1. Ninji pinatitsandzayisa kakamwe?

 YAHOVA asafuna kuti tikhale akutsandzaya. Ife tisadziwa pyenepi thangwi kutsandzaya ndi nsapo wa nzimu wakucena. (Agal. 5:22) Nakuti kupasa kusatsandzayisa kakamwe kupiringana kutambira, ife tisakhala akutsandzaya kakamwe tingacita pizinji m’basa yakumwaza mphangwa mbatiphedza abale na alongo athu munjira zakusiyana-siyana.—Mabasa 20:35.

2-3. (a) Mwakubverana na Agalata 6:4, ndi pinthu pipi piwiri pinafuna kutiphedza toera kupitiriza kukhala akutsandzaya m’basa ya Yahova? (b) Tinapfundzanji mu nsolo uno?

² Pa Agalata 6:4, mpostolo Paulu alonga pinthu piwiri pyakuti pinatiphedza toera kukhala akutsandzaya. (Lerini.) Cakutoma, ife tisafunika kucita pyonsene pinakwanisa ife m’basa ya Yahova. Khala tisacita pyonsene pinakwanisa ife m’basa ya Yahova, tisafunika kukhala akutsandzaya. (Mat. 22:36-38) Caciwiri, tisafunika kucalira kulandanisika na anango. Khala ife tisakwanisa kucita pizinji m’basa ya Yahova thangwi ya ungumi wathu, cipfundziso cidatambira ife peno maluso athu, tisafunika kupereka takhuta kuna Yahova. Thangwi ndiye adatipasa pinthu pyonsene piri na ife. Munjira inango, khala anango ali na maluso m’makhundu anango akumwaza mphangwa kupiringana ife, tisafunika kutsandzaya thangwi iwo ali kuphatisira maluso awo toera kusimba Yahova, tayu toera kupasika mbiri peno kucita pinthu pyakuti pinaphedza iwo basi. Natenepa, ife tisafunika kupfundza na iwo, tayu kucita mapika na iwo.

³ Mu nsolo uno, ife tinaona kuti ninji pinafuna kutiphedza tingafewa manungo thangwi yakucimwana kucita pyonsene pinafuna ife m’basa ya Mulungu. Ife tinaonambo kuti tinaphatisira tani mwadidi maluso onsene ali na ife, pontho tinapfundzanji na pitsandzo pya anango.

4. Ndi pinthu pipi pyakuti pinakwanisa kutifewesa manungo? Perekani citsandzo.

⁴ Anango a ife nee asakwanisa kucita pyonsene pinafuna iwo m’basa ya Yahova thangwi ya kukalamba peno utenda. Pontho pyenepi pisaticitisa kukhala akufewa manungo. Ndi pyenepi pidacitika kuna Carol. Iye akhala na nkhombo yakutumikira ku cisa cakuti cikhafuna amwazi mphangwa. Mu ndzidzi ukhatumikira iye kweneko, iye acitisa mapfundziro a Bhibhlya akukwana 35. Pontho aphedza anthu azinji toera kuthambaruka mpaka kuperekeka kuna Yahova mbabatizwa. Carol acita pizinji kakamwe m’basa yakumwaza mphangwa. Buluka penepo, iye aphatwa na utenda, natenepa akhafunika kukhala panyumba ndzidzi uzinji kakamwe. Carol alonga: “Ndisadziwa kuti thangwi ya utenda wanga, ine nee ndinakwanisa kucita pinacita anango, pontho ndisaona kuti nee ndine wakukhulupirika ninga iwo. Ine nee ndisakwanisa kucita pyonsene pinafuna ine. Pyenepi pisandifewesa manungo.” Carol asafuna kucita pyonsene pinakwanisa iye m’basa ya Yahova. Mwandimomwene, pyenepi mphyadidi kakamwe. Ife tiri na cinyindiro cakuti Mulungu wathu wantsisi asakomerwa naye, thangwi iye asacita pyonsene pinakwanisa iye.

5. (a) Tisafunika kukumbukanji khala tisafewa manungo thangwi nee tisakwanisa kucita pinthu pyonsene pinafuna ife? (b) Ninga pinaona ife pa foto, kodi m’bale ali kupitiriza tani kucita pyonsene pinakwanisa iye m’basa ya Yahova?

