1. ¿Imata rurashpata ñucanchicunaca ashtahuan cushijupanchi?

 JEHOVÁ DIOSCA tucuicunallata cushilla cachunmi munan. Ñucanchicuna cushilla cachun munashcataca Taita Diospa espiritupa cualidadcunapimi ricuita ushapanchi (Gál. 5:22). Bibliapica imagutapash carajcunaca carajpi japijcunatapash yalimi ninanda cushijun nijunmi. Chaimandami villachinapi ocupado yalishpa, ñucanchi huauquipanicunata ayudashpaca ashtahuan cushijupanchi (Hech. 20:35).

2, 3. a) Gálatas 6:4​pi nishcashnaca Jehová Diosta cushilla sirvishpa catichunga ¿imata ayudanga? b) Cai yachajuipica ¿imatata ricugripanchi?

² Ñucanchicuna cushilla cachunga ¿imata ayudanga? Cushilla cangapaca apóstol Pablopa ishcai yuyaicunata ricupashunchi. Chaitaca Gálatas 6:4​pimi ricuita ushapanchi (liipangui). Callari yuyai, ñucanchicuna Jehová Diosman tucui usharishcaguta rurashpaca ñucanchillatami cushilla sintiripashun. Jehová Diosmandaca tucuicunallatami imagutapash ruraita ushapanchi (Mat. 22:36-38). Catipica, shujcunahuanmi na compararijuna capanchi. Imaguta yachajushca cashpapash, imaguta rurai ushashpapash Jehová Diostami agradicina capanchi. Jehová ayudajpimi imagutapash rurai ushanchi. Shinaca shuj huauquipanicuna ñucanchimanda yali imagutapash Jehová Diosmanda ruranajujpica cushijuitami cushijuna capanchi. Paicuna imaguta rurai ushashpapash Jehová Diosta alabangapami ruranajun. Chaimandami, paicunahuan compararijunapa randica paicunamanda yachajuita ushapanchi.

³ Cai yachajuipica ñucanchi munashcashna Jehová Diosta na sirvi ushashpapash ama desanimarichunmi ayudanga. Shinallata, imaguta ali rurai ushashpapash chaicunata ali utilizanata, shinallata shujcunamanda imata yachajui ushashcatapashmi ricugripanchi.

4. Ñucanchicunataca ¿imata desanimachita ushan? Carol panigupa ejemplomanda parlapangui.

⁴ Huaquin huauquipanigucunaca mayorllagucuna caimanda, o na ashta sano caimandami paicuna munashcashna Jehová Diosta na sirvi  ushashpa desanimarishca sintirin. Carol shuti paniguca shuj tiempoca villachinata minishtirijuj pushtupi villachingapaj rishpami 35 gentecunata Bibliamanda yachachishpa huaquingunataca Jehová Diosta sirvingapaj bautizarichun ayudarca. Cai paniguca villachinapica alitapachami rurajurca. Shinapash shuj punlla irquiyashpaca huasimandapash na llujshi usharcachu. Chaimandami paica: “Ñuca ashata irquilla cashcamanda shuj turiñañagucunashna na villachi ushashcataca alimi yachani. Shinapash, ñana pundashna rurai ushaimanda, shinallata shuj turiñañagucunashnaca Jehová Diosta na sirvijunichu yashpami ñucamandallata desanimado sintirini” ninmi. Carol paniguca Jehová Diosmandaca tucui usharishcagutami rurangapaj munan. Cashna munaita charinaca alimi can. Jehová Diosca juyaj, llaquij Dios caimandami panigu paita tucui usharishcagupi sirvingapaj munajtaca ninanda valichin.

5. a) Ñucanchi munashcashna Jehová Diosta na sirvi ushashpa desanimarijushpaca ¿imatata yarina capanchi? b) Página 12​pa fotopica ¿imashinata shuj huauquiguca Jehová Diosmanda tucui usharishcaguta rurajushcataca ricuchijun?

