1. ¿Imata ruwaspataq kusisqa kachwan?

 JEHOVA DIOSQA munan kusisqa kananchiktam. Chayraykum atiyninwan yanapawanchik kusisqa kananchikpaq (Gal. 5:22). Diosmanta astawan willakuspanchikqa hinaspa iñiqmasinchikkunata astawan yanapaspanchikqa, kusisqam tarikusunchik. ‘Imapas quqmiriki aswan kusisqaqa imapas chaskiqmantaqa’ (Hech. 20:35).

2, 3. (1) ¿Imataq yanapawachwan Galatas 6:4 nisqanman hinaqa kusisqalla kanapaq? (2) ¿Imakunamantam yachasun kay yachachikuypi?

² ¿Imataq yanapawasun tukuy tiempo kusisqa kanapaq? Apostol Pablom nirqa chaypaq imakuna yanapawananchikmanta. Chayqa tarikun Galatas 6:4 (leey). Punta kaq, Jehova Diospaq tukuy sunqunchikmanta atisqanchikman hina ruwaspaqa kusisqam kasun. Chaypaqqa llapallanchikmi kallpanchakunanchik (Mat. 22:36-38). Iskay kaq, hukkunawanqa manam tupachikunanchikchu. Imawanpas mana unquspaqa, imata ruwanapaqpas yachachisqa kaspaqa, imatapas ruwayta yachaspaqa Jehova Diostayá agradecekusunchik. Pay munaptinmiriki chaynaqa kallanchik. Wakin iñiqmasinchikkuna imatapas ñuqanchikmanta aswan allinta ruwaptinkuqa kusikusunyá, paykunaqariki Jehova Diospaqmi ruwachkanku. Manam hatun tukusqankuraykuchu nitaq riqsisqa kayta munasqankuraykuchu. Paykunamanta rimapakunamantaqa, paykunamantayá yachasun.

³ Kay yachachikuymi yanapawasun mana ruway atisqanchikkunapi piensaspa mana hukmanyarunapaq. Yachachkasuntaqmi imapas yachasqanchikkunawan yanapakunamanta  hinaspa hukkunata imakunapi qatipakunamantapas.

4. ¿Imaraykutaq hukmanyasqa tarikuchwan? Carolmanta rimarimuy.

⁴ Wakin iñiqmasinchikkunaqa yuyaqña kasqankuraykum utaq unqusqankuraykum manaña ñawpaqta hinañachu Jehova Diospaq ruwanku. Iñiqmasinchik Carolpas chaynam tarikurqa, payqa ñawpaqtaqa mana testigokunapa kasqan lawpim Diosmanta willakurqa. 35 runakunamanmi bibliamanta yachachirqa, achka runakunatam bautizakunankupaq yanaparqa. Ichaqa chaymantam unquruspan wasillapiña karqa. Paymi nin: “Unqusqayraykum manaña ñawpaqta hinañachu Diospaqqa ruwani. Chayraykum piensani hawa sunqullaña Jehova Dios servisqayta. Ñawpaqta hina manaña ruwasqayraykum hukmanyasqa tarikuni”, nispa. Carolqa tukuy sunqunwanmi Jehova Diospaq imatapas ruwayta munan. Chaywanqa maynataraq Jehova Diosqa kusikun.

5. (1) ¿Imaynanpitaq ñawpaqpi hina manaña ruwaspanchikpas mana hukmanyananchikchu? (2) ¿Imaynatataq kay fotopi qawasqanchik iñiqmasinchik tukuy sunqumanta Jehova Diospaq atisqanta ruwarqa?

⁵ Imatapas ruwayta mana atispanchik, hukmanyasqa tarikuspaqa nikusunyá: “¿Imatataq Jehova Diosqa ñuqamanta munan?”, nispa. Diosqa munan atisqanchikman hina tukuy sunqumanta imapas ruwananchiktam. 80 watanpi iñiqmasinchikpas hukmanyasqam tarikullan 40 watanpi hina manaña ruwaspan. Payqa piensanmi ruwasqankunawan Jehova Diosta mana kusichisqanta. Ichaqa Diospaqqa manam chaynachu. ¿Imaynanpi? Payqariki 40 watanpi kachkaspanmi Diospaq tukuy imata ruwarqa, kunanpas 80 watanpi kachkaspanñapas hinallaraqmi atisqanta ruwachkan. Ñawpaqpi hina manaña ruwaspaqa amayá hukmanyasunchu, Diosqariki sunqumanta atisqanchikta ruwasqanchikwanmi kusikun. Chaypaq kallpanchakuptinchikqa Diosqa niwasun “allintam ruwarunki” nispam (tupachiy Mateo 25:20-23 nisqanwan).

6. ¿Imatam yachachwan iñiqmasinchik Mariamanta?

