1. Тынг кӕд фӕцин кӕнӕм?

 ЙЕГЪОВӔЙЫ фӕнды, цӕмӕй уӕм амондджын. Уый кӕцӕй зонӕм? Циндзинад у, сыгъдӕг тыхы дыргъмӕ цы миниуджытӕ хауы, уыдонӕй сӕ иу (Гал. 5:22). Хуыцауӕн лӕггад кӕнгӕйӕ, нӕ бон цыдӕриддӕр у, уый куы фӕаразӕм, стӕй нӕ хотӕн ӕмӕ не ’фсымӕртӕн истӕмӕй куы баххуыс кӕнӕм, уӕд тынг фӕцин кӕнӕм, уымӕн ӕмӕ «райсынӕй раттын амондджындӕр хъуыддаг у» (Хъуыд. 20:35).

2, 3. а) Галатӕгтӕм 6:4 стихмӕ гӕсгӕ нын цавӕр дыууӕ хъуыдыйы баххуыс кӕндзысты, цӕмӕй Йегъовӕйӕн цингӕнгӕйӕ лӕггад кӕнӕм? б) Ацы статьяйы цӕуыл аныхас кӕндзыстӕм?

² Галатӕгтӕм 6:4 стихы апостол Павел цы дыууӕ хъуыдыйы загъта, уыдон нын баххуыс кӕндзысты, цӕмӕй Йегъовӕйӕн цингӕнгӕйӕ лӕггад кӕнӕм. (Бакӕс ӕй.) Фыццаг хъуыды: нӕ нысан хъуамӕ уа Йегъовӕйӕн, махмӕ хуыздӕрӕй цы ис, уый дӕттын. Ӕмӕ нын уый хъуамӕ циндзинад хӕсса (Матф. 22:36–38). Дыккаг хъуыды: хъуамӕ нӕхи иннӕтимӕ ма барӕм. Иннӕтӕй ӕнӕниздӕр кӕй стӕм, цавӕрдӕр курдиӕттӕ нӕм кӕй ис кӕнӕ цӕуылдӕрты кӕй сахуыр стӕм, уымӕ гӕсгӕ нын кӕд Йегъовӕйы хъуыддаджы бирӕ ӕнтысы, уӕд уый тыххӕй хъуамӕ Йегъовӕйӕ уӕм бузныг. Алцыдӕр нӕм уый фӕрцы ис. Кӕд Йегъовӕйы хъуыддаджы чидӕр цӕмӕдӕр махӕй хуыздӕр арӕхсы, уӕд ууыл дӕр хъуамӕ цин кӕнӕм. Ӕгайтма йӕ фӕнды йӕ курдиӕттӕй Йегъовӕйы кадджын кӕнын, йӕхицӕн ном скӕнын нӕ, фӕлӕ. Ӕмӕ хъуамӕ ахӕм хо кӕнӕ ’фсымӕримӕ ерыс ма кӕнӕм, фӕлӕ-иу дзы цӕуылдӕр сахуыр уӕм.

³ Ацы статьяйӕ базондзыстӕм, Йегъовӕйы хъуыддаджы, цас нӕ фӕндид, уыйбӕрц аразын нӕ бон куы нӕ уа, уӕд нын цы баххуыс кӕндзӕн, цӕмӕй нӕ ныфс ма асӕтта. Аныхас ма кӕндзыстӕм, цы курдиӕттӕ нӕм ис, уыдонӕй нӕ бон куыд у хуыздӕр пайда кӕнын ӕмӕ иннӕтӕй цӕуыл ахуыр кӕнӕм, ууыл дӕр.

4. Кӕмӕндӕрты сӕ ныфс цӕй тыххӕй асӕтты? Ӕрхӕсс цӕвиттон.

