1. Цийнӕ нин ци хӕссуй?

 ЙЕГОВИ фӕндуй, цӕмӕй цийнӕ кӕнӕн. Уой федарӕй зонӕн, уомӕн ӕма сугъдӕг хъаури рӕзӕмӕ ци менеугутӕ хауй, уони астӕу цийнӕ дӕр ес (Гал. 5:22). Хуцауӕн ке лӕггадӕ кӕнӕн, удта хуӕртӕ ӕма ӕнсувӕртӕн дӕр банхус кӕнун нӕ бон ке фӕууй, е нин хъӕбӕр ӕхцӕуӕн ӕй, уомӕн ӕма «райсунӕй раттун амондгундӕр гъуддаг ӕй» (Гъуд. 20:35).

2, 3. а) Галатӕгтӕмӕ 6:4 куд финст ӕй, уомӕ гӕсгӕ, Йеговӕн лӕггадӕ кӕнгӕй, нӕ бон цӕбӕл ӕй цийнӕ кӕнун? б) Аци статьяй цӕмӕ ӕркӕсдзиан?

² Галатӕгтӕмӕ 6:4 Павел ниффинста, цӕхуӕн дууӕ гъуддаги нин банхус кӕндзӕнцӕ, цӕмӕй нӕ цийнӕ багъӕуай кӕнӕн. (Ба ’й кӕсӕ.) Фиццаг: гъӕуама Йеговӕн дӕттӕн, нӕхемӕ хуӕздӕрӕй ци ес, уой, ӕма гъе уӕд ӕцӕг амондгун уодзиан (Матф. 22:36–38). Дуккаг: иннети хӕццӕ гъӕуама нӕхе ма барӕн. Цидӕриддӕр нин ӕнтӕсуй, е Йегови фӕрци ӕй. Зӕгъӕн, цӕхуӕндӕр искурдиадӕ нӕмӕ ке ес, цӕмӕдӕр ке исдӕсни ан, удта ма не ’нӕнездзийнадӕ дӕр – алцидӕр нин Йеговӕй лӕвӕрд ӕй. Ӕма кӕд нӕ хуӕртӕ ӕма ӕнсувӕртӕн цидӕр махӕй хуӕздӕр уайуй, уӕд уобӕл цийнӕ кӕнун гъӕуй, уомӕн ӕма етӕ сӕ искурдиӕдтӕй пайда кӕнунцӕ Йегови кадгин кӕнунмӕ, сӕхе нӕ, фал. Мадта нӕ сӕ хӕццӕ ерис кӕнун нӕ гъӕуй, фал сӕмӕ хуарзӕй ци ес, уобӕл ахур кӕнун.

³ Аци статья нин банхус кӕндзӕй, цӕмӕй нӕхемӕ нецӕййаг ма кӕсӕн, Йеговӕн лӕггадӕ кӕнгӕй нӕ бон берӕ ку нӕ уа, уӕд. Уомӕй уӕлдай ма базондзиан, ци искурдиӕдтӕ нӕмӕ ес, уонӕй нӕ бон куд ӕй хуӕздӕр пайда кӕнун. Уой фӕсте ба радзубанди кӕндзиан, нӕ бон цӕбӕл ӕй иннетӕй ахур кӕнун.

4. Хатгай нӕ нифс цӕй туххӕй басӕттуй? Ӕрхӕссӕ цӕветтон.

