1. Ngozvapi zvinozotiita kuti tidakare maningi?

 JEHOVHA anoda kuti itusu tidakare. Tinoziva izvi ngokuti mudakaro unoita divi ro mucero wo mujimu mucena wake. (Vagaratiya 5:22) Pikija kuti tinodakara maningi ngo kupa kusiyapo ngo kuashira, tinoengejera maningi mudakaro wedu patinoshanda ngo simba mu basa ro kucumaera no kubesera hama no hambzaji jedu ngo njira jakasiyana-siyana.—Mabasa o Vapostori 20:35.

2-3. (a) Inga zvatinovona pana Vagaratiya 6:4, ngozvapi zviro zviviri zvinozotibesera kuti tienderere mberi takadakara pa kushandira kwedu Jehovha? (b) Ngozvapi zvatinozovona pa jijo iyi?

² Inga zvakatahwa pana Vagaratiya 6:4, mupostori Pauro wakananga zviro zviviri zvinozotibesera kuti tienderere mberi takadakara. (Verenganyi.) Cokutanga, cido cedu cinodikana kuva co kuita zvese zvatinokwanisa kuna Jehovha. Kudari tikaitira Jehovha zvese zvatinokwanisa, tinodikana kudakara. (Mateu 22:36-38) Cocipiri, atidikani kujiezanisa no vamweni. Azvinenyi kuti ngozvapi zvatinokwanisa ngo ndava yo uhomi hwedu no kujijiswa kotakaitwa, tinodikana kubonga Jehovha. Zvese zvatinazvo wari takazvipuwa ndiyena. Ngo divi rimweni, kudari vamweni vari kubudirira pa zvavari kuita mu basa ro kucumaera kupinda itusu, tinodikana kudakara ngokuti ivona vari kushandisa zvavanokwanisa kuita kuti vakuje Jehovha kusiyapo kuita zvinovadakajisa. Ngo kudaro, kusiyapo kuphikizana naivona, tinodikana kujijira ngo zvavanoitaro.

³ Pajijo iyi, tinozovona kuti zvicinyi zvingatibesera patinojizwa takasuruvara ngo kutama kukwanisa kuita zvese zvatinoda mu basa redu. Tinozovonazve kuti tingashandisa kudini zvipo zvatinazvo no kuvona manera otingajijira ngo muezaniso jo vamweni.

4. Ngowapi mugariro ungatiita kuti tisuruvare? Ipanyi muezaniso.

⁴ Vazinji vedu avacakwanisi kuita zvese zvavanoda pa kushandira kwavo Jehovha ngokuti vaavasharuka kana vari kutohwaja. Izvi zvinotiita kuti tisuruvare maningi. Ndizvona zvakaitikavo na hambzaji Karori. Ivona vaishandira kwaidiwa maningi vacumaeri. Pa nguva iyi, vaiitisa jijo jo Bhaibheri jinokwana kuita 35 no kubesera vandhu vakawanda kuti vajipire no kubhabhatijwa. Hambzaji Karori vaibudirira maningi mu mushando wavo! Asi ivona vakaguma pa kuhwaja maningi, zvoita kuti vapeje nguva yakawanda vakagara pa muzi. Ivona vakati: “Ndinoziva kuti ngo ndava yo kuhwaja kwangu andicakwanisi kuita zvese zvandinoda inga zvinoitwa ngo vamweni. Nguva jimweni, ndinojivona kuti andizivi kugondeka inga ndivona. Andicakwanisi kuita zvese zvandaida, izvi zvinondiita kuti ndisuruvare.” Hambzaji Karori vanoda kuita zvese zvanokwanisa kuna Jehovha. Mugariro uwu waushoni maningi! Tingava no cokwadi co kuti Mwari wedu ano usizi, ari kudakara maningi ngo zvavari kuitari.

5. (a) Ngozvapi zvatinodikana kuceukija kudari tikasuruvara ngo kukonehwa kuita zvimweni? (b) Inga zvatiri kuvona pa foto, hama iyi iri kukhombijisa kudini kuita zvese zvainokwanisa kuna Jehovha?

