1. So kerela amen but bahtale?

 O JEHOVA mangela te ova bahtale. Amen džanaja akava soske o bahtalipe tano jekh taro osobine so avena taro sveti duh (Gal. 5:22). Adaleske so isi poviše bahtalipe keda dela pe nego keda lela pe, but siem bahtale keda daja sa amendar ki služba hem keda pomožinaja amare phralenge ko različna načinija (Dela 20:35).

2-3. a) Sprema Galatite 6:4, kola duj bukja ka pomožinen amenge te ačhova bahtale ki služba bašo Jehova? b) So ka dikha ki akaja statija?

² Ko Galatite 6:4, o apostol Pavle spomninela duj bukja kola so ka pomožinen amenge te ačhova bahtale. (Čitin.) Prvo, amari cel valjani te ovel te da e Jehovaske amaro najšukar. Ako daja leske amaro najšukar, ka ova bahtale (Mat. 22:36-38). Dujto, na valjani te sporedina amen e javerencar. Šaj isi amen šukar sastipe, nesave sposobnostija ili siklilem te kera nesave bukja but šukar, amen sepak valjani te ova blagodarna e Jehovaske bašo adava so šaj te kera. Ustvari, sa so isi amen dobingjem lestar. Tari javer strana, ako o javera ko nesavo način tane pošukar amendar ki služba, valjani te ova bahtale, soske koristinena ple sposobnostija te šaj te slavinen e Jehova, a na te istakninen pe ili te ispolninen nesave sebična celija. Adaleske, namesto te natprevarina amen lencar, valjani te sikljova lendar.

³ Ki akaja statija ka dikha so šaj te pomožinel amenge keda siem obeshrabrime adaleske so našti te kera doborom kobor so mangaja ki služba bašo Jehova. Ka dikha isto agjaar sar šaj ko najšukar način te koristina amare sposobnostija hem so šaj te sikljova taro e javerengoro primer.

4. Tari koja pričina šaj nekoj te obeshrabrinel pe? Vaker primer.

⁴ Nesave taro e Jehovaskere sluge tane obeshrabrime soske našti te keren doborom kobor so mangena ki služba  bašo Jehova, adaleske so phurile ili nasvalile. Akava slučingja pe jekhe phenjake so vikinela pe Kerol. Angleder, oj služinela sine athe kote so sine pobari potreba taro objavitelija. Ko adava vreme oj vodinela sine 35 bibliska kursija hem pomožingja nekobore dženenge te den lafi e Jehovaske kaj ka služinen leske hem te krstinen pe. La sine la čače šukar rezultatija ki služba! Palo nesavo vreme oj nasvalili hem adaleske poviše vreme valjani sine te ačhovel khere. I Kerol vakerela: „Svesno sium kaj mlo nasvalipe ograničinela man hem kaj našti te kerav adava so o javera kerena le, sepak osetinava man sar ka phene nane man doborom bari vera sar o javera. Adaleske, but mange pharo soske našti te kerav adava so mangava te kerav“. I Kerol mangela te del e Jehovaske plo najšukar. Ustvari, adava tano but pofalno. Šaj te ova sigurna kaj amaro Devel kova soj tano sočuvstvitelno, ceninela lakoro šukar stavi.

5. a) So na valjani te bistra ako siem obeshrabrime adaleske so našti te kera doborom kobor so mangaja? b) Sar soj sikavdo ko slike, sar o phral celo plo životo dela plo najšukar ki služba bašo Jehova?

⁵ Ako ponekogaš sian obeshrabrimo taro tle ograničuvanja, puč tut: „So očekujnela mandar o Jehova“? O Jehova očekujnela te de tlo najšukar sprema tle okolnostija. Razmislin bašo akava primer: Jekh phen, kola so isi 80 berš, tani obeshrabrimi adaleske so našti te kerel doborom ki služba kobor so kerela sine keda sine la 40 berš. Oj mislinela kaj iako dela plo najšukar e Jehovaske ov nane zadovolno latar. Ama dali adava čače agjaar? Ako akaja phen dengja plo najšukar e Jehovaske keda sine la 40 berš hem ponadari da kerela adava ko 80 berš, oj ustvari nikogaš na čhinavgja te del le plo najšukar. Ako počminaja te mislina kaj na keraja dovolno e Jehovaske, na valjani te bistra kaj o Jehova tano adava so odlučinela kobor leske dovolno. Ako daja leske amaro najšukar, o Jehova ka ovel amendar zadovolno! (Sporedin Matej 25:20-23.)

