1. Σο πφερέλα-αμέν χαρά;

 Ο ΙΕΧΩΒΑ μανγκέλα τι αβάς ευτυχισμέ. Τζανάσα-λες ανταβά σόσκε η χαρά ισί αντρέ κο καρπός κι άγιε πνευμάσκο. (Γαλ. 5:​22) Αφού ισινάμ πο ευτυχισμέ κάνα ντάσα παρά κάνα λάσα, πφερντιάσα χαρά κάνα κεράσα ο πο λατσσό κο έργος ντα κάνα βοηθίνασα αμαρέ πφραλέν μπουτέ τροπόντζαρ.​—Πράξ. 20:35.

2, 3. (α) Καλά ντούι πράγματα κα βοηθίνεν-αμέν τι ατσσικιαράς αμαρί χαρά κι Ιεχωβάσκι υπηρεσία σαρ σικαβέλα ο εδάφιος Γαλάτες 6:​4; (β) Σο κα ντικχάς ανταλέ μαθημάστε;

² Κο εδάφιος Γαλάτες 6:4, ο απόστολος Παύλος βακερέλα ντούι πράγματα σο κα βοηθίνεν-αμέν τι ατσσικιαράς αμαρί χαρά. (Διαβάνεν) Πρώτον, πρέπει τι μανγκάς τι ντας κο Ιεχωβά ο πο λατσσό σο τθεράσα αμέν. Άμα ντάσα ο πο λατσσό σο τθεράσα αμέν, κα αβάς ευτυχισμέ. (Ματθ. 22:​36-38) Δεύτερον, δεν πρέπει τι συγκρίνας αμαρό νεαυτός ι γιαβερέντζαρ. Ατζέ-ντα άμα αμαρί υγεία, ο σικλιαριπέ σο λιντάμ ή αμαρέ ικανότητες να μουκχένα-αμέν τι κεράς μπουτ πράγματα, πρέπει τι αβάς πφερντέ εκτίμηση ι Ιεχωβάσκε σόσκε σο-ντα τθεράσα, ισί λέσταρ. Οκιά μπάνταρ, άμα ο γιαβερά κερένα πο λατσσές αμένταρ κάτι κι Ιεχωβάσκι υπηρεσία, πρέπει τι χαιρίνας σο χρησιμοποιήνενα πουμαρέ χαρίσματα για τι δοξάνεν ι Ιεχωβάς ντα όχι για τι ισαρέν-πες ή για τι κερέν λατσσιπέ πουμένγκε. Οτθάρ, μα τι τζας λέντζαρ κόντρα, αλλά τι σικλιάς λένταρ.

³ Ανταλέ μαθημάστε, κα ντικχάς σαρ τι ντας-λεν πέρα κάνα τσσουβάσα αμαρέ γκίστε οντουλένγκε σο ναστί κεράσα κι Ντεβλέσκι υπηρεσία. Ντα κα βακεράς σαρ τι χρησιμοποιήνας καζόμ πο λατσσές αβέλα-πες σο-ντα χαρίσματα τθεράσα ντα σο μπορίνασα τι σικλιάς κατά παράδειγμας ι γιαβερένγκο.

4. Σο μπορίνελα τι κερέλ-αμέν τι χασαράς αμαρί ζορ; Βακερέν εκ παράδειγμας.

⁴ Μερικοί αμένταρ σο πφουρίλιβασα ή ισινάμ νασφαλέ ναστί κεράσα σαρέ οντουλά σο κα μανγκάας, οτθάρ τσσουβάσα αμαρέ γκίστε. Ανταβά αβιλό-πες κι Κάρολ. Βόι υπηρετίνελας οτθέ σο η ανάγκη ισινέ πο μπαρί. Οντουβά βακίτι, κερντάς 35 τζενέν μελέτη ντα βοηθιντάς μπουτέν τι ερεσέν κο μπολντιπέ. Η Κάρολ κερντάς μπουτ πράγματα κο έργος! Αλλά σοράν νασφάλιλι, οτθάρ ακανά ο πο μπουτ ντιβεσά ναστί νικιόλα κατά κχερ. Βόι βακερέλα: «Τζανάβα ότι μο νασφαλιπέ να μουκχέλα-μαν τι κεράβ οντουλά σο κερένα ο γιαβερά, αλλά πακιάβα ότι να ισινόμ αζόμ πιστή σαρ ισί βον. Ισί σαρ τι αβέλα-πες εκ τζένγκι αντρέ μάντε σόσκε ναστί κεράβα οντουλά σο μανγκάβα ντα ισί μάνγκε μπουτ πφαρό τι νταϊντίναβ». Η Κάρολ μανγκέλα τι κερέλ ι Ιεχωβάσκε ο πο λατσσό σο μπορίνελα, ντα αξίνελα ισαριπέ ανταλέσκε! Ισινάμ σίγουροι ότι αμαρό Ντεβέλ σο πφαμπόλα αμένγκε εκτιμίνελα-λα σο ντέλα-Λες ο πο λατσσό σο τθερέλα.