⁴ Еуӕй-еу Йегови лӕггадгӕнгутӕн зин фӕууй исахур ун,  се ’нӕнездзийнадӕмӕ гӕсгӕ кенӕ сӕ карӕмӕ гӕсгӕ, раздӕр цӕйбӕрцӕ кодтонцӕ, уойбӕрцӕ кӕнун сӕ бон ке нӕбал ӕй, уобӕл. Уой ӕхецӕй зонуй Кэрол. Кӕддӕр лӕггадӕ кодта, Йегови Ӕвдесӕнтӕ берӕ кӕми н’ адтӕй, уӕхӕн рауӕн. 35 адӕймагей хӕццӕ Библи ахур кодта ӕма си кадӕртӕ сӕ цард Йеговӕн иснивонд кодтонцӕ ӕма донаргъуд райстонцӕ. Ӕцӕгӕйдӕр ин берӕ ӕнтӕстӕй. Фал ӕй минкъий фӕстӕдӕр е ’нӕнездзийнадӕ тухсун кӕнун райдӕдта ӕма хӕдзарӕй рацӕун дӕр ӕ бон нӕбал адтӕй. Кэрол зӕгъуй: «Бӕргӕ ’й лӕдӕрун, фулдӕр лӕггадӕ кӕнун мин мӕ нези туххӕй ке нӕ уайуй, фал мӕмӕ уӕддӕр уотӕ фӕккӕсуй, цума иннети хузӕн еузӕрдон нӕбал дӕн. Цӕйбӕрцӕ мӕ фӕндуй, уойбӕрцӕ кӕнун мин ке нӕ уайуй, уой туххӕй арӕх мӕхемӕ нийгъосун. Уӕхӕн гъудитӕбӕл фӕууӕлахез ун алкӕд ӕнцон нӕ фӕууй». Фал уӕддӕр Кэрол Йегови гъуддагӕн ӕ хъауритӕ не ’вгъау кӕнуй ӕма си уой туххӕй хъӕбӕр сӕрустур ан! Нӕ бон ӕй федарӕй зӕгъун, нӕ фӕлмӕнзӕрдӕ Хуцау ин ӕ лӕггадӕн устур аргъ ке кӕнуй.

5. а) Раздӕр нӕ бон цӕйбӕрцӕ адтӕй, уойбӕрцӕ ку нӕбал уа, уӕд нӕ зӕрдӕбӕл ци гъӕуама дарӕн? б) Хузӕмӕ ӕркӕсӕ. Уотӕ зӕгъӕн цӕмӕн ес, ӕма ӕнсувӕр алкӕддӕр Йеговӕн, хуӕздӕрӕй имӕ ци ес, уой лӕвардта?

⁵ Кӕд дӕу бон дӕр, раздӕр цӕйбӕрцӕ кодтай, уойбӕрцӕ кӕнун нӕбал ӕй, уӕд дӕхе бафӕрсӕ: «Йеговӕ ми ци агоруй?» Уой фӕндуй, цӕмӕй ин дӕ уавӕрти, хуӕздӕрӕй дӕмӕ ци ес, уой дӕттай. Уой хуӕздӕр балӕдӕрунмӕ ӕрхӕссӕн еу цӕветтон. 80 анземӕй фулдӕр кӕбӕл цӕуй, уӕхӕн хуӕри бон нӕбал ӕй 40 анзи ибӕл ку цудӕй, уӕд цӕйбӕрцӕ лӕггадӕ кодта, уойбӕрцӕ лӕггадӕ кӕнун. Уой туххӕй хъӕбӕр фӕммаст кӕнуй. Кӕд, ӕ бон ци ӕй, уой кӕнуй, уӕддӕр имӕ уотӕ кӕсуй, цума е фагӕ нӕй. Фал е ӕцӕгӕйдӕр уотӕ ’й? Гъӕйдӕ расагъӕс кӕнӕн: 40 анзи ибӕл ку цудӕй, уӕд Йеговӕн лӕвардта, хуӕздӕрӕй имӕ ци адтӕй, уой. Ӕма ибӕл кӕд нур 80 анземӕй фулдӕр цӕуй, уӕддӕр ма уотӕ архайуй. Мадта зӕгъӕн ес, ӕма неци раййивта, уомӕн ӕма алкӕддӕр, ӕ бон ци адтӕй, уой кодта. Кӕд дӕмӕ уотӕ фӕккӕсуй, ӕма Йеговӕ дӕ лӕггадӕй неци уотӕ арази ӕй, уӕд, дӕ хуарзӕнхӕй, дӕ зӕрдӕбӕл дарӕ: Йеговӕ арази цӕмӕй уодзӕй, цӕмӕй ба нӕ, уой ӕхуӕдӕг ниллух кӕнуй. Мах уобӕл мӕтӕ кӕнун нӕ гъӕуй. Дӕ бон ци ӕй, уой ку кӕнай, уӕд зӕгъӕн уодзӕй, ӕма дин Йеговӕ зӕгъуй: «Хъӕбӕр хуарз». (Рабарӕ Матфеййи 25:20–23.)

