1. I yini lexi hi yentxaka hi tsaka hintamu?

 YEHOVHA a lava leswaku hi tsaka. Ha swi tiva hikusa ku tsaka i wun’we wa mihandzu ya moya wa ku kwetsima. (Gal. 5:22) Bibele li hlaya swaku swa tsakisa ku nyika ku tlula ku yamukela, se hi tsaka hintamu nkama lowu hi yentxaka mintirho ya Wukreste hi tlhela hi pfuna vamakwerhu hi tindlela ta ku hambanahambana. —  Mint. 20:35.

2-3. a) Hi ku ya hi Vagalatiya 6:4, hi swini swilo swimbirhi leswi nga hi pfunaka ku tama hi tsaka ka ntirho wa Yehovha? b) I yini leswi hi nga ta swi vona ka nhlokomhaka leyi?

² Ka buku la Vagalatiya 6:4, Pawulo a vulavule hi swilo swimbirhi leswi nga hi pfunaka ku tama hi tsaka. (Lerha.) Xa ku sungula, hi fanele hi yentxela Yehovha hinkwaswu leswi hi nga swi kotaka. Loko hi yentxa leswo hi ta tsaka. (Mat. 22:36-38) Xa wumbirhi, a hi fanelanga hi tifananisa ni van’wana. Ku nga na mhaka swaku i yini leswi hi kotaka ku swi yentxa hi mhaka wutivi kumbe wutomi la hina, hi fanele hi tama hi khensa Yehovha hikusa hinkwaswu leswi hi nga na swona hi nyikiwe hi Yehovha. Se, hambiloko van’wana va chumayela kahle ku hi tlula, hi fanele hi tsaka na vona hikusa va tirhisa wutlharhi leli va nga na lona swaku va dzunisa Yehovha, ku nga li ku li tirhisela swaku va tidzunisa kumbe ku li tirhisela swilo leswi pfunaka vona ntsena. Hi mhaka leyo, a hi fanelanga hi palisana na vona, kambe hi fanele hi djondza ka vona.

³ Ka nhlokomhaka leyi, hi ta vona swaku i yini lexi nga hi pfunaka loko hi hela ntamu hileswi hi kalaka hi nga swi koti ku yentxa leswi a hi navela ku swi yentxa. Hi ta tlhela hi vona swaku hi nga yentxa yini swaku hi li tirhisa kahle wutlharhi la hina ni swaku hi nga djondza yini ka xikombiso xa van’wana.

4. I yini leswi nga hi yentxaka hi hela ntamu? Nyikela xikombiso.

⁴ Van’wana lava va tirhelaka Yehovha a va ha swi koti ku mu yentxela leswi va swi navelaka hi mhaka ya ku guga kumbe ku vabya. Leswo hi swona leswi nga yentxekela Makwerhu Carol. Yena a a tirha ka ndhawu leyi a ku ni vachumayeli va vatsongo. Hi nkama wolowo a ve ni 35 wa vanhu lava a a va djondzela Bibele lava a nga va pfuna swaku va tinyiketela ka Yehovha va tlhela va tsakamisiwa. Ntirho wa Carol a wu famba kahle kambe a game a vabya hintamu naswona a swi lava a heta nkama wa wunyingi na a li kaya. Yena a li: “Na swi tiva swaku a na ha swi koti ku yentxa leswi van’wana va swi yentxaka hi mhaka leswi ni vabyaka, naswona ni titwa ingi lipfumelo la mina a hi la nchumu loko ni li pimanisa ni la vamakwerhu. Leswi ni kalaka ni nga swi koti ku yentxa hinkwaswu leswi a ni navela ku swi yentxa, ni pfana ni hela ntamu.” Carol wa swi lava ku yentxela Yehovha hinkwaswu leswi a nga swi kotaka funtshi leswo swa tlangeleka swinene. Naswona hi nga tiyiseka swaku Yehovha Xikwembu xa timpsalu wa tsaka hi ntirho lowu a wu yentxaka.

5. a) I yini leswi hi faneleke hi swi khumbuka loko hi nga ha koti ku yentxa hinkwaswu leswi a hi navela ku swi yentxela Yehovha? b) Hi ku ya hi mufoto, makwerhu a swi kombisisa ku yini swaku a nga nyimanga ku yentxela Yehovha hinkwaswu leswi a nga swi kotaka?

