1. Niinzi zipa kuti tubotelwe?

 JEHOVA uyanda kuti tubotelwe. Tulizizi eezi nkaambo kubotelwa muchelo wamuuya uusalala. (Gal. 5:22) Mbukunga kupa bamwi kupa kuti tubotelwe, nkinkaako tulabotelwa chiindi nituli mumulimu wakukambawuka anitugwasya bakombima munzila zisiyene-siyene.—Mil. 20:35.

2-3. (a) Kweendelana alugwalo lwa Bagalatiya 6:4, nziizili zintu zibili zikonzya kutugwasya kuti tukkale katubotelwa mumulimu waJehova? (b) Tulalanga-langaanzi muchiiyo eechi?

² Mulugwalo lwa Bagalatiya 6:4, mwaapostolo Pawulu wakaambuula atala azintu zibili zikonzya kutugwasya kuti tukkale katubotelwa. (Bala.) Chakusaanguna, tweelede kuchita zyoonse nzitukonzya mumulimu waJehova. Kuti twachita zyoonse nzitukonzya tulabotelwa. (Mt. 22:36-38) Chachibili, tatweelede kulyeezyanisya aabamwi pe. Kuti katukonzya kuchita zimwi zintu akaambo kakuti twakaziyiila biya, tulisimide naakuti akaambo kakuti tuli aachipo, tweelede kulumba Jehova nkaambo nguwe ulikupa kuti tukonzye kuchita zintu nzizeezyo. Kuli lumwi lubazu, kuti bamwi kabazwidilila mumulimu wakukambawuka, tatweelede kubonaanga bachita oobo akaambo kakuti ngabayanda kulisumpula naakuti bayanda kubonenenwa pesi tweelede kubotelwa nkaambo ngabalikubelesya zipo zyabo kuti batembawule Jehova. Tweelede kwiiya kuzwa kuli mbabo kutali kuti tulyeezyanisye aambabo.

³ Muchiiyo eechi, tulabona zikonzya kutugwasya kuti twamana manguzu akaambo kakuti tatuchikonzyi pe kuchita zyiingi. Alubo tulabona mbutukonzya kubelesya zipo zyesu anzitwiiya kuzwa kuzikozyano zyabamwi.

4. Niinzi zikonzya kupa kuti tumane manguzu? Amba chikozyano.

⁴ Bamwi bakombi baJehova tabachikonzyi pe kuchita zyiingi mumulimu wakwe akaambo kakuchembaala alubo eezi ngazyabamana manguzu. Eezi nzizyo zyakachitikila muchizi uutegwa Carol. Aali chimwi chiindi, wakali kugwasilizya kubusena buyanda basikupupulula biingi. Aachiindi eecho, wakali kuchitisya zyiiyo zyaBbayibbele zili 35 alubo wakagwasya bantu biingi kuti balipede kuli Jehova akubbabbatizigwa. Carol wakali kuzwidilila loko mumulimu wakukambawuka. Pesi wakazoochiswa loko zyakuti taakachili kukonzya pe kuzwa aang’anda. Carol wakaamba kuti: “Tandichikonzyi pe kuchita zintu zichitwa aabamwi akaambo kakuti ndilachiswa pesi ndilimvwa kuti tandichisimide pe mubukombi mbuli mbabo. Tandichikonzyi kuchita zintu zyoonse nzindiyanda mumulimu waJehova, eezi zindimana manguzu.” Carol uyanda kuchita zyoonse nzyakonzya mumulimu waJehova. Maboneno aali boobu ayandikana loko. Tulaachoonzyo chakuti Leza wesu silweetelelo ulabotelwa azintu nzyachita.

5. (a) Tweelede kuyeeyaanzi kuti twamana manguzu akaambo kakuti tatuchikonzyi pe kuchita zyiingi? (b) Mbuli mbukutondeezedwe muzifanikisyo, niinzi zitondeezya kuti mukwesu ulikuchita nzyakonzya mumulimu waJehova?

