1. E faapefea ona faateleina lo tatou olioli?

 E FINAGALO Ieova ia tatou fiafia. E tatou te mautinoa i lenā mea, ona o le olioli o se vala o le fua o le agaga paia. (Kala. 5:22) Talu ai e sili le fiafia i le foaʻi atu nai lo le talia mai, e tatou te matuā olioli la pe a auai atoatoa i le faiva faa-Kerisiano ma fesoasoani i o tatou uso ma tuafāfine i isi auala.​—Galu. 20:35.

2-3. (a) O ā vala e lua o loo taʻua i le Kalatia 6:4, e fesoasoani e faatumauina ai lo tatou olioli i le auaunaga iā Ieova? (e) O le ā o le a tatou talanoaina i lenei suʻesuʻega?

² E lua vala na taʻua e Paulo i le Kalatia 6:4, e fesoasoani iā i tatou e faatumauina ai lo tatou olioli. (Faitau.) Muamua o lo tatou sini, o le faia lea o le mea sili e tatou te mafaia mo Ieova. Pe afai o loo tatou faia le mea sili e tatou te mafaia, e tatau la ona tatou fiafia. (Mata. 22:36-38) Lua, e tatau ona tatou ʻalofia le faatusatusa o i tatou i isi. Po o le ā lava ua mafai ona tatou faia e tusa ai ma lo tatou soifua mālōlōina, toleniga, po o tomai, e tatau ona tatou lotofaafetai iā Ieova. O le mea moni, o mea uma ua tatou maua e mai iā te ia. Pe afai e sili atu le tomai o isi i nisi vala o le faiva nai lo i tatou, e tatau ona tatou olioli ona ua faaaogā a latou taleni e vivii ai iā Ieova, ae lē o le viiviia pe faaauiluma ai o latou lava faanaunauga manatu faapito. O lea la, e tatou te fiafia e aʻoaʻo mai iā i latou, nai lo le faatautavā i ai.

³ I lenei suʻesuʻega, o le a tatou aʻoaʻoina ai auala e feagai ai ma faalogona ua itiiti mea e mafai ona tatou faia i le auaunaga. O le a tatou iloiloina foʻi le auala sili e faaaogā ai so o se meaalofa ua iā i tatou, ma mea e tatou te aʻoaʻoina mai i faaaʻoaʻoga a isi.

4. O ā tulaga e tatou te lotovaivai ai? Aumai se faaaʻoaʻoga.

⁴ O nisi auauna a Ieova, ua lotovaivai ona ua itiiti mea e mafai ona latou faia ona ua matutua pe mamaʻi. O le mea lenā na tupu iā Carol. O se faaeaga iā te ia le auauna i se nofoaga na tele ai le manaʻoga. Na ia faia ni suʻesuʻega faale-Tusi Paia e 35, ma e toʻatele na ia fesoasoani i ai e tuuina atu ma papatisoina. Na taulau manuia le faiva a Carol. Peitaʻi, na maʻi ma nofo ai i le fale mo le tele o taimi. Na faapea mai Carol: “Ou te iloa ua lē mafai ona ou faia mea o loo faia e isi ona ua ou maʻi. Ae ou te lagona e pei ou te lē o faamaoni i laʻu auaunaga e pei ona faia e isi. Ou te matuā lotovaivai lava ona e feteenaʻi le mea ou te manaʻo e fai ma le mea moni o loo tupu iā te aʻu.” E manaʻo Carol e fai mea uma e na te mafaia mo Ieova, ma o se uiga lelei tele lenā faanaunauga. E tatou te mautinoa e talisapaia e lo tatou Atua alofa mutimutivale lenā uiga o Carol.

5. (a) O le ā e tatau ona manatua pe a tatou lotovaivai ona ua itiiti mea e tatou te faia? (e) I le ata, o le ā le auala o loo faia ai pea e le uso le mea e na te mafaia e auauna ai iā Ieova?

