1. Antoy lapuan na tuan liket?

 LABAY nen Jehova ya maliket iray lingkor to. Diad tua, kaiba so “liket” ed bunga na masanton espiritu na Dios. (Gal. 5:22) Ibabaga na Biblia ya “mas makapaliket so mangiter nen say mangawat,” kanian nalikna tayoy tuan liket no mamasya tayod ministeryo tan tulongan tayo ray agagi diad nanduruman paraan.—Gawa 20:35.

2-3. (a) Base ed Galacia 6:4, antoy duara ya nepeg tayon gawaen pian mansiansia tayon maliket ed panlilingkor tayod si Jehova? (b) Anto ray pantongtongan tayo ed sayan artikulo?

² Diad Galacia 6:4, walay duaran imbaga nen apostol Pablo ya nepeg a gawaen na kada lingkor na Dios pian mansiansia ran maliket ed panlilingkor da. (Basaen.) Unona, usisam so sarilim no antoy ‘the best’ ya sarag mon gawaen parad si Jehova. No antam ya iiter moy ‘the best’ mo, maliket ka. (Mat. 22:36-38) Komadua, agmo dapat ikokompara so sarilim ed arum. No bilang ta dakel so nagagawaan mo ta maksil ni laman mo, walay abilidad mo, o akaawat kay panangipasal, misalamat kad si Aman Jehova ta nanlapu iratan ya amin ed sikato. Panon to balet no nanenengneng mo ya mas maong ya manpulong o manbangat so arum nen say sika? Miliket kad sikara ta uusaren day abilidad da pian nirayew si Aman Jehova, aliwan pian magmaliw iran sikat o pian irayew ira na arum. Kanian imbes ya mikompetensia kad sikara, mas maabig no aligen moy alimbawa ra.

³ Pantongtongan tayod sayan artikulo no antoy nepeg tayon isipen no bilang ta agtayo la nagagawaan so amin ya labay tayon gawaen parad si Jehova. Amtaen tayo met no panon tayon usaren iray abilidad ya inregalo nen Jehova ed sikatayo tan no panon tayon makaaral ed alimbawa na arum.

4. Antoy pakakadismayaan na arum ya agagi? Mangiter na alimbawa.

⁴ Wala ray agagi ya labay da komon ya aruman so nagagawaan da parad si Jehova pero ontatatken la ra o walay sakit da. Ontan so situasyon nen Sister Carol. Asali toy namboluntaryo ed lugar ya daiset so Tasi. Diad saman et walay 35 ya inyaralan to na Biblia, tan atulongan to so pigarad sikara ya magmaliw ya lingkor nen Jehova. Talagan na-enjoy toy ministeryo to! Pero nansakit na grabe si Carol, tan ngalngali agla makaalis ed abung. Oniay imbaga to: “Tanggap ko met ya agko la sarag ya gawaen so nagagawaan na arum ya agagi. Pero pakaliknak, mas matoor ira nen say siak. Lalabanan ko itan ya liknaan, pero nadidismaya ak ta agko la nagawaan so labay ko komon ya gawaen.” Nakomendaan si Sister Carol ta sankanonot toy pangiter to na anggaay nayarian to parad si Jehova. Pero anggano limitado lay nagagawaan to, seguradon natatalosan nen Jehova so situasyon to.

5. (a) Antoy nepeg tayon tandaan no nadidismaya tayo ta aliwa lan singa dati so nagagawaan tayo parad si Jehova? (b) Base ed litrato, akin et nibagan tuloytuloy ya iiter na brother so ‘the best’ to ed si Jehova?

⁵ No nadidismaya ka ta limitado lay nagagawaan mo parad si Jehova, tepetan moy sarilim, ‘Antoy iilaloan nen Jehova ya gawaen ko a?’ Iilaloan to ya iter moy ‘the best’ mo—amay no anton talagay sarag mon gawaen natan. Isipen pa so sakey ya sister ya masulok lan 80 so taon to. Ompan nadidismaya ta aliwa lan singa dati so nagagawaan to ed panagpulong kompara nen 40 so taon to. Anggano gagawaen toy anggaay nayarian to, ompan isipen to ya agto napapaliket si Jehova. Kasin duga so iisipen to? No inter toy ‘the best’ to nen 40 so taon to tan iiter to ni so ‘the best’ to anggano masulok lan 80 so taon to natan, labay ton ibaga sirin, tuloytuloy ton iiter so ‘the best’ to ed si Jehova. No bilang ta say pakaliknam et nakukulangan si Jehova ed gagawaen mo, ompan sika met labat so nakukulangan ed sarilim, aliwan si Jehova. Tandaan mo ya say kekerewen nen Jehova ed sika et no anto may sarag mon gawaen. Basta iter moy ‘the best’ mo, seguradon makakaimis si Aman Jehova tan singa to ibabagad sika ya: ‘Maabig so nagagawaan mo!’—Ikompara so Mateo 25:20-23.

