1. Andi ta mbei u dë waiwai?

 JEHOVAH kë fuu ta dë waiwai. U sa taki sö, u di piizii da wan u dee fasi di di santa jeje fëën ta mbei sëmbë ko abi (Gal. 5:22). Wan sëmbë ta möön dë waiwai te a ta da sëmbë soni möön leki te a ta feni. Fëën mbei te u ta du hii soni di u sa du a di peleikiwooko, söseei te u ta heepi dee baaa ku dee sisa fuu a peipei fasi, nöö u ta dë waiwai seei.​—Tjab. 20:35.

2-3. (a) Andi da tu soni di sa heepi u fuu ta dini Jehovah waiwai, te u luku Galasia 6:4? (b) Andi woo luku a di woto aki?

² A Galasia 6:4, apösutu Paulosu ta taki u tu soni di sa heepi u fuu ta dë waiwai. (Lesi ën.) Di fosu soni, hën da te u ta da Jehovah dee möön bunu soni dee u abi. Ee u ta du di soni aki kaa, nöö u sa dë waiwai (Mat. 22:36-38). Di u tu soni, hën da wa musu tei useei maaka ku wotowan. An toobi unfa di gösöntu fuu dë, nasö un pei siköö u go, nasö unfa u sa’ u du soni tjika, tökuseei Jehovah hën musu kisi di gafa, biga hën ta da u hii soni. Ma ee so baaa nasö sisa sa’ u du so soni u di peleikiwooko möön bunu möön u, nöö u musu wai taa de ta wooko ku di köni di de abi u gafa Jehovah. Biga te i luku ën, nöö de bi sa wooko ku di köni u de u tja gafa ko da deseei. Fëën mbei a bi o bunu fuu mbei möiti u lei wan soni a de, ka fuu ta fia ku de.

³ A di woto aki, woo luku andi u sa du te wa sa du hii soni di u bi o kë du da Jehovah. Woo luku tu unfa u sa wooko ku di köni di u abi u dini Jehovah, söseei woo luku andi u sa lei a wotowan.

4. Andi sa mbei so fuu fii bookosaka? Konda wan woto.

⁴ So fuu an sa du hii soni di u bi o kë du da Jehovah u di u ko gaandi, nasö u di u ko ta dë ku suwaki, nöö di soni aki ta mbei u ta fii bookosaka. Di soni aki bi pasa ku wan sisa de ta kai Carol. A bi ta dini a wan kamian ka möön peleikima bi dë fanöudu. A di ten dë, a bi ta lei 35 sëmbë soni u Bëibel. Soni bi ta waka bunu seei da Carol a di peleikiwooko! Ma te wan pisi, hën a ko dë ku suwaki, an bi sa go a kamian wan bëtë möön. Sisa Carol bi taki taa: „Mi sabi taa u di mi dë ku suwaki, mbei ma sa ta du dee soni di dee wotowan ta du. Ma tökuseei mi ta fii kuma ma ta dini Gadu tjika kumafa de ta du ën. Ma sa du hii soni di mi bi o kë du, nöö di soni aki ta mbei mi fii bookosaka.” Sisa Carol kë du hii soni di a sa du da Jehovah. Di soni dë da wan gaan bunu soni seei! U sabi taa di Gadu fuu di ta fii da sëmbë, ta wai ku di sisa fuu aki seei, u di a ta du hii soni di a sa du da Jehovah.

5. (a) Andi u musu hoi a pakisei ee u ta fii bookosaka, u di wa sa du hii soni di u kë? (b) Unfa wan baaa ta lei taa an disa u du hii soni di a sa du da Jehovah, te u luku dee peentje?

