1. Немиләрдин чоң хошаллиқни тапимиз?

 ЯРАТҚУЧИ ЙӘҺВА бизниң хошал болушимизни халайду. Биз буни нәдин билимиз? Сәвәви, хошаллиқ муқәддәс роһниң мевисидур (Гал. 5:22). «Елиштин көрә бериш бәхитлигирәк» дегән сөзләрниң раст екәнлигини чүшинип, вәз хизмитигә қатнишиш билән бәнт болуш вә етиқатдашларға түрлүк йоллар билән ярдәм бериштин зор хошаллиқ тапимиз (Әлч. 20:35).

2, 3. а) Галатилиқларға 6:4-айәткә асасланғанда, қандақ икки нәрсә хошаллиқни сақлап қелишимизға ярдәм бериду? ә) Бу мақалидә биз немиләрни көрүп чиқимиз?

² Әлчи Паул Галатилиқларға 6:4-айәттә (оқуң) хошаллиқни сақлап қелишимизға ярдәм беридиған икки нәрсини тилға алған. Биринчиси, Тәңри Йәһваға өзүмиздә бар әң яхшисини беришимиз керәк. Өзүмиздә бар әң яхшисини Униңға бәрсәк, хошаллиқни һис қилимиз (Мәт. 22:36—38). Иккинчиси, биз өзүмизни башқилар билән селиштурмаслиғимиз лазим. Тән-саламәтлигимиз, маһаритимиз яки қабилийәтлиримиз қандақ болушидин қәтъийнәзәр, биз Йәһваға миннәтдар болушимиз лазим. Сәвәви У буларниң һәммисини бизгә һәдийә қилған. Башқа тәрәптин, қериндашлиримиз вәз хизмәттә биздин яхширақ нәтиҗиләрни қолға кәлтүрсә, улар үчүн хошал болушимиз керәк. Чүнки улар қабилийәтлирини башқилардин яхширақ көрүнүш яки өз мәнпәитини көзләш үчүн әмәс, бәлки Йәһва Худаға шан-шәрәп кәлтүрүш үчүн ишлитиватиду. Шуңа өзүмизни башқилар билән селиштурушниң орниға улардин үгинишимиз керәк.

³ Бу мақалидә өзүмиз халиғандәк көпирәк хизмәт қилалмисақ, бизгә немә ярдәм берәләйдиғанлиғини көрүп чиқимиз. Униңдин башқа, өзүмиздә бар қабилийәтләрни әң яхши усулда ишлитиш үчүн немиләрни қилалаймиз вә башқилардин немиләрни үгинәләймиз дегәнләрни муһакимә қилимиз.

4. Бизни немә үмүтсизләндүрүши мүмкин? Мисал кәлтүрүң.

⁴ Худаниң бәзи хизмәтчилири яшинип қалғачқа яки тән-саламәтлиги начар болғачқа, өзлири халиғандәк Худаға көпирәк хизмәт қилалмай, чүшкүнлүккә чүшүп қалиду. Кэрол исимлиқ қериндишимиз буни баштин өткүзгән. У вәз ейтқучиларға еһтияҗлиқ җайға көчүп берип, хизмәт қилған еди. Шу йәрдә болғанда у 35 киши билән Муқәддәс китапни үгәнгән. Шулардин бәзилириниң Йәһва гувачиси болушқа ярдәм бәргән. Ениқки, Кэрол қериндаш вәз хизмитидә көп нәтиҗиләрни қолға кәлтүргән! Кейин униң тән-саламәтлиги начарлишип, көпинчә вақитта өйидин чиқмаслиққа тоғра кәлгән еди. У мундақ дегән: «Кесилим сәвәплик башқиларға охшаш көпирәк хизмәт қилалмайдиғанлиғимни чүшинимән. Шуңа иман-етиқадимни уларниңкигә охшаш анчә күчлүк әмәстәк һис қилимән. Өзүм халиған ишларниң һәммисини қилиш қолумдин кәлмәйду. Буниңдин бәк үмүтсизлинип кетимән». Бу қериндаш Йәһваға өзидә бар әң яхшисини беришни халайду вә у һәқиқәтән махташқа лайиқ! Биз шуниңға ишинәләймизки, бизниң дәрдимизгә һәмдәрт болидиған Худайимиз Кэролниң көрсәткән тиришчанлиғини бәк қәдирләйду!

5. а) Көпирәк хизмәт қилиш қолуңиздин кәлмәй, роһиңиз чүшүп кәтсә, немини әстин чиқармаслиғиңиз керәк? ә) Рәсимдә көрситилгәндәк, бурадәр Йәһваға хизмәт қилишта өзидә бар әң яхшисини давамлиқ бериш үчүн немә қиливатиду?

