1. Со керела амен бут бахтале?

 О ЈЕХОВА мангела те ова бахтале. Амен џанаја акава соске о бахталипе тано јекх таро особине со авена таро свети дух (Гал. 5:22). Адалеске со иси повише бахталипе кеда дела пе него кеда лела пе, бут сием бахтале кеда даја са амендар ки служба хем кеда поможинаја амаре пхраленге ко различна начинија (Дела 20:35).

2-3. а) Спрема Галатите 6:4, кола дуј буќа ка поможинен аменге те ачхова бахтале ки служба башо Јехова? б) Со ка дикха ки акаја статија?

² Ко Галатите 6:4, о апостол Павле спомнинела дуј буќа кола со ка поможинен аменге те ачхова бахтале. (Читин.) Прво, амари цел ваљани те овел те да е Јеховаске амаро најшукар. Ако даја леске амаро најшукар, ка ова бахтале (Мат. 22:36-38). Дујто, на ваљани те споредина амен е јаверенцар. Шај иси амен шукар састипе, несаве способностија или сиклилем те кера несаве буќа бут шукар, амен сепак ваљани те ова благодарна е Јеховаске башо адава со шај те кера. Уствари, са со иси амен добинѓем лестар. Тари јавер страна, ако о јавера ко несаво начин тане пошукар амендар ки служба, ваљани те ова бахтале, соске користинена пле способностија те шај те славинен е Јехова, а на те истакнинен пе или те исполнинен несаве себична целија. Адалеске, наместо те натпреварина амен ленцар, ваљани те сикљова лендар.

³ Ки акаја статија ка дикха со шај те поможинел аменге кеда сием обесхрабриме адалеске со нашти те кера добором кобор со мангаја ки служба башо Јехова. Ка дикха исто аѓаар сар шај ко најшукар начин те користина амаре способностија хем со шај те сикљова таро е јаверенгоро пример.

4. Тари која причина шај некој те обесхрабринел пе? Вакер пример.

⁴ Несаве таро е Јеховаскере слуге тане обесхрабриме соске нашти те керен добором кобор со мангена ки служба  башо Јехова, адалеске со пхуриле или насвалиле. Акава случинѓа пе јекхе пхењаке со викинела пе Керол. Англедер, ој служинела сине атхе коте со сине побари потреба таро објавителија. Ко адава време ој водинела сине 35 библиска курсија хем поможинѓа некоборе џененге те ден лафи е Јеховаске кај ка служинен леске хем те крстинен пе. Ла сине ла чаче шукар резултатија ки служба! Пало несаво време ој насвалили хем адалеске повише време ваљани сине те ачховел кхере. И Керол вакерела: „Свесно сиум кај мло насвалипе ограничинела ман хем кај нашти те керав адава со о јавера керена ле, сепак осетинава ман сар ка пхене нане ман добором бари вера сар о јавера. Адалеске, бут манге пхаро соске нашти те керав адава со мангава те керав“. И Керол мангела те дел е Јеховаске пло најшукар. Уствари, адава тано бут пофално. Шај те ова сигурна кај амаро Девел кова сој тано сочувствително, ценинела лакоро шукар стави.

5. а) Со на ваљани те бистра ако сием обесхрабриме адалеске со нашти те кера добором кобор со мангаја? б) Сар сој сикавдо ко слике, сар о пхрал цело пло живото дела пло најшукар ки служба башо Јехова?

⁵ Ако понекогаш сиан обесхрабримо таро тле ограничувања, пуч тут: „Со очекујнела мандар о Јехова“? О Јехова очекујнела те де тло најшукар спрема тле околностија. Размислин башо акава пример: Јекх пхен, кола со иси 80 берш, тани обесхрабрими адалеске со нашти те керел добором ки служба кобор со керела сине кеда сине ла 40 берш. Ој мислинела кај иако дела пло најшукар е Јеховаске ов нане задоволно латар. Ама дали адава чаче аѓаар? Ако акаја пхен денѓа пло најшукар е Јеховаске кеда сине ла 40 берш хем понадари да керела адава ко 80 берш, ој уствари никогаш на чхинавѓа те дел ле пло најшукар. Ако почминаја те мислина кај на кераја доволно е Јеховаске, на ваљани те бистра кај о Јехова тано адава со одлучинела кобор леске доволно. Ако даја леске амаро најшукар, о Јехова ка овел амендар задоволно! (Споредин Матеј 25:20-23.)

6. Со шај те сикљова таро е Маријакоро пример?

