1. Inogne ty raha tena mahafale antikagne?

 TEA i Jehovah ho falefale tika. Haintika zay satria agnisa ty voka i fagnahy masigney ty fifaleagne. (Gal. 5:22) Ty magnomey ro tena mahafale tie amy ty mandrambe. Izay ty mahavy antika vao mainke ho fale naho fa mazoto mandrambe anjara amy ty fanompoagne naho magnampe o rahalahintikagneo amy ty fomba maro isan-karaza’e.​—Asa. 20:35.

2-3. a) Inogne ty raha roe hagnampe antika ho falefale avao amy ty fanompoagne ataontika hoahy i Jehovah, arake ty rehafegne amy Galatianina 6:4 ao? b) Inogne ty hodinehentikagne ato?

² Mirehake raha roe magnampe antika ho falefale avao ty apostoly Paoly amy Galatianina 6:4 ao. (Vakio.) Voaloha’e, ty hagnomey ty fara’e soa vitantikagne hoahy i Jehovah ty toko’e ho tanjontikagne. Toko’e ho fale areke tika naho ohatse ty fara’e soa vitantikagne ro meintika aze. (Mat. 22:36-38) Faharoe, toko’e hitao tika mba tsy hampitaha ty tegnantika amy ty hafa. Ndra inogn’inogne raha vitantika noho ty fahasalamantikagne, ty fahaiantika ndra ty raha nianarantikagne le haintika soa ty manao aze, le toko’e hisaorantikagne i Jehovah zay. Naho ty maregne ka, le boake ama’e iaby ze raha anagnantikagne. Faie naho ohatse misy ndaty hoe mahay ambonentikagne amy ty lafi-panompoagne ila’e, le toko’e ho fale tika satria ampiasà’e mba hideragne i Jehovah ty fahaia iareo, fa tsy tihoe mba hireharehàgne ndra hagnasoa iareo ty tegna iareo. Ndra aleo areke miana-draha amy iareo ta tie hifaninagne amy iareo.

³ Hodinehentika amy ty lahatsoratse toy ty raha azontikagne atao naho ohatse kivy tika satria mahatsapa tie voafetra avao ty raha azontikagne atao amy ty fanompoagne i Jehovah. Hodinehentika ato ka tie akore ty azontika ampiasàgne amy ty fomba soa ty fahaiantikagne, le inogne ty azontika ianaragne boake amy ty hafa.

4. Inogne ty raha va’e hahakivy ty ila’e amantikagne? Mirehafa ohatse raike.

⁴ Kivy ty mpanompo i Jehovah ila’e, satria tsy afake mahavita ty raha tea iareo hatao amy ty fanompoagne i Jehovah noho iareo fa antetse ndra tsy salama. Izay zao ty raha nitsapa i Carol. Nanompo amy ty toeragne ilàgne mpitory maro agne reke tie taloha. Tagnate ze fotoagne zay, le nitarike fampianaragne Baiboly 35 reke sady maro ty nampea’e mba hanokan-tegna naho hatao badisa. Nahatrea vokatse tamy ty fanompoagne ty Carol. Faie narare reke naho fa tafara tatoy, le tsy le afake miboake fire fa le fa mijanogne an-tragno ao avao. Hoe ty Carol: “Haiko fa tsy afake mahavita ty raha vita ty hafa raho satria marare. Faie hoe mahatsapa zay raho tie tsy tena Kristiana naho ampiraegne amy iareo. Mahakivy ty mieretseretse tihoe misy raha tea’o hatao faie tsy vita’o ty manao aze.” Te hanao ze azo’e atao hoahy i Jehovah ty Carol. Tena soa ty toe-tsai’e. Matoky tika fa mampifale i Andrianagnaharentikagne mitretréy ze toe-tsai’e zay.

5. a) Inogne ty raha toko’e ho tsiaroventika naho ohatse tika kivy satria voafetra avao ty raha azontika atao? b) Akore ty nagnomea o rahalahy atoro amo o sareo eò ty fara’e soa hoahy i Jehovah amparake ty nahatanora aze?

