1. Ena a wee i nɛ kaāna ɛɛbu a?

 JƐHOVA gbī kɔ i ɛrɛ ɛɛbu. I suā doo wo nyɔɔbee ɛɛbu le yɛɛ eyuu kaɛ edɔɔ̄. (Gal 5:22) Kuma sɔ̄ ɛɛbu le bu nɛnɛ ee susu a, i wee ɛrɛ kaāna ɛɛbu sɔ̄ i si uwe zue ue le sɔ̄ i yerebah nɛ pya i wuga bu keekee sīdee.—Doonu 20:35.

2-3. (a) Dɛɛa nyɔɔ nu a le bu Pya Galetia 6:4, baɛ ena edap i yerebah nɛ kɔ i kiisī lo e’ɛrɛ ɛɛbu bu esiatam Jɛhova a? (b) Ena i nɔ bu ekobee ue ama a?

² Dookɛ̄ alu e’ɛm bu Pya Galetia 6:4 doo, nɛɛ lɛɛratam Pɔɔl kɔ baɛ nu eyerebah i nɛ kɔ i kiisī lo e’ɛrɛ ɛɛbu. (Buū.) Tuatua, nu a bɔloo kɔ i seeasī na lo enɛ Jɛhova i nu a lee eera. A lee kɔ bu i a ɛɛ lo i gaa ye nɛ i nu a lee eera. (Mat 22:36-38) Eree baɛ, ii ɛrɛ esu i loo doloo pya dɔɔ̄na. A bɔloo kɔ i doo yaa Jɛhova loo ɛrɛgeba nu i dap doo, dɛɛa nyɔɔ i kɛ̄tɔɔ̄ nwanaloo, pya nu i suā, ale pya nu i para. Kɛādoo, i ɛrɛ edoo wo nyɔɔbee dɛ̄dɛɛ̄ nu i ɛrɛ aa ye bah. E lo alu kɔ, a ɛrɛ nu pya dɔɔ̄na i para ee bu tam zue ue, a lee kɔ bu i a ɛɛ kɔ ba gaa su pya nu ba para nɛā ka Jɛhova. Nyɔɔbee ba naa su pya nu ba para ama yeāka loo aba aba ale daānu elee loo aba aba. Nyɔɔwo, taā i gbī elee wa ee, a lee kɔ i nɔ nu wa aāloo.

³ Bu ekobee ue ama, i kɔnia pya nu edap i yerebah nɛ sɔ̄ a i tɔɔ̄loo kɔ ii dapna doo dɛ̄dɛɛ̄ nu i gbī edoo bu i esiatam. I ɛpnage kɛ̄ i dap su ɛrɛgeba nu i para daānu leere doo, le nu i dap nɔ aāloo edoba pya dɔɔ̄na.

4. Amunu kɛ̄tɔɔ̄ na edap i ɔɛloo a? Naa nɛ edoba.

⁴ A agaloo siga pya zooro Jɛhova ba e’ana sa le bu dumɛloo kɔ ba a su wa kɛ̄tɔɔ̄ dookɛ̄ ba muɛ doo. Kɛ̄ a bee aganageloo ziī wuga nɛɛwa a kura Carol doolo. A ɛrɛ sɔ̄ a gaa bee si tam zue ue kɛ̄ pya zue ue lu ebɛɛ̄. Bu pya sɔ̄ ama, a bee sere 35 enɔānu Baibol, sa yerebah nɛ gbɛnɛ-edo nɛɛ kɔ ba a kiīloo nɛ sa liamaā. Tam zue ue Carol gaa bee si aa bee kiisī leere! Mɛ sɔ̄sɔ̄ aa kiisī, a bee dɔbu dumɛloo, sa naa bee dapna aa tɔ gbɛnɛkpo sɔ̄. Carol bee kɔ: “M suā kɔ nyɔɔbee na dumɛloo, mm dapna doo nu dookɛ̄ pya dɔɔ̄na aa doo. Sa m ɛp kɔ mm bɔnaloo eture nyiɛ loo dookɛ̄ ba alaba le doo. E loo mɛ ɔ nyɔɔbee mm dapna doo pya nu m gbī edoo.” Carol bee gbī edoo dɛ̄dɛɛ̄ nu a dap doo nɛ Jɛhova. Bu kaka, a bɔloo ekaɛgɛ ye loo pya nu a bee gbī edoo ama! I suā leere kɔ i Bari lo a ɛrɛ gbɛnɛ toesaɛ̄ tɔgɛ nia loo dua taɛ a ɛrɛ ama.

