1. So pherel amare ile bucuriaia?

 O IEHOVA camel te avas bucurime. Cadea sar jianas, i bucuria cherel partea anda o rodo le spiritosco sfânto. (Gal. 5:22) Anda codoia că si mai but bucuria te das sar te primisaras, amare ile pheren-pe bucuriaia cana das sea amari zor te cheras amari buchi anda o Iehova, hai cana das iech vast caște ajutisaras amare phralen. (Fap. 20:35)

2, 3. a) Cadea sar phenel-pe ando Galateni 6:4, save si dui buchia cai ajutin-ame te avas bucurime ando servicio le Iehovasco? b) So va avela te dichas ande cado articolo?

² Ando Galateni 6:4, o apostolo Pavel phendea anda dui buchia cai ajutin-ame te avas bucurime. (Citisar.) I iechto si, te das le Iehovasche sea so si amen mai lașio. (Mat. 22:36-38) I duito si, te na comparisaras-ame averența! Orisave avenas le buchia cai daisaras te cheras-le anda codoia că sam sicade, sasteveste sau si amen diferime talentea, trebul te das pachiv le Iehovasche, că sea so si amen avel lestar. Hai, dacă dichas că aver cheren pengo servicio creștino mai mișto sar amen, trebulas te bucurisaras-ame că folosin penghe talentea caște așaren le Iehovas, na caște sicaven că sile mai lașe sar aver sau caște den-pe bare. Cadea că, ando than te rodas te avas mai lașe sar von, avelas mai mișto te dichas so daisaras te sichioas lendar.

³ Mai dur, va avela te dichas so daisaras te cheras cana sam perade anda codoia că le paruimata anda amari viața ci mai mechen-ame te cheras cadea de but buchia ando servicio le Iehovasco. Sa cadea, va avela te dichas sar daisaras te folosisaras ande o mai lașio modo le daruri cai si amen hai so daisaras te sichioas averendar.

4. So daștil te cherel-ame te avas perade? Den iech exemplo.

⁴ Chichiva slujitori le Iehovasche sile perade anda codoia că phurile sau sile nasfale, hai ci mai daștin te cheren sa cadea de but anda o Iehova sar cherenas mai anglal. Cadea simțosardea-pe vi i Carol. Voi slujisardea ande iech than cai sas mai bari nevoia. Ande cado teritorio, cărdea but șucar buchia. Încărdea 35 studii biblico, anda save chichiva arăsle te bolen-pe. Pala codoia, voi pelea zurales nasfali hai trebulas te beșel mai but ando chăr. Voi phenel: „Jianav că, le paruimata anda mânri viața ci mai mechen-ma te cherav cadea de but sar aver phrala. Tha mânro ilo doșarel-ma hai cherel-ma te pachiav că ci som iech Martora cadea de lași sar von. O baro pharimos si că ci mai si man o zuralimos te cherav le buchia cai camav-le hai cadai buchi peravel-ma”. I Carol camel te cherel sea so daștil anda o Iehova, hai cadaia si zurales șucar. Daisaras te pachias zurales că amaro lașio Del dichel cuci sea so cherel cadai phei.

5. a) So ci trebul te bâstras cana sam perade anda codoia că ci mai si amen o zuralimos te cheras chichi camas? b) Cadea sar dichas andel imagini, sar dea o phral sea so sas-les mai lașio ando servicio le Iehovasco?

⁵ Dacă poiechdata san perado anda codoia că ci mai si tut o zuralimos te cheres sea so cames, șiu tuche o pușimos: „So ajucărel o Iehova mandar?”. Vo camel te des-les sea so si tut mai lașio, orichichi daștis acana. Te gândisaras-ame ca iech situația: Iech phei cai sila 80 bărșa simțosarel-pe peradi anda codoia că ci mai daștil te cherel sa cadea de but anda o Iehova sar cana sas-la 40 bărșa. Voi pachial că, chiar dacă cherel sea so daștil, o Iehova ci dichel cuci laco servicio. Tha si ciaces cadaia? Te gândisaras-ame. Dacă cadai phei dea le Iehovasche sea so sas-la mai lașio co 40 bărșa, hai vi acana, co 80 bărșa, del le Iehovasche sea so sila mai lașio, însemnol că voi cărdea cadaia sea o timpo. Cana prin amari goghi nachel o gândo că ci arăsăl anda o Iehova so cheras, te na bâstras că vo phenel chichi trebul te cheras caște avas cuci ande lesche iacha. Ori chichivar das le Iehovasche sea so si amen mai lașio, si sar cana așunas-les că phenel amenghe: „I buchi cai cheres-la si zurales lași!”. (Dich vi Matei 25:20-23.)

