1. Yini lesijabulisa kakhulu?

 JEHOVA ufuna sijabule. Loku sikusho ngobe injabulo isitselo semoya wakhe longcwele. (Gal. 5:22) Njengobe kunenjabulo lenyenti ekupheni kunasekwemukeleni, siyajabula nasenta umsebenti wekushumayela nalapho sisita bazalwane betfu nabodzadze ngetindlela letehlukahlukene.—Imis. 20:35.

2-3. (a) Njengobe kuvetiwe KubaseGalathiya 6:4, ngutiphi tintfo letimbili letingasisita sihlale sijabulile emsebentini waJehova? (b) Sitawucoca ngani kulesihloko?

² Njengobe kubhaliwe KubaseGalathiya 6:4, umphostoli Pawula washo tintfo letimbili letingasenta sihlale sijabulile. (Fundza.) Kwekucala, kufanele sentele Jehova konkhe lokusemandleni etfu. Sitawujabula nasentela Jehova konkhe lokusemandleni etfu. (Mat. 22:36-38) Kwesibili, kufanele sigweme kuticatsanisa nalabanye. Kunobe yini lesikhona kuyenta ngenca yekutsi siphilile, ngenca yekuceceshwa lesikutfolile, nobe ngenca yemakhono lesinawo, kufanele simbonge Jehova. Ngetulu kwaloko, konkhe sikunikwe nguye. Nangabe labanye baphumelela kunatsi nabasebentisa indlela letsite yekushumayela, kufanele sijabule kutsi basebentisa emakhono abo kuze badvumise Jehova, kunekutsi bawasebentise kuze batente labancono kunalabanye nobe batizuzise bona. Ngako, kunekutsi sincintisane nabo, kufanele sifundze kubo.

³ Kulesihloko, sitawucoca ngekutsi yini lengasisita nasidvumatekile ngenca yekutsi asikhoni kwenta konkhe lesifisa kukwenta emsebentini waJehova. Sitawuphindze sifundze kutsi singawasebentisa njani kahle emakhono lesinawo nangekutsi yini lesingayifundza esibonelweni salabanye.

4. Yini lengasenta sidvumateke? Shano sibonelo.

⁴ Letinye tikhonti taJehova tikutfola kumatima kuvumelana netimo letiletfwa kukhula nobe yimphilo lebutsakatsaka. Nguloko lokwenteka ku-Carol. Bekake wasita lapho kunesidzingo lesikhulu khona sebamemeteli. Ngaleso sikhatsi, bekanetifundvo teliBhayibheli letingu-35 futsi wasita labanyenti kutsi batinikele kuJehova futsi babhajatiswe. Carol bekaphumelela emsebentini wakhe wekushumayela! Wabese ugula kakhulu, futsi kwadzingeka acitse sikhatsi lesinyenti asekhaya. Carol utsi: “Ngenca yekugula, angisakhoni kwenta loko lokwentiwa ngulabanye, futsi ngiva ngatsi angisamkhonti kahle Jehova. Angikhoni kwenta lengifuna kukwenta futsi loko kuyangidvumata.” Carol ufuna kwentela Jehova konkhe langakhona kukwenta, futsi loko kuyintfo lenhle kakhulu. Siyati kutsi Nkulunkulu wetfu lonemusa uyajabula ngobe Carol wenta konkhe langakhona kukwenta.

5. (a) Yini lokufanele siyikhumbule nangabe sidvumatekile ngenca yekutsi asikhoni kwenta loko lesifuna kukwenta? (b) Lomzalwane lokuletitfombe uchubeke njani enta konkhe lokusemandleni akhe emsebentini waJehova?

⁵ Nangabe uhle udvumateka ngenca yekutsi awukhoni kwenta loko lofuna kukwenta, tibute: ‘Yini Jehova lacela kutsi ngiyente?’ Ukucela kutsi wente konkhe longakhona kukwenta nyalo. Cabanga nganasi sibonelo: Dzadze loseminyakeni yabo-80 udvumatekile ngenca yekutsi akasakhoni kwenta loko bekakwenta emsebentini wekushumayela nakaseminyakeni yabo-40. Ucabanga kutsi ngisho nobe enta konkhe langakhona kukwenta akumjabulisi Jehova. Kuliciniso yini loku? Cabanga nganaku: Lodzadze bekentela Jehova konkhe lokusemandleni akhe nakaseminyakeni yabo-40 futsi nanyalo uyachubeka amentela konkhe lokusemandleni akhe njengobe aseminyakeni yabo-80, akase wayekela kwentela Jehova konkhe lokusemandleni akhe. Nangabe siva shengatsi akumjabulisi Jehova loko lesimentela kona, kufanele sikhumbule kutsi nguye loncumako kutsi yini lemjabulisako. Nangabe senta konkhe lesingakhona kukwenta, Jehova utawutsi: “Wente kahle!”—Catsanisa naMatewu 25:20-23.

