1. Ke’ng seo se re thabišago kudu?

 JEHOFA o nyaka gore re dule re thabile. Re a tseba gore lethabo ke seka se sengwe seo se enywago ke moya wa gagwe o mokgethwa. (Bagal. 5:22) Re thaba kudu ge re šoma ka thata tšhemong le go thuša bana babo rena le dikgaetšedi ka ditsela tšeo di fapafapanego ka gobane go na le lethabo le legolo go neeng go feta go amogeleng.—Dit. 20:35.

2-3. (a) Go ya ka Bagalatia 6:4, ke dilo dife tše pedi tšeo di ka re thušago go dula re thabile ge re hlankela Jehofa? (b) Re tlo boledišana ka’ng sehlogong se?

² Go Bagalatia 6:4, moapostola Paulo o bolela ka dilo tše pedi tšeo di ka re thušago go dula re thabile. (Bala.) Sa pele ke gore, re swanetše go hlankela Jehofa ka dipelo tša rena ka moka. Ge e ba re ka dira bjalo, re tlo dula re thabile. (Mat. 22:36-38) Sa bobedi, ga se ra swanela go ipapetša le batho ba bangwe. Go sa šetšwe gore re phetše gabotse, re tlwaeditšwe goba re na le bokgoni, re swanetše go leboga Jehofa. Dilo tšeo re nago le tšona ka moka di tšwa go yena. Ka lehlakoreng le lengwe, ge e ba batho ba bangwe ba kgona go šoma tšhemo go re feta, re swanetše go thaba le bona ka gobane ba diriša bokgoni bja bona go hlankela Jehofa e sego go ikgantšha. Go e na le gore re phadišane le bona, re swanetše re ithute go bona.

³ Sehlogong se, re tlo bona gore ke eng seo se ka re thušago ge ikwa re nyamile ka ge re palelwa ke go dira seo re dumago go se dira tirelong ya rena. Re tlo ithuta le gore re ka diriša  bjang dimpho tšeo re nago le tšona. Le gona re ka ithuta eng mehlaleng ya ba bangwe.

4. Ke eng seo se ka dirago gore ba bangwe ba ikwe ba nyamile? Nea mohlala.

⁴ Ba bangwe ba rena ga re sa kgona go hlankela Jehofa kamoo re nyakago ka gona ka lebaka la bolwetši goba botšofadi, e bile seo se ka re nyamiša. Seo se ile sa diragalela Carol. O be a hlankela mo go nago le tlhokagalo ya bagoeledi. Ka nako yeo, o be a na le dithuto tša Beibele tše 35 e bile o ile a thuša ba bantši gore ba ineele le go kolobetšwa. Carol o be a thabela tšhemo. O ile a thoma go babja gomme a swanela ke go fetša nako e ntši a dutše ka gae. Carol o re: “Ka lebaka la bolwetši bja ka, ga ke sa kgona go dira dilo tšeo batho ba bangwe ba di dirago e bile ka dinako tše dingwe ke ikwa okare ga ke sa na mohola. Ga ke sa kgona go dira dilo go swana le peleng, e bile se se tloga se nnyamiša.” Carol o nyaka go dira sohle seo a ka se kgonago go hlankela Jehofa. Seo e tloga e le selo se sebotse kudu. Re ka kgodišega gore Modimo wa rena yo a nago le kwelobohloko o ikgantšha ka yena.

5. (a) Re swanetše go dira’ng ge re thoma go nyamišwa ke gore ga re sa kgona go dira dilo tšeo re bego re tlwaetše go di dira? (b) Ngwanabo rena wa mo seswantšhong o bontšha bjang gore o dula a dira sohle seo a ka se kgonago go hlankela Jehofa?