⁵ Kudari imwimwi nguva jimweni munosuruvara ngo kukhonehwa kuita zvizinji kuna Jehovha, jivhunjisenyi kudari: ‘Ngozvapi zvaanoda Jehovha kwandiri?’ Jehovha anoda kuti imwimwi muite zvese zvamunokwanisa pa mugariro wamunawo wari. Vonanyi muezaniso uwu basi: Imwe hambzaji ino makore anokwana kuita 80 ingasuruvara ngokuti aicakwanisi kuita zvese zvainokwanisa mu basa ro kucumaera inga zvoyaiita poyainga no 40 o makore. Iyona inorangarira kuti pikija iri kuita zvese zvainokwanisa, Jehovha aaripi kudakara ndizvona. Kunanga kuti izvi ndizvonadi? Amborangariranyi izvi basi. Kudari hambzaji iyi yakaita zvese zvayaikwanisa poyainga no 40 o makore no kuitazve zvondhozvo paino makore anokwana kuita 80, iyona aizivi kumbosiya kuita zvese zvainokwanisa kuna Jehovha. Kudari tikatanga kurangarira kuti zvatiri kuitaro azviripi kukwana kuti Jehovha adakare, tinodikana kuceukija kuti Jehovha ndiyena anonanga zvinomudakajisa. Tikaita zvese zvatinokwanisa, Jehovha anozotivhunja kudari: “Waita ushoni.”—Ezanisanyi na Mateu 25:20-23.

6. Ngozvapi zvatingajija ngo muezaniso wa hambzaji Mariya?

⁶ Zvakareruka maningi kuwana mudakaro, kudari tikabatikana pa zviya zvatinokwanisa kuita kuciripi pa zviya zvaticikakwanisi. Inga muezaniso, hambzaji imweni inodanwa Mariya, iri kuhwaja zvokuti aicakwanisi kuita zvese zvainoda mu basa rokucumaera. Pakutanga iyona yaijizwa iri yoga no icikacisiri. Asi yakarangarira ngo hambzaji iri mu ungano mwayo iri kuhwaja, yotema civaringo co kwenda koibesera. Hambzaji Mariya vakati: “Ndakaita nasiriro yokwenda kocumaera nayo ndecishandisa foni no kutara karata. Vhaza jese jotaishanda tese ndaiguma kumuzi ndakadakara, ngokuti ndaiziva kuti ndakwanisa kubesera hambzaji yangu.” Itusuvo tingakwanisa kuengejera mudakaro wedu, kudari tikabatikana pa zviya zvatinokwanisa kuita kuciripi pa zvaticikakwanisi. Asi tingati kudini kudari tinokwanisa kuita mabasa amweni pa kushandira kwedu Jehovha?

7. Ngoyapi mbhangiro yaushoni yakapa mupostori Pedhru kuno Makristu?

⁷ Pa karata yake yokutanga, mupostori Pedhru wakangwaja hama kuti jishandise zvipo zvajo kuti jivangise hama javo. Pedhru wakatara kudari: “Mukuzwirana no cipo caakaashira,  umwe nga umwe, ngaacishandise pa kushandira vamweni, inga muvonereri wakanaka wo unyasha hucikaezaniswi hwa Mwari.” (1 Pedhru 4:10) Itusu tinodikana kunasa kushandisa zvipo zvedu, totama kuthya ngo kurangarira kuti vamweni vanozoguma pa kuva no ushanje kana kutoremba. Kudari tikatama kuita zvese zvatinokwanisa ngo kuneseka ngo manera anozojizwa vamweni, tinonga ticikaitiri Jehovha zvese zvatinokwanisa.