⁴ Йегъовӕйы лӕггадгӕнджытыл азтӕ сӕ уӕз куы ’руадзынц кӕнӕ се ’нӕниздзинад куы фӕцуды, уӕд сӕ бон нал вӕййы, цас сӕ фӕндид, уыйбӕрц аразын. Ӕмӕ уый тыххӕй кӕмӕндӕрты сӕ ныфс асӕтты. Хо Кэрол иуафон лӕггад кодта, хъусынгӕнджытӕ кӕм нӕ фаг кодта, ахӕм ран. Уыцы рӕстӕг уагъта 35 Библийы ахуыры, ӕмӕ уыдонӕй чидӕртӕ сӕхи Йегъовӕйӕн снывонд кодтой ӕмӕ донаргъуыд райстой. Бирӕ йын бантыст! Фӕлӕ уый фӕстӕ йе ’нӕниздзинад фӕцудыдта, ӕмӕ ныр фылдӕр хӕдзары вӕййы. Кэрол зӕгъы: «Ӕмбарын ӕй, низы тыххӕй мӕ бон кӕй нӕу, иннӕтӕ цас аразынц, уыйбӕрц аразын. Фӕлӕ мӕм уӕддӕр афтӕ фӕкӕсы, ӕмӕ уыдоны хуызӕн иузӕрдион нӕ дӕн. Цас мӕ фӕндид, мӕ бон уыйбӕрц аразын кӕй нӕу, уый мӕ мары». Кэролы фӕнды Йегъовӕйы хъуыддаджы, йӕ бон цыдӕриддӕр у, уый аразын. Уӕдӕ раппӕлинаг куыннӕ у! Мах нӕ дызӕрдыг кӕнӕм, нӕ фӕлмӕнзӕрдӕ Хуыцау ын тынг кӕй аргъ кӕны.

5. а) Нӕ бон цыдӕр аразын кӕй нӕу, уый тыххӕй-иу нӕ ныфс куы асӕтта, уӕд-иу цӕуыл хъуамӕ ахъуыды кӕнӕм? б) Ӕркӕс нывтӕм. Цӕмӕн ис зӕгъӕн, ӕмӕ ӕфсымӕр цӕрӕнбонты Йегъовӕйӕн лӕвӕрдта, хуыздӕрӕй йӕм цы уыд, уый?

⁵ Кӕд дӕуӕн дӕр дӕ ныфс асӕтты, дӕ бон цыдӕр аразын кӕй нӕу, уый тыххӕй, уӕд-иу ахъуыды кӕн ахӕм фарстайыл: «Йегъовӕ та мӕм цӕмӕ ӕнхъӕлмӕ кӕсы?» Дзуапп та ахӕм у: Йегъовӕйы фӕнды, цӕмӕй йын дӕттай, ныртӕккӕ дӕм хуыздӕрӕй цы ис, уый, ома аразай, ныртӕккӕ дӕ бон цы у, уый. Ӕрхӕссӕм ахӕм цӕвиттон. 80-аздзыд хо ӕрӕнкъард вӕййы, уымӕн ӕмӕ Йегъовӕйы хъуыддаджы 40-аздзыдӕй цас арӕзта, ныртӕккӕ йӕ бон уыйбӕрц нал у аразын. Ӕмӕ кӕд, йӕ бон цыдӕриддӕр у, уый аразы, уӕддӕр ӕм афтӕ кӕсы, ӕмӕ дзы Йегъовӕ райгонд нӕу. Фӕлӕ цымӕ ӕцӕгдӕр афтӕ у? Кӕд 40-аздзыдӕй Йегъовӕйӕн лӕвӕрдта, хуыздӕрӕй йӕм цы уыд, уый ӕмӕ 80-аздзыдӕй дӕр афтӕ кӕны, уӕд афтӕ уайы, ӕмӕ йын алкӕддӕр лӕвӕрдта, хуыздӕрӕй йӕм цы уыд, уый. Уӕдӕ дӕм афтӕ кӕсын куы райдайа, ӕмӕ, цы аразыс, уый фаг нӕу, цӕмӕй дӕ Йегъовӕйы зӕрдӕ барухс уа, уӕд-иу ахъуыды кӕн иу цӕуылдӕр: Йегъовӕ йӕхӕдӕг скъуыддзаг кӕны, йӕ зӕрдӕ цӕмӕй барухс вӕййы ӕмӕ цӕмӕй нӕ барухс вӕййы, уый. Хуыздӕрӕй нӕм цы ис, уый йын куы дӕттӕм, уӕд-иу нӕ раппӕлдзӕн ӕмӕ нын зӕгъдзӕн, «тынг хорз!», зӕгъгӕ. (Абар Матфейы 25:20–23.)

