1. Dahme kin wadohng kitail peren laud?

 SIOHWA ketin kupwurki kitail en kin peren. Kitail ese met pwehki peren iei ehu wahn sapwellime manaman. (Kal. 5:22) Pwehki kihwei kin kaperen sang ale, kitail kin uhdahn peren ni atail doadoahk laud nan kalohk oh sewese riatail Kristian kan ni soangsoangen ahl akan.​—Wiewia 20:35.

2-3. (a) Nin duwen me Kalesia 6:4 mahsanih, soahng riau dah me pahn sewese kitail en ahnekihte peren nan atail doadoahk ong Siohwa? (b) Dahme kitail pahn koasoiapene nan iren onop wet?

² Nin duwen me Kalesia 6:4 mahsanih, wahnpoaron Pohl koasoia soahng riau me pahn sewese kitail en ahnekihte peren. (Wadek.) Keieu, kitail anahne patohwanohng Siohwa uwen atail kak koaros. Ma kitail kin kihong ih uwen atail kak koaros, kitail pahn peren. (Mad. 22:36-38) Keriau, kitail en dehr kapahrekihong kitail meteikan. Sohte lipilipil dahme atail kehl, kaiahn, de koahiek, kak kahrehiong kitail en kapwaiada, kitail anahne kalahngankihong Siohwa. Met pwehki e ketikihong kitail soahng koaros. Ahpw ma ekei kin koahiek sang kitail nan ekei wiepen kalohk, kitail en perenki arail kin doadoahngki arail koahiek pwehn kapinga Siohwa, ahpw kaidehn pwehn wiahiong irail en mwahusang meteikan, de ong kahrepe roporop kan. Eri kitail en dehr siai ong irail, ahpw kitail en sukuhlsang irail.

³ Nan iren onop wet, kitail pahn kilang dahme kak sewese kitail ni atail kin mworuskihla atail sohte kak wia soahng koaros me kitail men wia nan atail papah Siohwa. Kitail pahn pil koasoiapene ia duwen atail kak doadoahngki atail koahiek ni ahl me keieu mwahu, oh dahme kitail kak sukuhlkihsang mehn kahlemeng en meteikan.

4. Soahng dah kan me kak kahrehiong kitail en mworusala? Menlau kihda ehu karasaras.

⁴ Ekei kitail sohte kak wia soahng koaros me kitail men wia nan atail papah Siohwa pwehki kitail mahmahla de soumwahu, oh met kin kahrehiong kitail en mworus. Ih met me wiawihong Carol. Mahso, e kin kalohk wasa kan me anahn laud mie ong kalohk. Ahnsowo, e kin onop Paipel rehn aramas 35 oh sewesehier ekei ren inoukihong Siohwa arail mour oh papidaisla. Eh doadoahk en kalohk kin uhdahn pweida mwahu! Ahpw e uhdahn soumwahula oh pali laud ahnsou, e kin mihte ni imweo. Carol koasoia: “I ese me pwehki I soumwahu, I sohte kak wia dahme meteikan kak wia, ahpw met kin kahrehiong ien pehm me I sohte lelepek duwehte irail. I sohte kak wia soahng koaros me I men wia, oh met kin uhdahn kansensuwedih ie.” Carol men wia uwen eh kak koaros ong Siohwa. Met uhdahn mwahu! Kitail kak kamehlele me atail Koht limpoako ketin kupwurperenkihda eh kin wia uwen eh kak koaros.

5. (a) Dahme kitail en tamataman ma kitail mworuskihla atail sohte kak wia soahng koaros me kitail men wia? (b) Nin duwen me kilelo kasalehda, ia duwen brothero eh kin wiewia uwen eh kak koaros nan eh doadoahk ong Siohwa?

⁵ Ma ke kin ekei pak mworusala pwehki soahng kan me ke sohte kak wia, pein idek rehmw, ‘Dahme Siohwa ketin kupwurki sang ie?’ Siohwa ketin kupwurki ken wia uwen omw kak nan irair me ke mi loale ahnsou wet. Medewehla met: Sister men me sounpar 80 samwa mworuskihla eh sohte kak wia uwen me e men wia nan kalohk, duwehte me e kin wia ni ahnsou me e sounpar 40 samwa. E kin medewe me mendahki e kin wiewia uwen eh kak koaros, met sohte kin kaperenda Siohwa. Ahpw ia duwe, met mehlel? Ma sistero wia uwen eh kak ni ahnsou me e sounpar 40 samwa oh e pil kin wia uwen eh kak ni eh sounpar 80 samwa, met wehwehki me e sohte uhdihsang wia uwen eh kak. Ma kitail tepida pehm me dahme kitail kin wiewia sohte itar pwehn kaperenda Siohwa, kitail anahne tamataman me Siohwa me pahn ketin pilada dahme pahn itar pwehn kaperenda ih. Ma kitail wia uwen atail kak koaros, Siohwa pahn uhdahn ketin kupwurperenkin kitail!​—Pil kilang Madiu 25:20-23.