⁵ Ge e ba o nyamišwa ke gore ga o sa kgona go dira dilo ka tsela yeo o bego o tlwaetše ka yona, ipotšiše gore, ‘Jehofa o nyaka gore ke dire eng?’ Jehofa o nyaka gore o dire sohle seo o ka se kgonago gore o mo hlankele. Nagana ka boemo bjo. Kgaetšedi wa mengwaga e 80 o nyamišwa ke gore ga a sa kgona go ya tšhemong go swana le ge a be a na le mengwaga e 40. O nagana gore le ge a šoma ka thata, ga a kgahliše Jehofa. Na seo ke nnete? Nagana ka se. Ge e le gore kgaetšedi yo o šomile ka thata a na le mengwaga e 40 e bile le gona bjale o sa šoma ka thata a na le mengwaga e 80, seo se bontšha gore o hlankela Jehofa ka mafolofolo. Ge e ba re thoma go nagana okare tirelo ya rena go Jehofa ga ya lekana gore re ka mo kgotsofatša, re swanetše go ikgopotša gore Jehofa ke yena a tsebago seo se mo kgotsofatšago. Ge e ba o šoma ka thata go hlankela Jehofa, o tlo re go wena: “O dirile gabotse”.—Bapiša le Mateo 25:20-23.

6. Re ithuta’ng mohlaleng wa Maria?

⁶ Go tlo ba bonolo gore re kgone go thaba, ge e ba re ka dula re nagana ka seo re kgonago go se dira go e na le go nagana ka seo re sa kgonego go se dira. Nagana ka kgaetšedi Maria, yo a nago le bolwetši bjo bo mo šitišago go fetša nako e ntši a le tšhemong. Mathomong, o be a ikwa a nyamile e bile a se na mohola. O ile a nagana ka kgaetšedi yo mongwe ka phuthegong yo a be go a babja kudu, ke moka a thoma go mo thuša. Maria o re: “Ke ile ka dira ditokišetšo tša gore ke bolele ditaba tše dibotse le yena re diriša founo le go ngwala mangwalo. Ka mehla ge re be re fetša go šoma, ke be ke boa gae ke thabile e bile ke kgotsofetše ka gobane ke ile ka kgona go thuša kgaetšedi.” Le rena re ka oketša lethabo la rena ka go dira seo re kgonago go se dira go e na le go lebelela tšeo re ka se kgonego go di dira. Re ka dira’ng ge e ba re ka kgona go dira mo go oketšegilego gore re kgone go hlankela Jehofa?

7. Moapostola Petro o neile Bakriste keletšo efe e šomago?

⁷ Lengwalong la gagwe la mathomo moapostola Petro o ile a lemoša bana babo gore ba diriše dimpho tša bona le bokgoni bja bona gore ba kgothatše Bakristegotee le bona. Petro o ngwadile gore: “Go fihla bokgoleng  bjoo ka bjona yo mongwe le yo mongwe a amogetšego mpho, e dirišeng ge le hlankelana le le balaki ba babotse ba botho bjo bogolo bja Modimo.” (1 Pet. 4:10) Ga se ra swanela go tšhaba go diriša dimpho tša rena ka botlalo ka gobane re tšhaba gore batho ba tlo re jela mona goba ba nyama. Ge e ba re ka dira bjalo, re tla ba re sa šome ka thata go hlankela Jehofa.