⁵ Ñucanchi munashcashna Jehová Diosta na sirvi ushaimanda desanimarishca cashpaca cashna tapuripashunchi: “Jehová Diosca ¿ñuca imata rurachunda munan?” nishpa. Jehová Diosca paimanda tucui usharishcaguta rurachun nishpaca ñucanchicuna imaguta pactachi ushashcagutalla rurachunmi munan. Por ejemplo 80 huatacunata charij shuj paniguca, 40 huatacunata charishpa Jehovata sirvishcashna ñana sirvi ushashpami llaquilla sintirin. Paica cunanbi tucui usharishcagupi Jehová Diosta sirvijushpapash chaigullaca Jehová Diospaca ñana valinllu yashpami pensarin. Shinapash chaica na ciertochu can. Cai paniguca 40 huatacunata charishpaca Jehová Diostaca tucui usharishcagupimi sirvishca. Cunan 80 huatacunata charishpapash Jehová Diostaca tucui usharishcagupimi sirvishpa catijun. Paica Jehová Diosta sirvinataca nuncapash na saquishcachu. Shinapash Jehová Diosmanda imatapash na suficienteta rurajunichu yashpa pensarijushpaca ñucanchicunaca caitami yarina capanchi. Jehová Diosmi ñucanchicuna suficienteta o na suficienteta rurajujtaca ricuna derechota charin. Ñucanchicuna tucui usharishcaguta rurajpica Jehová Diosca alitami rurashcangui nishpami ninga (Mateo 25:20-23​huan chimbapurashpa ricupangui).

6. María panigupa ejemplomandaca ¿imatata yachajui ushapanchi?

⁶ Ñucanchicuna Jehová Diosta cushilla sirvishpa cati ushangapaca, na rurai ushashcacunapi pensarijunapa randica, imaguta rurai ushashcapimi pensarina capanchi. María panigupa ejemplota ricupashunchi. Paica, paipa saludhuan nali caimandami pai munashcashna predicacionbi canataca na ushan. Callaripica, cai paniguca imapapash na sirvinshna sintirishpami imapapash na valinichu yuyajurca. Shinapash congregacionmanda shuj ñañagu ungushca camapi sirijujtami yarirca. Chaimandami cai paniguta ayudangapaj esforzarirca. María paniguca ninmi: “Paipa huasipi visitangapaj, paihuan telefonopi, cartaguta rurashpa villachingapami arreglocunata rurarcani. Chashna rurashpaca, huasimanga siempremi cushilla tigrai callarircani. Ñañaguta ayudashcata sintishpaca ñucallatami ninanda cushijurcani” ninmi. Shinaca ñucanchicunapashmi ñucanchi munashcacunata na rurai ushanichu nishpa pensarijunapa randica, imaguta rurai ushashcapi pensarishpa chaigucunata rurashpa cushilla sintirita ushapanchi. Shinapash, ñucanchicuna Jehová Diosmanda ashtahuan rurai ushashpa villachinapi, imacunapipash ashtahuan imagutapash ali rurai ushashpaca ¿imatata rurana capanchi?

7. Apóstol Pedroca ¿ima ali consejotata curca?

⁷ Apóstol Pedro callari cartacunata escribishpaca imaguta rurai ushashpapash huauquipanicunata animangapami rurana canguichi nircami. Chaimandami: “Cada unoman Taita Dios cushca ushaita chasquishcataca shujcunata sirvingapami utilizana capanguichi” nirca (1 Ped. 4:10). Ñucanchi imagutapash ali rurai ushashca cosascunataca shujcuna envidianga o desanimaringa nishpallaca  na ruranata saquinachu capanchi. Shinaca, imaguta ali rurai ushashpapash na ruranajushpaca, Jehová Diosmanga ñucanchipa tucui usharishcataca na ruranajunchimanllu.

8. 1 Corintios 4:6, 7​pi nishcashnaca imaguta ali rurai ushashpapash ¿imamandata chaicunamandaca na jariyana capanchi?

