1. Kansi n’chinji chingatipase chisangalalo ngacho-ngacho?

 YEHOVA ofuna kuti tikonkhala osangalala. Ndipo tuziŵa vamene ivi, chifukwa chakuti chisangalalo chupanga mbali ya vitwazi va mzimu wake utuŵa. (Aga. 5:22) Sewo tuziŵa kuti kupasa kuleta chisangalalo chikulu kupambana kulondela, n’chifukwa chake tunkhala osangalala keno tuchita vonse vatingakwanishe mu utumiki komasoti poyavya abale ŵasu.—Mac. 20:35.

2-3. (a) Mokatijana na Agalatiya 6:4, kansi ni vinthu viŵili votyani vingatiyavye kupitilija kunkhala osangalala potumikila Yehova? (b) Kansi tikambilane chinji mu nkhani ino?

² Ntumwi Paulo enena kuti pali vinthu viŵili vamene vingatiyavye kupitilija kunkhala osangalala. (Ŵelengani Agalatiya 6:4.) Chinthu choyamba, ni kunkhala na cholinga chochita vonse vatingakwanishe potumikila Yehova. Keno sewo tuchita vonse vatingakwanishe tingankhale osangalala. (Mt. 22:36-38) Ndipo chachiŵili, ni kusalilinganija na ayakine. Tufunika kumutembeja Yehova pali vala vatingakwanishe kuchita, viliyekanthu na mwailili thanzi yasu, vinthu vatuziŵa olo luso iyakine yatili nayo. Ndipo olo vinthu vonse vatili navo, ni mphaso zechitipasa Yehova. Tetyo, keno ŵanthu ayakine ali na luso iyakine yolalikila kupambana sewo, tufunika kunkhala osangalala kuti ove okatishila ntchito mphaso yawo kuti atamande Yehova, osati pofuna kuliwoneshela. Tetyo, mmalo mopikishana nawo, tufunika kuphunzilapo kanthu pa mwakuchitila vinthu.

³ Mu nkhani ino, tikambilane vatingachite keno nise okhumudwa chifukwa chakuti tingakwanishelini kuchita vonse vetenzefuna potumikila Yehova. Tiwonesoti mwatingakatishilile ntchito mphaso iliyonse yechitipasa pomutumikila komasoti mwavingatiyavyile visanzo va ŵanthu ayakine.

4. Kansi n’chinji chingachitishe ayakine a sewo kunkhala okhumudwa? Pelekani chisanzo.

⁴ Kuli ayakine a sewo vingankhale vovuta kuvomekeja kuti tingakwanishelini kuchita vetenzefuna potumikila Yehova chifukwa cha nsinkhu olo thanzi. Vamene ivi niye vichitikila Carol. Pa nthawe iyakine, yove enkhala na mwayi wotumikila ku dela kwenzefunikila ofalisa anyinji. Pa nthawe yamene iyi, yove enze na mwayi wochitisha maphunzilo a Baibolo okwana 35 komasoti kuyavya ŵanthu anyinji kupita pasogolo kuti alipeleke kwa Yehova nobatiziwa. Carol echita vinyinji potumikila Yehova! Koma pavuli pake, yove elwala ngako ndipo enzekwanishalini kufuma pang’anda kanyinji-kanyinji. Yove enena kuti: “Newo nuziŵa kuti chifukwa cha mavuto a thanzi yangu, ningakwanishelini kuchita vinyinji monga mwakuchitila ayakine, koma olo n’tetyo, nuwona kuti ninelini wokhulupilika ngako monga mwalili ayakine. Ningakwanishelini kuchita chilichonse chanufuna, ndipo vamene ivi vunikhumudwisa.” Carol ofunishisha kuchita vonse vangakwanishe potumikila Yehova. Kulaŵila chendi, vamene ivi ni vokondwelesha ngako! Ndipo tukaikilalini kuti Yehova owona vonse vakukwanisha kuchita Carol pomutumikila kunkhala vofunika ngako.

5. (a) Keno takhumudwa chifukwa cha vinthu vatingalekekwanisha, kansi tufunika kukumbukila chinji? (b) Monga mwatuwonela pali ivi vithunzi, kansi m’bale opitilija tyani kuchita vonse vangakwanishe potumikila Yehova pa moyo wake?

