1. ¿Imakunata ruwaspan kusisqa kasunman?

 JEHOVÁ Diosqa munanmi kusisqa kananchista. Chayraykun Bibliapas nin: “Santo espiritun ichaqa ruruchin [...] kusikuyta”, nispa (Gál. 5:22). Chhaynaqa, ¿imakunata ruwaspan kusisqa kasunman? Jehová Diosta tukuy tiemponchiswan servispan, hermanonchiskunata yanapaspa ima. Chaymi Bibliapas nin: “Qoypin aswan kusikuyqa kan, manan chaskiypichu”, nispa (Hech. 20:35).

2, 3. a) Gálatas 6:4 nisqan jina, ¿imakunata ruwaymi yanapawasun kusisqalla Jehová Diosta servinanchispaq? b) ¿Imakunamantan kay yachachikuypi yachasunchis?

² ¿Imakunata ruwaymi yanapawasun kusisqalla Jehová Diosta servinanchispaq? Gálatas 6:4 textopi apóstol Pabloq nisqanta kasukuymi yanapawasun. Chay textopin payqa kallpachawanchis atisqanchisman jina Jehová Diosta servinanchispaq hermanonchiskunawanpas ama igualakunanchispaq. Chayta ruwaspan kusisqa Jehová Diosta servisunchis (leey Gálatas 6:4; Mat. 22:36-38). Sichus kallpanchiswan imachus yachasqanchiswan Jehová Diosta servishanchis chayqa ancha allinpunin. Chaykunataqa Jehová Diospa yanapaynillanwanmi ruwanchis, chaymantan Jehová Diosta “gracias” ninanchis. Ichaqa sichus reparanchis juj hermanonchis Diospa llaqtanpi astawan yanapakusqanta chayqa manan envidiakunanchischu, nitaqmi igualakunanchispaschu. Aswanpas kallpachakunanchismi pay jina tukuy sonqowan Jehová Diosta servinanchispaq.

³ Kay yachachikuypin yachasunchis imakunas yanapawasunman kuraqña kaspapas onqosqaña kaspapas kusisqalla Jehová Diosta servinanchispaq chayta. Chaymantapas yachallasuntaqmi imaynatas kallpanchiswan imachus yachasqanchiswan Jehová Diosta astawan servisunman chayta, imaynatas juj iñiqmasikunaq ejemplonpas yanapawasunman chaytapas.

4. ¿Imakunapi tarikuspan mayninpi Carol hermananchis jina pisikallpayasunman?

⁴ Wakin hermanonchiskunaqa kuraqña otaq onqosqa kasqankuraykun manaña ñaupaqpi jinachu Jehová Diosta servinku, chhaynapi tarikuspan mayninpiqa pisikallpayankuman. Chaymi Carol hermananchiswanpas pasan. Payqa Diosmanta willanapaq necesitakusqan llaqtamansi astakusqa. Chay llaqtapiqa 35 runakunamansi Bibliamanta yachachisqa. Payqa ancha kusisqas Jehová Diosta servisharan. Tiempowansi ichaqa onqopusqa, chayraykus manaña wasinmanta lloqsiyta atisqañachu. Paymi nin: “Onqopusqayraykun manaña wakin hermanokuna jinachu Jehová Diosta servini. Chaymi mayninpiqa iñiyniypi pisikallpayani. Munashaniña Jehová Diosta astawan serviyta chaypas manan atinichu”, nispa. Carol hermananchisqa munanmi Jehová Diosta astawan serviyta, chaytaqa allintan Jehová Diosqa yachan, kusikuntaqmi hermananchispa kallpachakusqanta rikuspa.

5. a) ¿Imatan mayninpi piensasunman manaña ñaupaqpi jinachu Jehová Diosta servisqanchisrayku? b) Fotokunapi rikusqanchis jina, ¿imata ruwananpaqmi hermanonchis kallpachakuran wayna kasqanmantapacha?

