1. Waut jeft ons ennalich väl Freid?

 JEHOVA well, daut wie schaftich sent. Daut weet wie, wäajen de Freid es Poat von dän Jeist siene Frucht (Gal. 5:22). Wäajen jäwen schaftja moakt aus nämen, jeft ons daut ennalich väl Freid, wan wie soo väl aus mäajlich em Prädichtdeenst sent un onse Breeda opp veschiedne Wäaj halpen (Apj. 20:35).

2-3. (a) Waut fa twee Sachen woaren ons no Galata 6:4 no halpen, onse Freid en Jehova sienen Deenst to hoolen? (b) Waut woa wie en disen Artikjel lieren?

² En Galata 6:4 räd de Apostel Paulus von tweeatlei, waut ons halpen woat, onse Freid to hoolen (läs). Ieeschtens sull wie ons väanämen, Jehova ons bastet to jäwen. Wan wie am ons bastet jäwen, dan wudd wie sellen schaftich sennen (Mat. 22:36-38). Tweedens sell wie ons nich met aundre vejlikjen. Wie sellen Jehova dankboa sennen fa daut, waut wie volbrinjen kjennen wäajen onse Jesuntheit, waut wie jelieet haben ooda met waut wie ons vestonen – wäajen opplatst hab wie aulmols aules von am jekjräajen. Oba wan aundre en eenje Stekjen mea em Deenst doonen kjennen aus wie, dan sell wie ons doaräwa freien, daut dee äare Gow brucken toom Jehova lowen un nich doatoo, om bäta to sennen aus aundre ooda fa äaren ieejnen Nutzen. Wie sellen waut von dee lieren, enne Städ ons met dee mäten.

³ En disen Artikjel woa wie lieren, waut ons halpt, wan sikj ons daut soo späat, daut wie nich jenuach em Deenst doonen. Wie woaren uk seenen, woo wie jieda Gow, waut wie veleicht haben, daut baste brucken kjennen un waut wie von aundre lieren kjennen.

4. En waut vonne Loag kaun eena mootloos woaren? Jeff een Biespel.

⁴ Eenje von ons kjennen nich mea soo väl en Jehova sienen Deenst doonen, aus wie wudden wellen, wäajen wie veleicht ella jeworden sent ooda krank sent; daut moakt ons sea mootloos. Soo wia daut bie Carol. See deed ea doa prädjen, wua mea Help fäld. En dee Tiet studieed see met 35 Menschen de Bibel un kunn miere halpen sikj Jehova hantojäwen un deepen to loten. Carol kunn aulsoo väl em Deenst doonen! Oba dan wort see krank un must meistens bloos noch tus bliewen. See sajcht: “Ekj weet, daut ekj wäajen miene Krankheit nich mea soo väl doonen kaun aus aundre, un doawäajen feel ekj mie soo, daut ekj nich soo tru sie aus dee. Daut moakt mie sea mootloos, daut ekj nich daut doonen kaun, waut ekj wudd wellen.” Carol well werkjlich äa bastet fa Jehova doonen. Daut es sea to lowen! Wie kjennen ons secha sennen, daut ons leeftolja Gott daut sea väl räakjent, daut see äa bastet jeft.

5. (a) Aun waut sell wie denkjen, wan wie mootloos sent, wäajen wie nich soo väl doonen kjennen? (b) Woo haft de Brooda emma sien bastet jedonen, soo aus opp de Bilda to seenen es?

⁵ Wan du eenjemol mootloos best, wäajen du nich soo väl doonen kaust, dan denkj aun dit: “Waut velangt Jehova von mie?” Hee well eefach, daut du dien bastet deist en diene Omstend. Saj wie mol, doa es eene Sesta, waut 80 Joa es un dee es mootloos, wäajen dee nich mea soo väl doonen kaun aus don, aus see 40 wia. See denkjt, wan see uk äa bastet deit, es daut doawäajen nich jenuach fa Jehova. Oba es daut werkjlich soo? Denkj mol han, wan dise Sesta äa bastet jeef, aus see 40 wia, un noch emma äa bastet deit, nu daut see 80 es, dan haft je see emma äa bastet jedonen. Wan wie aunfangen, ons soo to feelen, daut et nich jenuach es, waut wie fa Jehova doonen, dan mott wie doaraun denkjen, daut Jehova deejanja es, waut doa bestemt, met waut hee tofräd es. Wan wie ons bastet doonen, dan woat Jehova to ons sajen: “Du hast goot jedonen”! (See uk Matäus 25:20-23).

