1. ¿Imataj astawan kusichiwanchej?

 JEHOVAQA munan kusisqas kananchejta. Chaytataj yachanchej Diospa espíritu santonpa poqoyninmanta ujqa kusikuyniyoj kay kasqanrayku (Gál. 5:22). Wajkunaman qorispaqa aswan kusisqa kanchej. Chayrayku predicanapaj, hermanosta imaynallamantapis yanapanapaj tukuy atisqanchejta kallpachakuspaqa, aswan kusisqa kanchej (Hech. 20:35).

2, 3. 1) Gálatas 6:4 nisqanman jina, ¿imastaj yanapawasun kusisqallapuni Jehová Diosta sirvinapaj? 2) ¿Imastá kay yachaqanapi yachakusun?

² Apóstol Pabloqa Gálatas 6:4 (leey) versiculopi nerqa, kusisqallapuni kanapaj iskay imas yanapanawanchejta. Ñaupaj kaj, Jehovapaj tukuy atisqanchejta llankʼaspaqa kusisqa kasun (Mat. 22:36-38). Iskay kaj, mana wajkunawan kikinchakunapaj sumajta qhawarikuna. Jehovaman mayta agradecekunanchej tiyan sanitos kasqanchejmanta, llajtanpi yachachiwasqanchejmanta chayrí imatapis sumajta ruwayta yachasqanchejmanta. Imajtinchus Jehová tukuy imata qowanchej. Chantapis wakin hermanos predicacionpi aswan sumajta ruwasqankumanta kusikunanchej tiyan. Imajtinchus paykunaqa imatachus ruwayta yachasqankuwan Jehová Diosta jatunchashanku, nitaj paykunachu jatunchakushanku chayrí allinnillankutachu maskʼashanku. Chayrayku paykunawan atipanakupi kananchejmantaqa, paykunamanta yachakuna.

³ Kay yachaqanapeqa yachakusun manaña Jehovapaj munasqanchejman jina ruwayta atispa desanimakojtinchej, imatachus ruwananchejta. Yachakullasuntaj imatachus ruwayta yachasqanchejwan imaynatachus sumajta yanapakunata, imastachus wajkunamanta yachakuyta atisqanchejtapis.

4. ¿Imajtintaj llakikusunman? Sutʼinchariy.

⁴ Wakin hermanosqa Jehovapaj astawan llankʼayta munanku. Jinapis mana atinkuchu machitus kasqankurayku chayrí onqosqetas kasqankurayku, chaytaj mayta paykunata llakichin. Hermana Carolpis ajinapi rikukorqa. Uj tiempopi payqa maypichus astawan predicajkuna necesitakun chaypi yanapakorqa. Chay tiempopi payqa 35 estudiosniyoj karqa, ashkha runastataj yanaparqa kausayninkuta Jehovaman qopunankupaj, bautizakunankupajtaj. Payqa may sumajtapuni yanapakorqa. Tiemponmantaj onqoykusqanrayku, niña wasinmanta llojsiyta atejchu. Hermana Carol nin: “Yachani onqosqa kasqayrayku mana wajkuna jina ruwayta atisqayta, chayrayku yuyani mana paykuna jinachu Jehová Diosta munakusqayta. Noqaqa astawan ruwayta munani, jinapis mana atinichu, chaytaj mayta llakichiwan”, nispa. Hermana Carolqa Jehovapaj tukuy atisqanta ruwayta munan. Chaytaj may sumajpuni. Khuyakuyniyoj Diosninchejqa may sumajpajpuni qhawan hermananchej Carol paypaj astawan ruwayta munasqanta.

5. 1) ¿Imatataj yuyarikunanchej tiyan mana munasqanchejman jina Jehovapaj ruwayta atispa? 2) Fotospi rikunchej jina, ¿imaynatá kay hermano jovenmantapacha tukuy atisqanta Jehovata sirverqa?

