1. Kakɔna katosha ɔngɛnɔngɛnɔ w’efula?

 JEHOWA nangaka dia sho monga l’ɔngɛnɔngɛnɔ. Sho mbeyaka dui sɔ nɛ dia ɔngɛnɔngɛnɔ ekɔ dionga dimɔtshi dia l’olowa wa nyuma kande k’ekila. (Ngal. 5:22) Lam’ele ɔngɛnɔngɛnɔ wa mbisha ndeka wa nongola, sho mongaka l’ɔngɛnɔngɛnɔ w’efula etena kayashaso tshɛ l’olimu w’Okristo ndo kakimanyiyaso anangɛso lo toho totshikitanyi.​—Ets. 20:35.

2-3. a) Oko wotamidiɔ lo Ngalatiya 6:4, naa akambo ahende watokimanyiya dia ntetemala monga l’ɔngɛnɔngɛnɔ l’olimu wa Jehowa? b) Kakɔna kayotɔsɛdingola lo sawo nɛ?

² Oko wofundamidiɔ lo Ngalatiya 6:4, ɔpɔstɔlɔ Pɔɔlɔ akɛnya akambo ahende watokimanyiya dia ntetemala monga l’ɔngɛnɔngɛnɔ. (Adia.) Ntondotondo, oyango aso pombaka monga wa mbisha Jehowa kɛnɛ koleki ɔlɔlɔ le so. Naka sho mbosha kɛnɛ koleki ɔlɔlɔ le so, kete tayonga l’ɔngɛnɔngɛnɔ. (Mat. 22:36-38) Dui dia hende, sho pombaka mbewɔ ndjaɛdika l’anto akina. Oyadi tekɔ la yoonge ya dimɛna, takalongola olowanyelo ɔmɔtshi kana tekɔ la dikoka dimɔtshi dia lootɔ dia nsala akambo, sho pombaka monga la lowando le Jehowa. Laadiko di’akambo tshɛ, kɛnɛ tshɛ kele laso takakilongola oma le nde. Lo wedi okina, naka anto akina wekɔ tomanamana lo toho tɔmɔtshi t’esambishelo toleka, kete sho pombaka ngɛnangɛna l’ɔtɛ wakambawɔ l’akoka awɔ dia ntombola Jehowa, koko aha dia ndjatombola kana lo wahɔ awɔ hita. Laasɔ lo dihole dia nsɛmanɛ lawɔ, sho pombaka mbeka oma le wɔ.

³ Lo sawo nɛ, tayɛna kɛnɛ kakoka tokimanyiya naka tekɔ l’elelo ɛmɔtshi lo kɛnɛ kakokaso nsala l’olimu aso. Tayɔsɛdingola nto woho wakokaso nkamba lo yoho yoleki dimɛna la losha lele laso ndo wetshelo wakokaso nkondja oma lo bɛnyɛlɔ di’anto akina.

4. Dui diakɔna diakoka nkonya onto dia nkɔmɔ? Sha ɛnyɛlɔ.

⁴ Ekambi wa Jehowa ɛmɔtshi mongaka l’okakatanu dia ndjaekesanyiya la elelo wawaela lotshundu l’osombe kana yoonge ya demba ya kɔlɔ. Ɔsɔ aki okakatanu wakahomana la Carol. L’etena kɛmɔtshi nde aki la diɛsɛ dia nkamba lɛnɛ akiwɔ l’ohomba efula w’ekimanyielo. L’etena kɛsɔ, nde akalɔmbɔla wekelo wa Bible 35 ndo nde akakimanyiya anto efula dia mpama lo ndjakimɔ ndo batizama. Carol aki l’etombelo w’amɛna l’olimu w’esambishelo! Oma laasɔ, nde akayonga la yoonge ya kɔlɔ ndo nde akayotatɛ ntshikala paka la ngelo. Carol mbutaka ate: “Lam’ele dimi mbeyaka dia laya la elelo ɛmɔtshi wa lo demba, laya bu l’akoka wa nsala kɛnɛ kakoka anto akina nsala, koko dimi ndjaokaka oko laya bu Okristo wa dimɛna oko vɔ. Handjokoka nsala awui amɔtshi walangami nsala ndo dui sɔ kɔmɔlakami.” Carol nangaka nsala kɛnɛ tshɛ kakokande nsala lo dikambo dia Jehowa. Ɔsɔ ekɔ mɛtɛ dui dia mandola! Sho koka monga l’eshikikelo dia Nzambi kaso kokana kɛtshi ngɛnangɛnaka yimba yande ya dimɛna.

