1. ¿Tuku lu kinkamakgapaxuwayan?

 JEHOVÁ lakaskin pi napaxuwayaw. Katsiyaw pi chuna xlakata tapaxuwan wa tuku masta espíritu santo (Gál. 5:22). Chu, xlakata tlakg paxuwayaw akxni mastayaw nixawa akxni makglhtinanaw, tlan makgkatsiyaw akxni limaklakaskinaw kinkilhtamakujkan xlakata nalichuwinanaw Dios chu nakamakgtayayaw kinatalankan (Hech. 20:35).

2, 3. 1) Chuna la wan Gálatas 6:4, ¿tuku nakinkamakgtayayan chuntiya napaxuwayaw? 2) ¿Tuku nalichuwinanaw kʼuma artículo?

² ¿Tuku nakinkamakgtayayan chuntiya napaxuwayaw? Apóstol Pablo lichuwinalh pulaktiy tuku tlan nakinkamakgtayayan. Tekgsaw kʼGálatas 6:4 (kalikgalhtawakga). Pulana, komo namaxkiyaw Jehová tuku tlakg tlan kimpalakatakan napaxuwayaw. Chu wa uma tuku kimputumkan kilitlawatkan (Mat. 22:36-38). Xlipulaktiy, ni nakatatalakxtumiyaw amakgapitsin. Komo ni tatatlayaw, komo wi tuku kinkamasiyanikanitan o wi tuku katsiniyaw tlawayaw nema kinkamaxkiyan talakaskin natlawayaw tuku tlan, wa kapaxtikatsiniw Jehová, xlakata putum tuku kgalhiyaw wa kinkamaxkinitan. Chu komo amakgapitsi natalan tlakg katsinikgo lichuwinankgo Dios, kalipaxuwaw xlakata liwana maklakaskimakgolh tuku katsinikgo tlawakgo xlakata namalankikgo Jehová chu ni kaj litlankajwanankgo o xʼakstukan litamakgtayakgo. Ni kakatalatlajaw wata wi tuku kakatsiniw xpalakatakan.

³ Kʼuma artículo, naʼakxilhaw tuku nakinkamakgtayayan ni nataxlajwaniyaw komo nila tlawayaw putum tuku lakaskinaw chuna la skujnaniyaw Dios. Na naʼakxilhaw la tlan liwana namaklakaskinaw tuku tlan tlawayaw, chu tuku tlan nakatsiniyaw xpalakata amakgapitsin.

4. ¿Tuku max xkinkamaxlajwanin? Kalichuwinanti xliʼakxilhtit Carol.

⁴ Makgapitsi natalan taxlajwanikgo xlakata linkgoya kata o xlakata kgalhikgo akgtum tajatat chu nila tlawakgo putum tuku lakaskinkgo chuna la skujnanikgo Jehová. Wa uma tuku xakgspula chatum tala tiku wanikan Carol, milh kilhtamaku makgtayanalh niku tlakg xtalakaskin tamakgtay. Kgalhilh 35 takgalhtawakga chu kamakgtayalh lhuwa latamanin xlakata xtamakamastanikgolh Jehová chu xtamunukgolh. ¡Lu tlan kitaxtunilh! Pero tatatlalh chu nialhla xtaxtu kxchik. Xla wan: «Kkatsi pi xlakata kintajatat nila ktlawa tuku tlawakgo amakgapitsin. Maski chuna, kmakgkatsi pi nitlan kstalanina Cristo klitaxtu. Nila ktlawa putum tuku klakaskin. Uma lu kimaxlajwani». Carol tlawaputun putum tuku matlani xpalakata Jehová, chu uma lu tlan. Liwana katsiyaw pi Dios, tiku lu xalakgalhamanina, lu xtapalh akxilha putum tuku tlawa.

5. 1) ¿Tuku kililakapastakatkan komo makgkatsiyaw pi taxlajwaniyaw xlakata nila tlawayaw putum tuku lakaskinaw? 2) ¿La maxkinit Jehová uma tala tuku tlakg tlan kgalhi chuna la tasiya kdibujos xla uma artículo?