⁵ Jehovapaj astawan mana ruwayta atisqanchejrayku wakin kutis llakikunchej chayqa, piensarisunman imatachus Jehová sapa ujninchejmanta suyasqanpi. Jehovaqa suyan imatachus paypaj ruwayta atisqanchejman jina kallpachakunanchejta. Uj hermanitapi piensarina, payqa 80 watasniyoj. 40 watasniyoj kashaspa Jehovapaj mayta llankʼarqa, kunanqa manaña ajinata ruwayta atisqanmanta mayta llakikun. Payqa Jehovapaj tukuy atisqanta ruwashaspapis, yuyan Jehová chayta pisipaj qhawasqanta. Chaytaj mana jinachu. Hermanitanchejqa 40 watasniyoj kashaspa Jehovapaj tukuy atisqanta ruwarqa, kunan 80 watasniyojña kaspapis ajinallatapuni ruwashan. Payqa jovenmantapacha Jehovapaj tukuy atisqanta ruwashallanpuni. Ruwasqanchej Jehovata mana kusichishasqanta piensanchej chayqa, yuyarikunanchej tiyan Jehovalla niyta atisqanta mashkhata ruwasqanchejchus payta kusichisqanta. Jehovata sirvinapaj mayta kallpachakusun chayqa, pay niwasun: “Sumajta ruwanki”, nispa (Mat. 25:20-23, kikinchay).

6. ¿Imatá yachakunchej hermananchej Mariamanta?

⁶ Imastachus ruwayta atisqallanchejta ruwanapaj astawan kallpachakusun chayqa, kusisqa kasun. Hermana Mariamanta parlarina. Payqa uj onqoyniyoj kasqanrayku mana anchata predicacionman llojsiyta atinchu. Chaytaj qallariypi mayta llakichej, ni imapaj valesqantataj yuyaj. Jinapis payqa congregacionninmanta uj hermanita niña camanmanta sayariyta atisqanta reparasqa. Chayrayku imaynamantachus yanaparinanpi piensarerqa. María nin: “Wasinman rerqani, paywan telefononejta, cartanejtataj predicanaykupaj. Sapa kuti paywan predicasqaymanta wasiyman kusisqa kutipoj kani, sonqo juntʼasqataj hermanayta yanapasqaymanta”, nispa. Noqanchejpis mayta kusikullasunmantaj, imastachus ruwayta atisqanchejta ruwanapaj astawan kallpachakuspa. Jinapis, ¿imatá ruwasunman Jehovapaj astawan ruwayta atinchej chay, chayri Jehovata sirvinapaj wakin imasta sumajta ruwayta yachanchej chay?

7. ¿Imatataj apóstol Pedro cristianosman yuyaycharqa?

⁷ Apóstol Pedroqa ñaupaj kaj cartanpi hermanosninta nerqa, imatachus allinta ruwayta yachasqankuwan hermanosninkuta yanapanankuta. Pay nerqa: “Sapa ujniykichej ruwanapaj atiyta Diosmanta japʼisqaykichejman  jina purajmanta sirvinakuychej, Diospa jatun khuyakuyninmanta sumaj mayordomos jina”, nispa (1 Ped. 4:10). Imatachus sumajta ruwayta yachasqanchejtaqa ama manchachikuspa ruwana. Nitaj yuyanachu chaywan wajkunata envidiachinanchejta chayrí llakichinanchejta. Manchachikuspaqa Jehovapaj mana tukuy atisqanchejtachu ruwashasunman.

8. Kay 1 Corintios 4:6, 7 nisqanman jina, ¿imaraykutaj mana jatunchakunanchejchu tiyan imatapis sumajta ruwayta yachasqanchejmanta?