6. Марийи хабарӕй цӕбӕл ахур кӕнӕн?

⁶ Цӕмӕй нӕ цийнӕ ма исафӕн, уой туххӕй гъӕуама не ’ргом ӕздахӕн, нӕ бон ци ӕй, уомӕ, нӕ бон ци нӕй, уомӕ нӕ, фал. Уой ӕхецӕй зонуй еу хуӕрӕ Марийӕ. Е ’нӕнездзийнадӕмӕ гӕсгӕ ӕ бон берӕ нӕй. Фиццӕгти Марийӕ уой туххӕй хъӕбӕр маст кодта. Уотӕ имӕ кастӕй ӕма си неци пайда ес. Фал удта Марийӕ исфӕндӕ кодта, се ’мбурдӕй еу хъан сӕйгӕ хуӕрӕн ӕнхус кӕнун. Е зӕгъуй: «Ӕ хӕццӕ игъосун кодтан телефонӕй, удта финстӕгутӕ финстан. Ку балӕггадӕ кӕнианӕ, уӕд мӕ фурцийнӕй мӕ къӕхтӕ зӕнхӕбӕл дӕр нӕбал ӕмбӕлиуонцӕ, гъе уойбӕрцӕбӕл ӕхцӕуӕн мин фӕууидӕ хуӕрӕн ӕнхус кӕнун». Мадта мах дӕр не ’ргом нӕ бон ци ӕй, уомӕ ку раздахӕн, уӕд амондгундӕр уодзиан. Фал, зӕгъӕн, ӕцӕгӕйдӕр дӕ бон ӕй фулдӕр кӕнун кенӕ ба цӕмӕдӕр уӕлдай хуарз арӕхсис, уӕдта?

7. Апостол Петур хуӕртӕ ӕма ӕнсувӕртӕн цӕхуӕн унаффӕ равардта?

⁷ Петур ӕ фиццаг финстӕги хуӕртӕ ӕма ӕнсувӕрти баразӕнгард кодта: «Хуцау уин уӕ барӕ бакодта, аллихузи ке ’вдесуй, еци ’стур хуарзӕнхӕ, ӕма сумахӕй искурдиӕдтӕй ка куд исхайгин ӕй, уотӕ си пайда кӕнӕд  иннетӕн балӕггадӕ кӕнунмӕ» (1 Пет. 4:10). Раст н’ адтайдӕ нӕ искурдиӕдтӕ римӕхсун, еске нӕмӕ соцъа кӕнун ке райдайдзӕй кенӕ мах рази ӕхемӕ нецӕййаг ке кӕсдзӕй, уой тӕссӕй. Мадта нӕ искурдиӕдтӕ ку римӕхсӕн, уӕд уотӕ зӕгъӕн нӕ уодзӕй, ӕма Йеговӕн, хуӕздӕрӕй нӕмӕ ци ес, уой дӕттӕн.

8. Искурдиӕдтӕй хе ’стаун хуарз цӕмӕннӕ ’й? (1 Коринфӕгтӕмӕ 4:6, 7).

