1. Bici birhulerhera omwishingo munji?

 YEHOVA aba alonzize rhube n’omwishingo. Rhumanyire ntyo bulya omwishingo ciba ciguma c’omu bigabi by’ilehe ly’iroho lyage litagatifu. (Gl. 5:22) Bulya haba bushagaluke bunji omu kuhâna kulusha omu kuhâbwa, rhunabe n’omwishingo munji erhi rhucihâna omu mukolo gw’Ecikristu n’erhi rhurhabala bene wirhu omu njira ziri lubero.​—Ebj. 20:35.

2-3. (a) Nk’oku biyerekinwe omu Abagalasiya 6:4, bintu bibirhi bihi byakarhurhabala rhugendekere rhwaba n’omwishingo omu mukolo gwa Yehova? (b) Bici rhwaganirira mw’eci cigabi?

² Nk’oku biyerekinwe omu Abagalasiya 6:4, entumwa Paolo eganirire bintu bibirhi byakarhurhabala rhugendekere rhwaba n’omwishingo. (Osome.) Burhangiriza, omuhigo rhushinganine rhube nago kuli kuha Yehova ebintu birhu binja. Erhi rhwakakamuha ebintu birhu binja rhwanaba n’obushagaluke. (Mt. 22:36-38) Bwakabirhi, rhushinganine rhuyake okukacigerera oku bandi. Rhube rhwanahash’ihikiriza bintu binji erhi bisungunu omu mukolo gwa Yehova enyanya z’amagala girhu, amasomo girhu, erhi buhashe bwirhu bwʼakaburhano, rhushinganine rhukamuvuga omunkwa. Kobinali, ngasi kantu koshi rhujira ye warhuhâgako. Omu yindi njira, erhi abandi bakaba na malehe manji omu bigabi bilebe by’omukolo gw’amahubiri kurhulusha, rhushinganine rhushagaluke bwenene bulya bali bakolesa enshokano yabo lyo bakuza Yehova, ahali h’okuciyerekana bonene erhi kucilongeza obunguke. Co cirhumire, ahali h’okubaba luhali, rhushinganine rhuciyigirize binji kugerera olwiganyo lwabo.

³ Mw’eci cigabi, rhwabona gurhi rhwakajira amango rhuli rhwaciyumva oku hali ebi rhurhakahasha okujira omu mukolo gwa Yehova. Na kandi rhwayish’ibona gurhi rhwakakolesa bwinja  engalo zirhu zoshi n’ebi rhwakaciyigiriza kugerera enyiganyo z’abandi.

4. Kanga kahi kakarhuma omuntu avunika omurhima? Ohâne olwiganyo.

⁴ Bakozi baguma na baguma ba Yehova banavunike omurhima erhi babona oku barhakacihash’ijira binji omu mukolo gwa Yehova enyanya z’emyaka yabo erhi magala gabo. Ntyo ko byahikiraga Carol. Agwerhe olukengwa lw’okugend’ikolera omu eneo erimo obulagirire bunji. Ago mango akag’ilongoza mafunzo g’Ebibliya 35 ananarhabala bantu banji ba mulibo bahikira aha bacihâna emwa Yehova n’okubatizibwa. Carol agwerhe amalehe minja omu mukolo gw’amahubiri! Buzinda alwala, na kanjikanji arhacikagirhenga ahaka. Carol adesire ntya: “Manyire oku enyanya z’amagala gani ntakacihash’ijira ebi abandi bagwerhe obuhashe bw’okujira. Cikone nantanye oku ntaciri mwishwekerezi akabo. Ntakacihash’ijira ngasi kantu nakalonza okujira, n’oko kunamvune omurhima.” Carol aba alonzize okujirira Yehova ngasi byoshi akanahasha. Kobinali, oko ajira kuba kwinja bwenene! Rhwanayemera n’obwalagale oku Nnâmahanga wirhu w’obwonjo anashagalukire er’iroho linja lya Carol.

5. (a) Bici rhushinganine rhukakengera erhi rhwakavunika omurhima enyanya z’ebi rhurhakacihash’ijira omu mukolo gwa Yehova? (b) Nk’oku biyerekinwe oku nfoto, gurhi oyu mwene wirhu agendekire ahânamwo ebintu binja omu mukolo gwa Yehova?

