1. Ginani gi hi ningago gutsaka nya gukhongolo?

 JEHOVHA o vbweta gu khuye hi tsaka. Ethu ha guti esi kholu litsako la gu gira gipandre nya mihandro nya liphuvbo laye nya guage. (Gal. 5:22) Kha nga si tsakisago gu ninga guvbindra gu hakha, ethu hi ngu tsaka ngudzu tepo hi thumago thumoni nyo tshumayele hi bwe hi phasa vandriyathu khu dzindziya nya gu hambanehambane. — Mith. 20:35.

2-3. a) Kha nga si yeyedzwago umo ga Vagalatiya 6:4, khu sevbini silo sivili si na hi phasago gu simama na hi tsakide thumoni ga Jehovha? b) Ginani hi na bhulago khigyo avba nya ndrima yeyi?

² Kha nga si yeyedzwago umo ga Vagalatiya 6:4, mupostoli Pawulo ganede khu silo sivili si na hi phasago gu simama na hi tsakide. (Leri.) Nyo pheye, hi yede gu ninga Jehovha esi hi si kodzago. Ha gu ninga Jehovha esi hi si kodzago ethu hi na tsaka. (Mat. 22:36-38) Nya wuvili, hi yede gu potsa gu dzi fananisa ni vambe. Ni gevbini hi gi kodzago gu gira khu kotani nya mawugelo yathu, trenamento hi ningidwego mwendro makodzelo hi yede gu bonga Jehovha. Nigu satshavbo hi gu naso khuye a nga hi ninga. Ganiolu, a ba ri gu vambe va ngu dugeleya thumoni nyo tshumayele gu hi vbindra, hi yede gu tsaka kholu va thumisago makodzelo yawe gasi gu rungudza Jehovha nasiri gu ma thumisa gasi gu dzi yeyedza. Khu kharato, wulangani nya gu palisani navo hi yede gu hevbula khavo.

³ Avba nya ndrima yeyi, hi na wona egi gi nga hi phasago tepo hi dzipwago na hi gu vbeya tshivba khu kotani nya gu mba kodza  gu gira satshavbo hi si vbwetago thumoni gwathu. Hi na wona gambe edzi hi nga thumisago khidzo makodzelo adzina hi gu nawo, ni egi hi nga gi hevbulago khu siyeyedzo sa vambe.

4. Ginani gi nga girago vambe gwathu va vbeya tshivba? Ninga giyeyedzo.

⁴ Vambe vbakari gwathu kha va si kodzi gu gira satshavbo va nga ba va si vbweta thumoni ga Jehovha khu kotani nya madwali mwendro gu dandra khu tanga, nigu esi si ngu va gira va vbeya tshivba. Esi khiso si dugeledego Carol. Uye a di gu tala gu tshumayela ga malanga ma vbwetago giphaso. Ndrani nya myaga yoyo, uye gimbidziside 35 sihevbuli nya Bhibhiliya nigu phaside vathu nya vangi gu hendzeledza womi wawe va bwe va bhabhatiswa. Carol a di gu dugeleya thumoni nyo tshumayele! Khavbovbo, uye a di dwala ngudzu nigu si lombide gu a khala ndrangani khu tepo nyo laphe. Carol wari khuye: “Eni nyi ngu dziti gu kheni khu kotani nya madwali kha nyi si kodzi gu gira esi nyi si vbwetago, ganiolu nyo dzipwa gu khatshi kha nyiri Mukristo nya wadi gu fana navo. Kha nyi si kodzi gu gira satshavbo nyi si vbwetago, nigu esi si ngu nyi gira nyi vbeya tshivba.” Carol a gu vbweta gu gireya Jehovha satshavbo a si vbwetago. Khu lisine isoso si ngu zundzega. Hi nga tiyisega gu khethu Nungungulu wathu a gu na ni pweya-wusiwana a ngu tsaka khu satshavbo a si kodzago gu gira.

5. a) Ginani hi yedego gu gi dundruga a ba ri gu ha gu vbeya tshivba khu kotani nya olu hi gu mba si kodza gu gira satshavbo hi si vbwetago? b) Kha nga hi si wonago avba nya dzifotu, ndriyathu a gu simama kharini gu gira esi a si kodzago thumoni ga Jehovha?