⁸ Фал хуарз нӕ уодзӕй, ци искурдиӕдтӕ дӕмӕ ес, уонӕй дӕхе ку ’стауай. (Бакӕсӕ 1 Коринфӕгтӕмӕ 4:6, 7.) Зӕгъӕн, Библи ахур райдайун дин хуарз фӕууайуй, ӕма гъӕуама еци искурдиадӕй пайда кӕнай. Фал искурдиӕдтӕй пайда кӕнун ӕма си хе ’стаун еу нӕй. Зӕгъӕн, игъосун кӕнгӕй дин адӕймаг исарази ӕй Библи ахур кӕнунбӕл, ӕма ма туххӕй лӕууис еци хабар дӕ игъосун кӕнуни къуарӕн радзорунмӕ. Гъема игъосун кӕнуни фӕсте фембалдайтӕ ӕма еу хуӕрӕ журнал куд равардта, уой игъӕлдзӕгӕй дзоруй. Е журнал равардта, ду ба Библий ахур райдӕдтай. Куд бакӕндзӕнӕ? Дзубанди дӕр ибӕл нӕййес, Библий ахур ке райдӕдтай, е хуӕртӕ ӕма ӕнсувӕртӕн хъӕбӕр ӕхцӕуӕн уодзӕй. Фал хуӕздӕр уайдӕ еци хабар ӕндӕр хатт ку радзорисӕ, кенӕ ба еци хуӕрӕ журнал ке равардта, е имӕ нецибал кӕсдзӕй. Уотӕ ку бакӕнай, уӕд уомӕй бӕрӕг уодзӕй, еци хуӕри ке уарзис. Фал е уобӕл дзорӕг нӕй, ӕма дӕ дӕ искурдиадӕй пайда кӕнун нӕбал гъӕуй. Идарддӕр дӕр архайӕ, цӕмӕй дин еске хӕццӕ Библий ахур райдайун ӕнтӕса.

9. Нӕ искурдиӕдтӕй куд гъӕуама пайда кӕнӕн?

⁹ Иронх ди ма уӕд, ци искурдиӕдтӕ дӕмӕ ес, етӕ Йегови лӕвар ӕнцӕ ӕма си гъӕуама пайда кӕнӕн ӕмбурдӕн ӕнхус кӕнунмӕ, нӕхецӕн хуарз ном искӕнунмӕ нӕ, фал (Фил. 2:3). Нӕ хъауритӕ ӕма нӕ искурдиӕдтӕ Йегови фӕндон ӕнхӕст кӕнунмӕ ку исаразӕн, уӕд цийнӕ кӕндзиан, иннетӕй фулдӕр нин ке ӕнтӕсуй, уобӕл нӕ, фал Йегови ке кадгин кӕнӕн, уобӕл.

10. Раст цӕмӕннӕ адтайдӕ нӕхе иннети хӕццӕ барун?

¹⁰ Нӕхе иннети хӕццӕ барун раст н’ адтайдӕ, уомӕн ӕма ни еуемӕн еу цидӕр уайуй хуарз, иннемӕн ба – ӕндӕр цидӕр. Райсӕн дууӕ ӕнсувӕри. Сӕ еу дзурдарӕхст ӕй ӕма ин радзубандитӕ хуарз фӕууайунцӕ. Фал радзубандитӕ дзӕбӕх кӕмӕн нӕ уайунцӕ, еци ӕнсувӕрмӕ ба сӕрӕй бунмӕ кӕсуй ӕма ин ӕ хуарз менеугутӕ нӕ уинуй. Зӕгъӕн, еци ӕнсувӕр дзӕвгарӕ иуазӕгуарзондӕр ӕй, ӕ бийнонтӕн хуарз ӕй, удта игъосун кӕнуни гъуддаги дӕр хъӕбӕр зингзӕрдӕй архайуй. Аци цӕветтонӕй бӕрӕг ӕй, нӕхе иннети хӕццӕ ке гъӕуама ма барӕн. Мах хъӕбӕр  амондгун ан, нӕ алливарс берӕ арӕхстгун хуӕртӕ ӕма ӕнсувӕртӕ ке ес. Етӕ сӕ искурдиӕдтӕй пайда кӕнунцӕ Йеговӕн лӕггадӕ кӕнунмӕ ӕма иннетӕн ӕнхус кӕнунмӕ.

11. Йесо Киристей цӕмӕн гъӕуама фӕнзӕн?