⁶ Mana atisqanchik kaqkunapi piensanamantaqa, atisqanchik kaqta ruwaspam kusisqa tarikusunchik. Iñiqmasinchik Mariapas unqusqanraykum, manaña ñawpaqta hinañachu Diospaqqa ruwan. Payqa llumpay hukmanyasqam tarikurqa, mana valeqpaqñam hapikurqa. Chayna kachkaspanmi camallapiña kaq iñiqmasinchikta yanapayta qallaykurqa. Paymi chaymanta kaynata willakun: “Wasinman rispaymi yanaparqani telefonowan chaynataq cartawan willakunaykupaq. Chayta ruwaspayqa ancha-ancha kusisqam tarikurqani ñañayta yanapasqaymanta”, nispa. Ñuqanchikpas atisqanchikta sunqumanta ruwaspanchikqa kusisqam tarikusunchik. Ichaqa, ¿imatam ruwananchik imatapas ruwayta yachaspanchikqa?

7. ¿Imatam apostol Pedro nirqa iñiqkunata?

⁷ Apostol Pedroqa punta kaq cartanpim, iñiqkuna imapas ruway yachasqankuwan iñiqmasinkuta yanapanankupaq rimapayarqa. Chaymi qillqarqa: “Imapas ruway yachasqaykichikqa Diosmantam, chayman hina ruwaspayá llapallaykichik yanapanakuychik, chaytaqa ruwaychik Diospa ancha kuyakuyninta chaskiq allin sirviente hinayá. Diospa ancha kuyakuyninqa tukuy imapim qawakun”, niqta (1 Ped. 4:10). Imapas ruway yachasqanchikwanqa yanapakunanchikmi. Manam piensananchikchu  hukkunata llakichinanchiktaqa, hukkunata hukmanyachinanchiktaqa. Chayta piensaspanchikqa manam atisqanchiktachu Jehova Diosmanqa quchkachwan.

8. ¿Imaynanpitaq 1 Corintios 4:6, 7 nisqanman hinaqa mana alabakunanchikchu imapas ruway yachasqanchikmantaqa?

⁸ Allinmi imapas ruway yachasqanchikwan yanapakuyninchikqa, ichaqa manam chaymantaqa alabakunanchikchu (leey 1 Corintios 4:6, 7). Ichapas qamqa pimanpas chaylla bibliamanta yachachiyta qallaykunki. ¡Allinmi chayqa! Chaymanta alabakuymi ichaqa mana. Diosmanta willakuspa bibliamanta yachachiyta qallaykuspaykiqa anchatachá kusikunki. Chaymi iñiqmasinchikkunata kallpanchanaykipaq chaymanta willakuyta munanki. Ichaqa, willakunaykipaq kachkaptikim huk kaqnin iñiqmasinchikpas Diosmanta willakuspan huk kaqnin qillqata saqisqanmanta kusisqallaña willakuyta qallaykun. Chayta qawaspaykiqa, ¿imatataq ruwanki? ¿Hinallaraqchu willakunki icha hukpiña willakunaykipaqchu suyanki? Ichapas iñiqmasinchikkunata kallpanchanaykipaq willakuyta munanki. Ichaqa hukpiña willakunaykipaqmi tantiakuwaq, chaynapi qillqanchikta saqiq iñiqmasinchik mana hukmanyananpaq. Ichaqa hinallayá kallpanchakuy runakunaman bibliamanta yachachinaykipaq. Chaytaqa amayá saqiychu.

9. ¿Pitam hatunchananchik imapas ruway yachasqanchikkunawanqa?

⁹ Imatapas ruwaytaqa yachanchik Dios yanapawasqanchikraykum. Chaynaqa imapas ruway yachasqanchikwanqa iñiqmasinchikkunatayá yanapasun, amayá alabakunapaqchu imatapas ruwasun (Filip. 2:3). Diospa munayninta ruwanapaq imapas ruway yachasqanchikwan yanapakuspanchikqa kusisqam kasun. ¿Imaynanpi? Imapas yachasqanchikwan mana alabakusqanchikraykum nitaq hatun tukusqanchikraykum, aswanqa imapas yachasqanchikwan Diosta hatunchasqanchikraykum.

10. ¿Imaynanpitaq wakinkunawanqa mana tupachikunanchikchu?

¹⁰ Wakinpiqa mana musyakuchkaspam hukkunawan tupachikuyta qallaykuchwan. Allin yachachiq kasqanchikrayku ichapas yachachinanpaq sasachakuq iñiqmasinchikwan tupachikuyta qallaykuchwan, chayta ruwaspaqa ukunchikpim hatun tukuyta qallaykuchwan. Ichaqa iñiqmasinchikqa yachachinanpaq sasachakuspanpas qukuykuqllañam, churinkunatapas sumaqtam uywan, Diosmantapas  kusisqallañam willakun. Anchatamá kusikunchik iñiqmasinchikkuna warmipas qaripas Diosta servinankupaq tukuyta ruwasqankuwanqa.

11. ¿Imaynanpitaq Jesusta qatipakunapaq kallpanchakunanchik?