⁵ Pe a e lagona le lotovaivai ona ua itiiti mea e mafai ona e faia, ia fesili ifo: ʻO le ā e finagalo Ieova ou te faia?’ E finagalo Ieova e te faia le mea sili i so o se mea e te mafaia i le taimi lenei. Seʻi mātau le faataʻitaʻiga lenei: Ua lotovaivai se tuafafine ua 80 ona tausaga, ona ua lē mafai ona ia toe faia mea sa masani ai i le faiva a o 40 ona tausaga. E manatu o ia e tusa lava po o ia faia le mea sili e na te mafaia, ae e lē o faafiafiaina ai Ieova. Ae pe e moni lenā manatu? Pe afai na faia e le tuafafine le mea sili e na te mafaia i le auaunaga ina ua 40 ona tausaga, ma o loo faia pea le mea sili na te mafaia i le 80 o ona tausaga, o lona uiga la o loo faaauau pea ona faia e lenā tuafafine le mea sili mo Ieova. Pe a amata ona tatou lagona ua lē tele ni mea o loo tatou faia i le auaunaga e faafiafia ai Ieova, ia manatua e filifili e Ieova tapulaa o mea e mafai ona tatou faia e faafiafiaina ai o ia. Pe a tatou faia le mea sili e tatou te mafaia, e pei ua fetalai mai Ieova: “Malo lava!”​—Faatusatusa i le Mataio 25:20-23.

6. O le ā e tatou te aʻoaʻoina mai i le faaaʻoaʻoga a Maria?

⁶ E faigofie ona tatou maua le olioli pe a uaʻi atu i mea e mafai ona fai, nai lo o mea e lē mafai ona tatou faia. Seʻi manatu i se tuafafine e igoa iā Maria. Na aafia o ia i se maʻi ma lē tele ai ni mea e mafai ona ia faia i le faiva. O lea, na ia lagona ai le lotomafatia ma le lē aogā. Ae na ia mātauina le isi tuafafine i le faapotopotoga ua faataotolia i lona moega. Na filifili ai loa Maria e fesoasoani i le tuafafine. Ua faapea mai Maria: “Na ou faia ni fuafuaga e talaʻi faatasi ma le tuafafine i le telefoni ma le tusiaina o tusi. O taimi uma lava e ma te galulue faatasi ai, ou te foʻi fiafia i le fale ma le faamalieina ona ua mafai ona ou fesoasoani iā te ia.” E mafai foʻi ona faateleina lo tatou fiafia pe a taulaʻi atu i mea e mafai ona fai, nai lo mea e lē mafai ona tatou faia. Ae ā pe afai e tele atu ni mea e mafai ona tatou faia i le auaunaga iā Ieova, pe e iai foʻi se vala o le auaunaga e sili ona tatou lelei ai?

7. O le ā le fautuaga aogā na avatu e le aposetolo o Peteru i Kerisiano?

⁷ I le tusi muamua a Peteru, na ia uunaʻia ai ona uso ina ia faaaogā so o se meaalofa ua iā i latou e faalaeiau ai o latou uso talitonu. Na tusi Peteru: “E pei ona maua e tagata taʻitoʻatasi se meaalofa, ia faaaogā e auauna ai le tasi i le isi e pei o auauna pule lelei o le agalelei  faifua o le Atua.” (1 Pete. 4:10) E lē tatau ona tatou faatalatū e faaaogā atoatoa a tatou meaalofa, ona e tatou te popole neʻi lotoleaga pe faavaivaia ai isi. Pe a iā i tatou lenā manatu, ua tatou lē faia la le mea sili e tatou te mafaia mo Ieova.

