1. Мар милемлы шумпотон вае?

 ШУМПОТОН святой духлэн емышез пӧлы пыре. Татысь адӟиське, Иеговалэн потэ, ми шудоесь мед луомы шуыса (Гал. 5:22). Ми туж шумпотӥськомы Инмарлы вань сюлмысьтымы ужаны-тыршыны, озьы ик вын-агайёсмылы но сузэр-апайёсмылы юрттыны, малы ке шуоно «басьтон сярысь, сётыны умойгес» (Ап. уж. 20:35).

2, 3. а) Мар кароно, Иеговалы шумпотыса ужан-тыршон понна? (Галатъёслы 6:4) б) Мае ми эскеромы та статьяын?

² Кызьы гожтэмын Галатъёслы 6:4, Иеговалы шумпотыса ужан-тыршон понна, кык малпанъёсты лыдэ басьтоно (лыдӟе). Нырысетӥез, Инмарлы сётоно самой умойзэ, мармы милям вань. Лэсьтоно ваньзэ, мае ми быгатӥськомы. Соку ми шудо луомы (Матф. 22:36—38). Кыкетӥез, асьмеды мукетъёсыныз ӵошатыны уг яра. Ваньмыз, мар милям вань,— кылсярысь, тазалыкмы но быгатонлыкъёсмы — со Иеговалэсь. Нош вын-агайёсмы но сузэр-апайёсмы, милемын ӵошатыса, мае ке умойгес лэсьтыны быгато ке, соос понна шумпотоно. Малы ке шуоно асьсэлэн быгатонлыкъёсынызы соос асьсэды уг данъяло, нош Иеговаез данъяло. Соин ик, соосын ӵошатскем интые, соослэсь дышетскыны тыршоно.

³ Куке ми ум быгатӥське ужаны-тыршыны сомында, кӧня милям потэ, куддыръя милям мылкыдмы куашка. Та статья возьматоз, мар кароно сыӵе дыре. Озьы ик ми тодомы, кызьы ас югдурамы самой умойзэ сётыны быгатӥськомы но малы милям мукетъёсызлэсь дышетскеммы луэ.

4. Ку милям мылкыдмы куашканы быгатэ? Вералэ пример.

⁴ Иеговалэн куд-ог ужась-тыршисьёсызлы секыт валаны, тазалыксы яке арлыдзы сэрен азьвыл мында лэсьтыны уг быгато ини шуыса. Таӵе ик шӧдонъёсыз вал Кэрол сузэрлэн но. Со ужаз-тыршиз отын, кытын Адӟись-Ивортӥсьёс ӧжыт вал. Та сузэр 35 адямиосын Библиез дышетӥз. Соос пӧлысь тросэз Иеговалы сӥзиськизы но пылатӥськизы. Но берлогес Кэроллэн тазалыкез туж уродмиз. Со дорысьтыз но потаны ӧз быгаты ини. Со вера: «Мон валасько, тазалыке сэрен мукетъёсыз мында лэсьтыны уг быгатӥськы шуыса. Озьы ке но мыным потэ, мон соос кадь оскымон ӧвӧл шуыса. Мынам потэ тросгес лэсьтэме, но мон уг быгатӥськы. Соин ик мыным секыт луэ». Иегова понна Кэрол тырше лэсьтыны ваньзэ, мае быгатэ. Со милемлы умой адӟем карон возьматэ! Ми оскиськомы, солэсь тыршемзэ адӟыса, Иегова туж шумпотэ шуыса.

5. а) Мае вунэтоно ӧвӧл, азьвыл мында лэсьтыны уд ке быгатӥське ини? б) Учке суредэз. Малы вераны луоз, агай быдэс улонэз ӵоже Иеговалы самой умойзэ сётэ шуыса?