6. Марийӕйӕ цӕуыл ахуыр кӕнӕм?

⁶ Хъуамӕ хъуыды кӕнӕм, нӕ бон цы нӕу аразын, ууыл нӕ, фӕлӕ, нӕ бон цы у аразын, ууыл, ӕмӕ уӕд Йегъовӕйӕн цингӕнгӕйӕ лӕггад кӕндзыстӕм. Хо Марийӕйӕн йӕ низы тыххӕй йӕ бон нӕу, цас ӕй фӕндид, уыйбӕрц лӕггад кӕнын. Уый тыххӕй-иу ӕм раздӕр афтӕ каст, ӕмӕ дзы ницы пайда ис, ӕмӕ-иу йӕ ныфс асаст. Фӕлӕ иуафон хъуыды кӕнын райдыдта се ’мбырдӕй иу хойыл. Уыцы хо уыди уатон рынчын, ӕмӕ Марийӕйы бафӕндыд истӕмӕй йын баххуыс кӕнын. Марийӕ радзырдта: «Ӕз алцыдӕр афтӕ спълан кодтон, цӕмӕй иумӕ телефонӕй хъусын кодтаиккам ӕмӕ писмотӕ фыстаиккам. Уый фӕстӕ-иу хӕдзармӕ куы ’рбацыдтӕн, уӕд-иу фырцинӕй зӕххыл дӕр нал хӕцыдтӕн. Мӕ хойӕн кӕй баххуыс кодтон, ууыл-иу цинӕй мардтӕн». Махӕн дӕр нӕ циныл цин ӕфтдзӕн, нӕ бон цы нӕу, ууыл-иу куы нӕ хъуыды кӕнӕм, фӕлӕ, нӕ бон цы у, ууыл. Нӕ бон иннӕтӕй фылдӕр аразын куы уа кӕнӕ Йегъовӕйы хъуыддаджы цӕмӕдӕр хуыздӕр куы арӕхсӕм, уӕд уымӕ та цы цӕстӕй хъуамӕ кӕсӕм?

7. Апостол Петр чырыстӕттӕн цавӕр хорз уынаффӕ радта?

⁷ Апостол Петр йӕ фыццаг фыстӕджы йе ’фсымӕртӕм ныффыста: «Сымахӕй курдиӕттӕй  чи куыд схайджын, афтӕ сӕ пайда кӕнӕд иннӕтӕн балӕггад кӕнынӕн» (1 Пет. 4:10). Хъуамӕ сӕ курдиӕттӕй афтӕ пайда кодтаиккой, цӕмӕй-иу иннӕты бафидар кодтаиккой. Мах дӕр хъуамӕ нӕ курдиӕттӕй пайда кӕнӕм, хуыздӕр куыддӕриддӕр у, афтӕ. Нӕ сӕ хъӕуы сусӕг кӕнын ӕмӕ афтӕ хъуыды кӕнын, мӕ курдиӕтты тыххӕй мӕм исчи куы хӕлӕг кӕна кӕнӕ йӕхимӕ ӕгуыдзӕг куы ’ркӕса, зӕгъгӕ. Афтӕ куы хъуыды кӕнӕм, уӕд нӕ бон нӕ уыдзӕн Йегъовӕйӕн, махмӕ цы ис хуыздӕрӕй, уый дӕттын.

8. 1 Коринфӕгтӕм 4:6, 7 стихтӕм гӕсгӕ, цӕуылнӕ хъуамӕ ӕппӕлӕм, цы курдиӕттӕй стӕм хайджын, уыдонӕй?