¹¹ Hukkunawan tupachikuyqa manam allinchu, ichaqa hukkunamanta imatapas yachayqa allinmi. Rimarisun Jesusmanta. Ñuqanchikqa manam pay hina mana pantaqchu kanchik, ichaqa atichwanmi imayna kasqantawan imaynata imapas ruwasqanta qatipakuytaqa (1 Ped. 2:21). Payta tukuypi qatipakuspaqa, aswan allintam Jehova Diosta servisun, hinaspapas paymantam aswan allinta willakusun.

12, 13. ¿Imatam yachachwan kamachiq Davidmanta?

¹² Bibliapim niwanchik achka Diosta serviq qarikunawan warmikuna qatipakunapaq hina kasqankumanta (Heb. 6:12). Paykunamanta huk kaqninmi kamachiq David. Paymantam Jehova Dios nirqa: “Davidqa sunquypaq hinam”, nispa (Hech. 13:22). Chaywanpas Davidqa pantaqmi karqa. Payqa huchakunamanmi wichiykurqa. Chaywanpas qatipakunapaq hinam. ¿Imanasqa? Huchanmanta rimapayaptinku uyarikuspan sunqumanta wanakusqanraykum. Chaymi paytaqa Diospas pampachaykurqa (Sal. 51:3, 4, 10-12).

¹³ David hina kanapaqqa kaykunatam nikunanchik: “¿Kutipakunichu pipas rimapayawaptin? ¿Riqsikunichu pantasqaykunata, icha pakanichu? ¿Hukkunamanchu tumpani imapipas pantasqaymanta? ¿Kallpanchakunichu kaqmanta mana pantanaypaq?”, nispa. Diosman sunqu qarikunamantawan warmikunamanta bibliapi leespanchikpas nikusunyá: “¿Kay ñakarisqay kaqkunawanchu paykunapas ñakarirqa? ¿Imaynataq karqaku sasachakuypi kaspankupas? ¿Imaynatam kay Diosman sunqu runata qatipakuyman?”, nispa.

14. ¿Yanapawachwanchu iñiqmasinchikkunata qatipakuyqa?

¹⁴ Iñiqmasinchikkunamantapas yachachwanmi yuyaq kaptinkupas utaq musu-sipas kaptinkupas. Ichapas huk kaqnin iñiqmasinchik ñakarichkan warmamasinkuna mana allinkunata ruwananpaq hikutasqanrayku utaq familian harkakusqanrayku utaq unqusqanrayku. ¿Yaqachu chay iñiqmasinchikta imallapipas qatipakuchwan?  Payta qatipakuspaqa yachasunmi sasachakuykunapi tarikuptinchik imakuna yanapawananchikmanta. Sasachakuypiña kaspankupas Diospi hapipakusqankuqa anchatam kallpanchawanchik. ¡Mayna kusikunapaqmi chayqa! (Heb. 13:7; Sant. 1:2, 3).

15. ¿Apostol Pablopa ima nisqantaq yanapawasunchik Diosta kusisqa servinapaq?

¹⁵ Atisqanchikta Jehova Diospaq ruwaspanchikqa, iñiqmasinchikkunawanmi hawkalla kawsakusun, huk sunqullam kasun. Chaytamá ruwarqaku Jesuspa qatiqninkunapas. Paykunaqa manam chaynallachu karqaku, sapakamam imatapas ruway yachasqankuman hina ruwaqku (1 Cor. 12:4, 7-11). Ichaqa manam chayraykuchu chiqninakurqaku nitaq rakinakurqaku. Pablopas Efeso llaqtaman qillqaspanmi nirqa ‘tukuyta ruwaspa Cristopa cuerponta wiñachimunankupaq’. Nirqaraqmi: ‘Cuerpopa partenkunaqa, cuerpotam yanapan wiñananpaq hinaspa kuyakuyninpi allinta takyananpaq’, nispa (Efes. 4:1-3, 11, 12, 16). Chayman hina kawsasqankuraykum hawkalla, huk sunqulla kawsakurqaku. Chayqa iñiqmasinchikkunapim kunanpas qawakun.

16. ¿Imapaqmi kallpanchakunanchik? (Rimarimuytaq Hebreos 6:10 nisqanmantapas).

¹⁶ Hukkunawan mana tupachikunanchikpaqmi kallpanchakunanchik. Hukkunawan tupachikunamantaqa Jesusta qatipakuspayá pay hina kanapaq kallpanchakusun. Qatipakusunyá ñawpaq tiempopi Diosta serviqkunatawan kunan tiempopi Diosta serviqkunata. Atisqanchiktayá Jehova Diospaq ruwasun, ‘payqa manam mana allin ruwaqchu payrayku imapas ruwasqanchikta qunqarunanpaqqa’ (leey Hebreos 6:10). Hinallayá Jehova Diosta kusisqa servisun, payqa imapas ruwasqanchikwanqa anchatam kusikun.