6. Yini lesingayifundza esibonelweni saMaria?

⁶ Sitawujabula nasinaka loko lesikhona kukwenta kunekunaka loko lesingakhoni kukwenta. Cabanga ngalomunye dzadze lokutsiwa nguMaria, lonesifo lesimenta angakhoni kwenta loko lafuna kukwenta emsebentini wekushumayela. Ekucaleni bekacindzeteleke kakhulu futsi ativa angasilusito lwalutfo. Kodvwa wacabanga ngalomunye dzadze losebandleni lakulo lobekahlala asembhedzeni ngenca yekugula, futsi Maria wancuma kumsita. Maria utsi: “Ngahlela kushumayela naye ngelucingo nangekubhala tincwadzi. Njalo nangishumayele naye bengifika ekhaya ngijabulile futsi ngenetisekile ngekutsi ngikhonile kusita dzadzewetfu.” Natsi singajabula kakhulu nasinganaka loko lesikhona kukwenta kunekutsi sinake loko lesingakhoni kukwenta. Kodvwa kutsiwani nangabe singakhona kwenta lokunyenti emsebentini waJehova nobe siwenta kahle lomunye umsebenti?

7. Ngusiphi seluleko umphostoli Phetro lasinika emaKhristu?

⁷ Encwadzini yekucala leyabhalwa ngumphostoli Phetro, watjela bazalwane kutsi basebentise emakhono abo kuze bakhutsate bazalwane nabodzadze. Phetro wabhala watsi: “Ngekwelizinga umuntfu ngamunye lemukele ngalo sipho, akasisebentise kuze asite labanye njengenceku lekahle lephatsiswe umusa lomkhulu waNkulunkulu.” (1 Phet.  4:10) Kufanele sente konkhe lesingakhona kukwenta kuze sisebentise emakhono etfu futsi singakhatsateki ngekutsi labanye batawuba nemona nobe batawudvumateka. Nangabe singakwenti konkhe lesingakhona kukwenta kuze sisebentise emakhono etfu, sitawube singamniketi Jehova lokuncono kakhulu.

8. Ngekusho kwa-1 KubaseKhorinte 4:6, 7, ngusiphi sizatfu lesisenta singatigcabhi ngemakhono lesinawo?

⁸ Kufanele siwasebentise emakhono etfu, kodvwa kufanele sicaphele singatigcabhi ngawo. (Fundza 1 KubaseKhorinte 4:6, 7.) Sibonelo nje, kungenteka unelikhono lekucalisa tifundvo teliBhayibheli. Kufanele wente konkhe lokusemandleni akho kuze ulisebentise lelikhono! Kodvwa kunemehluko lokhona emkhatsini wekusebentisa likhono lonalo nekutigcabha ngalo. Asesitsi kwenteke intfo letsite lekujabulisile nawusashumayela futsi loko kukwente wacalisa sifundvo seliBhayibheli. Uyakulangatelela kutjela labo labasecenjini lokulo. Nawuhlangana nalelicembu, utfola dzadze ucoca ngaloko lokwenteke kuye lokwente waniketa lotsite magazini. Lodzadze unikete lotsite magazini, wena wacalisa sifundvo. Yini lotawuyenta? Uyati kutsi loko lokwenteke kuwe kutalikhutsata licembu, kodvwa ungakhetsa kungacoci ngako ngaleso sikhatsi kuze ungenti lodzadze lonikete lotsite magazini eve shengatsi kuncane lakwentile. Nawenta njalo utawube ukhombisa kutsi unemusa. Kodvwa chubeka wenta konkhe longakwenta kuze ucalise tifundvo teliBhayibheli. Unelikhono, ngako lisebentise!

9. Kufanele siwasebentise njani emakhono etfu?

⁹ Kufanele sikhumbule kutsi nobe ngumaphi emakhono lesinawo, siwaphiwe nguNkulunkulu. Ngako kufanele siwasebentisele kusita libandla, hhayi kutsi siwasebentise kuze bantfu banake tsine. (Fil. 2:3) Nasisebentisa emandla etfu nemakhono etfu kuze sente intsandvo yaNkulunkulu sitawujabula, hhayi ngobe sitawube sifuna kuba ncono yini kunalabanye, kodvwa ngobe sitawube siwasebentisela kudvumisa Jehova.

10. Ngusiphi sizatfu lesisenta singaticatsanisi nalabanye?

¹⁰ Nakangakanaki, umuntfu angacala kucatsanisa loko lakwenta kahle naloko lomunye langakhoni kukwenta kahle. Sibonelo nje, umzalwane angaba nelikhono lekubeka tinkhulumo telinyenti. Kodvwa kungenteka ambukele phasi umzalwane lote kahle likhono lekubeka tinkhulumo telinyenti. Nobe kunjalo, kungenteka lomzalwane unemoya wekungenisa tihambi, uyakhona kucecesha bantfwana  bakhe nobe ukhutsele emsebentini wekushumayela. Sijabula kakhulu ngekutsi sinebazalwane labanyenti nabodzadze labasebentisa emakhono abo kuze bakhonte Jehova futsi basite nalabanye!

