1. Akapeea e rauka ai te rekareka maata?

 KA INANGARO a Iehova kia mataora tatou. E mea papu teia no te mea e tuanga te rekareka no te ua o tona vaerua tapu. (Gala. 5:22) No te mea e meitaki te oronga atu i te rave mai, ka rekareka maata tatou me piri maroiroi ki roto i te angaanga tutu aere e te tauturu i to tatou au taeake e te au tuaine.—Anga. 20:35.

2-3. (a) Ia Galatia 6:4, eaa te nga apinga te ka tauturu ia tatou kia vai rekareka ua i te tavini ia Iehova? (e) Eaa ta tatou ka uriuri i roto i teia atikara?

² Ia Galatia 6:4, kua taiku te apotetoro ko Paulo e rua apinga te ka tauturu ia tatou kia vai rekareka ua. (E tatau.) Mea mua, ka inangaro tatou i te tavini ia Iehova ma to tatou maroiroi katoa. Me rave tatou i te reira, ka rauka te rekareka. (Mata. 22:36-38) Te rua, auraka e akaaite ia tatou uaorai ki tetai ke. Noatu te tu maroiroi, te terenianga e te karape tei rauka ia tatou, ka akameitaki tatou ia Iehova no te reira. Nana i oronga mai i teia au mea katoatoa. Inara, me e meitaki atu tetai pae ia tatou i roto i te angaanga tutu aere, kia mataora tatou e te taangaanga ra ratou i to ratou tareni no te akapaapaa ia Iehova, kare kia puapinga me kore kia meitaki atu ratou. No reira auraka e tarere atu, mari ra kia apii tatou mei ia ratou.

³ I teia atikara, ka kite mai tatou eaa te ka tauturu ia tatou me kua kotingaia ta tatou ka rauka i te rave no te tavini ia Iehova. Ka uriuri katoa tatou akapeea me taangaanga meitaki i to tatou tareni, e ta tatou ka apii mai mei te akaraanga o tetai ke.

4. Eaa te ka akatupu i te taitaia maata? Akakite mai i tetai akaraanga.

⁴ E ngatā ana i tetai au tavini o Iehova kia akatano ki to ratou turanga maki e te ruaine. Kua tupu teia kia Carol. Kua tavini ana aia i tetai enua te anoano maataia ra te tauturu. I taua tuatau, e 35 ana apii Pipiria e kua tauturu aia i tetai pae kia akatapu i to ratou oraanga e kia papetitoia. Kua mataora tikai a Carol i tana angaanga tutu aere! Inara kua tupu tetai maki kino kiaia e kare e rauka iaia i te akaruke i tona kainga. Karanga a Carol, “No toku maki, kare e rauka akaou iaku i te rave i te au angaanga mei te au taeake rai, e ka manako au e kare au e tiratiratu ana mei ia ratou rai. Kare e rauka iaku i te rave i taku ka inangaro e ka taitaia maata au.” Kua inangaro a Carol i te tavini maata ia Iehova. Kia akameitakiia aia! E mea papu e te mareka ra a Iehova i tana ka rauka i te rave.

5. (a) Eaa ta tatou ka akamaara me kua kotingaia ta tatou tavinianga? (e) I roto i te tutu, akapeea te taeake te tavini maroiroi anga ia Iehova?

⁵ Me kua taitaia koe no tei kotingaia taau tavinianga, e ui kia koe uaorai, ‘Eaa ta Iehova e umuumu maira?’ Ko taau mea meitaki rava atu ka rauka i te rave i teia taime. Akamanako ana i teia: Kua maromaroa tetai tuaine e 80 ona mataiti no tei kore e maata akaou tana ka rauka i te rave i roto i te angaanga tutu aere mei tona 40 mataiti rai. Karanga aia e kare a Iehova e mareka i tana e oronga ra. E tika ainei te reira? Me kua maroiroi teia tuaine i te tavini i te Atua i tona 40 mataiti, e te tavini nei rai i tona 80 mataiti, kare aia i akamutu ana i te tavini maroiroi ia Iehova. Me manako tatou e kia maata atu ta tatou ka rave e mareka ai a Iehova ia tatou, e akamaara, na Iehova e akanoo eaa te ka akamareka iaia. No reira, me rave tatou i ta tatou ka rauka, ka rekareka a Iehova!—Akaaite kia Mataio 25:20-23.

