1. Kɛkɔnge kɛtɔpɛyɛ osasa w’efula?

 YEHOVA nkɔpaka dj’iso ndjala l’osasa. Iso ndjewaka nkambo djɛsɔ ladjikɛnde osasa alekɔ djekeka mɔtshi djɛ lowambo lɔ nyuma. (Nga. 5:22) Ladjikɛnde osasa woyɛ má mpɛyɛ ndeka wɔ ndongola, iso ndjalaka l’osasa w’efula winá w’oyapɛyɛso tshɛ l’olemo w’Okristo la w’okotshɛso wananyɔ waso lá topo totshikitanyi.​—Ele. 20:35.

2-3. a) Etengo Ngalatiya 6:4 ɛnyɛwɔ, akambo ape wakɔnge wangotokotshɛ́ djɛ nkindjɛ ndjala l’osasa l’olemo wɔ Yehova? b) Kɛkɔnge kɛ songoshishima lá djamba djɛnɛ?

² Etengo yombofunama lá Ngalatiya 6:4, ɔpɔstɔlɔ Poolo ɛnyɛka akambo ape watokotshɛ́ djɛ nkindjɛ ndjala l’osasa. (Wala.) Nkambo djɛ ntondo, iso ladjɛ mpɛyɛ Yehova kɛnɛ keleka wɔlɔ leso. Ntsha iso ndɔɔpɛyɛka kɛnɛ keleka wɔlɔ leso, tongoyala l’osasa. (Mat. 22:36-38) Dj’ape, iso ladjɛ ndjewɔ ndawɛdjɛ l’anto ankina. Ayale tolekɔ la demba djɛ wɔlɔ, towaka okfumbelo ɔmɔtshi kana tolekɔ la nkoka djɛ lowotshɔ djɛ nangha nkambo mɔtshi, iso ladjɛ ndjala la djedjɛ te Yehova. Nkambo deka nde, kenkfumɔ k’okotshɛso, isawa nde mende. L’onkoko onkina, ntsha anto ankina wawa eposelo wɛ wɔlɔ efula má topo tɔmɔtshi t’olemo w’ipoposanyɛ ntoleka iso, iso ladjɛ nsasanga ladjikɛnde wakamba l’akoka wawɔ djɛ numɛ Yehova, koko ape djɛ ndalumɛ kana lá wapɔ wɛwɔ yɔmɛlɛ. Lasɔ, l’edjena k’iso mpamana isawɔ, iso ladjɛ ndjeka mewɔ.

³ Lá djamba djɛnɛ, tɔngɛna kɛnɛ k’okokaso nangha ntsha tomboyala l’elelo lá kɛnɛ k’okokaso nangha l’olemo wɔso. Tongoshishima lonkina wopo w’okokaso nkamba l’opapɛyɛ onkfumɔ w’okotshɛso lá yopo yeleka wɔlɔ edjinge kɛnɛ k’okokaso ndjeka má ndjɔmbɔmba y’anto ankina.

4. Nkambo djɛkɔnge djekoka nkomɛ onto djɛ ndɛmba? Pɛyɛ ndjɔmbɔmba.

⁴ Enkambi wɛ Yehova ɛmɔtshi ndjalaka l’okakasano wɔ ndjekesanela l’elelo weyɛ má lotshundo kana má ɔkɔnɛlɔ w’elando. Ɔsɔ ndeke okakasano wɔ Carol ndapomaná. Lá mbamba kɛmɔshi nde awaka mpeyi kɛ ntokotshɛ́ l’edjena kɛ yayalaka la djonyi efula dj’okotshɔ. L’etsho wɛsɔ, nde ekaki l’anto 35 Bible edjinge akotshɛka anto efula l’anteyi kɛwɔ djɛ ndalambola la ndongola batisimo. Carol awaki eposelo wɛ wɔlɔ efula l’olemo w’ipoposanyɛ! Masɔ nde ayɛka ndɔkɔna olando wɔ wolo efula, ko apolekaka mposa má mvulu. Carol ntepelaka ante: “Lemi ndjewaka ente m’ɔtɛ w’olando wɔ mɔmɔkɔna wɔnɛ, mpalekɔ lonkina l’akoka wa nangha kɛnɛ k’anto ankina onanghawɔ, koko ndawoka etengo mpalekɔ lonkina Okristo wɔ wɔlɔ etengo iwɔ. Mpalekɔ l’akoka wa nangha kenkfumɔ k’okombolami nangha, ko kɛsɔ ndɛmbɛka lemi demba.” Carol nkombolaka nangha kenkfumɔ k’okokande nangha lá nkambo djɛ Yehova. Lá nsɔsɔlɔ, ɔsɔ alekɔ nkambo djɛ wɔlɔ efula! Iso nkoka ndashikikɛ ente Ndjambe kɛso kɛ nkɛtshi nsasangaka l’ikanyi yɛnde yɛ wɔlɔ yɛsɔ.

