1. Itshi tudi naye gutshita ha gukhala nu gusuangula guavula?

 YEHOWA wana tshigina egi tukhale nu gusuanguluga, handaga guana khala mukatshi dia mabundu a nyuma yenji. (Gal. 5:22) Tangua tuana tshita ngolo ha gukalagala mudimo wa gulongesa nu tuana kuatesa aphangi’etu, tuana khala nu gusuanguluga guavula handaga muthu udi muhana wana khala nu gusuanguluga guavula gubalega muthu udi muzula.—Makal. 20:35.

2-3. (a) Ha gutadila Galatiya 6:4, ndaga tshi mbadi jiajiya gutukuatesa ha gubamba gusuanguluga guetu mu mudimo wa Yehowa? (b) Itshi tuza muzuelela mu longo edi?

² Mu mukanda wa Galatiya 6:4, mupostolo phaula wasonegele ndaga mbadi jiajiya gutukuatesa ha gubamba gusuanguluga guetu (Tanga.) Thomo, tudi naye gukalegela Yehowa nu ngolo jietu jiagasue. Gula tuatshita ngenyi mbatukhala nu gusuanguluga. (Mat. 22:36-38) Ya mbadi tudi naye gutuna gudifuanesa nu athu ako. Gula tudi nu ngolo nga ndunge jia gukalagala ndaga, tudi naye guhana Yehowa mersi handaga muene watuhanele ima yene yagasue. Gula gudi nu aphangi ako ana tshita mudimo wa gulongesa muabonga, tudi naye gusuanguluga handaga ana kalegelago ndunge jiawo ha guditumbuisa nga gukamba gubonga guawo, uvi ana guyitshita ha gusuanguluisa Yehowa. Tushigo naye gudifuanesa nawo, uvi tudi naye gulandula gifezegeselo giawo.

³ Mu longo edi tuza mumona ndaga yajiya gutukuatesa gula tualeba muila handaga tuajiyilego luko gutshita muavula mudimo wa Nzambi. Tuza nji mumona luholo tuajiya gukalegela muabonga ngolo jietu nu luholo tuajiya gulandula ifezegeselo ya aphangi ako.

4. Ndaga itshi yajiya gutulebesa muila? Hana gifezegeselo.

⁴ Yana khala lamba gudi akombeledi ako a Yehowa ha gutshita ndaga akhalele mukalagala thomo gula adi mukata nga adi a gukola. Phangi Carol wataganele nu ndaga yene. Wakhalele nu luendu lua guya mulongesa fundo diakhalele nu funu ya alongeshi avula. Mu tangua diene wakhalele mu longesa athu 35 Biblia, wakuatesela athu avula ha gudihana nu ha gubatijiwa. Wahetele diago gubonga guavula mu mudimo wa gulongesa. Gungima wasendele gukata, watshitshile masugu avula gu inzo gakhalelego muzoga. Phangi Carol udi muzuela egi: “Ngudi mujiya egi ngajiyilego gukalagala ndaga gifua muana tshita aphangi ako handaga ngana kata. Ngana tangiza egi ngushigo nu gutshigina guavula gifua ene. Ngana khalago nu luholo lua gukalagala ndaga yagasue ngudi mutshigina. Ndaga yene yana gungulebesa muila.” Phangi Carol wana tshigina guhana ngolo jienji jiagasue gudi Yehowa. Idi ndaga yabonga diago! Tudi nu gutshigina egi Nzambi wana gudihaga ha fundo dia phangi Carol nu wana suanguluga muavula nu ndaga jiana tshita muene.

5. (a) Itshi tudi naye gujiya gula tualeba muila handaga tushigo nu luholo lua gutshita ndaga jiagasue tudi mutshigina? (b) Ha gutadila gifuanesa, luholo lutshi phangi wa yala udi mulandula guhana Yehowa ngolo jienji jiagasue?