⁵ Khala midzidzi inango imwe musafewa manungo thangwi ya pinthu pinacimwana imwe kucita, bvundzikani: ‘Kodi Yahova asafuna kuti ndicitenji?’ Yahova asafuna kuti mucite pyonsene pinakwanisa imwe mwakubverana na makhaliro anu. Nyerezerani mulongo wakuti ali na pyaka 80. Iye ali wakufewa manungo thangwi nee asakwanisabve kucita pizinji m’basa yakumwaza mphangwa ninga pikhakwanisa iye kucita mu ndzidzi ukhali iye na pyaka 40. Maseze iye asacita pyonsene pinakwanisa iye, asanyerezera kuti Yahova nee asakomerwa napyo. Kodi pyenepi mphyandimomwene? Nyerezerani basi. Khala mulongo unoyu akhacita pyonsene pikhakwanisa iye mu ndzidzi ukhali iye na pyaka 40, pontho asapitiriza kucita pyonsene pinakwanisa iye na pyaka 80, pisabveka kuti iye nee asiya kucita pyonsene pinakwanisa iye m’basa ya Yahova. Ife tingatoma kunyerezera kuti pinacita ife nee mphyakukwana toera kukomeresa Yahova, tisafunika kukumbuka kuti ndi Yahova anadziwa kuti ndi pinthu pipi pinakomerwa na iye. Tingacita pyonsene pinakwanisa ife, Yahova anadzatipanga tenepa: “Wacita mwadidi.”—Onani Mateu 25:20-23.

6. Tisapfundzanji na citsandzo ca Maria?

⁶ Pinakhala pyakukhonda nentsa kuna ife kukhala akutsandzaya tinganyerezera pinthu pinakwanisa ife kucita mbatikhonda kunyerezera pinthu pinacimwana ife kucita. Mwacitsandzo, mulongo unango anacemerwa Maria, asathabuka na utenda wakuti usancimwanisa kucita pizinji m’basa yakumwaza mphangwa. Pakutoma, iye akhali wakutsukwala kakamwe, pontho akhaona kuti ndi wakusowa basa. Mbwenye iye anyerezera mulongo m’bodzi wa mu mpingo mwace, wakuti akhali na utenda ukhancimwanisa kulamuka pa talimba. Natenepa iye aona kuti akhafunika kum’phedza. Maria alonga: “Ine ndacita masasanyiro toera ine na iye timwaze mphangwa na ntokodzi peno kulemba matsamba. Ndzidzi onsene ukhaphata ife basa pabodzi, ine ndikhabwerera kunyumba mwakukomerwa na mwakutsandzaya thangwi yakukwanisa kuphedza mulongo unoyu.” Ife tinakwanisambo kukhala akutsandzaya kakamwe tinganyerezera pinthu pinakwanisa ife kucita, tayu pinacimwana ife. Mphapo ndiye tani khala tisakwanisa kucita pizinji peno khala tisakwanisa kucita mwadidi kakamwe pinthu pinango m’basa ya Yahova?

7. Ndi uphungu upi wadidi kakamwe udapereka mpostolo Pedhru kuna Akristu?

⁷ Mu tsamba yace yakutoma, mpostolo Pedhru adembetera abale ace toera aphatisire  miyoni yawo yonsene na maluso awo toera kuwangisa cikhulupiro ca abale awo. Pedhru alemba: “Nakuti m’bodzi na m’bodzi atambira muoni, mbauphatisire toera kutumikira anango ninga muyang’aniri wa kukoma ntima kukulu kwa Mulungu.” (1 Ped. 4:10) Ife tisafunika kucita pyonsene pinakwanisa ife toera kuphatisira maluso athu mbatikhonda kudzudzumika kuti anango anakhala na bibvu peno anafewa manungo thangwi ya ife. Tingakhonda kucita pyonsene pinakwanisa ife basi ene thangwi yakugopa kutsukwalisa anango, ife nee tiri kucita pyonsene pinakwanisa ife m’basa ya Yahova.