5. a) Kɛkɔnge k’oyɛso ladjɛ mvungɔka ntsha tombotateyɛ ndɛmba demba m’ɔtɛ w’elelo wɛso? b) Etengo ɛnaso l’ansango, wopo wɔkɔnge wɔnanyɔ okindjɛnde mpɛyɛ Yehova kɛnɛ k’oyɛnde l’akoka l’olemo wɔnde?

⁵ Ntsha lá mbamba imɔtshi ɔngɔlɛmbake má elelo welekɔ lawɛ, yawopola nghɔmɛlɛ ente: ‘Kɛkɔnge kɛ Yehova ɔndɔmbande?’ Yehova nkɔlɔmbaka kɛnɛ keleka wɔlɔ lewɛ, ntepela ente kɛnɛ k’oyɛ l’akoka wa nangha winá wɔsɔ. Tokolenda ndjɔmbɔmba kɛnɛ: Nkaana kɛmɔtshi kelekɔ l’ɛnɔnyi 80 la ndjakfe ambɔlɛmba ladjikɛnde apalekɔ l’akoka efula wa ndapɛyɛ l’olemo w’ipoposanyɛ etengo ndananghaka winá wɔ ndayalaka l’ɛnɔnyi 40 la ndjakfe. Nde akanela ante kaanga ɔpɛyɛnde kɛnɛ k’oyɛnde l’akoka, kɛsɔ kepasasangɛ Yehova. Ko oyɛwɔ nde nsɔsɔlɔ nghɔsɔ? Kokanela ndambo lá nkambo djɛsɔ. Ntsha nkaana kɛsɔ apɛyɛki kɛnɛ keleka wɔlɔ lende l’etsho wɛ ndayalaka l’ɛnɔnyi 40 la ndjakfe, edjinge akindjɛ mpɛyɛ kɛnɛ keleka wɔlɔ lende winá w’oyɛnde l’ɛnɔnyi 80 la ndjakfe, mbɔkoko nde atatshike mpɛyɛ kɛnɛ keleka wɔlɔ lende. Ntsha tombotateyɛ nkanela ente olemo w’okambelaso Yehova wopakoke ndoosasangɛ, iso ladjɛ mvungɔka ente Yehova ndeke loshikikɛka kɛnɛ kekoka ndoosasangɛ. Ntsha iso nangha kɛnɛ k’oyɛso l’akoka wa nangha, Yehova angotoshimela nsɔsɔlɔ ante: ‘Ngo nkɔkɔsɔ!’​—Ɛdjɛ la Mateo 25:20-23.

6. Olakanyelo wɔkɔnge w’okokaso mba má ndjɔmbɔmba kɛ Maria?

⁶ Angoyala wɔdju leso djɛ ndjala l’osasa ntsha tila yimba lá kɛnɛ k’okokaso nangha l’edjena kɛ ndjila yimba lá kɛnɛ kɛ sopalekɔ l’akoka wa nangha. Tokotepela nkambo djɛ nkaana kɛso ketawɔ Maria, kanga lɛna ndjolo l’olando ɔmɔtshi wowilela elelo lá kɛnɛ k’okokande nangha l’olemo w’ipoposanyɛ. Má bango, nde ayakiyanyɛki efula la ayawokaki etengo apalekɔ la ntshina. Koko winá wɔ ndokanela lá nkambo djɛ nkaana kɛmɔtshi kel’otshumano ketamaká ngo lá mbeto, Maria ɔsaka nkano djɛ ndookotshɛ́. Maria ntepelaka ante: “Ndɔsaka nonghanyi kɛ mpoposanyɛka isande má telefɔnɛ la má mfunanelana enkanda. Winá enkfumɔ wɛ sakambaka esanga lákalɔki lá mbandja l’osasa edjinge lásasangaki ente lambowaka mbamba kɛ nkotshɛ́ nkaana kɛmi.” Kaanga iso, tokoka mfudjɛ osasa wɔso ntsha iso ndapɛyɛ lá kɛnɛ k’okokaso nangha koko ape lá kɛnɛ kɛ sopakoke nangha. Ya otepelaso mo ntsha tolekɔ l’akoka wa nangha akambo efula kana tolekɔ l’akoka watshikitanyi l’etenyi kɛmɔtshi k’olemo wɔ Yehova?