6. So daisaras te sichioas catar i phei Maria?

⁶ Daisaras te avas ciaces bucurime, cana gândisaras-ame ca le buchia cai daisaras te cheras-le, na ca codola cai ci daisaras. Iech phei po anav Maria dichlea că sas mișto te cherel cadaia. La sila iech nasfalimos cai ci mai mechel-la te jial cadea de but andi predicarea. Mai anglal, voi sas-li zurales peradi hai simțosardea că ci mai sili lași chancesche. Pala codoia, avilea ande lachi goghi iech phei andai congregația cai ci mai daștilas te uștel anda o pato hai gândisardea-pe te ajutil-la andi predicarea. I Maria phenel: „Cărdeam predicarea ande iech than prin o telefono hai prin lila. De fiesavi data cana gălemas chăre catar cadai phei, somas zurales bucurime hai mânro ilo bariolas că daisardem te ajutisarav-la”. Vi amen daisaras te bariaras amari bucuria cana încăras andi goghi le buchia cai daisaras te cheras-le, na le buchia cai ci daisaras. Tha dacă daisaras te cheras mai but sau jianas te cheras mișto iech buchi ando servicio le Iehovasco?

7. So sfato lașio dea o apostolo Petru le creștinenghe?

⁷ Ande lesco dintuno lil scriime tela inspirația, o apostolo Petru phendea pesche phralenghe te folosin penghe daruri caște zuriaren codolen andai congregația. Vo scriisardea: „Cadea sar fiesavo primisardea iech daro,  folosin-les, hai slujin iech averesche sar lașe administratori le lașimasche nemeritime le Devlesco”. (1 Pet. 4:10) Ci trebulas te încăras-ame parpale te folosisaras chichi mai mișto amare daruri anda codoia că daras că le coaver daștinas te aven invidioși pe amende sau te aven perade. Dacă încăras-ame parpale, ci das le Iehovasche so si amen mai lașio.

8. Cadea sar phenel-pe ando 1 Corinteni 4:6, 7, sostar ci trebulas te das-ame bare le darurența cai si amen?

⁸ Camas te folosisaras chichi mai mișto le daruri cai sas amenghe dine, tha ci trebul te das-ame bare lența. (Citisar 1 Corinteni 4:6, 7.) Te phenas că si tuche ușoro te astares studii biblico. Ci trebulas te încăres-tu parpale te folosisares cado daro. Tha, iech buchi si te folosisares-les hai aver buchi si te des-tu baro leia. Daștil-pe că astardean iech studio biblico hai chio ilo hutel bucuriatar. Abia ajucăres te phenes che phralenghe andai grupa cadai experiența. Tha, cana diches-tu lența, iech phei phenel sar daisardea voi te del iech revista andi predicarea. Voi dea iech revista, tu astardean iech studio biblico. So va avela te cheres? Le phrala andai grupa avenas zuriarde te așunen chi experiența, tha daștis te alosares te phenes-la aver data caște na ciores i bucuria chia pheiachi. Cana alosares te cheres cadaia sicaves lașimos. Tha niciechdata ci trebulas te încăres-tu parpale te astares studii biblico! Tut si tut iech daro, cadea că folosisar-les!

9. Sar trebulas te folosisaras amare daruri?

⁹ Te na bâstras că orisavi buchi cai jianas te cheras-la si iech daro le Iehovastar. Trebul te folosisaras cadal daruri caște zuriaras le phralen, na caște țârdas i atenția caring amende. (Filip. 2:3) Cana folosisaras amaro zuralimos hai talentea caște cheras i voința le Devleschi amaro ilo silo pherdo bucuriatar. Amen sam bucurime na anda codoia că cheras mai but sar aver sau că camas te sicavas că sam mai lașe sar von, tha anda codoia că folosisaras amare daruri caște așaras le Iehovas.

10. Sostar ci sicavas goghiaverimso cana comparisaras-ame averența?

¹⁰ Dacă ci las sama, daisaras te arăsas te comparisaras-ame averența hai te rodas te sicavas că jianas te cheras mai mișto le buchia sar aver. Sar exemplo, daștil-pe că iech phral jianel te încărel șucar cuvântări. Cado si lesco daro. Tha ande lesco ilo, daștilas te dichel de opral ieche phrales casche si pharo te încărel cuvântări publico. Tha cado phral daștilas te avel lașio ande aver buchia: daștil-pe că del averen anda so siles, sicavel mișto pesche șiaven sau cherel but andi lucrarea de predicare. Si șucar  că ande amari organizația si amen but phrala hai pheia cai jianen te cheren but buchia, hai cai folosin penghe daruri ando servicio le Iehovasco hai caște ajutin averen.

