1. Kuyini okusenza sithokoze kakhulu?

 UJEHOVA ufuna sithokoze. Siyakwazi lokho ngoba ukuthokoza ngesinye sezithelo zomoya ongcwele. (Gal. 5:22) Ukupha kuyathokozisa ukwedlula ukwamukela, yikho siyathokoza kakhulu nxa sisebenza nzima ekutshumayeleni futhi sincedisa abafowethu labodadewethu ngendlela ezitshiyeneyo.—ImiSeb. 20:35.

2-3. (a) Ngokwalokho okutshiwo kuGalathiya 6:4, yiziphi izinto ezimbili ezizasinceda ukuthi sihlale sithokoza enkonzweni yethu? (b) Sizaxoxa ngani esihlokweni lesi?

² KuGalathiya 6:4 umphostoli uPhawuli uqamba izinto ezimbili ezingasinceda ukuthi siqhubeke sithokoza. (Bala.) Okokuqala, kumele sizimisele ukwenzela uJehova konke okusemandleni ethu. Singenza njalo sizathokoza. (Mat. 22:36-38) Okwesibili, akumelanga siziqathanise labanye. Kumele simbonge uJehova ngalokho esenelisa ukumenzela khona kusiya ngempilakahle yethu, ulwazi esilalo loba iziphiwo zethu. Phela konke esilakho sikuphiwe nguye. Kanti njalo nxa kulokunye abanye abakwenza ngcono kulathi enkonzweni, kumele sithokoze ukuthi basebenzisa iziphiwo zabo ukudumisa uJehova hatshi ukuzifunela udumo. Yikho-ke kulokuthi sincintisane labo kumele sifunde kubo.

³ Esihlokweni lesi sizabona ukuthi kuyini okungasinceda ukuthi singadani nxa singasenelisi ukwenzela uJehova okunengi. Sizaphinda sibone ukuthi singazisebenzisa njani iziphiwo esilazo lokuthi singafundani kwabanye.

4. Kuyini okungenza abanye bethu badane? Nika isibonelo.

⁴ Abanye bethu sidaniswa yikuthi asenelisi ukwenza okunengi ekukhonzeni ngenxa yokugula loba ukuguga.  Omunye udadewethu okuthiwa nguCarol waba lohlupho olufananayo. Wake wayancedisa lapho okwakulabamemezeli abalutshwana khona. Ekhonale wafunda labantu abangu-35 iBhayibhili futhi wancedisa abanye babo ukuthi bathuthuke baze babhabhathizwe. UCarol wenza okunengi sibili ekutshumayeleni. Kodwa wagula kakhulu okokuthi wayengasenelisi lokuphuma endlini. Uthi: “Ngiyakwazi ukuthi ukugula kwami akusangivumeli ukuthi ngenze okunengi njengabanye. Kodwa nxa ngibabona betshiseka emsebenzini wokutshumayela ngibona angani angenzi kuhle ekukhonzeni njengabo. Kuyangidanisa ukuthi angisenelisi ukwenza konke engifisa ukukwenza.” Kuhle sibili ukuthi uCarol ufuna ukwenzela uJehova konke okusemandleni akhe. Siyaqiniseka ukuthi uNkulunkulu wethu olozwelo uyathokoza ngalokho uCarol amenzela khona khathesi.

5. (a) Kuyini okumele sikukhumbule nxa singasenelisi ukwenza okunengi enkonzweni? (b) Umfowethu osemfanekisweni wenzeni ukuze aqhubeke esenzela uJehova konke okusemandleni akhe?

⁵ Nxa uyake udane ngenxa yokuthi awusenelisi ukwenza okunengi njengakuqala, khumbula ukuthi uJehova ufuna umnike konke okusemandleni akho kungelani lesimo ophakathi kwaso khathesi. Ake sithi udade oleminyaka engu-80 udanile ngoba kasenelisi ukwenza okunengi enkonzweni njengalokho ayekwenza eseseleminyaka engu-40. Ucabanga ukuthi uJehova kathokozi ngakwenzayo lanxa esenza konke okusemandleni akhe. Kodwa liqiniso yini leli? Hatshi. Nxa udade lo wayesenza okusemandleni akhe eleminyaka engu-40 njalo elokhu ekwenza khathesi eseleminyaka engu-80 kutsho ukuthi kazake ayekele ukwenza konke okusemandleni akhe. Nxa sesibona angani esikwenzayo akwenelanga ukuthi kumthokozise uJehova, kumele sizikhumbuze ukuthi uJehova nguye otshoyo ukuthi kuyini okumthokozisayo. Nxa ungenza konke okusemandleni akho, uJehova uzakutshayela ihlombe athi: “Wenze kuhle!”—Khangela uMathewu 25:20-23.

