1. Kumbi ndi vinthu wuli vo vichitiska kuti tikondwengi ukongwa?

 YEHOVA wakhumba kuti tikondwengi. Tiziŵa venivi chifukwa chakuti likondwa ndimoza mwa mijalidu yo mzimu utuzga. (Aga. 5:22) Chifukwa chakuti kupaska kuchitiska kuti munthu wakondwengi ukongwa kuluska kulonde, tikondwa ukongwa asani tifwiyapu kupharazga kweniso asani titovya abali ndi azichi ŵidu mu nthowa zakupambanapambana.—Machi. 20:35.

2-3. (a) Mwakukoliyana ndi Agalatiya 6:4, kumbi ndi vinthu viŵi nivi vo vingatiwovya kuti tilutirizgi kukondwa pakuteŵete Yehova? (b) Kumbi tikambiskanengenji mu nkhani iyi?

² Mwakukoliyana ndi Agalatiya 6:4, wakutumika Paulo wanguzumbuwa vinthu viŵi vo vingatiwovya kuti tilutirizgengi kukondwa. (Ŵerengani.) Chakwamba, titenere kumupaska Yehova vinthu vidu vamampha ukongwa. Asani titimupaska vinthu vidu vamampha ukongwa, titenere kukondwa. (Mate. 22:36-38) Chachiŵi, tingajiyeruzgiyanga ndi anyidu cha. Kwali tifiska kuchitanji chifukwa cha nthazi zidu, masambiru pamwenga malusu, titenere kuwonga Yehova. Ndipu vosi vo tenavu, tikuchita kupaskika ndi iyu. Kweni asani anyaki achita umampha pa vigaŵa vinyaki va uteŵeti kuphara isi, tikondwengi kuti agwiriskiya ntchitu malusu ngawu kuti athamiki Yehova, ndipu achita venivi kuti atiluski cha pamwenga chifukwa cha mbunu. Mwaviyo, mumalu mwakupharizgana nawu, tisambirengi kwaku yiwu.

³ Mu nkhani iyi, tiwonengi vo vingatiwovya asani tiwona kuti titondeka kuchita vinandi pakuteŵete Yehova. Tiwonengi so mo tingagwiriskiya ntchitu umampha mphasu yeyosi yo tenayu, kweniso vo tingasambira ku ŵanthu anyaki.

4. Kumbi ndi vinthu wuli vo vingachitiska kuti munthu wagongoŵi? Kambani chakuwoniyapu.

⁴ Anyaki aku isi, titondeka kuchita vinandi pa kuteŵete Yehova chifukwa cha kukota pamwenga kutama ndipu venivi vititigongowesa. Venivi ndivu vinguchitikiya Carol. Nyengu yinyaki iyu wapharazganga ko kwakhumbikanga apharazgi anandi. Pa nyengu yo, iyu wachitisanga masambiru nga Bayibolu 35 ndipu wanguwovya ŵanthu anandi kujipereka kwaku Yehova kweniso kubatizika. Yapa Carol vinthu vamuyendiyanga umampha ukongwa mu uteŵeti! Kweni pavuli paki, Carol wangutama ukongwa ndipu kanandi wajanga ŵaka panyumba. Iyu wanguti: “Ndiziŵa kuti chifukwa chakutama nditondeka kuchita vo ŵanthu anyaki achita kweni ndiwona kuti nde wakugomezgeka cha nge yiwu. Ndingafiska cha vosi vo ndikhumba kuchita ndipu venivi vitindigongowesa.” Carol wakhumba kuchitiya Yehova vosi vo wangafiska. Kukamba uneneska, venivi vakukondwesa ukongwa! Tingasimikiza kuti Chiuta widu walisungu, wakondwa chifukwa cha vo Carol wafiska kuchita.

5. (a) Kumbi tikhumbika kukumbukanji asani tiguŵa chifukwa chakuti titondeka kuchita vinandi? (b) Mwakukoliyana ndi vithuzi, kumbi mubali walutirizga wuli kuchita vo wangafiska pakuteŵete Yehova?