5. (α) Σο πρέπει τι ντας-αμέν γκοντί άμα χασαράσα αμαρί ζορ ιτιρί οντουλένταρ σο ναστί κεράσα; (β) Σαρ σικάντιβελα κο φωτογραφίες, σαρ ντινάς οντουβά πφραλ ο πο λατσσό κι Ιεχωβάσκι υπηρεσία σαρέ ο μπρεσά πι ζωγιάτε;

⁵ Άμα μπάζιμα χασαρένα τουμαρί ζορ ιτιρί οντουλένταρ σο ναστί κερένα, πουτσέν-τουμέν: “Σο μπεκλεντίνελα ο Ιεχωβά μάνταρ;” Ο πο λατσσό σο τθερένα τουμέν, καβά-ντα τι αβέλ ανταβά ακανά. Βακερέν χάι ότι εκ πφεν, σο ισί 80 μπρεσένγκι, χασαρντάς πι ζορ σόσκε ναστί κερέλα κο έργος οντουλά σο κερέλας κάνα ισινέ 40 μπρεσένγκι. Αμντίνελα ότι, παρόλο σο ντέλα ο πο λατσσό σο τθερέλα, να κερέλα ι Ιεχωβάσκο γκι. Αλλά ισί μπαγιά ανταβά; Σκεφτίνεν: Άμα ντέλας-λες ο πο λατσσό κάνα ισινέ 40 ντα ντέλα-λες ο πο λατσσό σο τθερέλα ακανά-ντα σο ισί 80, να τσσιναντάς τι ντελ-λες ο πο λατσσό. Άμα νιωθίνασα ότι οντουλά σο κεράσα να ερεσένα για τι κεράς ο γκι ι Ιεχωβάσκο, χρειαζίντιβελα τι ντας-αμέν γκοντί ότι ο Ιεχωβά ισί οντουβά σο βακερέλα σο τι κεράς για τι αβέλ λέσκο γκι. Άμα κεράσα σο νακχέλα αμαρέ βαστένταρ, ο Ιεχωβά κα αβέλ σαρ τι βακερέλ αμένγκε: «Μπουτ λατσσές κερντάν!»​—Ντικχέν Ματθαίος 25:​20-23.

6. Σο σικλιάσα κατά παράδειγμας ι Μαριάκο;

⁶ Κα αβέλ πο εύκολος τι αβάς χαρούμενοι άμα τθεράσα αμαρέ γιακχά οντουλέντε σο μπορίνασα τι κεράς, όχι οντουλέντε σο ναστί κεράσα. Σκεφτίνεν ι Μαριά, εκχέ πφενιά σο ναστί κερέλα αζόμ μπουτ πράγματα σόσκε τθερέλα εκ νασφαλιπέ. Κι αρχή, η Μαρία στεναχωρίντιβελας μπουτ ντα πακιάλας ότι να τθερέλας αξία. Αλλά σοράν αντάς πι γκοντιάτε εκχέ νασφαλέ πφενιά σο ναστί ιστίλα κατά κρεβάτι ντα μανγκλάς τι βοηθίνελ-λα. Η Μαρία βακερέλα: «Κανονιντόμ τι κεράβ έργος λάσαρ κατά τηλέφωνος ντα κατά επιστολές. Κάθε φαρ σο κεράας έργος, βουρτίναβας κχερέ πφερντί χαρά ντα αβέλας μο γκι σο βοηθιντόμας μι πφενιά». Κα μπαριαράς αμέν-ντα αμαρί χαρά άμα τθεράσα αμαρέ γιακχά οντουλέντε σο μπορίνασα τι κεράς, όχι οντουλέντε σο ναστί κεράσα. Αλλά σο αβέλα-πες άμα μπορίνασα τι κεράς πο μπουτ ή άμα ισινάμ μπουτ λατσσέ εκχέ πραγμάστε κι Ιεχωβάσκι υπηρεσία;