⁵ Erhi akaba onavunike omurhima okubona oku hali ebi orhakacihash’ijira, ocidose ntya: ‘Bici Yehova ampunyire?’ K’okuderha ngasi kantu kinja wakahash’ijira omu kanga olimo buno. Orhanye kuli aka kanga: Mwali wirhu muguma ogwerhe myaka 80 ali aciyumva avunisire omurhima bulya arhakacihash’ijira binji omu mukolo gw’amahubiri nk’oku akag’ijira erhi agwerhe myaka 40. Ali arhanya oku ciru akaba ali ahâna ebintu byage binja, birhakacishagalusa Yehova. Cikone, ka kobinali ntyo? Ocibig’irhanya. Erhi akaba oyo mwali wirhu akag’iha Yehova ebintu byage binja erhi agwerhe myaka 40 anacigendekire amuhabyo ciru akaba akola agwerhe myaka 80, k’okuderha oku arhasag’ileka okumuha ebintu byage binja. Erhi rhwakarhondera rhwarhanya oku ebi rhuli rhwajira omu mukolo gwa Yehova birhali binji lyo bimushagalusa, rhushinganine rhukengere oku Yehova yene orhuyeresa ebyakamushagalusa. Erhi rhwakajira ebintu binja rhwakanahasha, Yehova ayish’irhubwira ntya: “Bwinja obwo!”​—Oshushanye na Mateyo 25:20-23, Mashi Bible.

6. Bici olwiganyo lwa Maria lwakarhuyigiriza?

⁶ Kwanaba kulembu okuba n’omwishingo erhi rhwakakasegeza obwenge bwirhu kw’ebi rhwakahash’ijira ahali h’okubusegeza kw’ebi rhurhakacihash’ijira. Orhanye okubiyerekire olwiganyo lwa mwali wirhu muguma ohamagalwa Maria, olwazire obulwala burhuma arhacijira binji omu mukolo gw’amahubiri. Oku murhondero, avunika omurhima ananaciyumva nk’ali wa busha. Cikone Maria arhanya okubiyerekire mwali wirhu muguma w’omu cigamba cabo orhacikag’irhenga omu ncingo ananahiga okumurhabala. Maria adesire ntya: “Narhôla emipango y’okuhubiri haguma naye kugerera etelefone n’amaruba. Ngasi mango erhi nakakozire haguma naye, nakag’igaluka eka erhi nanshagalusire bwenene na ntimusirwe bulya narhabire mwali wirhu.” Na nirhu rhwanayushula omwishingo gwirhu erhi rhwakakasegeza obwenge bwirhu kw’ebi rhwakahash’ijira ahali h’okubusegeza kw’ebi rhurhakacihash’ijira. Cikone gurhigi erhi akaba rhwanajira binji erhi kujira bwinja bigabi bilebe by’omukolo gwa Yehova?

7. Ihano lihi linja Petro ahîre Abakristu?

⁷ Entumwa Petro yayinginga bene wabo oku bakolese ngasi ngalo erhi nshokano bagwerhe  lyo bayubaka ababo bemezi. Petro ayandika ntya: “Nk’oku ngasi muguma ahâbirwe engalo, muyikolese omu kukolerana nka bimangizi binja b’olukogo lwa Nnâmahanga lurhashinganinwi.” (1 Pt. 4:10, NWT) Rhurhashinganini rhukarhindira okukolesa engalo zirhu nk’oku rhwakanahasha mpu bulya rhuyobohire oku abandi barhuyumviza obumvu erhi bavunika omurhima. Erhi rhwakakarhindira okujira ntyo, rhurhakaha Yehova ebintu birhu binja.

8. Nk’oku biyerekinwe omu 1 Abakorinti 4:6, 7, bulya gurhi rhushinganine rhuyake okulimbira abandi enyanya z’engalo zirhu?