5. (a) Ena a bɔloo kɔ i nyɛŋiabu lo i kɛ̄tɔɔ̄ doo kɔ i ɛrɛ e’ɔaloo a? (b) Dookɛ̄ a le bu foto doo, mɛ sīdee na lo wuga nɛɛdam aa kiisī lo edoo dɛ̄dɛɛ̄ nu a dap doo bu esiatam Jɛhova a?

⁵ Lo a ɛrɛ siga sɔ̄ o ɛrɛ e’ɔaloo nyɔɔbee pya nu oo dap doo, bip aba ɔɔ kɔ: ‘Ena Jɛhova mɛ ɛmadɛɛ̄ aābah a?’ Ɛɛ o nu a lee eera, lo a le ɛrɛgeba nu o dap doo anyaawo. Naa kɛɛrɛbu edoba ama: Ziī wuga nɛɛwa elua 80 zua ɛrɛ e’ɔaloo nyɔɔbee a naa dapna zue ue dookɛ̄ a wee doo sɔ̄ a bee le 40 zua. A bee kɛɛrɛ kɔ kereadoo a gaa dooe dɛ̄dɛɛ̄ nu a dap doo, a naa nia Jɛhova. Mɛ lege kɛ̄ a le doo lo ni? Naa kɛɛrɛ lo ama. Lo alu kɔ wuga nɛɛwa ama bee le aa doo dɛ̄dɛɛ̄ nu a dap doo sɔ̄ a bee le 40 zua, sa gaa kiinagesī lo edoo wo sɔ̄ elua 80 zua, a kura kɔ a sii ɔbɛ enɛ ye nu a lee eera. Lo i bɔātɛ̄ ekɛɛrɛ kɔ i esiatam naa turanadɛɛ̄ nu enia Jɛhova, a lee kɔ i nyɛŋiabu kɔ Jɛhova na a wee kɔ pya nu i doo sa a nia ye a. Lo i doo dɛ̄dɛɛ̄ nu i dap doo, ele doodoo bee Jɛhova aa i kɔ nɛ kɔ: “Lee!”—Dooreloo Matiu 25:20-23.

6. Ena i dap nɔ aāloo edoba Maria a?

⁶ E waɛ i loo e’ɛrɛ ɛɛbu, lo i sere ekɛɛrɛ nyɔɔ pya nu i dap doo, taā i sere ekɛɛrɛ nyɔɔ pya nu ii le edap doo. Naa ɛp nu a bee siraloo ziī wuga nɛɛwa a kura Maria, lo a ɛrɛ dumɛloo a doo kɔ aa dapna si uwe zue ue dookɛ̄ a wee doo. Tua sɔ̄, loo ye bee ɔ sa a bee kɛɛrɛ kɔ a naa le edɛɛ̄ lɔgɔ nu. Kerewo, Maria bee kɛɛrɛ nu akiiloo dɔɔ̄na wuga nɛɛwa a le bu wa bɔŋanaloo lo dumɛloo bee doo kɔ a bia tɔ, e a bee biaɛfii lo eyerebah ye nɛ. Maria bee kɔ: “M bee nɔɔ lo enyɔɔnɛ ye zue ue nɛ pya nɛɛ tɛ̄ma nyɔɔ fon le tɛ̄maloo ɛm lɛta. Ɛrɛgeba sɔ̄ i zue ue sah, loo mɛ wee sukɛ̄ nyɔɔbee m edaba yerebah nɛ na wuga nɛɛwa.” Ili dapnage nyimɛ i ɛɛbu yereloo tɛ̄maloo esere ekɛɛrɛ nyɔɔ pya nu i dap doo, e a naale pya nu ii dap doo. Mɛ lo alu kɔ i dap doo yereloo ale a ɛrɛ pya nu i para edoo bu esiatam Jɛhova ni a?