⁸ Imatachus ruwayta yachasqanchejta ruwanapajqa mayta kallpachakuna. Jinapis allinta qhawarikuna mana chaymanta jatunchakunapaj (1 Corintios 4:6, 7 leey). Ichapis wakenqa estudiosta qallariyta atillanchej. Chaytataj ruwanallapuni. Imatapis sumajta ruwayta yachasqanchejqa sumajpuni, jinapis chaymanta jatunchakoyqa mana allinchu. Kunallanraj pillamanpis Bibliamanta yachachiyta qallarisqanchejpi piensarina. Chaytaqa predicacionpi hermanosman mayta willariyta munashanchej. Imajtinchus paykunaqa chayta willarejtinchej mayta kusikonqanku. Jinapis predicacionpiña kaspa uyarisunman, uj hermanita hermanosman willarishasqanta wasiyojman uj revistata saqesqanta. Chayta uyarispaqa ichapis waj kutillaña willarisunman mana chay hermanata llakichinapaj. Imaraykuchus payqa uj revistallata saqerqa. Experiencianchejta waj kutillapiña willarispaqa, khuyakoj kasqanchejta rikuchishasunman. Jinapis estudiosta qallariyta atillanchej chayqa, chayta ruwanallapuni.

9. ¿Imatá ruwasunman imatapis sumajta ruwayta yachasqanchejwan?

⁹ Imatapis sumajta ruwayta yachasqanchejqa Diosmanta jamun. Chaywantaj hermanosninchejta yanapana, amataj chaymanta jatunchakunachu (Fili. 2:3). Imatachus sumajta ruwayta yachasqanchejwan, kallpanchejwan ima Jehovaj munayninta ruwaspaqa, kusisqa kasun. Imajtinchus chaytaqa ruwanchej Jehová Diosta jatunchanapaj, mana wajkunamanta astawan ruwayta munaspachu, nitaj wajkunamanta aswan kurajta jina qhawachikuyta munaspachu.

10. ¿Imaraykutaj mana allinchu wajkunawan kikinchakunanchej?

¹⁰ Mana allinta qhawarikuspaqa, imatachus sumajta ruwayta yachasqanchejta, wajkuna mana sumajta ruwayta yachasqankuwan kikinchayta qallarisunman. Kaypi piensarina: Uj hermanoqa sumajta discursosta qoyta yachan. Jinapis payqa sonqonpi yuyan mana pay jina sumajta discursosta qoyta yachaj hermanitomanta, astawan yachasqanta. Jinapis mana pay jina discursaj hermanitoqa, ichapis waj imasta sumajta ruwan. Payqa wasinman wajyarikuyta yachan, wawasninman sumajta yachachin  chayrí predicacionmanpis llojsinpuni. Chayrayku mayta kusikunchej ashkha hermanosninchej imatachus sumajta ruwayta yachasqankuwan Jehovata sirvisqankumanta, wajkunatapis yanapasqankumanta.

11. ¿Imajtintaj Jesús jina kanapaj kallpachakuna tiyan?

¹¹ Wajkunawan kikinchakoyqa manapuni allinchu. Jinapis Diospa kamachisninmantaqa mayta yachakunchej. Jesuspi piensarina. Payqa mana noqanchej jina pantaj runachu karqa. Jinapis pay imayna runachus kasqanmanta, sumaj imasta ruwasqanmantapis mayta yachakusunman (1 Ped. 2:21). Jesús jina ruwanapaj tukuy atisqanchejta kallpachakusun chayqa, aswan sumaj cristianosman tukusun, predicacionpipis aswan sumaj riwasun.

12, 13. ¿Imatá rey Davidmanta yachakusunman?

¹² Bibliapeqa parlan Diospa ashkha kamachisninmanta. Paykunaqa pantaj runas kaspapis, Diosta tukuy sonqo sirverqanku. Paykunamantaqa mayta yachakusunman (Heb. 6:12). Jehovaqa rey Davidmanta kayta nerqa: “Davidta tarini sonqoypa munasqanman jina”, nispa (Hech. 13:22). Jinapis Davidqa pantaj runa karqa, jatuchaj juchaspitaj urmarqa. Paymantapis mayta yachakullasunmantaj. Imajtinchus payqa juchanmanta kʼamisqa kaspa, pantaykusqanta reconocerqa. Chantá kʼamisqankuta japʼikorqa, tukuy sonqotaj arrepientekorqa mana allin imasta ruwasqanmanta. Chayrayku Jehová payta perdonarqa (Sal. 51:3, 4, 10-12).