8. I le 1 Korinito 4:6, 7, aiseā e tatau ai ona tatou ʻalofia le mimitavale i a tatou meaalofa?

⁸ E manaʻomia ona faaaogā atoatoa a tatou meaalofa, ae e tatau foʻi ona tatou faaeteete neʻi o tatou mimitavale ai. (Faitau le 1 Korinito 4:6, 7.) O se faataʻitaʻiga, atonu e te lelei i le amataina o suʻesuʻega faale-Tusi Paia ma e lē tatau ona faatalatū e faaaogā lenā meaalofa. Ia faaaogā lelei a tatou meaalofa ae lē o le mimitavale ai! Seʻi faapea na iai se mea manaia na tupu talu ai nei i lau faiva, na iʻu ai i le amataina o se suʻesuʻega faale-Tusi Paia. Ua e matuā naunau lava e taʻu atu lenā mea i le talaʻiga a la outou vaega. Ae ina ua faatasitasi la outou vaega mo le talaʻiga, na faamatala ai e se tuafafine se mea na tupu i lana faiva lea na iʻu ai i le taliaina e le tagata e ona le fale o se mekasini. Na ofoina e le tuafafine le mekasini, ae na e amataina le suʻesuʻega. O le ā o le a e faia? E te iloa o le a faalaeiauina la outou vaega i le mea na tupu iā te oe i le talaʻiga, ae e te ono filifili e faamatala lenā mea i se taimi talafeagai ina ia aua neʻi faaitiitia ai le olioli o le tuafafine na ofoina le mekasini. E ese le agalelei o lenā mea, ae aua lava neʻi taofia ai lou ofoina atu pea o suʻesuʻega faale-Tusi Paia. O lea, ia faaaogā se meaalofa ua iā te oe!

9. O le ā le auala e tatau ona faaaogā ai a tatou meaalofa?

⁹ Ia manatua o so o se tomai ua iā i tatou o se meaalofa mai le Atua. E tatau ona tatou faaaogā na meaalofa e atiaʻe ai le faapotopotoga, ae lē o i tatou lava. (Fili. 2:3) Pe a faaaogā le malosi ma tomai ua iā i tatou e faia ai le finagalo o le Atua, e tatou te maua ai le olioli ona o loo faaaogā a tatou meaalofa e viia ai Ieova. Ae e tatou te lē maua le fiafia ona e tele mea ua tatou faia nai lo isi, po o le taumafai e sili atu i lo isi.

10. Aiseā e lē lelei ai le faatusatusa o i tatou i isi?

¹⁰ Pe a lē faaeteete, e ono maua ai i tatou i le mailei o le faatusatusa o mea e tatou te lelei ai i mea e lē lelei ai isi. O se faataʻitaʻiga, atonu e iai se uso e matuā tomai i le faia o lauga i le lautele, ma o le mea lenā e lelei ai. Ae i lona loto, atonu e vaai maulalo o ia i se uso e lē lelei lana failauga, peitaʻi o lenā uso atonu e mataʻina le auala e na te faaalia ai le agaga talimālō, toleniina o lana fanau ma e  maelega i le faiva. Maʻeu lo tatou lotofaafetai ona e toʻatele uso ma tuafāfine e tele o latou tomai, ma o loo latou faaaogāina na meaalofa e auauna ai iā Ieova ma isi!

11. Aiseā e tatau ai ona tatou taumafai e mulimulituʻi i le faaaʻoaʻoga a Iesu?

¹¹ E ui e tatau ona ʻalofia le faatusatusa o i tatou i isi, ae e tatou te maua aogā mai i faaaʻoaʻoga a auauna faamaoni a Ieova. Seʻi mātau le faaaʻoaʻoga a Iesu, e ui e lelei atoatoa o ia ae e mafai ona tatou aʻoaʻo mai i ona uiga matagofie ma ona ala. (1 Pete. 2:21) Pe a tatou faia le mea sili e tatou te mafaia e mulimulituʻi ai i lana faaaʻoaʻoga, o le a avea ai i tatou ma auauna e sili ona lelei a Ieova ma uigā atili ai la tatou faiva.

12-13. O le ā e tatou te aʻoaʻoina mai i le tupu o Tavita?

¹² E tatou te maua i le Afioga a le Atua le tele o faaaʻoaʻoga a tane ma fafine faamaoni, e ui e lē lelei atoatoa ae e mafai ona tatou faaaʻoaʻo i ai. (Epe. 6:12) Seʻi mafaufau i le tupu o Tavita, na taʻua o ia e Ieova “o se tagata ua malie i ai loʻu loto.” (Galu. 13:22) Peitaʻi, e lē lelei atoatoa Tavita. O le mea moni, na ia faia agasala matuiā. E ui i lea, aiseā e avea ai o ia o se faaaʻoaʻoga lelei mo i tatou? E na te leʻi taumafai e fai ni faamolemolega ina ua aʻoaʻia o ia. Ae na ia talia le aʻoaʻiga malosi ma faaalia le salamō moni. O le iʻuga, na faamagalo o ia e Ieova.​—Sala. 51:3, 4, 10-12.