5. a) Kakɔna kahombaso mbohɔka naka elelo wele laso wotɔkɔmɔla? b) Oko wadiɛnya esato, ngande wakatetemalaka ɔnangɛso nkimɔ kɛnɛ koleki ɔlɔlɔ le nde l’olimu wa Jehowa?

⁵ Naka wɛ mongaka l’ɔkɔmwɛlɔ lo tena dimɔtshi l’ɔtɛ w’elelo wele layɛ, kete yambola wate: ‘Kakɔna kanɔmba Jehowa?’ Jehowa nangaka dia wɛ nsala kɛnɛ koleki ɔlɔlɔ l’etena kɛnɛ. Kadiyɛso kɛmɔtshi kele l’ɛnɔnyi 80 l’ɛmɔtshi ambɔkɔmɔ l’ɔtɛ wahandayokoka nsambisha efula woho wakandasambishaka etena kakinde l’ɛnɔnyi 40 l’ɛmɔtshi. Nde fɔnyaka dia kaanga mbashande Jehowa kɛnɛ koleki ɔlɔlɔ le nde, Jehowa hangɛnangɛna. Ko onde dui sɔ diekɔ mɛtɛ? Ohokanyiya dui sɔ. Naka kadiyɛso akakimɔka kɛnɛ koleki ɔlɔlɔ le nde etena kakinde l’ɛnɔnyi 40 l’ɛmɔtshi ndo nde ekɔ lo ntetemala nkimɔ kɛnɛ koleki ɔlɔlɔ le nde etena kayande l’ɛnɔnyi 80 l’ɛmɔtshi, kete nde atatshike kaanga yema nkimɔ kɛnɛ koleki ɔlɔlɔ le nde. Naka sho ntatɛ ndjaoka dia ndooko ka dikayi kasalaso kakoka ngɛnyangɛnya Jehowa, kete sho pombaka mbohɔ dia Jehowa mbele ɔnɛ lashikikɛ atɔndɔ wa kɛnɛ kakoka mbɔngɛnyangɛnya. Naka sho mbosha kɛnɛ koleki ɔlɔlɔ le so, kete Jehowa ayototɛ ɔnɛ: “Dimɛna efula!”​—Ɛdika la Mateo 25:20-23.

6. Wetshelo akɔna wakokaso nkondja oma l’ɛnyɛlɔ ka Maria?

⁶ Tayɛna dia ekɔ dui dia wɔdu dia monga l’ɔngɛnɔngɛnɔ naka sho ndjasha lo kɛnɛ kakokaso nsala lo dihole dia ndjasha lo kɛnɛ kahatakoke nsala. Tɔsɛdingole ɛnyɛlɔ ka kadiyɛso kɛmɔtshi kelɛwɔ Maria, kadiɛnɛ la hemɔ kɛmɔtshi kawodjɛ elelo l’akambo efula wakokande nsala l’esambishelo. Ntondotondo, nde akonge l’ɔkɔmwɛlɔ ndo nde akayaokaka di’oko nde bu ohomba. Koko oma laasɔ, nde akakanyiya kadiyɛso kɛmɔtshi ka l’etshumanelo katshikala paka lo mbeto ndo Maria akɔshi yɛdikɔ ya mbokimanyiya. Maria mbutaka ate: “Lakayakongɛ dia nsambisha kaamɛ la nde lo telefɔnɛ ndo lo mikanda. Etena tshɛ kakatakambaka kaamɛ, lakakalolaka la ngelo l’ɔngɛnɔngɛnɔ ndo l’ɔlɔ l’ɔtɛ wakamonge l’akoka wa nkimanyiya kadiyɛmi.” Sho lawɔ koka mfudia ɔngɛnɔngɛnɔ aso etena kayashaso lo kɛnɛ kakokaso nsala lo dihole dia ndjasha lo kɛnɛ kahatakoke nsala. Ko kayotota naka sho kokaka nsala awui efula kana sho salaka awui amɔtshi wa l’olimu wa Jehowa dimɛna efula?