⁸ Фӕлӕ-иу хъуамӕ нӕ курдиӕттӕй ӕппӕлын дӕр ма райдайӕм. (Бакӕс 1 Коринфӕгтӕм 4:6, 7.) Зӕгъӕм, хорз дын уайы Библийы ахуыртӕ райдайын, ӕмӕ хъуамӕ уыцы курдиатӕй пайда кӕнай. Фӕлӕ, цы курдиатӕй дӕ хайджын, уымӕй пайда кӕнай, уый иу у, дӕхицӕй ӕппӕлай, уый та – ӕндӕр. Ахъуыды кӕнӕм ахӕм цӕвиттоныл. Ӕрӕджы уацамынды кӕимӕдӕр тынг хорз аныхас кодтай ӕмӕ йемӕ Библи ахуыр кӕнын райдыдтай. Ӕмӕ дӕ куыннӕ фӕнды дӕ уацамындон къордӕн уыцы хабар радзурын. Фӕлӕ куы фембӕлдыстут, уӕд иу хо радзырдта, кӕмӕндӕр журнал кӕй радта. Ӕмӕ ныр куыд бакӕндзынӕ? Ды йӕ зоныс, дӕуыл цы хабар ӕрцыд, уый се ’ппӕты дӕр кӕй бафидар кӕндзӕн. Фӕлӕ, чи зоны, хуыздӕр уыдзӕн, ӕндӕр хатт ӕй куы радзурай, цӕмӕй уыцы хомӕ афтӕ ма фӕкӕса, ӕмӕ уадиссагӕй ницы сарӕзта. Уый уыдзӕн уарзондзинадыл дзурӕг. Фӕлӕ, ды цы курдиатӕй дӕ хайджын, уымӕй дарддӕр дӕр пайда кӕн! Ӕмӕ архай, цӕмӕй-иу адӕмимӕ Библи ахуыр кӕнын райдайай.

9. Нӕ курдиӕттӕй куыд хъуамӕ пайда кӕнӕм?

⁹ Цы курдиӕттӕ нӕм ис, уыдон нын Хуыцау радта, ӕмӕ сӕ хъуамӕ афтӕ пайда кӕнӕм, цӕмӕй-иу ӕмбырд бафидар кӕнӕм. Иннӕтӕ нын кад кӕной, уымӕ хъуамӕ ма бӕллӕм (Фил. 2:3). Хуыцауы фӕндон ӕххӕст кӕнынӕн нӕ хъарутӕ ӕмӕ нӕ курдиӕттӕ куы не ’вгъау кӕнӕм, уӕд алкӕддӕр цин кӕндзыстӕм. Афтӕмӕй Йегъовӕйы кадджын кӕндзыстӕм, ӕмӕ уый у сӕйраг. Иннӕтӕй фылдӕр кӕй аразӕм кӕнӕ цӕмӕдӕр хуыздӕр кӕй арӕхсӕм, уый та афтӕ ахсджиаг нӕу.

10. Раст цӕуылнӕ уыдзӕн нӕхи иннӕтимӕ барын?

¹⁰ Цӕмӕдӕр иннӕтӕй хуыздӕр куы арӕхсӕм, уӕд раст нӕ уыдзӕн, нӕхи семӕ куы барӕм. Зӕгъӕм, ӕфсымӕр дзырдарӕхст у ӕмӕ дӕсны у ӕргом раныхӕстӕ дзурынмӕ. Ӕмӕ уый хорз у. Фӕлӕ, гӕнӕн ис, йӕхинымӕр худа, уыцы хъуыддагмӕ афтӕ хорз чи нӕ арӕхсы, уыцы ’фсымӕрыл. Афтӕмӕй та уыцы ’фсымӕрӕн хуыздӕр уайынц ӕндӕр хъуыддӕгтӕ, зӕгъӕм, хуыздӕр арӕхсы йӕ сывӕллӕтты, Йегъовӕ  куыд амоны, афтӕ ахуыр кӕнынмӕ, стӕй у тынг уазӕгуарзон адӕймаг ӕмӕ зынгзӕрдӕ хъусынгӕнӕг. Куыд хорз у, уыйбӕрц курдиатджын хотӕ ӕмӕ ’фсымӕртӕ нын кӕй ис ӕмӕ сӕ курдиӕттӕ Йегъовӕйӕн лӕггад кӕнынӕн ӕмӕ иннӕтӕн ӕххуыс кӕнынӕн кӕй не ’вгъау кӕнынц!

11. Йесо Чырыстийы цӕмӕн хъуамӕ фӕзмӕм?