⁵ Abari gu dzimbe dzitepo u ngu vbeya tshivba khu kotani nya gu hegedwe u gu nago, dzi wudzise gu khuwe: ‘Jehovha o vbweta gu khuye nyi gira ginani?’ Uye o vbweta gu khuye u gira satshavbo u si kodzago ndrani nya giemo u gomogo ga igyo. Nga wona giyeyedzo gegi: Ndriyathu nya nyamayi a gu na ni 80 myaga a gu vbeya tshivba kholu kha si kodzi gu gira nya singi thumoni nyo tshumayele nga edzi a nga ba a gira khidzo tepo a nga ba ari ni 40 myaga. Uye a gu pimisa gu khuye ambari olu a girago satshavbo a si kodzago iso kha si tsakisi Jehovha. Ina isoso kamo lisine? Ahihi. Abari gu ndriyathu yoyu nya nyamayi giride satshavbo a nga ba a si kodza tepo a nga ba a ri ni 40 myaga nigu a ngo simama gu gira satshavbo a si kodzago olu a gu na ni 80 myaga, uye gima kha ema gu gira satshavbo a si kodzago. Ha gu pheya gu dzipwa gu khethu thumo hi girago kha wu eneyi gasi gu tsakisa Jehovha, hi yede gu dundruga gu khethu Jehovha khuye a hathago esi si mu tsakisago. Ha gu gira satshavbo hi si kodzago, Jehovha a na hi embeya khuye: “U thumide!” — Fananisa ni Matewu 25:20-23.

6. Ginani hi nga gi hevbulago khu giyeyedzo gya Maria?

⁶ Si na hi vbevbugeya gu tsaka ha gu vega gupima avba nya esi hi si kodzago gu gira, wulangani nya esi hi gu mba si kodza gu gira. Wona giyeyedzo gya ndriyathu moyo nyo pwani khu Maria, oyu a nga ba a tshaniswa khu madwali ma nga ba ma mu gira a si giri nya singi thumoni ga Jehovha. Uye gupheyani a di vbeya tshivba a bwe a dzipwa na si phasi gilo. Ganiolu, tepo a nga tugula ndriyathu moyo nya nyamayi libandlani a nga ba a dwala ngudzu nyo bwe a si duge khu drangani, uye a di hunga gu mu phasa. Maria wari khuye: “Nyi di gira malulamiselo nya gu tshumayele naye khu telefoni ni malangaliya. Tepo yatshavbo hi nga ba hi thuma hatshavbo, nyi di gu hongola gaya na nyi tsakide khu gu ba nyi phaside ndriyangu.” Anethu hi nga tsaka khu gu hi vega gupima avba nya esi hi si kodzago gu gira wulangani nya esi hi gu mba si kodza gu gira. Ganiolu, ahati ha gu ba hi ri ni makodzelo nya gu gire gwadi gilo nyo khaguri thumoni ga Jehovha ke?

7. Wusingalagadzi muni owu mupostoli Pedro a ningedego Makristo?

⁷ Avba nya lidangaliya laye nyo pheye, mupostoli Pedro gengedzide vandriyaye gu khuye ni gevbini giningwa va gu nagyo va yede gu gi thumisa gasi gu tiyisa vandriyawe. Pedro lovide gu khuye: “Khalani vagimbidzisi nya vadi nya siningwa mu hakhidego ga Nungungulu. Muthu ni muthu a na thumise giningwa gyaye afela gu phasa vakwawe.” (1 Ped. 4:10) Kha hi yeli gu diga gu thumisa siningwa sathu khu gu khethu vambe va ngapwa lidiwo mwendro gu vbeya tshivba. Kholu ha gu gira isoso, kha hi na nga gireya Jehovha esi hi si kodzago.