6. Dahme kitail kak sukuhlkihsang mehn kahlemeng en Maria?

⁶ E pahn mengei ong kitail en ahneki peren ma kitail medemedewehte dahme kitail kak wia, a kaidehn dahme kitail sohte kak wia. Medewehla sister men me adaneki Maria, me ahneki soumwahu ehu me kahrehiong ih en sohte kak wia uwen eh kak nan kalohk. Nin tapio, e mworusala oh pehm me sohte katepe. Ahpw mwuhr, e medewehla duwen sister men nan mwomwohdiso me kin wonohn tohr nan peht, oh e koasoanehdi en sewese. Maria koasoia: “I koasoanehdi en iang ih kalohk nan delepwohn oh nting kisinlikou. Ahnsou koaros me se kin doadoahkpene, I kin pwurala imweio peren oh nsenamwahu pwehki I kak sewese rieio.” Kitail pil kak kalaudehla atail peren ni atail medemedewehte dahme kitail kak wia a kaidehn dahme kitail sohte kak wia. Ahpw ia duwen ma kitail kak wia laudsang met, de mie soahng kei nan sapwellimen Siohwa doadoahk me kitail kin koahiek en wia?

7. Kaweid mwahu dah me wahnpoaron Piter kihong Kristian kan?

⁷ Nan keieun nah kisinlikowo, wahnpoaron Piter kangoangehki rie Kristian kan en doadoahngki arail koahiek pwehn kangoange iengarail tohnkaudok kan. E ntingihedi: “Ni  uwen me emenemen alehkihdi kisakis ehu, en papahki emenemen nin duwen sounapwalih mwahu en sapwellimen Koht kadek sapan.” (1 Pit. 4:10) Kitail en wia uwen atail kak en doadoahngki atail koahiek kan oh dehr pwunodki ma meteikan kin peirinki de mworuski. Ma kitail kin pwunodki, eri kitail sohte kin kihong Siohwa uwen atail kak koaros.

8. Nin duwen me 1 Korint 4:6, 7 mahsanih, dahme kahrehda kitail en dehr suweiki atail koahiek kan?

⁸ Kitail anahne doadoahngki atail koahiek ni uwen atail kak, ahpw kitail anahne kanahieng en dehr suweiki. (Wadek 1 Korint 4:6, 7.) Karasepe, ele ke kin koahiek en tapiada onop en Paipel kan. Ke anahne doadoahngki koahieko! Ahpw e kesempwal en tamataman en dehr suweiki duwen met. Ia duwen ma me keren ele mie mehkot kaperen wiawi nan kalohk oh ke tapiada onop en Paipel ehu? Uhdahn ke men padahkihong omw pwihnen kalohko duwen met. Ahpw ni omw lella rehrail, sister men koasoakoasoiahiong irail duwen eh kihla makasihn ehu. E kihla makasihn ehu, ahpw ke tapiada onop en Paipel ehu. Dahme ke pahn wia? Ke ese me dahme wiawihong uhk pahn kangoange omw pwihnen kalohko, ahpw ele ke pilada en awih oh padahkihong irail mwuhr pwehki ke sohte men sister me kihla makasihno en pehm me e sohte koahiek duweiuk. Wiewia kadek ehu met. Ahpw dehr uhdihsang tapiada onop en Paipel. Ke ahneki koahiek wet, eri doadoahngki!

9. Ia duwen atail pahn doadoahngki atail kisakis kan?

⁹ Kitail en tamataman me sohte lipilipil soangen koahiek dah me ele kitail ahneki, e wia kisakis kei sang rehn Koht. Kitail anahne doadoahngki soangen kisakis pwukat pwehn kangoange mwomwohdiso, a kaidehn pwehn wadohng kitail kaping. (Pil. 2:3) Ni atail doadoahngki atail kehl oh koahiek pwehn wia kupwuren Koht, e pahn mie kahrepen atail peren, kaidehn pwehki kitail kin wia laudsang dahme meteikan kin wia de songosong en mwahusang irail, ahpw pwehki kitail kin doadoahngki atail kisakis pwehn wahdo kaping ong Siohwa.

10. Dahme kahrehda e sohte mwahu en kapahrekiong kitail meteikan?

¹⁰ Ma emen sohte kanahieng, e kakete tepida kapahrekiong dahme e maiong ong dahme emen sohte maiong. Karasepe, ele brother men kin maiong wia kapahrek en wehipokon. Ih ah kehlo me. Ahpw ele e kin kilengdiong brother teio me sohte koahiek en padahk. Ahpw ele brother teio kin koahiek en kasalehda kadek, kaiahnehda nah seri kan, de ngoang  nan kalohk. Ia uwen atail kin kalahnganki me mie riatail Kristian koahiek tohto me kin doadoahngki arail koahiek kan pwehn papah Siohwa oh sewese meteikan!