⁵ Ee i ta fii bookosaka so juu u di ja sa du hii soni di i bi o kë du da Jehovah, nöö i sa hakisi iseei di soni aki: ’Andi Jehovah bi o kë u mi du?’ Wë a bi o kë fii du andi i sa du dëën. Pakisei di soni aki luku: Wan sisa di abi 80 jaa ta fii bookosaka, u di an sa du sö hia soni möön a di peleikiwooko kumafa a bi ta du di a bi abi 40 jaa. A ta fii kuma hii fa a ta du hii soni di a sa du da Jehovah, tökuseei Jehovah an ta wai ku ën. Ma sö a dë tuutuu ö? Pakisei ën luku. Ee a bi ta du hii soni di a bi sa du di a bi abi 40 jaa, söseei a ta du hii soni di a sa du hii fa a abi 80 jaa nöunöu, hën da nöiti di sisa aki disa u du hii soni di a sa du da Jehovah. Na sö nö? Fëën mbei ee u ta fii kuma dee soni dee u ta du da Jehovah an tjika faa wai ku u, nöö a bunu fuu hoi a pakisei taa Jehovah hën ta taki ee di soni di u ta du dëën tjika nasö ee an tjika. Te u ta du hii soni di u sa, nöö Jehovah o taki da u taa: „I du ën bunu seei!”​—Luku Mateosi 25:20-23.

6. Andi u sa lei a di woto u Maria?

⁶ Woo dë möön waiwai te u ta buta pakisei a dee soni dee u sa du, ka fuu buta pakisei a dee soni dee wa sa du. Boo buta pakisei a di woto u wan sisa de kai Maria. Di sisa aki abi wan siki di ta mbei an sa ta du di peleikiwooko kumafa a kë. Bigibigi a bi ta fii bookosaka, söseei a bi ta fii kuma an dë wan hojo soni. Ma a ko buta pakisei a wan woto sisa a di kemeente di bi abi wan suwaki di bi mbei taa a bedi wanwan a bi ta dë, hën a bigi heepi ën a soni. Maria bi taki taa: „Mi bi seeka soni sö taa mi ku di sisa bi sa ta peleiki da sëmbë ku tëlëfön, söseei ku biifi. Hiniwan juu te mi bi dou a wosu, mi bi ta fii bunu seei u di mi bi sa heepi di sisa u mi.” Useei sa ko dë möön waiwai te u ta buta pakisei a dee soni dee u sa du, ka fuu ta buta pakisei a dee soni dee wa sa du. Ma unfa a dë ee u sa du möön soni da Jehovah, nasö ee u sa’ u du so soni bunu seei?

7. Un köni lai apösutu Petuisi bi da dee woto Keesitu sëmbë?

⁷ A di fosu biifi di di apösutu Petuisi bi sikifi, a bi piki dee baaa ku dee sisa fëën u de wooko ku di köni di Gadu da de, u de da de na de taanga. Petuisi bi taki taa: „Nöö fa Masa Gaangadu paati dee köni fëën da unu dë, hiniwan fuunu musu ta wooko ku di fëën a wan fasi di ta heepi otowan e. Biga a da unu  de peipei ku ën bunuhati, nöö un musu ta wooko ku de a wan futoou fasi” (1 Pet. 4:10). Wa musu fëëë u wooko ku dee köni dee u abi, u di u ta si kuma wotowan o ta haun ku u, nasö u di u ta si kuma de o fii bookosaka. Ee u du soni a di lö fasi dë, nöö a o dë taa wa ta du hii soni di u sa du da Jehovah.