6. Antoy naaralan tayo ed si Sister Maria?

⁶ Nalikna tayoy tuan liket no manpokus tayo ed saray sarag tayon gawaen imbes ya isipen tayo ray agtayo la nagagawaan. Ontan so ginawa nen Sister Maria. Walay sakit to kanian limitado lay nagagawaan to ed ministeryo. Diad gapo, sikatoy a-depress tan pakalikna to et singa anggapo lay usar to. Pero anonotan nen Sister Maria so kakongregasyon to ya agla makabangon. Nan-isip na paraan si Maria no panon ton natulongan iyan sister. “Walay inyeskedyul kon agew ya onla ak ed abung da, tan saniba kamin man-telephone witnessing tan man-letter writing,” so kuan nen Maria. “Kada no onsempet ak, malikeliket ak ta naliliknak ya wala ni usar ko tan atulongan koy agik.” Nalikna tayo met so tuan liket no manpokus tayo ed saray sarag tayon gawaen, imbes ya diad saray agtayo la nagagawaan. Panon to balet no mabiskeg tayo met ni tan wala ray abilidad tayo ya nauusar tayo parad si Jehova?

7. Antoy praktikal ya bilin nen apostol Pedro ed saray Kristiano?

⁷ Diad samay unonan sulat nen apostol Pedro, binilin to ray agagi ya usaren da so antokaman ya regalo o abilidad ya walad sikara pian  pasesegen so kongregasyon. Oniay imbaga to: “Unong a say kada sakey ed sikayo et akaawat na regalo, usar yo itan diad panlingkor ed sakey tan sakey bilang maong a lingkor ya akaawat na agnaparaan a kaabigan na Dios.” (1 Ped. 4:10) Duga kasi ya agtayo usaren iray regalo ya inter nen Jehova ed sikatayo lapud iisipen tayon ompan nainggit so arum ya agagi tan nadismaya irad sarili da? Andi. No say sankanonot tayo et no antoy ibaga o nalikna na arum, agtayo niiter ed si Jehova so ‘the best’ tayo.

8. Base ed 1 Corinto 4:6, 7, akin et agtayo dapat ipapasirayew iray regalo o abilidad tayo?

⁸ Labalabay tayon usaren iray abilidad tayo parad si Jehova. Pero manalwar tayo ta ompan agtayo nalilikas et ipapasirayew o ilalastog tayo la manaya itan. (Basaen so 1 Corinto 4:6, 7.) Singa bilang, ompan maong kan mangigapo na Bible study. Agka dapat manaalangan ya usaren itan ya regalom, pero agmo ilalastog. Imanoen iyan eksena: Nampulong so grupo yo, tan walay nigapom ya Bible study. Labalabay mo lan istoryaen itan ed saray kagrupom. Pero nen nambabana ki la, asabian mo ra ya ondedengel ed istorya na sakey ya sister ya akapan-place na magasin. Antoy gawaen mo ey? Amay sister, akapan-place na magasin. Sika balet, walay nigapom ya Bible study. Anggano makapaseseg may eksperiensyam, ompan mas maabig no diad arum lan pagkakataon mo istoryaen pian agnalikna na sister ya singa asapawan. Agmo labay ya nalikna na arum ya mas maong ka nen say sikara. Pero siempre, agto labay ya ibagan agka la mangigapo na Bible study. Atan so regalom, kanian usar mo!

9. Panon tayon usaren iray abilidad tayo?

⁹ Tandaan tayo ya amin ya abilidad tayo et nanlapud si Jehova, kanian usaren tayo iratan pian nagawaan tayoy panlabayan to tan napabiskeg so kongregasyon. Agtayo iratan uusaren pian mikompetensia o ipalikna ed arum ya nayaryari tayo. (Fil. 2:3) Naliknam so tuan liket no say motibom ed pangiiter moy ‘the best’ mo et pian nirayew si Aman Jehova.

10. Akin et agtayo dapat ikokompara so sarili tayo ed arum?

¹⁰ No agtayo manalwar, ompan ikompara tayoy sarili tayo ed arum ya agagi. Pero makapuy itan ta wala ray abilidad tayo ya anggapod arum, tan wala met so abilidad na arum ya anggapod sikatayo. Singa bilang, ompan say sakey ya brother et maong ya manpaliwawa. Atan so kamaongan to. Balet no aga manalwar, ompan diad isip to et balawen to so sakey  ya brother ya nanairapan ya manpaliwawa. Pero, atan manaya ya brother et masangkaili, maar-aron ama, tan maseseg ed ministeryo. On, nandurumay abilidad tan regalo na kada sakey ed sikatayo. Misatsalamat tayo ta uusaren na agagi so abilidad da parad si Jehova tan pian natulongan so arum!