⁵ Naho ohatse rehe kivy satria mahatsapa tie voafetra avao ty raha azo’o atao, le saintsaigno zao: ‘Inogne moa ty raha také i Jehovah amako?’ Ty hagnomey ze fara’e soa vita’o arakarake ze raha iaigna’o amy izao. Dineho ty ohatse raike toy. Kivy ze rahavave raike 80 taogne zay satria tsy afake mahavita bey amy ty fanompoagne sasa manahake ty nivita’e tamy ireke ni-40 taogney. Mieretseretse reke tie ndra tie ty fara’e soa vita’e aza ro mei’e i Jehovah, le mbe tsy hampifale Aze avao. Faie le tena maregne vao zay? Saintsaigno zao: Naho ohatse reke nagnomey ty fara’e soa vita’e tamy ireke ni-40 taogney, sady mbe manao izay avao ka amy ireke 80 taogney, le tsy niova zane ty raha natao’e. Naho ohatse areke tika mahatsapa tie tsy tena mampifale i Jehovah ty fanompoagne ataontika, le mila tsiaroventikagne fa i Jehovah ro mamaritse tie ty manao akore ro mampifale aze, le ty manao akore ro tsy mampifale aze. Naho ty fara’e soa vitantikagne ro meintikagne aze, le hoe misaontsy amantika reke tie: ‘Fanjaka!’​—Ampitahao amy ty Matio 25:20-23.

6. Inogne ty raha azontikagne ianaragne boake amy i Maria?

⁶ Ho mora amantikagne ty hahatrea hafaleagne naho ohatse tika mifantoke amy ze raha azontikagne atao fa tsy amy ze tsy azontikagne atao. Dineho ohatse ty tantara i rahavave Maria. Nanjare voafetra avao ty raha azo’e natao amy ty fanompoagne noho ireke managne aretegne. Nikivy naho nahatsiaro ho tsy misy ilàgne aze reke tamy ty voaloha’e. Faie naho fa nieretseretse ze rahavave raike marare tsy afake miala am-pandreagne eo, amy i fiangona iareo eo zay reke, le nanapa-kevetse fa hagnampe aze. Hoe ty Maria: “Nanao fandaharam-potoagne mba hiarahagne mitory ama’e an-telefony naho an-taratasy raho. Isake tie avy nanompo zahay, le mahatsiaro ho fale naho ho afa-po raho satria nahavita nagnampe i rahavavekoy.” Vao mainke ho falefale areke tika naho mifantoke amy ty raha azontikagne atao fa tsy amy ty raha tsy azontikagne atao. Faie akore naho afake mahavita bey amy ty fanompoagne i Jehovah tika ndra misy fanompoagne ila’e tena magnavanagne antika?

7. Inogne ty torohevetse nimey i apostoly Petera o Kristianao?

⁷ Nandrisike o rahalahi’eo ty apostoly Petera amy i taratasi’e voaloha’ey ao mba hampiasa ze fagnomezagne niazo iareo hampaherezagne o mpiara-manompo amy iareò. Hoe ty Petera: ‘Ampiasao mba hifanompoagne ze nimeigne anareo, arakarake ze nirambese’areo  tsikiraidraike iaby. Ty anto’e, inareo ty mpanompo soa magnampe ty hafa handrambe soa i hasoa fagnahy miambake asehon’Andrianagnaharey.’ (1 Pet. 4:10) Tsy toko’e hataontika hampisalasala antikagne hampiasa amy ty fomba feno ty fahaiantikagne areke ty fatahoragne tie kera va’e hanjare ho kivy ndra hialogne antika ty ndaty hafa. Naho ohatse tika matahotse hoe izay, le manjare tsy magnomey ty fara’e soa vitantika hoahy i Jehovah.