11. Sostar trebul te das sea amari zor te las-ame pala o exemplo le Isusosco?

¹¹ Chiar cana trebul te las sama te na comparisaras-ame averența, amen daisaras te țârdas miștimata cana sichioas anda o exemplo avere slujitorenghe le Iehovasche. O mai lașio exemplo savestar daisaras te sichioas si o Isus. Chiar cana amen ci sam perfecți, sar vo, amen daisaras te sichioas but buchia anda lesche șucar calități hai anda o modo sar phiradea-pe. (1 Pet. 2:21) Dacă das sea amari zor te uștaras chichi mai exacto pe lesche urme, arăsas te avas slujitori le Iehovasche mai lașe hai te cheras mai mișto amari buchi ande lesco servicio.

12, 13. So daisaras te sichioas catar o rege David?

¹² Andi Biblia arachas but exemplea murșenghe hai jiuvleanghe cai slujisarde loialo le Iehovasche hai pala save daisaras te las-ame, chiar cana sas-le imperfecți. (Evr. 6:12) Iech mașcar codola si o David, cas o Iehova numisardea-les „iech manuș pala mânro ilo” sau, cadea sar sicavel aver traducerea, „o felo manușesco cai silo cuci ande mânre iacha”. (Fap. 13:22) Tha o David ci sas-lo perfecto. Vo chiar cărdea-pe doșalo anda but buchia nasul. Cu sea cadala, vo așel iech lașio exemplo anda amende. Sostar? Anda codoia că cana sas-lo ortosardo, vo ci rodea te sicavel că le buchia cai cărdea-le ci sas-le cadea de nasul. Mai but, vo lea-pe pala o sfato cai sas lesche dino hai falea-les nasul anda sea o ilo anda so cărdea. Cadea că, o Iehova iertisardea-les. (Ps. 51:3, 4, 10-12)

¹³ Anda o exemplo le Davidosco, sichioas te șioas amenghe le pușimata: „So cherav cana si manghe dino iech sfato? Dav mânri sama sigo că som doșalo? Sau rodav te phenav că so cărdem ci si cadea de nasul? Șiudav i doș pe aver? Dav mânri zor te na cherav pale sa codol buchia nasul?”. Cana dichas o exemplo avere slujitorenghe loialo andai Biblia, daisaras te pușias-ame: „Nachle vi von prin pharimata prin save nachav vi me? So șucar calități sicade von? Sar daștiv te lav-ma pala lengo exemplo sea mai mișto?”.

14. So daisaras te sichioas catar amare phrala hai pheia?

¹⁴ Daisaras te sichioas but buchia anda o exemplo amare phralengo, tărne sau mai phure. Avel tuche andi goghi varecon anda chi congregația cai ci mechel-pe ande iech situația phari hai jial mai dur pherdo pachiamos?  Daștil-pe că nachel prin o zumaimos că le colegi catar i școala sau catar i buchi prasan-les ori leschi familia așel lesche contra sau siles iech nasfalimos. Dichlean cadale jeneste șucar calități save cames vi tu te sicaves-le mai but ande chi viața? Anda lesco exemplo, daștis te sichios but buchia, cai ajutin-tu te na meches-tu cana naches prin pharimata. Amaro ilo bariol te dichas ande amari congregația phrala hai pheia cai sile exemplea pachiamasche anda amende. (Evr. 13:7; Iac. 1:2, 3)

15. So sfato dea o apostolo Pavel cai daștil te ajutil-ame te avas bucurime vi mai dur ando servicio le Iehovasco?

¹⁵ Ca andi congregația te avel pacea hai le phrala te aven chidine ande iech than, fiesavo anda amende trebul te folosisarel chichi mai mișto pesche daruri. Te gândisaras-ame ca le creștini anda o iechto secolo. Len sas len diferime daruri hai sas lenghe dine te cheren diferime buchia andi congregația. (1 Cor. 12:4, 7-11) Tha cadaia ci cărdea-le te sicaven că sile mai lașe sar aver sau te han-pe mașcar pende. O Pavel phendea fiesavesche anda lende te cheren penghi partea „caște zuriaren o corpo le Cristososco”. Vo scriisardea le creștinenghe anda Efes: „Cana fiesavi partea le corposchi cherel peschi buchi mișto, o corpo bariol hai zuriarel-pe andi iubirea”. (Ef. 4:1-3, 11, 12, 16) Codola cai line-pe pala lesco sfato cărde te avel pacea andi congregația, hai le phrala te aven mai chidine cadea sar dichas vi andel congregații de aghies.

16. So sam hotărâme te cheras? (Evrei 6:10)

¹⁶ Cadea că, av hotărâme te na comparis-tu averența. Le-tu pala o exemplo le Isusosco hai de chi zor te sicaves lesche calități. Țârde miștimata anda o exemplo le slujitorengo le Iehovasche andal puraimata hai de aghies. Cana des mai dur le Iehovasche sea so si tut mai lașio, daștis te aves siguro că vo ci silo neorta caște bâstrel chi buchi. (Citisar Evrei 6:10.) Slujisar mai dur pherdo bucuria le Iehovasche hai pachia anda sea o ilo că vo dichel că des sea chi zor caște aves cuci ande lesche iacha.