⁵ Mayninpiqa yaqapaschá pisikallpayasunman manaña ñaupaqpi jinachu Jehová Diosta servisqanchisrayku. Chhaynapi tarikuspaqa tapukunanchismi: “¿Ima ruwanaytan Jehová Dios munan?”, nispa. Yachasqanchis jina Jehová Diosqa munanmi atisqanchisman jina payta servinanchista. Wakin hermanonchiskunaqa yaqapaschá kuraqña kapusqankurayku manaña ñaupaqpi jinachu Jehová Diosta servinku. Chhaynapi tarikuspaqa yaqapaschá ninkuman: “Jehová Diosqa manapaschá kay ruwasqaytaqa chaskinqachu”, nispa. Chhaynata piensayqa manan allinchu. Jehová Diosllan ninan payta servisqanchista chaskinqachus icha manachus chaytaqa. Sichus kallpachakusun atisqanchisman jina Jehová Diosta servinanchispaq chayqa sonqontan kusichisun (Mateo 25:20-23).

6. ¿Imatan yachasunman María hermananchispa ejemplonmanta?

⁶ Jehová Diosta kusisqa servinanchispaqqa imachus ruway atisqanchispin astawanqa piensananchis. Chaytan María hermananchispas ruwaran. Paymi nin: “Noqaqa onqopusqayraykun manaña ñaupaqpi jinachu Jehová Diosta serviyta atirani. Chaymi mayninpiqa nishuta llakikuq kani, mana valeqpaq jinataqmi qhawarikuqpas kani. Ichaqa yacharuranin iñiq t’aqaypi juj hermana camapi onqosqa kashasqanta. Chaymi kallpachakurani wasinta rinaypaq. Chaypin iskayniyku cartata qelqaspa telefonopi wajaspa Diosmanta willarayku. Paypa wasinmantaqa kusisqan kutipuq kani”, nispa. Noqanchispas hermananchis María jinan kallpachakunanchis atisqanchisman jina Jehová Diosta servinanchispaq. Chayta ruwaspaqa kusisqan kasunchis. Ichaqa yaqapaschá wakinninchisqa Diospa llaqtanpi allinta imatapas ruwayta yachanchis. Chhaynaqa, ¿imaynatan kallpanchiswan imachus yachasqanchiswan astawanraq Diospa llaqtanpi yanapakusunman?

7. ¿Imaniranmi apóstol Pedro ñaupa tiempopi cristianokunata?

⁷ Apóstol Pedroqa juj kaq carta qelqasqanpin cristianokunata kallpacharan imachus ruway yachasqankuwan iñiqmasikunata yanapanankupaq. Paymi niran: “Qankunaqa Diospa imaymanapi rikukuq ancha sumaq sonqo kayninta chaskiq allin mayordomokunan kankichis, chayrayku maykamachus Diospa qokuyninta chaskisqaykichisman jina jujkuna-jujkunawan servinakuychis”, nispa (1 Ped. 4:10). Apóstol Pedroq nisqan jina noqanchispas kallpachakunanchismi tukuy kallpanchiswan yachasqanchiswan ima Jehová Diosta servinanchispaq. Manataqmi  ninanchischu: “Diospa llaqtanpi astawan yanapakusaq chayqa yaqapaschá wakin iñiqmasikunaqa pisipaq qhawarikunqaku otaq envidiakunqakupas”, nispaqa. Jehová Diosta imachus yachasqanchiswan servispaqa kusisqan kasunchis, Jehová Diostapas anchatan kusichisunchis.

8. 1 Corintios 4:6, 7 nisqan jina, ¿imaraykun manapuni imachus ruway atisqanchismanta jatunchakunanchischu?