8. Nagnino tika ro mila mitao mba tsy hirohake miomba ty fahaiagne anagnantikagne, arake ty 1 Korintianina 4:6, 7?

⁸ Mila mampiasa amy ty fomba feno ty fahaiantikagne tika, faie mila mitao ka mba tsy hirehareha amy irey. (Vakio ty 1 Korintianina 4:6, 7.) Va’e tena mahay mitarike fampianaragne Baiboly, ohatse, rehe. Tsy toko’e hisalasala hampiasa ze fahaia’o zay rehe. Faie tsy mitovy tihoe mampiasa ty fahaia’o naho tihoe mirohake. Andao hatao tihoe nahatrea ndaty liagne rehe tamy i fanompoagney ey, le nanomboke nitarike fampianaragne Baiboly amy i ndatỳ. Tena tsy ligne’o ty hitantara aze amy i andiam-pitory misy azoy. Faie naho fa nahatrea iareo rehe, le nisy rahavave raike zoe’o mitantara amy iareo tie nahavita nametrake gazete reke. I rahavavey gazete ty nivoapetra’e, fa ty azo, nitarike fampianaragne Baiboly. Akore ty hatao’o? Hai’o fa hampahery i mpitory rey i raha tea’o hotantaraegney. Faie va’e hanapa-kevetse rehe tie ndra aleo amy ty magnarake vaho hotantarae’o amy iareo i rahay, amy izay tsy kivy i rahavave nafana fo nitantara tie nahavita nametrake gazetey. Soa naho izay ty atao’o. Faie tsy midika zay tie ko mitarike fampianaragne Baiboly sasa rehe. Naho managne ze fahaiagne zay rehe, le ampiasao.

9. Akore ty toko’e hampiasantikagne ty fahaiagne anagnantikagne?

⁹ Mila tsiaroventikagne fa boake aman’Agnahare ty fahaiagne anagnantikagne. Toko’e hampiasantikagne mba hampaherezagne o fiangonagneo i fahaizantika rey fa tsy hibohabohantikagne. (Fil. 2:3) Naho mampiasa ty herintikagne naho ty fahaiantikagne mba hanoagne ty zoton’arofo i Jehovah tika, le hanagne anto’e hifaleagne amy ty tegnantikagne. Tsy tihoe noho itika mahavita raha maro ndra mahay ambone iareo ro mahafale antika, fa noho itika mampiasa ty fahaiantika mba hideragne i Jehovah.

10. Nagnino ro tsy mete ty mampitaha ty tegnantikagne amy ty ndaty hafa?

¹⁰ Naho tsy mitao ty ndaty raike, le va’e hanomboke hampitaha ty raha hai’e amy ty raha tsy hay ty hafa. Ohatse, va’e misy rahalahy raike tena mahay manao lahajaka hoahy ty ndaty maro. Izay zao ty raha hai’e. Le am-po’e agne reke va’e hieretseretse tie ambone noho ty rahalahy  raike tsy le mahay manao lahajaka manahake aze. Faie o rahalahy tsy le mahay manao lahajaka iohoe, va’e ho tea mandrambe ambahiny, mampiofagne ty ana’e, ndra mafana fo amy ty fanompoagne. Tena fale areke tika fa managne rahalahy naho rahavave maro mampiasa ty fahaia iareo mba hanompoagne i Jehovah naho hagnampeagne ty hafa.

11. Nagnino tika ro toko’e hikezake hitsikombe ty modely i Jesosy?

¹¹ Maregne fa tsy toko’e hampitaha ty tegnantikagne amy ty hafa tika. Faie ndra tie eo zay, le afake miana-draha maro amo o mpanompo i Jehovah tsy mivalikeo tika. I Jesosy ty tena modely soa ho antikagne. Maregne fa tsy manahake aze tika satria reke voririke. Faie maro ty raha azontika ianaragne ama’e. (1 Pet. 2:21) Naho ohatse tika manao ze azontikagne atao mba hanahafagne aze, le vao mainke hihasoa ty toetsentikagne sady hahatrea vokatse amy ty fanompoagne ka tika.

12-13. Inogne ty raha azontika ianaragne boake amy i Davida Mpanjaka?

¹² Maro ty lahilahy naho ty ampela amy Baiboly ao azontika tsikombegne ndra tie tsy voririke aza. (Heb. 6:12) Dineho ohatse ty Davida Mpanjaka. “Lahilahy tea ty arofoko” ty nikanjia i Jehovah aze. Misy Baiboly nandika o rehake rehoe tie: “Ndaty tena mampifale ahy.” (Asa. 13:22) Ie amy izao ty Davida ndaty tsy voririke. Maro ty hadisoagne lahibey natao’e. Faie ndra tie eo zay, le ohatse soa ho antikagne reke. Fa nagnino? Naho fa nanaregne reke, le tsy nagnamaren-tegna. Ireke aza nagneke i torohevetse nimeigne azey ndra tie mafe aza, sady tena nanegnegne tamy ty raha natao’e reke. Izay ka ty nahavy i Jehovah hamindra fo tama’e.​—Sal. 51:3, 4, 10-12.