⁵ Asani nyengu zinyaki muguŵa chifukwa chakuti mutondeka kuchita vinandi, jifumbeni kuti, ‘Kumbi Yehova wakhumbanji kwaku ini?’ Yehova wakhumba kuti muchiti vo mungafiska, mwakukoliyana ndi mo vinthu viliri pa umoyu winu pasonu panu. Ŵanaŵaniyani chakuchitika ichi: Mzichi wa vyaka 80 waguŵa chifukwa chakuti wachita vinandi cha mu uteŵeti nge mo wachitiyanga pa nyengu yo wenga ndi vyaka 40. Iyu waŵanaŵana kuti chinanga kuti watesesa kuchita vo wangafiska, kweni vitimukondwesa cha Yehova. Kweni kumbi venivi vauneneska? Aŵanaŵaniyani ŵaka, asani mzichi mwenuyu wayesesanga kumupaska vinthu vamampha Yehova pa nyengu yo wenga ndi vyaka 40, ndipu sonu walutirizga kumupaska mbwenu vamampha Yehova pa nyengu yo we ndi vyaka 80, ndikuti iyu wakuleka cha kumupaska vamampha Yehova. Asani tayamba kuŵanaŵana kuti tichita vinandi cha kuti tikondwesi Yehova, titenere kukumbuka kuti Yehova ndiyu waziŵa vo tingachita kuti timukondwesi. Asani titesesa kuchita vo tingafiska, Yehova watikambiyengi kuti: “Wachita umampha ukongwa.”—Yeruzgiyani ndi Mateyu 25:20-23.

6. Kumbi tingasambiranji kwaku Maria?

⁶ Tingasuzgika cha kukondwa asani tiŵika maŵanaŵanu pa vo tingafiska kuchita, mumalu mwakuŵika maŵanaŵanu pa vo tingatondeka kuchita. Tiyeni tikambiskani va mzichi munyaki zina laki Maria, yo watondeka kuchita vinandi mu uteŵeti chifukwa cha kutama. Pakwamba, iyu wakondwanga cha ndipu wajiwonanga kuti ngwambula kukhumbika. Kweni pavuli paki, wanguŵanaŵaniya mzichi munyaki mumpingu, yo kanandi wagona ŵaka pabedi chifukwa chakutama ndipu wanguwona kuti wamuwovyi. Maria wanguti: “Ndingunozga kuti nkhapharazgiyengi nayu limoza mwakugwiriskiya ntchitu foni kweniso kalata. Nyengu yeyosi yo tapharazgiya limoza, ndakondwanga kweniso kukhorwa kuti ndafiska kuwovya munyangu.” Nasi, tingasazgiyaku likondwa lidu asani tiŵika maŵanaŵanu pa vinthu vo tingafiska kuchita mumalu mwakuŵika maŵanaŵanu pa vo tingatondeka kuchita. Kweni wuli asani tichita vinandi pamwenga tichita umampha ukongwa muvigaŵa vinyaki pakuteŵete Yehova?

7. Kumbi wakutumika Peturo wangupereka ulongozgi wakovya nuwu kwa Akhristu?

⁷ Mukalata yaki yakwamba, wakutumika Peturo wanguchiska abali ŵaki kuti agwiriskiyi ntchitu mphasu yeyosi yo ŵenayu kweniso malusu kuti azengi Akhristu anyawu. Peturo wangulemba kuti: “Mwakukoliyana ndi mphasu yo weyosi wakulonde, yigwiriskiyeni ntchitu pakuteŵetiyana nge ateŵeti akuwonere nyumba amampha wo alonde wezi ukulu waku Chiuta.” (1 Petu. 4:10)  Tingalekanga cha kugwiriskiya ntchitu mphasu zidu mwakukwana chifukwa chakopa kuti ŵanthu anyaki angachita sanji pamwenga kuguŵa. Chifukwa asani tingachita viyo, mbwenu titondekengi kumupaska vinthu vamampha ukongwa Yehova.

