1.‏ کیہڑی چیز توں سانوں بڑی خوشی مِلدی اے؟‏

 یہوواہ چاہندا اے کہ اَسی خوش رہیے۔اَسی ایہہ گل ایس لئی کہہ سکنے آں کیونکہ خوشی اوہدی پاک روح دے پھل دا اِک حصہ اے۔ (‏گلتیوں 5:‏22‏)‏ اَسی جاننے آں کہ لین نالوں دین چ زیادہ خوشی مِلدی اے۔ ایس لئی جدوں اَسی جی جان نال مُنادی کر‌نے آں تے فرق فرق طریقیاں نال اپنے بھین بھراواں دی مدد کر‌نے آں تے سانوں بڑی خوشی مِلدی اے۔—‏اعمال 20:‏35‏۔‏

2، 3.‏ (‏الف)‏ گلتیوں 6:‏4 دے مطابق کیہڑیاں دو چیزاں ساڈی مدد کر سکدیاں نیں تاکہ اَسی خوشی نال یہوواہ دی خدمت کر‌دے رہیے؟ (‏ب)‏ ایس مضمون چ اَسی کنہاں گلاں تے غور کر‌اں گے؟‏

² گلتیوں 6:‏4 چ پولُس رسول نے دو ایہو جہیاں گلاں دا ذکر کیتا جنہاں دی وجہ توں اَسی خوش رہ سکنے آں۔ ‏(‏ایت نُوں پڑھو۔)‏ پہلی گل ایہہ وے کہ اَسی یہوواہ لئی جو کجھ وی کر سکنے آں اوہ جی جان نال کر‌ئیے۔ جے اَسی اِنج کر رہے آں تے فیر سانوں خوش ہونا چاہی دا اے۔ (‏متی 22:‏36-‏38‏)‏ دُوجی گل ایہہ وے کہ سانوں دُوجیاں نال اپنا مقابلہ نئیں کر‌نا چاہی دا۔ اَسی اپنی صحت، اپنے ہنر یاں اپنی کسے قابلیت دی وجہ توں یہوواہ لئی جو کجھ کر سکنے آں اوہدے لئی سانوں یہوواہ دا شکرگزار ہونا چاہی دا اے۔ ساڈے کول جو کجھ وی ہے اوہ سانوں یہوواہ نے ای دِتا اے۔ پر جے کوئی بھین بھرا یہوواہ دی خدمت چ کوئی کم ساڈے نالوں بہتر کر‌دا اے تے سانوں ایس گل تے خوش ہونا چاہی دا اے کہ اوہ اپنی قابلیت نُوں اپنی واہ واہ تے فائدے لئی نئیں سگوں یہوواہ دی وڈیائی لئی استمال کر رہیا اے۔ اِنج اَسی اوہدا مقابلہ نئیں کر‌اں گے سگوں اوہدے توں سکھاں گے۔‏

³ ایس مضمون چ اَسی ویکھاں گے کہ جے اَسی یہوواہ دی خدمت چ اوہ سب کجھ نئیں کر پا رہے جو اَسی کر‌نا چاہنے آں تے فیر کیہڑی چیز ساڈی مدد کر‌ے گی تاکہ اَسی بے حوصلہ نہ ہوئیے۔ اَسی ایہہ وی ویکھاں گے کہ اَسی اپنی قابلیت نُوں یہوواہ دی خدمت چ چنگی طرحاں کیویں استمال کر سکنے آں تے اَسی دُوجیاں کولوں کیہہ سکھ سکنے آں۔‏