⁵ Әгәр көпирәк хизмәт қилиш қолуңиздин кәлмәй, үмүтсизләнгән болсиңиз, өз-өзүңиздин: «Йәһва Худа мениңдин немини күтиду?»— дәп сораң. У сиздин өзүңиздә бар әң яхшисини беришиңизни күтиду. Бир вәзийәтни көрүп чиқайли. Йеши 80гә кәлгән қериндаш бүгүнки күндә 40 йешида хизмәт қилғандәк, көпирәк хизмәт қилалмиғанлиқтин үмүтсизләнди дәйли. У һәтта Худаға өзүмдә бәр әң яхшисини беришкә тиришсамму, У буниңдин хурсән болмайду дәп ойлайду. Лекин бу тоғриму? Буни ойлап көрүң: қериндишимиз 40 йешида Худаға әң яхшисини бәргән болса, у һәтта 80 йешидиму шундақ қилиш үчүн тиришиватқан болса, демәк у өзидә бар әң яхшисини беришини һечқачан тохтатмиған. Бизму Йәһвани хурсән қилиш үчүн анчә яхшисини берәлмәйватимән дәп ойлисақ, немә қилсақ болиду? Биз Йәһвани немә хошал қилидиғанлиғини, У Өзи бәлгүләйдиғанлиғини әстин чиқармаслиғимиз лазим. Худаға өзүмиздә бар әң яхшисини беришкә һәрикәт қилсақ, У интайин хошал болуп, бизни махтайду (Мәтта 25:20—23ни селиштуруң).

6. Мария исимлиқ қериндаштин немини үгинәләймиз?

⁶ Диққитимизни қолумиздин кәлмәйдиған ишларға әмәс, өзүмиз қилалайдиған ишларға қаратсақ, хошаллиқ тепиш асанирақ болиду. Мария исимлиқ қериндашниң мисалини көрүп чиқайли. Кесәллик түпәйлидин у халиғандәк көп хизмәт қилалмайду. Дәсләптә у чүшкүнлүккә чүшкән вә өзини керәксиздәк һис қилған. Кейинәрәк у кесәл караватида орун тутуп йетип қалған җамаәттики бир қериндаш һәққидә ойлашқа башлиған вә униңға ярдәм беришни қарар қилған. Мария мундақ дәйду: «Қериндаш билән телефон вә хәт йезиш арқилиқ вәз қилишни келишивалдуқ. Һәр қетим униң билән вәз қилғандин кейин униңға ярдәм берәлигиним үчүн өзүмни хошал вә қанаәт тапқандәк һис қилаттим». Бизму диққитимизни қолумиздин кәлмәйдиған ишларға әмәс, бәлки өзүмиз қилалайдиған ишларға қаратсақ, техиму хошаллиқ тапалаймиз. Әгәр Йәһваға көпирәк хизмәт қилиш қолумиздин кәлсә яки бәзи саһалирида өз қабилийәтлиримизни ишлитәлисәк немә қилсақ болиду?

7. Әлчи Петрус Мәсиһ әгәшкүчилиригә қандақ әмәлий мәслиһәт бәргән?

⁷ Әлчи Петрус биринчи хетидә Мәсиһ әгәшкүчилирини өзлиригә берилгән қабилийәтләр вә маһарәтлирини ишлитип, етиқатдашлириға илһам-мәдәтләрни беришкә дәвәт қилған.  У мундақ дәп язған: «Худаниң...һәрбириңларға қабилийәт қандақ өлчәмдә берилгән болса, бир-бириңларға хизмәт қилғанда, шундақ өлчәмдә пайдилиниңлар» (Пет. 1-х. 4:10). Биз һәргизму башқилар қабилийәтлиримизни көрүп, ич тарлиқ қилиду яки роһи чүшүп кетиду дәп ойлимай, давамлиқ өз қабилийәтлиримизни ишлитишимиз лазим. Әгәр қабилийәтләримизни толуқ ишләтмисәк, Йәһва Худаға өзүмиздә бар әң яхшисини бәрмигән болимиз.

8. Коринтлиқларға 1-хәт 4:6, 7-айәтләргә асасланғанда, немә үчүн махтиништин сақлинишимиз керәк?