8. Go ya ka 1 Bakorinthe 4:6, 7, ke ka baka la’ng re swanetše go phema go kgantšha dimpho tša rena?

⁸ Re swanetše go diriša dimpho tša rena ka botlalo, eupša re hlokomele gore re se ke ra ikgantšha. (Bala 1 Bakorinthe 4:6, 7.) Ka mohlala, o ka ba o kgona go thoma dithuto tša Beibele. O se ke wa tšhaba go diriša mpho yeo. Eupša gopola gore go bohlokwa gore re se ke ra ikgantšha ka seo re kgonago go se dira. A re re o sa tšwa goba le phihlelo ye e kgahlišago tšhemong, yeo e feleleditšego ka gore o thome thuto ya Beibele. O fela pelo ya go botša bao ba lego sehlopheng sa tšhemo seo o šomago le sona. Ge o fihla sehlopheng o hwetša kgaetšedi yo mongwe a ba botša gore yena o ile a kgona go sepediša makasine. Yena o sepedišitše makasine mola wena o ile wa kgona go thoma thuto. O be o tla dira eng? O a tseba gore sehlopha se tlo kgothatša ke phihlelo yeo, eupša o ka kgetha go ema gomme o tle o e bolele ka morago mola kgaetšedi a feditše gore a se ke a ikwa a se na mohola. Seo se tla ba se bontšha gore o naganela kgaetšedi yoo. Eupša seo ga se re gore o swanetše go kgaotša go thoma dithuto tša Beibele. O na le bokgoni, bo diriše.

9. Re swanetše go diriša bjang dimpho tšeo re nago le tšona?

⁹ Re swanetše go gopola gore bokgoni bjo re nago le bjona ke mpho e tšwago go Modimo. Re swanetše gore re diriše dimpho tšeo gore re age phuthego, go e na le go ikgantšha ka tšona. (Bafil. 2:3) Ge re diriša matla ao re nago le ona le bokgoni go dira seo Modimo a se nyakago re a thaba, e sego ka gobane re kgona go šoma go feta batho ba bangwe, eupša re diriša dimpho tšeo Jehofa a re neilego tšona gore re mo tumiše.

10. Ke ka baka la’ng go se bohlokwa gore re ipapetše le batho ba bangwe?

¹⁰ Ge e ba re sa hlokomele, motho a ka wela molabeng wa go bapetša seo a kgonago go se dira le seo motho yo mongwe a sa kgonego go se dira. Ka mohlala, ngwanabo rena a ka ba a na le bokgoni bja go nea dipolelo tša phatlalatša. Seo ke se a kgonago go se dira. Eupša a ka nagana gore o kaone go feta ngwanabo rena yo a sa kgonego go nea dipolelo gabotse. Ngwanabo rena yo a ka ba a na le bokgoni bja  go amogela baeng, go tlwaetša bana ba gagwe goba go šoma tšhemo ka mafolofolo. Re tloga re leboga gore re na le bana babo rena le dikgaetšedi bao ba nago le bokgoni gomme ba diriša dimpho tša bona go hlankela Jehofa le go thuša ba bangwe.

11. Ke ka baka la’ng re swanetše go ekiša mohlala wa Jesu?

¹¹ Le ge re swanetše go phema go ipapetša le batho ba bangwe, re ka ithuta dilo tše dintši go bahlanka ba Jehofa. Jesu o re beetše mohlala o mobotse wo re ka o ekišago. Le ge rena re se ra phethagala, re ka ithuta dilo tše dintši go dika tša gagwe tše dibotse le tseleng yeo a bego a dira dilo ka yona. (1 Pet. 2:21) Ge e ba re ka dira seo re ka se kgonago go ekiša mohlala wa Jesu, re tlo ba bahlanka ba bakaone ba Jehofa e bile ra kgona go šoma tšhemo ka mafolofolo.

12-13. Re ka ithuta’ng mohlaleng wa Kgoši Dafida?

¹² Ka Beibeleng go na le mehlala e mentši ya bahlanka ba Jehofa bao ba botegago bao re ka ekišago mehlala ya bona le ge ba be ba se ba phethagala. (Baheb. 6:12) Nagana ka Kgoši Dafida yo Jehofa a ilego a mmitšago gore ke “monna yo a kwanago le pelo ya ka,” phetolelo e nngwe ya Beibele e re, “monna wa go kgahla pelo ya ka.” (Dit. 13:22) Dafida o be a sa phethagala. Ge e le gabotse o ile a dira diphošo tše dikgolo. Eupša e tloga e le mohlala o mobotse. Ka baka la’ng? Ka gobane ge a be a newa keletšo ga se a ka a ikemelela. Go e na le moo, o ile a amogela keletšo yeo gomme a itshola go tšwa pelong ka baka la dilo tšeo a di dirilego. Ka gona Jehofa o ile a mo lebalela.—Ps. 51:3, 4, 10-12.