8. Mukuzwirana 1 Vakorinte 4:6, 7, ngenyi atidikani kuzvikuja ngo zvipo zvatinazvo?

⁸ Tinodikana kushandisa ushoni zvipo zvatinazvo, asi tinodikana kuita ubhasopa kuti titame kuzvikuja ndizvona. (Verenganyi 1 Vakorinte 4:6, 7.) Inga muezaniso, zvingaita kuti imwimwi munokwanisa ushoni kutangisa jijo jo Bhaibheri. Ngo kudaro, munodikana kushandisa cipo ici. Asi ceukijanyi kuti amudikani kuzvikuja ngo pamusoro pazvo. Ngatiti imwimwi makwanisa kubhuya no mundhu mu basa ro kucumaera mokwanisa kutangisa jijo yo Bhaibheri. Makadakara zvokuti maida kutovhunja vese vo pa cikwata cenyu co kucumaera. Asi pamunosongana no cikwata cenyu co basa ro kucumaera, monokhada hambzaji inonga yecisumuravo zvaiitikira payainga yecipekeja revhista. Iyona yakakwanisa kubudisa revhista, imwimwi makakwanisa kutangisa jijo yo Bhaibheri. Waro ngozvapi zvamaizoita? Munoziva kuti vese mu cikwata cenyu vaizovangiswa maningi ngo kuzwa zvakamuitikirari, asi kangaije maizosana kuvetera kuti muzozvinange pa nguva imweni kuti mutame kupungura mudakaro wo hambzaji yabudisaya revhista. Kuita izvi zvaizokhombija kunaka mwoyo kamare. Asi azvirevi kuti imwimwi amucadikanizve kutangisa jijo jo Bhaibheri. Munaco cipo ici, ngo kudaro cishandisenyi.

9. Tinodikana kushandisa kudini zvipo zvatinazvo?

⁹ Tinodikana kuceukija kuti zvipo zvese zvatinazvo takazvipuwa ndi Jehovha. Ngo kudaro, tinodikana kushandisa zvipo zvatinazvo kuti tibesere ungano yedu, kuciripi kuda kujivonesa pacedu. (Vafiripi 2:3) Patinoshandisa simba redu no zvipo zvatinazvo kuti tiite kuda ka Jehovha, tinozova no thangwe ro kudakara, kuciripi ngokuti itusu tiri kuita zvizinji kupinda vamweni kana tiri kueja kuva vakanaka maningi kupinda ivona. Asi ngokuti tiri kuita zvese zvatinokwanisa kuti tikuje Jehovha.

10. Ngenyi asipi zvaushoni kujiezanisa no vamweni?

¹⁰ Kudari akatama kungwarira, mundhu angatanga kuezanisa zviro zvaushoni zvaanoita no zvimweni zviciripi zvaushoni zvinoitwa ngo vamweni. Inga muezaniso, zvingaita kuti hama yaita hurukuro yaushoni. Iyona inonga yatovangisira kamare. Asi ingatotanga kurangarira  kuti inokwanisa ushoni kuita hurukuro kupinda hama imweni. Kuveni hama yondhoyo inotokwanisavo kuita ushoni zviro zvimweni, zvakadari inga kuashira ushoni varendo, kujijisa vana vayo no kuvangisira mu basa ro kucumaera. Tinodakara maningi ngokuti hama no hambzaji jakawanda jinoshandisa zvipo zvajo pa kushandira Jehovha no kubesera vamweni.

11. Ngenyi tinodikana kuvangisira kuti titevejere muezaniso wa Jesu?

¹¹ Pikija tinodikana kungwarira kuti titame kujiezanisa no vamweni, itusu tingabesereka maningi ngo kujijira ngo muezaniso jo vaya vakagondeka. Muezaniso wokutanga watinoda kuvona ngo wa Jesu. Pikija kuti iyena wainga akakwana, tinokwanisa kujija ngo mugariro jake jaushoni no manera anoshamaisa aaita ndiwona zviro. (1 Pedhru 2:21) Patinoita zvese zvatinokwanisa kuti titevejere muezaniso wake ngo phedo, tinozova vashandiri vaushoni va Jehovha no kunasa kubudirira mu basa ro kucumaera.

12-13. Ngozvapi zvatingajija ngo muezaniso wa Dhavhidhi?

¹² Mu Bhaibheri tinowana muezaniso wo vanarume no vanakaji vakagondeka, vatinodikana kutevejera muezaniso wavo ngo phedo pikija vainga vacikazivi kukwana. (Vahebheru 6:12) Inga muezaniso, Jehovha waidanija Mambo Dhavhidhi kuva “mundhu anodakajisa mwoyo” wake. (Mabasa o Vapostori 13:22) Asi Dhavhidhi aacaengepi mundhu wakakwana. Iyena wakaguma pakuita zvishaishi zvikuru kamare. Pikija zvakadaro, imuezaniso waushoni kwatiri. Ngenyi? Ngokuti paakapangihwa aazivi kueja kujiinikira. Kusiyapo zvondhozvo, wakaashira mbhangiro yaainga akapuwa no kukhombija kuti wainga akhauyadi ngo zvaainga akaita. Inga muviyo, Jehovha wakamuregerera.—Nduyo 51:5, 6, 12-14.