⁸ Jehová Diosta imachus yachasqanchiswan serviyqa ancha allinpunin, ichaqa manapunin jatunchakunanchischu (leey 1 Corintios 4:6, 7). Wakinninchisqa yaqapaschá facil-llata runakunaman Diosmanta willasunman otaq yachachisunmanpas. Chhayna kaqtinqa kallpachakushanallanchismi chayta ruwananchispaq, ichaqa manan jayk’aqpas jatunchakunanchischu. Mayninpiqa yaqapaschá Diosmanta willashaspa allin sonqoyoq runata tarisunman, jinaspa yachachiyta qallarisunman. Chay pasawasqanchistaqa yaqapaschá usqhaylla hermanonchiskunaman willayta munasunman. Ichaqa, ¿imatan ruwawaq juj hermananchis wasiyoqman juj revistata saqesqanmanta wakin iñiqmasikunaman kusisqa willakusqanta rikuspa? Chayta rikuspaqa yaqapaschá juj p’unchayña hermanokunaman willasunman imachus pasawasqanchista. Chhaynapin hermananchista yanapasun imachus ruwasqanmanta kusisqa kananpaq, munakusqanchistataqmi rikuchisunpas. Chaywanpas kallpachakushallay kallpaykiwan imachus yachasqaykiwan Jehová Diosta servishanallaykipaq.

9. ¿Imata ruwananchispaqmi llapanchispas kallpachakunanchis?

⁹ Noqanchisqa Jehová Diospa yanapaynillanwanmi imatapas ruwayta atinchis. Chaymi kallpachakunanchis imachus ruway atisqanchiswan hermanonchiskunata yanapananchispaq. Ichaqa manan allinta qhawarichikuyta munaspachu paykunataqa yanapananchis (Filip. 2:3). Sichus kallpachakusun Jehová Diosta tukuy kallpanchiswan imachus yachasqanchiswan ima servinanchispaq chayqa Jehová Diostan jatunchasunchis, kusisqataqmi kasunpas.

10. ¿Imaraykun manapuni hermanonchiskunawan igualakunanchischu?

¹⁰ Allintaña juñunakuykunapi yachachisunman chaypas manapunin jayk’aqpas juj hermanonchiskunawanqa igualakunanchischu. ¿Imarayku? Wakin hermanonchiskunaqa manapaschá noqanchis jinachu yachachinku, ichaqa yaqapaschá aswan qoykukuq kanku, wawankuta allinta uywanku, otaq kallpachakunku Diosmanta astawan willanankupaq. Chayraykun hermanonchiskunawanqa manapuni igualakunanchischu, aswanpas kusikunanchismi tukuy tiemponkuwan, kallpankuwan, imachus yachasqankuwan ima Jehová Diosta servisqankumanta.

11. ¿Imaraykun kallpachakunanchis Jesús jina kananchispaq?

¹¹ Ñaupa tiempopi Dios sonqo runakunamanta yachaypas kay tiempopi allin iñiyniyoq hermanonchiskunamanta yachaypas anchatan yanapawasunman. Yachasun Jesusmanta. Payqa kallpachakuranmi tukuy tiemponwan Jehová Diosta servinanpaq. Chaymantapas sumaq sonqo khuyapayakuqmi karan. Manaña Jesús jinachu ch’uya runakuna kanchis chaypas paymanta yachayqa anchatan yanapawasunman (1 Ped. 2:21). Sichus kallpachakusunchis Jesús jina kananchispaq chayqa allintan imatapas ruwasunchis, kusisqataqmi Diosmantapas yachachisunchis.

12, 13. ¿Imatan yachasunman rey Davidmanta?

¹² Bibliapin willashan ñaupa tiempopi Dios sonqo runakunamanta. Paykunamanta yachaypas anchatan yanapawasunman (Heb. 6:12). Yachasun rey Davidmanta. Paymantan Jehová Diosqa niran: “Jesepa wawan Davidtan tarini sonqoypaq jina runata, paymi lliu munasqayta ruwanqa”, nispa (Hech. 13:22). Davidqa noqanchis jina juchayoq runan karan, chayraykun jatun juchakunaman urmaran. Ichaqa profeta Natanpa wanachisqanta uyarikuspan Jehová Diosman kutirikuran. Davidqa sonqomantan juchallikusqankunamanta pesapakuran, chaymi Jehová Diosqa payta perdonaran (Sal. 51:3, 4, 10-12).