⁸ Rhushinganine rhukakolesa engalo zirhu bwenene, cikone rhushinganine rhube masu lyo zirhag’ikarhuma rhwalimbira abandi. (Osome 1 Abakorinti 4:6, 7.) Kwa lwiganyo, wanaba ogwerhe obuhashe bw’okurhondeza amafunzo g’Ebibliya, orhashinganini orhindire okukolesa eyola ngalo! Cikone hali olubero egarhi k’okukolesa engalo n’okulimbira abandi enyanya zayo. Kwa lwiganyo, wazindig’icibonera akantu kinja omu mukolo gw’amahubiri wanarhondeza ifunzo ly’Ebibliya. Ogwerhe irala ly’okubwira abantu b’omu cikundi cinyu okubiyerekire ebyo bintu binja wacibwinire omu mukolo gw’amahubiri. Cikone hano orhimanana n’abantu b’omu cikundi cinyu, wanarhimana mwali wirhu muguma ali abaganirira okubiyerekire ebi acibwinire omu mukolo gw’amahubiri anahikira aha ahâna egazeti. Ahânyire egazeti; cikone wehe warhondeza ifunzo ly’Ebibliya. Gurhi wakajira? Omanyire oku abantu b’omu cikundi cinyu bahâbwa omurhima omu kuyumva ebi wacibwinire, cikone wanahiga okulinda akandi kasanzi kashinganine ly’obaganirira ebyo, ly’orhag’irhuma oyo mwali winyu aciyumva nka yehe ntabyo ajijire. Okujira ntyo kwanaba kwinja bwenene. Cikone oko kurhakarhuma waderha oku okola waleka okukarhondeza amafunzo g’Ebibliya. Ogwerhe engalo, co cirhumire oyikolese!

9. Gurhi rhushinganine rhukakolesa engalo zirhu?

⁹ Rhukengere oku ngasi buhashe bw’akaburhano rhujira eba ngalo erhenga emwa Nnâmahanga. Rhushinganine rhukakolesa ezo ngalo lyo rhuyubaka ecigamba, ahali h’okukaciyerekana rhwenene. (Fl. 2:3) Erhi rhukolesa emisi yirhu n’obuhashe bwirhu lyo rhujira obulonza bwa Nnâmahanga, rhunabe n’ecirhumire c’okucishinga, arhali mpu bulya rhulushire abandi, cikone bulya rhwakolesize engalo zirhu lyo rhukuza Yehova.

10. Bulya gurhi kurhali kwinja okukacigerera oku bandi?

¹⁰ Nk’omuntu arhali masu, anaja omu murhego gw’okurhondera okugerera emisi yage oku buzamba bw’owundi muntu. Kwa lwiganyo, mwene wirhu muguma anageza ehotuba zage bwinja, bo buhashe bwage obo, cikone nkaba  omu murhima gwage anaba erhi ali abonerera mwene wirhu mulebe orhageza ehotuba zage bwinja. Cikone nkaba oyo mwene wirhu aba lwiganyo lwinja omu kuyegereza ebigolo, omu kukomereza abana bage, n’omu kuba wa bushiru omu mukolo gw’amahubiri. Rhushagalusire bwenene okubona rhugwerhe bene wirhu na bali birhu banji b’obuhashe bali bakolesa engalo zabo lyo bakolera Yehova n’okurhabala abandi!

11. Bulya gurhi rhushinganine rhujire okwirhu koshi lyo rhukulikira olwiganyo lwa Yezu?

¹¹ Ciru akaba rhushinganine rhuyake okukacigerera oku bandi, okuciyigiriza kugerera abakozi bishwekerezi ba Nnâmahanga kwanarhulerhera bunguke bunji. Yezu ye lwiganyo lwinja rhwakayiga. Ciru akaba ali mwimana, amorhere gage minja n’enjira zage byanarhuyigiriza bintu binji. (1 Pt. 2:21) Erhi rhujira okwirhu koshi lyo rhukulikira n’obwishwekerezi olwiganyo lwage, rhwanaba bakozi binja ba Nnâmahanga n’okuba na malehe manji omu mukolo gw’amahubiri.

12-13. Bici olwiganyo lwa Mwami Daudi lwakarhuyigiriza?

¹² Omu Kanwa ka Nnâmahanga, rhwanabonamo nyiganyo nyinji z’abalume n’abakazi bishwekerezi rhwakayiga enyiganyo zabo ciru akaba barhali bimana. (Hb. 6:12) Orhanye okubiyerekire Mwami Daudi, oyu Yehova ahamagalaga “muntu w’omurhima gwani,” ezindi Bibliya zinahindule olo lwandiko ntya: “Muntu onshagalusa bwenene.” (Ebj. 13:22) Cikone, Daudi arhali mwimana. Ajijire magosa maguma na maguma mazibu. Ciru akaba ntyo, ali lwiganyo lwinja kuli rhwe. Bulya gurhi? Bulya erhi bakamuhanwîre arhakag’ilonza okucihalira. Lubero n’oko, ayemera ihano lizibu-zibu bamuhâga ananaciyunjuza n’omurhima gwage goshi ebi ajiraga. N’oko kwarhuma Yehova amubabalira.​—Enna. 51:3, 4, 10-12.