⁵ Komo min kilhtamaku taxlajwaniyaw xlakata nila tlawayaw putum tuku lakaskinaw, kalilakpuwaw uma takgalhskinin: «¿Tuku kgalhkgalhi Jehová kimpalakata?». Kgalhkgalhi pi katlawaw putum tuku matlaniyaw, uma wamputun, pi katlawaw la uku putum tuku matlaniyaw. Kalilakpuwanti uma liʼakxilhtit. Chatum tala tiku kgalhi 80 kata taxlajwani xlakata nialhla lichuwinan Dios chuna la xtlawa akxni xkgalhi 40 kata. Xla lakpuwan, pi maski maxkima Jehová tuku tlakg tlan, xla ni makgapaxuwa. Pero ¿xlikana uma? Kaʼakxilhwi. Komo uma tala maxkilh Jehová tuku tlakg tlan xkgalhi akxni 40 kata xkgalhi chu chuntiya tlawama la uku maski kgalhi 80 kata, uma wamputun pi ankgalhin maxkinit tuku tlakg tlan. Komo chuna natsukuyaw lakpuwanaw pi tuku tlawayaw ni makgapaxuwa Jehová, kalakapastakwi pi wa tiku laksaka tuku makgapaxuwa chu tuku ni. Komo namaxkiyaw tuku tlakg tlan kgalhiyaw, xla nakinkawaniyan: «Lu kimakgapaxuwaya» (katamalakxtupi Mateo 25:20-23).

6. ¿Tuku kinkamasiyaniyan xliʼakxilhtit María?

⁶ Tuku nakinkamakgtayayan chuntiya napaxuwayaw wa nalilakpuwanaw tuku tlan tlawayaw, chu ni wa tuku nila tlawayaw. Kaʼakxilhwi xliʼakxilhtit María, chatum tala tiku nila lhuwa lichuwinan Dios xlakata kgalhi akgtum tajatat. Xapulana lu xtaxlajwani chu xlakpuwan pi nitu xlitaxtu. Pero lilakpuwa chatum tala xalak congregación tiku xtatatla chu nila xtaki. Wa xlakata lakputsalh la namakgtaya. María wan: «Klakkaxwililh nakan kxchik chu naklichuwinanaw Dios kteléfono chu kcartas. Ankgalhin xatapaxuwan xakkitaspita xlakata tlan xakmakgtayanit uma tala». Akinin na napaxuwayaw komo wa nalilakpuwanaw tuku tlan tlawayaw chu ni wa tuku nila tlawayaw. Pero ¿tuku nakitaxtu: komo akinin tlakg wi tuku katsiniyaw tlawayaw?

7. ¿Tuku tlan tastakyaw kamaxkilh apóstol Pedro xnatalan?

⁷ Kxapulana carta nema tsokgli apóstol Pedro, kastakyawalh xnatalan pi xmaklakaskinkgolh tuku xkatsinikgo tlawakgo xlakata nakalimakgpuwantinikgo xnatalan. Tsokgli: «Tuku tlan tlawayatit nema makglhtinanitantit, kalimaklakaskintit xlakata nalaskujnaniyatit chatunu chatunu chuna la laktlan skujnanin xla xtalakgalhaman Dios» (1 Ped. 4:10).  Kilimaklakaskinatkan putum tuku tlan tlawayaw chu ni kalakpuwaw pi amakgapitsin nalakgsitsikgo o nakamaxlajwanikgo. Komo nichuna xtlawaw, ni xmaxkiw Jehová tuku tlakg tlan kgalhiyaw.

8. Chuna la wan 1 Corintios 4:6, 7, ¿tuku xlakata ni nalitlankajwananaw tuku katsiniyaw tlawayaw?

⁸ Xlikana pi kilimaklakaskinatkan tuku katsiniyaw tlawayaw, pero kuenta kilitlawatkan xlakata ni nalitlankajwananaw (kalikgalhtawakga 1 Corintios 4:6, 7). Akgtum liʼakxilhtit, max wix ni tuwa makgkatsiya namatsukiya akgtum takgalhtawakga xalak Biblia. ¡Pues chuntiya katlawa! Liwana namaklakaskinaw tuku tlan katsiniyaw tlawayaw ni xtachuna kitaxtu nalitlankajwananaw. Kalilakpuwanti pi nina makgas lu tlan kitaxtunin chuna la xlichuwinampat Dios chu matsuki akgtum takgalhtawakga xalak Biblia. Chu lu kalitachuwinamputuna natalan la kitaxtunin. Pero, akxni makxtum katawila natalan, kgaxpata pi chatum tala puskat lichuwinama pi makgxtakgnilh maktum revista chatum lataman. Xla makgxtakglhli maktum revista, chu wix matsuki akgtum takgalhtawakga xalak Biblia. ¿Tuku natlawaya? Wix katsiya pi tuku kitaxtunin nakamakgpuwantini natalan, pero max nalaksaka nalichuwinana atanu kilhtamaku xlakata ni makgalipuwamputuna uma tala. ¡Lu tlan la limasiya talakgalhaman! Pero chuntiya kamatsuki takgalhtawakga xalak Biblia. Wix wi tuku katsiniya tlawaya, wa xlakata kamaklakaskinti.

