1. Re maka king gore re jabole ka ku tengteng?

 JEHOVA o nyaka gore re jabole. Tsotsone re di tšiba ka taba la gore go jabola ke seyengwa sa moya wage wa go hlawolega. (Magal. 5:22) Di re jabodisa ka matla mo re tšhela letsogo ga mmereko wa Sekreste wa go tšhomayela re boya re gelepa magageru ka tse dingwana ka taba la gore di jabodisa ka matla go neya ba bangwana dilo go phala mo bona ba neya rune.—Meber. 20:35.

2-3. (a) Magalata 6:4 yi re ke difeng dilo ka dipedi tso di ka re gelepang gore re dule re jabodiye mo re kene re berekela Jehova? (b) Re nyoko petapeta ka ying ga hlogotaba yowa?

² Ga Magalata 6:4, Pawulo wa lepostola o hlayye dilo ka dipedi tso di ka re gelepang gore re dule re jabodiye. (Bala.) Sa mathomo, di nyaka re tikemisela go makela Jehova so rune beng re se kgonang. Di nyaka re jabole mo nkare re mo neya tso rune re kgonang go di maka. (Mat. 22:36-38) Sa bobedi, re sa liketse le ka gonyana go titshwanisa le ba bangwana. Fote di nyaka re leboga Jehova ka tso re di segeleleng di sa yi ka gore re philegiye, re tšhutegiye go segela kaye kela king tso re kgonang go di maka. Phela dilo ka mokana ga tsona tso re nang natso re neyye ke yene. Ga taba yonone, mo nkare ba bangwana baa re phala mo ba maka tsa go yelana le mmereko wa go tšhomayela, di nyaka re jabodise ke gore ba berekisa tso ba nang natso gore ba thanake Jehova, a ba tinyakele tsa bona beng. So re ka se makang ke go tšhuta ga bona, mara re sa titshwanisi nabo.

³ Ga hlogotaba yowa, re nyoko tšhuta gore re ka maka byang mo re kwa nkare go na le tsa go re metela mafiti kela go re kgerela. Fote re nyoko petapeta ka gore se sengwana le se sengwana so re neyiwweng sona re ka se berekisa ka mokgo mang le gore re ka tšhuta ying ga mešupetso ya ba bangwana.

4. Motho a ka kgongwetsa ke seyemo sa mošaga mang? Re beyisele ša.

⁴ Le malata ya Jehova ma kena ke malwele kela go gongwana o kraya ba thomisa go kgalabyela kela go kgekolela, byalo ba bangwana ba kwa di thathafa ka matla go yamogela gore tse dingwana ba ka sa sa di kgona. Tsotsone di makegiye ga Carol. O yye a berekela mo go gayelang batšhomayedi. Ka nako yonone, ne a tšhutisa 35 ya batho Bhayibele a boya a gelepa ba bangwana gore ba šinye ba tineyele ba boye ba kolobetsiwe. Tšhomo ke mo yi mo natefela ka matla ga Carol! Mara bolwele bya fo re palakata, a gapeletsega go fo dula a le gaye. Carol o re: “Ke ya di tšiba gore ke ya lwala, fote ke ya di tšiba gore nka sa kgone go maka tso ba bangwana ba kgonang go di maka, mara ke kwa nkare a ke tshepege go tshwana nabo. Ke nabela stereka mara seyemo se ro gana, wa tšiba di ya baba.” Carol o nyaka go makela Jehova so a ka kgonang go se maka. Phela o nabela tsa gabutši wa tšiba! A re kamake gore Modimo wa rune wa go kwelana go baba o yi tseyela gedimo taba yone yage.

5. (a) King sa gore di nyaka re sa se lebale mo re kgongwetsa ke tsa go re kgerela? (b) Mo re lebelela ga dithombhe tsowa, mogageru yewa o karakariye ka mokgo mang gore a fo dula a makela Jehova so a ka se kgonang?