¹³ Tingajija zviri zvese ngo muezaniso wa mambo Dhavhidhi ngo kujivhunjisa kudari: ‘Ngozvapi zvandinoita pandinopuwa mazano? Ndinokasika kutendera kuti ndashaisha kana ndinoeja kujiinikira? Ndinokasika kupa ndava vamweni here? Ndinovangisira kuti nditame kuitazve zvishaishi zvondhozvo?’ Mungajiitavo muvhunjo jakafanana pamunonga muciverenga ngo pamusoro po vanarume no vanakaji vamweni vakagondeka vanonangwa mu Bhaibheri. Kunanga kuti ivona vakasonganavo no zvineso zvamuri kusonganari nazvo? Ngojapi mugariro jaushoni jovakakhombija? Pamunonga muciverenga ciitiko cimwe nga cimwe, jivhunjisenyi kudari: ‘Zvicinyi zvandingaita kuti ndivevo inga mushandiri uwu wakagondeka wa Jehovha?’

14. Tinobesereka kudini ngo kusotesesa muezaniso wo hama no hambzaji?

 ¹⁴ Itusu tingabeserekavo ngo kusotesesa zvinoitwa ngo hama no hambzaji jedu, azvinenyi dangani jiri majaha kana vasharuka. Inga muezaniso, munokwanisa kurangarira mundhu mu ungano mwenyu ari kucungirira zvineso zvakadari inga kuvangirijwa ngo vadoni vo kucikora kana vo kubasa, kuteverehwa pa mbhuri kana ano zvineso zvo uhomi? Munokwanisa kuvona mugariro jaushoni pa mundhu wondhowo jamungada kutevejera? Pamunosota mugariro javo jaushoni, mungajijira zviri zvese kuti mukwanise kucungirira zvineso zvamuri kusonganari nazvo. Tinobonga maningi ngokuti hama no hambzaji iji jiri kukhombija muezaniso waushoni wo rutendo.—Vahebheru 13:7; Jakobo 1:2, 3.

15. Ngoyapi mbhangiro yakapa mupostori Pauro, ingatibesera kuti tienderere mberi tecishandira Jehovha takadakara?

¹⁵ Kuti timusijire runyararo no rubatano mu ungano, umwe nga umwe wedu anodikana kuita zvese zvaanokwanisa kuti ungano irambe yakadaro. Vonanyi muezaniso wo Makristu o muzana ro kutanga. Ivona vainga no zvipo pomwe no mabasa akasiyana-siyana. (1 Vakorinte 12:4, 7-11) Asi izvi azvizivi kuita kuti ivona vagume pa kuphikizana kana kuparajana. Pauro wakangwaja umwe nga umwe wavo kuti vaidikana kuita zvaidiwa kuti ‘vavake muviri wa Kristu.’ Pauro wakatara kudari kuno Vaefeso: “Cihwa cimwe na cimwe pacinoshanda ushoni, zvinobesera kukura ko muviri, paunonga wecijivaka mu rudo.” (Vaefeso 4:1-3, 11, 12, 16) Vese vanoita zvondhozvo, vanomusijira runyararo no rubatano, mugariro jatinokwanisa kuvona mu ungano jedu nyamasi uno.

16. Munodikana kutema civaringo co kuitenyi? (Vahebheru 6:10)

¹⁶ Temanyi civaringo co kutama kuda kujiezanisa no vamweni. Jijanyi ngo muezaniso wa Jesu no kutevejera mugariro jake. Beserekanyi ngo muezaniso jatinowana mu Bhaibheri no jo hama no hambzaji jo mu njiku jedu jino jiri kukhombija rutendo. Pamunoenderera mberi muciita zvese zvamunokwanisa, thembanyi kuti Jehovha, “asipi mundhu acizivi kururama kuti akanganwe basa renyu.” (Verenganyi Vahebheru 6:10.) Endereranyi mberi mecidakara pa kushandira Jehovha, meciziva kuti iyena anodakara maningi ngo kuvona kuvangisira kwamuri kuita.