej. Ye okijto: “Nonnochteh ononkiselijkeh tlatlamantli tekitl  non Dios onomechmák, xiktekitiltikah ijkuak nonkimpalewiah nomokniwah” (1 Ped. 4:10). Amo ma timokuayejyekokan amo tikchiuaskej tlen tikmatij porque oksekimej technexikolitaskej noso moyolkokoskej. Tla amo ijkon tikchiuaj amo tiktekichiuilijtoskej Jehová ika nochi toyolo.

8. Ijkon ken kijtoua 1 Corintios 4:6, 7, ¿tleka amo ma timoueyinekikan?

⁸ Moneki tikchiuaskej tlen tikmatij tikchiuaj pero amo ma timoueyinekikan (xiktlajtolti 1 Corintios 4:6, 7). Ma tikitakan ken uelis tikchiuaskej. Ma tikijtokan tejuatsin amo tikita oui ikaj tikmachtis, ijkon xikchijto pero amo kuali tla timoueyineki. Ximokuayejyeko otitetlapouito uan opejki ikaj san niman tikmachtia pero ijkuak yitika iuan tokniuan tikkaki se tokni kijtoua okikajteuili se revista akin okitlapouijtoka. ¿Tlen tikchiuas? Tikmatij tlen tikijtos kinyolchikauas tokniuan pero okachi kuali tikchiuas tla tikinmiluis okse tonal para amo tikyolkokos tokni. Kuali tla ijkon tikchiuas. Pero amo xikkaua tikintemos akinmej tikinmachtis porque tejuatsin amo tikita oui ijkon tikchiuas.

9. Maski tikmatij itlaj tikchiuaskej, ¿tlen moneki ma tikilnamiktokan?

⁹ Ma tikilnamikikan toTajtsin Dios techpaleuia ma tikchiuakan tlen ueli tikchiuaj. Ik non, ma tikinyolchikauakan tokniuan uan amo ma timoueyinekikan (Filip. 2:3). Tiyolpakiskej tla titlapaleuiaj ika nochi tlen tiuelij para tikchiuaskej tlen toTajtsin Dios kineki uan ijkon tikueyichiuaskej uan amo para tikinmititiskej tokniuan tejuan okachi tikmatij.

10. ¿Tleka amo kuali tla timokuayejyekouaj tejuan okachi tikmatij itlaj tikchiuaskej uan oksekimej amo?

¹⁰ Tla amo timomaluiaj, timokuayejyekoskej tejuan okachi tikmatij uan oksekimej amo. Ma tikitakan ken uelis panos. Xamo se tokni kuali tlamachtia kanin timonechikouaj, xamo mokuayejyekoua okachi kimati porque okse tokni amo ueli ijkon kichiua. Pero xamo non tokni kimati kichiuas okseki tlamantli, xamo kipaktia kinselis tokniuan inkalijtik, kuali kinmachtia ikoneuan noso kipaktia tetlapouis. Tiyolpakij porque katej miakej tokniuan tlen kimatij kichiuaskej miak tlamantli uan ijkon kiueyichiuaj Jehová uan kinpaleuiaj tokniuan.

11. ¿Tleka moneki timochijchikauaskej tikchiuaskej ken Jesús?

¹¹ Maski amo ueli tikchiuaj ken oksekimej, uelis tikitaskej tlen kuali kichiuaj. Ma tikitakan tlen okichi Jesús. Maski amo tikchiuaskej ken ye okichi porque titlajtlakolejkej, uelis timomachtiskej tlen tlamantli kualtsin okichi (1 Ped. 2:21). Tla timochijchikauaj tikchiuaj ken ye, tikyolpaktiskej Jehová, noijki ijkuak titetlapouiskej kinekiskej techkakiskej.

12, 13. ¿Tlen techmachtia tlen okichi tekiua David?