⁵ Mo nkare o fela o kgongwetsa ke taba ya gore go na le tsa go go kgerela, tiputsise gore, ‘Jehova o nyaka ying ho gaka?’ O nyaka gore o make so o ka se kgonang—soso wene o ka se kgonang ga seyemo so o leng ga sona gana byalo. Lebelela mošupetso ke wowa: Mogageru wa mosadi wa gore o na le gana hala ga 80 ya mengwaga, o kwa a kgongwela ka taba la gore aa sa kgona go maka tsa go tlala ga mmereko wa go tšhomayela, go fo tshwana le nakwela a sa na le gana hala ga 40 ya mengwaga. O kwa nkare Jehova aa jabole le mo yene a kene a tigoga a liketsa go mo jabodisa. Ayitsano wa resa? Lebelela taba yowa gabutši ša. Mo nkare mogageru yewa wa mosadi o yye a karakara ka matla gore a make so a ka se kgonang mo a sa na le gana hala ga 40 ya mengwaga, a boya a ya mahlong a kene a karakara gana byalo mo a šele a na le 80 ya mengwaga, di ra gore a sanka a lisetsa le ka gonyana go maka so a ka se kgonang. Mo di ka makega gore le rune re thomise go kwa nkare tso re di makelang Jehova a di ya yenela, di nyaka re sa lebale gore Jehova ke yene a tikgetelang gore o jabodisa king. Mo re maka tsa go segela mo rune re kgerang gona, Jehova o nyoko re: “O berekiye!”—Tshwanisa le Matewu 25:20-23.

6. Re ka tšhuta ying ga taba ya Maria?

⁶ Mo re ka tihlupa ka tso re kgonang go di maka re lisetsa go šekela ka matla ka tso di re šitang, re nyoko dula re jabodiye. O fo lebelela mošupetso wa mogageru wa mosadi ye ba reng ke Maria, wa gore o na le bolwele bya gore bo mo kgerela tso a ka di makang ga mmereko wa go tšhomayela. Mathomisong ne a kwa di mo kgahleletsiye ka matla a boya a kwa nkare aa thuši ka selo. Mara o yye a nagana go gelepa mogageru wa mosadi wa ka phutegong wa gore ke mo a dula a yetsele mpetong. Maria o re: “Ke yye ka kwana naye gore re tšhomayele ggoši re berekisa fowunu re boya re ngwala marifi. Ka moka nako mo re berekiye ggoši, ne ke kwa ke jabodiye ka matla mo ke sologa ke ya gaye, ke kgotsofatsiye ke gore ke gelepiye mogageru yewa wa mosadi.” Le rune re ka maka gore re nape re jabola ka matla ka gore re hlupege ka matla ka tso re kgonang go di maka ke mokane re lisetsa tso di re šitang. Byalo mo nkare go na le tso re napang re di kgona ka matla ga mmereko wa Jehova gee?

7. Petro wa lepostola o yye a yeletsa Makreste gore ma make ying?

⁷ Ga lengwalo la mathomo lo Petro wa lepostola a le ngwadiyeng, o yye a hlohletsela magagabo gore ma berekise tso ma neyiwweng tsona kela tso ma kgonang go di maka gore ma tiyise tumelo ya magagabo. Petro o ngwadiye gore: “Ye mongwana le ye mongwana a berekise so a neyiwweng sona go berekela ba bangwana ka mokgo  malata ya Modimo ma tshwaneleng go maka ka gona go šupetsa gore Modimo o re kwele go baba ka mekgwa ya go tlala.” (1 Pet. 4:10) Re sa tšhabe go berekisa tso re neyiwweng tsona re tshosa ke gore di ka maka gore ba bangwana ba re jelasele kela dya ba kgongwetsa. Mo re ka maka tsotsone, re nyoko ba re ngamelela Jehova tso re ka kgonang go di maka.

8. Makorente wa Mathomo 4:6, 7, yi re ke ntaba di nyaka re kganela kgole le go kganyisa tso re neyiwweng tsona?

⁸ Tsa gore re ro neyiwa di nyaka re di berekise gabutši mara o sa kraye re di kganyisa. (Bala 1 Makorente 4:6, 7.) Mo re beyisa, o ka kraya di sa hlupi gago go thomisa go tšhuta Bhayibele le motho. Byalo, di sa go tšebisi mo di nyaka o berekise so o neyiwweng sona! Mara go berekisa so o neyiwweng sona le go se kganyisa a di tshwane. Tla re fo re malobanyana howa mo o maka mmereko wa tšhomo, o gahlanne le motho ke mokane wa mmeyela ditaba gabutši, byalo motho yene o nyaka go thomisa go tšhuta Bhayibele. Gana byalo o kwa o jagele go botsa bo o berekang nabo tšhomo gore go makegiye ying. Mo le gahlana fote le mogoba wo o berekang nawo o kraya mogageru wa mosadi a kene a sa ba botsa gore o kgonne go neya motho makazine. Yene o neyye motho makazine, wene o thomisiye go tšhutisa motho Bhayibele. O nyoko maka ying ka nako yonone? Le mo o di tšiba gabutši gore tso o gahlanneng natso di ka jabodisa magageru ga mogoba wone, mara o ka fo kgeta gore tso tsago di tšwe di yemme, o sa make gore mogageru yewa wa mosadi wa gore o sipidisiye makazine a kwe nkare yene ke mo a tshwere ya go kgana. Phela o ko ba o šupetsa gore o kwelana go baba ka mokgonone. Mara o sa lisetsi go thomisa go tšhutisa batho Bhayibele. Akere go na le so o neyiwweng sona—se berekise!