7. Amunu zuurabahtɔ̄ na nɛɛ lɛɛratam Pita bee nɛ Pya Nɛɛ Kraist a?

⁷ Bu tua kpa nɛɛ lɛɛratam Pita bee ɛm, a bee zū pya ye wuga kɔ ba a su ɛrɛgeba nu ba para siātam nɛ pya wa wuga bu yira. Pita bee ɛm kɔ: “Doodoo kɛ̄ ziī ziī bui ɛrɛ dɔɔ̄nu doo, [suaa] siā tam nɛ ɛnia bui, doodoo kaāna pya tɔɔ̄loo nu ewonu Bari lo a le booboo sīdee.” (1 Pit 4:10) Naa bɔloo kɔ bɔɔ a aa i lo esu pya nu i  para daānu leere, nyɔɔbee i kɛɛrɛ kɔ pya dɔɔ̄na edap i manyiɛ ale kɔ e’ɔɛ wa loo. Lo bɔɔ aa i doo wo, ii le edap nɛ Jɛhova i nu a lee eera.

8. Dookɛ̄ ue a le bu 1 Pya Kɔrint 4:6, 7 kɔ doo, ena anua ii le ekaaga loo pya nu i para a?

⁸ A lee kɔ i su pya nu i para daānu leere, kerewo, i ɛrɛ enwaɛ̄dɛɛ̄ lokwa ii wa su kaāŋa. (Buū 1  Pya Kɔrint 4:6, 7.) Bu edoba, naadaba o wee para bɔātɛ̄ enɔānu Baibol. Waa aaloo edoo nu o para ama! Ziī nu na lo esu nu i para daānu leere, e lo dɔɔ̄na na lo esu kaāŋa. Naa su kɔ a ɛrɛ lenu a bee a siraloo bie uwe zue ue, lo a bee doo kɔ o dap bɔātɛ̄ ziī enɔānu Baibol. E a taɛ a kaāna lo ekɔ nɛ pya le ɔɔ le bu aba eku tam zue ue. Kerewo, sɔ̄ o zɔ̄ŋia pya le ɔɔ le bu lo eku tam zue ue, o muɛ kɔ ziī wuga nɛɛwa aa kɔ nu a bee ye siraloo, lo a bee doo kɔ a nɛ ziī ekpo magazin. Alɛ bee nɛ ziī ekpo magazin; mɛ olo bee bɔātɛ̄ enɔānu Baibol. Ena o doo ani? O suā leere kɔ pya le ɔɔ le bu lo eku tam zue ue e’ɛrɛ biī aāloo nu a bee a siraloo ama, mɛ o dap biaɛfii lo eyira baɛ dɔɔ̄na sɔ̄ lɛɛ o gae kɔ, lokwa oo doo kɔ lo wuga nɛɛwa a bee nɛ magazin a, a kɛɛrɛ kɔ a naa parae bɔātɛ̄ enɔānu Baibol dookɛ̄ olo doo. Lo o doo wo, etɔgɛ kɔ o ɛrɛ fɛgɛ dogo. Kerewo, o aa ɔbɛ lo esere enɔānu Baibol. Nyɔɔwo, su nu o para siātam leere!

9. I su pya nu i para daānu doodoo wa?

⁹ A lee i nyɛŋiabu kɔ ɛrɛgeba nu i para lu dɔɔ̄nu a aabah Bari. Lee kɔ i su dɔɔ̄nu ama yeā mɛm loo bɔŋanaloo, e a naale yeā kaloo aba ii. (Fil 2:3) Sɔ̄ i su i mɛm le i ekpo siātam nɛ Bari, edoo kɔ i ɛrɛ ɛɛbu, naale nyɔɔbee i aa gbī elee ee pya dɔɔ̄na ale i gbī e’ee wa nyɔɔ, mɛ nyɔɔbee i aa su nu i para nɛā ka Jɛhova.