7. Dako djɛkɔnge ɔpɔstɔlɔ Pɛtɛlɔ ndapɛyɛ Akristo?

⁷ L’onkanda wɔnde wɔ ntondo, ɔpɔstɔlɔ Pɛtɛlɔ  akembɛka wananyɔ wande djɛ nkamba l’epapɛyɛ enkfumɔ edjinge l’akoka wokotshɛwɔ djɛ nkembɛ winawɔ andjawodji. Pɛtɛlɔ afunaka ante: ‘Lá lɛdji l’onto l’onto ndalongola opapɛyɛ, nyokambe la wɔkɔ djɛ nkotshana etengo oyɛnyo enkambi wɛ djɔ wɛ wɔlɔ w’ipa wɔsɔdjɔmba wɛ Ndjambe.’ (1 Pɛ. 4:10) Topakoke nkaakanda djɛ nkamba l’akoka w’okotshɛso lá lɛdji lɔ wɔlɔ má ndjoka wɔma ente anto ankina nkoka ndoyala la djewɔ kana ndɔlɛmba. Ntsha tombonangha nghɔsɔ, mbɔ topangɔpɛyɛ Yehova kɛnɛ keleka wɔlɔ leso.

8. Lá nkilika 1 Kɔrɛtɔ 4:6, 7, lamo oyɛso ladjɛ ndjewɔ dj’ipa ndafuna lá nkambo dj’epapɛyɛ wɛso?

⁸ Iso ladjɛ nangha kenkfumɔ k’okokaso nangha djɛ nkamba l’epapɛyɛ wɛso, koko iso ladjɛ mbadjɛ dj’ipa ndafuna lá nkambo dj’epapɛyɛ wɛkɔ. (Wala 1 Kɔrɛtɔ 4:6, 7.) Ndjɔmbɔmba, wɛ nkoka ndjala l’akoka wa mbanga ndjeka l’anto Bible ipa l’okakasano. Opakoke ntshika nkamba l’opapɛyɛ wɔsɔ! Koko alekɔ djonyi mvungɔka dj’ipa ndafuna lá nkambo dj’opapɛyɛ wɔkɔ. Kɔsa djɛ wɛ ombokambaka la balo djɛko l’olemo w’ipoposanyɛ, ko kɛsɔ kembokokotshɛka djɛ wɛ mbanga ndjeka Bible l’onto ɔmɔtshi. Wɛ okonga l’oloko lukuluku djɛ ntoshimela ase iloyi yɛko y’olemo w’ipoposanyɛ nkambo djɛkɔ. Koko winá w’opomanɛ ny’ase iloyi yɛko, nkaana kɛmɔtshi ambotateyɛ nkɔndɔla wopo wɔ ndowaki eposelo wɛ wɔlɔ má nkapa periodikɛ. Nde ambokapaka periodikɛ, koko wɛ ombowangaka la wekelo wɔ Bible. Nghonghonangha nge? Wɛ ndjewaka ente ase iloyi yɛnyo wangokeketshama má ndjɔmbɔmba kɛko, koko wɛ nkoka ndɔsa nkano djɛ nkonga mbamba kenkina, ko wɛ ndaakɔndɔlá ndjɔmbɔmba kɛkɔ dj’ipa wɛ ndoshiyɛ osasa wɔ nkaana kɛko kekapisa periodikɛ. Ɔsɔ angoyala nkambo djɛ wɔlɔ efula. Koko lá winá wɔk’ɔmɔ totshikake ndɔmba anto djɛ ndjeka nyawɔ Bible. Ɔsɔ oyɛwɔnde opapɛyɛ wɔko, kambaka la wɔkɔ!

9. Wopo wɔkɔnge w’oyɛso ladjɛ nkamba l’epapɛyɛ wɛso?

⁹ Nyontshɔ tovungɔke ente akoka ankfumɔ w’okotshɛso oyɛwɔnde epapɛyɛ w’ime Ndjambe. Iso ladjɛ nkamba l’epapɛyɛ wɛsɔ djɛ nkembɛ otshumano, koko ape djɛ nyɛnyɛ ente iso ndeka anto ankina. (Flp. 2:3) Winá w’okambaso la wolo wɔso edjinge l’akoka waso djɛ nangha ɛkɔpa kɛ Ndjambe, iso mbaka donga djɛ nsasanga, ape ladjikɛnde tohona djɛ nyɛnyɛ ente iso ndeka anto ankina, koko mande tokamba l’epapɛyɛ wɛso djɛ mpɛyɛ Yehova lomo.

