1. Биске чүү улуг өөрүшкүнү эккеп турарыл?

 ИЕГОВА биске аас-кежикти күзеп турар. Ол алыс шын-дыр. Өөрүшкү анаа эвес Бурганның ыдыктыг сүлдезиниң үре-түңнелинче кирип турар (Гал. 5:22). Бурганга сеткиливистиң ханызындан бараалгап, ха-дуңмавыска дуза каткаш, дыка өөрүүр бис, чүге дизе «алырынга көөрде, бээри — амыр-чыргалдыг» болгай (Аж.-ч. 20:35).

2, 3. а) Галатчыларга 6:4-тен алырга, Иеговага бараалгап тургаш, чүнүң ачызында өөрүшкүнү миннип болур бис? б) Бо статьяга чүнү сайгарар бис?

² Галатчыларга 6:4-тен алырга, Иеговага өөрүшкүлүг бараалгаар дизе, ийи чүүлдү кичээнгейге алыр херек (номчуптуңар). Бирээде, бисте бар эң эки чүүлдү Иеговага бээр ужурлуг бис. Бир эвес шыдаар шаавыс-биле Бурганга бараалгаар болзувусса, аас-кежиктиг болур бис (Мф. 22:36—38). Ийиде, бодувусту өскелер-биле деңневес ужурлуг бис. Бисте бар шупту чүүлдү — кадыкшылывысты, чедип алган арга-мергежиливисти, салым-чаяанывысты — Иегова берген. Ынчангаш шупту чедиишкиннеривис дээш Иеговага четтиргенивисти илередир ужурлуг бис. Акы-угбалар бир-ле чүүлдү бистен артык эки кылып турар болза, ол дээш өөрүүр херек. Чүге дээрге олар салым-чаяанын боттарын эвес, а Иегованы алдаржыдар дээш ажыглап турар болгай. Олар-биле адааннажырының орнунга, олардан үлегерни алыылыңар.

³ Иеговага бараалгаар аргаларывыс кызыгаарлыг-даа болза, бодун чөгенчиг кылдыр санавазынга бо статья дузалаар. Оон аңгыда, салым-чаяанывысты долузу-биле канчаар ажыглаарын база өскелерниң үлегеринден чүнү өөренип ап болурувусту көөр бис.

4. Чүү дээш кижиниң холу сула салдына берип болур? Чижектен чугаалаңар.

⁴ Иегованың чамдык бараалгакчыларынга назы-харының азы кадыкшылының ужундан чаа байдалдарга чаңчыгары дыка берге. Ону Кэрол бодунга көрген. Ол ооң мурнунда Иегованың Херечилери чедишпес черге бараалгап чораан. Ол 35 библейжи кичээлди эрттирип турган. Өөредип турган улузунуң чамдыызы Бурганга чуртталгазын бараалгадып, сугга суктуруп алган. Кэрол дыка-ла чедиишкинниг бараалгап чораан! Ынчалза-даа үе эрткенде, ооң кадыы баксырап эгелээн. Ол бажыңындан безин үнүп шыдавас апарган. Кэрол үлешкен: «Аарыгларым дээш хөйнү кылып шыдавас мен деп билип тур мен. Ынчалза-даа өске улус дег, бердинген бараалгакчы эвес мен деп бодал сагыш-сеткилимни өйүп чоруур. Күзеп турар чүүлүм биле байдалым дүүшпес боорга, меңээ дыка муңгаранчыг-дыр». Ынчалза-даа Кэрол Иеговага шыдаар чүүлүн кылырынга белен. Ол, шынап-ла, эр-хей-дир! Бараалгакчыларының байдалын кымдан-даа артык эки билип турар Бурганывыс Кэролду аажок үнелеп турар.

5. а) Байдалывыс аайы-биле ооң мурнунда ышкаш бараалгаары болдунмайн турар болза, чүнү сактыр ужурлуг бис? б) Чуруктарны көрүңер. Акывыс бүгү назынында Иеговага эң эки чүүлдү берип чоруур деп чүге чугаалап болур?