6. Waut kjenn wie von Maria lieren?

⁶ Wie woaren kjennen mea Freid haben, wan wie doano kjikjen, waut wie doonen kjennen un nich doano, waut wie nich kjennen. Räd wie mol von eene Sesta, waut Maria heet, un nich soo väl em Deenst doonen kaun wäajen äare Krankheit. Ieeschtlich wia see mootloos doaräwa un feeld sikj tonuscht. Oba dan docht see äwa eene Sesta en äare Vesaumlunk no, waut emma em Bad sennen mott, un see wort sikj eenich, ar to halpen. See sajcht: “Ekj beräd mie met ar toop äwa Fon to prädjen un Breew to schriewen. Jiedatsmol, wan wie toop jeprädicht hauden, kjeem ekj schaftich no Hus un feeld mie ennalich tofräd, daut ekj ar kunn halpen.” Wie kjennen uk mea Freid haben, wan wie doano kjikjen, waut wie doonen kjennen un nich doano, waut wie nich kjennen. Oba waut es, wan wie mea doonen kjennen ooda ons met jewesset en Jehova sienen Deenst fein vestonen?

7. Waut fa gooden Rot jeef de Apostel Petrus siene Gloowesbreeda?

⁷ En sienen ieeschten Breef rod de Apostel Petrus siene Breeda too, äare Gowen to brucken, om aundre Moot tootospräakjen. Hee schreef: “Een jiedra saul siene Gow, dee hee jekjräajen haft, brucken dän näakjsten toom gooden to deenen, aus een Vewaulta, dee met Gott siene Jnodengowen tru omjeit” (1. Pet. 4:10, von ons dunkel un  schroz jemoakt). Wie sellen ons nich trigjhoolen, onse Gowen daut baste to brucken, bloos wäajen wie Angst haben, daut aundre woaren aufjenstich ooda mootloos woaren. Wan wie daut doonen wudden, dan wudd wie Jehova nich ons bastet jäwen.

8. Wuarom sell wie no 1. Korinta 4:6-7 no nich met onse Gow puchen?

⁸ Wie sellen onse Gowen daut baste brucken un oppaussen, daut wie nich doamet puchen (läs 1. Korinta 4:6-7). Saj wie mol, du vesteist daut sea fein, met aundre aunfangen, de Bibel to studieren. Wan du dise Gow hast, dan wurscht du dee sellen brucken. Oba doa es een groota Unjascheet, aus du dise Gow fein brukst ooda aus du doamet puchst. Veleicht kust du sea fein em Deenst met wäm räden un mau rajcht aunfangen, met dän de Bibel to studieren. Du kaust daut aul meist nich aufluaren de Breeda von diene Grupp, daut to vetalen. Oba aus du dan met dee toop best, vetalt eene Sesta gaunz schaftich, daut see wäm kunn een Heft jäwen. See jeef wäm een Heft, oba du fungst aun, met wäm de Bibel to studieren. Waut woascht du nu doonen? Du weetst, daut de Breeda von de Grupp daut woat väl Moot jäwen, wan du an diene scheene Erfoarunk vetalst. Oba du woascht die veleicht eenich, daut opp aundatsmol to vetalen, om de Sesta nich äare Freid wajchtonämen. Daut wudd leeftolich sennen, daut soo to doonen. Oba hool die doawäajen nich trigj, met aundre aunfangen to studieren. Du hast dise Gow, dan bruck dee!

9. Woo sell wie onse Gowen brucken?

⁹ Wie wellen emma doaraun denkjen, daut et eene Gow von Gott es, wan wie ons met jewesset vestonen. Wie sellen dise Gowen brucken, om aundre enne Vesaumlunk Moot to moaken un nich, daut dee sellen no ons kjikjen (Filip. 2:3). Wan wie onse Krauft un daut, wua wie ons met vestonen, brucken, om Gott sienen Wellen to doonen, dan woa wie ons freien kjennen. Daut es nich, wäajen wie bäta sent aus aundre, oba wäajen wie Jehova doamet lowen.

10. Wuarom sell wie ons nich met aundre vejlikjen?

¹⁰ Wan wie ons met waut fein vestonen un nich oppaussen, dan vejlikj wie ons veleicht met soone, waut sikj doa nich fein met vestonen. Veleicht es doa een Brooda, waut daut sea fein vesteit, Räden to hoolen. En sikj kjikjt hee veleicht opp dän aundren Brooda rauf, waut daut schwoa felt, feine Räden to hoolen. Oba dis Brooda es veleicht sea oppnäment to aundre, trakjt siene Kjinja  fein opp un es sea flietich em Deenst. Wie sent sea dankboa, daut wie een deel Breeda un Sestren haben, waut sikj met välet vestonen un daut brucken toom Jehova deenen un aundre halpen!

