1. ¿Tlenon techyolpaktia?

 JEHOVÁ kineki nochipa matiyolpakikan. Biblia kijtoua ika akin noyekanaj ika iespíritu Jehová melak yolpakij (Gál. 5:22). Tejuamej melak tiyolpakij ijkuak titenojnotsaj niman ijkuak tikinpaleuiyaj tokniuan pampa tikmatij ika akin kitemakaj tlen kipiyaj melak yolpakij (Hech. 20:35).

2, 3. a) Ken kijtoua Gálatas 6:4, ¿tlenon uelis techpaleuis nochipa matiyolpakikan? b) ¿Tlenon tikitaskej ipan yejuin tlamachtijli?

² (Xpoua Gálatas 6:4). Apóstol Pablo otechijli itlaj tlen techpaleuis nochipa matiyolpakikan. Kachtopa, okijto ika melak tiyolpakiskej tla tikmakaj Jehová nochi tlen tiuelij. Niman yejuin itlaj tlen tinochimej noneki tikchiuaskej (Mat. 22:36-38). Ika ome, okijto ika xnoneki totlatlantoskej imiuan tokniuan. Jehová yotechmakak nochi tlen tikpiyaj, ika yejon, matiktlasojkamachilikan tla xtikualoj, tla yotechmachti noso tla itlaj ueli tikchiuaj. Niman tla tikitaj ika se tokniuj más ueli itlaj kichiua ipan ikalpan Jehová, matiyolpakikan pampa yejuin tokniuj nokojtilia kitekichiuilis Jehová niman pampa xnoueyimati ika tlen ueli kichiua. Kuakon,  matikitakan kenon uelis tikchiuaskej ken yejon tokniuan niman maka matikinnexikolitakan.

³ Ipan yejuin tlamachtijli tikitaskej kenon uelis tiyolpakiskej maski xmás ueli tiktekichiuiliaj Jehová ken tiknekiskiaj. Noijki tikitaskej kenon uelis más kuajli tiktekichiuiliskej Jehová niman kenon uelis tikchiuaskej ken oksekimej itekipanojkauan Jehová.

4. ¿Tlenon ueliskia techyolkokos? Xkijto tlen ipan onochiuj Carol.

⁴ Sekimej tokniuan akin kualoj niman iueuentsitsintin noyolkokouaj pampa kinemiliaj ika xkuajli kitekichiuilijtokej Jehová. Matikitakan tlen ipan onochiuj tokniuj Carol. Yejua otlapaleuito kampa nonekij tenojnotskej. Okinmachti kanaj 35 tlaltikpakchanejkej niman okinpaleui sekimej manosentemakakan itech Jehová niman manoapolaktikan. ¡Melak kuajli tlen okichiuj! San ika, sakin okualok niman san ichan nemiya. Yejua kijtoua: “Nikmatstok ika xueli chikauak niktekichiuilia Jehová pampa nikualo. Ika yejon, melak ninoyolkokoua pampa niknemilia ika xnimelajkanemi ijkon ken oksekimej tokniuan. Nejua nikneki miyek nikchiuas, san ika, xniueli”. Melak kuajli tlen kichiua Carol pampa kineki chikauak kitekichiuilis Jehová. Kuajli tikmatstokej ika toTajtsin, akin melak teiknelia, kuelita tlen kichiua Carol.

5. a) ¿Tlenon noneki tikilnamikiskej tla toyolkokouaj pampa xueli tiktekichiuiliaj Jehová ken tejuamej tiknekiskiaj? b) Ken nesi ipan tlaixkopinaltin, ¿kenon yejuin tokniuj nochipa kitekichiuilia Jehová?

⁵ Tla kemantika toyolkokouaj pampa xueli tiktekichiuiliaj Jehová ijkon ken tejuamej tiknekiskiaj, matotlajtoltikan: “¿Tlenon kineki Jehová manikchiua?”. Yejua san kineki matikchiuakan nochi tlen tiuelij para tiktekichiuiliskej. Matikitakan tlenon ipan nochiua se tokniuj siuatl akin kipiya 80 xiuitl. Yejua noyolkokoua pampa xok ueli kitekichiuilia Jehová ken ijkuak kipiaya 40 xiuitl. Yejua kinemilia ika nochi tlen kichiua xkiyolpaktia Jehová. San ika, yejon xmelauak pampa yejuin toknitsin desde ijkuak kipiaya 40 xiuitl chikauak kuajtekichiuilijtiuj Jehová niman aman ika ikipiya 80 xiuitl ok ijkon kichiujtika. Nochi tlen yokichiuj yejuin tokniuj kiyolpaktia Jehová. Tla peua ijkon tomachiliaj, matikilnamikikan ika Jehová yejua akin kitlapejpenia tlenon kiyolpaktia. Tla tokojtiliaj chikauak tiktekichiuiliskej Jehová, yejua techijlis: “¡Sanoyej kuajli! Tejua tikuajli tekitketl” (noijki xkita Mateo 25:20-23).