⁵ Силерге база назы-харыңар болгаш кадыыңар байдалы-биле ооң мурнунда ышкаш бараалгаары болдунмайн турар болза, бодуңардан айтырыңар: «Иегова менден чүнү манап турар?» Амгы байдалыңарда Аңаа эң эки чүүлдү бээриңерни. Мындыг байдалды сагыштаалап көрээлиңер: 80 ажыг харлыг угбавыс, 40 харлыында ышкаш, бараалгап шыдавас апарганынга муңгарап турар. Чеже-даа ол шыдаар шаа-биле бараалгап турар болза, ооң сагыжында Иегова аңаа таарзынмайн турар ышкаш. Ооң бодап турары шын бе? Бо угбавыстың байдалынче өске талазындан көрээлиңер. Ол 40 харлыг тургаш, Иеговага эң-не эки чүүлүн берип чораан. Ам ол 80 ажыг харлыг-даа болза, база-ла ынчаар кылып чоруур. Ынчап кээрге, ол Иеговага эң эки чүүлдү бээрин кажан-даа соксатпаан ышкажыл. Силер база ындыг минниишкиннерлиг болзуңарза, бодуңарга мону сагындырыңар: Иегованы чүү өөртүр-өөртпезин бис шиитпирлевес бис. Шыдаар шааңар-биле бараалгап чоруур болзуңарза, Иегова силерни: «Эр хей!» деп турар. (Деңнеңер: Матфей 25:20—23).

6. Марияның үлегери биске чүзү-биле ажыктыг?

⁶ Өөрүшкүнү чидирбес дизе, кижи бодунуң кылып шыдавас чүүлүнче эвес, а кылып шыдаар чүүлүнче кичээнгейни угландырар болза эки. Аңаа Мария дээр угбавыс шынзыккан. Кадыкшылының аайы-биле ол хөйнү кылып шыдавас апарган. Эгезинде Мария ол дээш муңгарап, бодун чөгенчиг кылдыр миннип турган. Ынчалза-даа Мария орундан турбайн чыдар кады бүзүрээн угбазынга дузалаар деп шиитпирлеп алган. Ол мынча дээн: «Телефон болгаш чагаа таварыштыр кады суртаалдаар дээш, ол угбай-биле дугуржуп эгелээн мен. Ооң-биле кады бараалгаан санымда-ла, өөрүшкүмнү чүге деңнээр боор! Аңаа дузалаары меңээ ол хире аянныг болган». Кылып шыдавас эвес, а кылып шыдаар чүүлүвүстүң дугайында боданыр болзувусса, оон-даа аас-кежиктиг апаар бис. А бир эвес бис бараалгалга хөйнү кылып шыдаар азы бараалгалдың кандыг-ла бир хевирин эки кылып турар болзувусса, канчаар?

7. Пётр элчин христианнарга кандыг сүме каткан?

⁷ Пётр элчин бодунуң бирги чагаазында христианнарны боттарының салым-чаяанын акы-угбаларның менди-чаагай чоруу дээш ажыглаарынче кыйгырган. Ол мынча дээн:  «Өскелерге бараан боорда, кижи бүрүзү Бурганның хайырлаан ачы-буянныг белээн ажыглаар ужурлуг. Силерге ындыг хөй хевирлиг кылдыр берген Бурганның авыралын, эки башкарыкчылар дег, сарыылдыг ажыглаңар» (1 Пет. 4:10). Өскелер мээң салым-чаяаным көргеш, боттарын чөгенчиг кылдыр миннип азы адааргап эгелээр ирги бе дээш, оозун чажырып, ажыглавайн баар болза, шын эвес боор. Иеговага эң-не экини бээр дээш, шупту салым-чаяанывысты ажыглаар ужурлуг бис.

8. Кижи чүге бодунуң салым-чаяанынга мактанмас ужурлуг? (1 Коринфичилерге 4:6, 7).