¹³ Inogne ty raha azontika ianaragne amy i Davida? Saintsaigno zao: ‘Akore ty ataoko naho fa meagne torohevetse raho? Le avy le mieke ty hadisoako vao raho, sa magnamaren-tegna heike? Tea magnomey tsiny ty hafa vao raho? Mikezake mafe vao raho mba tsy hagneregne sasa ty hadisoagne nataoko?’ Naho fa mamaky tantara o ndaty hafa tsy mivalike amy Baiboly ao rehe, le azo’o atao ty misaintsaigne fagnonteneagne mitovitovy amy ireo. Ndra izao: ‘Mitovy amy ty olagne atreheko vao ty olagne natrehe iareo? Inogne ty toetse soa naseho iareo?’ Isake tie manao izay rehe, le dineho ka zao: ‘Inogne ty azoko atao mba tena hanahafako soa o mpanompo i Jehovah tsy nivalike iohoe?’

14. Nagnino ro mahasoa antika ty mandineke o mpiara-manompo amantikagneo?

¹⁴ Handrambe soa ka tika naho mandineke o mpiharo finoagne amantikagneo le miana-draha amy iareo, ndra tanora zay ndra fa antetse.  Azo’o eretseretegne zao tie ia ty ndaty amy i fiangona’areo eo miatreke raha sarotse faie tsy mivalike. Ia, ohatse, ty seré ndra taone ty nama’e hanao raha raty, ty enjehe ty longo’e, ndra marare? Inogne ty toetse soa anagna o ndaty iohoe trea’o tie mila ikezaha’o anagnagne mba hanahafa’o aze? Naho mandineke ty modely iareo rehe, le hahatrea lesogne hagnampe azo hahavita hiatreke ty olagne mahazo azo. Tena mahafale antika ty managne o rahalahy naho o rahavave modely amy ty tsy fivalihagne rehoe.​—Heb. 13:7; Jak. 1:2, 3.

15. Inogne ty torohevetse nimey i apostoly Paoly mba hagnampeagne antika ho falefale avao amy ty fanompoantikagne i Jehovah?

¹⁵ Mila magnomey ze fara’e soa boake amantikagne tika tsikiraidraike mba hahavy o fiangonagneo hilongo soa naho hiharo saigne. Dineho ohatse o Kristiana tamy ty taonjato voaloha’eo. Tsy nitovy ty fagnomezagne naho ty fanendreagne niazo iareo. (1 Kor. 12:4, 7-11) Faie tsy nahavy iareo hifaninagne naho hizarazara zay. I Paoly aza nandrisike ty tsikiraidraike amy iareo hanao ze raha ilaegne atao mba ‘hagnatanjahagne ty vata i Kristy.’ Hoe ty Paoly tamo o Efesianao: ‘Naho fa miasa soa ty ratsam-batagne tsikiraidraike, le mitombo o vatagneo satria mihamatanjake noho ty hatea.’ (Efes. 4:1-3, 11, 12, 16) Ze nagnorike o reha i Paoly rehoe le nampisy filongoagne naho firaisan-tsaigne tamy i fiangonagney teo, i toetse treantika amo o fiangonantikagneo eo amy izaò.

16. Toko’e ho tapa-kevetse ty hanao inogne tika? (Hebreo 6:10)

¹⁶ Mikezaha ho tapa-kevetse ty tsy hampitaha ty tegna’o amy ty ndaty hafa. Mianara amy i Jesosy, le mikezaha mafe hanahake ty toetse’e. Mandrambesa ka fianaragne amo o ndaty tsy nivalike voarehake amy Baiboly ao naho amo o androntikagne amy izaò. Naho ihe magnomey ze fara’e soa vita’o hoahy i Jehovah, le matokia fa ‘tsy mba manao ty tsy maregne reke, le hagnaligno ze raha natao’o.’ (Vakio ty Hebreo 6:10.) Mifalea lognandro areke amy ty fanompoagne i Jehovah, satria tena mahafale aze ty mahavazoho azo mikezake amy ty fo’o mba hampifaleagne aze.