10. Ena anua a naa lee kɔ i su i loo doloo pya dɔɔ̄na a?

¹⁰ Lo ii nwaɛ̄dɛɛ̄, i dap dɔ bu zaɛ̄ su nu i para dooreloo nu pya dɔɔ̄na naa para. Bu edoba, ziī wuga nɛɛdam dap para nɛ ekɔaue taɛkɛ̄ leere. Ɛɛ nu alɛ para lo. Kerewo, a dap kɛɛrɛ kɔ a lee e’ee dɔɔ̄na wuga nɛɛdam a naa para nɛ ekɔaue. Mɛ a dap lu kɔ lo wuga nɛɛdam a naa para nɛ ekɔaue a para aara saanɛɛ, kpɔā pya ye miɔŋɔ leere, sa ɛrɛ mɛm loo tam zue ue. Naa ɛp kɛ̄ bu i ɛɛ doo kɔ i ɛrɛ gbɛnɛ-edo pya wuga nɛɛdam le nɛɛwa lo ba su pya nu ba para siātam nɛ Jɛhova sa yeānage bah nɛ pya dɔɔ̄na a!

11. Ena anua i piiga lo enyɔɔnɛ edoba Jizɔs a?

¹¹ Kereadoo a naa lee kɔ i su i loo doloo pya dɔɔ̄na, i dap ɛrɛ biī aāloo enɔ edoba pya a bee bɔ ture nyiɛ loo. Bu edoba, i naa ɛp edoba Jizɔs. Kere a bee lu nɛɛ a mmana, i dap nɔnu aāloo ye le edoba le pya lele nu a bee doo. (1 Pit 2:21) Lo i piiga lo enɔ ye edoba, i lu kaāna pya zooro Jɛhova sa si tam zue ue leere.

12-13. Ena i dap nɔ aāloo Mɛnɛ Devid a?

¹² I dap muɛ gbɛnɛ-edo edoba pya nɛɛdam le nɛɛwa a bee bɔloo eture nyiɛ loo lo i dap nɔ nu aāloo aābu Muɛ̄ Ue Bari. (Hib 6:12) Naa kɛɛrɛ nu akiiloo Mɛnɛ Devid lo Jɛhova bee ye kure “nɛɛ a nia na beenyiɛ” ale dookɛ̄ dɔɔ̄na tatap Baibol kɔ doo, “nɛɛ a mɛ nia kaāna.” (Doonu 13:22) Kerewo, Devid bee le nɛɛ a naa mmana. Bu kaka, ɛrɛ pio sɔ̄ a bee si gbɛnɛ pɔrɔ. Kaɛlɛɛ wo, alu kaāna le edoba i nɛ. Ena anua a? Nu anua na bee sɔ̄ a bee lu ekāmɛnɛ ye, a naa bee gbī eleere ue aba ɛɛ. Taāwo, a bee su baɛbah suā e’agabah zuurabahtɔ̄ a bee lu enɛ ye, sa bee ɛrɛ kaāna ekiɛ̄nu loo nu a bee doo. E lo ama bee doo kɔ Jɛhova a aaloo ye nɛ.—Yɔɔ 51:3, 4, 10-12.

¹³ I dap nɔ nu aāloo Devid tɛ̄maloo ebip aba ii kɔ: ‘M wee doo dogo kiiloo zuurabahtɔ̄ alu enɛ mɛ doodoo wa? M wee nwaagebah yiga na tɛɛ̄ ekwɔ, sɛh m wee leere ue aba mm ni? M wee nwaabah bege ue pya dɔɔ̄na ni? M wee piigage kaāna lo emuɛ kɔ mm sinakɛ̄ tɛɛ̄ ekwɔ m bee tɛɛ̄ ni?’ O dapnage bip dua ebip ama aba ɔɔ sɔ̄ o buū nu akiiloo pya nɛɛdam le nɛɛwa a bee bɔ ture nyiɛ loo bu Baibol. Ekɔ o gaa tɛɛ̄bu dua kɛ̄tɔɔ̄ ba bee tɛɛ̄bu ni? Pya amunu lele elap na ba bee tɔgɛ a? Bu ziī ziī kɛ̄tɔɔ̄ ama, bip aba ɔɔ kɔ: ‘Bu mɛ sīdee na m dap bee zooro Jɛhova a bee tɔɔ̄ agara ama a?’