⁸ Ындыг-даа бол, кижи бодунуң салым-чаяанынга мактанмас ужурлуг. (Номчуптуңар: 1 Коринфичилерге 4:6, 7.) Библейжи кичээлдерни сеңээ эгелеп алыры белен дижик. Ол дээрге белек-тир, ону ажыглаар болза эки. Ындыг-даа бол, ону көөргеткен ажыы чок. Суртаал үезинде сээң-биле дыка онза болуушкун болган дижик: бир кижи Библияны өөренирин чөпшээрешкен. Кады суртаалдаар бөлүүңде ха-дуңмаңга ону чугаалаксааш, четтикпейн турар сен. Суртаалдап каапкан соонда шупту чыглып келген силер. Бир угбай журнал бергенин амырап, хөөреп эгелээн. А сен библейжи кичээл эгелеп алган сен! Бо байдалда канчаар алдынар сен? Чугаажок, сээң-биле болган таварылга акы-угбаларны сорук киирер, ынчалза-даа бо удаада ону чугаалавааны дээре. Оон башка угбаң журнал бергенинге өөрүвейн баар. Ооң минниишкиннерин бодааш, чугаалавас болзуңза, чараш боор. Ындыг турбуже, библейжи кичээлдерни улуска сүмелээрин черле соксатпа. Ол дээрге сээң белээң-дир, ону ажыгла!

9. Салым-чаяанывысты канчаар ажыглаар болзувусса эки?

⁹ Бистиң кандыг-даа салым-чаяанывыс — Иеговадан белек деп утпас ужурлуг бис. Ол салым-чаяанывысты бодувусту көөргедир дээш эвес, а чыышты быжыглаар дээш ажыглаар болза эки (Флп. 2:3). Күжүвүстү болгаш салым-чаяанывысты Бурганның күзел-соруун күүседиринче угландырып турар болзувусса, өскелерден дээре бис дээш эвес, а салым-чаяанывыс-биле Иегованы алдаржыдып турарывыс дээш өөрүүр бис.

10. Өскелер-биле бодун деңнээри чүге шын эвес?

¹⁰ Оон ыңай кижи бүрүзүнде күштүг-даа, кошкак-даа талалар бар деп утпас болза эки. Ынчангаш бодун өскелер-биле деңнээри шын эвес. Ийи акыйны сагыштаалап көрээлиңер. Бирээзи — кончуг дээн илеткелчи, ол ооң күштүг талазы-дыр. Ынчалза-даа ол иштинде өске акыйның дугайында: «Мен бо кижиден дээре мен, чүге дизе аңаа илеткелдер чугаалаары берге» деп бодап турар. А ооң аалчыларга  экииргээн, ажы-төлүн кайы хире эки кижизидип билирин база чүткүлдүг суртаалдап чоруурун эскербейн турар. Моон көөрге, бодун өскелерге деңнээн ажыы чок. Бистиң аравыста бодунуң салым-чаяанын Иеговага бараалгадып база долгандыр улуска дузалаар дээш ажыглап чоруур акы-угбалар хөй боорга, биске дыка өөрүнчүг-дүр!

11. Иисустуң изин изээрин чүге кызып чоруур бис?

¹¹ Өскелер-биле бодувусту деңневес бис, ынчалза-даа олардан эки чүүлдерге өөренип ап болур бис. Маңаа ылаңгыя Иисустуң үлегери дыка тааржыр. Бис тергиин эвес болгаш, бодувусту ооң-биле деңнээн херээ чок. Ынчалза-даа Иисустуң кылган бүгү ажыл-херээ болгаш чугаалаан сөс бүрүзү — биске дыка эки үлегер-дир (1 Пет. 2:21). Иисустуң изин кара олчаан изээн тудум, Иегованың оон-даа эки бараалгакчылары болгаш суртаалчылары апарып турар бис.

12, 13. Давид хаандан чүнү өөренип ап турар бис?

¹² Тергиин эвес-даа болза, Бурганга шынчы, төлептиг үлегер арттырган эр, херээжен улустуң дугайында Библияда бижээн (Евр. 6:12). Чижээ, Иегова Давид хаанны: «Мээң сеткилимге кирер кижи» — дээн (Аж.-ч. 13:22). Давид бачыттыг кижи чораан, безин ол элээн каш шыңгыы частырыгны кылган. Ындыг-даа бол, ол биске эки үлегер. Чүге? Чүге дизе ол шииткелден дезер дээш, кажар-оптуг аргалар ажыглап, былданып, бодун агартынмаан. Чеже-даа берге болза, Давид сойгалаашкынны хүлээп ап, үүлгедии дээш шын-на сеткилинден хараадап турган. Ынчангаш Иегова ону өршээпкен (Ыд. ыр. 50:5, 6, 12—14).