10. Lamo yopalekɔ nkambo djɛ balo ndawɛdjɛ l’anto ankina?

¹⁰ Ntsha nde apawadjisa, onto nkoka ndotala l’ilonga yɛ ndawɛdjɛ l’anto ankina l’akambo woyɛnde l’akoka kana wa ndopalekɔ l’akoka wa nangha. Ndjɔmbɔmba, wɔnanyɔ ɔmɔtshi nkoka ndjala l’akoka wa mpɛyɛ wamba wa wɔlɔ efula.  Ɔsɔ alekɔ akoka wande. Koko, l’oloko wɔnde, nde nkoka nyɔnyɔla wɔnanyɔ ɔmɔtshi wolekɔ l’okakasano wɔ mpɛyɛ wamba. Koko mbala imɔtshi wɔnanyɔ wɔsɔ alekɔ l’akoka wa ndongola angangɛnda, nkfumba wana wande, kana angoyalake l’entete efula l’olemo w’ipoposanyɛ. Tolekɔ nsɔsɔlɔ la djedjɛ dj’efula lá wopo w’okotshɛso wananyɔ l’ankaana yelekɔ l’akoka efula wa nkamba l’epapɛyɛ wɛwɔ djɛ nkambela Yehova la nkotshɛ́ anto ankina!

11. Lamo oyɛso ladjɛ nangha la wolo djɛ nkilika ndjɔmbɔmba kɛ Yeso?

¹¹ Kaanga oyɛso ladjɛ ndjewɔ ndawɛdjɛ l’anto ankina, iso nkoka mba wapɔ má ndjeka ndjɔmbɔmba y’anto walekɔ la nkɔmano. Ndjɔmbɔmba keleka, k’oyɛso ladjɛ nkilika nde kɛ Yeso. Kaanga ndayalaka onto wɔ djɔ, iso nkoka mba olakanyelo má wekeka wande la m’akambo wa wɔlɔ efula wa ndananghaká. (1 Pɛ. 2:21) Winá w’onanghaso la wolo djɛ nkilika ndjɔmbɔmba kɛnde wɔlɔwɔlɔ lá nkilika akoka waso, iso nkomaka enkambi wɛ Yehova wɛ wɔlɔ edjinge mbaka eposelo wɛ wɔlɔ m’olemo wɔso w’ipoposanyɛ.

12-13. Olakanyelo wɔkɔnge w’okokaso mba má ndjɔmbɔmba kɛ Nkfumi Davidɛ?

¹² L’Otepela wɔ Ndjambe, iso ntanaka ndjɔmbɔmba y’ampame la y’amato wa nkɔmano w’okokaso ndjokola kaanga yayalaka anto wa ntshamba djɛ djɔ. (Heb. 6:12) Kokanela nkambo djɛ Nkfumi Davidɛ, kanga Yehova ndeete ante: ‘Mpame kesasangɛ oloko wɔmi’ kana lá nkilika ekadjimwelo enkina wɛ Bible, ‘wopo w’onto woleka nsasangɛ lemi.’ (Ele. 13:22) Koko, Davidɛ atayala onto wɔ djɔ. Lá nsɔsɔlɔ, nde ananghaka evunga ɛmɔtshi wɛ nkekete. Koko kaanga oyɛwɔ nghɔsɔ, nde alekɔ ndjɔmbɔmba kɛ wɔlɔ leso. Lamo? Ladjikɛnde winá wɔ yoosembolá, nde atayahonela elonga. Koko, nde awolaka alako wa wolo wa yɔpɛyɛ edjinge ayakiyanyɛka lá lɛdji lɔ nsɔsɔlɔ lá kɛnɛ kɛ ndananghe. Eposelo weyalisa nde, Yehova owimeyɛka​.—Yee. 51:3, 4, 10-12.