¹¹ Мах базыдтам, нӕхи иннӕтимӕ кӕй хъуамӕ ма барӕм. Фӕлӕ уый ууыл дзурӕг нӕу, ӕмӕ нӕ бон нӕу иннӕтӕй цӕуылдӕрты ахуыр кӕнын. Хуыцауы иузӕрдион лӕггадгӕнджытӕй бирӕ цӕуылдӕрты сахуыр вӕййӕм. Фыццаджыдӕр нӕ бон у Йесо Чырыстийы бафӕзмын. Кӕй зӕгъын ӕй хъӕуы, мах уый хуызӕн ӕххӕст адӕймӕгтӕ не стӕм. Фӕлӕ йын йӕ миниуджытыл ӕмӕ, цы хъуыддӕгтӕ арӕзта, уыдоныл куы хъуыды кӕнӕм, уӕд дзы бирӕ цӕуылдӕрты сахуыр уыдзыстӕм (1 Пет. 2:21). Куы архайӕм, цӕмӕй йӕ алы хъуыддаджы дӕр фӕзмӕм, уӕд Йегъовӕйӕн суыдзыстӕм хуыздӕр лӕггадгӕнджытӕ ӕмӕ уацамынды дӕр уыдзыстӕм ӕнтыстджындӕр.

12, 13. Паддзах Давидӕй цӕуыл ахуыр кӕнӕм?

¹² Библийы ис бирӕ иузӕрдион нӕлгоймӕгты ӕмӕ сылгоймӕгты цӕвиттонтӕ. Уыдон уыдысты ӕнӕххӕст, фӕлӕ нын сты фӕзминаг (Дзут. 6:12). Ӕрхъуыды-ма кӕнӕм паддзах Давиды. Йегъовӕ Давидӕй загъта, «мӕ зӕрдӕйӕн адджын... у», зӕгъгӕ (Хъуыд. 13:22). Кӕй зӕгъын ӕй хъӕуы, Давид ӕнӕрӕдигӕ нӕ уыд. Уый уӕззау тӕригъӕдтӕ дӕр сарӕзта. Фӕлӕ нын уӕддӕр у фӕзминаг. Цӕмӕй? Йӕ рӕдыдмӕ-иу ын куы бацамыдтой ӕмӕ-иу ын карзӕй куы бауайдзӕф кодтой, уӕд-иу йӕхи нӕ рӕстытӕ кодта, фӕлӕ-иу зӕрдӕйӕ ӕрфӕсмон кодта. Ӕмӕ-иу ын Йегъовӕ дӕр ныххатыр кодта (Пс. 51:3, 4, 10–12).

¹³ Цӕмӕй Давиды бафӕзмӕм, уый тыххӕй нӕ бон у ахӕм фарстатыл ахъуыды кӕнын: «Ӕз та уынаффӕмӕ ӕмӕ уайдзӕфмӕ цы цӕстӕй ракӕсын? Мӕ рӕдыдтытыл уайтагъд басӕттын ӕви мӕхи фӕрӕстытӕ кӕнын? Мыййаг, иннӕты фӕаххосджын кӕнын? Зӕрдиагӕй фӕархайын, цӕмӕй та ногӕй уыцы рӕдыдтытӕ ма саразон?» Библийы ӕндӕр иузӕрдион нӕлгоймӕгты ӕмӕ сылгоймӕгты тыххӕй куы кӕсай, уӕд дӕр дӕ бон у афтӕ фарстаты фӕрцы ахъуыды кӕнын, цӕмӕй сӕ ис бафӕзмӕн, ууыл. Чи зоны, уыдон дӕр ӕмбӕлдысты, ды цы зындзинӕдтыл ӕмбӕлыс, ахӕм зындзинӕдтыл. Ӕмӕ-иу алкӕй тыххӕй кӕсгӕйӕ дӕр ахъуыды кӕн ахӕм фарстайыл: «Ацы иузӕрдион лӕггадгӕнӕгмӕ цавӕр хорз миниуджытӕ уыд ӕмӕ йӕ мӕ бон цӕмӕй у бафӕзмын?»

14. Хотӕ ӕмӕ ’фсымӕрты цӕвиттонтыл куы хъуыды кӕнӕм, уӕд нын уый куыд баххуыс кӕндзӕн?