4.‏ اَسی کیہڑی گل توں بےحوصلہ ہو سکنے آں؟مثال دَوو۔‏

⁴ کجھ بھین بھرا ودھدی عمر یاں بیماری دی وجہ توں یہوواہ دی خدمت چ اوہ سب نئیں کر پاندے جو اوہ کر‌نا چاہندے نیں۔ ایس وجہ توں اوہ بے حوصلہ ہو جاندے نیں۔ بھین کیرل دے نال وی اِنج ای ہویا۔ اِک وقت سی کہ اوہ اِک ایہو جہے علاقے چ مُنادی کر‌دی سی جِتھے مبشراں دی بڑی ضرورت سی۔ اوس ویلے اوہنے 35 لوکاں نُوں بائبل کورس کر‌ایا تے کئی لوکاں دی مدد کیتی کہ اوہ اپنی زندگی یہوواہ دے ناں کر‌ن تے بپتسمہ لین۔ پر فیر اوہدی صحت وِگڑن لگ پئی تے اپنی بیماری دی وجہ توں اوہنوں زیادہ‌تر وقت گھر چ ای رہنا پیندا سی۔ اوہ کہندی اے:‏ ”‏میں ایس گل نُوں چنگی طرحاں سمجھنی آں کہ اپنی بیماری دی وجہ توں میں ہُن اوہ سارے کم نئیں کر سکدی جیہڑے دُوجے کر سکدے نیں۔ پر فیر وی مینوں لگدا اے کہ میں ایہناں بھین بھراواں جِنّی چنگی مسیحی نئیں آں۔ ایہہ سوچ کے میں بڑی بے حوصلہ ہو جانی آں کہ میں ہُن اوہ سب کجھ نئیں کر سکدی جو میں کر‌نا چاہنی آں۔“‏ بھین کیرل چاہندی اے کہ اوہ یہوواہ دی خدمت لئی جو کجھ وی کر سکدی اے اوہ ضرور کر‌ے تے ایہہ بڑی چنگی گل اے۔ سانوں پورا یقین اے کہ ساڈا خدا بھین کیرل دے حالاتاں نُوں چنگی طرحاں سمجھدا اے تے بھین دی خدمت دی بڑی قدر کر‌دا اے۔‏

5.‏ (‏الف)‏ جے اَسی ایس وجہ توں بے حوصلہ ہو جانے آں کہ اَسی یہوواہ دی خدمت چ اوہ سب نئیں کر پا رہے جو اَسی کر‌نا چاہنے آں تے سانوں کیہڑی گل یاد رکھنی چاہی دی اے؟ (‏ب)‏ تصویر دے مطابق اِک بھرا کیویں ساری زندگی جی جان نال یہوواہ دی خدمت کر‌دا رہیا؟‏

⁵ جے تُسی کدی کدی ایس وجہ توں بے حوصلہ ہو جاندے او کہ تُسی یہوواہ لئی اوہ سب نئیں کر پا رہے جو تُسی کر‌نا چاہندے او تے اپنے آپ کولوں پچھو:‏ ”‏یہوواہ میرے کولوں کیہہ چاہندا اے؟“‏ یہوواہ چاہندا اے کہ تُسی اپنے حالاتاں مطابق اوہدے لئی جو کجھ وی کر سکدے او، اوہ جی جان نال کر‌و۔ فرض کر‌و کہ اِک 80 سال دی بھین ایس وجہ توں بےحوصلہ ہو جاندی اے کہ ہُن اوہ مُنادی چ اوناں کم نئیں کر سکدی جِنّاں اوہ 40 سال دی عمر چ کر‌دی سی۔ اوہنوں لگدا اے کہ اوہ یہوواہ دی خدمت چ جو کجھ وی کر رہی اے اوہ جی جان نال کر رہی اے پر یہوواہ ایہدے توں خوش نئیں اے۔ کیہہ ایہہ گل سچ اے؟ ذرا سوچو کہ اوہ 40 سال دی عمر چ جی جان نال یہوواہ دی خدمت کر رہی سی تے ہُن 80 سال دی عمر چ وی اوہ پوری لگن نال یہوواہ دی خدمت کر رہی اے تے ایہدا مطلب ایہہ وے کہ اوہنے کدی وی یہوواہ دی خدمت جی جان نال کر‌نا نئیں چھڈیا۔ جے اَسی ایہہ سوچنے آں کہ اَسی یہوواہ لئی جو کجھ وی کر رہے آں اوہ اوہنوں خوش کر‌ن لئی کافی نئیں اے تے فیر سانوں یاد رکھنا چاہی دا اے کہ ایس گل دا فیصلہ یہوواہ کر‌دا اے کہ اوہنوں خوش کر‌ن لئی اوہدی خدمت چ سانوں کِنّاں کم کر‌نا چاہی دا اے۔ جے اَسی جی جان نال یہوواہ دی خدمت کر‌ن دی کوشش کر‌اں گے تے ایہدے چ کوئی شک نئیں کہ یہوواہ کہوے گا:‏ ”‏شاباش!‏“‏—‏متی 25:‏20-‏23 تے غور کر‌و۔‏