11. Dahme kahrehda kitail anahne idawehn sapwellimen Sises mehn kahlemeng?

¹¹ Mendahki kitail en dehr kapahrengkihong kitail meteikan, kitail kak sukuhlki soahng tohto sang sapwellimen Siohwa ladu lelepek kan. Mehn kahlemeng keieu mwahu iei Sises. Mendahki kitail sohte unsek duwehte Sises, kitail kak sukuhlki soahng tohto sang sapwellime irair kaselel kan oh soahng mwahu kan me e ketin wia. (1 Pit. 2:21) Ni atail kin wia uwen atail kak en idawehn sapwellime mehn kahlemeng, kitail kin kamwahwihala atail papah Siohwa oh kalaudehla atail koahiek nan kalohk.

12-13. Dahme kitail kak sukuhlkihsang nanmwarki Depit?

¹² Nan Paipel, kitail kak diar mehn kahlemeng en ohl oh lih lelepek tohto me kitail kak alasang mendahki irail sohte unsek. (Ipru 6:12) Medewehla Nanmwarki Depit me Siohwa ketin kamwarenki “ohl emen me kin kaperenda kupwurei.” (Wiewia 13:22) Ahpw Depit sohte unsek. E wiahda sapwung laud kei. Ahpw mendahki met, e wia mehn kahlemeng mwahu ong kitail. Dahme kahrehda? Pwehki ni ahnsou me emen kapwungala ih, e sohte song en rapahki kahrepe kan. Ahpw e pwungki kaweid kehlailo oh uhdahn koluhkihla dahme e wiao. Pwehki met, Siohwa ketin mahkohng.​—Mel. 51:3, 4, 10-12.

¹³ Kitail kak sukuhlsang Depit ni atail pein idek rehtail: ‘Dahme I kin wia ma I kin ale kaweid? I mwadang pohnese ei sapwung kan, de I kin song en kihda kahrepe kan? I kin mwadang kapwukoahki meteikan? I kin nanti laud en dehr pwurehng wiahda sapwung ko?’ Ke pil kak idek soangen peidek pwukat ni omw wadek duwen ohl oh lih lelepek teikan nan Paipel. Ia duwe, arail kahpwal ko duwehte omw kahpwal kan? Soangen irair kaselel dah kan me re kin kasalehda? Ni omw wadek duwen emenemen irail, pein idek rehmw: ‘Ia duwen ei kak uhdahn duwehte sapwellimen Siohwa ladu lelepek menet?’

14. Ia duwen atail kak paiekihda atail tehk iengatail tohnkaudok kan?

¹⁴ Kitail pil kak paiekihda atail tehk iengatail tohnkaudok kan, me pwulopwul oh mah. Karasepe, ke kak medewe emen nan omw mwomwohdiso me kin ni lelepek dadaur pahn  kahpwal ehu, duwehte kasongosong sang meteikan, uhwong sang peneinei, de soumwahu? Mie irair kaselel kan rehn aramaso me ke men alasang? Ni omw medemedewe eh mehn kahlemeng mwahu, ele ke pahn sukuhlkihsang soahng mwahu kan pwehn kak dadaurete pahn pein omw kahpwal kan. Ia uwen atail kalahnganki me riatail Kristian kan kin wia mehn kahlemeng mwahu en pwoson!​—Ipru 13:7; Seims 1:2, 3.

15. Kaweid dahieu me wahnpoaron Pohl kihda me kak sewese kitail en pousehlahte peren?

¹⁵ Emenemen kitail anahne wia uwen atail kak pwehn wiahda popohl oh minimin nan mwomwohdiso. Medewehla tepin Kristian ko. Mie soangsoangen koahiek kan oh pwukoa kan me re ahneki. (1 Kor. 12:4, 7-11) Ahpw met sohte kin kahrehiong irail en siaipene de liaktohrohr. Ahpw, Pohl kangoange emenemen irail en wia dahme anahn pwehn “kauwada paliwar en Krais.” Pohl ntingkilahng mehn Episos kan: “Ni ehuehu kisehn paliwaro eh kin doadoahk mwahu, met kin sewese kekeirdahn paliwaro ni eh kin kokouda ni limpoak.” (Ep. 4:1-3, 11, 12, 16) Irail kan me kin kapwaiada met, kin wiahda popohl oh miniminpene​—soangen irair pwukat iei me kitail kin kilang nan atail mwomwohdiso kan rahnwet.

16. Dahme kitail anahne koasoanehdi teng en wia? (Ipru 6:10)

¹⁶ Koasoanehdi teng en dehr kapahrekihong uhk meteikan. Ahpw sukuhlsang Sises oh nantihong alasang sapwellime irair kaselel kan. Sukuhlsang mehn kahlemeng en pwoson sang nan Paipel oh nan atail ahnsou. Ni omw doulahte wia uwen omw kak, kamehlele me Siohwa ‘sohte pahn ketin meliehla omw doadoahk.’ (Wadek Ipru 6:10.) Pousehlahte peren nan omw papah Siohwa, oh ese me e kin ketin kupwurperenki ni omw kin wia uwen omw kak en kaperenda ih.