8. Faandi mbei wa musu njan buka u dee köni dee u abi hedi, te u luku 1 Kolenti 4:6, 7?

⁸ Wa musu fëëë u wooko ku dee köni dee u abi, ma u musu köni fu wa ta njan buka. (Lesi 1 Kolenti 4:6, 7.) Kandë i sa’ u fan ku sëmbë a sö wan fasi taa wantewante de ta kë lei soni u Bëibel. A bi o dë wan köni soni fii wooko ku di köni dë. Ma u musu hoi a pakisei taa wa musu njan buka fëën hedi. Boo taa i miti wan sëmbë a di peleikiwooko, hën wantewante i bigi lei ën soni u Bëibel. I ta wai seei, nöö i kë kondëën da dee wotowan u di peleikiwooko kulupu ka i dë. Di i miti ku dee wotowan u di kulupu, hën i ta jei fa wan sisa ta konda fa a da wan sëmbë wan u dee buku fuu. Di sisa da wan sëmbë wan buku, ma i feni wan sëmbë u lei soni u Bëibel. Andi joo du? I sabi taa dee woto baaa ku sisa o feni taanga a di woto fii, ma a bi o sa möön bunu fii kondëën da de bakaten, u di ja bi o kë u di sisa fii kuma an du wan apaiti soni. Ma ja musu disa u suku sëmbë u lei de soni u Bëibel. Gadu da i wan köni, nöö wooko ku ën!

9. Unfa u musu wooko ku dee köni dee u abi?

⁹ A bunu fuu hoi a pakisei taa Gadu hën da u dee köni dee u abi. U musu wooko ku dee köni dë u heepi di kemeente, ma na fuu hei useei (Fil. 2:3). Te u ta wooko ku di kaakiti fuu ku dee köni dee u abi u du soni da Gadu, nöö woo ta möön dë waiwai. Wa o ta dë waiwai u di u ta du soni möön wotowan nasö u di u ta du soni u lei taa u bunu möön de. Ma woo ta dë waiwai, u di u ta wooko ku dee köni fuu u tja gafa ko da Jehovah.

10. Faandi mbei an dë wan bunu soni fuu tei useei maaka ku wotowan?

¹⁰ Ee wa köni, nöö a sa pasa taa u tei useei maaka ku wotowan, u di u sa’ u du so soni di de an sa’ u du. Boo taa wan baaa sa’ u hoi taki bunu seei. Di soni aki da di köni di a abi. Ma di baaa aki sa ta pakisei taa a bunu möön di woto baaa di an sa’ u hoi taki sö bunu. Ma kandë di woto baaa lo’ u tei sëmbë a wosu, a ta lei dee mii fëën soni bunu, söseei a ta du di peleikiwooko fajafaja. U ta wai seei taa u abi sömëni baaa ku sisa di ta wooko ku di köni u de u dini Jehovah, söseei u heepi wotowan!

11. Faandi mbei u musu mbei hii möiti u djeesi Jesosi?

¹¹ Hii fa wa musu ta tei useei maaka ku wotowan, tökuseei u sa lei sömëni soni u woto dinima u Jehovah. Di möön bunu sëmbë di u sa lei soni nëën da Jesosi. Hii fa Jesosi an bi abi zöndu, tökuseei u sa lei sömëni soni a dee bunu fasi dee a bi abi (1 Pet. 2:21). Te u ta mbei hii möiti u djeesi Jesosi, nöö woo sa dini Jehovah a wan möön bunu fasi, söseei woo sa peleiki möön bunu.

12-13. Andi u sa lei a Könu Dafiti?

¹² A di Wöutu u Gadu, u sa feni sömëni woto u womi ku mujëë di u sa djeesi, hii fa de bi dë zöndu libisëmbë (Heb. 6:12). Di Jehovah bi ta taki soni u Könu Dafiti, hën a bi taki taa: „Fasi fëën ta kai ku mi a hii futu.” Wan woto Bëibel puu di pisi aki ko „wan sëmbë di ta mbei hati u mi ta piizii” (Tjab. 13:22). Ma Dafiti bi dë wan zöndu libisëmbë. A bi mbei gaangaan föutu. Ma tökuseei a dë wan sëmbë di u sa djeesi. Faandi mbei? Wë u di te sëmbë bi ta leti ën buta a pasi u di a bi mbei wan föutu, nöö an bi ta fia. Ma a bi ta haika te de bi ta fan ku ën, söseei a bi ta tjali tuutuu u dee hogi dee a bi du. Di soni aki bi ta mbei taa Jehovah bi ta dëën paadon.​—Ps. 51:3, 4, 10-12.

