1. Ngera mo uchul a klou el deuil a rengud?

 A JEHOVAH soal a bo ledeu a rengud. Kede medengelii tiang e le deurreng a uldimukl er a rodech er a chedaol reng. (Gal. 5:22) Ngklou el deurreng sel dorous er a dolai me ngmo klou a deuil a rengud sel leblak a rengud el meruul er a omesiunged e dolengeseu er a rudam er kid er a kakerous el rolel.​—Rel. 20:35.

2-3. (a) Ngar er a Galatia 6:4, e ngera el eru el tekoi a mo ngosukid el melemolem el dmeu a rengud el ngar er a omesiunged el mora Jehovah? (b) Ngera kede mo mesaod er tia el suobel?

² Ngar er a Galatia 6:4, e a apostol Paulus a mesaod a eru el tekoi el mo ngosukid el melemolem el dmeu a rengud. (Monguiu.) A kot, e a turrekong er kid a soad el msa Jehovah sel kot el ungil er kid. A lsekum kede omsang a kot el ungil er kid, e ngkirel mo dmeu a rengud. (Mt. 22:36-38) Ongerung, ngdiak el kired el omekesiu er kid er a rebebil. Aike el sebeched el remuul el klisichel a bedenged, training, me a lechub e ngduch er kid a uchul a doureng a sulel a Jehovah el kirel. E le rokui el tekoi el ngar ngii er kid a mla er ngii el mei. Me nguaisei engdi a lsekum te ngar ngii a rebebil el kuk meduch er kid er a ta er a bedengel a omesiou, e ngkirel mo dmeu a rengud e le tousbech a duch er tir el oldanges er a Jehovah, er a bai lousbech el olecholt er tir me a lechub e ngdi mo uchul a klungiolir. Me ngdiak bo dongaisichai er kid er tir e kede bai mesuub er tir.

³ Ngar tia el suobel, e kede mo mesa rolel e ngsebeched el mo mesisiich er a uldasu el kmo ngdiak el sebeched el remuul aike el rokui el soad er a omesiunged. Kede dirrek el mo mesaod a rolel e ngsebeched el mo ungil ousbech a duch er kid me a dirrek el ike el sebeched el suub er a kerebai er a rebebil.

4. Ngera sebechel rullid el mo mechitechut a rengud? Mosaod.

⁴ A rebebil mesiungel a Jehovah a mo meringel er tir sel lolatk aike el diak el sebechir el remuul e le ngcheluodel me a secher a uchul. Tia dilubech el mora Carol. Ngika mla er ngii a techellel el mesiou er a beluu el uluusbech a ngeso er a berkel a klumech. Seikid el taem e ngmilsuub lobengterir a re 35 el chad e ngilsuterir a rebebil el olengeriakl el mo tuib a rengrir e mo metecholb. Ngkmal mle bekerredechel a omesiungel! A uriul e ngkmal mlo smecher me ngmlo kirel di kiei er a blil. Ngmelekoi el kmo: “Ak medengei el kmo ngsecherek a uchul me ngdiak el sebechek el remuul aike loruul a rebebil, engdi ak mo omdasu el kmo ngdiak el blak a renguk el uai tir. Ngdiak el sebechek el remuul aike el rokui el soak e tiang a rullak el kmal mo mechitechut a renguk.” A Carol a soal meruul aike el rokui el sebechel el mora Jehovah. Me kede kmal chemat er ngii. Ngdirrek el ulterekokl a rengud el kmo a chubechub el Dios er kid me ngkmal oba omereng el saul el kirel aike el sebechel el remuul.

5. (a) Ngera diak el kired lobes er ngii sel sekum ngdiak el sebeched el remuul aike el rokui el soad? (b) Ngmekera odam e melemolem lomsa sel kot el ungil er ngii er a omesiungel el mora Jehovah el ua domes er aika el siasing?

⁵ A lsekum ngmo mechitechut a rengum e le ngdiak el sebechem el remuul aike el rokui el soam, e di lekau el oker, ‘Ngera soal a Jehovah er ngak?’ Sel kot el ungil el sebechem el rullii er chelechang. Molatk er tiang. A odos el okai a rekil a mechitechut a rengul e le ngdiak el sebechel remuul aike el lurruul er a le okeua rekil el ngar er a omesiungel. Ngmelatk el kmo alta ngomsa Jehovah sel kot el ungil er ngii, engdi tiang a diak lodeuir a rengul a Jehovah. Engdi tia ngmera el uaisei? Me dolatk er ngii. A lsekum ngika el odos a milsa Jehovah sel kot el ungil er ngii er a le okeua rekil e dirk omsa sel kot el ungil er ngii er chelecha el okai a rekil, e ngdirkak lestob lomsa sel kot el ungil er ngii. A lsekum kede mo omelechesiu el kmo a omesiunged a diak lodeuir a rengul a Jehovah, e ngdiak el kired lobes el kmo Jehovah a ngike el olterekokl er sel odeuir a rengul. A lsekum kede msa sel kot el ungil er kid, e ngmo dmu er kid el kmo, “Ng ungil a urerem.”​—Momekesiu er a Mateus 25:20-23.