⁵ Loko minkama yin’wana hi hela ntamu hileswi hi kalaka hi nga ha koti ku yentxa swa swinyingi, hi fanele hi tivutisa leswi: ‘I yini leswi Yehovha a swi nyimelaka ka mina?’ Yehovha a lava swaku u yentxa hinkwaswu u swi kotaka hi ku ya hi swiyimu leswi u kumekaka ka swona swoswi. Pimisa hi makwerhu wawansati lweyi a nga ni 80 wa malembe, lweyi a helaka ntamu hileswi a kalaka a nga ha swi koti ku yentxa leswi a a swi yentxa nkama na a ni 40 wa malembe. Yena a pimisa swaku hambileswi a yentxaka hinkwaswu leswi a nga swi kotaka a nga swi koti ku tsakisa Yehovha. Loko makwerhu lweyi a nga ni 80 wa malembe a ha tama a yentxela Yehovha leswi a nga swi kotaka ku fana ni leswi a a mu yentxelisa xiswona nkama na a ni 40 wa malembe, swi vula swaku a nga zanga a nyima ku nyika Yehovha hinkwaswu leswi a nga na swona. Loko hi sungula ku pimisa swaku leswi hi yentxelaka Yehovha a swi yeneli swaku hi mu tsakisa, hi fanele hi khumbuka swaku Yehovha, hi yena a tivaka swaku i yini leswi mu tsakisaka. Loko hi yentxela Yehovha hinkwaswu leswi hi nga swi kotaka a ta hi byela leswi: “U yentxe kahle.” —  Vona ni Matewu 25:20-23.

6. Hi nga djondza yini ka xikombiso xa makwerhu Maria?

⁶ Leswaku hi tama hi tsaka, hi fanele hi pimisa hi leswi hi nga kotaka ku swi yentxa ku nga li ku tshamela ku pimisa hi leswi hi nga ta kala hi nga swi koti ku swi yentxa. Pimisa hi xikombiso xa makwerhu lweyi a vitaniwaka swaku i Maria, lweyi mavabyi ya yena ma mu sivelaka ku yentxa leswi a a navela ku swi yentxa ka ntirho wa ku chumayela. Ku sunguleni a a hele ntamu naswona a a titwa a nga pfuni nchumu. Kambe a pimise hi leswi a nga swi yentxaka swaku a pfuna makwerhu wawansati abandleni, lweyi a a ni mavabyi lawa a ma mu yentxa a nga humi kaya. Makwerhu Maria a vula swaku a fambe a ya chumayela na yena hi telefoni ni makarta, funtshi a hlaya swaku minkama hinkwayu leyi a a tirha na yena a a muka kaya na a tsakile hikusa a yentxe hinkwaswu leswi a nga swi kota swaku a mu pfuna. Na hina hi nga tsaka loko hi pimisa hi leswi hi nga kotaka ku mu yentxela swona Yehovha handle ka ku tshamela ku pimisa hi leswi hi kalaka hi nga swi koti ku swi yentxa. Se hi ta ku yini loko hi kota ku yentxela Yehovha swa swinyingi kuve ku ni swin’wana leswi hi kalaka hi nga swi koti ku swi yentxa kahle?

7. I yini leswi mupostolo Pedru a nga swi byela vamakwerhu ka karta leli a nga va tsalela?

⁷ Ka karta la ku sungula leli mupostolo Pedru a nga li tsalela vamakwerhu, a va byele swaku va fanele va tirhisa tinyiko hinkwatu leti va nga na tona swaku va pfuna van’wana. Yena a te: “Leswi mun’wana ni mun’wana a nga yamukela nyiko, a a yi tirhisi swaku a pfuna van’wana, hileswi mi nga vatirheli va Xikwembu lava xi nga va komba timpsalu ta tikulu”. (1 Ped. 4:10) A hi fanelanga hi tshika ku yentxa hinkwaswu leswi hi nga swi kotaka hi ku pimisa swaku van’wana va ta hi navela kumbe va hela ntamu. Loko hi nga yentxi hinkwaswu leswi hi swi kotaka swaku hi tirhela Yehovha hi ku pimisa hi leswi van’wana va nga ta titwisa xiswona, a hi nga ta va hi yentxela Yehovha hinkwaswu leswi nga ka matimba ya hina.