⁵ Тазалыкты яке арлыдды сэрен тӥ азьвыл мында лэсьтыны уд ке быгатӥське ини, юалэ асьтэлэсь: «Мае возьма мынэсьтым Иегова?» Со возьма, ас югдурады тӥ самой умойзэ лэсьтоды шуыса. Пуктэ син азяды: сузэр, кудӥзлы 80 ареслэсь тросгес, куректэ, уг быгаты шуыса лэсьтыны сомында, кӧня быгатэ вал 40 арес дыръяз. Со самой умойзэ сётыны тырше ке но, со малпа, Иеговалы та тырмыт ӧвӧл шуыса. Нош зэм ик-а со озьы? Малпаське: 40 арес дыръяз со Иеговалы самой умойзэ сётыны тыршиз. Али но, 80 арес дыръяз, со самой умойзэ сётыны тырше. Озьыен, со котьку но лэсьтӥз ваньзэ, мае быгатӥз. Тӥ малпаськоды ке, ужам-тыршемды Иеговалы уг яра шуыса, эн вунэтэ: Инмар ачиз тодэ, мар сое шумпоттэ, нош мар — уг. Иеговалы ужан-тыршонын лэсьтӥды ке ваньзэ, мае быгатӥськоды, Иегова шумпотоз. (Ӵошатэ Матфейлэсь 25:20—23.)

6. Малы дышетскыны луэ Мариялэсь?

⁶ Иеговалы шумпотыса ужан-тыршон понна, малпаськоно, мае ми карыны быгатӥськомы, нош малпано ӧвӧл, мае ми карыны ум быгатӥське. Тае ас вылаз шӧдӥз Мария. Урод тазалыкез сэрен со уг быгаты ужаны-тыршыны сомында, кӧня солэн потэ. Нырысь таин сэрен со куректыса улӥз но малпаз, солэсь нокыӵе пайда ӧвӧл шуыса. Но собере Мария ужпум кутӥз, кенешысьтызы одӥг сузэрлы юрттӥськыны. Та сузэр валес вылысьтыз султылыны уг быгаты вал. Мария вера: «Ми та сузэрен телефон пыр но гожтэтъёс гожъяса тодытӥмы. Мон туж шумпотӥсько вал, солы юрттыны быгатӥсько шуыса!» Ми но шудогес луомы, малпаськимы ке, мар карыны быгатӥськомы. Нош мар кароно, ми зэм но мукетъёсызлэсь тросгес но мае ке умойгес лэсьтыны быгатӥськомы ке?

7. Кыӵе визь-кенеш сётӥз апостол Пётр христианъёслы?

⁷ Апостол Пётр нырысетӥ гожтэтаз христианъёслэсь мылкыдзэс ӝутӥз лэсьтыны ваньзэ, мае быгато, вын-агайёссылы но сузэр-апайёссылы юрттон понна. Со вераз: «Огдылы огды юрттӥське, котькудӥз сыӵе кузьымен, кыӵезэ со басьтӥз Инмарлэсь пӧртэм пумо дэлетъёссэ басьтӥсь коркаен  ӟеч кивалтӥсь ляльчи кадь» (1 Пётр 4:10). Милемлы лэсьтоно ваньзэ, мае быгатӥськомы. Сюлмаськоно ӧвӧл, мукетъёсыз милемлы вожъяськыны кутскозы яке соослэн мылкыдзы куашкалоз шуыса. Соку гинэ милям Иеговалы самой умойзэ сётэммы луоз.

8. Малы быгатонлыкъёсыныд ушъяськыны уг яра? (1 Коринфъёслы 4:6, 7).