⁶ Полокхе ка овел те ова бахтале ако концентриринаја амен ко адава со шај те кера, наместо ко адава со нашти те кера. Размислин баши јекх пхен која со викинела пе Марија која со башо пло насвалипе нашти те керел повише ки служба. Ко почеток, ој сине бут разочарими хем мислинела сине кај нане корисно. Ама, пало адава ој сетинѓа пе ки јекх пхен таро собрание, која со нашти сине више те уштел таро кревети хем ој одлучинѓа те поможинел лаке. И Марија вакерела: „Договоринѓем амен заедно те сведочина преку телефони хем писмонцар. Секова пути кеда иранава ман сине кхере сиум сине бахтали хем задоволно соске шај сине те поможинав ме пхењаке“. Амен да шај те ова побахтале ако концентриринаја амен ко адава со шај те кера, наместо ко адава со нашти те кера. Ама, со ако сием бут шукар ко несаве подрачја ки служба хем шај те кера повише?

7. Саво совет денѓа о апостол Петар е христијаненге?

⁷ Ко пло прво писмо, о апостол Петар поттикнинѓа е христијанен те користинен пумаре способностија те шај те охрабринен пумаре пхрален. Ов пишинѓа: „Служинен јекх јекхеске — секој е поклонеа со добинѓа ле — сар шукар управителија е Девлескере шукарипаја со на заслужинаја ле“ (1. Пет. 4:10). Ваљани те трудина амен целосно те користина амаре способностија хем те на дара кај башо адава о јавера шај те овен  аменге љубоморна или кај ка обесхрабринен пе. Ако на користинаја амаре способностија ко најшукар начин, тегани нане те да амаро најшукар е Јеховаске.

8. Спрема 1. Коринќаните 4:6, 7, соске на ваљани те фалина амен башо амаре способностија?

⁸ Иако ваљани целосно те користина амаре способностија мора бут те пазина те на фалина амен ленцар. (Читин 1. Коринќаните 4:6, 7.) На пример, шај туке локхе те почмине библиско курси. Користин адаја способност! Ама те користине адаја способност хем те фалине тут тане дуј различна буќа. Замислин туке кај сигенде сине тут јекх бут шукар искуство ки служба хем кај почминѓан библиско курси хем едвај аџикереа те пхене адава е пхраленге хем е пхењенге тари тли група проповедибаске. Ама кеда кхединѓен тумен, јекх пхен вакерела пло искуство хем вакерела кај успејнѓа те дел јекх списание. Ој денѓа јекх списание а ту почминѓан јекх библиско курси. Со ка кере? Џанеа кај о пхраља ка овен охрабриме таро тло искуство. Ама шај ка одлучине те вакере ле ки јекх јавер прилика, соске на мангеа и пхен те мислинел песке кај ој нане добором успешно ки служба сар туте. Адава би овела бут љубезно тутар! Ама, адава на значинела кај ваљани те чхинаве те нудине библиско курси. Тут иси тут адаја способност хем адалеске користин ла!

9. Сар ваљани те користина амаре способностија?

⁹ Ма те бистра кај о способностија со иси амен тане поклон таро Девел. Адала поклонија ваљани те користина лен те шај те охрабрина амаре пхрален хем пхењен, а на те фалина амен (Фил. 2:3). Кеда користинаја амари сила хем амаре способностија те шај те кера е Девлескири волја, ка овел амен причина те ова бахтале. Соске? На соске кераја повише таро јавера или мангаја те ова лендар пошукар, него адалеске со мангаја те користина амаре способностија те шај те славина е Јехова.

10. Соске нане шукар те споредина амен е јаверенцар?

¹⁰ Ако на пазинаја шај те пера ко искушение те споредина амаре јака стране е јаверенгере слаба страненцар. На пример, јекх пхрал шај икерела бут шукар говорија. Адаја тани лескири јако страна. Адалеске, ов шај те мислинел песке кај тано пошукар таро јекх пхрал кова со на икерела добором шукар говорија сар лесте. Ама адава пхрал шај тано гостопримливо, воспитинела шукар пле чхавен или тано ревно ки служба. Сием бут бахтале со иси амен бут  пхраља хем пхења кола со користинена пумаре способностија те шај те служинен е Јеховаске хем те поможинен пумаре пхраленге!

11. Соске ваљани те трудина амен те џа пало е Исусескоро пример?