14. Mɛ sīdee na i dap ɛrɛ biī aāloo nɔ nu akiiloo edoba pya i wuga bu bɔŋanaloo a?

¹⁴ I dapnage ɛrɛ biī aāloo enɔ edoba pya i wuga bu bɔŋanaloo, kere ba le zege ale ba e’ana. Bu edoba, o dapge kɛɛrɛ nu akiiloo ziī nɛɛ a le bu o bɔŋanaloo lo a gaa egerebu kɛ̄bah ziī taāŋa, naadaba ezū a aabah pya ye gbo, gbanasī a aa butɔ, ale dumɛloo ni? Ekɔ o muɛge lele elap dogo a ye le bu lo o dap nɔ lo e’ɛrɛ ni? Tɛ̄maloo enɔ ye le edoba, o dap muɛ pya sīdee o dap egerebu sɔ̄ o le kɛ̄bah taāŋa. Mɛ dua lenu a i siraloo kɔ i ɛrɛ  pya lele edoba akiiloo pya nɛɛ a bee ɛrɛ yira ama sɛh! Bu kaka, alu nu ɛɛbu.—Hib 13:7; Jem 1:2, 3.

15. Amunu zuurabahtɔ̄ na nɛɛ lɛɛratam Pɔɔl bee nɛ lo a dap yerebah doo kɔ i kiisī lo e’ɛrɛ ɛɛbu bu esiatam Jɛhova a?

¹⁵ Lokwa i nyimɛ efɛɛloo le gbaaloo bu bɔŋanaloo, ziī ziī ii ɛrɛ enɛ i nu a lee eera. Naa kɛɛrɛ nu akiiloo Pya Nɛɛ Kraist bu tua sɔ̄ o’oo tup zua. Ba bee ɛrɛ keekee nu ba para le tam a bee lu enɛ wa. (1 Kɔr 12:4, 7-11) Kerewo, pya nu ama naa bee doo kɔ ba a gbī elee ee pya wa wuga sa wa yere epoo epoo yɛɛ. Taāwo, Pɔɔl bee yere mɛm loo ziī ziī aba kɔ ba a doo nu alu ebɛɛ̄ “lo ewu ekpaloo Kraist nɛ nyɔɔ doodoo tɔ.” Pɔɔl bee ɛm ma pya Ɛfɛsɔs kɔ: “Sɔ̄ ziī ziī dɔ a si tam leere, a doo lo ekpaloo nyim lo ewu ye loo nɛ nyɔɔ bu wereloo.” (Ɛfɛs 4:1-3, 11, 12, 16) Pya a bee doo wo bee nyimɛ efɛɛloo le gbaaloo, lo alu pya elap i muɛ bu keekee i bɔŋanaloo anii’ee.

16. Ena i biaɛfii lo edoo a? (Pya Hibru 6:10)

¹⁶ Biaɛfii kɔ oo le esue oloo doloo pya dɔɔ̄na. Taāwo nɔ edoba Jizɔs, sa piiga lo esu pya ye lele elap dogo yerebu dogo. Nɔ nu aāloo lele edoba pya a bee tɔgɛ yira lo Baibol kɔ nu akiiloo, le lo bu ilii dee ama. Kuma sɔ̄ o waa kiisī lo edoo dɛ̄dɛɛ̄ nu o dap doo a, suā kɔ Jɛhova “naa lu nɛɛ pɔrɔ dogo lo e’ibere [o] tam.” (Buū Pya Hibru 6:10.) Kiisī lo e’ɛrɛ ɛɛbu bu si tam nɛ Jɛhova, sa suā kɔ a tɔgɛ nia loo sɔ̄ o gaa doo dɛ̄dɛɛ̄ nu o dap doo lo edoo kɔ bu ye a ɛɛ.