1. Wanem nao savve mekem iumi for barava hapi?

 JEHOVAH hem laekem iumi for hapi. And iumi savve lo datwan bikos holy spirit savve mekem iumi for hapi. (Gal. 5:22) Bible sei man wea givim samting hem barava hapi winim man wea kasem samting. So iumi hapi taem iumi waka hard lo ministry and helpem olketa brata and sista.—Acts 20:35.

2-3. (a) Olsem Galatia 6:4 storyim, wanem nao tufala samting wea bae helpem iumi for gohed hapi lo wanem iumi duim for Jehovah? (b) Wanem nao bae iumi storyim lo disfala article?

² Lo Galatia 6:4, aposol Paul storyim tufala samting wea bae helpem iumi for gohed hapi. (Readim.) First samting, iumi shud duim best blo iumi for Jehovah. Sapos iumi duim best blo iumi for hem, datwan shud mekem iumi hapi. (Matt. 22:36-38) Mek-tu samting, iumi shud no comparem wanem iumi duim witim wanem olketa narawan duim. Sapos iumi garem gud health, or iumi savve gud hao for duim samfala samting, iumi shud thankiu lo Jehovah for olketa samting hia. And sapos olketa narawan gud lo samfala samting lo ministry winim iumi, iumi shud hapi olketa iusim savve wea olketa garem for praisem Jehovah and no for mekhae lo olketa seleva. So iumi no laek for winim olketa, bat lane from olketa.

³ Sapos iumi discourage from iumi no savve duim wanem iumi laek for duim, disfala article bae helpem iumi for deal witim datwan. Bae iumi storyim tu hao hem gud for no hol bak for iusim savve wea iumi garem, and wanem iumi savve lanem from example blo olketa narawan.

4. Wanem nao savve mekem samfala lo iumi for discourage? Storyim example.

⁴ Maet samfala no savve duim wanem olketa laek for duim for Jehovah from olketa olo or sik, and diswan savve mekem olketa discourage. Datwan nao samting wea happen lo Carol. Bifor, hem busy for duim preaching waka lo ples wea garem need. Lo datfala taem hem garem 35 Bible study, and gogo samfala lo olketa dedicate and baptaes. Carol helpem staka for kam insaed lo truth! Bat then hem kasem big sik, and datwan mekem hem mas stap lo haos. Carol sei: “Datfala sik mekem mi no fit for duim staka samting olsem olketa narawan. So mi tingse maet mi no faithful olsem olketa. Mi laekem tumas for duim moa samting for Jehovah bat hem hard.” Carol laek for duim best blo hem for Jehovah, and iumi sure Jehovah tinghae lo datwan.

5. (a) Wanem nao iumi shud tingim sapos iumi discourage from iumi no savve duim wanem iumi laek duim? (b) Olsem iumi lukim lo piksa, hao nao brata hia duim best blo hem for Jehovah lo full laef blo hem?

⁵ Sapos iu discourage from iu no savve duim wanem iu laek for duim, hem gud for tingim Jehovah laekem iu for duim nomoa wanem iu fit for duim. Tingim disfala example. Wanfala sista wea hem 80 years hem discourage bikos hem no savve duim staka samting lo ministry olsem hem duim taem hem 40 years. Nomata hem duim wanem hem fit for duim, hem tingse Jehovah no hapi lo datwan. Bat waswe, datwan hem tru? Nomoa. Datfala sista duim wanem hem fit for duim taem hem 40 years, and nomata hem 80 years distaem hem gohed for duim best blo hem. Sapos iumi tingse wanem iumi duim for Jehovah hem no inaf for mekem hem hapi, hem gud for tingim hao Jehovah luksavve iumi duim best blo iumi and hem hapi lo datwan. Hem olsem Jehovah sei lo iumi: “Gud tumas! Iu barava faithful long wanem iu duim.”​—Comparem Matthew 25:20-23.