7. Καγιά συμβουλή ντινάς ο απόστολος Πέτρος κο Χριστιανοί;

⁷ Κι πρώτη επιστολή σο γραφιντάς ο απόστολος Πέτρος ι Ντεβλέσκε πνευμάσαρ, βακερντάς ι πφραλένγκε τι χρησιμοποιήνεν σο-ντα χάρισμας ή δώρος λιντέας για τι ντεν ζορ ι γιαβερέ Χριστιανόν. Ο Πέτρος γραφιντάς: «Αφού ο κάθε εκ τουμένταρ λιντάς εκ δώρος, τι χρησιμοποιήνεν-λες για τι υπηρετίνεν ο εκ ι γιαβερές σαρ λατσσέ υπηρέτες ι λατσσιμάσκε  σο σικαβέλα ο Ντεβέλ χωρίς τι αξίνεν-λες». (1 Πέτρ. 4:​10) Νανέ λατσσό τι σακιντίνας τι χρησιμοποιήνας αμαρέ χαρίσματα καζόμ πο μπουτ αβέλα-πες επειδή νταράσα ότι ο γιαβερά μπορεί τι ζηλίνεν ή τι χασαρέν πουμαρί ζορ. Άμα κα κεράας-λες ανταβά, να κα ντάας κο Ιεχωβά ο πο λατσσό σο τθεράσα αμέν.

8. Σόσκε νανέ λατσσό τι ισαράς-αμέν αμαρέ χαρισματένγκε σαρ βακερένα ο εδάφια 1 Κορινθίους 4:6, 7;

⁸ Χρειαζίντιβελα τι χρησιμοποιήνας αμαρέ χαρίσματα καζόμ πο μπουτ αβέλα-πες, αλλά πρέπει τι τθεράς αμαρί γκοντί μα τι ισαράς-αμέν λένγκε. (Διαβάνεν 1 Κορινθίους 4:6, 7) Για παράδειγμας, μπέκιμ τζανάσα λατσσές σαρ τι ασταράς νεβέ μελέτες. Μα τι σακιντίνας τι χρησιμοποιήνας ανταβά χάρισμας! Αλλά γιαβέρ ισί τι χρησιμοποιήνας αμαρό χάρισμας ντα γιαβέρ τι ισαράς-αμέν λέσκε. Βακερέν χάι ότι τθεράας εκ μπουτ σουκάρ εμπειρία κο έργος ντα ασταρντάμ εκ μελέτη. Μπεσάσα σαρ σαρ τι βακεράς ο αμπέρια κο πφραλά αμαρέ ομιλόσκε. Αλλά κάνα ισινάμ ι ομιλόσαρ, εκ πφεν πουτρέλα ι πφραλένγκε σαρ ντινάς εκ περιοδικός. Βόι ντινάς εκ περιοδικός. Αμέν ασταρντάμ εκ μελέτη. Σο κα κεράς; Τζανάσα ότι ο πφραλά κο όμιλος κα λεν ζορ αμαρέ εμπειριάταρ, αλλά μπέκιμ τι τραμπίνας τι βακεράς-λα εκ γιαβέρ φαρ για μα τι χασαρέλ πι χαρά η πφεν σο ντινάς ο περιοδικός. Αντικάς κα σικαβάς λατσσιπέ. Αλλά δεν πρέπει τι τσσιναβάς τι ασταράς νεβέ μελέτες. Τθεράσα χάρισμας ντα ισί λατσσό τι χρησιμοποιήνας-λες!

9. Σαρ πρέπει τι χρησιμοποιήνας αμαρέ χαρίσματα;

⁹ Τι ντας-αμέν γκοντί ότι σο-ντα χαρίσματα τθεράσα ισί δώρα κατά Ντεβέλ. Πρέπει τι χρησιμοποιήνας ανταλά δώρα για τι ντας ζορ κι κχανγκιρί, όχι για τι ισαράς-αμέν. (Φιλιπ. 2:3) Κάνα χρησιμοποιήνασα αμαρί ζορ ντα αμαρέ χαρίσματα για τι κεράς σο μανγκέλα ο Ντεβέλ, κα τθεράς λόγος τι χαιρίνας, όχι επειδή ισινάμ πο λατσσέ ή πο οπρέ λένταρ, αλλά επειδή χρησιμοποιήνασα αμαρέ χαρίσματα για τι δοξάνας ι Ιεχωβάς.