7. Naa dako dia dimɛna diakasha ɔpɔstɔlɔ Petero Akristo?

⁷ Lo mukanda ande wa ntondo wakasambiyama, ɔpɔstɔlɔ Petero akakeketsha anango dia nkamba la losha ndo l’akoka wele lawɔ dia nkeketsha asekawɔ ambetawudi. Petero akafunde ate: “Lo yɛdikɔ yakalongola onto l’onto losha,  nyokambe la lɔ dia kimanyiyana oko wenyu alami w’eshika w’ɔlɔlɔ waheyama mbɛdika waki Nzambi wakɛnɛmɔma lo toho totshikitanyi.” (1 Pe. 4:10) Hatohombe mengenga dia nkamba la losha laso tshɛ lo tshɛ lo mboka wɔma ɔnɛ anto akina koka ndjotoka kandjema kana ndjɔkɔmɔ. Naka sho nsala ngasɔ, kete hatotosha Jehowa kɛnɛ koleki ɔlɔlɔ le so.

8. Lo ndjela 1 Kɔrɛtɔ 4:6, 7, lande na kahombaso mbewɔ ndjafuna l’ɔtɛ wa losha laso?

⁸ Sho pombaka nkamba la losha laso tshɛ lo tshɛ, koko sho pombaka monga la yambalo diaha sho ndjɔsɛma l’ɔtɛ alɔ. (Adia 1 Kɔrɛtɔ 4:6, 7.) Ɛnyɛlɔ, wɛ mbeyaka monga l’akoka wa ntatɛ mbeka l’ambeki wa Bible dimɛna. Wɛ hakoke ntshika nkamba la losha lɔsɔ! Koko ekɔ ohomba mbohɔ di’aha monga l’ofunu l’ɔtɛ alɔ. Ohɔsa dia wɛ aki oma la nkamba la diewo diayɛ l’esambishelo ko wɛ akatate mbeka l’onto Bible. Wɛ olomɔlomɔ dia mbitɛ ase olui ayɛ w’esambishelo tshɛ dui sɔ. Koko etena kahomanayɛ kaamɛ l’ase olui ayɛ, kadiyɛso kɛmɔtshi ambotatɛ nkɔndɔla etombelo w’amɛna wakandakondjisha lo mbisha onto ɔmɔtshi periodikɛ. Nde akasha onto periodikɛ; wɛ akatate mbeka l’onto Bible. Kakɔna kayoyosala? Wɛ mbeyaka di’ase olui ayɛ wayokeketshama oma lo diewo diayɛ, koko wɛ koka mbɔsa yɛdikɔ ya nkonga diaaso dimɔtshi dia dimɛna dia wɛ ndjɔkɔndɔla dui sɔ, l’oyango waha wɛ ndjoshishɛ kadiyɛyɛ kakasha onto periodikɛ ɔngɛnɔngɛnɔ ande. Ɔsɔ ayonga dui dia dimɛna dia nsala. Koko lo weho akɔ tshɛ totshikake dia nɔmba anto dia mbeka lawɔ Bible. Wɛ ekɔ la losha lɔmɔtshi, nkamba la lɔ!

9. Ngande wahombaso nkamba la losha laso?

⁹ Tohɔ di’akoka tshɛ wa lootɔ wele laso wekɔ losha l’oma le Nzambi. Sho pombaka nkamba la losha lɔsɔ dia nkeketsha ase etshumanelo, koko aha dia ndjaɛnya dia sho mboleki. (Flpɛ. 2:3) Etena kakambaso la wolo ndo l’akoka aso lo nsala lolango la Nzambi, sho mongaka l’ɔkɔkɔ wa monga l’ɔngɛnɔngɛnɔ aha l’ɔtɛ wasalaso akambo efula ndeka anto akina kana l’ɔtɛ wasalaso dia mbaleka, koko l’ɔtɛ wakambaso la losha laso dia ntombola Jehowa.