¹³ ¿Imatan ruwananchis Davidpa ejemplon yanapawananchispaq? Chaypaqqa tapukunanchismi: “¿Sumaqtachu uyarikuni jujkunaq yuyaychawasqankuta? ¿David jinachu imapipas pantasqayta reqsikuni, icha jujkunatachu tumpani? ¿Kallpachakunichu mana allin ruwasqayta saqepunaypaq?”, nispa. Chaymantapas ñaupa tiempopi Dios sonqo runakunamanta estudiashaspan tapukunanchis: “¿Ima sasachakuykunapin ñaupa tiempopi Dios sonqo runakunapas tarikuranku? ¿Imayna runakuna kanankupaqmi kallpachakuranku? ¿Imatan ruwayman paykuna jina junt’aq sonqo kanaypaq?”, nispa.

14. ¿Imaynatan hermanonchiskunaq ejemplonpi piensay yanapawasunman?

¹⁴ Kay tiempopi allin iñiyniyoq hermanonchiskunaq ejemplonpas anchatan yanapawasunman. Wakin wayna-sipas hermanonchiskunataqa colegionkupin compañeronkuna mat’ipayanku qhelli ruwaykunata ruwanankupaq. Wakin kuraq iñiqmasinchiskunapas imaymana sasachakuykunapin tarikushanku. Chhaynaña kaqtinpas kallpachakushallankun Jehová Diosta servinankupaq. Chaymi kallpachakunanchis paykunaq ejemplonpi piensananchispaq. Chayta ruwaymi yanapawasun paykuna jina ima sasachakuykunapiña tarikuspapas Jehová Diosta  servishanallanchispaq, munakuq pacienciayoq kananchispaq ima (Heb. 13:7; Sant. 1:2, 3).

15. ¿Imaynatan apóstol Pabloq yuyaychasqan yanapawasunman juj nisqalla Jehová Diosta servinanchispaq?

¹⁵ Llapanchismi kallpachakunanchis atisqanchisman jina Jehová Diosta servinanchispaq. Chayta ruwaspaqa juj nisqallan iñiq t’aqapi Jehová Diosta servisunchis. Chaytan ñaupa tiempopi cristianokunapas ruwaranku. Paykunaqa imaymana ruwaytan yacharanku, chay yachasqankuwanmi Jehová Diosta atisqankuman jina serviranku (1 Cor. 12:4, 7-11). Chayraykun apóstol Pabloqa carta qelqasqanpi cristianokunata kallpacharan juj nisqalla Jehová Diosta servinankupaq. Chaymi niran: “Sapanka miembrochus ruwanankuta allinta junt’anku chayqa, llapa cuerpon allinta wiñan, chhaynapitaq cuerpoqa munakuypi qaqata sayan”, nispa (Efes. 4:1-3, 11, 12, 16). Apóstol Pabloq yuyaychasqanta kasukuyqa ñaupa tiempopi cristianokunata jinan yanapawasun iñiq t’aqapi juj nisqalla Jehová Diosta servinanchispaq.

16. ¿Imakunata ruwananchispaqmi kallpachakunanchis? (Hebreos 6:10).

¹⁶ Kallpachakunanchismi astawan Jehová Diosta servinanchispaq, ichaqa manan jayk’aqpas iñiqmasinchiskunawanqa igualakunanchischu. Aswanpas Jesuspa ejemplontan qatikunanchis. Chaymantapas kallpachakunanchismi ñaupa tiempopi kay tiempopi Dios sonqo cristianokuna jina kananchispaq. Sichus kallpachakushallasun imachus yachasqanchiswan Jehová Diosta servinanchispaq chayqa Jehová Diosqa manan jayk’aqpas “qonqanqachu imachus ruwasqanchistaqa” (leey Hebreos 6:10). Aswanpas yanapawasunmi kusisqalla payta servinanchispaq.