¹² ITlajtol toTajtsin Dios techiluia miakej tlakamej uan siuamej maski omotlapololtijkej techmachtiaj miak tlamantli (Heb. 6:12). Ijkon okichi tekiua David, ik non, Jehová okijto: “Yonikajsik [...] se tlakatl akin nechpaktia” (Hech. 13:22). David omotlapololti uan maski otlajtlakolchi techpaleuia tlen satepan okichi. Okikauili Jehová ma kiyektlali uan melauak omoyolkopki, ik non, okitlapojpolui (Sal. 51:3, 4, 10-12).

¹³ Tlen okichi David uelis techpaleuis tla timotlajtlaniaj: “¿Tlen nikchiua ijkuak ikaj nechyektlalia? ¿San niman nikijtoua kema ijkon onikchi noso nikijtoua amo? ¿San niman nikintlajtlakoltia oksekimej? ¿Uelis nimochijchikauas para amo ijkon nikchiuas?”. Noijki ijkuak timomachtiskej tlen okichijkej sekimej tlakamej uan siuamej, ma timotlajtlanikan: “¿Otlajyouijkej ijkon ken ne? ¿Tlen okichijkej ijkuak ijkon okinpanok?”. Noijki ma timotlajtlanikan: “¿Ken uelis nikchiuas ken yejuan okichijkej?”.

14. ¿Ken uelis techpaleuis tlen kichiuaj tokniuan?

¹⁴ Noijki uelis techpaleuis tlen kichiuaj tokniuan tlen yikipiaj miak xiuitl noso telpochmej uan ichpochmej. Uelis timokuayejyekoskej se telpochtli noso se ichpochtli tlen iuan timonechikouaj kiteititia melauak tlaneltoka itech Jehová ijkuak oksekimej telpochmej uan ichpochmej kiluiaj itlaj amo kuali ma kichiua. Noso se tokni mokokoua noso ifamilia kitlajyouiltia. ¿Nonmej tokniuan kichiuaj tlen tejuan techpoloua tikchiuaskej? Tla tikitaj tlen yejuan kichiuaj, uelis techpaleuis ma titlaxikokan ijkuak titlajyouiskej. ¿Tikpatioitaj  tlen kichiuaj tokniuan? Tla ijkon tikchiuaj, techpaleuia ma tiyolpakikan (Heb. 13:7; Sant. 1:2, 3).

15. ¿Ken techpaleuia tlen okijto apóstol Pablo?

¹⁵ Tinochtin uelis titlapaleuiskej kuali ma mouikakan tokniuan tla timochijchikauaj tiktekichiuiliaj Jehová ken ye kineki. Ijkon okichijkej tokniuan itech achto siglo, yejuan tlatlamantli itlaj okichiuayaj (1 Cor. 12:4, 7-11). Pero amo omonekiaya ijkon kichiuaskiaj para motlatlaniskiaj noso para amo ma mouikakan oksekimej. Ijkuak Pablo okintlajkuilili tokniuan tlen ochantiayaj ompa Éfeso, okinmilui omonekiaya ‘makiyekiskaltikah ikuerpo Cristoʼ. Noijki okinmilui: “Ijkuak nochi kuali tekitih, kuali moskaltijtih iwa mochikajti ika tlasojtlálistli” (Efes. 4:1-3, 11, 12, 16). Ijkuak ijkon okichijkej otlapaleuijkej ma mouikakan iuan tokniuan, axkan noijki ijkon tikitaj ijkuak timonechikouaj.

16. ¿Tlen moneki tikchiuaskej? (Hebreos 6:10).

¹⁶ Amo ma timokuayejyekokan tejuan okachi tikmatij itlaj tikchiuaskej uan oksekimej amo. Ma tikitakan tlen okichi Jesús uan ma tikchiuakan ken ye. Ma tikitakan tlen okichijkej yiuejkika tokniuan uan tlen kichiuaj axkan tokniuan. Ma timochijchikauakan tiktekichiuiliskej Jehová ken ye kineki. Ma tikilnamikikan ye amo kilkauas tlen tejuan tikchiuaj para tikueyichiuaskej (xiktlajtolti Hebreos 6:10). Ma tiyolpakikan tiktekichiuiliaj Jehová, ma tikilnamikikan ye kipatioita timochijchikauaj tikchiuaskej tlen ye kipaktia.