⁵ Kuti kuli kumana manguzu akaambo kakuti tuchikonzyi pe kuchita zyiingi, weelede kuyeeya kuti Jehova uyanda kuti uchite zyoonse nzukonzya kweendelana achiimo chako. Muchikozyano, muchizi uuli aaminyaka iili kuma80 ulakonzya kumana manguzu akaambo kakuti tachikonzyi pe kuchita zyiingi mumulimu wakukambawuka mbuli mbaakali kuchita naakali aaminyaka iili kuma40. Ulakonzya kubonaanga Jehova talikubotelwa pe azintu nzyachita lino nikuba kuti ulikuchita zyoonse nzyakonzya. Nichoonzyo na eechi? Atuyeeye atala azeezi. Kuti muchizi ooyu kali wakali kuchita zyoonse nzyakonzya naakali aaminyaka iili kuma40 alubo kachichita zyoonse nzyakonzya lino kali aaminyaka iili kuma80, eezi zyaamba kuti muchizi ooyu talekede pe kuchita zyoonse nzyakonzya, uchizumanana. Kuti twasaanguna kubonaanga zintu nzituchita tazichimubotezyi pe Jehova, tweelede kuyeeya kuti Jehova nguwe uuzi zintu zimubotezya. Kuti wachita zyoonse nzukonzya, Jehova uyookubuzya kuti: “Wacita kabotu.”—Kozyanisya a Matayo 25:20-23.

6. Twiiyaanzi kuzwa kuchikozyano chaMaria?

⁶ Tulakonzya kubotelwa kuti twabikkila maanu kuzintu nzitukonzya kuchita kutali kuzintu nzitutakonzyi. Atubone chikozyano chaMaria. Maria ulaabulwazi bumukachizya kuti achite zyiingi mumulimu wakukambawuka. Kumasaangunino, wakali kukataazikana alubo wakali kulimvwa katagwasyi. Pesi wakazooyeeya umwi muchizi wamumbungano yakwe uuchiswa zyakuti ulibbizya kalede mpawo Maria wakasala kuti amugwasye. Maria wakati: “Ndakachita mabambe aakuti katukambawuka aamwi katubelesya fooni akulemba magwalo. Chiindi choonse nitubelekaamwi, ngandabotelwa loko alubo ngandakkutisikana nkaambo ngandagwasya mukombima.” Andiswe tulakonzya kubotelwa kuti twabikkila maanu kuzintu nzitukonzya kuchita kutali kuzintu nzitutakonzyi. Pesi niinzi nzitweelede kuchita kuti katukonzya kuchita zyiingi mumulimu waJehova naakuti katuli aachipo chakuchita imwi milimu yabukombi?

7. Ngaali malayilile aagwasya mwaapostolo Petro ngaakalembela maKristu?

⁷ Mulugwalo lwakwe lwakusaanguna, mwaapostolo Petro wakasungwaazya bakombinyina  kuti babelesye zipo zyabo kuti basungwaazye bakombinyina. Wakalemba kuti: “Kweelana acipego umwi aumwi ncaakatambula, amucibelesye mukubelekelana mbuli babanzi babotu baluzyalo lwa Leza.” (1 Pet. 4:10) Tatweelede kuleka kubelesya zipo zyesu katuyoowa kuti bamwi balatuchitila bbivwe naakuti balakonzya kumana manguzu. Kuti twachita oobo, ngatatuli kuchita zyoonse nzitukonzya mumulimu waJehova.