6. ¿Tlenon techititia tlen okichiuj María?

⁶ Melak tiyolpakiskej tla san titlanemiliaj itech tlen kema uelis tikchiuaskej. Matitlajtokan itech tokniuj María. Yejua xueli tenojnotsa ken kinekiskia pampa kualo. Yejua noyolkokouaya niman kinemiliaya ika xok ueliskia tepaleuis. San ika, sakin okimat ika ipan itlanechikol nemiya okse tokniuj siuatl akin más kualouaya. María kijtoua: “Niaya ichan niman iuan nitenojnotsaya ika teléfono niman carta. Nochipa ijkuak niuajnokuepaya nochan melak niyolpakiya pampa onikpaleui yejon tokniuj”. Tejuamej noijki uelis tiyolpakiskej tla tikchiuaj nochi tlen tiuelij. San ika ¿tlenon uelis tikchiuaskej tla tikitaj ika tejuamej kema uelis miyek tikchiuaskej ipan ikalpan toTajtsin?

7. ¿Tlenon okijto apóstol Pedro?

⁷ Ipan kachtopa carta tlen okijkuilo apóstol  Pedro, okimijli tokniuan makichiuakan nochi tlen noneki para kinyolchikauaskej oksekimej. Yejua okijkuilo: “Kuajli xtekitiltikan on tlen Dios omechmakak para nenkimpaleuiskej oksekimej” (1 Ped. 4:10). Maka matiknemilikan ika oksekimej technexikolitaskej tla tikchiuaj nochi tlen tiuelij ipan ikalpan Jehová. Tla ijkon titlanemiliskiaj, xok kuajli tiktekichiuilijtoskiaj Jehová.

8. Ken kijtoua 1 Corintios 4:6, 7, ¿tleka xnoneki toueyimatiskej?

⁸ Tla itlaj tiueltokej tikchiuaj, matotlajpiyakan para maka toueyimatiskej (xpoua 1 Corintios 4:6, 7). Kanaj tejua nimantsin tikinnextia akin tikinmachtia. ¡Yejon melak kuajli! San ika, xmotlajpiya para maka timoueyimatis. Xkonnemili ika ijkuak otitenojnots opeuj tikmachtia yakaj niman sa tiknektika tikimijlis tokniuan kenon opeuj titemachtia. San ika, ijkuak otimosentlali imiuan tokniuan tikaki ika se tokniuj melak yolpaki pampa ouel okitekauili se revista. Yejua okitekauili se revista niman tejua opeuj titemachtia. ¿Tlenon tikchiuas? Tejua tikmatstok ika tlen tikijtos melak kinyolchikauas tokniuan. San ika, xtlaj otikijto pampa xotiknek tikyolkokos tokniuj. ¡Melak kuajli tlen otikchiuj! Maka xkajkaua ika titemachtia. Xchiua nochi tlen tejua tiueli.

9. ¿Tlenon noneki tikchiuaskej?

⁹ Matikilnamikikan ika Jehová techpaleuiya matikchiuakan nochi tlen ueli tikchiuaj. Kuakon, matiteyolchikauakan niman maka matoueyimatikan (Filip. 2:3). Ijkuak tijkuij tokojtilis niman nochi tlen ueli tikchiuaj para tiktekichiuiliskej Jehová, melak tiyolpakij pampa tikueyichiujtokej Jehová. San ika, maka matoueyimatikan nion matikinyolkokokan oksekimej pampa tla ijkon tikchiuaj xok tiyolpakiskej.

10. ¿Tleka xkuajli tla san tikitaj tlen ueli tikchiuaj niman tlen oksekimej xueli kichiuaj?

¹⁰ Tla xtotlajpiyaj, uelis san tikitstoskej tlen tejuamej ueli tikchiuaj niman tlen oksekimej xueli kichiuaj. Matikonnemilikan ika se tokniuj melak ueli kinpanoltia itlamachtiluan niman hasta kinemilia ika yejua más ueltok xijkon ken okse tokniuj akin xmás ueli kinpanoltia itlamachtiluan. San ika, tokniuj akin xmás ueli kinpanoltia itlamachtiluan kanaj kuajli teselia ichan, kuajli kimiskaltia ikoneuan niman melak kuajli tenojnotsa. Matiktlasojkamachilikan Jehová ika ipan ikalpan nemij tokniuan tlakamej  niman siuamej akin kichiuaj nochi tlen uelij para kitekichiuiliskej.

11. ¿Tleka noneki tokojtiliskej tikchiuaskej ken Jesús?