⁵ Gula matangua ako waleba muila handaga ushigo nu ngolo jia gukalagala ndaga gifua luholo wakhalele mukalagala thomo dihule egi: ‘Itshi Yehowa udi gungutoga ha gutshita?’ Yehowa wana tshigina egi umutshitshile mudimo mugudivua nu ngolo jiaye. Tutadilenu ndaga eyi: Phangi mumoshi wa mukhetu udi nu ivo 80, waleba muila handaga gashigo mulongesa luko muavula gifua hakhalele muene nu ivo 40. Phangi muene udi mutangiza egi ngatshima udi mutshita yagasue ha gukalegela Yehowa mugudivua nu ngolo jienji, Yehowa ganago gusuanguluga. Uvi idi diago ngenyi ba? Ndo! Gula phangi muene wakhalele mutshita ngolo ha gukalegela Yehowa hakhalele muene nu ivo 40 nu udi mulandula gutshita ngenyi mugudivua nu ngolo jienji hadi muene nu ivo 80, idi mumonesa egi yowu genji mulandula guhana ngolo jienji jiagasue gudi Yehowa. Gula tuamona egi tushigo luko mukalegela Yehowa muavula ha gumusuanguluisa, tudi naye gujiya egi muene udi mujiya itshi yana gumusuanguluisa. Gula tudi muhana Yehowa ngolo jietu jiagasue, muene mbawusuanguluga nu esue—Fuanesa nu Matayo 25:20-23.

6. Longo ditshi tuazula mu gifezegeselo gia phangi Maria?

⁶ Gula tuahaga matangi etu phamba mu ndaga tuajiya gutshita mbatukhala nu gusuanguluga. Tutadilenu gifezegeselo gia phangi Maria, misongo yana kata muene yana gumuhanago njila ha gukalagala muavula mu mudimo wa gulongesa. Thomo, yamulebesele muila nu wakhalele mutangiza egi gashigo nu ndando. Uvi tangua phangi Maria wamonele phangi mumoshi wa mukhetu mu hungu mukata muavula, wazudile desizio dia gumukuatesa. Udi muzuela egi: “Ngadivile n’enji hagula tukhale mulongesa mu njila ya telefone nu gusonega mikanda. Matangua avula tuakhalele mulongesa n’enji hamoshi, gungima ngakhalele nu gusuanguluga handaga ngakhalele mukuatesa phangi wami wa mukhetu.” Esue nji tuajiya gukhala nu gusuanguluga guavula gula tuahaga matangi etu phamba mu ndaga tuajiya gutshita. Itshi wajiya gutshita gula udi nu ngolo jia gukalaga muavula mudimo wa Yehowa nga ndo udi mutshita ndaga imoshi muabonga mu mudimo wene?

7. Longo ditshi mupostolo Phetelo wahanele Aklisto?

⁷ Mu mukanda wenji wa thomo, mupostolo Phetelo wawambelele aphangi agasue ha gukalegela khapho dia ahanele Yehowa ha gukolesa aphangi’awo Aklisto. Wasonegele egi: “Mu  luholo muthu nu muthu wahetele khapho gudi Nzambi, adikalegele ha gukuatesa athu ako gifua enya mudimo abonga anyi Nzambi wamonesele khenda jienji jiavula.” (1 Phet. 4:10) Tushigo naye guvua woma nga gutangiza egi gula tuakalegela khapho dietu, athu ako ajiya gutuvuila ginjiongo nga guleba muila. Gula tuavua woma nga tuatangiza ngenyi, mbatushigo muhana Yehowa ngolo jietu jiagasue.