⁵ Keno mwewo namwe nthawe ziyakine mufoka chifukwa chakuti mungakwanishelini kuchita vemwenzefuna, mukolikonsha kuti, ‘Kansi Yehova ofuna kuti newo nikochita chinji?’ Yehova ofuna kuti mwewo mukochita vonse vamungakwanishe—mokatijana na mwavilili vinthu pa moyo wanu. Ganizilani chochitika ichi: Mulongo wa vyaka 80 okhumudwa chifukwa chakuti angakwanishelini kuchita vinyinji mu utumiki, monga ni mwenzechitila penze na vyaka 40. Ndipo olo yove ochita vangakwanishe, owona kuti Yehova okondwelalini naye. Koma kansi vamene ivi n’vachendi? Ganizilani ivi. Keno mulongo wamene uyo echita vonse vangakwanishe penze na vyaka 40, ndipo opitilija kuchita vonse vangakwanishe ali na vyaka 80, niyekuti aliyeleke olo patontho kuchita vonse vangakwanishe potumikila Yehova. Tikayamba kulimvwa kuti vatuchita potumikila Yehova n’vosakwanila, tufunika kukumbukila kuti Yehova niye osankha kuvomeleja vakuwona kuti vumukondwelesha olo yayi. Keno tuchita vonse vatingakwanishe, tingankhale osimikijila kuti Yehova asangalale nase notiuja kuti: “Wachita bwino ngako!”—Yelekezelani na Mateyu 25:20-23.

6. Kansi tingaphunzile chinji kufumila pa chisanzo cha Maria?

⁶ Vingankhale vosavuta kuti tikonkhala osangalala keno tuganizila ngako pa vinthu vatingakwanishe kuchita osati vatingalekekwanisha. Ganizilani chisanzo cha mulongo muyakine zina yake Maria, wamene ali na matenda amene omukangisha kuchita vinyinji mu utumiki. Poyamba, yove enzevutika maganizo ndipo enzeliwona kunkhala wosafunika. Koma pavuli pake, yove eganizila za mulongo muyakine mumpingo mwawo, wamene enzenkhala yone chifukwa cha matenda ndipo Maria eganiza zakuti amuyavye. Maria enena kuti: “Newo nichita makonzedwe akuti nikolalikila naye kupitila pa foni komasoti kupitila m’makalata. Nthawe iliyonse yanalalikila naye pamozi, nenzejokela kung’anda nili wosangalala ngako komasoti nili wokhutila powona kuti nakwanisha kumuyavya mulongo wamene uyo.” Sewo nase tingankhale osangalala ngako keno tuganizila vinthu vatingakwanishe kuchita osati vatingalekekwanisha. Lomba tyani keno mwewo mungakwanishe kuchita vinyinji, olo keno muli na luso iyakine yamene mungaikatishile ntchito potumikila Yehova?

7. Kansi ntumwi Petulo epeleka malangizo otyani othandiza kuli Akhilisitu?

⁷ Mu kalata yake yoyamba, Petulo elimbikisa abale kuti akatishile ntchito mphaso zawo na  maluso ŵawo kuti alimbikise ayakine. Petulo elemba kuti: “Molingana na mphaso yawalondela aliyense, ikatishileni ntchito potumikilana monga oyanganila aweme amene alondela kuwama ntima kukulu kwa Mulungu.” (1 Pet. 4:10) Tufunikalini kuleka kukatishila ntchito mphaso zasu na maluso ŵasu mokwanila, poyopa kuti ayakine angatichitile djalasi olo kukhumudwa nase. Keno tuchita tetyo, tingankhalelini kuti tuchita vonse vatingakwanishe potumikila Yehova.