10. Σόσκε νανέ γκοντιαβέρ τι συγκρίνας-αμέν ι γιαβερέντζαρ;

¹⁰ Άμα εκ τζενό να τθερέλα πι γκοντί, μπέκιμ τι περέλ κι παγίδα τι συγκρίνελ ο πράγματα σο κερέλα λατσσές ι πραγματέντζαρ σο να κερέλα λατσσές εκ γιαβέρ πφραλ. Για παράδειγμας, εκ πφραλ μπέκιμ κερέλα μπουτ σουκάρ ομιλίες. Τθερέλα χάρισμας. Αντρέ πι γκίστε όμως μπέκιμ αμντίνελα ότι εκ γιαβέρ πφραλ σο ζορίντιβελα τι κερέλ ομιλίες ισί πο τελέ λέσταρ. Αλλά ο γιαβέρ πφραλ ισί λατσσό γιαβερέ πραγματέντε. Για παράδειγμας, πουτρέλα πο κχερ ι πφραλένγκε, σικλιαρέλα λατσσές πι τσσαβέν ή κερέλα ο έργος αντράλ πι γκίσταρ. Καζόμ εκτίμηση τθεράσα αμαρέ πφραλένγκε  ντα πφενίνγκε σο τθερένα αζόμ χαρίσματα ντα χρησιμοποιήνενα-λεν για τι υπηρετίνεν ι Ιεχωβάς ντα για τι βοηθίνεν ι γιαβερέν!

11. Σόσκε πρέπει τι κεράς σο νακχέλα αμαρέ βαστένταρ για τι αβάς σαρ ο Ιησούς;

¹¹ Παρόλο σο νανέ λατσσό τι συγκρίνας-αμέν ι γιαβερέντζαρ, ντικχάσα λατσσιπέ κάνα σικλιάσα κατά παράδειγμας πιστέ τζενένγκο. Σκεφτίνεν ι Ιησούς. Παρόλο σο ισινέ τέλειος, μπορίνασα τι σικλιάς λέσκε σουκάρ ιδιοτητένταρ ντα οντουλένταρ σο κερέλας. (1 Πέτρ. 2:​21) Κάνα κεράσα σο νακχέλα αμαρέ βαστένταρ για τι αβάς καζόμ πο μπουτ αβέλα-πες σαρ λέστε, ισινάμ πο λατσσέ υπηρέτες ι Ιεχωβάσκε ντα κεράσα πο λατσσές ο έργος.

12, 13. Σο σικλιάσα κατά βασιλιάς Δαβίδ;

¹² Κο Λάφι κι Ντεβλέσκο ισί μπουτ παραδείγματα πιστέ μουρσένγκε ντα τζουβλίνγκε. Αξίνελα τι αβάς σαρ λέντε, παρόλο σο ισινέ ατελείς. (Εβρ. 6:​12) Ανέν τουμαρέ γκοντιάτε ι βασιλιάς Δαβίδ. Ο Ιεχωβά βακερντάς ότι ο Δαβίδ ισινέ εκ “μουρς αντικάς σαρ μανγκέλας [ι Ντεβλέσκο] γκι”. (Πράξ. 13:​22) Αλλά ο Δαβίδ να ισινέ τέλειος. Κερντάς μπαρέ λάθη πι ζωγιάτε. Αλλά ισί λατσσό παράδειγμας αμένγκε. Σόσκε; Σόσκε κάνα λιντάς διόρθωση, να μπεσλό τι αρακχέλ δικαιολογίες. Οκιά μπάνταρ, ασουντάς ι πφαρί συμβουλή σο ντιντιλί-λες ντα μετανιωσάλο μπαγιά οντουλένγκε σο κερντάας. Οτθάρ, ο Ιεχωβά συγχωριντάς-λες.​—Ψαλμ. 51:3, 4, 10-12.

¹³ Κα σικλιάς κατά Δαβίδ άμα κα κεράς αμαρέ νεαυτόσκε ακαλά ερωτήσεις: “Σο κεράβα με κάνα λάβα συμβουλή; Αγαβάβα σουγκό μο λάθη ή μπεσάβα τι αρακχάβ δικαιολογίες; Μήπως σιγκιαράβα τι τσσουβάβ ο βάρετα κο γιαβερά; Μαράβα-μαν για μα τι κεράβ πάλι ο ίδια λάθη;” Ισί λατσσό τι κερέν τουμαρέ νεαυτόσκε ασακέ ερωτήσεις κάνα διαβάνενα κι Γραφή γιαβερέ-ντα πιστέ μουρσένγκε ντα τζουβλίνγκε. Σκεφτίνεν άμα νακχλέ βον-ντα δυσκολίες σαρ τουμαρέ ντα καλά λατσσέ ιδιότητες σικαντέ. Σοράν, πουτσέν-τουμέν: “Σαρ μπορίναβα τι μοιάζαβ πο μπουτ οντουλέ αφοσιωμέ τζενέστε;”