6.‏ اَسی بھین ماریہ توں کیہہ سکھ سکنے آں؟‏

⁶ ایہہ سوچن دی بجائے کہ اَسی یہوواہ دی خدمت چ کیہہ نئیں کر سکدے جے اَسی ایہہ سوچئے کہ اَسی اوہدی خدمت چ کیہہ کر سکنے آں تے فیر ساڈے لئی خوش رہنا اسان ہوئے گا۔ ذرا بھین ماریہ دی مثال تے غور کر‌و، جنہوں اِک ایہو جہی بیماری اے جدی وجہ توں اوہ زیادہ دیر مُنادی نئیں کر سکدی۔ شروع شروع چ ایس وجہ توں اوہ بڑی بے حوصلہ ہو گئی۔ اوہنوں لگدا سی کہ اوہ کسے کم دی نئیں اے۔ پر فیر اوہنے اپنی کلیسیا دی اِک بھین تے غور کیتا جیہڑی اپنی بیماری دی وجہ توں بستر توں نئیں اُٹھ سکدی سی۔ اوہنے فیصلہ کیتا کہ اوہ اوس بھین دی مدد کر‌ے گی۔ اوہ کہندی اے:‏ ”‏میں اوس بھین نال مل کے فون دے ذریعے تے خط لکھ کے لوکاں نُوں گواہی دین دا پروگرام بنایا۔ جدوں وی میں اوس بھین نال مل کے مُنادی کر‌نی ساں تے مینوں ایس گل توں بڑی خوشی تے سکون مِلدا سی کہ میں اوس بھین دی مدد کر پائی آں۔“‏ جدوں اَسی ایس گل تے دھیان دین دی بجائے کہ اَسی کیہہ نئیں کر سکدے ایس گل تے دھیان دَواں گے کہ اَسی کیہہ کر سکنے آں تے ساڈی خوشی ودھے گی۔ پر جے اَسی یہوواہ دی ہور زیادہ خدمت کر سکنے آں یاں فیر اَسی اوہدی خدمت چ کوئی کم بڑی چنگی طرحاں کر رہے آں تے فیر سانوں کیہڑیاں گلاں یاد رکھنیاں چاہی دِیاں نیں؟‏

7.‏ پطرس رسول نے مسیحیاں نُوں کیہہ ہدیت دِتی؟‏

⁷ اپنے پہلے خط چ پطرس رسول نے مسیحیاں نُوں ہدیت دِتی کہ اوہناں نُوں اپنی قابلیت نُوں اپنے ہم‌ایماناں دا حوصلہ ودھان لئی استمال کر‌نا چاہی  دا اے۔ اوہنے کہیا:‏ جیس حد تک توانوں کوئی نعمت مِلی اے ایہنوں اِک دُوجے دی خدمت لئی استمال کر‌و کیونکہ تُسی خدا دی عظیم رحمت دے چنگے مختار او۔ (‏1-‏پطرس 4:‏10‏)‏ سانوں ایہہ سوچ کے اپنیاں مہارتاں نُوں استمال کر‌ن توں پچھے نئیں ہٹنا چاہی دا کہ دُوجے بھین بھرا ساڈے توں سڑن گے یاں فیر بےحوصلہ ہو جان گے۔ جے اَسی اِنج کر‌اں گے تے اَسی یہوواہ نُوں اوہ نئیں دے رہے ہوواں گے جو اَسی دے سکنے آں۔‏

8.‏ 1-‏کُرنتھیوں 4:‏6، 7 مطابق سانوں اپنیاں صلاحیتاں بارے شیخی کیوں نئیں مارنی چاہی دی؟‏