⁸ Но со дыре ик аслад быгатонлыкъёсыныд ушъяськыны уг яра. (Лыдӟе 1 Коринфъёслы 4:6, 7.) Шуом, тынад умой пӧрме кутскыны адямиосын Библиез дышетыны. Ӵапак али одӥг адями сое дышетыны соглаш кариськиз. Тынад туж потэ тодытон понна группаысьтыды мукет ивортӥсьёслы но тае верамед. Но тодытэмды бере пумиськыса, одӥг сузэр вераны кутскиз, кызьы со журналэз сётыны быгатӥз. Со журнал сётӥз, нош тон адямиен Библиез дышетыны кутскид! Кызьы тыныд астэ возёно? Тынад учыред вын-агайёсты но сузэр-апайёсты шумпоттысал, дыр. Но сузэрлэн мылкыдыз медаз куашка шуыса, умой луысал со сярысь мукет дыръя вераны. Сузэр сярысь малпаса, тон ӟеч сямдэ возьматод. Но тон Библия дышетонъёсты кутскыны быгатӥськод бере, азьланяз но озьы ик лэсьты!

9. Кызьы уже кутоно быгатонлыкъёсмес?

⁹ Вунэтоно ӧвӧл, быгатонлыкъёсмы — со Иеговалэн кузьымез шуыса. Соосты уже кутыса, ми асьмеды ум данъяське, ми кенешез юнматыны тыршиськомы (Флп. 2:3). Куке ми лэсьтӥськомы ваньзэ, мае быгатӥськомы, Инмарлэсь эриксэ быдэстон понна, ми шумпотӥськомы. Со шумпотон вае, малы ке шуоно ми Иеговаез данъяськомы, нош асьмеды — ум.

10. Малы асьмеды мукетъёсыныз ӵошатоно ӧвӧл?

¹⁰ Со сяна, вунэтоно ӧвӧл, котькуд адямилэн юн но ляб палъёсыз вань шуыса. Соин ик ог-огмес ӵошатыны уг яра. Пуктэ син азяды кык агайёсты. Одӥгез туж умой речьёс вера. Та агай малпа, со умойгес шуыса мукет агайлэсь, кудӥзлы речьёс вераны секытгес. Но со дыре ик та агай уг адӟы, мукетыз агай куно карыны яратэ, семьяез сярысь умой сюлмаське но ӟырдыт мылкыдын тодытэ шуыса. Та учырысь адӟиське, малы ог-огмес ӵошатоно ӧвӧл. Ми туж шумпотӥськомы, вын-агайёсмылэн но сузэр-апайёсмылэн пӧртэм быгатонлыкъёссы вань шуыса, кудъёсыныз соос Иеговаез данъяло но мукетъёсызлы юртто.

11. Малы ми тыршиськомы Иисуслэн пытьы кузяз мыныны?

¹¹ Ми асьмеды мукетъёсыныз ум ӵошатӥське. Но ми быгатӥськомы соослэсь дышетскыны. Тае валан понна, ойдолэ эскеромы Иисуслэсь примерзэ. Ми асьмеды соин ӵошатыны ум быгатӥське, малы ке шуоно ми сьӧлыкоесь. Озьы ке но Иисуслэн котькуд кылыз но ужез милемыз малы ке но дышетыны быгатэ (1 Пётр 2:21). Солэн пытьы кузяз мыныса, ми эшшо но умойгес Иеговалэн ужась-тыршисьёсыз но тодытӥсьёсыз луомы.

12, 13. Малы ми Давид эксэйлэсь дышетскыны быгатӥськомы?

¹² Библиын вераське трос оскымон пиосмуртъёс но кышномуртъёс сярысь. Соос сьӧлыкоесь вал ке но, ми соослэсь дышетскыны быгатӥськомы (Евр. 6:12). Кылсярысь, тодамы ваёмы Давид эксэез. Иегова со сярысь вераз: «Аслам сюлмылы кельшись пиосмурт» (Ап. уж. 13:22). Давид сьӧлыко вал но трос янгышъёс лэсьтӥз ке но, ми солэсь дышетскыны быгатӥськомы. Малы? Малы ке шуоно, куке сое тупатӥзы, со ассэ шонере поттыны ӧз туртты. Озьы ик со солы сётэм визь-кенешлэсь кылзӥськиз но туж жаляз, янгышъёс лэсьтӥз шуыса. Соин ик Иегова сое простить кариз (Пс. 50:5, 6, 12—14).