8. Ha gutadila 1 Kolinto 4:6, 7, mukunda natshi tushigo naye gudihala mukunda nu makhapho etu?

⁸ Tudi naye gukalegela makhapho etu muavula, uvi tushigo naye gudihala mukunda nu makhapho ene. (Tanga 1 Kolinto 4:6, 7.) Ha gufezegesa, yajiya gukhala egi yanakhala ndaga yaleba gudi aye ha gusendesa gulonguga Biblia nu athu. Idi khapho diaye, udi naye gudikalegela. Idi nu ndando ha gukalegela khapho diene, uvi ushigo naye gudihala. Yajiya gukhala egi masugu wawa wahetshi eksperianse yagusuanguluisa mu mudimo wa gulongesa, wasendesa gulonguga Biblia nu muthu. Idi yadiago egi udi nu gusuanguluga haguwambela athu ako ndaga yene. Tangiza egi watagana nu aphangi, mukatshi diawo phangi mumoshi wa mukhetu udi muta lumene egi wahetshi luendu lua guhana zulunalo mu mudimo wa gulongesa. Aye wasendesa gulongesa muthu Biblia, uvi muene wahanyi zulunalo. Itshi udi naye gutshita? Udi mujiya egi eksperianse yaye mbayihana aphangi gikhesa, uvi udi naye gunengenena ha guatela naye lusugu luko hagula phangi wa mukhetu wahanyi zulunalo galebigo muila. Mbayikhala diago ndaga yabonga gula watshita ngenyi. Uvi ishigo mukotelesa egi udi naye gubemba gusendesa gulongesa athu Biblia. Udi nu khapho diaguhanele Nzambi, dikalegele!

9. Luholo lutshi tudi naye gukalegela makhapho etu?

⁹ Tudi naye gujiya egi ndaga yagasue tuana kalagala gale muabonga idi kado yatuhanele Nzambi. Tudi naye guyikalegela ha gukolesa aphangi mu hungu, ha fundo dia guditumbuisa. (Fili. 2:3) Gula tudi mukalegela ngolo jietu nu makhapho tudi nawo ha gutshita gutshigina gua Nzambi, mbatukhala nu gusuanguluga. Mbatukhala nu gusuanguga guene handaga tudi mukalegela makhapho etu ha gutumbuisa Yehowa, uvi ndo ha gumonesa egi tuabalega athu ako.

10. Mukunda natshi tushigo naye gudifuanesa nu athu ako?

¹⁰ Gula tuatemelego, tuajiya gusendesa gufuanesa ndaga tuana tshita muabonga nu jinyi athu ako anago gutshita kiawaha. Ha gufezegesa, yajiya gukhala egi phangi mumoshi wa yala wana kalagala ba diskur muabonga. Idi diago khapho dienji. Mu mutshima wenji wajiya gutangiza egi wana tshita ba diskur muabonga gubalega phangi muko wanago gutshita diago muabonga.  Ngatshima phangi muene ganago gutshita ba diskur muabonga, uvi yajiya gukhala egi wana khala nu khadilo dia guyamba athu, wana longesa an’enji muabonga nu wana tshita muavula mudimo wa gulongesa. Tudi nu gusuanguluga guavula handaga aphangi etu a mala nu a akhetu anyi adi nu makhapho a ahanele Yehowa, ana guakalegela ha gumukombelela nu ha gukuatesa athu ako.

11. Mukunda natshi tudi naye gutshita ngolo ha gulandula gifezegeselo gia Yesu?

¹¹ Ngatshima tushigo naye gudifuanesa nu athu ako, uvi tuajiya guzula malongo mu ifezegeselo ya akombeledi ako a Yehowa. Yesu udi gifezegeselo kiawaha gia gulandula. Ikhale wakhalele muthu watagana, tuajiya gulandula makalegelo enji nu gutshita ndaga gifua muene. (1 Phet. 2:21) Gula tuashita ngolo ha gulandula gifezegeselo gienji, mbatubua akombeledi abonga a Yehowa nu mbayitukuatesa ha gutshita mudimo wa gulongesa muabonga.

12-13. Longo ditshi tuajiya guzula mu gifezegeselo gia Fumu Davidi?

¹² Biblia yanazuelela ifezegeselo ya akombeledi a Yehowa a mala nu a akhetu a gujinginyina anyi tuajiya gulandula ngatshima akhalelego athu atagana. (Heb. 6:12) Ha gufezegesa Yehowa watamegele Fumu Davidi egi, “muthu wana kalagala diago ndaga ngana tshigina.” (Makal. 13:22) Idi yadiago egi Davidi gakhalelego muthu watagana. Wakalegele ndaga jiko jiabola diago. Uvi, udi gifezegeselo giabonga gudi esue. Mukunda nathi? Handaga tangua amuhanele malongo mukunda nu gubola guenji, gakambelego gudibingisa. Uvi watshiginyile malongo ene nu wadibelele diago mukunda nu ndaga yene. Hene Yehowa wamutotesele.—Ngi. 51:3, 4, 10-12.