9. Tso re neyiwweng tsona di nyaka re di berekisa ka mokgo mang?

⁹ Di nyaka re sa lebale gore se sengwana le se sengwana so re kgonang go se maka re ro se neya ke Modimo. Byalo, dilo tso re neyiwweng tsona di nyaka re di berekisele go tiyisa phutego, re sa makele gore batho ba thanake rune. (Mafil. 2:3) Mo re maka tso Modimo a di nyakang, re berekisa matšhika ya rune le tso re kgonang go di maka, re nyoko ro jabola ka matla—re nyoko ba re sa jabodisi ke gore re kawone go phala ba bangwana mara re nyoko jabodisa ke gore re berekisa tso re neyiwweng tsona gore re thanake Jehova.

10. Ke ntaba go tilekanisa le ba bangwana go se gabutši?

¹⁰ Mo re sa pasope, o ka kraya motho a goromela ga taba ya go lekanisa tso a di kgonang ka matla le tso di šitang ye mongwana. Mo re beyisa, mogageru a ka ba a teya a tshwarelele ga taba ya go beya dipolabolo tsa batho ka moka. Nnete wa di kgona. Mara o ka kraya ka ho pelong a mo tseyela fase ga mogageru wa gore ke ntshitshire gage go beya dipolabolo. Mara fote, o ka kraya yene mogageru  yewa wa gore o tshwara bothatha ga taba ya go beya dipolabolo a kwana natso tsa go yamogela divakaši, a tšhutisa bananyana bage gabutši kela a na le matšato ga mmereko wa go tšhomayela. Di re jabodisa ka matla go tšiba gore re na le magageru ya banna le ya basadi ya gore ma berekisa tso ma neyiwweng tsona gore ma thogo berekela Jehova le go gelepa ba bangwana!

11. Ke ntaba di nyaka re liketsa go kopisela ga Jeso?

¹¹ Di nyaka re kganela kgole le taba ya go titshwanisa le ba bangwana, mara di ka re berekela ka matla go tšhuta ga taba ya gore baa tshepega. Tla re beyiseneng ka Jeso. Ke mo a yenele, mara re ka tšhuta ga mekgwa yage ya go bafala le ka mokgo ne a maka dilo. (1 Pet. 2:21) Mo re ka maka so re ka se kgonang gore re kopisele gage ka matla, re nyoko ba malata ya gabutši ya Jehova fote mmereko wa go tšhomayela re ka sa wo kwi.

12-13. Re ka tšhuta ying ga Kgoši Dafita?

¹² Ga Lentsu la Modimo, re kraya mešupetso ya banna le basadi ba go tshepega ba gore re ka tšhuta tsa go tlala ga bona, le mo yi le gore le bona ne ba sa yenela ho mmeleng. (Maheb. 6:12) Tseya ka Kgoši Dafita, wa gore Jehova mo a bolabola ka yene o yitseri “ke monna wa gore pelo yaka yi kwana naye,” fote Bhayibele ye nngwana mo yi beya taba yo yi re, “ke mohlobo wa motho ye a njabodisang ka matla.” (Meber. 13:22) Mara Dafita ke mo a sa yenela. Gabutšibutši, ga tse dingwana o yye a kekemisa ka matla. Le mo go le ka mokgonone, ke mošupetso wa gabutši ga rune. Ke ntaba? Ka taba la gore nakwela ba mo wolola, a sanka a liketsa go wutama ka lehlokwa. Mara o yye a fo beyelela mo ba mo tšapola a kene a kwa go baba fote ne a tisola ka matla ka tso a di makiyeng. Tsotsone ke tsona di makiyeng gore Jehova a mo tshwarele.—Pis. 51:3, 4, 10-12.

