1. Kiki ekituleetera okusemererwa kwingi?

 YAHWE n’agonza tutunge okusemererwa. Ekitukimanyire habwokuba okusemererwa guli gumu ha miringo ey’eretwa ekyana eky’omwoyo gwe ogurukwera. (Bag. 5:22) Nk’oku okugaba kuleeta okusemererwa kwingi kukira okuheebwa, tutunga okusemererwa kwingi obutukora n’amaani omu buheereza kandi n’obutukonyera Abakristaayo bagenzi baitu omu miringo erukwahukana.​—Eng. 20:35.

2-3. (a) Nk’oku kyolekerwe omu Abagaratiya 6:4, nsonga ki ebiri ezisobora kutukonyera kwikara twine okusemererwa omu kuheereza Yahwe? (b) Kiki ekiturukugenda kubazaaho omu kicweka kinu?

² Nk’oku kyolekerwe omu Abagaratiya 6:4, omukwenda Paulo abazaaho ensonga ebiri eziratukonyera kwikara twine okusemererwa. (Soma.) Eky’okubanza, ekigendererwa kyaitu kisemeriire kuba eky’okuha Yahwe ekirukukirayo oburungi. Obuturaba nitumuha ekirukukirayo oburungi, tusemeriire kusemererwa. (Mat. 22:36-38) Eyakabiri, tusemeriire kwerinda kwerengesaniza n’abantu abandi. Kyona ekiturukusobora kukora kusigikirra ha bwomeezi bwaitu, kutendekwa, rundi ebisembo ebitwine, tusemeriire kukisiimira Yahwe. Ebitwine byona, tukabitunga kuruga hali uwe. Ha rubaju orundi kakuba abandi baba barungi omu miringo emu ey’obuheereza kutukira, tusemeriire kusemererwa habwokuba nibakozesa ebisembo byabo kukugiza Yahwe, hatali kubikozesa kwenyumiza rundi habw’ebigendererwa byabo nk’abantu. Nahabweki, omu kiikaro kyokulengaho kugonza kubakira, tusemeriire kubeegeraho.

³ Omu kicweka kinu, nitugenda kurora kiki ekisobora kutukonyera obuturukuba nitwehurra tuhoirwemu amaani habwokuba titurukusobora kukora omu buheereza ekitwakugondeze. Nitwija n’okubazaaho omu mulingo tusobora kukozesa kurungi  ebisembo ebitwine, kandi n’ekitusobora kwega omu byokurorraho eby’abantu abandi.

4. Nyikara ki ey’esobora kuleetera abamu kuhwamu amaani? Bazaaho ekyokurorraho.

⁴ Abamu h’abaheereza ba Yahwe tibakyasobora kukora ebibakugondeze kukora omu kuheereza Yahwe habw’okukura omu myaka rundi habw’oburwaire. Kinu nikyo kyahikire hali Carol. Yatebezaaga omu kiikaro nambere hali obwetaago. Omu kasumi ako, akaba aine abeegi ba Baibuli 35 kandi akakonyera baingi kuhika ha kwehayo kandi n’okubatizibwa. Carol yayegondezaaga omu buheereza! Hanyuma akarwa muno, kandi kyamwetaagisa kwikara omu ka obwire oburukukira obwingi. Carol nagamba ati: “Nkimanyire ngu habw’oburwaire bwange tindukusobora kukora abandi ebibasobora kukora, baitu nyehurra ngu tindi mwesigwa nk’abo. Tindukusobora kukora ebintu byona ebinakugondeze kukora, kandi kinu kindetera kuhwamu amaani.” Carol nagonza kukorra Yahwe kyona ekyarukusobora. Eki kirungi muno! Nitukigumya ngu Ruhanga waitu ow’embabazi n’amusiima muno habwokuba n’akora ekyarukusobora.

5. (a) Kiki ekitusemeriire kwijuka kakuba twehurra tuhwoirwemu amaani habw’ebi ebitutarukusobora kukora? (b) Nk’oku kyolekerwe omu bisisani, ow’oruganda aikaire ata naaha Yahwe ekirukukirayo oburungi?