¹³ Davidmanta yachakunapajqa kay tapuykunapi piensarisunman: “Wajkuna yuyaychawajtinku, ¿imatá ruwani? ¿Juchayta reconocenichu chayri achakistachu churani? ¿Wajkunatachu juchachani? ¿Manaña kikin juchaspi urmanaypaj kallpachakunichu?”. Bibliapi Diospa waj kamachisninmanta leeshaspaqa, chay jina tapuykunapi piensarillasunmantaj. ¿Paykuna noqanchej jina problemasnillayojtajchu karqanku? Kʼamisqa kaspa, ¿imayna kasqankutataj rikucherqanku? Pimantachus leeshasqanchejpi tʼukurispa tapurikusunman: “¿Imatá ruwayman pay jina Jehová Diosta tukuy sonqo sirvinaypaj?”.

14. Hermanosninchejta aguantasqankuta rikuy, ¿imaynatá yanapawanchej?

¹⁴ Kay tiempomanta hermanosninchejmantapis mayta yachakullasunmantaj, jóvenes kajtinkupis chayrí mayores kajtinkupis. Ichá piensarisunman congregacionninchejmanta uj hermanito llakiykunata aguantashasqanpi. Paytaqa ichapis compañerosnin sajra imasman tanqashankuman, familian churanakushanman chayrí onqosqa kashanman. ¿Imatá paymanta yachakusunman? Imaynatachus chay  hermanito llakiyninta aguantasqanta rikuspaqa, noqanchejpis pay jina llakiykunasninchejta aguantanapaj kallpachakusunman. Maytapuni agradecekunchej Diospa llajtanpi chay jina hermanos, hermanas kasqankumanta. Imajtinchus paykuna jina ruwaspaqa mayta kusikunchej (Heb. 13:7; Sant. 1:2, 3).

15. ¿Imaynatataj apóstol Pabloj yuyaychasqan yanapawasun Jehovata kusisqallapuni sirvinapaj?

¹⁵ Jehovata sirvinapaj tukuy atisqanchejta kallpachakusun chayqa, congregacionpi allinta kausakusun, ujchasqataj kasun. Apostolespa tiemponkupi kausaj cristianosmanta parlarina. Paykunaqa sapa uj, Diospa espiritunpa yanapayninwan ashkha imasta ruwarqanku (1 Cor. 12:4, 7-11). Jinapis chayqa mana atipanakusta chayrí tʼaqanakusta rikhurichinankupajchu karqa. Astawanpis Pabloqa sapa ujta kallpacharqa yanapanakunankuta “Cristoj cuerponta wiñachinankupaj”. Pabloqa Efesomanta cristianosman nerqa: “Cuerpoj sapa uj iman ruwananta sumajta juntʼajtin, cuerpoqa sumajta wiñan, munakuypi sumaj sayasqa kananpaj”, nispa (Efe. 4:1-3, 11, 12, 16). Pabloj nisqanta kasukojkunaqa, yanapakorqanku congregacionpi allinta kausakunankupaj, ujchasqataj kanankupaj. Congregacionesninchejpipis chayllatataj rikunchej.

16. ¿Imatataj nipuni ruwananchejchu tiyan? (Hebreos 6:10).

¹⁶ Ni imarayku wajkunawan kikinchakunachu. Astawanqa Jesusmanta yachakuna, pay jina kʼacha runa kanapajtaj kallpachakuna. Diospa ñaupa tiempo kamachisninmanta, kunan tiempo kamachisninmantapis yachakuna. Jehovata sirvinapaj tukuy atisqanchejta kallpachakunallapuni. Imajtinchus Jehovaqa cheqan, manataj qonqapunchu imastachus paypaj ruwasqanchejta (Hebreos 6:10 leey). Kusisqallapuni Jehovata sirvina. Imajtinchus payqa may allinpaj qhawan tukuy sonqo payta sirvinapaj kallpachakusqanchejta.