9. ¿La kilimaklakaskinatkan tuku katsiniyaw tlawayaw?

⁹ Kalakapastakwi pi komo wi tuku katsiniyaw tlawayaw wa Dios kinkamaxkinitan. Wa xlakata kalimaklakaskiw nakalimakgpuwantiniyaw natalan xalak congregación, chu ni kaj kalitlankajwanaw (Filip. 2:3). Akxni limaklakaskinaw kilitliwakgakan chu tuku katsiniyaw tlawayaw xlakata natlawayaw xtalakaskin Dios, paxuwayaw. ¿Tuku xlakata? Xlakata maklakaskimanaw putum tuku kgalhiyaw xlakata nalimalankiyaw Jehová, ni limaklakaskimaw xlakata lu nakinkalakgapaskanan o nalimasiyayaw pi tlakg xlakaskinka litaxtuyaw nixawa amakgapitsin.

10. ¿Tuku xlakata nitlan kitaxtu akxni katatalakxtumiyaw amakgapitsin?

¹⁰ Komo ni kuenta natlawayaw, max natsukuyaw tamalakxtumiyaw tuku tlan tlawayaw chu tuku nila tlawakgo amakgapitsin. Kawiliw akgtum liʼakxilhtit. Max chatum tala lu katsini masta akgtum taʼakgchuwin. Wa uma tuku xla tlan tlawa. Pero max kxnaku nalakpuwan pi xla tlakg katsini nixawa atanu tala tiku tuwa  makgkatsi namatitaxti akgtum taʼakgchuwin. Pero max uma tala atanu tuku tlan tlawa, max tlan kamakgamakglhtinan natalan, liwana kamakgastakma xkamanan o lu paxuwa akxni lichuwinan Dios. Lu paxtikatsininanaw pi wilakgolh lhuwa natalan tiku maklakaskimakgo tuku katsinikgo tlawakgo xlakata naskujnanikgo Jehová chu nakamakgtayakgo amakgapitsin.

11. ¿Tuku xlakata lu naliskujaw nastalaniyaw xliʼakxilhtit Jesús?

¹¹ Maski ni kilitatalakxtumitkan amakgapitsin, tlan nalitamakgtayayaw komo nakatsiniyaw xliʼakxilhtit amakgapitsi xlakskujnin Jehová. Kalilakpuwaw Jesús, tlakg xatlan kiliʼakxilhtitkan. Maski akinin makglakgalhinanin, tlan nakatsiniyaw xlakata xalakstlan xtayat chu la likatsi (1 Ped. 2:21). Komo naliskujaw xlakata liwana nastalaniyaw xliʼakxilhtit, tlakg tlan xlakskujnin Jehová nalitaxtuyaw chu tlakg tlan nakinkakitaxtuniyan akxni nalichuwinanaw Dios.

12, 13. ¿Tuku kinkamasiyaniyan xlakata xliʼakxilhtit mapakgsina David?

¹² Biblia kalichuwinan lhuwa lakchixkuwin chu lakpuskatin tiku maski makglakgalhinanin xwankgonit, tlan liʼakxilhtit kimpalakatakan (Heb. 6:12). Chatum wa mapakgsina David. Jehová wa umakgolh tachuwin xpalakata: «Ktekgsnit […] chixku tiku makgapaxuwa kinaku» (Hech. 13:22). Pero David na makglakgalhina xwanit. Chu asta tlawalh makgapitsi laklanka talakgalhin. Maski chuna, kinkawilinin akgtum lu tlan liʼakxilhtit. ¿Tuku xlakata? Xlakata akxni stakyawaka ni atanu tuku likilhalh. Wata, makgamakglhtinalh tastakyaw chu nitlan limakgkatsilh anta kxnaku tuku xtlawanit. Wa xlakata, Jehová tapatilh (Sal. 51:3, 4, 10-12).