¹³ Re ka tšhuta tsa go tlala ga Dafita mo re ka fo tiputsisa gore: ‘Nna ke titshwara byang mo ba ng’wolola? Ayitsano ke yakgoswa ke dumela gore ke kekemisiye kela ke liketsa go tshwana le hlapi ka meetšing? Ayitsano ke liketsa go sola ba bangwana, ke re ke makisiye ke bona? Ayitsano ke ro ganya dikobo gore ke sa sa boyelela tsetsela ke di kekemisiyeng?’ O ka tiputsisa diputsiso tsowa mo o kene o bala ka banna le basadi ba go tshepega ba ka ho Bhayibeleng. Ayitsano ba yye ba gahlana le dintshitshire tsa go tshwana le tso wene o gahlanang natso? Ke mekgwa yifeng ya gabutši yo ba šupetsiyeng gore ba nayo? Ga taba ye nngwana le ye nngwana, tiputsise gore: ‘Nka ma kopisela byang malata yawa ya go tshepega ya Jehova?’

14. Go tšhuta ga bo re rapelang nabo di nyoko re berekela ka mokgo mang?

¹⁴ Fote di ka re berekela ka matla go tšhuta ga bo re rapelang nabo, ba banyana kela ba bagolo. Mo re beyisa, ayitsano go na le ye mongwana ka phutegong ya lune wa gore o fo ya mahlong a kene a  tshepega le mo a kgahleletsiye ke dintshitshire tsa go tshwana le tsa dithaka, go phigisa ke mašaga kela go tilwalela? Ayitsano o bona a na le mekgwa ya gabutši ya gore le wene o nyoko tšhuta gore o be nayo? Mo o ka lebelela tsa gabutši tso a di makang, o ka tšhuta ka mokgo wene o ka tiyiselang dintshitshire tso o gahlanang natso. Re leboga re sa fetsi ka taba la gore re na le mešupetso yo re ka yi kopiselang ga taba ya go tshepega—phela tsotsone dya jabodisa!—Maheb. 13:7; Jak. 1:2, 3.

15. King tso Pawulo wa lepostola a re yeletsang ka tsona tsa gore di ka re gelepa gore re ye mahlong re kene re berekela Jehova re jabodiye?

¹⁵ Gore ka ho phutegong go dule go bebiye fote re dule re mamarelanne, di nyaka ye mongwana le ye mongwana a make so a ka se kgonang. Lebelela mošupetso wa Makreste ya ku botala. Tso ne ba neyiwwe tsona ke mo di sa tshwane fote le mebereko yo ne di nyaka ba yi maka ke mo yi sa tshwane. (1 Makor. 12:4, 7-11) Mara tsotsone ne di sa ba tšhofe gore ba bhetšisane kela di maka gore ba sa kwane. Pawulo o yye a ba hlohletsela gore ba neyele ka tso di nyakegang gore “ba yage mmele wa Kreste.” Pawulo mo a ngwalela Maefeso o yitseri: “Mo se sengwana le se sengwana se bereka gabutši, di maka gore mmele wo thogo gola ka taba la gore wo thogo tiyelela wo kene wo kwana.” (Maef. 4:1-3, 11, 12, 16) Bo ba yyeng ba liketsa go maka ka mokgonone ba makiye gore go bebe fote phutego yi be selo ka ssoši—yone ke mong yona mekgwa ya gabutši yo re yi bonang ga diphutego tsa rune tsa lekgono.

16. Di nyaka re tikemisela go maka ying? (Maheberu 6:10)

¹⁶ Tikemisele go kganela kgole le taba ya go titshwanisa le ba bangwana. Mara o tšhute ga Jeso o boye o karakare ka matla gore o kopisele mekgwa yage ya go bafala. Tšhuta ga mešupetso ya ka ho Bhayibeleng o boye o tšhute ga ba bangwana ba gore ba na le tumelo ya go tiya. Mo o kene o ya mahlong o maka so o ka se kgonang, o sa kamake le ka gonyana gore Jehova “aa na pelo ye phifadu fote a ka sa lebale tso le di makiyeng.” (Bala Maheberu 6:10.) Ariye mahlong o jabodisa ke go berekela Jehova o kene o di tšiba gabutši tsa gore le yene o di tseyela gedimo mo a go bona o karakara ka pelo yago ka mokana ga yona gore o mo jabodise.