8. Guya khu 1 Vakorinto 4:6, 7, khu ginani hi yedego gu potsa gu dzi khusedza khu siningwa sathu?

⁸ Gu vbwetega hi thumisa siningwa sathu, ganiolu hi yede gu dzi woneya gasi hi si dzi khusedzi khiso. (Leri 1 Vakorinto 4:6, 7.) Khu giyeyedzo, adzina u na ni makodzelo nya gu pheye sihevbuli nya Bhibhiliya. U yede gu gi thumisa giningwa gyogyo. Ganiolu, si na ni lisima gu dundruga gu khuwe kha wu yeli gu dzi khusedza khu giningwa u gu nagyo. Hongole hi khethu u manide matshango nyo tsakise thumoni nyo tshumayele nigu u phede gihevbulo nya Bhibhiliya. U lambede ngudzu gu bhuleya matshango yago tsawa wago, ganiolu tepo u mananago ni tsawa wa gu ya mana gu khuwe ndriyathu moyo nya nyamayi a gu bhuleya tsawa gu khuye si kodzide gu ningeya revhista thumoni nyo tshumayele. Uye a di ningeya revhista basi, ganiolu uwe u di pheya gihevbulo nya Bhibhiliya. Ginani u na girago? Uwe u ngu dziti gu khuwe tsawa wu na tiyiswa khu matshango yago, ganiolu wa gu hunga gu vireya yimbe tepo gasi gu va bhuleya kholu kha wu vbweti gu khuwe ndriyathu wule a pimisa gu khuye kha dugeleya thumoni nyo tshumayele. Gu gira isoso si na ba siri sadi ngudzu. Ganiolu, u nga digi gu tula sihevbulo nya Bhibhiliya. Thumisa giningwa u gu nagyo!

9. Hi yede gu si thumisa kharini siningwa sathu?

⁹ Hongoleni hi dundrugani gu khethu yatshavbo makodzelo hi gu nawo hi di ningwa khu Nungungulu. Ethu hi yede gu thumisa siningwa soso gasi gu tiyisa libandla nasiri gu vbweta gu dzi yeyedza khiso. (Filp. 2:3) Ha gu thumisa tshivba yathu ni makodzelo yathu gasi gu gira gugola ga Nungungulu, hi na mana sighelo nyo tsake nasiri khu gu ba hi gira silo guvbindra vambe, ganiolu khu gu ba hi thumisa siningwa sathu gasi gu tsakisa Jehovha.

10. Khu ginani hi si yeligo gu dzi fananisa ni vambe?

¹⁰ Muthu nyo khaguri a gu mba dzi woneya si nga gira a pheya gu dzi fananisa ni vambe khesi  a si kodzago gu gira ni esi vambe va gu mba si kodza gu gira. Khu giyeyedzo, adzina ndriyathu yoyo a ngu kodza gu vega gwadi dziganelo dza guagani nigu uye a ngu dugeleya gwadi avba nya gipandre gegi. Nigu monyoni gwaye si nga gira a pheya gu kanyisa ndriyathu a si kodzigo gu vega gwadi dziganelo. Ganiolu, si nga gira ndriyathu yoyo a mu kanyisago na gu kodza gu yeyedza wuwadi, na gu kodza gu hevbudza sanana saye a bwe a thuma khu sighingi thumoni nyo tshumayele. Hi ngu bonga ngudzu khu gu manega ni vandriyathu va thumisago makodzelo yawe gasi gu phasa vandriyathu ni gu thumeya Jehovha.

11. Khu ginani hi yedego gu zama gu pimedzeya giyeyedzo gya Jesu?

¹¹ Ambari olu hi si yeligo gu dzi fananisa ni vambe, hi nga hevbula nya singi khu sithumi sa Jehovha. Giyeyedzo nya gyadi hi nga hevbulago khigyo, khu Jesu. Ethu kha ha vbeleya gu fana naye, ganiolu hi nga hevbula nya singi khu makhalelo yaye nya yadi ni silo nya sadi a giridego. (1 Ped. 2:21) Ha gu pimedzeya giyeyedzo gyaye khavba hi si kodzago khavbo hi na khala sithumi nya sadi sa Jehovha nigu hi na dugeleya thumoni nyo tshumayele.

12-13. Ginani egi Pfhumu Dhavhidhe a giridego tepo a ningidwego wusingalagadzi, nigu ginani hi nga gi hevbulago khu giyeyedzo gyaye?