8. Kweendelana alugwalo lwa 1 Bakorinto 4:6, 7, nkamboonzi nituteelede kulisumpula azipo nzitulaazyo?

⁸ Tweelede kubelesya zipo nzitulaazyo pesi tweelede kuchenjelela kuti tutalisumpuli pe azipo eezyo. (Bala 1 Bakorinto 4:6, 7.) Muchikozyano, kulakonzeka kuti ulazwidilila kutalisya zyiiyo zyaBbayibbele. Nkinkaako, toyelede kuleka pe kubelesya chipo eecho. Pesi kulayandikana kuti utalisumpuli pe. Atuteedi ulikubotelwa akaambo kakuti wakasaanguna chiiyo chaBbayibbele nwaakali mumulimu wakukambawuka. Uyanda kuyoobuzya bamwi mbulaabo mukabunga kamulimu wakukambawuka. Nwaaswaanana aabo, umwi muchizi wasaanguna kwaamba atala akuzwidilila nkwaakachita chiindi naakapa umwi muntu magazini. Muchizi ooyo wakapa muntu magazini mpawo iwe wakasaanguna chiiyo chaBbayibbele. Uyoochita biyeni aali boobu? Kulakonzeka kuti ulizi kuti bakwesu abachizi mbulaabo mukabunga kamulimu wakukambawuka bayoosungwaazigwa anzwaakachita pesi ulakonzya kulindila kuti uzoowambe aali chimwi chiindi kuchitila kuti muchizi ooyo wakapa muntu magazini atabonaanga taakwe nzyaakachita pe kuti walyeezyanisya aanzwaakachita. Kuti wachita oobo, nga ulikutondeezya kuti ulikumufwida luzyalo mukombinyokwe. Pesi utaleki pe kuyanduula bantu bakwiiyaabo Bbayibbele nkaambo ulaachipo chakuchita oobo.

9. Tweelede kuzibelesya biyeni zipo zyesu?

⁹ Tweelede kuyeeya kuti, kufumbwa chipo nchitulaacho chakazwa kuli Leza. Nkinkaako, tweelede kubelesya zipo eezi kuti tusungwaazye bakombima kutali kuti tulisumpule. (Flp. 2:3) Kuti twabelesya manguzu eesu azipo nzitulaazyo kuti tuchite kuyanda kwaLeza, tulabotelwa nkaambo ngatwabelesya zipo eezyo kuti tutembawule Jehova kutali kuti tulijanine mpuwo naakuti tutondeezye kuti tulabayinda bamwi.

10. Nkamboonzi nikutali kabotu kuti tulyeezyanisye aabamwi?

¹⁰ Kuti teetwachenjela, tulakonzya kusaanguna kulyeezyanisya aabantu mbitwiinda kuchita  zimwi zintu. Muchikozyano, kulakonzeka kuti umwi mukwesu ulaachipo chakupa nkani zyabantu boonse zinywisya maanzi. Pesi kulakonzeka kuti mumoyo wakwe nga ulikumulangilaansi umwi mukwesu uutakonzyi kupa kabotu nkani. Nikuba boobo, kulakonzeka kuti mukwesu ooyo uutakonzyi kupa kabotu nkani ulipedwe kusangalizya, kuyiisya bana naakuti musungu mumulimu wakukambawuka. Tulabalumba bakwesu bali aazipo zisiyene-siyene alubo babelesya zipo eezyo kuti babelekele Jehova akugwasya bamwi.

11. Nkamboonzi nitweelede kutobelezya chikozyano chaJesu?

¹¹ Tatweelede kulyeezyanisya aabamwi pe pesi tweelede kwiiya kuzwa kuzikozyano zyabo. Umwi ngutukonzya kwiiya kuzwa kuli nguwe nguJesu. Nikuba kuti Jesu wakalimaninide pesi tulakonzya kwiiya kuzwa kubuntu bubotu mbwakalaabo azintu zibotu nzyaakali kuchita. (1 Pet. 2:21) Kuti twabeleka changuzu kuti tutobelezye chikozyano chakwe, tulachita zintu zibotezya Jehova alubo tulachita zyiingi mumulimu wakukambawuka.

12-13. Niinzi nzitukonzya kwiiya kuzwa kuMwaami Davida?

¹² MuJwi lyaLeza muli zikozyano zyiingi zyabaalumi abanakazi basyomeka nzitukonzya kutobelezya nikuba kuti teebakamaninide pe. (Heb. 6:12) Muchikozyano, tulakonzya kwiiya kuzwa kuchikozyano chaMwaami Davida. Jehova wakamwaamba kuti ‘mwaalumi weendelana amoyo wangu.’ (Mil. 13:22) Pesi Davida wakali aachibi. Wakachita zintu zyiingi zitali kabotu. Nikuba boobo, nchikozyano chilikabotu nchitukonzya kutobelezya. Nkamboonzi? Nkaambo chiindi naakalulamikwa, taakayuba aakanwe pe pesi wakatambula lulayo ndwaakapegwa alubo wakalisola akaambo kazibi nzyaakachita. Eezi zyakapa kuti Jehova amulekelele.—Int. 51:3, 4, 10-12.