8. Mwakukoliyana ndi 1 Akorinto 4:6, 7, ntchifukwa wuli tikhumbika cha kujikuzga ndi mphasu zo tenazu?

⁸ Tikhumbika kuzigwiriskiya ntchitu mwakukwana mphasu zidu, kweni titenere kuphwere kuti tileki kujikuzga chifukwa cha mphasu zenizi. (Ŵerengani 1 Akorinto 4:6, 7.) Mwakuyeruzgiyapu, panyaki vitikusuzgani cha kwambisa masambiru nga Bayibolu. Mungalekanga cha kugwiriskiya ntchitu mphasu yeniyi! Kweni chakukhumbika ukongwa ntchakuti mutenere cha kujikuzga chifukwa cha mphasu yo mwenayu. Tiyeruzgiyi kuti pambula kuswera mwakumana ndi vinthu vakukondwesa mu uteŵeti, vo vachitiska kuti muyambisi sambiru la Bayibolu. Mukhumbisiska kukambiyaku kagulu kinu ka uteŵeti vo vachitika. Kweni mwati mwakumana ndi abali ndi azichi a mu kagulu kenaka, mzichi munyaki wakonkhoska vo vamuchitikiya vo vachitiska kuti wagaŵiyi magazini. Iyu wangugaŵiya magazini, penipo yimwi mungwambisa sambiru la Bayibolu. Kumbi muchitengi wuli? Muziŵa kuti kagulu ka uteŵeti kangachiskika ukongwa ndi vo vakuchitikiyani, kweni mungasankha kulindizgapu dankha kuti muzikonkhoski venivi pa nyengu yakwenere, kuti mzichi yo wangugaŵiya magazini waleki kuguŵa. Kuchita viyo, kungalongo kuti mwe ndi lisungu. Kweni mwemosi mo vingaŵiya, mungalekanga cha kwambisa masambiru nga Bayibolu. Mwe ndi mphasu, yigwiriskiyeni ntchitu!

9. Kumbi titenere kuzigwiriskiya wuli ntchitu mphasu zidu?

⁹ Tikumbukengi kuti malusu ngengosi ngo tingaŵa nangu, ndi mphasu zakutuliya kwaku Chiuta. Tigwiriskiyengi ntchitu mphasu zenizi kuchiska mpingu, kuti ŵanthu atiwoni cha. (Afi. 2:3) Asani tigwiriskiya ntchitu nthazi zidu kweniso malusu ngidu kuti tichiti khumbu laku Chiuta, tiŵengi ndi chifukwa chakukondwe, chifukwa chakuti tichita vinandi kuphara anyaki cha pamwenga chifukwa chakuti tichita umampha ukongwa. Kweni chifukwa chakuti tigwiriskiya ntchitu mphasu zidu kuthamika Yehova.

10. Ntchifukwa wuli mbumampha cha kujiyeruzgiya ndi ŵanthu anyaki?

¹⁰ Asani munthu wangaleka kuphwere, wangayamba kuwira muchiŵana chakuyeruzgiya vo iyu wachita umampha ndi vo munyaki wachita umampha cha. Mwakuyeruzgiyapu, mubali wangaŵa kuti wakamba umampha ukongwa nkhani za chisanisani. Yeniyi ndi mphasu yaki. Kweni mumtima, wangayamba kuŵanaŵana kuti wachita umampha ukongwa kuluska mubali munyaki yo watondeka kukamba umampha nkhani. Kweni mubali yo watondeka kukamba umampha ukongwa nkhani, wangaŵa kuti wachita umampha pa  nkhani ya kulonde alendu, kusambiza ŵana ŵaki pamwenga ngwa phamphu mu uteŵeti. Vakukondwesa ukongwa kuti te ndi abali ndi azichi wo ŵe ndi malusu ngakupambanapambana wo agwiriskiya ntchitu mphasu zenizi pakuteŵete Yehova kweniso kovya anyawu!

11. Ntchifukwa wuli titenere kuyesesa kulondo chakuwoniyapu chaku Yesu?

¹¹ Chinanga kuti tikhumbika cha kujiyeruzgiya ndi ŵanthu anyaki, tingasambira vinandi kwa ateŵeti anyaki aku Yehova. Yesu ntchakuwoniyapu chamampha ukongwa kwaku isi. Chinanga kuti wenga wakufikapu, kweni tingasambira vinandi pa mijalidu yaki yamampha kweniso vinthu vo wanguchita. (1 Petu. 2:21) Asani tichita vosi vo tingafiska kuti tilondo chakuwoniyapu chaki mwakugomezgeka, tingaja ateŵeti amampha aku Yehova ndipuso tingachita umampha ukongwa mu uteŵeti.

12-13. Kumbi tingasambiranji kwa Fumu Davidi?

¹² Mu Mazu ngaku Chiuta, mwe vakuwoniyapu vinandi va anthulumi ndi anthukazi akugomezgeka wo tingaŵayezga chinanga kuti ŵenga ambula kufikapu. (Ahe. 6:12) Ŵanaŵaniyani va Fumu Davidi yo Yehova wangumudana kuti “munthu wakukoliyana ndi mtima wangu” pamwenga nge mo Mabayibolu nganyaki ngakambiya kuti, “munthu yo watindikondwesa ukongwa.” (Machi. 13:22) Kweni Davidi wenga wambula kufikapu. Mwakuti wanguchita maubudi nganyaki ngakulungakulu. Chinanga kuti venga viyo, iyu ntchakuwoniyapu chamampha kwaku isi. Chifukwa wuli? Chifukwa wati wachenyeka wangupereka vifukwa vakujigowoke cha. Mumalu mwaki, wanguzomera ulongozgi wanthazi wo wangupaskika ndipu wangujivwiya lisungu chifukwa cha vo wanguchita. Mwaviyo, Yehova wangumugowoke.—Salimo 51:3, 4, 10-12.