⁸ سانوں اپنیاں صلاحیتاں نُوں یہوواہ دی خدمت کر‌ن لئی پوری طرحاں استمال کر‌نا چاہی دا اے۔ پر سانوں کدی وی ایہناں دی وجہ توں شیخی نئیں مارنی چاہی دی۔ ‏(‏1-‏کُرنتھیوں 4:‏6، 7 نُوں پڑھو۔)‏ مثال لئی، ہو سکدا اے کہ تُسی بڑی چنگی طرحاں بائبل کورس کر‌اندے او۔ اپنی ایس مہارت نُوں استمال کر‌ن توں پچھے نہ ہٹو۔ پر کدی وی ایہدے بارے شیخی نہ مارو۔ فرض کر‌و کہ توانوں مُنادی کر‌دے ویلے بڑا چنگا تجربہ ہویا اے۔ تُسی کسے نُوں بائبل کورس کر‌انا شروع کیتا اے۔ ظاہر اے کہ تُسی خوش او تے ایہدے بارے دُوجے بھین بھراواں نُوں وی دَسنا چاہندے او۔ پر جدوں تُسی مُنادی دے بعد بھین بھراواں نُوں مِلدے او تے اِک ہور بھین دَسدی اے اوہنے کسے نُوں اِک رسالہ دِتا اے۔ سو تُسی کسے نال بائبل کورس شروع کیتا اے، تے بھین نے کسے نُوں رسالہ دِتا اے۔ ایس موقعے تے تُسی کیہہ کر‌و گے؟ توانوں پتہ اے کہ جے تُسی بھین بھراواں نُوں دَسو گے کہ تُسی کسے نال بائبل کورس شروع کیتا اے تے اوہناں نُوں بڑی ہمت ملے گی۔ پر تُسی فیصلہ کر‌دے او کہ تُسی ایہہ گل اوہناں نُوں کسے ہور موقعے تے دَسو گے تاکہ جیہڑی بھین نے رسالہ دِتا اے اوہ ایہہ محسوس نہ کر‌ے کہ اوہ تواڈے جِنّی ماہر استاد نئیں اے۔ ایہہ بوہت ودھیا گل ہوئے گی۔ پر ایس وجہ توں دُوجیاں نُوں بائبل کورس کر‌انا نہ چھڈو۔ تواڈے اندر دُوجیاں نُوں چنگی طرحاں بائبل کورس کر‌ان دی جیہڑی صلاحیت اے اوہنوں استمال کر‌و۔‏

9.‏ سانوں اپنیاں صلاحیتاں نُوں کیویں استمال کر‌نا چاہی دا اے؟‏

⁹ ایہہ گل ہمیشاں یاد رکھو کہ ساڈے اندر جیہڑی وی صلاحیت اے، اوہ سانوں یہوواہ وَلّوں ملی اے۔ سانوں اپنی کسے وی صلاحیت نُوں اپنی واہ واہ لئی نئیں سگوں کلیسیا دے فائدے لئی استمال کر‌نا چاہی دا اے۔ (‏فِلپّیوں 2:‏3‏)‏ جدوں اَسی اپنی طاقت تے صلاحیتاں نُوں یہوواہ دے کم لئی استمال کر‌اں گے تے سانوں بڑی خوشی ملے گی۔ ایہہ خوشی سانوں ایس لئی نئیں ملے گی کیونکہ اَسی یہوواہ لئی دُوجیاں نالوں زیادہ کم کر رہے آں یاں اَسی اوہناں توں بہتر آں سگوں سانوں ایہہ خوشی ایس لئی ملے گی کیونکہ اَسی اپنی صلاحیتاں نُوں یہوواہ دی وڈیائی لئی استمال کر رہے آں۔‏

10.‏ دُوجیاں نال اپنا مقابلہ کر‌نا چنگا کیوں نئیں اے؟‏

¹⁰ جے اَسی دھیان نئیں رکھاں گے تے ہو سکدا اے کہ اَسی ایہہ سوچئے کہ جو کم اَسی چنگے طریقے نال کر سکنے آں دُوجے اوہ نئیں کر سکدے۔ مثال لئی، شاید اِک بھرا بڑیاں چنگیاں تقریراں پیش کر‌دا اے پر ہو سکدا اے کہ اوہ اپنے دل چ اِک ایہو جہے بھرا نُوں کم‌تر سمجھے جیہڑا اینیاں چنگیاں  تقریراں پیش نئیں کر‌دا۔ پر اوہ بھرا شاید دُوجیاں دی بڑی مہمان‌نوازی کر‌دا اے، اپنے بچیاں دی بڑی چنگی تربیت کر رہیا اے تے بڑی لگن نال مُنادی کر رہیا اے۔ اَسی یہوواہ دے بڑے شکرگزار آں کہ اوہنے ساڈے بھین بھراواں نُوں اینیاں زیادہ صلاحیتاں دِتیاں نیں جنہاں نُوں اوہ یہوواہ دی خدمت کر‌ن تے دُوجیاں دی مدد کر‌ن لئی استمال کر رہے نیں۔‏