¹³ Iso nkoka mba olakanyelo má ndjɔmbɔmba kɛ Davidɛ má ndawopola isɔmɛlɛ ente: ‘Wopo wɔkɔnge w’elolakami winá w’ɔmpɛyɛwɔ dako? Langawolake evunga wɛmi mbala kɛkɔ kɛmɔ, ndokoko langoyahonelake elonga? Langoyalake entshupa djɛ mámá anto ankina lowo? Langonanghake la wolo dj’ipa nkalɔ t’evunga wɛmi lonkina?’ Wɛ nkoka ndawopola weepó wɛfɔna la wɛsɔ, winá w’owalɛ ɛkɔndɔ w’ampame la w’amato ankina wa nkɔmano w’otepelawɔ lá Bible. Iwɔ wapomanaka l’ekakasano w’etengo wɛko? Wekeka wakɔnge wa wɔlɔ wayalaki lawɔ? Lá nkambo la nkambo, yawopala ente: ‘Wopo wɔkɔnge w’okokami ndjokola onkambi wɔ Yehova wɔ nkɔmano wɔnɛ?’

14. Wapɔ wɛkɔnge w’owaso má nshishima ndjɔmbɔmba yɛ winaso andjawodji?

 ¹⁴ Iso nkoka mba wapɔ lonkina má nshishima winaso andjawodji, ayale dangala kana nkokolo. Ndjɔmbɔmba, wɛ nkoka nkanela onto ɔmɔtshi l’otshumano wɔnyo wokfulumeyisá ohemba ɔmɔtshi la nkɔmano nkfumɔ, mbala imɔtshi lodjimbo lɔ me winande, onanyelo má nkfumbo, kana olando ɔmɔtshi wɔ wolo? Ɛna wekeka amɔtshi wa wɔlɔ le onto wɔsɔ w’okokɛ nangha la wolo djɛ ndjokola? Má nshishima ndjɔmbɔmba kɛnde kɛ wɔlɔ, wɛ nkoka ndjeka topo tɔ wɔlɔ tokokɛ nkfulumeyɛ ehemba wɛko. Tolekɔ nsɔsɔlɔ la djedjɛ efula lá wopo w’okotshɛso ndjɔmbɔmba y’anto wawika walekɔ la djawo dj’okokaso ndjokola, ɔsɔ alekɔ nsɔsɔlɔ donga djekoka ntosasangɛ!​—Heb. 13:7; Dja. 1:2, 3.

15. Dako djɛkɔnge dj’ɔpɔstɔlɔ Poolo ndapɛyɛ djekoka ntokotshɛ́ djɛ nkindjɛ nama osasa wɔso l’olemo wɔ Yehova?

¹⁵ Djɛ vu l’osanga ndjala l’otshumano, ɔmɔmɔ wɔ l’anteyi kɛso ladjɛ mpɛyɛ kɛnɛ keleka wɔlɔ lende. Tokoshishima ndjɔmbɔmba k’Akristo wal’ɛtɛndɔ kɛ ntondo. Iwɔ wayalaki l’epapɛyɛ edjinge l’edjito wetshikitanyi. (1 Kɔ. 12:4, 7-11) Koko nkambo djɛsɔ djetátshinda dj’iwɔ mpamana la ndjatɔna. Koko, Poolo akembɛka onto l’onto l’anteyi kɛwɔ djɛ nangha kɛnɛ keyalaki djonyi djɛ ‘nkfumba demba djɛ Kristo.’ Poolo afunelaka ase Ɛfɛsɛ ante: ‘Winá wɔ etenyi kɛ demba kenkfumɔ okambande olemo wɔnde wɔlɔ, kɛsɔ nkotshɛka djɛ demba mfula winá w’oyapikande lá ngandji.’ (Ɛfɛ. 4:1-3, 11, 12, 16) Wanɛ wakilikaki dako djɛ Poolo wakotshɛki djɛ vu la osanga, wekeka w’ɛnaso lɔɔko lá ntshumano djɛso ndjala.

16. Nkano djɛkɔnge dj’oyɛso ladjɛ ndɔsa? (Hebero 6:10)

¹⁶ Ɔsa nkano dj’ipa ndawɛdjɛ l’anto ankina. Koko waka olakanyelo me Yeso, edjinge kindjɛ ndjokola wekeka wande. Waka wapɔ má ndjɔmbɔmba yemá Bible la y’anto wal’etsho wɛso wɛnɛ walekɔ la djawo. Winá w’okindjɛ nangha kɛnɛ k’oyɛ l’akoka wa nangha, yashikikɛ ente Yehova ‘apalekɔ ntshamba djɛ sii djɛ mvungɛ olemo wɔko.’ (Wala Hebero 6:10.) Kindjɛ nsasanga l’olemo wɔ Yehova, má ndjewa ente nde nsasangaka la welo wɛ l’oloko ɔmɔ w’ilɛ djɛ ndosasangɛ.