11. Akin et kaukolan tayon aligen so alimbawa nen Jesus?

¹¹ Tua ya agtayo dapat ikokompara so sarili tayo ed arum, pero makaaral tayo ed alimbawa ra. Say sankaabigan ya pakaaralan tayo et si Jesus. Anggano aliwa tayon perpekto, sarag tayon aligen iray balibalin ugali to, tan makaaral tayod saray ginawa to. (1 Ped. 2:21) No aligen tayoy alimbawa to, magmaliw tayon mas maong ya Kristiano tan mas epektibo tayo ed ministeryo.

12-13. Antoy naaralan tayo ed si Arin David?

¹² Diad Biblia, dakel so nabasa tayon matoor ya lalaki tan bibii ya pakaaralan tayoy alimbawa ra anggano wala met iray agawaan dan lingo. (Heb. 6:12) Say sakey et si Arin David. Sikatoy tinawag nen Jehova ya “lakin makapaliket ed pusok.” (Gawa 13:22) Wala ray agawaan nen David ya seryoson kasalanan, pero makaaral tayo nin siansia ed alimbawa to. Akin ey? On ta impatua toy kasalanan to, nagbabawi, tan agla nanrason nen akaawat na ambelat ya disiplina. Kanian sikatoy pinerdona nen Jehova.—Sal. 51:3, 4, 10-12.

¹³ Panon tayon makaaral ed alimbawa nen Arin David? Tepetan tayoy sarili tayo: ‘Antoy reaksion ko no walay mansimbawa ed siak? Kasin aaminen kon tampol so lingok, o manrarason ak ni tan manaanap ak na tetelen ko? Kasin makakaaral ak ed lingok?’ Manisip ka na ontan iran tepet no babasaen mo ray salaysay ed Biblia tungkol ed arum nin matoor a lingkor nen Jehova. Anto ran situasyon so dinalan da ya dadalanen mo met natan? Anto ray ugali o ginawa ra ya balibalin aligen? Tepetan moy sarilim: ‘Anto kasi gawaen ko pian naalig ko iyan matoor a lingkor nen Jehova?’

14. Akin et maabig no obserbaan tayo ray kaagian tayo?

¹⁴ Maabig no obserbaan tayo met iray kaagian tayo—ugaw man o matatken—ta makaaral tayo ed sikara. Kasin walay kakongregasyon mo ya matoor a manlilingkor anggano ondadalan ed subok? Singa bilang, ompan iinsultoen na saray kaklase to, babawalan na saray kapamilya to, o walay graben sakit to. Anto ray balibalin ugali o kualidad to yan agi ya labay mon aligen? No isipen moy maong  ya alimbawa to, walan-walay naaralan mod sikato pian nasarag mo met iray problemam. Maong labat ta amayamay so agagi tayo ya balibalin aligen so alimbawa ra!—Heb. 13:7; Sant. 1:2, 3.

15. Antoy bilin nen apostol Pablo ya makatulong pian mansiansia tayon maliket ed panlilingkor tayod si Jehova?

¹⁵ Pian walay deen tan pankakasakey ed kongregasyon, dapat iter na kada sakey so ‘the best’ to. Isip mo pa ray Kristiano nen panaon na saray apostol. Aliwan parepareho so regalo tan asainmin ya inter nen Jehova ed sikara. (1 Cor. 12:4, 7-11) Anggano nandurumay abilidad da, ag-itan dapat panlapuan na kompetisyon tan inggitan. Imbes, kaukolan dan usaren so abilidad da pian “pabiskegen day laman [o kongregasyon] na Kristo.” Oniay bilin nen Pablo ed saray taga Efeso: “Sano susumpalen na kada kabiangan so betang to, ontulong itan ed ibaleg na laman legan ya ombibiskeg ed aro.” (Efe. 4:1-3, 11, 12, 16) Lapud inyaplika da itan ya bilin, walay deen tan pankakasakey da. Nanenengneng tayo met itan ed saray kongregasyon anggad natan.

16. Antoy itultuloy tayon gawaen? (Hebreo 6:10)

¹⁶ Agmon balot ikokomparay sarilim ed arum. Imbes, gawam so anggaay nayarian mon aligen si Jesus. I-personal study’m iray matoor ya lingkor nen Jehova ed Biblia, tan alig moy alimbawa ra. Obserbaan mo met iray agagi pian naalig mo iray balibalin kualidad da. No iiter moy ‘the best’ mo ed si Jehova, “agto lingwanan” so amin ya gagawaen mo parad sikato. (Basaen so Hebreo 6:10.) Itultuloy mo sirin so maliket ya panlilingkor mod si Jehova, tan agmo lilingwanan ya mabmabli ed sikato so amin ya sagpot mo.