6. Wat nao iumi savve lanem from example blo Maria?

⁶ Bae iumi hapi sapos iumi tingim wanem iumi fit for duim and no tingting tumas abaotem wanem iumi no fit for duim. Tingim wanfala sista wea nem blo hem Maria. Hem garem sik wea mekem hem no fit for duim staka samting lo ministry. Firstaem, datwan mekem hem feel iusles. Bat then hem tingim wanfala sista lo kongregeson wea sik and leidaon nomoa lo bed, so hem disaed for helpem hem lo ministry. Maria sei: “Mitufala iusim telephone and raetem leta for preach lo pipol. Evritaem bihaen mitufala waka tugeta, mi hapi and satisfae from mi helpem sista blo mi.” Iumi tu savve hapi sapos iumi tingim nomoa wanem iumi savve duim lo ministry. Bat hao sapos iumi fit for duim moa samting lo ministry, or iumi savve gud hao for duim samfala samting lo waka blo Jehovah?

7. Wanem nao aposol Peter encouragem olketa Christian for duim?

⁷ Lo first leta blo aposol Peter, hem encouragem olketa lo kongregeson for iusim savve wea olketa garem for strongim each other. Peter sei: “From God hem kaen tumas, hem givim iufala evriwan savve for duim olketa difren kaen spesol waka. So iufala mas iusim datwan for helpem narawan.” (1 Pet. 4:10) Iumi shud no hol bak for iusim savve wea iumi garem nomata  maet iumi tingse samfala bae jealous or discourage. Sapos iumi warim tingting blo pipol, datwan bae stopem iumi for duim best blo iumi for Jehovah.

8. Olsem 1 Corinth 4:6, 7 storyim, why nao iumi shud no tok praod abaotem samting iumi savve gud hao for duim?

⁸ Hem tru, iumi shud iusim savve blo iumi, bat iumi mas no tok praod abaotem datwan. (Readim 1 Corinth 4:6, 7.) For example, iu maet savve tumas hao for startim Bible study, so no hol bak for duim datwan! Bat important samting nao, hem for no tok praod abaotem. Tingim sapos iu go preaching and iu startim wanfala Bible study. Iu barava laek for storyim lo olketa wea iufala preach tugeta. Bat taem iu meet bak witim olketa, wanfala sista gohed storyim hao hem givim magasin for samwan. Hao, hem gud taem for iu storyim experience blo iu? Iu savve olketa wea iufala preach tugeta bae hapi for herem experience blo iu. Bat maet iu disaed for storyim datwan lo nara taem from iu tingim feeling blo datfala sista, and iu no laek for mekem hem shame. Nomata iu no storyim experience blo iu, from iu savve tumas lo hao for startim Bible study, no hol bak for duim datwan.

9. Hao nao iumi shud iusim savve wea iumi garem?

⁹ Sapos iumi savve gud lo hao for duim samting, tingim, datwan hem present from God. Iumi shud iusim datfala savve for strongim kongregeson, and no for mekem pipol tinghae lo iumiseleva. (Phil. 2:3) Taem iumi iusim strong, and savve blo iumi for duim wanem God laekem, datwan bae mekem iumi hapi bikos iumi duim datwan for mekhae lo Jehovah, and no from iumi laek for winim olketa narawan.

10. Why nao hem no stret for tingse iumi gud winim olketa narawan?

¹⁰ Sapos samwan no careful, maet hem start for tingse wanem hem duim hem gud winim narawan. For example, wanfala brata maet savve gud lo hao for givim pablik tok. Maet hem start for tingse hem gud winim nara brata wea no savve gud hao for givim tok. Bat datfala brata maet gud lo olketa nara samting, olsem for kaen lo olketa narawan, trainim olketa pikinini blo hem, or strong for duim ministry. So iumi shud hapi from iumi garem olketa brata and sista wea iusim savve blo olketa for Jehovah and for helpem olketa narawan.

11. Why nao iumi laek followim example blo Jesus?

¹¹ Hem tru, iumi no laek comparem iumiseleva witim olketa narawan, bat iumi savve lane from example blo olketa wea faithful. Tingim example blo Jesus. Nomata iumi no perfect olsem Jesus, iumi savve lane from olketa gudfala samting wea hem duim and followim wei blo hem. (1 Pet. 2:21) Taem iumi waka hard for followim example blo hem, datwan bae helpem iumi for garem gudfala wei and duim gud ministry blo iumi.