¹³ Re ka ithuta mohlaleng wa Dafida ka go ipotšiša gore: ‘Na ke arabela bjang ge ke newa keletšo? Na ke bona diphošo tšeo ke di dirilego, goba ke leka go ikemelela? Na ke kitimela go bea ba bangwe molato? Na ke leka ka thata gore ke se ke ka bušeletša diphošo tšeo ke di dirilego?’ O ka ipotšiša dipotšišo tša go swana le tše ge o dutše o bala ka bahlanka ba botegago ba Jehofa ka Beibeleng. Na ba ile ba lebeletšana le mathata a go swana le ao o nago le ona? Ke dika dife tše dibotse tšeo ba bego ba na le tšona? Ge o dutše o ithuta ka yo mongwe le yo mongwe wa bona, ipotšiše gore: ‘Nka dira bjang gore ke swane le mohlanka yo wa Jehofa yo a botegago?’

14. Re ka holwa bjang ke mehlala ya Bakristegotee le rena?

¹⁴ Re ka holwa le ke go ithuta ka mehlala ya Bakristegotee le rena, ba bagolo le ba banyenyane. Ka mohlala, na o ka nagana  ka Mokristegotee le wena ka phuthegong yo a kgotleletšego mathata, mohlomongwe kgateletšo ya dithaka, go ganetšwa ka gae, goba bolwetši? Na o bona ngwanabo rena yo a na le dika tšeo o ka di ekišago? Ge o ka ekiša mohlala wa gagwe o ka kgona go kgotlelela diteko tšeo o kopanago le tšona. Re leboga kudu go ba le bana babo rena le dikgaetšedi bao ba re beelago mohlala o mobotse.—Baheb. 13:7;Jak. 1:2, 3.

15. Ke keletšo efe yeo moapostola Paulo a ilego a e nea yeo e dirago gore re thabele go hlankela Jehofa?

¹⁵ Ka moka ga rena re swanetše go šoma ka thata go dira gore ka phuthegong go be le khutšo le botee. Nagana ka Bakriste ba mehleng ya pele. Ba be ba na le dikabelo le dimpho tša go se swane. (1 Bakor. 12:4, 7-11) Eupša seo ga se sa dira gore ba phadišane goba ba lwe. Go e na le moo Paulo o ile a ba kgothaletša gore ba šome ka thata “bakeng sa go aga mmele wa Kriste.” Paulo o ile a ngwalela Baefeso gore: “Ka ge setho se sengwe le se sengwe se kopantšwe gotee ka kwano le go dira gore di be le tirišano ka lelokololo le lengwe le le lengwe leo le neago se se nyakegago, mmele ka moka o a gola e le gore o ikage ka lerato.” (Baef. 4:1-3, 11, 12, 16) Bao ba ilego ba dira seo Paulo a se boletšego ba ile ba dira gore go be le khutšo le botee, e lego seo re se bonago ka diphuthegong tša gabo rena lehono.

16. Re swanetše go ikemišetša go dira’ng? (Baheberu 6:10)

¹⁶ O se ke wa ipapetša le batho ba bangwe. Go e na le moo, ithute ka dika tše dibotse tša Jesu gomme o leke go di ekiša. Ithute ka mehlala ya bahlanka ba Jehofa ba ka Beibeleng le ba gona bjale bao ba ilego ba bontšha tumelo. Ge o dutše o hlankela Jehofa ka matla a gago ka moka, o ka kgodišega gore “ga se yo a sa lokago moo a ka lebalago modiro wa [gago].” (Bala Baheberu 6:10.) Dula o thabile ge o hlankela Jehofa o tseba gore o tloga a thabela seo o mo direlago sona.