14. Σο λατσσιπέ ντικχάσα κατά παράδειγμας αμαρέ πφραλένγκο;

¹⁴ Ντικχάσα λατσσιπέ κατά παράδειγμας αμαρέ πφραλένγκο-ντα, εμ ι τερνένγκο εμ ι πφουρένγκο. Για παράδειγμας, αβέλα τουμαρέ γκοντιάτε καέκ τζενό τουμαρέ κχανγκιριάταρ σο νταϊντίνελα εκ δοκιμασία, σαρ ισί εκ νασφαλιπέ ντα η κόντρα πι φαμιλιάταρ ή γιαβερένταρ; Ντικχένα οντουλέ τζενέστε λατσσέ ιδιότητες σο κα μανγκένας τουμέν-ντα τι μπαριαρέν ατζέ πο μπουτ; Καζόμ κα ντικχέν λέσκο λατσσό  παράδειγμας, μπέκιμ τι σικλιόν σαρ τι νταϊντίνεν τουμαρέ δοκιμασίες. Ισινάμ πφερντέ εκτίμηση σο τθεράσα πασ’ αμέντε ασακέ παραδείγματα τζενένγκε σο σικαβένα πίστη ντα μπορίνασα τι μοιάζας λέντε. Ανταβά ανέλα αμένγκε μπαρί χαρά!​—Εβρ. 13:7· Ιακ. 1:2, 3.

15. Καγιά συμβουλή σο ντινάς ο απόστολος Παύλος, μπορίνελα τι βοηθίνελ-αμέν τι ατσσικιαράς αμαρί χαρά καζόμ υπηρετίνασα ι Ιεχωβάς;

¹⁵ Για τι ανάς ειρήνη ντα ενότητα κι κχανγκιρί, ο κάθε εκ αμένταρ χρειαζίντιβελα τι ντελ ο πο λατσσό σο τθερέλα βοβ. Ανέν τουμαρέ γκοντιάτε ι πρώτε Χριστιανόν. Τθερένας σαβέ τι μανγκές χαρίσματα ντα διορισμοί. (1 Κορ. 12:4, 7-11) Αλλά ανταβά να κερέλας-λεν τι χαν-πες ντα τι αβέν διχομέ. Οκιά μπάνταρ, ο Παύλος βακερντάς ι κάθε εκχέσκε τι ντελ σο χρειαζίντιβελας «για τι ζουράνιβελ ο σώμας ι Χριστόσκο». Ο Παύλος γραφιντάς κο Εφεσίους: «Κάνα ο κάθε εκ κερέλα πι μπουτί σωστά, βοηθίνελα τι μπαριόλ ο σώμας καζόμ ο σώμας λέλα ζορ μανγκιμάσαρ». (Εφεσ. 4:​1-3, 11, 12, 16) Οντουλά σο κερένας-λες ανταβά ανένας ειρήνη ντα ενότητα κι κχανγκιρί, ντα ανταλά ντικχάσα-λεν αμαρέ κχανγκιρίντε-ντα αντιβές.

16. Σο δεν πρέπει τι κεράς ποτές; (Εβραίους 6:10)

¹⁶ Ποτές μα συγκρίνεν τουμαρό νεαυτός ι γιαβερέντζαρ. Οκιά μπάνταρ, σικλιόν κατά Ιησούς ντα μαρέν-τουμέν για τι τθερέν λέσκε ιδιότητες. Βοηθίντιβεν κατά λατσσέ παραδείγματα ι πουρανέ μπρεσένγκε αλλά εμ οντουλένταρ σο σικαβένα πίστη αμαρέ ντιβεσέντε. Μα τσσιναβέν τι κερέν σο νακχέλα τουμαρέ βαστένταρ, ντα αβέν σίγουροι ότι ο Ιεχωβά «νανέ άδικος για τι μπιστρέλ οντουλά σο κερντέν». (Διαβάνεν Εβραίους 6:​10) Μα τσσιναβέν τι αβέν χαρούμενοι καζόμ υπηρετίνενα ι Ιεχωβάς ντα μα μπιστρέν ότι βοβ εκτιμίνελα σο κερένα ο πο λατσσό για τι αβέλ λέσκο γκι.