¹³ Tulakonzya kujana zyiiyo kuzwa kuli Davida kwiinda mukulibuzya mibuzyo iili mbuli yakuti: ‘Ndichita biyeni kuti ndapegwa lulayo? Ndilafwambaana na kubona mpundalubizya naakuti ngandapa zilitamizyo? Ndilabasola na bamwi? Ndileezya na kutayindulula lubo zintu zibi nzindinga ndachita?’ Ulakonzya kulibuzya mibuzyo iili mbuli eeyi chiindi nubala atala abamwi baalumi abanakazi basyomeka baambidwe muBbayibbele. Bakaswaanana aabuyumu-yumu bukozyenie aabwako na? Mbuubuli buntu bubotu mbubakalaabo? Ulakonzya kulibuzya kuti: ‘Ngandilachita biyeni kuti nditobelezye chikozyano chabo?’

14. Nga ulachita biyeni kuti ugwasigwe aazikozyano zyabakombinyokwe?

 ¹⁴ Tulakonzya kwiiya kuzwa kuzikozyano zyabakombima kazitakwe ndaba kuti mbapati na naakuti mbaniini. Muchikozyano, kuli umwi na mumbungano yanu ulikulisimya kubuyumu-yumu mbwaswaananaabo mbuli kuyungwa aabeenzinyina, kukazigwa aabamumpuli naakuti kuchiswa? Kuli zintu zibotu na nzulikubona kumuntu ooyo nzuyanda kutobelezya? Kwiiya kuzwa kuchikozyano chakwe chibotu kulakonzya kukugwasya anduwe kuti ukonzye kulisimya kubuyumu-yumu mbulikuswaana. Tulabalumba bakwesu abachizi aaba akaambo kakutusiila chikozyano chibotu nchitukonzya kutobelezya.—Heb. 13:7; Jak. 1:2, 3.

15. Ngaali malayilile mwaapostolo Pawulu ngaakapa maKristu bakusaanguna aakonzya kutugwasya kuti tukkale katubotelwa mumulimu waJehova?

¹⁵ Kuti mumbungano mube luumuno akuti mube kujatana, umwi awumwi weelede kuchita nzyakonzya. Atubone chikozyano chamaKristu bakusaanguna. MaKristu aaba bakali aazipo zisiyene alubo bakali aamilimu iisiyene njibakali kuchita. (1 Kor. 12:4, 7-11) Eezi taakwe nizyakapa kuti babusye muzundaano naakuti batamvwanani. Pawulu wakabasungwaazya kuti bachite zyoonse zyakali kuyandikana kuti “bayake mubili wa Kristo.” Pawulu wakalembela maKristu bakuEfeso kuti: “Cizo cimwi acimwi nocibeleka kabotu, eeci cipa kuti mubili ukomene mbwaanga ulaliyaka wini muluyando.” (Ef. 4:1-3, 11, 12, 16) Aabo bakachita oobo bakapa kuti mumbungano mube luumuno akuti mube kujatana. Eezi nzizyo zili kuchitika mumbungano zyesu mazubaano.

16. Tweelede kukanza kuchitaanzi? (Bahebrayo 6:10)

¹⁶ Toonse atube aamakanze aakuti tutalyeezyanisyi aabamwi pesi atwiiye kuzwa kuchikozyano chaJesu. Alubo tweezye kuba aabuntu mbwaakalaabo. Yiya kuzwa kuzikozyano zyabakombi baJehova balembedwe muBbayibbele akubakombi bakwe bamazubaano. Kuti wazumanana kuchita oobo, ulaba aachoonzyo chakuti Jehova “tali Leza uutaluleme pe uunga waluba milimo” yako. (Bala Bahebrayo 6:10.) Atuzumanane kubotelwa mumulimu waJehova katuzi kuti anguwe ulabotelwa akumubelekela nkutuchita amoyo woonse.