1. So ćerela amen te ova bahtale?

 O JEHOVA mangela te ova bahtale. Odova đanaja sose i radost tani plod ando oleso sveti duh (Gal. 5:22). Sebepi so „pobuter isi bahtalipe ked dela pe nego ked lela pe“, amen hijam pobahtale ked daja sa amendar ki služba hem ked pomožinaja amare phralenđe (Dela 20:35).

2-3. (a) Premalo Galatima 6:4, kola duj buća ka pomožinen amen te aćhova bahtale? (b) Sostar ka vaćera ko akava članko?

² Sar so pisini ko Galatima 6:4, o apostol Pavle vaćeri ando duj buća kola šaj te pomožinen amen te aćhova bahtale. (Čitin.) Sar prvo, valjani te da e Jehovase amaro najšukar. Ked daja e Jehovase amaro najšukar, amen ka ova bahtale (Mat. 22:36-38). Sar dujto, na valjani te uporedina amen averencar. Šaj isi amen šukar sastipe, disave sposobnostija ja šaj sikljiljam disave buća šukar te ćera, ama valjani te ova zahvalna e Jehovase aso sa so šaj te ćera. Ki aver strana, ako avera phralja hem phenja tane pošukar amendar ki služba, valjani te ova bahtale sebepi olengo sose on pe sposobnostija koristinena te hvalinen e Jehova, a na te vazden pe. Umesto te manga te ova pošukar olendar, amen valjani te sikljova olendar.

³ Ko akava članko, ka dikha so šaj te pomožini amen ked hijam obeshrabrime sebepi so našti te ćera sa so mangaja. Isto ađahar, ka dikha sar šaj amare sposobnostija te koristina ko najšukar način hem so šaj te sikljova averendar.

4. Sose disave e Jehovase sluge tane obeshrabrime. Vaćer jekh primer.

⁴ Disave e Jehovase sluge tane obeshrabrime sose sebepi po sastipe ja pe berša našti te ćeren sa so angleder ćerđe. Ađahar osetinđa pe hem amari phen i Kerol. Angleder, oj služinđa uduri kaj hine pobari potreba. Tegani hine la 35 kursija hem pomožinđa bute manušenđe te resen đi o krštenje. Oj ćaće hine la but šuži služba. Ama, palo odova oj but naborsaljilji hem morandilji te bešel ćhere. I Kerol phenela: „Sebepi mo nabormipe, našti te ćerav sa so avera ćerena. Podijekh puti mislinava so nane man odobor bari vera sar avera. Svako dive ano mande tani borba maškaro odova so mangava te ćerav hem so ćaće šaj te ćerav hem odova but obeshrabrini man.“ Amari phen i Kerol mangela te ćerel sa so šaj hem odova tano asi svako pohvala. Šaj te ova sigurna so amaro saosećajno Devel cenini odova so dela poklo najšukar.

5. (a) So na valjani te bistra ked hijam obeshrabrime? (b) Sar so o slike mothovena, sar akava phral dela poklo najšukar e Jehovase?

⁵ Ako podijekh puti hijan obeshrabrimo, puć tut: „So o Jehova rodela mandar?“ O Jehova rodela te da olese amaro najšukar. Zamislin akija situacija: Jekh phen isi la 80 berš hem obeshrabrimi tani sose našti te ćerel ki služba odobor kobor ćerđa ked hine la 40 berš. Iako dela poklo najšukar, oj mislini so o Jehova nane zadovoljno olaja. Ama, da li tano odova ćaće ađahar? Ako akija phen dinđa poklo najšukar ked hine la 40 berš hem akana ked isi la 80 berš hem ponodri ćerela odova, tegani oj niked na ćhinavđa te del e Jehovase poklo najšukar. Ako mislinaja so na daja dovoljno e Jehovase, na valjani te bistra so o Jehova odlučini soj tano dovoljno lese. Ako daja lese amaro najšukar, o Jehova ka phenel amenđe: „But šukar ćerđan!“ (Uporedin e stihonencar ando Matej 25:20-23.)