¹⁴ Нӕ бон ма у нӕ хотӕ ӕмӕ не ’фсымӕртӕй  дӕр цӕуылдӕрты ахуыр кӕнын. Ӕмбырды чи ис, уыдонӕй нын алчидӕр цӕмӕйдӕр у фӕзминаг – хистӕртӕ дӕр, кӕстӕртӕ дӕр. Алчидӕр цавӕрдӕр фӕлварӕнтыл ӕмбӕлы. Кӕмӕндӕр йе ’мбӕлттӕ фӕаразын кӕнынц ӕвзӕр цыдӕртӕ, кӕмӕндӕр йӕ бинонтӕ цӕуынц йӕ ныхмӕ, чидӕр та цавӕрдӕр низӕй хъӕрзы. Ӕмӕ дӕ бон у ахъуыды кӕнын, цавӕр хорз миниуджытӕ сӕм ис ӕмӕ сӕ дӕ бон бафӕзмын цӕмӕй у, ууыл. Афтӕмӕй-иу бамбардзынӕ, дӕхи бон дӕр куыд у фӕлварӕнты фидар фӕлӕууын. Йегъовӕйӕ тынг бузныг стӕм, ахӕм иузӕрдион хотӕ ӕмӕ ’фсымӕрты нӕхӕдӕг кӕй зонӕм, уый тыххӕй. Ӕмӕ ууыл дӕр куыннӕ хъуамӕ цин кӕнӕм (Дзут. 13:7; Иак. 1:2, 3).

15. Павелы уынаффӕ нын куыд баххуыс кӕндзӕн, цӕмӕй дарддӕр дӕр Йегъовӕйӕн цингӕнгӕйӕ лӕггад кӕнӕм?

¹⁵ Алчидӕр нӕ, йӕ бон цыдӕриддӕр у, уый куы араза, уӕд ӕмбырды уыдзӕн фарн ӕмӕ иудзинад. Ахъуыды кӕнӕм 1 ӕнусы цӕрӕг чырыстӕттыл. Уыдон хайджын уыдысты алыхуызон курдиӕттӕй, стӕй сыл уыди алыхуызон хӕстӕ (1 Кор. 12:4, 7–11). Фӕлӕ уый тыххӕй кӕрӕдзиимӕ ерыс нӕ кодтой ӕмӕ нӕ ныддихтӕ сты. Павел сын загъта, цӕмӕй алчидӕр, йӕ бон цы уыд, уый арӕзтаид ӕмӕ афтӕмӕй «Чырыстийы буар фидар кодтаиккой». Ефесӕгтӕм афтӕ ныффыста: «Буары уӕнгтӕй алкӕцы дӕр, куыд ӕмбӕлы, афтӕ куы куса, уӕд буар ӕгасӕй дӕр рӕздзӕн ӕмӕ фидар кӕндзӕн уарзондзинады» (Еф. 4:1–3, 11, 12, 16). Чырыстӕттӕ йӕ ныхӕстӕм гӕсгӕ кӕй архайдтой, уый фӕрцы се ’хсӕн уыди фарн ӕмӕ иудзинад. Ӕмӕ абон дӕр афтӕ у.

16. Нӕ фидар фӕнд цы у? (Дзуттӕгтӕм 6:10).

¹⁶ Дӕхи иннӕтимӕ ма бар. Хъуыды кӕн Йесойы миниуджытыл ӕмӕ йӕ фӕзм. Библийы цы иузӕрдион лӕггадгӕнджыты кой ис ӕмӕ нӕ рӕстӕджы дӕр Йегъовӕйӕн иузӕрдионӕй чи лӕггад кӕны, уыдоны дӕр фӕзм. Дарддӕр дӕр Йегъовӕйӕн дӕтт, хуыздӕрӕй дӕм цы ис, уый. Йегъовӕ мӕнгард нӕу, ӕмӕ дын нӕ ферох кӕндзӕн дӕ фыдӕбон. (Бакӕс Дзуттӕгтӕм 6:10.) Уый тынг аргъ кӕны, йӕ зӕрдӕ барухс кӕныныл зӕрдиагӕй кӕй архайыс, уымӕн. Уӕдӕ йын дарддӕр дӕр цингӕнгӕйӕ лӕггад кӕн!