8. Hi ku ya hi 1 Vakorinto 4:6, 7, hi mhaka muni hi nga fanelanga hi tibyela hi tinyiko leti hi nga na tona?

⁸ Hi fanele hi tirhisa tinyiko ta hina hilani hi nga kotaka hi kona kambe hi fanele hi tivonela swaku hi nga tibyeli hi mhaka tinyiko leti hi nga na tona. (Lerha 1 Vakorinto 4:6, 7.) Hi xikombiso, swi nga yentxeka swi ku vevukela ku sungula swidjondzo swa Bibele. Loko ku li leswo, tama u yi tirhisa nyiko leyo. Kambe ku tirhisa nyiko leyi u nga na yona ni ku tibyela hi nyiko leyi u nga na yona swi hambanile. A hi nge, u li nsin’wini ni vamakwerhu van’wana u gama u sungula ku djondza Bibele ni munhu hi nkama wolowo. Phela u nga tsaka hintamu lakakuva u lava ku kontarela vamakwerhu van’wana leswi nga ku yentxekela. Kambe loko u lava ku va kontarela, u vona swaku ku ni makwerhu mun’wana lweyi a ngo yo kota ku nyikela revhixta ntsena, lweyi na yena a kontarelaka vamakwerhu leswi a nga li nyikelisa xiswona revhixta. Hambileswi u swi tivaka swaku vamakwerhu va nga pfuneka hi xiperiyensiya xa wena, phela swi nga ha yampsa u nga va kontareli hi nkama wolowo vamakwerhu xiperiyensiya xolexo, leswaku makwerhu lweyi a ngo yo kota ku nyikela revhixta ntsena a nga titwi na a nga yentxanga ntirho wa lisima. Phela loko u yentxe leswo u ta va na u yentxe kahle, kambe a swi vuli swona swaku a wu fanelanga u tama u va djondzisa Bibele van’wana. U ni nyiko ya yinene, se yi tirhisi!

9. Hi fanele hi ti tirhisisa ku yini tinyiko leti hi nga na tona?

⁹ Minkama hinkwayu hi fanele hi khumbuka swaku hinkwaswu leswi hi kotaka ku swi yentxa, hi Yehovha lweyi a nga hi pfuna swaku hi kota ku swi yentxa. Hi mhaka leyo, hi fanele hi tirhisa tinyiko toleto swaku hi tiyisa bandla ku nga li swaku hi dzunisiwa hi van’wana. (Filp. 2:3) Se loko hi tirhisa ntamu wa hina ni leswi hi kotaka ku swi yentxa swaku hi yentxa ku rhandza ka Xikwembu  hi ta tsaka, ku nga li hileswi hi tlulaka van’wana, kambe hileswi hi tirhisaka tinyiko leti hi nga na tona swaku hi dzunisa Yehovha.

10. Hi mhaka muni swi nga li swinene ku tifananisa ni van’wana?

¹⁰ Loko hi nga tivoneli, hi nga ha sungula ku fananisa leswi hi kotaka ku swi yentxa ni leswi van’wana va kalaka va nga swi koti ku swi yentxa. Hi xikombiso, makwerhu a nga ha ma veka kahle madixkursu, kambe a mu vonela hansi makwerhu lweyi a kalaka a nga swi koti ku veka kahle madixkursu ku fana na yena. Kambe swi nga yentxeka makwerhu lweyi a mu vonelaka hansi a li munhu lweyi a yamukelaka vanhu van’wana, a va djondzisaka kahle vana va yena funtshi a chumayelaka hi ku hiseka. Phela swa tsakisa ku va xikarhi ka vamakwerhu lava nga ni tinyiko ta ku hambana, kambe va tirhisaka tinyiko toleto swaku va dzunisa Yehovha va tlhela va pfuna vanhu van’wana.

11. Hi mhaka muni hi fanele hi tekelela Yesu?

¹¹ Hambileswi swi kalaka swi nga li swinene ku tifananisa ni van’wana, hi nga pfuneka loko hi djondza ka vanhu va Yehovha va ku tshembeka. Yesu i xikombiso xa xinene lexi hi nga djondzaka ka xona. Phela hambileswi Yesu a a nga na xidjoho, hi nga djondza ka wumunhu la linene leli a a li na lona ni ka leswi a a swi yentxisa xiswona swilo. (1 Ped. 2:21) Se, loko hi yentxa hinkwaswu leswi hi nga swi kotaka swaku hi tekelela xikombiso xa Yesu, hi ta mu tirhela kahle Yehovha hi tlhela hi wu yentxa kahle ntirho wa ku chumayela.

12-13. Hi nga djondza yini ka xikombiso xa Davhida?

¹² Ka Bibele, ku ni swikombiso swa swinyingi swa vavanuna ni vavasati va ku tshembeka, lava hi nga va tekelelaka hambileswi a va ni xidjoho. (Heb. 6:12) Pimisa hi Hosi Davhida. Yehovha a vule swaku Davhida a a li wanuna ‘lweyi a mu rhandzaka’, kumbe hi marito man’wana a a li wanuna lweyi a a tsakisa mbilu ya Yehovha. (Mint. 13:22) Phela Davhida a a nga hetisekanga funtshi a yentxe swidjoho swa swikulu. Hambileswo, i xikombiso xa xinene lexi hi nga xi tekelelaka, hikusa nkama a nga layiwa a nga zamanga ku tinyimelela. Kambe a pfumele xitsundzuxu lexi a nga nyikiwa xona a tlhela a tisola hi xidjoho lexi a nga xi yentxa. Hi mhaka leyo, Yehovha a mu rivalelile. —  Pis. 51:3, 4, 10-12.