6. Eaa ta tatou ka apii mai mei te akaraanga o Maria?

⁶ Ka rekareka tatou me akamou ua ki runga i ta tatou ka rauka i te rave, kare ki runga i te mea kare e rauka. Akamanako ana i te tuaine ko Maria, kua rokoia e te maki e kua kotingaia tana angaanga tutu aere. I te akamataanga, kua taitaia aia e kua manako puapinga kore iaia uaorai. Inara kua maara iaia tetai tuaine i roto i te putuputuanga kare e rauka akaou i te aaere, e kua inangaro aia i te tauturu iaia. Karanga a Maria, “Kua akanoo au kia tutu aere maua na runga i te tereponi e te tata reta. Me oti ta maua tutu aere, ka oki au ki te kainga ma te rekareka e kua tauturu au i toku tuaine.” Ka rauka katoa ia tatou te rekareka me akamou ua ki runga i ta tatou ka rauka i te rave. Akapeea i reira me ka rauka ia tatou i te tavini maata atu ia Iehova?

7. Eaa te ako ta te apotetoro ko Petero i oronga ki te au Kerititiano?

⁷ I roto i tana reta mua, kua akamaroiroi te apotetoro ko Petero i tona au taeake kia taangaanga i to ratou au tareni no te akamaroiroi i tetai ke. Tata a Petero: “Ka oronga te tangata katoa i te meitaki no tetai, mei tei rauka mai iaia ra, mei te tiaki meitaki i te aroa ua tumatatini a te Atua.” (1 Pete. 4:10) Auraka tatou e tāpu i to tatou au tareni no te mea penei ka vareae tetai ke me kore ka  akataitaia ia ratou. Me tāpu tatou i te reira, kare tatou e oronga i te mea meitaki kia Iehova.

8. Ia 1 Korinetia 4:6, 7, eaa ra tatou kare e akapaapaa ia tatou uaorai?

⁸ Ka anoanoia tatou kia taangaanga meitaki i to tatou tareni, inara kia matakite auraka e akapaapaa ia tatou uaorai. (E tatau ia 1 Korinetia 4:6, 7.) Ei akaraanga, penei e tareni toou no te akamata i tetai apii Pipiria. Kia taangaanga meitaki koe i te reira, inara auraka e akapaapaa ia koe uaorai. Penei kua akamata koe i tetai apii Pipiria. E āka inangaro toou i te akakite i te reira ki te au taeake. Inara te aravei anga kotou, te akakite ra tetai tuaine e kua rauka iaia i te oronga i tetai makatini. Kua oronga aia i tetai makatini; kua akamata koe i tetai apii Pipiria. Eaa taau ka rave? Kua kite koe e ka akamaroiroiia te au taeake mei taau i rauka, inara penei ka iki koe i tetai tuatau ke no te akakite i te reira, kia kore te tuaine e manako e kare aia e karape ana mei ia koe rai. E tu takinga meitaki teia. No reira, auraka e akamutu i te akamata i tetai apii Pipiria. Me e tareni toou—taangaanga i te reira!

9. Akapeea tatou me taangaanga i to tatou tareni?

⁹ E akamaara, to tatou tareni e apinga aroa te reira no ko mai i te Atua. E taangaanga tatou i te reira no te akamaroiroi i te putuputuanga, kare no te akapaapaa ia tatou uaorai. (Phili. 2:3) Me taangaangaia to tatou maroiroi e te tu karape no te rave i to te Atua anoano, ka rekareka tatou—kare no te mea e maata atu ta tatou i rave me kore e meitaki atu tatou i tetai ke, mari ra no te akapaapaa ia Iehova.

10. Eaa ra kare i te mea meitaki kia akaaite ia tatou uaorai ki tetai ke?

¹⁰ Me kare tatou e matakite, penei ka akamata tatou i te akaaite i to tatou maroiroi ki te tu paruparu o tetai ke. Ei akaraanga, penei e oronga ana tetai taeake i te au akoanga meitaki. E karape aia i te rave i te reira. Penei ka manako aia e meitaki atu aia i tetai taeake kare e karape ana i te oronga i te ako. Inara penei e taeake takinga meitaki aia, e karape i te tereni i tana tamariki e te maroiroi i te tutu aere. Kia rekareka tatou e maata te au taeake e te au tuaine e taangaanga nei i to ratou tareni no te tavini ia Iehova e te tauturu i tetai ke!

11. Eaa tatou ka aru ei i te akaraanga o Iesu?

¹¹ Kare tatou e akaaite ia tatou uaorai ki tetai ke. Noatu ra, ka puapingaia tatou mei te akaraanga o te au tavini tiratiratu o Iehova. Akamanako ana i te akaraanga o Iesu. Ka rauka ia tatou i te apii mai mei tona au tu manea e tana i rave. (1 Pete. 2:21) Me tauta tatou i te aru vaitata i tona akaraanga, ka riro mai tatou ei au tavini meitaki no Iehova e ka puapingaia ta tatou angaanga tutu aere.