8. Mokatijana na 1 Akorinto 4:6, 7, ndaŵa yanji tufunikalini kulitamandila chifukwa cha mphaso zatili nazo?

⁸ N’chendi kuti tufunika kukatishila ntchito mphaso zasu na maluso ŵasu potumikila Yehova, koma tufunika kunkhala osamala kuti osati tiyambe kulikuja chifukwa cha maluso ŵasu. (Ŵelengani 1 Akorinto 4:6, 7.) Mwachisanzo, payakine mwewo muli na luso yoyambisha maphunzilo a Baibolo. Ndipo kulaŵila chendi, mufunika kuikatishila ntchito mphaso yamene iyo! Koma kukatishila ntchito mphaso zamene izo n’kosiyana na kulitamandila. Tiyelekezele kuti vinthu vakuyendelani bwino ngako mu utumiki ndipo mwayambisha phunzilo ya Baibolo. Ndipo mufunishisha kufotokozelako abale na alongo a m’kagulu kanu ka utumiki. Ndipo pavuli pakuti mwakumana nawo, mulongo muyakine ofotokoza vamuchitikila mu utumiki ndipo ni wosangalala chifukwa chakuti wakwanisha kuyaŵila magazini. Yove wayaŵila magazini; koma mwewo mwayambisha phunzilo. Kansi pamene apa mungachite tyani? Mwewo muziŵa kuti abale na alongo a m’kagulu kanu, angalimbikisiwe ngako kuziŵa kuti mwayambisha phunzilo ya Baibolo. Koma mungasankhe kuyembekezela na kuzaŵafotokozela nkhani yamene iyi nthawe iyakine, kuyopela kuti wala mulongo wamene wayaŵila tyala magazini angaleke kusangalala poganiza kuti paliye chawachita. Kwamene uku kungankhale kuwama ntima. Koma mufunikalini kuleka kuyambisha maphunzilo a Baibolo chifukwa cha vamene ivi. Yamene iyi ni mphaso yamuli nayo—tetyo, ikatishileni ntchito!

9. Kansi tufunika kuzikatishila ntchito tyani mphaso zatili nazo?

⁹ Tufunika kukumbukila kuti maluso ŵatili nawo ni mphaso zofumila kwa Mulungu. N’chifukwa chake tufunika kukatishila ntchito mphaso zamene izo kuti tilimbikise abale na alongo, osati kuliwoneshela chifukwa cha mphaso zamene izo. (Afil. 2:3) Keno tukatishila ntchito mphamvu zasu na maluso ŵasu kuti titumikile Yehova, tinkhale na vifukwa vosangalalila—osati chifukwa chakuti tuliwona kunkhala ofunika kupambana ayasu, koma chifukwa chakuti tukatishila ntchito mphaso zasu kuti titamande Yehova.

10. Ndaŵa yanji n’chinthulini chiweme kulilinganija na ŵanthu ayakine?

¹⁰ Keno munthu angaleke kunkhala wosamala, angayambe kulinganija vinthu vakuchita bwino na vinthu vasachita bwino ayake. Mwachisanzo,  payakine m’bale angankhale waluso polaŵila nkhani za onse. Yamene iyi ni mbali yakuchita bwino. Koma payakine muntima mwake, yove angoweluza m’bale muyakine wamene ovutika kulaŵila nkhani za onse. Koma olo kuti m’bale wamene uyo olaŵilalini luweme nkhani za onse, payakine angankhale kuti ochita bwino pa nkhani yotandaja alwendo, ophunzisa luweme ŵana ŵake olo angankhale wakhama mu utumiki. Tutembeja ngako kuti tili na abale na alongo anyinji aluso amene okatishila ntchito mphaso zawo potumikila Yehova komasoti kuyavya ayakine!

11. Ndaŵa yanji tufunika kukonkheja chisanzo cha Yesu?

¹¹ N’chendi kuti tufunikalini kulilinganija na ŵanthu ayakine, koma tingaphunzile vinyinji kufumila pa visanzo va abale ŵasu. Ndipo chisanzo chiweme ngako ni Yesu. N’chendi kuti niselini angwilo monga mwenzele Yesu, koma tingaphunzile vinyinji kufumila pa minkhaliwe yake iweme na vinthu vodabwisa vechichita yove. (1 Pet. 2:21) Keno tukonkheja chisanzo cha Yesu mulimonse mwatingakwanishile, tunkhala Akhilisitu aweme ndipo tuyangijila luso yasu mu utumiki.

12-13. Kansi tingaphunzile chinji kufumila pa chisanzo cha Mfumu Davide?

¹² M’Baibolo tufwanamo visanzo vinyinji vatingakonkheje va analume komasoti anakazi okhulupilika. (Ahe. 6:12) Ganizilani chisanzo cha Mfumu Davide, wamene Yehova emutomola kuti “munthu wapantima pangu” olo mokatijana na mwayufotokozela Baibolo iyakine kuti, “munthu wamene onikondwelesha ngako.” (Mac. 13:22) Koma Davide enzelini wangwilo ndipo echita machimo ayakine akulu-akulu. Olo n’tetyo, yove ni chisanzo chiweme kuli sewo. Ndaŵa yanji? Ndaŵa yakuti penzepasiwa malangizo enzeyejalini kufwana vifukwa volikhululukila. Mmalomwake, yove enzevomela malangizo amphamvu ŵenzepasiwa ndipo elapa kufumila pansi pantima pa vinthu vechichita. Monga vokonkhapo vake, Yehova emukhululukila.—Sal. 51:3, 4, 10-12.