8. Mwakubverana na 1 Akorinto 4:6, 7, thangwi yanji nee tisafunika kugaya na maluso athu?

⁸ Ife tisafunika kuphatisira maluso athu onsene, mbwenye tisafunika kucita mphole-mphole toera tikhonde kugaya nawo. (Lerini 1 Akorinto 4:6, 7.) Mwacitsandzo, panango imwe nee musanentseka toera kutomesa mapfundziro a Bhibhlya. Na thangwi ineyi, imwe musafunika kuphatisira luso ineyi. Mbwenye kuphatisira luso ndi pyakusiyana kakamwe na kugaya thangwi ya luso ineyi. Nyerezerani kuti ntsiku zingasi nduli pinthu pyakufambirani mwadidi kakamwe m’basa yakumwaza mphangwa mbamutomesa pfundziro ya Bhibhlya. Imwe musafuna kupanga abale a mu nsoka wanu wa m’munda pinthu pyenepi pidakucitikirani. Pidagumanyikana imwe na amwazi mphangwa a mu nsoka wanu, mulongo m’bodzi atoma kulonga kuti akwanisa tani kugawira revista kuna munthu unango. Iye agawira revista, mbwenye imwe mwatomesa pfundziro ya Bhibhlya. Munacitanji? Imwe musadziwa kuti abale a mu nsoka wanu anawangiswa na pinafuna imwe kulonga, mbwenye panango imwe nee munalonga pyenepi pa ndzidzi unoyu mbamudikhira ndzidzi unango wakuthema toera kulonga kuti mwatomesa tani pfundziro ya Bhibhlya. Thangwi imwe nee musafuna kuti mulongo adagawira revista anyerezere kuti nee ali na maluso adidi kakamwe ninga imwe. Pyenepi ndi pinthu pyadidi kakamwe. Ngakhale tenepo, pitirizani kutomesa mapfundziro a Bhibhlya. Imwe muli nayo luso ineyi, na thangwi ineyi, iphatisireni.

9. Tinaphatisira tani miyoni yathu?

⁹ Tisafunika kukumbuka kuti maluso onsene ali na ife ndi miyoni idatipasa Mulungu. Ife tisafunika kuphatisira miyoni ineyi toera kuwangisa abale mu mpingo, tayu toera kupasika mbiri. (Afil. 2:3) Ife tingaphatisira mphambvu zathu na maluso athu toera kutumikira Mulungu, tinakhala na thangwi toera kutsandzaya, tayu thangwi yakupiringana anango peno kupangiza kuti ndife adidi kakamwe kupiringana iwo, mbwenye thangwi tiri kuphatisira miyoni yathu toera kusimba Yahova.

10. Thangwi yanji nee ndi pyadidi kulandanisika na anango?

¹⁰ Munthu angakhonda kucita mphole-mphole  anagwa mu nsampha wakulandanisa pinthu pinakwanisa iye kucita mwadidi na pinacimwana kucita anango. Mwacitsandzo, panango m’bale asakwanisa kucita mwadidi kakamwe nkhani za pakweca. Ineyi ndi luso yace. Muntima mwace panango anapwaza m’bale wakuti asanentseka toera kucita nkhani za pakweca. Mbwenye panango m’bale unoyu ali na makhaliro adidi ninga kutambira alendo, kupfundzisa anace, peno kumwaza mphangwa mwaphinga. Ife tisapereka takhuta kakamwe thangwi tiri na abale na alongo azinji a maluso, akuti asaphatisira miyoni yawo toera kutumikira Yahova na kuphedza anango.

11. Thangwi yanji tisafunika kuwangisira toera kutowezera citsandzo ca Yezu?

¹¹ Maseze tisafunika kucalira kulandanisika na anango, ife tinakwanisa kupfundza pizinji na pitsandzo pya atumiki anango akukhulupirika a Yahova. Toera tibvesese mwadidi pyenepi tendeni tione citsandzo ca Yezu. Yezu akhali munthu wakusowa madawo, ngakhale tenepo, ife tinakwanisa kupfundza pizinji kubulukira m’makhaliro ace adidi na pinthu pyadidi pidacita iye. (1 Ped. 2:21) Tingacita pyonsene pinakwanisa ife toera kutowezera mwadidi makhaliro ace, tisakhala atumiki adidi a Yahova mbaticita pizinji m’basa yakumwaza mphangwa.

12-13. Tinapfundzanji na citsandzo ca Mambo Dhavidhi?

¹² M’Bhibhlya, muli na pitsandzo pizinji pya amuna na akazi akukhulupirika akuti athema kutowezerwa, maseze ndi akusowa ungwiro. (Aheb. 6:12) Nyerezerani Mambo Dhavidhi. Yahova alonga kuti iye ndi ‘munthu anacita pinafuna ntima wanga.’ (Mabasa 13:22) Mbwenye Dhavidhi nee akhali munthu wakusowa madawo. Mwandimomwene, iye acita madawo mangasi makulu, ngakhale tenepo iye ndi citsandzo cadidi kuna ife. Thangwi yanji? Thangwi pidasandikwa iye, nee ayesera kusaka mathangwi adancitisa kudawa. Mbwenye atawira uphungu wakuwanga udapaswa iye mbatcunyuka na ntima onsene thangwi ya pinthu pidacita iye. Na thangwi ineyi, Yahova amulekerera.—Masal. 51:3, 4, 10-12.