¹³ Давидлэсь дышетскон понна, юалэ асьтэлэсь: «Кызьы мон асме возисько, куке мыным визь-кенеш сёто? Валасько-а мон аслэсьтым янгышъёсме яке асме шонере поттыны тыршисько? Мон мукетъёссэ янгыше уськытӥсько-а? Тыршисько-а мон азьланяз таӵе ик янгышъёсты лэсьтытэк улыны?» Та выллем юанъёсты тӥ асьтэлы сётыны быгатӥськоды, куке Библиысь лыдӟиськоды мукет оскымон пиосмуртъёс но кышномуртъёс сярысь. Вал-а соослэн тӥляд кадь ик шуг-секытъёссы? Кыӵе умой сямъёссэс соос возьматӥзы? Котькуд адями сярысь лыдӟыкуды, юалэ асьтэлэсь: «Мар мон карыны быгатӥсько, Иеговалэн та оскымон ужась-тыршисез кадь луон понна?»

14. Малы вын-агайёсмылэсь но сузэр-апайёсмылэсь адӟем кароно?

¹⁴ Со сяна, ми быгатӥськомы дышетскыны пӧртэм арлыдо вын-агайёсмылэсь но сузэр-апайёсмылэсь. Вань-а тӥляд кенешады агайёс но сузэръёс, кудъёсызлэн али кыӵе ке шуг-секытъёссы вань? Оло нош, соослы пумит мыно огъёзъёссы,  семьязы яке соослэн тазалыксы урод? Кыӵе умой сямъёссэс тӥ соослэсь адӟем карыны быгатӥськоды? Соослэсь дышетскыса, тӥледлы капчигес луоз асьтэлэсь шуг-секытъёстэс вормыны. Ми туж тау кариськомы Иеговалы, солэн оскымон ужась-тыршисьёсызлэсь адӟем карыны быгатӥськомы шуыса! (Иак. 1:2, 3; Евр. 13:7).

15. Апостол Павеллэн кыӵе визь-кенешез юрттоз тӥледлы азьланяз но шумпотыса Иеговалы ужаны-тыршыны?

¹⁵ Кенешын тупаса но огкылысь улон понна, котькудӥзлы тыршыны кулэ. Малпаськомы нырысетӥ даурысь христианъёс сярысь. Котькудӥзлэн пӧртэм быгатонлыкъёсыз но ужъёсыз вал (1 Кор. 12:4, 7—11). Озьы ке но соос ог-огенызы ӵошатскыса ӧз улэ. Ефес карысь кенешлы апостол Павел гожтӥз: «Котькуд люкет солы кулэ ужез быдэсъя ке, соку яратон пыр Мугор будэ, юнма» (Еф. 4:1—3, 11, 12, 16). Та кылъёсын Павел христианъёсты ӧтиз быгатонлыкъёсынызы ог-огзэс юнматыны. Озьы соос «Христослэсь Мугорзэ», яке кенешез, юнматысалзы. Та визь-кенешлэсь кылзӥськыса, агайёс но сузэръёс тупаса но огкылысь улӥзы. Павеллэсь кылзӥськыса, ми но озьы ик улыны быгатӥськомы.

16. Мар карыны тӥляд мылкыдды вань? (Еврейёслы 6:10).

¹⁶ Озьыен, асьтэды мукетъёсыныз эн ӵошатэ. Иисуслэсь дышетске. Солэсь сямъёссэ адӟем каре. Дышетске Иеговалэн ужась-тыршисьёсызлэсь, кудъёсыз вашкала дыръя улӥзы но кудъёсыз асьме нуналъёсы уло. Тӥ Инмарлы самой умойзэ сётӥськоды ке, юн оске: «Со уг вунэты тӥлесьтыд уждэс». (Лыдӟе Еврейёслы 6:10.) Умой мылкыдын Иеговалы ужалэ-тырше. Эн вунэтэ: Инмар туж шумпотэ, куке адӟе вань сюлмысьтыды тыршемдэс.