6. Ngera sebeched el suubii er a Maria?

⁶ Ngmo beot er kid el mo dmeu a rengud a lsekum ngultaut a osenged er aike el sebeched el remuul er a bai dolatk aike el diak el sebeched. Molatk er a odos el Maria el secherel a uchul me ngmeringel er ngii a remuul a betok el ngar er a omesiungel. A kot e ngmlo depressed e ulemdasu el kmo ngdiak a sebechel kutmeklii. Engdi ngmlo melatk er a odos er a ongdibel el di mle dengarech e mlo soal lolengeseu er ngii. Ngmelekoi el kmo, “Ak ullengit er ngii me ngmo sebechek el omerk er a klumech lobengkel loeak a dengua me a omeluches el babier. A bek el taem el ki mdak el oureor, e sel be krei e ngkmal lungil a renguk e le ngmle sebechek el ngosuir a odos er ngak.” Kid me ngsebechel mo klou a deurreng er kid sel lultaut a osenged er aike el sebeched el remuul er a bai dolatk aike el diak el sebeched. Engdi ngkuk mekerang a lsekum ngsebeched el remuul a betok me a lechub e kede kuk kmal meduch er a bebil telengtengil a omesiou el mora Jehovah?

7. Ngera el omengelechel a lebilsterir a Rekristiano a apostol Petrus?

⁷ Ngar er a kot el babilengel, e a apostol Petrus a milengelechel er a rudam er ngii el mo  ousbech a duch er tir el melisiich er a rekldemir er a klaumerang. Ngmilluches el kmo: “A ta ma tar kemiu bo lungil el ousbech a ikel le meduch er ngii el tekoi el le ngilai er a Dios, el mo klungiolir a re bek el chad.” (1 Pe. 4:10) Ngdiak el kired el omai er a rengud a ousbech a duch er kid e le kede bekikl el kmo a rebebil a mo mechechei me a lechub e ngmo mechitechut a rengrir. A bo doruul uaisei, e ngdikea domsa Jehovah sel kot el ungil er kid.

8. A doltirakl er a 1 Korinth 4:6, 7 e ngera uchul me ngdiak lungil a di dosaod el kirel a duch er kid?

⁸ Ngkired el mo ungil lousbech a duch er kid engdi ngdirrek el kired el kerekikl me ngdiak di dosaod el kirel. (Menguiu er a 1 Korinth 4:6, 7.) El ua tiang, ke locha kmal meduch el omuchel a omesubel a Biblia. Ngkmal sebechem lousbech er tia el duch er kau! Me nguaisei engdi ngklou a ultutelel a lak di mosaod el kirel. Me dedu el kmo ngmla er ngii a ungil experience er kau el mle sebechem el mechelii a omesubel a Biblia. Me ke kmal semeriar el mo ouchais er a group er kau el kirel. Sel bom kebetech kau me tir, e a ta er a odos a mesaod er a experience er ngii el rirusii a magazine. Ngii el odos a rirusii a magazine e kau a miluchelii a omesubel a Biblia. Ke mo mekerang? Ke medengei el kmo a group er kau a mo ngmai a omelisiich er a experience er kau engdi ke mecherei me a kuk ta er a taem e ke mo mesaod er ngii, me lak mrellii ngike el odos el mo melatk el kmo ngdiak el meduch el uai kau. Tiang a ungil tekoi el sebechem el rullii. Me nguaisei engdi molemolem el omuchel a omesubel a Biblia. Ngar ngii a duch er kau me mousbech er ngii!

9. Ngmekera dousbech a sengk el dolab?

⁹ Lak dobes el kmo a ngii di el duch er kid a sengk el mlara Dios. Ngkired el ousbech aika el sengk el meleketek er a ongdibel, el diak dousbech el olengesechekl er kid. (Fil. 2:3) Sel dousbech a klisichel a bedenged me a duch er kid el meruul a soal a Dios, e ngmo er ngii a uchul a deuil a rengud. Ngdmeu a rengud e le kede ousbech el mengebkall er a Jehovah el diak dousbech e le ngsoad el kuk mo ungil er a rebebil.

10. Ngera uchul me ngdiak lemelemalt a domekesiu er kid er a rebebil?

¹⁰ A lak dekerekikl e ngsebeched el omuchel el omekesiu a klisiched er a chelitechetul a chad. El ua tiang, a odam a sebechel kmal meduch loltobed a cheldecheduch el mora buai. Tiakid a klisichel. Me nguaisei engdi ngar er a rengul e ngmetengel osengel er a ta er a odam el diak lsal lungil er tia el tekoi. Engdi ngika el odam a sebechel kmal meduch lomtechakl er a rechad, train er a rengelekel, me a lechub e ngkmal blak a rengul er a omesiungel. Kede  oba omereng el saul e le te betok a rudam me a rudos er a delongeled el ousbech a duch er tir el mesiou er a Jehovah e olengeseu er a rebebil.