10. Lande na kele bu dimɛna dia ndjaɛdika l’anto akina?

¹⁰ Naka onto hendji ɔlɔlɔ, kete nde koka ndjotala lo djonga ya ndjaɛdika l’anto akina l’ɔtɛ w’awui wende l’akoka wa nsala kana wahandakoke nsala. Ɛnyɛlɔ, ɔnangɛso ɔmɔtshi mbeyaka monga l’akoka wa mbisha asawo wa lo sɛkɛ wa lɔɔka. Ɔsɔ ekɔ awui wende l’akoka wa nsala. Koko l’otema ande nde mbeyaka mɔnyɔla ɔnangɛso ɔmɔtshi lele l’okakatanu dia mbisha asawo. Koko mbeyaka monga ko ɔnangɛso ɔsɔ nongolaka angɛndangɛnda dimɛna, ndowanyaka  anande kana mongaka l’ohetoheto l’olimu w’esambishelo. Ande lowando lele laso dia monga l’anangɛso l’akadiyɛso efula wakamba la losha lawɔ dia kambɛ Jehowa ndo nkimanyiya anto akina lee!

11. Lande na kahombaso nsala la wolo dia ndjela ɛnyɛlɔ ka Yeso?

¹¹ Kaanga mbakokaso mbewɔ ndjaɛdika l’anto akina, sho koka nkondja wahɔ lo mbeka bɛnyɛlɔ dia wanɛ wele la kɔlamelo. Dia mboka dui sɔ, tɔsɛdingole ɛnyɛlɔ ka Yeso. Kaanga mbakinde kokele, sho koka nkondja wetshelo oma lo waonga ndo akambo w’amɛna wakandasalaka. (1 Pe. 2:21) Naka sho nsala la wolo dia mbokoya ɛnyɛlɔ kande dimɛna dimɛna, kete sho koka nkoma ekambi wa Jehowa w’eshika ndo tomanamama l’olimu aso w’esambishelo.

12-13. Wetshelo akɔna wakokaso nkondja oma l’ɛnyɛlɔ ka nkumekanga Davidɛ?

¹² L’Ɔtɛkɛta wa Nzambi, sho tanaka bɛnyɛlɔ efula di’apami la wamato waki la kɔlamelo diasunganaso mbokoya kaanga mbakiwɔ komonga kokele. (Hɛb. 6:12) Ohokanyiya ɛnyɛlɔ ka nkumekanga Davidɛ, lele Jehowa akawelɛ ɔnɛ: “Pami kangɛnyangɛnya otema ami,” kana lo ndjela ekadimwelo kekina ka Bible “onto laleka ngɛnyangɛnyami.” (Ets. 13:22) Koko, Davidɛ komonga kokele. Lo mɛtɛ, nde akasale munga mɔtshi ya weke. Kaanga mbakidiɔ ngasɔ, nde ekɔ ɛnyɛlɔ ka dimɛna leso. Lande na? Nɛ dia etena kakandahokɔma, nde kombisha tɛkɛ nɛndɛ. Koko, nde aketawɔ alako wa wolo wakandalongola ndo nde akayatshumoya l’otema ɔtɔi lo kɛnɛ kakandasale. Etombelo waki la dui sɔ ele, Jehowa akodimanyiya.​—Os. 51:3, 4, 10-12.

¹³ Sho koka nkondja wetshelo oma le Davidɛ lo ndjambola ɔnɛ: ‘Ngande watomosalaka etena katowombishaka alako? Onde dimi mbetawɔka munga yami esadi eto, ko kana dimi mbishaka tɛkɛ nɛndɛ? Onde dimi mɛndjaka anto akina onongo? Onde dimi salaka la wolo di’aha kalolɛ munga yami?’ Wɛ koka ndjambola ambola wa woho akɔ waamɛ etena kadiayɛ awui wendana l’apami la wamato akina waki la kɔlamelo watɛkɛtama lo Bible. Onde vɔ wakahomana l’ekakatanu wafɔna la wele layɛ? Naa waonga w’amɛna wakawakɛnɛmɔla? Lo dikambo la dikambo yambola ɔnɛ: ‘Ngande wakokami nyomoleka monga oko okambi wa Jehowa wele la kɔlamelo ɔnɛ?’