11.‏ سانوں یسوع مسیح دی مثال تے عمل کر‌ن دی کوشش کیوں کر‌نی چاہی دی اے؟‏

¹¹ ایہہ سچ اے کہ سانوں دُوجیاں نال اپنا مقابلہ نئیں کر‌نا چاہی دا پر اَسی یہوواہ دے بندیاں توں بوہت کجھ سکھ سکنے آں۔ آؤ ایس بارے یسوع مسیح دی مثال تے غور کر‌ئیے۔ اَسی یسوع مسیح وانگوں بےعیب تے نئیں، پر اوہنے جیہڑیاں خوبیاں ظاہر کیتیاں تے جیہڑے کم کیتے اوہناں توں اَسی بوہت کجھ سکھ سکنے آں۔ (‏1-‏پطرس 2:‏21‏)‏ جے اَسی یسوع دی مثال تے چلن دی پوری کوشش کر‌اں گے تے اَسی ہور بہتر مسیحی بن جاواں گے تے ہور بہتر طریقے نال مُنادی کر پانواں گے۔‏

12، 13.‏ اَسی بادشاہ داؤد توں کیہہ سکھ سکنے آں؟‏

¹² بائبل چ یہوواہ دے بوہت سارے بندیاں دا ذکر مِلدا اے جنہاں نے عیب‌دار ہون دے باوجود ساڈے لئی بڑی چنگی مثال قائم کیتی اے۔ (‏عبرانیوں 6:‏12‏)‏ ایہناں وچوں اِک بادشاہ داؤد سی جدے بارے یہوواہ خدا نے کہیا:‏ اوہدے توں میرا دل خوش اے۔ (‏اعمال 13:‏22‏)‏ پر داؤد بادشاہ توں وی غلطیاں ہوئیاں تے اوہدیاں کجھ غلطیاں تے بوہت وڈیاں سن۔ پر فیر وی اوہ ساڈے لئی بڑی چنگی مثال اے۔ اَسی ایہہ گل کیوں کہہ سکنے آں؟ کیونکہ جدوں یہوواہ نے اوہدی درستی کیتی تے اوہنے اَگوں صفائیاں نئیں پیش کیتیاں۔ ایہدی بجائے اوہنے اپنیاں غلطیاں نُوں منیا تے دلوں توبہ کیتی۔ ایس وجہ توں یہوواہ نے اوہنوں معاف کر دِتا۔—‏زبور 51:‏3، 4،‏ 10-‏12‏۔‏

¹³ جے اَسی داؤد بادشاہ توں سکھنا چاہنے آں تے سانوں اپنے آپ کولوں ایہہ سوال پچھنے چاہی دے نیں:‏ ”‏جدوں کوئی میری درستی کر‌دا اے تے میں کیہہ کر‌نا واں؟ کیہہ میں فوراً اپنی غلطی من لینا واں یاں فیر کیہہ میں اَگوں صفائیاں دینا واں؟ کیہہ میں فوراً دُوجیاں تے اِلزام لا دینا واں؟ یاں میں پوری کوشش کر‌نا واں کہ دُبارہ اوہ غلطی نہ کر‌اں؟“‏ تُسی ایہناں سوالاں تے اوہدوں وی غور کر سکدے اوہ جدوں تُسی پاک‌کلام توں خدا دے کسے ہور بندے بارے پڑھدے او۔ کیہہ اوہناں نُوں وی ایہو جہیاں مشکلاں دا سامنا کر‌نا پیا جنہاں دا تُسی سامنا کر رہے او؟ اوہناں چ کیہڑیاں خوبیاں سن؟ یہوواہ دے ہر بندے دی مثال تے غور کر‌دے ویلے اپنے آپ توں پچھو:‏ ”‏میں یہوواہ دے ایس بندے وانگوں کیویں بن سکنا واں؟“‏