12-13. Wanem nao iumi lanem from example blo King David?

¹² Bible storyim staka faithful man and woman wea iumi savve followim example blo olketa, nomata olketa no perfect. (Heb. 6:12) Wanfala example hem King David, Jehovah sei hem man wea ‘barava wan mind witim hem.’ (Acts 13:22) Bat David hem no perfect, and hem duim samfala big sin tu. Nomata olsem, hem wanfala gud example wea iumi savve followim. Why nao olsem? Bikos taem hem kasem kaonsel, hem no trae for denyim wanem hem duim, hem acceptim kaonsel and hem sorre lo wanem hem duim. From datwan, Jehovah forgivim hem.​—Sams 51:3, 4, 10-12.

¹³ For kasem gud samting from example blo David, hem gud for tingim: ‘Taem mi kasem kaonsel, waswe, mi acceptim datwan or mi denyim rong samting wea mi duim? Waswe, mi kwiktaem blamem narawan? Hao, mi traem best for no duim moa datfala rong samting?’ Taem iumi read abaotem olketa nara faithful man and woman lo Bible, hem gud for tingim tu olketa kwestin olsem: ‘Waswe, iumi deal witim olketa sem problem wea olketa feisim? Taem olketa feisim problem, wanem nao olketa gudfala wei wea olketa garem? And hao nao mi savve followim example blo disfala faithful man or woman?’

14. Hao nao example blo olketa brata and sista savve helpem iumi?

¹⁴ Iumi savve lane tu from example blo olketa young wan, and olketa olo brata and sista lo kongregeson. Hao, iu savve tingim eniwan wea gohed faithful nomata maet hem kasem olketa hard taem olsem, famili againstim hem, narawan forcem hem for duim samting wea no stret, or garem problem saed lo health? Waswe, hem garem samfala gudfala wei wea iu  laek for followim? Taem iumi ting raonem gudfala example blo hem, datwan savve helpem iumi for deal witim hard taem wea iumi feisim. Iumi tinghae tumas lo gudfala example blo olketa brata and sista wea showimaot gudfala example for iumi!​—Heb. 13:7; Jas. 1:2, 3.

15. Wanem nao Paul talem wea savve helpem iumi for hapi lo wanem iumi duim for Jehovah?

¹⁵ Sapos iumi duim best blo iumi and no trae for winim narawan, datwan bae helpem kongregeson for garem peace and wan mind. Tingim olketa Christian lo first century. Olketa garem difren kaen savve and waka. (1 Cor. 12:4, 7-11) Datwan no mekem olketa for laek winim narawan or raoa witim each other. Bat Paul encouragem olketa for duim wanem olketa fit for duim for ‘strongim datfala body bilong Christ.’ Paul talem olketa lo Ephesus: “Olketa join duim gud waka bilong olketa for mekem evri part long body join gud tugeta, and taem evri part long body duim gud waka bilong olketa tu, datfala body hem grow and love strongim hem.” (Eph. 4:1-3, 11, 12, 16) Olketa wea duim wanem Paul talem, mekem kongregeson garem peace and wan mind, wea hem tu wanem hem happen lo olketa kongregeson distaem.

16. Wanem nao iumi laek for duim? (Hebrew 6:10)

¹⁶ Iumi no laek for comparem iumiseleva witim olketa narawan. Bat iumi laek lane from example blo Jesus, and followim olketa gudfala wei blo hem. And tu, iumi laek lane from and followim example blo olketa lo Bible and olketa faithful brata and sista distaem tu. Taem iumi gohed duim best blo iumi, iumi savve sure Jehovah bae no ‘forgetim waka wea iumi duim.’ (Readim Hebrew 6:10.) Gohed hapi lo wanem iumi duim for Jehovah, and tingim hao Jehovah hapi bikos iumi duim wanem iumi fit for duim.