¹¹ Melak miyek tlen tiuelij ijkuak tikitaj tlen kichiuaj oksekimej itekipanojkauan Jehová. Matontlanemilikan itech Jesús. Maski tejuamej titlajtlakolejkej uelis tikchiuaskej ijkon ken yejua okichiuj (1 Ped. 2:21). Tla tokojtiliaj tikchiuaskej ken Jesús, melak kuajli tiktekichiuiliskej Jehová niman kuajli titenojnotsaskej.

12, 13. ¿Tlenon techmachtia tlen okichiuj tekiuaj David?

¹² Biblia kinteneua miyekej tlakamej niman siuamej akin okichiujkej tlen kuajli maski tlajtlakolejkej katka. Ika yejon, tla tikitaj tlen yejuamej okichiujkej, melak techpaleuis (Heb. 6:12). Matitlanemilikan itech tekiuaj David. Jehová okijto: “Nejua nikixmati [...] sen tlakatl yejuan sanoyej nechpaktia niman kichiuas nochi tlen nikneki” (Hech. 13:22). Matikilnamikikan ika David melak otlajtlako, maski ijkon, miyek tlen techmachtia. ¿Tleka? Pampa okinokauili makimelajkatlalikan niman onoyolkuep ika nochi iyojlo. Ika yejon, Jehová okitlapopolui (Sal. 51:3, 4, 10-12).

¹³ Tla tiknekij matechpaleui tlen okichiuj David, matotlajtoltikan: “¿Tlenon nikchiua ijkuak nechmelajkatlaliaj? ¿Niknokuitia tlen onikchiuj? ¿Noso ika okse tlemach ninotlajtlamiya? ¿Nimantsin nitetlajtlakoltia? ¿Ninokojtilia xok ijkon nikchiuas?”. Noijki ijkon uelis totlajtoltiskej ijkuak tomachtiskej itech oksekimej itekipanojkauan Jehová akin noteneuaj ipan Biblia. ¿Noijki okixnamijkej tlen nejua nikixnamiktika? ¿Tlenon okichiujkej? Niman ¿kenon uelis nikchiuas ken yejuin itekipanojkauj Jehová?

14. ¿Kenon techpaleuiya ijkuak tikitaj tlen kichiuaj oksekimej tokniuan?

¹⁴ Noijki, matikitakan kenon uelis tikchiuaskej ken tokniuan telpokamej niman ichpokamej noso akin iuejueyimej akin nemij ipan totlanechikol. Matikitakan tlenon kichiuaj tokniuan telpokamej niman ichpokamej akin tlaxikojtokej ipan escuela, noso tlenon kichiuaj tokniuan akin kintlaueltokaj inchanejkauan noso akin kualoj. Sakin matotlajtoltikan: “¿Kichiua itlaj tlen nejua noijki noneki nikchiuas?”. Tla tikitaj tlenon kinpaleuiya tokniuan, itikmatstoskej tlenon  tikchiuaskej ijkuak tejuamej tikixnamikiskej tlen ouijtika. Sajnoye tiktlasojkamatij tlen kichiuaj yejuin tokniuan. Nochi yejuin kichiua melak matiyolpakikan (Heb. 13:7; Sant. 1:2, 3).

15. ¿Tlenon okijto apóstol Pablo tlen techpaleuiya ika toyojlo matiktekichiuilikan Jehová?

¹⁵ ¿Tlenon panos tla tinochimej tikchiuaj tlen tiuelij para tiktekichiuiliskej Jehová? Tokniuan nemiskej ika inyojlo niman san sekan nemiskej ipan tlanechikojli. Yejon tlen okichiujkej tokniuan akin onenkej ipan kachtopa siglo. Yejuamej ueliyaj miyek kichiuayaj ipan ikalpan Jehová (1 Cor. 12:4, 7-11). Maski ijkon, yejuamej xnonekiya notlatlaniskej noso kixeloskej tlanechikojli. Pablo okimijli tokniuan akin chantiyaj Éfeso manokojtilikan san sekan makitekichiuilikan Jehová. Pablo okijto: “Ijkuak cada parte itlalnakayo Cristo kuajli tekiti, nochi kuajli noskaltia niman chikajtiu ikan tetlajsojtlalistli” (Efes. 4:1-3, 11, 12, 16). Tokniuan akin okichiujkej tlen Pablo okimijli xnotlauelitayaj niman san sekan nemiyaj. Niman aman noijki ijkon panoua ipan tlanechikojli.

16. ¿Tlenon noneki tikchiuas? (Hebreos 6:10).

¹⁶ Kuakon, maka xmotlatlani imiuan oksekimej. Xmokojtili xchiua ken Jesús niman ken itekipanojkauan Jehová akin yeuejkaui onenkej niman akin aman nemij. Nochipa xmokojtili kuajli xtekichiuili Jehová niman xkilnamiki ika yejua xkilkauas nochi tlen tejua tikchiua (xpoua Hebreos 6:10). Ika nochi moyojlo xtekichiuili Jehová niman kuajli xmatsto ika yejua kitlasojkamatij tlen tejua tikchiua.