6. So šaj te sikljova taro e Marijakoro primer?

⁶ Polokhe ka ovel te ova bahtale ako koncentririnaja amen ko adava so šaj te kera, namesto ko adava so našti te kera. Razmislin baši jekh phen koja so vikinela pe Marija koja so bašo plo nasvalipe našti te kerel poviše ki služba. Ko početok, oj sine but razočarimi hem mislinela sine kaj nane korisno. Ama, palo adava oj setingja pe ki jekh phen taro sobranie, koja so našti sine više te uštel taro kreveti hem oj odlučingja te pomožinel lake. I Marija vakerela: „Dogovoringjem amen zaedno te svedočina preku telefoni hem pismoncar. Sekova puti keda iranava man sine khere sium sine bahtali hem zadovolno soske šaj sine te pomožinav me phenjake“. Amen da šaj te ova pobahtale ako koncentririnaja amen ko adava so šaj te kera, namesto ko adava so našti te kera. Ama, so ako siem but šukar ko nesave podračja ki služba hem šaj te kera poviše?

7. Savo sovet dengja o apostol Petar e hristijanenge?

⁷ Ko plo prvo pismo, o apostol Petar pottikningja e hristijanen te koristinen pumare sposobnostija te šaj te ohrabrinen pumare phralen. Ov pišingja: „Služinen jekh jekheske — sekoj e poklonea so dobingja le — sar šukar upravitelija e Devleskere šukaripaja so na zaslužinaja le“ (1. Pet. 4:10). Valjani te trudina amen celosno te koristina amare sposobnostija hem te na dara kaj bašo adava o javera šaj te oven  amenge ljubomorna ili kaj ka obeshrabrinen pe. Ako na koristinaja amare sposobnostija ko najšukar način, tegani nane te da amaro najšukar e Jehovaske.

8. Sprema 1. Korinkjanite 4:6, 7, soske na valjani te falina amen bašo amare sposobnostija?

⁸ Iako valjani celosno te koristina amare sposobnostija mora but te pazina te na falina amen lencar. (Čitin 1. Korinkjanite 4:6, 7.) Na primer, šaj tuke lokhe te počmine biblisko kursi. Koristin adaja sposobnost! Ama te koristine adaja sposobnost hem te faline tut tane duj različna bukja. Zamislin tuke kaj sigende sine tut jekh but šukar iskustvo ki služba hem kaj počmingjan biblisko kursi hem edvaj adžikerea te phene adava e phralenge hem e phenjenge tari tli grupa propovedibaske. Ama keda khedingjen tumen, jekh phen vakerela plo iskustvo hem vakerela kaj uspejngja te del jekh spisanie. Oj dengja jekh spisanie a tu počmingjan jekh biblisko kursi. So ka kere? Džanea kaj o phralja ka oven ohrabrime taro tlo iskustvo. Ama šaj ka odlučine te vakere le ki jekh javer prilika, soske na mangea i phen te mislinel peske kaj oj nane doborom uspešno ki služba sar tute. Adava bi ovela but ljubezno tutar! Ama, adava na značinela kaj valjani te čhinave te nudine biblisko kursi. Tut isi tut adaja sposobnost hem adaleske koristin la!

9. Sar valjani te koristina amare sposobnostija?

⁹ Ma te bistra kaj o sposobnostija so isi amen tane poklon taro Devel. Adala poklonija valjani te koristina len te šaj te ohrabrina amare phralen hem phenjen, a na te falina amen (Fil. 2:3). Keda koristinaja amari sila hem amare sposobnostija te šaj te kera e Devleskiri volja, ka ovel amen pričina te ova bahtale. Soske? Na soske keraja poviše taro javera ili mangaja te ova lendar pošukar, nego adaleske so mangaja te koristina amare sposobnostija te šaj te slavina e Jehova.

10. Soske nane šukar te sporedina amen e javerencar?

¹⁰ Ako na pazinaja šaj te pera ko iskušenie te sporedina amare jaka strane e javerengere slaba stranencar. Na primer, jekh phral šaj ikerela but šukar govorija. Adaja tani leskiri jako strana. Adaleske, ov šaj te mislinel peske kaj tano pošukar taro jekh phral kova so na ikerela doborom šukar govorija sar leste. Ama adava phral šaj tano gostoprimlivo, vospitinela šukar ple čhaven ili tano revno ki služba. Siem but bahtale so isi amen but  phralja hem phenja kola so koristinena pumare sposobnostija te šaj te služinen e Jehovaske hem te pomožinen pumare phralenge!