¹³ Давид ышкаш, Иегованың мурнунга эки аттыг болуксаар-дыр силер бе? Ынчаарга бодуңардан айтырыңар: «Чемелээшкинни канчаар хүлээп ап турар мен? Чазыгларымны ол-ла дораан миннир мен бе азы бодумну агартынар мен бе? Буруумну өске улусче чууй кааптар чаңчылым бар бе? Частырыгларымны катаптавас дээш, бар шаам-биле кызып турар мен бе?» Бурганга шынчы улустуң дугайында Библиядан номчуп тургаш, мындыг айтырыгларны кижи бодунга салдынып болур: «Олар мээң ышкаш бергелерге таваржып турган бе? Олар кандыг төлептиг шынарларны илередип чораан?» Иегованың кандыг-бир шынчы бараалгакчызының дугайында номчаан саныңарда-ла: «Бо кижини канчаар өттүнүп болур мен?» деп бодуңардан айтырыңар.

14. Кады бүзүрээн ха-дуңмавыстың үлегери биске чүзү-биле ажыктыг?

¹⁴ Оон аңгыда, кады бүзүрээн ха-дуңмавыстың үлегери база биске ажыктыг.  Чыыжыңарда кым быжыг туруштуу-биле кандыг-ла бир шенелдени — үе-чергезиниң базыышкынын, өг-бүлезиниң удурланыышкынын, аарыг-аржыкты — ажып эртип чоруурул? Ол акывыстың азы угбавыстың кандыг шынарларын өттүнүксээр-дир силер? Оларның үлегериниң дугайында боданыр болзуңарза, шенелделерни ажып эртери силерге чиик боор. Бистиң аравыста ынча хөй быжыг бүзүрелдиг акы-угбалар бар боорга, Иеговага өөрүп четтирер-дир бис! (Евр. 13:7; Иак. 1:2, 3).

15. Иеговага улаштыр-ла өөрүшкүлүг бараалгаарынга Павелдиң кандыг сөстери биске дузалаар?

¹⁵ Чыышка тайбың болгаш чаңгыс аай чорук турзун дизе, кижи бүрүзү шыдаар шаа-биле үлүг-хуузун киирер ужурлуг. Бирги вектиң христианнарын сактып кээлиңер. Оларның салым-чаяаны болгаш күүседип чораан даалгалары аңгы-аңгы турган (1 Кор. 12:4, 7—11). Ынчалза-даа ол дээш олар адааннажып, аңгылажып турбаан. Павел элчин Эфесте чыышка мону бижээн: «Мага-боттуң кезек бүрүзү бодунуң хүлээлгелерин күүседип турда, ооң бүгү боду өзүп-мандып, ынакшылдың ачызында быжыгып орар» (Эф. 4:1—3, 11, 12, 16). Ол сөстер-биле Павел христианнарны боттарының салым-чаяанын бот-боттарын деткижип база Христостуң мага-бодун, азы чыышты, быжыктырар дээш ажыглаарынче оттурган. Ооң сүмезин дыңнааш, акы-угбалар тайбыңны болгаш чаңгыс аай чорукту тургузарынга үлүг-хуузун киирген. Бөгүн база ындыг чүүлдү чыыштарывыска көрүп болур.

16. Чүнү кылырынче хөөнненип алдыңар? (Еврейлерге 6:10).

¹⁶ Ынчап кээрге, бодуңарны өскелер-биле деңневеңер. Иисустан үлегер-чижекти алыңар. Ооң шынарларын кызып илередиңер. Иегованың бурунгу-даа, амгы-даа үениң бараалгакчыларын өттүнүңер. Бир эвес силер Бурганга эң-не экини берип турар болзуңарза, «кылган ажыл-херээңерни... Ол уттур хире эвес» дээрзинге чигзинмеңер. (Номчуптуңар: Еврейлерге 6:10.) Иеговага бараалгап тургаш, эки хөөннү чидирбеңер. Ооң сеткилин өөртүр дээш, үндүрүп турар күжениишкиннериңерни Иегова аажок үнелеп турар!