14. Wahɔ akɔna wakokaso nkondja lo nsɛdingola bɛnyɛlɔ di’asekaso ambetawudi?

¹⁴ Sho koka nkondja wahɔ nto lo nsɛdingola asekaso ambetawudi, oyadi akɛnda kana  epalanga. Ɛnyɛlɔ, shi wɛ koka nkanyiya dikambo di’ose etshumanelo kanyu ɔmɔtshi lakikɛ ohemba ɔmɔtshi la kɔlamelo tshɛ, ondo shɛngiya y’oma le asekande, ɔlɔshamelo oma le nkumbo, kana yoonge ya kɔlɔ? Onde wɛ mɛnaka le onto ɔsɔ waonga w’amɛna wakokayɛ nkɛnɛmɔla lo yɛdikɔ y’efula? Lo nsɛdingola ɛnyɛlɔ kande dimɛna, wɛ koka mbeka toho takokayɛ mbikikɛ ehemba ayɛ. Ande lowando lele laso dia monga la bɛnyɛlɔ diasɛna ngasɔ dia mbetawɔ diakokaso mbokoya diele kiɔkɔ y’ɔngɛnɔngɛnɔ lee!​—Hɛb. 13:7; Jak. 1:2, 3.

15. Dako diakɔna diakasha ɔpɔstɔlɔ Pɔɔlɔ diakoka tokimanyiya dia ntetemala monga l’ɔngɛnɔngɛnɔ l’olimu wakambɛso Jehowa?

¹⁵ Dia nkimanyiya dia wɔladi ndo kaamɛ monga l’etshumanelo, ɔmɔmɔ la l’atei aso pombaka nkimɔ kɛnɛ koleki ɔlɔlɔ le nde. Tɔsɛdingole ɛnyɛlɔ k’Akristo wa lo ntambe ka ntondo. Vɔ waki la losha ndo l’ɛkɛndɛ wotshikitanyi. (1 Kɔr. 12:4, 7-11) Koko ɔsɔ komonga kiɔkɔ y’ɔsɛmanelo ndo ya diatɔnelo lam’asawɔ. Diakɔ diele, Pɔɔlɔ akakeketsha onto l’onto dia nsala kɛnɛ kahombama dia “mbika demba dia Kristo.” Pɔɔlɔ akafundɛ ase Ɛfɛsɔ ate: “Etena kakamba etenyi ka demba tshɛ olimu atɔ dimɛna, dui sɔ kimanyiyaka dia demba mbola etena kayahikadiɔ lo ngandji.” (Ɛf. 4:1-3, 11, 12, 16) Anto wakasale dui sɔ wakakimanyiya dia wɔladi ndo kaamɛ monga, wɔladi wɛnaso ndo lo tshumanelo diaso ɛlɔ kɛnɛ.

16. Kakɔna kahombaso ndjashikikɛ dia nsala? (Hɛbɛru 6:10)

¹⁶ Yashikikɛ dia mbewɔ ndjaɛdika l’anto akina. Lo dihole dia nsala ngasɔ, nkondja wetshelo oma le Yeso ndo nsala la wolo dia mbokoya waonga ande. Kondja wahɔ oma lo bɛnyɛlɔ dia lo Bible ndo di’anto wa nshi yaso nyɛ wele la mbetawɔ. Naka wɛ ntetemala nsala kɛnɛ koleki ɔlɔlɔ, kete onga l’eshikikelo dia Jehowa “keema kɔlɔ dia nde mbohɛ olimu [ayɛ].” (Adia Hɛbɛru 6:10.) Ntetemala ngɛnangɛna olimu wakambɛyɛ Jehowa, lo mbeya dia nde ngɛnangɛnaka welo wadjayɛ l’otema ɔtɔi dia mbɔngɛnyangɛnya.