¹³ Tingaphunzilepo kanthu pa chisanzo cha Davide polikonsha kuti: ‘Kansi nuchita tyani nikapasiwa malangizo? Kansi nuvomeleja vophoniya vangu mokulumija olo nuyeja kufwana vifukwa volikhululukila? Kansi nukulumija kuimba mulandu ŵanthu ayakine? Kansi nuyeja-yeja kuti osati niwelejesoti vophoniya vangu?’ Mungalikonshe makonsho olingana na amene aŵa keno muŵelenga nkhani ziyakine za analume na anakazi okhulupilika otomolewa m’Baibolo. Kansi ove ekumana na mavuto olingana na ŵamukumana nawo mwewo? Kansi ewonesha minkhalidwe yotyani iweme? Pa nkhani iliyonse yamwaŵelenga mukolikonsha kuti: ‘Kansi ningamukonkheje tyani ntumiki wokhulupilika wamene uyu wa Yehova?’

14. Kansi tingaphunzile chinji kufumila kuli abale na alongo a mumpingo mwasu?

 ¹⁴ Tingaphunzilesoti vinyinji kufumila kuli abale na alongo mumpingo, keno ni achilumbwana olo achikulile. Mwachisanzo, ganizilani za Mkhilisitu muyakine mumpingo mwanu wamene okumana na chiyeso—payakine yove otamanishiwa na ayake ku sikulu, oshushiwa na achibale ŵake olo payakine olimbana na vuto iyakine ya thanzi. Kansi ni minkhalidwe yotyani yakuwonesha Mkhilisitu wamene uyo yamungakonde kuikonkheja? Kuganizila chisanzo chake chiweme kungakuyavyeni kuziŵa vamungachite kuti mupilile mayeselo ŵamukumana nawo. Tutembeja ngakosoti komasoti tusangalala kuti tili na abale na alongo okhulupilika—amene tingatolele chisanzo chawo!—Ahe. 13:7; Yak. 1:2, 3.

15. Kansi Paulo epeleka malangizo otyani amene angatiyavye kupitilija kunkhala osangalala potumikila Yehova?

¹⁵ Aliyense wa sewo ofunika kuchita vonse vangakwanishe kuti akulishe ntendele na mgwilizano mumpingo. Ganizilani chisanzo cha Akhilisitu oyambilila. Ove enze na mphaso komasoti mautumiki osiyana-siyana. (1 Akor. 12:4, 7-11) Koma vamene ivi, viliyeŵachitishe kuti akopikishana noyambisha magaŵano. Mmalomwake, Paulo elimbikisa aliyense mumpingo kuchita vinthu vamene sembe viyavya kuti “amange muŵili wa Khilisitu.” Yove elembela Akhilisitu aku Efeso kuti: “Muŵili wonse ukula polimanga weka mwachikondi, . . . mokatijana na ntchito yoyenelela ya chizo chilichonse.” (Aef. 4:1-3, 11, 12, 16) Akhilisitu amene ekonkheja malangizo a Paulo, eyavya kuti mumpingo munkhale ntendele komasoti mgwilizano—ndipo Akhilisitu achendi ochitasoti chimozi-mozi masiku ŵano.

16. Kansi mufunika kusimikijila kuchita chinji? (Aheberi 6:10)

¹⁶ Osati mukolilinganija na ŵanthu ayakine. Mmalomwake, mukoyeja-yeja kukonkheja chisanzo cha Yesu na visanzo va Akhilisitu ayakine okhulupilika, a masiku ŵano komasoti a m’nthawe zakuvuli. Mukochita vonse vamungakwanishe, ndipo mukonkhala osimikijila kuti Yehova “sikuti ni wosalungama kuti angaluŵe ntchito yanu.” (Ŵelengani Aheberi 6:10.) Pitilijani kunkhala osangalala potumikila Yehova, poziŵa kuti mukondwelesha ntima wake keno muchita vonse vamungakwanishe pomutumikila.