⁸ Бизгә әта қилинған қабилийәтлиримиздин әң яхши усулда пайдилинишимиз керәк. Лекин қабилийәтлиримизни көз-көз қилип, махтиништин сақлинишимиз лазим (Коринтлиқларға 1-хәт 4:6, 7ни оқуң). Мәсилән, сиз Муқәддәс китап үгинишини башлашқа маһир дәйли. Сиз бу соғатни давамлиқ ишлитишиңиз керәк! Лекин соғаттин пайдилиниш билән, уни көз-көз қилип махтиниш арисида пәриқ бар. Сиз вәз хизмәттә әҗайип вақиәни баштин кәчүрүп, Муқәддәс китап үгинишини башлидиңиз дәп пәрәз қилайли. Бу тоғрилиқ вәз учришиштики топиңиздики қериндашларға ейтип бәрмәкчи болдиңиз. Топ билән жиғилғанда, бир қериндаш вәз хизмитидә журнал берәлигәнлиги һәққидә һаяҗанлинип ейтип бериватиду. У журнални берәлигән, сиз болсиңиз, Муқәддәс китап үгинишини башлидиңиз. Әнди бундақ вәзийәттә немә қилисиз? Сиз баштин кәчүргән вақиәни топқа илһам беридиғанлиғини билсиңизму, уни башқа қолайлиқ бир вақитта ейтип беришни қарар қилишиңиз мүмкин. Сәвәви қериндашниң хошаллиғиға ортақ болушни халайсиз. Амма һәргизму кишиләрни Муқәддәс китап үгинишкә тәклип қилиштин тохтап қалмаң. Сизгә әта қилинған соғини ишлитиш пурситини һечқачан қолдин бәрмәң!

9. Соғатлардин қандақ пайдилинишимиз керәк?

⁹ Есимиздә болсунки, өзүмиздә бар болған туғма қабилийәтләр Худа һәдийә қилған соғатлардур. Бу соғатлардин өз-өзүмизни көз-көз қилиш үчүн әмәс, бәлки етиқатдашлиримизни қоллап-қувәтләш үчүн пайдилинишимиз лазим (Флп. 2:3). Өзүмизни көрситиш яки башқилардин үстүн екәнлигимизни испатлаш үчүн әмәс, бәлки Худаниң ирадисини орунлаш үчүн күчимизни вә қабилийәтлиримизни ишләтсәк, хошаллиққа еришимиз. Чүнки шу соғилиримиз билән Яратқучимиз Йәһвани мәдһийиләймиз.

10. Немә үчүн өзүмизни башқилар билән селиштуруш натоғра?

¹⁰ Әгәр киши пәхәс болмиса, өзиниң күчлүк тәрәплирини башқиларниң аҗиз тәрәплири билән селиштуруш тузиғиға чүшиши мүмкин. Мәсилән, бир бурадәрни наһайити яхши натиқ дәйли. Бу униң күчлүк тәрипи. Бирақ у анчә яхши нутуқ ейталмайдиған башқа бурадәрни өзидин төвән көридиған болди. Лекин әшу бурадәр  нутуқларни яхши ейталмисиму, меһмандостлуқ, бала тәрбийиләш вә қизғинлиқ билән вәз қилишта яхши үлгә көрситиду. Йәһваға хизмәт қилишта вә етиқатдашларға ярдәм бериштә Худа һәдийә қилған соғатлиридин ишлитидиған көплигән қабилийәтлик қериндашлиримизниң болғанлиғи үчүн Йәһваға миң шүкри!

11. Немә үчүн Әйса Мәсиһниң үлгисигә әгишиш үчүн тиришишимиз лазим?

¹¹ Гәрчә өзүмизни башқилар билән селиштуруш натоғра болсиму, амма Худаға садиқ хизмәт қилидиғанлардин үлгә елиш биз үчүн пайдилиқ. Әйса Мәсиһ биз үчүн әң әҗайип үлгә қалдурған. У мукәммәл инсан болсиму, униң есил пәзиләтлири вә иш-һәрикәтлиридин көп нәрсиләрни үгинәләймиз (Пет. 1-х. 2:21). Әйсаниң үлгисигә әгишиш үчүн қолумиздин кәлгәнниң һәммисини қилишқа тиришсақ, Худаниң яхши хизмәтчиси болуп, вәз хизмәтни техиму үнүмлүк қилалаймиз.

12, 13. Давут падишадин қандақ үлгә алалаймиз?

¹² Муқәддәс Язмиларда намукәммәллигигә қаримай, садақәтмәнлигини сақлиған көплигән әр вә аялларниң мисаллири йезилған. Улардин үлгә алалаймиз (Ибр. 6:12). Мәсилән, Давут падишаниң мисали һәққидә ойлап көрүң. Йәһва Худа уни көңлүмдикидәк бир адәм дәп атиған (Әлч. 13:22). Бирақ Давут падиша намукәммәл адәм болған вә бирқанчә қетим еғир гуна садир қилған. Буниңға қаримастин, биз униңдин үлгә алсақ болиду. Немә үчүн? Чүнки униңға нәсиһәт берилгәндә, у өзини ақлашқа тиришмиған. Әксинчә, уни қобул қилип, өткүзгән гунасиға чин жүрәктин товва қилип, Худадин кәчүрүм сориған. Нәтиҗидә, Йәһва Худа уни кәчүргән (Зәб. 51:3, 4, 10—12).