⁵ Kakuba obwire obumu oyehurra ohwoiremu amaani habw’ebi ebyotasobora kukora, nosobora kwekaguza, ‘Kiki Yahwe ekyarukunyetaagisa?’ Yahwe nagonza omuhe ekirukukirayo oburungi kusigikirra ha nyikara ey’orumu. Tekerezaaho enyikara enu: Munyaanya itwe ow’emyaka 80 ayehurra ahwoirwemu amaani habwokuba takyasobora kutebeza nk’oku yatebezaaga obwakaba aine emyaka 40. Natekereza ngu n’obwaraaba nahayo ekirukukirayo oburungi tikirukusemeza Yahwe. Eki ky’amananu? Kitekerezeeho. Munyaanya itwe obwaraaba yahayoga ekirukukirayo oburungi ha myaka 40 kandi na hati nakyahayo ekirukukirayo oburungi n’obwaraaba aine emyaka 80, eki nikimanyisa ngu takalekaga kuhayo ekirukukirayo oburungi. Kakuba tutandika kwehurra ngu ebiturukukorra Yahwe tibirukumara kumusemeza, tusemeriire kwijuka ngu Yahwe nuwe acwamu kiki ekirukumara kusobora kumusemeza. Kakuba tukorra Yahwe ekirukukirayo oburungi, naija kutugambira ati: “Okozire.”​—Lengesaniza na Matayo 25:20-23.

6. Kiki ekitusobora kwega kuruga omu kyokurorraho kya Maria?

⁶ Nikiija kutwanguhira kutunga okusemererwa, kakuba omutima tuguteeka hali ebiturukusobora kukora hatali habitutarukusobora. Tekerezaaho munyaanya itwe Maria, ow’aine oburwaire obumuleetera kukora kake omu buheereza. Ha kubanza, akaba ayenubire kandi nayehurra taine mugaso. Baitu hanyuma akatekerezaaho munyaanya itwe omu kitebe ow’akaba atasobora kuruga omu kitabu, kandi akacwamu kumukonyera. Maria nagamba ati: “Nkora entekaniza ey’okukora na uwe kurabira omu kukozesa esimu n’okuhandiika amabbaruha. Buli murundi obunakoraga na uwe, nataahaga omu ka nyine okusemererwa hamu n’okumarwa habwokuba nabaga nsoboire kukonyera munyaanya itwe.” Naitwe nitusobora kwongera ha kusemererwa kwaitu, kakuba tuteeka omutima hali ebi ebitusobora kukora hatali habitutarukusobora kukora. Baitu kiki ekitusemeriire kukora kakuba tuba nitusobora kukora ekirukukiraho rundi nitukora kurungi omu miringo emu ey’okuheereza Yahwe?

7. Buhabuzi ki oburungi omukwenda Petero obuyahaire Abakristaaho bagenzi be?

⁷ Omu bbaruha ye ey’okubanza hali Abakristaayo bagenzi be omukwenda Petero  akabekambisa kukozesa ebisembo ebi baine kwombekangana. Petero akahandiika ati: “Nkokumuhairwe ebisembo omu omu [mubikozese kuheerezangana] inywenka, nkabaahuzi abarungi abembabazi nyingi eza Ruhanga.” (1 Pet. 4:10) Titusemeriire kutiina kukozesa ebisembo ebitwine omu bwijwire ngu habwokuba titurukugonza kuleetera abandi kukwatwa ihali rundi kuhwamu amaani. Kakuba tukora eki nituba tutarukuha Yahwe ekirukukirayo oburungi.