6. So sikljovaja andi phen i Marija?

⁶ Ka ovel amenđe polokho te aćhova bahtale, ako razmislinaja odolestar so šaj te ćera, a na odolestar so našti te ćera. Te dikha o primer andi amari phen i Marija koja sebepi po nabormipe našti te ćerel but ki služba. Ko početko, oj hine obeshrabrimi hem mislinđa so na vredini but. Ama, palo odova počminđa te razmislini kotar jekh phen andi olaki skupština koja našti te uštel ando kreveti hem odlučinđa te ćerel diso te pomožini la. I Marija phenela: „Dogovorinđum man olaja te đa ki služba ađahar so ka vićina prekalo telefoni ja so ka pisina lila. Svako puti ked hijum le olaja ki služba aljum ćhere bahtali hem zadovoljno sose šaj hine te pomožinav me phenjaće.“ Hem amen šaj te ova pana pobuter bahtale ako razmislinaja odolestar so šaj te ćera, a na odolestar so našti te ćera. Ama, so ako šaj te ćera diso pobuter ja so ako ki amari služba disave buća ćaće đana amenđe kotar vas?

7. Kova savet o apostol Petar dinđa e phralenđe?

⁷ Ko po prvo lil, o apostol Petar podstakninđa e phralen pe sposobnostija te koristinen te zorjaćeren averen. Ov pisinđa: „Služinen jekh jekhese premalo poklon kova svako tumendar dobinđa, sar šukar nastojnikija ando Devleso bizaslužimo šukaripe“ (1. Petr. 4:10).  Na valjani te bezdina amen te koristina amare sposobnostija samo sose mislinaja so avera šaj te oven ljubomorna ja obeshrabrime. Ako na koristinaja amare sposobnostija na ka da e Jehovase amaro najšukar.

8. Premali 1. Korinćanima 4:6, 7, sose na valjani te hvalina amen sebepi amare sposobnostija?

⁸ Valjani te koristina amare sposobnostija, ama valjani te pazina te na hvalina amen sebepi odova. (Čitin 1. Korinćanima 4:6, 7.) Na primer, šaj šukar đala tuće te počmine e biblijake kursija. Na valjani te bezdine tut te koristine te sposobnostija. Ama, jekh tano te koristina amare sposobnostija, a aver tano te hvalina amen olencar. Zamislin so akana sigende hine tut jekh šužo iskustvo ki služba hem so počminđan jekh kurs. Šaj jedva ađićereja te vaćere averenđe odolestar. Baš ked tu mangljan te vaćere to iskustvo, jekh phen počminđa te vaćeri poklo iskustvo. Oj aćhavđa jekh časopis ki služba, ama tu počminđan e biblijako kurs. So ka ćere? Tu đaneja so toklo iskustvo ka ohrabrini averen, ama odlučineja aver puti te vaćere lenđe sose na mangeja odija phen te mislini so nane odobor šukar ki služba sar tute. Ovela bi šukar te ćere ađahar. Ama, niked ma ćhinav te puće e manušen te proučinen e Devleso Lafi. Ako isi tut disave sposobnostija, koristin len.

9. Sar valjani te koristina amare sposobnostija?

⁹ Na valjani te bistra so sa amare sposobnostija avena ando Devel. Valjani te koristina len te zorjaćera amare phralen hem phenjen, a na te vazda kokri amen (Fil. 2:3). Ked amari snaga hem amare sposobnostija koristinaja te ćera odova so o Devel mangela, amen ka ova bahtale na sose ćeraja pobuter averendar ja sose mangaja te ova pošukar olendar, već sose koristinaja amare sposobnostija te hvalina e Jehova.

10. Sose nane šukar te uporedina amen averencar?

¹⁰ Ako na pazinaja, šaj te pera ki zamka te uporedina o buća ko kola amen hijam šukar odoleja ko sa avera nane šukar. Na primer, jekh phral šaj đanela te ićeri but šuže govorija. Ov tano šukar ko odova, ama šaj ko po vilo mislini soj tano pošukar ando phral kova na đanela odobor šukar te ićeri govorija. Ama, šaj odova aver phral đanela but šukar te  ugostini averen, but šukar sikavi pe ćhaven hem revno propovedini. Kobor hijam zahvalna so isi amen phralja hem phenja kola pe sposobnostija koristinena te služinen e Jehovase hem te pomožinen averenđe.