¹³ Tingasambira kwaku Davidi mwakujifumba kuti: ‘Kumbi ndichita wuli asani ndapaskika ulongozgi? Kumbi ndizomera mwaliŵi vo ndanangisa pamwenga nditijiŵikiya kuvuli? Kumbi nditanja kumba mulandu ŵanthu anyaki? Kumbi ndiyesesa kuleka kuwerezapu so vo ndikunangisa?’ Mungajifumba mafumbu nge ngenanga asani muŵerenga nkhani za anthulumi ndi anthukazi anyaki akugomezgeka wo akulembeka mu Bayibolu. Kumbi yiwu angukumana ndi masuzgu nge nginu? Kumbi ndi mijalidu yamampha niyi yo angulongo? Pa nkhani yeyosi jifumbeni kuti: ‘Kumbi ndingachita wuli kuti ndije nge mteŵeti wakugomezgeka mwenuyu?’

14. Kumbi tingayanduwa wuli asani tisambira kwa Akhristu anyidu?

¹⁴ Tingayanduwa so asani tisambira kwa Akhristu anyidu, achinyamata kweniso arara. Mwakuyeruzgiyapu, kumbi mungaŵanaŵaniya munthu munyaki mumpingu winu yo wakunthiyapu mayeseru, nge kuchichizgika ndi anyaki kuti wachiti  vinthu viheni, kususkika ndi ŵanthu a mu banja laki, pamwenga kutama? Kumbi muwona mijalidu yamampha mwaku iyu, yo namwi mungayanja kuja nayu? Asani muŵanaŵaniya chakuwoniyapu chaki chamampha, mungasambira nthowa zinandi zo zingakuwovyani kuti mukunthiyepu mayeseru ngo mukumana nangu. Tiwonga ukongwa kuti te ndi abali ndi azichi akugomezgeka ŵenaŵa wo tingaŵayezga ndipu atitichitiska kuti tikondwengi!—Ahe. 13:7; Yako. 1:2, 3.

15. Kumbi wakutumika Paulo wangupereka ulongozgi wuli wo ungatiwovya kuti tilutirizgi kukondwa po titeŵete Yehova?

¹⁵ Kuti tichiskengi chimangu kweniso kukoliyana mumpingu, weyosi waku isi, wakhumbika kupaska Yehova vinthu vamampha vo wangafiska. Tiyeni tikambiskani va Akhristu a mu nyengu ya akutumika. Yiwu ŵenga ndi mphasu kweniso mauteŵeti ngakupambanapambana. (1 Akori. 12:4,7-11) Kweni venivi vinguchitiska kuti achitengi vinthu mwamaphara cha pamwenga kugaŵikana. Mumalu mwaki, Paulo wanguŵachiska kuti agwiriskiyi ntchitu mphasu zenizi kuti “azengi liŵavu laku Khristu.” Paulo wangulembe Akhristu aku Aefeso kuti: “Asani chiŵalu chechosi chigwira umampha ntchitu, vitovya kuti liŵavu likuwi lichijizenga lija mu chanju.” (Aefe. 4:1-3, 11, 12, 16) Akhristu wo anguchita vo Paulo wangukamba, anguwovya kuti paŵi chimangu kweniso kukoliyana, mijalidu yo tiwona mumipingu yidu mazuŵa nganu.

16. Kumbi titenere kusimikiza mtima kuchitanji? (Aheberi 6:10)

¹⁶ Simikizani mtima kuti mujiyeruzgiyengi cha ndi ŵanthu anyaki. Mumalu mwaki, sambirani kwaku Yesu ndipu yesesani kuyezga mijalidu yaki. Muyanduwengi ndi vakuwoniyapu va ŵanthu wo azumbulika mu Bayibolu kweniso va ateŵeti akugomezgeka a mazuŵa nganu. Po mulutirizga kuchita vosi vo mungafiska, simikizani kuti Yehova “ngwambula urunji cha kuti wangaluwa ntchitu yinu.” (Ŵerengani Aheberi 6:10.) Lutirizgani kukondwa po muteŵete Yehova ndipu ziŵani kuti iyu wawonga ukongwa mtima winu wakujipereka kuti mumukondwesi.