8. Kusigikirra ha 1 Abakolinso 4:6, 7, habwaki tutasemeriire kwepakisa ebisembo ebitwine?

⁸ Nitwetaaga kukozesa ebisembo ebitwine omu bwijwire, baitu tusemeriire kwerinda kubyepakisa. (Soma 1 Abakolinso 4:6, 7.) Ekyokurorraho, nosobora kuba oli murungi muno omu kutandika kwegesa abantu Baibuli. Tosemeririe kutiina kukozesa ekisembo eki! Baitu kikuru muno oijuke ngu tosemeriire kukyepakisa. Katugambe osemeriirwe muno habwokuba osoboire kutandika kwegesa omuntu Baibuli obwobaire oli omu buheereza. Oija oine ekihika kingi kugambiraho abali omu guruupu yaawe ey’obuheereza ekibaireho. Baitu obwohikaho guruupu yaawe ey’obuheereza, osanga munyaanya itwe nagambira abandi nk’oku asoboire kugaba magaziini. Uwe agabire magaziini, baitu iwe osoboire kutandika kwegesa omuntu Baibuli. Kiki ekyorakora? Okimanyire ngu ab’omu guruupu yaawe nibaija kugarurwamu amaani habw’ekyokurorraho kyawe, baitu nosobora kucwamu kulinda okabagambira ha bwire obundi, habwokuba torukugonza kuleetera munyaanya itwe ow’agabire magaziini kwehurra ngu takozere ky’amaani kwingana iwe. Eki nikiba kiri kikorwa ky’embabazi. Baitu tosemeriire kuleka kutandika kwegesa abantu Baibuli. Ekisembo kyawe​—kikozese!

9. Tusemeriire kukozesa tuta ebisembo ebitwine?

⁹ Twijuke ngu ebisembo byona ebitwine biruga hali Ruhanga. Tusemeriire kukozea ebisembo ebi kwombeka ekitebe, hatali kwenyumiza itwenka. (Baf. 2:3) Obutukozesa amaani gaitu hamu n’ebisembo ebitwine kukora Ruhanga eby’agonza, tutunga okusemererwa, hatali habwokuba nitukora bingi kukira abandi rundi habwokugonza kubakira, baitu habwokuba nitubikozesa kukugiza Yahwe.

10. Habwaki kitali ky’amagezi kwerengesaniza n’abantu abandi?

¹⁰ Kakuba omuntu ategendesereza nasobora kutandika kwerengesaniza n’omuntu ondi ataine ekisembo nk’ekye. Ekyokurorraho, ow’oruganda nasobora kuba amanyire kuha kurungi embazo. Eki kisembo kye. Baitu omu mutima gwe, nasobora kuba narabyamu amaiso ow’oruganda ow’atamanyire kuha kurungi embazo.  Baitu ow’oruganda ngu nasobora kuba murungi muno omu kwoleka amakune, omu kutendeka abaana be, rundi mwekambi muno omu buheereza. Nka mugisa gw’amaani, kurora ngu twine ab’oruganda na banyaanya itwe baingi abakozesa ebisembo byabo kuheereza Yahwe kandi n’okukonyera abandi!

11. Habwaki tusemeriire kulengaho kuhondera ekyokurorraho kya Yesu?

¹¹ N’obukiraaba ngu titusemeriire kwerengesaniza n’abandi, nitusobora kwega bingi kuruga h’abaheereza ba Yahwe abandi. Ekyokurorraho, leka tubazeeho Yesu. Nobukiraaba ngu akaba ahikiriire nitusobora kwegera ha miringo ye enungi hamu n’ebintu ebiyakozere. (1 Pet. 2:21) Obutukora kyona ekiturukusobora kuhondera ekyokurorraho kye, tufooka baheereza ba Yahwe abarungi kandi tweyongera kufooka abatebezi abarungi.

12-13. Kiki ekitusobora kwega kuruga hali Omukama Daudi?

¹² Omu Kigambo kya Ruhanga, harumu ebyokurorraho bingi eby’abasaija n’abakazi abesigwa, ebitusobora kwegeraho n’obukiraaba ngu bakaba batahikiriire. (Baheb. 6:12) Tekerezaaho Omukama Daudi, Yahwe ouyayesere “omuntu ali nkanyowe okundukwenda” rundi omuntu oundukugonza muno kusigikirra ha mpindura endi eya Baibuli. (Eng. 13:22) Baitu Daudi akaba atahikiriire. Amananu gali, akakora ensobi ezimu ez’amaani muno. Eki n’obukiraaba nukwo kiri, akateekaho ekyokurorraho ekirungi kitusobora kwegeraho. Habwaki? Habwokuba obuyahanirwe, atalengeho kutunga eby’okwekwasa. Oihireho, akaikiriza okuhanwa okw’amaani okuyatungire kandi yayegarukamu kuruga ha mutima habw’ebibi bye. Ekyarugiremu, Yahwe akamuganyira.​—Zab. 51:3, 4, 10-12.