6. Sifundani kulokho okwenziwa nguMaria?

⁶ Sizathokoza nxa singagxila kulokho esenelisa ukukwenza kulokuzihlupha ngalokho esingenelisi ukukwenza. Lokhu yikho udadewethu okuthiwa nguMaria akwenzayo. Kenelisi ukwenza okunengi enkonzweni ngenxa yomkhuhlane alawo. Ekuqaliseni wayehlulukelwe futhi esezibona engelancedo. Kodwa wasekhumbula ukuthi ebandleni labo kulomunye udade owayelele phansi engenelisi lokuphuma ekutshumayeleni. UMaria wazimisela ukumncedisa. Uthi: “Ngahlela ukuthi sitshumayele sonke ngefoni langokubhala incwadi. Ngangisithi nxa ngifika endlini ngivela tshumayela laye ngizizwe ngithokoza futhi ngisuthisekile ngoba ngincedise udadewethu.” Lathi sizathokoza kakhulu nxa singagxila kulokho esenelisa ukukwenza kulokuzihlupha ngalokho esingenelisi ukukwenza. Kodwa kuthiwani nxa sisenelisa ukwenza okunengi kumbe kulokunye esikwenza kuhle enkonzweni kaJehova?

7. Umphostoli uPhetro wakhuthaza amaKhristu ukuthi enzeni?

⁷ Encwadini yakhe yokuqala umphostoli uPhetro wakhuthaza abafowabo ukuthi basebenzise iziphiwo zabo ukuze bakhuthaze abanye ebandleni. Wathi: “Kusiya ngesipho ngamunye asamukeleyo, sisebenziseni ukuncedisana njengoba lingabaphathi abahle bomusa omkhulu kaNkulunkulu.”  (1 Phet. 4:10) Akumelanga sesabe ukusebenzisa iziphiwo zethu sicabanga ukuthi abanye bazaba lomhawu kumbe bazikhangelele phansi. Nxa singenza njalo siyabe singasaniki uJehova konke esilakho.

8. Ngokwalokho okutshiwo ku-1 Khorinte 4:6, 7, kungani kungamelanga sizigqaje ngeziphiwo esilazo?

⁸ Kumele sizisebenzise sibili iziphiwo esilazo kodwa akumelanga sizigqaje ngazo. (Bala u-1 Khorinte 4:6, 7.) Ngokwesibonelo, nxa ulesiphiwo sokuqalisa izifundo zeBhayibhili kumele usisebenzise isiphiwo sakho. Kodwa kulomehluko phakathi kokusisebenzisa lokuzigqaja ngaso. Ake sithi uhlangane lomunye umuntu ekutshumayeleni wahle waqalisa ukufunda laye iBhayibhili njalo sekukuphuzele ukuthi uxoxele abanye eqenjini lakho. Kodwa nxa ufika eqenjini ufica omunye udade elandisa indlela aphumelele ngayo ukutshiyela omunye umuntu imagazini. Yena uhambise imagazini nje kuphela wena waqalisa isifundo. Uzakwenzani? Lanxa indaba yakho ingabakhuthaza abanye eqenjini, ungakhetha ukuthi ungabaxoxeli ngalelolanga ukuze ungamdanisi udade lo otshiyele umuntu imagazini. Ungenza njalo uyabe utshengise ukuthi ulomusa. Kodwa ungekeli ukuqalisa izifundo zeBhayibhili. Ulesiphiwo, sisebenzise!

9. Kumele sizisebenzise njani iziphiwo zethu?

⁹ Kumele sihlale sikhumbula ukuthi loba yiziphi iziphiwo esilazo sizinikwe nguNkulunkulu. Yikho kumele sizisebenzise ukuncedisa abanye ebandleni hatshi ukuthi sibukwe ngabantu. (Flp. 2:3) Nxa singasebenzisa amandla ethu kanye leziphiwo esilazo ukwenza intando kaNkulunkulu, sizaba lesizatho sokuthokoza. Okuzasithokozisa yikuthi siyabe sisebenzisa iziphiwo zethu ukudumisa uJehova hatshi ukuthi senza okunengi kulabanye kumbe ukuthi sizibona singcono kulabo.

10. Kungani kungamelanga siziqathanise labanye?

¹⁰ Nxa umuntu engananzeleli angacina esezibona engcono kulomunye ngenxa yokuthi kulokuthile enelisa ukukwenza okungeneliswa ngomunye. Ngokwesibonelo, umfowethu othile angabe elesiphiwo sokukhuluma inkulumo ezimnandi. Enhliziyweni yakhe angabe ekhangelela phansi umfowethu ongenelisi ukukhuluma inkulumo ezinhle njengaye. Kodwa umfowethu lo ongenelisi ukukhuluma kuhle inkulumo angabe elomusa, esamukela  abantu emzini wakhe, ebafundisa kuhle kakhulu abantwabakhe njalo ekhuthele emsebenzini wokutshumayela. Kuyasithokozisa ukuthi silabafowethu labodadewethu abanengi abasebenzisa iziphiwo zabo ukuze bakhonze uJehova futhi bancede abanye.