11. Yini leyenta kudzingeke kutsi setame kulingisa sibonelo saJesu?

¹¹ Nanobe kufanele sigweme kuticatsanisa nalabanye, singazuza ngekufundza etibonelweni tebantfu labetsembekile. Cabanga ngesibonelo saJesu. Nanobe bekete sono, kodvwa singafundza ebuntfwini bakhe lobuhle nakuloko lakwenta. (1 Phet. 2:21) Nasenta konkhe lokusemandleni etfu kuze silingise sibonelo sakhe, siba tikhonti taJehova letincono futsi siphumelele emsebentini wekushumayela.

12-13. Yini lesingayifundza eNkhosini Davide?

¹² Evini laNkulunkulu, kunetibonelo letinyenti temadvodza netebafati lebebatsembekile lesingabalingisa nanobe bebanesono. (Heb. 6:12) Cabanga ngeNkhosi Davide, Jehova watsi ‘ingumuntfu lotsandzekako enhlitiyweni yakhe’ nobe ‘iluhlobo lwemuntfu lolumjabulisako,’ njengobe kusho lelinye lihumusho. (Imis. 13:22) Nobe kunjalo, Davide bekanesono. Ecinisweni, wenta emaphutsa lamakhulu. Ngisho kunjalo, usibonelo lesihle kitsi. Sisho ngani? Ngobe ngesikhatsi elulekwa akazange abeke taba. Kunaloko, wasemukela leseluleko futsi bekatisola ngaloko bekakwentile. Loko kwenta kutsi Jehova amcolele.—Hla. 51:3, 4, 10-12.

¹³ Singafundza kuDavide ngekutsi sitibute nayi imibuto: ‘Ngenta njani nangelulekwa? Ngiyawavuma yini emaphutsa ami, nobe ngetama kubeka taba? Ngisheshe ngibasole yini labanye? Ngenta konkhe yini lokusemandleni kuze ngingawaphindzi emaphutsa ami?’ Ungatibuta imibuto lefanako nawufundza ngalamanye emadvodza nebafati labetsembekile lokukhulunywa ngabo eBhayibhelini. Bebanetinkinga letifana netakho yini? Bebanabuphi buntfu lobuhle? Kunobe ngukuphi, tibute: ‘Ngingasilingisa njani lesikhonti saJehova lesetsembekile?’

14. Kungasisita ngani kubuka labo lesikholwa nabo?

¹⁴ Kungasisita nekubuka labo lesikholwa nabo, kungaba ngulasebakhulile nobe ngulabasebasha. Nasi sibonelo, ukhona yini lomatiko losebandleni lokulo lobeketelela inkinga letsite, kungaba kucindzetelwa bontsanga yakhe, kuphikiswa ngemalunga emndeni, nobe yimphilo lebutsakatsaka? Bukhona yini buntfu lobuhle lobubonako kulomuntfu  longatsandza kubulingisa? Kubuka sibonelo sakhe lesihle kungakwenta ubone tindlela longatibeketelela ngato tinkinga takho. Sibonga kakhulu ngekutsi sinebazalwane nabodzadze labasibekela sibonelo lesihle!—Heb. 13:7; Jak. 1:2, 3.

15. Ngusiphi seluleko lesashiwo ngumphostoli Pawula lesingasisita kutsi sichubeke sijabulile emsebentini lesiwentela Jehova?

¹⁵ Kuze sikhutsate kuthula nebunye ebandleni, ngamunye wetfu kufanele ente konkhe langakhona kukwenta. Cabanga ngesibonelo semaKhristu ekucala. Bewanemakhono langafani futsi enta imisebenti leyehlukene. (1 Khor. 12:4, 7-11) Kodvwa loko akuzange kuwente ancintisane nobe ehlukane ekhatsi. Kunaloko, Pawula wawakhutsata kutsi ente konkhe lebekudzingekile kuze ‘akhe umtimba waKhristu.’ Pawula wabhalela base-Efesu watsi: “Nangabe lilunga ngalinye lisebenta kahle, loku kuba nesandla ekukhuleni kwemtimba njengobe utakha ngelutsandvo.” (Ef. 4:1-3, 11, 12, 16) Labo labakwenta loko lokwashiwo nguPawula bebakhutsata kuthula nebunye, lokutintfo lesitibonako emabandleni lesikuwo lamuhla.

16. Yini lokufanele sitimisele kuyenta? (KumaHebheru 6:10)

¹⁶ Timisele kutsi ungaticatsanisi nalabanye. Kunaloko, fundza kuJesu futsi wetame kamatima kulingisa buntfu bakhe. Fundza lokutsite etibonelweni letiseBhayibhelini nakubazalwane nabodzadze labetsembekile. Njengobe uchubeka wenta konkhe longakhona kukwenta, ciniseka kutsi Jehova ‘ulungile, ngako ngeke awukhohlwe umsebenti wakho.’ (Fundza KumaHebheru 6:10.) Chubeka ukujabulela kukhonta Jehova, futsi wati kutsi uyajabula nakakubona wenta konkhe longakhona kukwenta kuze umjabulise.