¹³ Ha gulandula gifezegeselo gia Davidi tuajiya gudihula egi: ‘Itshi ngana tshita gula anguhana malongo? Ngana tshigina gubola guami mu phushi, nga ndo ngana kamba gudibingisa? Ngana zuela egi muthu muko wangushinjiga hagutshita ngenyi? Ngana tshita ngolo hagutuna guvutugila gubola guene?’ Tangua udi mutanga mene jidi mu Biblia jia akombeledi a Yehowa a gujinginyina, wajiya nji gudihula mihu eyi. Ataganele nu malamba a luholo lumoshi nu aye ba? Makalegelo atshi abonga amonesele? Tangua udi mutanga lumene lumoshi mu Biblia dihule egi: ‘Luholo lutshi ngajiya gulandula muabonga gifezegeselo gia mukombeledi owu wa Yehowa wa gujinginyina?’

14. Gubonga gutshi tuajiya guheta gula tudi mutala ndaga jiabonga jidi mukalagala aphangi’etu Aklisto?

¹⁴ Tuajiya guheta gubonga gula tudi mutala ndaga jiabonga jidi mukalagala aphangi’etu,  ikhale gudi mavuala nga gudi athu agukola. Ha gufezegesa, udi mujiya phangi mumoshi mu hungu dienu udi mukolesela mu malamba, yajiya gukhala usageshi udi mukatuga gudi mafuta enji, gudi enya fami yenji nga misongo? Wana mona makalegelo abonga gudi phangi muene anyi wajiya gulandula? Gila watangiza gifezegeselo gienji giabonga, wajiya gujiya luholo lua gukolesela tangua udi mutagana nu malamba. Tudi diago nu gusuanguluga guavula mukunda nu aphangi’etu agujinginyina adi muhana ifezegeselo yabonga inyi tuajiya gulandula!—Heb. 13:7; Yak. 1:2, 3.

15. Longo ditshi dia Phaula diajiya gutukuatesa ha gulandula gukhala nu gusuanguluga mu mudimo tuana kalegela Yehowa?

¹⁵ Mbatukhala mu guhuima mu hungu nu mbatukhala nji hamoshi, gula muthu wagasue mukatshi dietu udi mutshita ngolo ha gukalegela Yehowa nu ngolo jienji jiagasue. Tutadilenu gifezegeselo gia Aklisto a mu siekle ya thomo. Akhalele nu makhapho nu inemo ya gudisha. (1 Kol. 12:4, 7-11) Uvi, ndaga yene ya atuminego ha gudifuanesa nga gudikhaphumuna. Phaula wawambelele muthu yagasue ha gutshita ndaga yajiya guakuatesa “ha gutunga muila wa Klisto.” Wasonegele enya gu Efeso egi: “Gula gitshinyi giagasue gidi mukalagala mudimo wenji muabonga, yana kuatesa muila wagasue ha gukula hagula ukole mu guzumba.” (Ef. 4:1-3, 11, 12, 16) Ndaga yaawambelele Phaula yaakuatesele ha gukhala mu guhuima nu gukhala nji hamoshi. Mangino, tuana mona nji ndaga yene mu mahungu etu.

16. Itshi tudi naye gutshita? (Hebelu 6:10)

¹⁶ Udi naye gutshita yagasue ha gutuna gudifuanesa nu athu ako. Uvi, zula malongo mu gifezegeselo gia Yesu, tshita nji ngolo ha gulandula makalegelo enji. Heta gubonga mu ifezegeselo ya akombeledi a Yehowa a gujinginyina idi mu Biblia nu mu ifezegeselo ya aphangi’etu mangino. Gula udi mulandula guhana Yehowa ngolo jiaye jiagasue, sha mutshima egi muene ‘gashigo muthu wabola ha gujimbila mudimo wakalegele.’ (Tanga Hebelu 6:10.) Landula gusuanguluga nu mudimo wana kalegela Yehowa, jiya egi muene wana suanguluga gula udi mutshita ngolo ha gumusuanguluisa.