11. Sose valjani te da sa amendar te ova sar o Isus?

¹¹ Na valjani te uporedina amen averencar, ama šukar tano te sikljova averendar. Najšukar primer kastar šaj te sikljova tano o Isus. Amen na hijam savršena sar oleste, ama but šaj te sikljova ando olese šuže osobine hem ando buća kola ov ćerđa (1. Petr. 2:21). Ked daja sa amendar te ova sar oleste, pana pošukar ka služina e Jehovase hem ka ova pana pošukar ki služba.

12-13. So šaj te sikljova ando kralj David?

¹² Ko Devleso Lafi isi but manuša kolen šaj te oponašina iako hine nesavršena (Jevr. 6:12). Razmislin ando kralj David. O Jehova phenđa olestar soj tano manuš palo oleso vilo (Dela 13:22). Odova na značinđa so o David hine savršeno. Ov ćerđa but ozbiljna grehija. Ama, ipak tano but šukar primer amenđe. Sose? Ked dobinđa savet, ov na rodinđa opravdanje, već prihvatinđa o savet hem celone vileja kajinđa pe aso odova so ćerđa. Sebepi odova, o Jehova oprostinđa lese (Ps. 51:3, 4, 10-12).

¹³ Ando David šaj te sikljova ađahar so ka puća amen: „Sar reagujinava ked dobinava savet? Da li priznajinava mi greška ja rodava opravdanje aso odova so ćerđum? Da li krivinava averen? Da li dava sa mandar te na ćerav palem odija greška?“ Ked čitinaja kotar avera manuša kotar Devleso Lafi šaj te puća amen: „Da li hine len slična problemija sar me? Kola šuže osobine mothovđe?“ Svako puti ked čitineja i Biblija, puć tut: „Sar šaj te ovav sar akava e Jehovaso verno sluga?“

14. So šaj te sikljova ando amare phralja hem phenja?

¹⁴ Isto ađahar, but šaj te sikljova ando terne hem phure phralja hem phenja ki skupština. Na primer, da li avela tuće ki godi neko andi skupština koj tano verno iako doživini pritisak ando pe vrsnikija, iako avera protivinena pe lese ja iako tano nabormo? Da li neko olendar isi le disave šuže osobine ko kola tu mangeja  pana pobuter te ćere? Ked razmislinaja ando olengo šukar primer, šaj te sikljova sar te istrajina ko amare kušnje. But hijam zahvalna so isi amen asavke verna phralja hem phenja kola dena amen šukar primer (Jevr. 13:7; Jak. 1:2, 3).

15. Kova savet o apostol Pavle dinđa hem sar odova savet hem amenđe avdije pomožini?

¹⁵ Te šaj te ovel mir hem jekhipe ki skupština, svako amendar valjani te del poklo najšukar e Jehovase. Te dikha o primer ando prva hrišćanija. On hine len različita zadatkija hem sposobnostija (1. Kor. 12:4, 7-11). Ama, odova na hine razlog te vazden pe ja te ćeren podele ki skupština. Umesto odova, o apostol Pavle podstakninđa sarinen „te zorjaćeren e Hristeso telo.“ Ov pisinđa e hrišćanenđe ko Efes: „Ked svako deo ćerela pi uloga, odova pomožini o telo te barjol, kova kokri pes izgradini ko mangipe“ (Ef. 4:1-3, 11, 12, 16). Okola so šunđe e Pavleso savet ćerđe ki skupština te ovel mir hem jekhipe, a ađahar tano hem avdije ko amare skupštine.

16. So valjani hem ponodri te ćere? (Jevrejima 6:10)

¹⁶ Ma uporedin tut averencar. Sikljov ando Isus hem de sa tutar te oponašine olese osobine. Sikljov ando manuša kotar Devleso Lafi hem ando amare phralja hem phenja. Đi hem ponodri deja toklo najšukar e Jehovase, ov sigurno so o Jehova „nane nepravedno te bistrel“ odova so ćerđan. (Čitin Jevrejima 6:10.) Hem ponodri ov bahtalo đi služineja e Jehovase hem ma bistri so o Jehova tano bahtalo ked dikhela so deja lese toklo najšukar.