¹³ Hi nga djondza ka xikombiso xa Davhida hi ku tiyentxa swivutiso swa ku fana ni leswi: ‘Ni yentxa yini loko va ni layiwa? Ni hantla ni pfumela xidjoho xa mina kumbe ni zama ku tinyimelela? Ni tolovela ku lumbeta van’wana? Ni zama ku kala ni nga ha phindhi swihoxo leswi ni nga swi yentxa?’ U nga ha tlhela u tivutisa swivutiso swa ku fana ni leswi nkama u lerhaka  hi vavanuna ni vavasati va ku tshembeka lava nga Bibeleni: ‘Va kumane ni xikarhatu xa ku fana ni lexi ni kumanaka na xona? Hi lini wumunhu la linene leli va nga li kombisa?’ Ka mhaka yin’wana ni yin’wana tivutisi leswi: ‘Ni nga swi kotisa ku yini ku tekelela xikombiso xa vona?’

14. Xikombiso xa xinene xa vamakwerhu van’wana xi nga hi pfunisa ku yini?

¹⁴ Hi nga djondza ka xikombiso xa vamakwerhu van’wana, ku nga na mhaka swaku i majovhem kumbe se va gugile. Hi xikombiso, pimisa hi makwerhu wa bandla la wena lweyi a tiyiselaka swikarhatu swa ku fana ni ku xengeteliwa swaku a yentxa swa ku biha, ku kanetiwa hi maxaka ya yena kumbe mavabyi. Loko ku li swaku a kona makwerhu lweyi u mu tivaka a kumanaka ni swikarhatu leswi, zama ku tekelela wumunhu la linene leli li mu pfunaka ku tiyisela swikarhatu swoleswo. Ku pimisa hi xikombiso xa makwerhu yelweyo swi nga ku pfuna ku vona leswi u nga swi yentxaka swaku u tiyisela swikarhatu leswi u kumanaka na swona. Hi swi khensa hintamu ku va ni vamakwerhu va ku tshembeka lava nga xikombiso xa swinene lexi hi nga xi tekelelaka! —  Heb. 13:7; Yak. 1:2, 3.

15. I yini leswi mupostolo Pawulo a nga swi hlaya leswi nga hi pfunaka ku tama hi tsaka ka ntirho wa Yehovha?

¹⁵ Hinkwerhu hi nga pfunisa swaku ku va ni ku rhula ni ku twanana abandleni. Pimisa hi xikombiso xa Vakreste va nkama wa vapostolo. Vona a va ni tinyiko ta ku hambana va tlhela va va ni mintirho ya ku hambana. (1 Kor. 12:4, 7-11) Kambe a va twanana naswona a va nga phikizani. Hi mhaka leyo, Pawulo a va byele swaku va “tiyisa miri wa Kreste.” Pawulo a tlhele a tsalela Vaefeza a ku: “Loko xirho xin’wana ni xin’wana xi tirha kahle, miri hinkwawu wa kula na wu tiyaka hi lirhandzu.” (Efe. 4:1-3, 11, 12, 16) Hinkwavu lava nga hanya hi leswi mupostolo Pawulo a nga swi vula, a va hanya hi ku rhula va tlhela va twanana, ku nga leswi Vakreste va ntiyiso va swi yentxaka mabandleni namuntlha.

16. U fanele u tinyimisela ku yentxa yini? (Vaheberu 6:10)

¹⁶ Tinyimiseli ku kala u nga tifananisi ni van’wana. Naswona djondza ka xikombiso xa Yesu u tlhela u zama ku tekelela wumunhu la yena. Tlhela u zama ku djondza ka xikombiso xa vanhu lava ku vulavuliwaka hi vona ka Bibele ni swikombiso swa vamakwerhu va ku tshembeka. Nkama u yentxaka hinkwaswu leswi u nga swi kotaka, tiyiseka swaku Xikwembu ‘xi lulamile naswona a xi nge wu khohlwi ntirho wa wena’. (Lerha Vaheberu 6:10.) Tama u tsaka hi ntirho lowu u wu yentxelaka Yehovha, na u khumbuka swaku wa yi vona minzamu hinkwayu leyi u yi yentxaka swaku u mu tsakisa.