¹¹ Нӕхе иннети хӕццӕ ке нӕ барӕн, е уобӕл дзорӕг нӕй, ӕма си ахур дӕр нӕ кӕнӕн. Киристей цӕветтонбӕл расагъӕс кӕнӕн. Ӕнӕнхӕст ке ан, уой туххӕй нӕхе ӕ хӕццӕ баргӕ дӕр нӕ кӕнӕн. Фал имӕ ци хуарз менеугутӕ адтӕй ӕма ци хуарз гъуддӕгтӕ кодта, уонӕй ба нӕ бон ӕй ахур кӕнун (1 Пет. 2:21). Киристей къахвӕдтӕбӕл цӕунмӕ не ’гас хъауритӕй ку архайӕн, уӕд нӕ уодигъӕдӕ хуӕздӕрмӕ ӕййевдзиан, удта Йеговӕн хуӕздӕр лӕггадгӕнгутӕ уодзиан.

12, 13. Паддзах Давидӕй цӕбӕл ахур кӕнӕн?

¹² Библий берӕ еузӕрдон нӕлгоймӕгтӕ ӕма силгоймӕгти хабӕрттӕ финст ес. Етӕ нин фӕнзуйнаг ӕнцӕ, кӕд ӕнӕнхӕст адтӕнцӕ, уӕддӕр (Дзиуит. 6:12). Райсӕн паддзах Давиди. Гъуддӕгти 13:22 куд финст ӕй, уотемӕй Йеговӕ Давиди исхудта, ӕ «зӕрдӕн адгин ка ӕй, уӕхӕн адӕймаг». Давид дӕр ӕнӕнхӕст адӕймаг адтӕй ӕма ма цалдӕр уӕззау тӕрегъӕди дӕр искодта, фал уӕддӕр махӕн фӕнзуйнаг ӕй. Цӕмӕн? Уомӕн ӕма ин ӕ рӕдудмӕ ку ниййамониуонцӕ, уӕд ӕхе рӕститӕ кӕнунбӕл нӕ фӕууидӕ, фал ӕ фудбӕл басӕттидӕ. Давидӕн цийфӕнди зин ма уидӕ, уӕддӕр зундамундмӕ байгъосидӕ ӕма зӕрдӕй ӕрфӕсмон кӕнидӕ. Уомӕ гӕсгӕ ин Йеговӕ ниххатир кӕнидӕ (Пс. 51:3, 4, 10–12).

¹³ Нӕ дӕ фӕндадтайдӕ, цӕмӕй дӕуӕн дӕр Йегови, рази Давидӕн цӕхуӕн ном адтӕй, уӕхӕн ном уа? Дӕхе бафӕрсӕ: «Мӕ рӕдудмӕ мин ку ниййамонунцӕ, уӕд уомӕ цӕхуӕн цӕстӕй ракӕсун? Мӕ фудбӕл басӕттун ӕви мӕхе рӕститӕ кӕнун райдайун? Иннети фудгин кӕнунбӕл нӕ фӕуун? Ме ’гас хъауритӕй фӕййархайун, цӕмӕй уӕхӕн рӕдуд мабал искӕнон?» Еци еузӕрдон лӕггадгӕнгути хабӕрттӕ кӕсгӕй хуарз уайдӕ расагъӕс кӕнун: «Еске си дӕу хузӕн зиндзийнӕдтӕбӕл ӕмбалдӕй? Еци уавӕрти сӕхе куд бадариуонцӕ, уомӕй нин фӕнзуйнаг цӕмӕй ӕнцӕ?» Алли хатт дӕр дӕхе бафӕрсисӕ: «Никки хуӕздӕр сӕ мӕ бон куд ӕй фӕнзун?»

14. Хуӕртӕ ӕма ӕнсувӕрти цӕветтонтӕбӕл сагъӕс кӕнун хуарз цӕмӕн ӕй?