¹³ Ife tinakwanisa kupfundza na citsandzo ca Dhavidhi tingabvundzika: ‘Ndisacitanji ndingapaswa uphungu? Ndisadzindikira mwakucimbiza madodo anga, peno ndisasaka mathangwi toera kupangiza kuti thangwi yanji ndacita pyenepi? Ndisapasa mulando anango? Kodi ndisawangisira toera ndikhonde kucita pontho madodo mabodzi ene?’ Imwe munakwanisa kucitika mibvundzo ibodzi ene, mu ndzidzi unaleri imwe pya amuna na akazi akukhulupirika analongwa m’Bhibhlya. Kodi nyatwa zidatamba iwo ndi sawa-sawa na zinatamba imwe? Ndi makhaliro api adidi kakamwe adapangiza iwo? Mu ndzidzi unaleri imwe pya m’bodzi na m’bodzi, bvundzikani: ‘Ndinatowezera tani ntumiki unoyu wakukhulupirika wa Yahova?’

14. Tinaphedzeka tani tingaona makhaliro adidi a Akristu andzathu?

 ¹⁴ Ife tinakwanisambo kupfundza tingaona pinacita abale na alongo athu, mwakukhonda tsalakana khala ndi aphale peno ankhalamba. Mwacitsandzo, imwe munakwanisa kunyerezera m’bale peno mulongo wa mu mpingo mwanu wakuti asapirira mwakukhulupirika nyatwa zizinji, ninga mikakamizo ya axamwali, kutcingwa pabanja peno utenda. Kodi imwe musaona makhaliro a m’bale unoyu akuti munakwanisa kuatowezera? Mungaona makhaliro adidi a m’bale unoyu, imwe panango munapfundza pinthu pyakuti pinakuphedzani toera kupirira nyatwa zanu. Ife tisapereka takhuta kakamwe thangwi yakukhala na abale na alongo anewa anapangiza makhaliro adidi akuti tinakwanisa kuatowezera. Mwandimomwene, ineyi ndi thangwi toera kutsandzaya.—Aheb. 13:7; Tiya. 1:2, 3.

15. Ndi uphungu upi udapereka mpostolo Paulu wakuti unatiphedza toera tipitirize kutumikira Yahova mwakutsandzaya?

¹⁵ Toera kuphedzera kuti anthu akhale mu ntendere na akuphatana mu mpingo, m’bodzi na m’bodzi wa ife asafunika kucita pyonsene pinakwanisa iye. Onani pidacitika na Akristu a mu ndzidzi wa apostolo. Iwo akhali na maluso akusiyana-siyana, pontho akhadapaswa mabasa akusiyana-siyana. (1 Akor. 12:4, 7-11) Mbwenye iwo nee akhapikisana unango na ndzace thangwi ya maluso awo, peno mabasa anewa. Paulu adembetera m’bodzi na m’bodzi wa iwo toera acite pinthu pikhafunika “toera kuwangisa manungo a Kristu.” Paulu alembera Aefesi kuti: “Khundu ibodzi na ibodzi ingaphata basa mwadidi, pisaphedza toera manungo akule, mbakhala akuwanga okhene mwaufuni.” (Aef. 4:1-3, 11, 12, 16) Ale adacita pyenepi aphedza anthu toera akhale mu ntendere na akuphatana. Mwandimomwene, anewa ndi makhaliro anaona ife lero m’mipingo yathu.

16. Tisafunika kuwangisira toera kucitanji? (Ahebheri 6:10)

¹⁶ Wangisirani toera mucalire kulandanisika na anango. Mbwenye pfundzani na pidacita Yezu mbamuwangisira toera kutowezera makhaliro ace. Towezerani pinthu pidacita anthu analongwa m’Bhibhlya na Akristu andzathu akukhulupirika a mu ntsiku zino. Mu ndzidzi unapitiriza imwe kucita pyonsene pinakwanisa imwe, khalani na cinyindiro cakuti Yahova ‘nee ndi wakukhonda kulungama toera aduwale basa yanu.’ (Lerini Ahebheri 6:10.) Pitirizani kukhala akutsandzaya thangwi yakutumikira Yahova, pontho dziwani kuti iye asakomerwa angakuonani mbamucita pyonsene pinakwanisa imwe toera kunkomeresa.