11. Soske valjani te trudina amen te dža palo e Isuseskoro primer?

¹¹ Iako na valjani te sporedina amen e javerencar, ka ovel amen korist ako sikljovaja taro primer e verna slugengoro. O najšukar primer kolestar so šaj te sikljova tano o Isus. Iako ov sine sovršeno, a amen siem nesovršena, sepak šaj te sikljova taro leskere šuže osobine hem postapke (1. Pet. 2:21). Keda trudinaja amen te dža palo leskoro primer najšukar so šaj ovaja pošukar sluge e Jehovaskere hem povešta ki služba.

12-13. So šaj te sikljova taro e Davideskoro primer?

¹² Ko e Devleskoro Lafi tane spomnine but primerija taro verna murša hem džuvlja kolendar so šaj but te sikljova iako sine nesovršena (Evr. 6:12). Razmislin bašo cari o David. Baši leste o Jehova vakergja „manuš sprema mlo vilo“ ili sar so bešela ko jekh javer biblisko prevod „ličnost koja so najviše svidžinela pe mange“ (Dela 13:22). Ama o David na sine sovršeno. Ov kergja seriozna grevija. Sepak, ov tano šukar primer amenge. Soske? Adaleske so keda sine ukorimo ov na probingja te opravdinel pe. Namesto adava ov prifatingja o strogo ukor hem iskreno kaingja pe bašo adava so kergja. Hem adaleske o Jehova prostingja leske (Ps. 51:3, 4, 10-12).

¹³ Te šaj te sikljova taro e Davideskoro primer šaj te puča amen: „Sar reagirinava keda dobinava sovet? Dali sigate priznajnava mle greške, ili opravdinava man? Dali odma krivinava e javeren? Dali dava mandar sa te na povtorinav mle greške?“ Šaj te puče tut slična pučiba džikote čitinea ki Biblija bašo javera da verna murša hem džuvlja. Dali borinena pe sine slična problemencar sar tle? Kola šuže osobine sikavgje? Bizi razlika kaske čitinea, puč tut: „Sar šaj panda pošukar te džav palo primer akale verno slugaskoro?“

14. Sar šaj te koristinel amenge adava so ka razmislina bašo šukar primer amare phralengoro hem phenjengoro?

¹⁴ Isto agjaar šaj but te sikljova taro amare phralja hem phenja, bizi razlika dali tane terne ili phure. Na primer, dali nekoj taro tlo sobranie verno istrajnela  iako šaj isi le nesavo problemi — šaj isi le pritisok taro vrsnikija, problemija ki familija ili tano nasvalo? Dali akale objavitele isi le nesave šuže osobine kola so tu lično bi mangea te razvine len ki pobari mera? Ako razmislinea bašo leskoro ili lakoro šukar primer, šaj ka dikhe kola praktična bukja ka pomožinen tuke te istrajne ko nevolje. But siem blagodarna hem bahtale so maškar amende isi verna phralja hem phenja kolendar so šaj te sikljova (Evr. 13:7; Jak. 1:2, 3).

15. Kova sovet taro apostol Pavle šaj te pomožinel amenge ponadari da bahtale te služina e Jehovaske?

¹⁵ Te šaj te ovel mir hem jekhipe ko sobranie, sekova jekh amendar valjani te del plo najšukar. Razmislin bašo hristijanja taro prvo veko. Len sine len različna poklonija taro sveti duh hem različna zadače (1. Kor. 12:4, 7-11). Ama akava na sine pričina te natprevarinen pe jekh jekhea ili te keren podelbe maškar peste. Namesto adava, o Pavle pottikningja sekole jekhe lendar te keren adava soj potrebno te šaj „te izgradinen e Hristoseskoro telo“. Ov pišingja e Efešanenge: „Keda sekova jekh delo kerela pli uloga, adava pomožinela o telo te bajrol, kova so korkori peste izgradinela ko mangipe“ (Ef. 4:1-3, 11, 12, 16). Okola hristijanja so kerena sine akava pomožinena sine te ovel mir hem jekhipe — nešto so avdive da dikhaja le ko amare sobranija.

16. Ko so valjani te ova odlučna? (Evreite 6:10).

¹⁶ Ov odlučno te na sporedine tut e javerencar. Namesto adava, sikljov taro Isus hem trudin tut te sikave leskere osobine. Sikljov taro e Devleskere verna sluge taro purano vreme hem taro amaro vreme. Ponadari da de e Jehovaske tlo najšukar hem ov uverimo kaj o Jehova „nane nepravedno pa te bistrel adava so kergjen“. (Čitin Evreite 6:10.) Ponadari da ov bahtalo džikote služinea e Jehovaske hem ma bistre kaj ov tano bahtalo keda dikhela kaj dea tlo najšukar te šaj te kere leskiri volja.