¹⁴ Нӕ бон ма ӕй хуӕртӕ ӕма ӕнсувӕртӕй ахур кӕнун, цийфӕнди кари ма уонцӕ, уӕддӕр. Расагъӕс кӕнӕ, уе ’мбурдӕй цӕхуӕндӕр фӕлварӕнбӕл ка исӕмбалдӕй, уӕхӕн хуӕрӕ кенӕ ӕнсувӕрбӕл. Зӕгъӕн, кедӕр си  скъолай мӕстӕймарӕ кӕнунцӕ, бийнонтӕ ӕ нихмӕ цӕунцӕ кенӕ ба е ’нӕнездзийнадӕй тухсуй. Еци фӕлварӕнти сӕхе куд дарунцӕ, уомӕй сӕ дӕ бон ку ӕй фӕнзун? Уӕхӕн хуӕрӕ кенӕ ӕнсувӕри цӕветтонбӕл ку сагъӕс кӕнӕн, уӕн нин е ӕнхус кӕндзӕй, ӕма ’й зондзиан, цӕхуӕндӕр фӕлварӕни нин нӕхе куд даргӕ ’й, уой. Мах Йеговӕй хъӕбӕр боз ан, се ’ууӕндундзийнадӕй фӕнзуйнаг ка ӕй, уӕхӕн хуӕртӕ ӕма нин ӕнсувӕртӕ ке ес, уой туххӕй! (Дзиуит. 13:7; Иак. 1:2, 3).

15. Павел цӕхуӕн унаффӕ равардта ӕма нин е куд ӕнхус кӕнуй Йеговӕн цийнӕгӕнгӕй лӕггадӕ кӕнунмӕ?

¹⁵ Цӕмӕй ӕмбурди фарнӕ ӕма еудзийнадӕ уа, уобӕл гъӕуама алкедӕр архайа. Расагъӕс кӕнӕн фиццаг ӕноси киристӕнттӕбӕл. Алкӕмӕдӕр си фӕйнӕхузи искурдиӕдтӕ адтӕй, удта аллихузи ихӕстӕ ӕнхӕст кодтонцӕ (1 Кор. 12:4, 7–11). Фал уой туххӕй нӕ ниддехтӕ ’нцӕ ӕма ерис кӕнун нӕ райдӕдтонцӕ. Апостол Павел Ефеси ӕмбурдмӕ финста: «Бауӕри иуӕнгтӕй алкӕцидӕр, куд ӕмбӕлуй, уотӕ ку коса, уӕд бауӕр ӕгасӕйдӕр ирӕздзӕй ӕма федар кӕндзӕй уарзондзийнади» (Еф. 4:1–3, 11, 12, 16). Аци дзурдтӕй Павел киристӕнтти баразӕнгард кодта сӕ искурдиӕдтӕй уотӕ пайда кӕнун, цӕмӕй «Киристей бауӕр», гъома ӕмбурд, федар кӕнонцӕ. Хуӕртӕ ӕма ӕнсувӕртӕ Павели дзурдтӕмӕ гӕсгӕ ке архайдтонцӕ, уой фӕрци ӕмбурди адтӕй фарнӕ ӕма еудзийнадӕ. Ӕма абони дӕр хуӕртӕ ӕма ӕнсувӕртӕ гъе уотӕ архайунцӕ.

16. Идарддӕр дӕ куд фӕндуй архайун? (Дзиуиттӕгтӕмӕ 6:10).

¹⁶ Мадта дӕхе иннети хӕццӕ ма барӕ. Уой бӕсти Киристей цӕветтонбӕл сагъӕс кӕнӕ ӕма ин ӕ менеугутӕ фӕнзӕ. Уомӕй уӕлдай ма дин фӕнзуйнаг уодзӕнцӕ, рагидзаманти Йеговӕн ка лӕггадӕ кодта, етӕ ӕма абони хуӕртӕ ӕма ӕнсувӕртӕ дӕр. Ма гурусхӕ кӕнӕ, Йеговӕн, хуӕздӕрӕй дӕмӕ ци ес, уой ку дӕттай, уӕд дин «нӕ феронх кӕндзӕй дӕ хъиамӕт». (Бакӕсӕ Дзиуиттӕгтӕмӕ 6:10.) Йеговӕ аргъ кӕнуй, ӕ зӕрдӕ барохс кӕнунбӕл ин ке архайис, уомӕн. Мадта ин идарддӕр дӕр цийнӕгӕнгӕй лӕггадӕ кӕнӕ!