⁸ Shinaca ñucanchicuna imaguta ali rurai ushashpa chaicunata ruranaca alimi can. Shinapash chai rurai ushashcacunamanda ama jariyajungapami cuidadota charina capanchi (1 Corintios 4:6, 7​ta liipangui). Por ejemplo, tauca estudiocunata chari ushashpaca yachachishpa catingapaj esforzaripailla. Pero ñucanchi rurai ushashcacunahuanga na jariajunachu capanchi. Por ejemplo, villachingapaj llujshishpa shuj personata Bibliamanda yachachingapaj taripashcanguiman. Chaimanda chai estudiota tarishcataca cushijushpa huauquipanicunaman villangapaj munajushcanguiman. Shinapash ña huauquipanicunahuan tandanajushca cajpica, shuj panigu shuj personaman shuj revistata saquishcata cushijushpa villajushcanman. Shina situacionbi cashpaca ¿imata ruranashi ali canman? Estudiota callarishca experiencia huauquipanicunata predicacionbi animana cajpipash, revistata saquishca panigu ama desanimarichunga chai experienciataca shuj ratopi parlanata decidishparapashmi ali canman. Shina rurashpami huauquipanicunata juyashcata ricuchishun. Bibliata gentegucunaman yachachingapaj ofrecishpa catipailla. Quiquin imata rurai ushashcagutaca rurashpa catinallami capangui.

9. Imaguta ali rurai ushashpapash ¿imashinata utilizana capanchi?

⁹ Imaguta rurai ushachunbash Taita Dios ayudajushcatami yarina capanchi. Chaimandami imata rurai ushashpapash ñucanchi chai rurashcacunahuan ali ricuringapaj munajunapa randica, congregacionmanda huauquipanicunata animangapami imaguta ushashpapash rurana capanchi (Filip. 2:3). Ñucanchi yachashcacunata, ñucanchi ushaita Jehová Diosta sirvingapaj utilizashpami cushijuita ushapanchi. Shinaca, imaguta rurai ushashpapash shujcunapa ñaupapi ali ricuringapalla o shujcunamanda yali cashcata ricuchingapaca na ruranachu capanchi. Imata rurashpapash Jehová Diosta sirvinamandami rurana capanchi.

10. Shuj huauquipanicunahuan compararijunaca ¿imamandata nali can?

¹⁰ Ñucanchipa ali rurai ushashcacunahuan, cutin shuj huauquipanicuna imagutapash na rurai ushashcacunahuan ama comparajungapami cuidadota charina capanchi. Por ejemplo, congregaciongunapica huaquin huauquicunaca alipacha discursocunata cunatami yachan. Cutin huaquingunapaca ashata shinllimi ricurin. Chaicunapimi, huaquinbica ñucami chai huauquita yali ashtahuan ali discursocunata cuita ushani yashpa compararina yuyaicunaiman shamuita ushan. Shinapash  cai huauquigupa discursocunata cuna shinlli cajpipash, cai huauquiguca talvez shuj huauquipanicunata mingachinata gushtaj, paipa huahuacunata aliguta viñachij, villachinamanbash cushijushpa llujshi huauquigumi caita ushan. Shinaca congregacionbi huauquicuna paicunapa ali rurai ushashcacunahuan Jehová Diosta sirvishpa huauquipanicunata ayudanajushcamandaca ninandami agradicipanchi.

11. Jesuspa ejemplota catingapaca ¿imamandata esforzarina capanchi?

¹¹ Shujcunahuan na compararijuna cashpapash, shujcuna Jehová Diosta imashna sirvinajujta ricushpa yachajunaca alimi can. Por ejemplo, Jesusca ñucanchipaca alipacha ejemplomi can. Jesushna na perfecto cashpapash Jesusmandaca ashtacatami yachajuita ushapanchi (1 Ped. 2:21). Jesuspa ejemplota ali catingapaj esforzarishpaca Jehová Diosta ali sirvishpami villachinapipash ashtahuan ali experienciacunata charipashun.

12, 13. Rey Davidmandaca ¿imatata yachajui ushapanchi?