¹³ Rhwanayiga olwiganyo lwa Daudi omu kucidosa ntya: ‘Gurhi njira erhi bampa amahano? Ka nampugûkwe duba-duba amagosa najijire, erhi nanjire okwani koshi lyo ndonza okucihalira? Ka nantumuze ho n’aho muntu mulebe oku ye warhumaga najira ago magosa? Ka nanjire okwani koshi lyo ntagicib’igalukira ago magosa?’ Wanacidosa amadoso gali nk’ago amango oli wasoma emyanzi eganirirwe omu Bibliya okubiyerekire abandi balume n’abakazi bishwekerezi. Ka balwisize amazibu gashushine n’aga oli walwisa? Morhere gahi minja bayerekine? Omu ngasi kanga, ocidose ntya: ‘Gurhi nakayigamwo olwiganyo lw’oyu mukozi mwishwekerezi wa Yehova?’

14. Gurhi rhwakayungukamwo omu kuyiga olwiganyo lw’abirhu bemezi?

¹⁴ Na kandi, rhwanayunguka omu kuyiga olwiganyo lw’abirhu bemezi, emisole n’abashosi. Kwa lwiganyo, ka wanarhanya okubiyerekire  muntu mulebe w’omu cigamba cinyu oli walembera amazibu n’obwishwekerezi, nkaba kwanaba kusezibwa okujira ebintu birhashinganini, okuhagalikwa n’abantu b’omu mulala, erhi bulwala? K’oyo muntu agwerhe amorhere minja wakalonza obe nago kulusha? Omu kulola olwiganyo lwage lwinja, wanaciyigiriza gurhi wakalemberamwo amazibu gawe. Rhushagalusire bwenene okuba n’enyiganyo z’obuyemere rhushinganine rhuyige. Kobinali, abo bene wirhu na bali birhu bali cirhumire c’okucishinga!​—Hb. 13:7; Yk. 1:2, 3.

15. Ihano lihi Paolo ahânaga lyakarhurhabala rhugendekere rhwaba n’omwishingo omu mukolo rhujirira Yehova?

¹⁵ Lyo rhugendekeza omurhûla n’ecinyabuguma omu cigamba, ngasi muguma wirhu ashinganine ahâne ebintu byage binja. Rhuganirire olwiganyo lw’Abakristu b’omu myaka igana mirhanzi. Bagwerhe engalo n’emikolo eri lubero. (1 Kr. 12:4, 7-11) Cikone oko kurharhumaga baja omu kamashigwe erhi kugabikanamwo. Lubero n’oko, Paolo ayinginga ngasi muguma oku ajire ebintu by’obulagirire “lyo agendereza [kuyubaka] omubiri gwa Kristu.” Paolo ayandikira Abefezi ntya: “Amango ngasi cirumbu cikola nk’oku cinagwasirwe, omubiri gwoshi gunakule n’okuyushuka n’obuzigire.” (Ef. 4:1-3, 11, 12, 16, Mashi Bible) Abajira nk’oko Paolo aderhaga banarhabale ly’ecigamba cibamo omurhûla n’ecinyabuguma, morhere gabonekana omu bigamba birhu ene.

16. Bici rhushinganine rhuhige okujira? (Abahabraniya 6:10)

¹⁶ Ohige okuyaka okukacigerera oku bandi. Lubero n’oko, oyige olwiganyo lwa Yezu, onalole gurhi wakayigamwo amorhere gage. Oyunguke n’enyiganyo z’abantu b’obuyemere baganirirwe omu Bibliya n’aba gano mango girhu. Erhi wakagendekera wajira oku wakanahasha, wanayemera n’obwalagale oku Yehova ‘arhali mubula burhondekezi [mubula bushinganyanya, NWT] mpu ayibagira ebijiro byawe.’ (Osome Abahabraniya 6:10.) Ogendekere waba n’omwishingo omu mukolo ojirira Yehova, onamanye oku anashagalukire obushiru ojira n’omurhima gwawe goshi ly’omushagalusa.