¹³ E mafai ona tatou aʻoaʻoina se lesona mai iā Tavita e ala i le fesili ifo: ʻO le ā le auala ou te tali atu ai i se fautuaga? Pe e vave ona ou faailoa atu aʻu mea sesē, pe ou te taumafai e fai ni faamolemolega? Pe e vave ona ou tuuaʻia isi? Pe ou te taumafai malosi e ʻalofia le toe faia o na mea sesē?’ E mafai ona e fesili i fesili faapena pe a faitau e faatatau i isi auauna faamaoni a le Atua i le Tusi Paia. Pe na latou fesagaʻia luʻi e pei o luʻi o loo e fesagaʻia? O ā uiga lelei na latou faaalia? I luʻi taʻitasi, ia fesili ifo: ʻE faapefea ona ou faaaʻoaʻo i lenei auauna faamaoni a Ieova?’

14. E faapefea ona tatou maua aogā i le mātauina o faaaʻoaʻoga a o tatou uso tapuaʻi?

¹⁴ E mafai foʻi ona aogā iā i tatou le mātauina o faaaʻoaʻoga a uso ma tuafāfine talavou ma le ʻau matutua. O se faataʻitaʻiga, pe mafai ona e mafaufau i se uso po o se tuafafine i lau faapotopotoga o loo onosaia ma le faamaoni ni luʻi, e pei o omiga mai aumea, teteega mai aiga po o maʻi? O ā uiga lelei o lenā tagata e te manaʻo e faaaʻoaʻo i ai ma faaleleia atili? O le iloiloina o lana faaaʻoaʻoga lelei, atonu o le  a e aʻoaʻoina ai ni auala aogā e te tumau ai pe a feagai ma luʻi. Maʻeu lo tatou lotofaafetai i le avea o nei uso ma tuafāfine ma faaaʻoaʻoga o le faatuatua e tatou te faaaʻoaʻo i ai, ma maua ai le olioli moni!​—Epe. 13:7; Iako. 1:2, 3.

15. O le ā le fautuaga a le aposetolo o Paulo e fesoasoani iā i tatou e olioli ai pea i le auaunaga iā Ieova?

¹⁵ E tatau iā i tatou taʻitoʻatasi ona faia le mea sili e tatou te mafaia, ina ia maua ai le filemu ma le autasi i le faapotopotoga. Mātau faaaʻoaʻoga a Kerisiano i le uluaʻi senituri, e eseese meaalofa ma faaeaga na latou maua. (1 Kori. 12:4, 7-11) Ae e leʻi avea lenā ma mea na latou faatautavā pe femisaaʻi ai. O lea la, na faalaeiau e Paulo i latou ina ia taʻitoʻatasi ma faia mea e manaʻomia e ʻatiaʻe ai le tino o Keriso.’ Na tusi Paulo i Kerisiano i Efeso, pe a faia ʻle mea e manaʻomia e tusa ma galuega talafeagai a itutino taʻitasi, ua faia ina ia tupu aʻe ai le tino, ma atiina aʻe ai o ia lava i le alofa.’ (Efe. 4:1-3, 11, 12, 16) O i latou na faia faapea ua latou faaauilumaina le filemu ma le autasi, o uiga o loo vaaia i a tatou faapotopotoga i aso nei.

16. O le ā e tatau ona tatou maumauaʻi e fai? (Eperu 6:10)

¹⁶ Ia maumauaʻi e ʻalofia le faatusatusa o i tatou i isi, ae ia aʻoaʻo mai iā Iesu ma taumafai malosi e faaaʻoaʻo i ona uiga. Ia aogā iā i tatou faaaʻoaʻoga o le faatuatua i le Tusi Paia ma aso nei. A o e taumafai pea e faia le mea sili e te mafaia, ia mautinoa ʻe lē amiolētonu Ieova e na te lē faagalogalo ai au galuega.’ (Faitau le Eperu 6:10.) Ia faaauau pea ona auauna iā Ieova ma le olioli, ma ia iloa e na te talisapaia au taumafaiga ma le lotoatoa e faafiafia o ia.