12-13. Eaa ta tatou ka apii mai mei te Ariki ko Davida?

¹² E maata te au akaraanga Pipiria no te au tane e te au vaine tiratiratu ka tau kia aru tatou noatu to ratou tu apa. (Ebe. 6:12) Akamanako ana i te Ariki ko Davida, ta Iehova i kapiki “e tangata e tau i toku ngakau” me kore, mei ta tetai urianga Pipiria i taiku, “te tu tangata taku i mareka maata.” (Anga. 13:22) E tangata apa ua a Davida. Kua rave ana aia i te ara kino tikai. Noatu ra, e akaraanga meitaki aia kia aru tatou. No teaa ra? Te akoia anga aia, kare aia i kimi ana i tetai kotoeanga. Mari ra, kua āriki aia i te akoanga pakari e kua tataraara no tana i rave. Tei tupu, kua akakore a Iehova i tana ara.—Sala. 51:3, 4, 10-12.

¹³ Mei tei tupu kia Davida, penei ka ui tatou: ‘Eaa taku ka rave me akoia au? Ka āriki ainei au i toku tarevake, me ka kimi ainei au i tetai kotoeanga? Ka viviki ainei au i te akaapa i tetai ke? Ka rave akaou ainei au i teia tarevake?’ Me tatau koe no runga i te au tane e te au vaine tiratiratu i roto i te Pipiria, penei ka ui koe, ‘Kua aite ainei to ratou au manamanata ki toku? Eaa te au tu manea ta ratou e akaari ra?’ Pera katoa e ui i teia uianga: ‘Akapeea au me aru i te akaraanga meitaki o teia au tavini tiratiratu o Iehova?’

14. Akapeea tatou e puapinga ai mei te akaraanga meitaki o te au taeake?

¹⁴ Ka puapinga katoaia tatou me aru i te akaraanga o te au taeake mapu e te ruaine. Ei akaraanga, kua kite ainei koe i tetai taeake i roto i te putuputuanga te akakoromaki ra i tetai timataanga—penei te māroia ra e tona au oa, te patoianga a te ngutuare tangata me kore kua rokoia e te maki? Eaa tona au tu meitaki ka inangaro koe i te akaari maata atu? Na te akamanako anga i  tona akaraanga meitaki, ka tauturu te reira ia koe kia akakoromaki i toou au manamanata. Ka rekareka tatou e kua akanoo teia au taeake i te akaraanga meitaki no tatou kia aru!—Ebe. 13:7; Iako. 1:2, 3.

15. Eaa te akoanga a te apotetoro ko Paulo te ka tauturu ia tatou kia rekareka ua i te tavini ia Iehova?

¹⁵ E tupu ei te ’au e te taokotai i roto i te putuputuanga, ka anoanoia tatou kia rave i ta tatou ka rauka. Akamanako ana i te au Kerititiano mua. E tukeke to ratou tareni e ta ratou au apainga. (1 Kori. 12:4, 7-11) Inara, kare teia i akatupu ana i te ke e te vaerua tarere. Mari ra, kua akamaroiroi a Paulo ia ratou kia rave i ta ratou ka rauka “kia meitaki oki te kopapa o te Mesia.” Tata a Paulo ki to Ephesia: “No te meitaki o te au pirianga katoa i te pakari mou o te au ngai katoa kia tau, tupu akera te kopapa i te maata anga o tona uaorai meitaki ma te aroa.” (Ephe. 4:1-3, 11, 12, 16) Ko tei rave i te reira, kua akatupu ratou i te ’au e te taokotai—te tu e kiteia nei i roto i te putuputuanga i teia tuatau.

16. Eaa taau ka tauta i te rave? (Ebera 6:10)

¹⁶ Auraka e akaaite ia koe uaorai ki tetai ke. E tauta i te akaari i te au tu meitaki o Iesu. Ka puapinga katoaia koe mei te au akaraanga meitaki o te Pipiria e to teia tuatau. Ia koe e rave maroiroi ra i taau ka rauka, ka papu ia koe e “kare [a Iehova] i te Atua tuatua-tika kore, ka akangaro atu ei aia i ta kotou angaanga i rave.” (E tatau ia Ebera 6:10.) Kia rekareka ua rai koe i te tavini ia Iehova, no te mea ka akaperepere aia i taau tauta anga i te akamareka iaia.