¹¹ Иако на ваљани те споредина амен е јаверенцар, ка овел амен корист ако сикљоваја таро пример е верна слугенгоро. О најшукар пример колестар со шај те сикљова тано о Исус. Иако ов сине совршено, а амен сием несовршена, сепак шај те сикљова таро лескере шуже особине хем постапке (1. Пет. 2:21). Кеда трудинаја амен те џа пало лескоро пример најшукар со шај оваја пошукар слуге е Јеховаскере хем повешта ки служба.

12-13. Со шај те сикљова таро е Давидескоро пример?

¹² Ко е Девлескоро Лафи тане спомнине бут примерија таро верна мурша хем џувља колендар со шај бут те сикљова иако сине несовршена (Евр. 6:12). Размислин башо цари о Давид. Баши лесте о Јехова вакерѓа „мануш спрема мло вило“ или сар со бешела ко јекх јавер библиско превод „личност која со највише свиџинела пе манге“ (Дела 13:22). Ама о Давид на сине совршено. Ов керѓа сериозна гревија. Сепак, ов тано шукар пример аменге. Соске? Адалеске со кеда сине укоримо ов на пробинѓа те оправдинел пе. Наместо адава ов прифатинѓа о строго укор хем искрено каинѓа пе башо адава со керѓа. Хем адалеске о Јехова простинѓа леске (Пс. 51:3, 4, 10-12).

¹³ Те шај те сикљова таро е Давидескоро пример шај те пуча амен: „Сар реагиринава кеда добинава совет? Дали сигате признајнава мле грешке, или оправдинава ман? Дали одма кривинава е јаверен? Дали дава мандар са те на повторинав мле грешке?“ Шај те пуче тут слична пучиба џикоте читинеа ки Библија башо јавера да верна мурша хем џувља. Дали боринена пе сине слична проблеменцар сар тле? Кола шуже особине сикавѓе? Бизи разлика каске читинеа, пуч тут: „Сар шај панда пошукар те џав пало пример акале верно слугаскоро?“

14. Сар шај те користинел аменге адава со ка размислина башо шукар пример амаре пхраленгоро хем пхењенгоро?

¹⁴ Исто аѓаар шај бут те сикљова таро амаре пхраља хем пхења, бизи разлика дали тане терне или пхуре. На пример, дали некој таро тло собрание верно истрајнела  иако шај иси ле несаво проблеми — шај иси ле притисок таро врсникија, проблемија ки фамилија или тано насвало? Дали акале објавителе иси ле несаве шуже особине кола со ту лично би мангеа те развине лен ки побари мера? Ако размислинеа башо лескоро или лакоро шукар пример, шај ка дикхе кола практична буќа ка поможинен туке те истрајне ко неволје. Бут сием благодарна хем бахтале со машкар аменде иси верна пхраља хем пхења колендар со шај те сикљова (Евр. 13:7; Јак. 1:2, 3).

15. Кова совет таро апостол Павле шај те поможинел аменге понадари да бахтале те служина е Јеховаске?

¹⁵ Те шај те овел мир хем јекхипе ко собрание, секова јекх амендар ваљани те дел пло најшукар. Размислин башо христијања таро прво веко. Лен сине лен различна поклонија таро свети дух хем различна задаче (1. Кор. 12:4, 7-11). Ама акава на сине причина те натпреваринен пе јекх јекхеа или те керен поделбе машкар песте. Наместо адава, о Павле поттикнинѓа секоле јекхе лендар те керен адава сој потребно те шај „те изградинен е Христосескоро тело“. Ов пишинѓа е Ефешаненге: „Кеда секова јекх дело керела пли улога, адава поможинела о тело те бајрол, кова со коркори песте изградинела ко мангипе“ (Еф. 4:1-3, 11, 12, 16). Окола христијања со керена сине акава поможинена сине те овел мир хем јекхипе — нешто со авдиве да дикхаја ле ко амаре собранија.

16. Ко со ваљани те ова одлучна? (Евреите 6:10).

¹⁶ Ов одлучно те на споредине тут е јаверенцар. Наместо адава, сикљов таро Исус хем трудин тут те сикаве лескере особине. Сикљов таро е Девлескере верна слуге таро пурано време хем таро амаро време. Понадари да де е Јеховаске тло најшукар хем ов уверимо кај о Јехова „нане неправедно па те бистрел адава со керѓен“. (Читин Евреите 6:10.) Понадари да ов бахтало џикоте служинеа е Јеховаске хем ма бистре кај ов тано бахтало кеда дикхела кај деа тло најшукар те шај те кере лескири волја.