¹³ U sa lei soni a Dafiti te u ta hakisi useei taa: ’Andi mi ta du te wan sëmbë leti mi buta a pasi? Mi ta tei taa mi föutu ö, naa mi ta fia? Mi ta buta di föutu a wotowan hedi ö? Mi ta mbei taanga möiti u ma mbei dee seei föutu baka u?’ I sa hakisi iseei dee seei soni aki te i ta lesi woto u woto womi ku mujëë a Bëibel, di bi abi wan taanga biibi. Dee fuka dee bi ta miti de, ta miti i tu ö? Un bunu fasi de bi abi? Te i ta lesi dee woto aki, nöö hakisi iseei taa: ’Unfa mi sa dë kuma di dinima u Jehovah aki?’

14. Unfa u sa feni wini te u ta luku fa dee baaa ku dee sisa fuu ta du soni?

¹⁴ U sa feni wini tu te u ta luku unfa dee dinima u Jehovah a di ten aki ta du soni, aluwasi de njönku nasö de gaandi. I sabi wan sëmbë a di kemeente ka i dë, di ta hoi dou hii fa fuka ta miti ën u? Kandë wotowan ta duwengi ën faa du soni kuma de, kandë dee famii fëën ta du ku ën, nasö kandë di gösöntu fëën an dë sö bunu. I ta si wantu bunu fasi a di sëmbë aki di i bi o kë ko abi tu ö? Te i ta luku di fasi fa a ta hoi dou, nöö iseei o si fa i sa hoi dou tu, hii fa tesi ta miti i. U ta tei ën u bigi seei taa u abi baaa ku sisa di u sa djeesi a di fa de ta biibi!​—Heb. 13:7; Jak. 1:2, 3.

15. Un köni lai Paulosu bi da dee fesiten Keesitu sëmbë, di sa heepi u fuu dini Jehovah waiwai go dou?

¹⁵ Ee u kë libi fiifii makandi a di kemeente, nöö hii u tuu musu du hii soni di u sa du u heepi di kemeente. Buta pakisei a dee fesiten Keesitu sëmbë. De bi abi peipei köni ku peipei wooko di de bi musu du (1 Kol. 12:4, 7-11). Ma di soni aki an bi ta mbei taa de bi ta fia ku deseei nasö taa de bi ta buja ku deesi. Paulosu bi da de taanga u de du di soni di bi dë fanöudu, sö taa de bi sa „ko dë gbelingbelin kumafa Masa Jesosi seei dë söndö föutu”. Paulosu bi piki dee sëmbë u Efeise taa: „Te hiniwan sëmbë ta du ën wooko kumafa a fiti ta lobi dee otowan fëën, nöö woo nango a fesi seei” (Ef. 4:1-3, 11, 12, 16). Dee sëmbë dee bi du di soni di Paulosu bi taki, bi mbei taa sëmbë bi sa libi fiifii makandi a di kemeente, nöö sö nöö a dë a dee kemeente a di ten aki.

16. Andi u musu dë kabakaba u du? (Hebelejën 6:10)

¹⁶ Mbei möiti fu ja ta tei iseei maaka ku wotowan. Ma suku u lei soni a Jesosi, nöö mbei möiti u ko abi dee fasi fëën. Lei soni a dee woto u sëmbë di sikifi a Bëibel, söseei lei soni u sëmbë u di ten aki di abi wan taanga biibi. Te i ta du hii soni di i sa du, nöö i sa dë seiki taa Jehovah ’an o fëëkëtë dee bunu libi fii dee i ta libi’. (Lesi Hebelejën 6:10.) Mbei möiti fii ta dë waiwai go dou a di dini u Jehovah, u di i sabi taa a ta si taa i ta du hii soni di i sa du dëën.