¹³ Nitusobora kwegera hali Daudi kurabira omu kwekaguza: ‘Nyetwaza nta obutunga obuhabuzi? Nyanguha kwikiriza ensobi zange, rundi nserra ebyokwekwasa? Nyanguha kuteekaho abandi omusango? Nyekamba muno kutongera kugarukamu ensobi zange?’ Nosobora n’okwekaguza ebikaguzo ebirukusisana nka binu obworukuba n’osomaho abasaija na bakazi abesigwa abarukubazibwaho omu Baibuli. Bakaraba omu bizibu ebirukusisana n’ebyawe? Miringo ki enungi eibayolekere? Hanyuma omu buli nyikara, wekaguze: ‘Ninsobora kuba nta nk’omuheereza wa Yahwe onu omwesigwa?’

14. Nitusobora tuta kugasirwa omu byokurorraho eby’Abakristaayo bagenzi baitu?

¹⁴ Nitusobora nokwegera h’Abkristaayo bagenzi baitu, abakuru n’abato. Ekyokurorraho,  haroho omuntu omu kitebe kyanyu ow’arukugumira ekirengo n’obwesigwa, obundi kusindikirizibwa, obundi kuhakanizibwa ab’omu ka ye, rundi ow’arwaire? Omuntu onu n’omuroramu emiringo enu ei wakugondeze kweyongera kukurakuraniza? Kutekerezaaho ekyokurorraho kye ekirungi nosobora kwega emiringo nk’oku osobora kugumira ebirengo ebyawe. Nitusiima muno habw’ab’oruganda na banyaanya itwe banu abatuteriireho ebyokurorraho ebirungi eby’okwikiriza!​—Baheb. 13:7; Yak. 1:2, 3.

15. Buhabuzi ki omukwenda Paulo obuyahaire obusobora kutukonyera kugumizaamu nitutunga okusemererwa omu buheereza bwaitu hali Yahwe?

¹⁵ Kusobora kukurakuraniza obusinge n’obumu omu kitebe, buli omu omuli itwe asemeriire kuhayo ekirukukirayo oburungi. Tekerezaaho Abakristaayo ab’omu kyasa eky’okubanza. Bakaba baine ebisembo n’obujunanizibwa ebirukwahukana. (1 Kol. 12:4, 7-11) Baitu kinu kitabaleetera kugonza kukirangana rundi kwebaganizaamu. Oihireho, Paulo akekambisa buli omu kukora ekirukwetaagisa “okwombeka omubiri gwa Kristo.” Paulo akahandiikira Abefeso ngu buli kicweka obukihikiiriza omulimo gwakyo kurungi, omubiri gukura kandi gwombekwa omu kugonza. (Bef. 4:1-3, 11, 12, 16) Abo abaakozere Paulo ekiyagambire bakakurakuraniza obusinge hamu n’obumu, enu niyo emiringo eiturora omu bitebe kasumi kanu.

16. Kiki ekitusemeriire kucweramu kimu kukora? (Abaheburaniya 6:10)

¹⁶ Cweramu kimu kwetantara kwerengesaniza n’abandi. Oihireho, yegera hali Yesu, kandi oyekamba muno kukurakuraniza emiringo nk’eye. Gasirwa omu byokurorraho eby’okwikiriza ebiri omu Baibuli hamu n’eby’omu kasumi kanu. Gumizaamu n’okora ekirukukirayo oburungi, kandi okigumize kimu ngu Yahwe “tali atahikiriire okwebwa emirimo [yaawe].” (Soma Abaheburaniya 6:10.) Gumizaamu notunga okusemererwa omu kuheereza Yahwe, okimanyire ngu n’asiima byona ebyorukumukorra n’omutima gwawe gwona kusobora kumusemeza.