¹³ Xliʼakxilhtit David tlan nakinkamakgtayayan komo nalilakpuwanaw umakgolh takgalhskinin: «¿La kmakgamakglhtinan akxni wi tiku kistakyawa? ¿Klitaya tuku nitlan ktlawanit, o wi tuku klikilhan? ¿Tunkun kkalimawaka amakgapitsin? ¿Kliskuja xlakata nialh naktlawa tuku nitlan ktlawalh?». Akxni kalikgalhtawakgayaw xliʼakxilhtitkan xlatamatkan lakchixkuwin chu lakpuskatin tiku ni makgxtakgkgolh Dios nema kalichuwinan Biblia na katlawaw umakgolh takgalhskinin. ¿Na titaxtukgolh tuku tuwa chuna la akinin? ¿Tuku tayat limasiyakgolh? Akxni kalikgalhtawakgamaw, kalilakpuwaw: «¿La tlan naklikatsi chuna la uma kskujni Jehová?».

14. ¿La kinkamakgtayayan xliʼakxilhtitkan amakgapitsi natalan?

 ¹⁴ Na tlan lhuwa tuku nakatsiniyaw xpalakata kinatalankan, maski lakgkgawasanku o linkgoya kata. Max nalilakpuwana chatum tala tiku tayaninit tuku xmatlawiputunkgo xcompañeros, talakatakit xalak xfamilia o akgtum tajatat. ¿Uma tala limasiya akgtum tayat nema akinin na tlan xkgalhiw? Komo kuenta natlawayaw xliʼakxilhtit, nakatsiniyaw tuku nakinkamakgtayayan natayaniyaw akxni natitaxtuyaw tuku tuwa. ¿Ni xlikana pi lhuwa xtapalh liʼakxilhaw umakgolh liʼakxilhtit? Uma lu kinkamakgtayayan napaxuwayaw (Heb. 13:7; Sant. 1:2, 3).

15. ¿Tuku xtastakyaw apóstol Pablo nakinkamakgtayayan chuntiya xatapaxuwan naskujnaniyaw Jehová?

¹⁵ Komo kimputumkan namaxkiyaw Jehová tuku tlakg tlan kgalhiyaw, namakgtayananaw xlakata naʼanan takaksni chu makxtum natawila congregación. Wa uma tuku tlawakgolh kstalaninanin Cristo xapulana siglo. Xlakan tanu tanu tuku xkatsinikgo tlawakgo chu tanu tanu tuku xlakgayakgo (1 Cor. 12:4, 7-11). Pero uma ni xtlawa pi xʼanalh tapapitsit chu xlatlajaputulh. Wata, Pablo kawanilh natalan xalak Éfeso pi chatunu chatunu xliskujli «xlakata nakaskujnanikgo amakgapitsin, xlakata namatliwakglhkgo xmakni Cristo». Chu wampa: «Putum makni makgtaya makni xlakata nastaka chu tliwakga nakgalhi xtapaxkit» (Efes. 4:1-3, 11, 12, 16). Akxni chuna tlawakgolh makgtayanankgolh xlakata xʼanalh takaksni chu makxtum xtawilakgolh, umakgolh tayat wa tuku akxilhaw kcongregaciones xala uku.

16. ¿Tuku mililakkaxwilit natlawaya? (Hebreos 6:10).

¹⁶ Kalakkaxwili xlakata ni nakatatalakxtumiya amakgapitsin. Wata kastalani xliʼakxilhtit Jesús chu kaliskujti xlakata nakgalhiya tayat nema xla kgalhi. Kalitamakgtaya xatlan xliʼakxilhtitkan tiku kalichuwinankan kBiblia chu xtakanajlakan natalan xalak kinkilhtamakujkan. Chuntiya kamaxki Jehová tuku tlakg tlan kgalhiya, chu kalakapastakti pi xla «xaʼakgstitum chu xla nikxni katipatsankgalh» tuku tlawaya xpalakata (kalikgalhtawakga Hebreos 6:10). Chuntiya xatapaxuwan kaskujnani Jehová chu liwana kakatsi pi xla lu xtapalh akxilha tuku wix tlawaya xlakata namakgapaxuwaya.