14.‏ سانوں اپنے ہم‌ایماناں دی مثال تے غور کر‌ن نال کیہہ فائدہ ہو سکدا اے؟‏

¹⁴ سانوں اپنے ہم‌ایماناں دی مثال تے غور کر‌ن نال وی بڑا فائدہ ہو سکدا اے، فیر بھانویں اوہ جوان ہون یاں وڈیرے۔ مثال لئی، شاید تواڈے ذہن چ اپنی کلیسیا دا کوئی ایہو جیہا بھرا یاں بھین آئے جنہوں غلط کم کر‌ن دے دباؤ دا سامنا کر‌نا پے رہیا اے، اپنے گھر والیاں وَلّوں مخالفت  دا سامنا کر‌نا پے رہیا اے یاں اوہدی صحت اینی چنگی نئیں اے، پر فیر وی اوہ یہوواہ دا وفادار اے۔ اوس بھین یاں بھرا دِیاں کیہڑیاں خوبیاں تُسی اپنے اندر پیدا کر‌نا چاہندے او؟ اوہناں دی مثال تے غور کر‌ن نال تُسی سکھ پاؤ گے کہ تُسی وی مشکلاں دے باوجود یہوواہ دے وفادار کیویں رہ سکدے او۔ سانوں ایہہ ویکھ کے بڑی خوشی ہوندی اے کہ ساڈے بھین بھرا ساڈے لئی اینی ودھیا مثال قائم کر رہے نیں۔—‏عبرانیوں 13:‏7؛‏ یعقوب 1:‏2، 3‏۔‏

15.‏ پولُس رسول دی کیہڑی نصیحت تے عمل کر کے اَسی خوشی نال یہوواہ دی خدمت کر‌دے رہ سکنے آں؟‏

¹⁵ سانوں ساریاں نُوں کلیسیا چ امن تے اتحاد نُوں قائم رکھن دی پوری کوشش کر‌نی چاہی دی اے۔ پہلی صدی عیسوی دے مسیحیاں دی مثال تے غور کر‌و۔ اوہناں ساریاں چ فرق فرق صلاحیتاں سن تے اوہناں نُوں فرق فرق ذمےداریاں دِتیاں گئیاں سن۔ (‏1-‏کُرنتھیوں 12:‏4،‏ 7-‏11‏)‏ پر ایس وجہ توں اوہ اِک دُوجے نال مقابلہ یاں لڑائی نئیں کر‌ن لگ پئے سن۔ پولُس رسول نے ایہناں مسیحیاں نُوں نصیحت کیتی کہ اوہ مسیح دے جسم نُوں مضبوط رکھن لئی جو کجھ وی کر سکدے نیں، اوہ ضرور کر‌ن۔ پولُس نے اِفسس دی کلیسیا دے مسیحیاں نُوں خط چ لکھیا:‏ جدوں ہر عضو صحی طرحاں کم کر‌دا اے تے جسم ودھدا پھلدا اے تے اوہ محبت دی وجہ توں ہور مضبوط ہوندا جاندا اے۔ (‏اِفسیوں 4:‏1-‏3،‏ 11، 12،‏ 16‏)‏ جیہڑے مسیحیاں نے پولُس دی نصیحت تے عمل کیتا، اوہناں دی وجہ توں کلیسیا دا امن تے اتحاد ہور ودھیا تے اِنج دا اتحاد تے امن اَج ساڈیاں کلیسیاواں چ وی اے۔‏

16.‏ سانوں کیہہ کر‌ن دا پکا ارادہ کر‌نا چاہی دا اے؟‏

¹⁶ ایس گل دا پکا ارادہ کر‌و کہ تُسی دُوجیاں نال اپنا مقابلہ نئیں کر‌و گے۔ ایہدی بجائے یسوع مسیح توں سکھو تے اپنے اندر اوہدے ورگیاں خوبیاں پیدا کر‌ن دی کوشش کر‌و۔ یہوواہ دے اوہناں بندیاں توں سکھو جنہاں دا ذکر پاک‌کلام چ مِلدا اے تے اوہناں توں وی جیہڑے اَج ساڈے لئی چنگی مثال قائم کر رہے نیں۔ جی جان نال یہوواہ دی خدمت کر‌دے رہوو تے ایس گل دا پکا یقین رکھو کہ خدا بےاِنصاف نئیں اے، اوہ تواڈی محنت تے محبت نُوں نئیں بُھلے گا۔ ‏(‏عبرانیوں 6:‏10 نُوں پڑھو۔)‏ خوشی نال یہوواہ دی خدمت کر‌دے رہوو تے یاد رکھو کہ جدوں یہوواہ ویکھدا اے کہ تُسی اوہدے لئی اوہ سب کجھ کر رہے اوہ جو تُسی کر سکدے او تے اوہ بوہت خوش ہوندا اے۔‏