¹³ Давут падишадин үлгә елип, өз-өзүңиздин мундақ сорап көрүң: «Берилгән нәсиһәткә қандақ қараймән? Дәрһал хаталиқлиримни тез иқрар қилимәнму яки өзүмни ақлашқа тиришимәнму? Яки болмиса, башқиларни әйипләшкә алдираймәнму?» Муқәддәс китаптики башқа садиқ әрләр вә аяллар һәққидә оқуғиниңизда, өз-өзүңиздин бу соалларни сорисиңиз болиду: Мән баштин кәчүргән қийинчилиқлар Муқәддәс китаптики әрләр вә аяллар баштин кәчүргән қийинчилиқларға охшамду? Улар қандақ гөзәл пәзиләтләрни көрсәткән? Һәрбир вәзийәттә өз-өзүңиздин: «Йәһва Худаниң бу хизмәтчисидин немини үгинәләймән?»— дәп сораң.

14. Етиқатдашлиримиздин үгинишниң қандақ пайдисини көрәләймиз?

¹⁴ Биз йәнә яш вә яшанған қериндашлиримиздин үгинишниң пайдисини көрәләймиз. Мәсилән, җамаитиңиздә синақларға садиқлиқ билән бәрдашлиқ бериватқан бирәр қериндашни есиңизгә алаламсиз? Бәлким, у тәңдашлириниң бесими, аилә әзалириниң қаршилиғи  яки тән-саламәтлиги начар болуши сәвәплик, қийинчилиқлар билән күрәш қиливатқанду. Бу қериндашниң сиз йетилдүрүшни халайдиған пәзилити барлиғини көрүватамсиз? Бундақ етиқатдашлардин үгиниш қийинчилиқлириңизға бәрдашлиқ беришиңизгә ярдәм қилалайду. Бизгә үлгә болалайдиған садиқ етиқатдашлиримизниң мисаллири болғанлиғи үчүн бәк миннәтдармиз! Бу һәқиқәтән бизни хошал қилиду! (Ибр. 13:7; Яқуп 1:2, 3).

15. Әлчи Паул давамлиқ хошал-хорам Худаға хизмәт қилишқа ярдәм беридиған қандақ мәслиһәтни бәргән?

¹⁵ Җамаәттә тинчлиқ вә инақ-иттипақлиқни илгири сүрүш үчүн өзүмиздә бар әң яхшисини беришимиз керәк. Мәсилән, биринчи әсирдики Мәсиһ әгәшкүчилириниң мисалини көрүп чиқайли. Уларниң һәрбири һәр түрлүк соғатлар вә қабилийәтләргә егә болған (Кор. 1-х. 12:4, 7—11). Бирақ бу уларниң арисида риқабәт яки бөлүнүшниң пәйдә болушиға сәвәп болмиған еди. Әксинчә, әлчи Паул уларға Мәсиһниң тенини мустәһкәмләш үчүн немә қилиш керәклигини ейтқан. У әфәсликләргә мундақ дәп язған: «Һәрбир әза, меһир-муһәббәттә мустәһкәмлиниш үчүн, тәнниң өсүшигә ярдәм қилмақта» (Әфәс. 4:1—3, 11, 12, 16). Паулниң мәслиһитигә қулақ салғанлар тинчлиқ вә инақ-иттипақлиқни сақлашқа өз һәссисини қошқан. Бүгүнки күндиму җамаәтлиримиздә шуни көрүватимиз.

16. Немә қилишқа бәл бағлишимиз керәк? (Ибранийларға 6:10)

¹⁶ Өзүңизни башқилар билән селиштуруштин сақлинишқа бәл бағлаң. Әксинчә, Әйса Мәсиһни үлгә қилип, униң пәзиләтлиридин үлгә елишқа тиришиң. Муқәддәс китапта тилға елинғанларниң вә бүгүнки күндә садиқ етиқатчиларниң етиқадидин үлгә елиң. Қолуңиздин келишичә өзүңиздә бар әң яхшисини давамлиқ Худаға бериң. Худа адаләтсиз әмәстур, сизниң әҗир-меһнәтлириңизни унтуп қалмайду дегән сөзләргә болған ишәнчиңиз камил болсун (Ибранийларға 6:10ни оқуң). Йәһва Худа сизниң Уни хурсән қилиш үчүн өзүңиздә бар әң яхшисини чин жүрәктин бәргиниңизни бәк қәдирләйдиғанлиғини билип, давамлиқ Униңға хошаллиқ билән хизмәт қилиң!