11. Wuarom sell wie proowen, Jesus sien Biespel notodoonen?

¹¹ Wie sellen ons nich met aundre vejlikjen, oba wie kjennen doawäajen väl von aundre true Deena lieren. Näm wie doatoo mol daut Biespel von Jesus. Wan wie uk onvolkomen sent, kjenn wie doawäajen väl von am lieren, woo hee wia un waut hee deed (1. Pet. 2:21). Wan wie ons aunstrenjen, sien Biespel soo goot aus mäajlich notodoonen, dan woa wie bätre Deena von Jehova un wie woaren onsen Deenst bäta doonen kjennen.

12-13. Waut kjenn wie von dän Kjennich David lieren?

¹² En Gott sien Wuat finj wie een deel Mana un Frues, waut wie nodoonen kjennen, wan dee uk onvolkomen wieren (Heb. 6:12). Denkj wie biejlikj mol aun dän Kjennich David, dän Jehova aus “een Maun no mienem Hoaten” tald, ooda soo aus eene aundre Äwasatunk sajcht, “eene Sort Mensch, waut mie daut dolste jefelt” (Apj. 13:22). Oba David wia je nich volkomen. Hee bejinkj mau rajcht eenje schwoare Sinden. Oba hee es doawäajen een goodet Biespel fa ons. Wuarom? Wäajen aus hee trajchtjewäsen wort, deed hee sikj nich rajchtfoadjen. Enne Städ daut neem hee dän strenjen Rot aun un haud opp iernst een Leetsennen äwa daut, waut hee jedonen haud. Doawäajen vejeef Jehova am (Psa. 51:5-6, 12-14).

¹³ Wie kjennen waut von David lieren, wan wie äwa dit nodenkjen: “Waut doo ekj, wan ekj Rot kjrie? Sto ekj mienen Fäla too ooda vesieekj ekj mie to rajchtfoadjen? Proow ekj aundre de Schult to jäwen? Strenj ekj mie aun, dänselwjen Fäla nich nochmol to doonen?” Biejlikj soone Froagen kjenn wie ons stalen, wan wie von aundre true Mana un Frues enne Schreft läsen. Hauden dee biejlikj soone Schwierichkjeiten, aus du hast? Waut fa goode Ieejenschoften hauden dee? Du wurscht dan doaräwa nodenkjen kjennen: “Woo kaun ekj dise true Deena von Jehova noch bäta nodoonen?”

14. Waut kjenn wie von onse Gloowesbreeda lieren?

¹⁴ Wie kjennen uk von onse Gloowesbreeda lieren, endoont aus dee junk ooda aul ella sent. Jeft daut en diene Vesaumlunk biejlikj wäm, waut tru blift, wan dee uk  unja Druck jesat woat, Wadastaunt enne Famielje haft ooda krank es? Kaust du bie dän goode Ieejenschoften seenen, wua du wurscht jleichen noch dolla aun to schaufen? Wan du äwa daut Biespel von soonen Brooda ooda Sesta nodenkjst, kaust du veleicht goode Sachen lieren, woo du noch bäta met diene Schwierichkjeiten foadich woaren kaust. Wie sent sea dankboa, daut soone Breeda un Sestren ons soon goodet Väabilt sent! (Heb. 13:7; Jak. 1:2-3).

15. Waut von Rot jeef de Apostel Paulus, waut ons vondoag dän Dach noch halpt, Freid en Jehova sienen Deenst to haben?

¹⁵ Jieda eena von ons mott sien bastet doonen, daut enne Vesaumlunk Fräd un Eenichkjeit es. Näm wie doatoo mol daut Biespel von de ieeschtemmasche Christen (1. Kor. 12:4, 7-11). Dee hauden veschiedne Fäichkjeiten un Oppgowen, oba daut brocht dee nich bat doa, daut eena bäta sennen wull aus de aundra ooda daut dee aunfungen to strieden. Paulus rod jieda eenem too, sien bastet to doonen, “wuaderch Christus sien Kjarpa . . . jebut woat”. Paulus schreef aun de Efeesa: “Wan jieda Jlett deit, waut daut kaun, dan waust de Kjarpa un but en Leew opp” (Efs. 4:1-3, 11-12, 16). Deejanje, waut dit nokjeemen, sträwden no Fräd un Eenichkjeit – krakjt daut, waut wie vondoag dän Dach bie onse Vesaumlungen beoobachten kjennen.

16. To waut sell wie ons gaunz eenich sennen? (Hebräa 6:10).

¹⁶ Sie die gaunz eenich, die nich met aundre to vejlikjen. Enne Städ daut lia von Jesus un proow soo to sennen, aus hee wia. Lia uk von de true Deena von ieeschtemma un von de vondoagsche Tiet. Jie kjennen junt secha sennen: “Gott es nich ojjerajcht, daut hee june Woakjen un june Leew vejäten deit”, wan jie wieda jun bastet doonen (läs Hebräa 6:10). Frei die wieda en Jehova sienen Deenst, wiels du kaust die secha sennen, daut hee daut väl räakjent, wan du dien bastet deist.