¹² Omu nya Lito la Nungungulu gu na ni siyeyedzo nya vama ni vanyamayi nyo tumbege hi nga si pimedzeyago ambari olu va nga mba vbeleya. (Hebh. 6:12) Nga dundrugeya khu Pfhumu Dhavhidhe, oyu Jehovha a mu ranidego khuye “mwamana a tsakisago monyo wangu.” (Mith. 13:22) Ambari olu a giridego sihoso nya singi, uye giyeyedzo nya gyadi gwathu. Khu ginani? Kholu tepo a nga kawukwa, uye kha zama gu dzi emeleya. Wulangani nya isoso, uye dzumede wusingalagadzi a ningidwego a bwe a dzi laya khesi a giridego. Kha nga handro wakone, Jehovha mu divalede. — Ndzi. 51:3, 4, 10-12.

¹³ Hi nga hevbula khu giyeyedzo gya Dhavhidhe khu gu dzi gira siwudziso sesi: ‘Nyo hakha kharini wusingalagadzi? Ina nyi ngu dzumeya sihoso sangu mwendro nyo zama gu dzi emeleya? Ina nyi ngu vbiredzeya gu ninga nandru vambe? Ina nyi ngu zama gu mba gira sihoso sasimweso?’ U nga dzi gira siwudziso sasimweso tepo u hevbulago omu nya Bhibhiliya maningano ni simbe sithumi nyo tumbege sa Nungungulu. Ina avo va tshanganide ni sigaradzo nyo fane ni iso sago? Khu yavbini makhalelo va nga ba vari nawo ma va phasidego gu pala sigaradzo sawe? Ga giemo ni giemo, dzi wudzise khuwe:  ‘Nyi nga pimedzeya kharini siyeyedzo nya sithumi sesi nyo tumbege?’

14. Hi nga phasega kharini khu gu pimedzeya siyeyedzo sa vandriyathu?

¹⁴ Hi nga phasega gambe khu gu hevbula khu giyeyedzo nya vaphya ni vandriyathu va dandridego khu tanga. Khu giyeyedzo, ina u ngu dundrugeya khu muthu nyo khaguri libandlani a emisanago ni guwugedwa xikwatunu, ndrangani mwendro a tshaniswago khu madwali? Ina ndriyathu yoyo na ni makhalelo u dogoreyago gu ma pimedzeya? Khu gu pimedzeya giyeyedzo gyaye u na mana dzindziya nya dzadi nyo timiseye gigaradzo gyago. Hi ngu tsaka ngudzu ni gu bonga kholu hi gu na ni siyeyedzo nya sadi nyo si pimedzeye. — Hebh. 13:7; Jak. 1:2, 3.

15. Khu wevbini wusingalagadzi owu mupostoli Pawulo a wu ningedego wu nga hi phasago gu simama na hi tsakide thumoni gwathu ga Jehovha?

¹⁵ Gasi gu andrisa gurula ni gu pwanana libandlani, moyo ni moyo wathu yede gu dzi garadza. Nga wona esi si dugeledego Makristo ya lizana myaga nyo pheye. Ayo ma diri ni siningwa ni mithumo nyo hambanehambane. (1 Kor. 12:4, 7-11) Ganiolu, isoso kha sa va gira va palisana. Pawulo va kutside gu khuye va di yede gu “vbaha ni gu dandrisa givili gya Kristo khu gukhodwa.” Pawulo lovede Makristo ya Efeso, khuye: “Givbango ni givbango gya gu thuma thumo gi fanedego, guphasega givili gyatshavbo, gi dandra khu maningano lihaladzoni.” (Efes. 4:1-3, 11, 12, 16) Avo va giridego esi Pawulo a nga ganeya va andriside gurula ni gu pwanana, a gu esi hi si wonago mabandlani muhuno.

16. Ginani hi yedego gu dzi emiseya gu gira? (Vahebheru 6:10)

¹⁶ Dzi emiseye gu potsa gu dzi fananisa ni vambe. Wulangani nyo gire isoso, hevbula khu giyeyedzo gya Jesu u bwe u pimedzeya makhalelo yaye. Hevbula khu siyeyedzo si gomogo omu nya Bhibhiliya ni siyeyedzo nya gukhodwe sa matshigoni yathu. Wa gu simama gu gira satshavbo u si kodzago, tiyisega gu khuwe Jehovha “kha divaledwi khu thumo [u wu] giridego.” (Leri Vahebheru 6:10.) Simama gu tsaka khu gu thumeya Jehovha na wu gu dziti gu khuwe uye a ngu tsaka khu gu wona gudzigaradza u gu girago gasi gu mu tsakisa.