11. Ngera uchul me ngkired el melasem loltirakl er a kerebil a Jesus?

¹¹ Alta ngdiak el kired el omekesiu er kid er a rebebil, engdi ngsebeched el ngmai a klungioled er a kerebai er a reblak a rengrir. A kot el ungil kerebai el sebeched el mesuub er ngii a Jesus. Alta ngmle cherrungel engdi ngsebeched el mesuub a ungil blekerdelel me a omerellel. (1 Pe. 2:21) Sel debora tkurrebab el sebeched el oukerebai er ngii, e kede mo ungil mesiungel a Jehovah e lmuut el mo meduch el meruul er a omesiunged.

12-13. Ngera sebeched el suubii er a King David?

¹² Ngar er a Tekingel a Dios e kede metik a betok el kerebai er a reblak a rengrir el sechal me a redil el alta te dimlak lemecherrungel engdi ngkmal sebeched loukerebai er tir. (Heb. 6:12) Molatk er a King David el Jehovah millekoi el kirel el kmo ngchad el “soal a renguk.” (Rel. 13:22, BT) Me nguaisei engdi David a dimlak lecherrungel. Ngriruul a bebil oberaod el klengit. Me alta nguaisei, engdi ngdirk ungil kerebai el kired. Ngera uchul? E le sera lenguu omesmechokl, e ngdimlak lolasem el omeklemalt er ngii. Ngbai kilengei a mesisiich el omellach e kmal uluuchel er a rengul er a omerellel. Me a Jehovah uluusubes er ngii.​—Psa. 51:3, 4, 10-12.

¹³ Ngsebeched el mesuub er a David sel di lekid el oker: ‘Ngua ngera osengek el kirel a omellach? Ak di mereched el ouchais a telemellek, me a lechub ak melasem el lomeklemalt er ngak? Ak di mereched el oltelechakl er a rebebil? Ak melasem el diak kluut el omelekl a cheleuid el omerellek?’ Ngsebeched el oker a osisiu el ker sel donguiu el kirir a reblak a rengrir el sechal me a redil er a Biblia. Tirka te mlo chelebangel a osisiu el omelsemai el uai kau? Ngera el ungil blekeradel a lullecholt? Ngar er a derta er aike el tekoi el dilubech, e di lekau el oker: ‘Ak mekera e mo ua ngika el blak a rengul el mesiungel a Jehovah?’

14. Kede mekera ngmai a klungioled sel domtab er a rekldemed er a klaumerang?

¹⁴ Ngdirrek el sebechel mo uchul a klungioled sel domtab er a rekldemed er a klaumerang el meklou me a remekekerei. El ua tiang, ngsebechem el dobedebekii a chad er a ongdibel el outekangel er a ringel, el ltang ngorimel er tirke el ua meklungel, ultok er a telungalek, me a lechub e ngchelitechetul a bedengel? Ngsebechem el mes a ungil blekerdelel el soam el  mo oukerebai? Sel molatk er a ungil kerebai er ngii, e ngsebechem el suub a rolel e ke outekangel er a ringel el mchelebangel er ngii. Kede oba omereng el saul le ngngar ngii a chouaitirka el ungil kerebai er a klaumerang el sebeched el oukerebai er tir.​—Heb. 13:7; Jak. 1:2, 3.

15. Ngera el omengelechel a lebilskid a apostol Paulus el sebechel ngosukid el melemolem el dmeu a rengud er a omesiunged el mora Jehovah?

¹⁵ A derta er kid a kired el msa Jehovah sel kot el ungil er kid a lsoad el melisiich er a budech me a kltarreng er a ongdibel. Molatk er a Rekristiano er a irechar. Ngmla er ngii a kakerous el duch er tir me a ngerechelir. (1 Ko. 12:4, 7-11) Engdi tia dimlak bo luchul a klaisichai me a klekakeakl. A apostol Paulus a bai milengelechel er a derta er tir el mo meruul aike el sebechir “me bo loleketek er a bedengel a Kristus.” A Paulus a milluches el mora Rekristiano er a Efesus el kmo: “Ma ikel derta ma tal klekedall a kuk di bo loungerachel el meruul a ikel lulebeob el kirel, e tial chelechad el rokir a mukeroul e di ngii el meleketek er ngii el oeak a bltikerreng.” (Efe. 4:1-3, 11, 12, 16) Tirke el mirruul uaisei a milleketek er a budech me a kltarreng, el ngii el blekeradel a deues er a ongdibel er chelecha el taem.

16. Ngera kired el rullii er a rengud el mo meruul er ngii? (Hebru 6:10)

¹⁶ Mrellii er a rengum el diak bo mongaisisiu er kau er a rebebil. Bai mosuub er a Jesus e molasem el oukerebai a blekerdelel. Mngai a klungiolem er a kerebai el ngar er a Biblia me a dirrek el chelecha el taem. Sel molemolem el meruul er sel kot el ungil er kau, e bo lulterekokl a rengum el kmo a Jehovah ‘a diak le chebirukel me di lobes a urerem.’ (Monguiu er a Hebru 6:10.) Molemolem loldeu er a rengum el mesiou er a Jehovah, el ungil medengei el kmo ngoba omereng el saul el kirel a blakerreng er kau el odeuir a rengul.