11. Kungani kumele sizame ukulingisela uJesu?

¹¹ Lanxa kungamelanga siziqathanise labanye kunengi esingakufunda ezincekwini zikaJehova ezithembekileyo. Omunye esingafunda kuye nguJesu. Lanxa wayephelele singenelisa ukufunda endleleni ayesenza ngayo izinto futhi silingisele ubuntu bakhe. (1 Phet. 2:21) Nxa singenza konke okusemandleni ethu ukuthi simlingisele, sizakuba zinceku zikaJehova ezenza kuhle futhi sizaphumelela emsebenzini wokutshumayela.

12-13. Sifundani enkosini uDavida?

¹² ELizwini likaNkulunkulu kukhulunywa ngamadoda labesifazana okumele sibalingisele ababesenza okuhle lanxa babelesono. (Heb. 6:12) Omunye wabo yiNkosi uDavida, uJehova athi ‘wayeyindoda evumelana lenhliziyo yakhe.’ Elinye iBhayibhili lithi ‘wayengumuntu omthokozisa kakhulu.’ (ImiSeb. 13:22) Kodwa uDavida wayelesono futhi wenza amaphutha amakhulu. Lanxa kunjalo uyisibonelo esihle kithi. Ngenxa yani? Ngoba wathi eselulekwa kazange azame ukucatsha ngomunwe. Kodwa wasamukela iseluleko esiqinileyo asiphiwayo njalo wazisola kakhulu ngalokho ayekwenzile. Lokhu kwenza uJehova wamxolela.—Hubo. 51:3, 4, 10-12.

¹³ Okungasinceda ukuthi sifunde kuDavida yikuzibuza imibuzo elandelayo: ‘Ngenzani nxa ngingelulekwa? Ngiyaphangisa yini ukuvuma amaphutha ami kumbe ngiyazama ukuzigeza? Ngihle ngizame ukwesulela indaba kwabanye yini? Ngiyazama ngamandla yini ukungaphindi amaphutha engiwenzileyo?’ Ungazibuza imibuzo efananayo nxa ubala ngamanye amadoda labesifazana ababethembekile okukhulunywa ngabo eBhayibhilini. Bake baba phakathi kobunzima obufanana lalobo ophakathi kwabo yini? Yibuphi ubuntu obuhle ababelabo? Sonke isikhathi nxa ufunda ngomunye wabo zibuze ukuthi ungenzani ukuze ufanane laye.

14. Kuzasinceda njani ukunanzelela okuhle okwenziwa ngabanye?

¹⁴ Okunye okungasinceda yikulingisela  izibonelo zabasakhulayo lasebekhulile esilabo emabandleni. Ngokwesibonelo, ukhona yini ebandleni oqhubeka ethembekile lanxa ephakathi kobunzima, kungenzakala uyengwa ngabanye, uyaphikiswa emulini kumbe uyagula? Kulobuntu alabo yini ongafisa ukubulingisela? Nxa ungananzelela lokho akwenzayo, ungafunda ukuthi lawe ungenzani ukuze uqinisele phakathi kobunzima okubo. Siyathokoza ukuthi silabafowethu labodadewethu abalokholo oluqinileyo esingabalingisela.—Heb. 13:7; Jak. 1:2, 3.

15. Yisiphi iseluleko esasinikwa ngumphostoli uPhawuli esenza siqhubeke sithokoza ngalokho esikwenzela uJehova?

¹⁵ Nxa sonke singenza konke okusemandleni ethu kuzakuba lokuthula lokumanyana ebandleni. Cabanga ngamaKhristu esikhathi sabaphostoli. Ayeleziphiwo lemisebenzi etshiyeneyo ebandleni. (1 Khor. 12:4, 7-11) Kodwa lokho akuzange kubangele ukuthi ancintisane njalo angazwanani. UPhawuli wakhuthaza abazalwane laba ukuthi ngamunye wabo enze akwenelisayo ukuze ‘akhe umzimba kaKhristu.’ Wabhalela abase-Efesu wathi: “Nxa isitho ngasinye sisebenza kuhle, lokho kuyawunceda umzimba ukuthi ukhule njengoba uzakha ethandweni.” (Efe. 4:1-3, 11, 12, 16) Labo abawalalelayo amazwi kaPhawuli benza kwaba lokuthula lokumanyana ebandleni, okuyikho esisebenza nzima ukuthi kuhlale kukhona emabandleni ethu lalamuhla.

16. Kumele uzimisele ukwenzani? (UHebheru 6:10)

¹⁶ Zimisele ukungaqali ukuziqathanisa labanye. Funda kuJesu futhi uzame ukumlingisela. Zama lokulingisela izinceku zikaJehova zakudala kanye lezakhathesi ezithembekileyo. Nxa uqhubeka usenza konke okusemandleni akho, qiniseka ukuthi ‘uNkulunkulu kayisuye ongalunganga ukuthi sengaze awukhohlwe umsebenzi wakho.’ (Bala uHebheru 6:10.) Qhubeka uthokoza ekukhonzeni uJehova usazi ukuthi uyakuqakathekisa okwenza ngenhliziyo yonke ukuze umthokozise.