¹² Juchayucuna cashpapash ali ejemplota ñucanchiman saquishca gentecunamandami Bibliapica parlan (Heb. 6:12). Por ejemplo, Davidmanda parlashpaca Jehová Diosca ñucata sirvishpa, ñucata cushichij runagutami tarishcani nircami (Hech. 13:22). Davidpash ñucanchishnallata juchayumi carca. Chaimandami paica huaquin cosascunapi pandarirca. Shina pandarishpapash ali ejemplotami ñucanchimanga saquirca. Por ejemplo pandarishcanguimi nijpica, paica na negarishpami tucui shungu arripintirirca. Chaimandami Jehová Diosca paitaca perdonarca (Sal. 51:3, 4, 10-12).

¹³ Davidpa ejemplo ñucanchicunata ayudachunga cai tapuicunapi pensaripashunchi: “Pipash ñucata consejajpica ¿imashinata sintirini? ¿Ñucapa pandarishcacunata negarinata o reconocinatachu yachani? Pipash imata nijpica ¿shujcunatarachu culpani? Imapi pandarishpapash ¿cutin chaicunata ama rurangapachu esforzarini?” nishpa. Cashna tapuicunatami Bibliamanda ejemplocunata yachajujushpaca pensarina capanchi. Shinallata “¿Paicunaca ñucanchishnacha llaquicunataca charirca? o ¿ima cualidadcunatata ricuchirca? ¿Imashamanda paicunapa ejemplotaca catita ushani?” nishpa tapuripashunchi.

14. Huauquipanicunapa ejemplocunaca ñucanchicunataca ¿imashinata ayudaita ushan?

¹⁴ Ñucanchi mayorlla huauquipanicunamanda o joven huauquipanicunamandaca ashtacatami yachajuita ushapanchi. Por ejemplo, ñucanchi congregacionbi joven huauquipanigucuna imashna shuj jovengunapa jarcaicunata mishanajushcapi, o familiacunapi jarcaicunata charishcamanda o na sano cashcamanda imashna aguantashpa catinajushcapi pensaripashunchi. Paicunapa ejemplocunata catinaca llaquicunata  charishpapash aguantashpa catichunmi ayudanga. Huauquipanicuna, cashna ali ejemplocunata ricuchishcamandaca ninandami cushijupanchi (Heb. 13:7; Sant. 1:2, 3).

15. Apóstol Pablopa ¿maijan consejota Jehová Diosta cushilla sirvishpa catichun ayudanga?

¹⁵ Tucui usharishcagupi Jehová Diosta sirvingapaj esforzarishpaca, congregacionbica tucuicunahuanllatami ali llevari ushapashun. Primero Jesusta catijcunaca, shuj shuj cosascunatami ali rurai usharca. Shinallata shuj shuj responsabilidadcunatapashmi charirca (1 Cor. 12:4, 7-11). Shinapash paicunaca na shujcunahuan compararishpa, shujcunamanda yali cashcataca pensanajurcachu. Apóstol Pabloca imata rurai ushashpapash huauquipanicunata ayudangapami rurana canguichi nishpami paipa cartacunapica escribirca. Chaimandami, cuerpopa tucuilla partecuna alipacha unido cajpica paicunapura apoyarishpa shinlli tucushpa catin nishpa escribirca (Efes. 4:1-3, 11, 12, 16). Apóstol Pablopa consejota catij huauquipanicunaca congregacionbica tucuicuna ali llevarishpa tranquilo causaigu tiachunmi ayudarca. Chaimandami cunan punllacunapipash ñucanchi congregaciongunapica tucuicunallata ali llevarin.

16. ¿Imata rurangapata esforzarita ushapanchi? (Hebreos 6:10).

¹⁶ Shinaca shuj huauquipanicunahuan ama compararinajungapaj esforzaripashunchi. Chaipa randica, Jesuspa ejemplota catishpa paipa cualidadcunata ricuchingapaj esforzaripashunchi. Shinallata, Taita Diosta punda ali sirvijcunapa ejemplota catipashunchi. Shinaca Jehová Diosca ñucanchipa rurashcacunata na cungaj Dios cashcata yarishpa, Jehová Diosta sirvingapaca tucui usharishcaguta rurangapaj esforzaripashunchi (Hebreos 6:10​ta liipangui). Shinaca, Jehová Diosta cushilla sirvishpa catipaichi. Jehová Diospaca paita cushichingapaj imaguta rurashcacunapash ninan valishcami can.