1. Ndi mini zwine zwa ita uri ri takale nga maanḓa?

 YEHOVA u ṱoḓa ri tshi takala. Zwenezwi ri zwi ḓivha ngauri dakalo ndi tshiṅwe tsha zwi aṋwiwaho nga muya wawe mukhethwa. (Vhagal. 5:22) Samusi u ṋea zwi tshi takadza u fhira u ṋewa, ri a takala zwihulu musi ri tshi shuma nga maanḓa tsimuni na u thusa vhahashu nga nḓila dzo fhambanaho.—Mish. 20:35.

2-3. (a) U ya nga Vhagalata 6:4, ndi zwithu zwifhio zwivhili zwine zwa ḓo ri thusa uri ri dzule ro takala tshumeloni ya Yehova? (b) Ri ḓo amba nga ha mini kha ino thero?

² Kha Vhagalata 6:4, muapostola Paulo o amba nga ha zwithu zwivhili zwine zwa ḓo ri thusa uri ri dzule ro takala. (Vhalani.) Tsha u thoma, ri tea u fha Yehova zwa khwine-khwine. Zwenezwo zwi ḓo ita uri ri takale. (Mat. 22:36-38) Tsha vhuvhili, ri songo ḓivhambedza na vhaṅwe. Ri tea u livhuwa Yehova uri ri a kona u mu itela zwiṅwe hu sa londwi mutakalo washu, nḓila ye ra gudiswa ngayo kana vhukoni vhune ra vha naho. Ri songo hangwa uri zwithu zwoṱhe zwine ra vha nazwo ro fhiwa ngae. Nga zwenezwo, musi vhaṅwe vha tshi ita zwo engedzeaho u fhira zwine riṋe ra kona u zwi ita tshumeloni ya Yehova, ri tea u takala ngauri vha khou shumisa vhukoni vhune vha vha naho u itela u hulisa Yehova, hu si vhone vhaṋe kana u itela u ḓivhuyedza. Ri tea u guda khavho nṱhani ha u ṱaṱisana navho.

³ Kha ino thero, ri ḓo vhona uri ri nga thuswa nga mini arali ri tshi pfa u nga a ri tsha kona u ita zwo engedzeaho tshumeloni ya Yehova. Ri ḓo dovha ra vhona uri ri nga shumisa hani vhukoni vhune ra vha naho na uri ri nga guda mini kha vhaṅwe.

4. Ndi mini zwine zwa nga kula vhaṅwe nungo? Ṋeani tsumbo.

⁴ Vhaṅwe vhashu a ri tsha kona u ita zwo engedzeaho tshumeloni ya Yehova nga nṱhani ha uri ro no vha vhalala kana nga vhulwadze nahone zwenezwo zwi nga ri kula nungo. Zwenezwo zwo itea kha Carol. O vha a tshi shuma fhethu hu re na ṱhoḓea. Musi e henefho, o guda na vhathu vha 35, a thusa vhaṅwe vhavho uri vha ḓiṋekedzele na u lovhedzwa. Carol o vha a tshi shuma nga maanḓa vhuḓinḓani. O mbo ḓi thoma u vha na mutakalo u si wavhuḓi, zwa ita uri a fhedze tshifhinga tshinzhi e hayani. Carol u ri: “A thi tsha kona u ita zwo engedzeaho u fana na vhaṅwe ngauri ndi na mutakalo u si wavhuḓi nahone zwenezwo zwi ita uri ndi pfe u nga a thi fhulufhedzei u fana na vhaṅwe. A thi tsha kona u ita zwine nda ṱoḓa u zwi ita nahone zwi a nkula nungo.” Carol u khou ṱoḓa u fha Yehova zwa khwine-khwine. Zwenezwi ndi zwavhuḓi. Ri na vhungoho ha uri Mudzimu washu ane a pfela vhuṱungu o takala ngauri Carol u khou ita zwoṱhe zwine a nga kona.

5. (a) Ri tea u humbula mini arali ri tshi kulea nungo nga nṱhani ha uri ri khou pfa u nga a ri khou itela Yehova zwoṱhe zwine ra nga kona? (b) Samusi zwo sumbedzwa kha zwifanyiso, wahashu u khou bvela hani phanḓa a tshi ṋea Yehova zwoṱhe zwine a nga kona?

⁵ Arali nga zwiṅwe zwifhinga ni tshi ḓipfa no kulea nungo ngauri a ni tsha kona u ita zwo engedzeaho, ni ḓivhudzise uri: ‘Yehova u ṱoḓa ndi tshi ita mini?’ U ṱoḓa ni tshi mu fha zwa khwinesa kha vhuimo vhune na vha khaho. Sa tsumbo, wahashu wa tshifumakadzini a re na miṅwaha ya 80 o kulea nungo ngauri u vhona u nga ha tsha ita zwo engedzeaho u fana na musi e na miṅwaha ya 40. U vhona u nga naho a tshi khou ṋea Yehova zwoṱhe zwine a nga kona, Yehova ha zwi takaleli. Fhedzi naa zwenezwo ndi ngoho? Kha ri humbule nga hazwo. Arali onoyo wahashu o ita zwoṱhe zwine a nga kona e na miṅwaha ya 40 nahone a tshi khou ita zwoṱhe zwine a nga kona zwino e na miṅwaha ya 80, zwi amba uri o dzula a tshi itela Yehova zwoṱhe zwine a nga kona. Arali ri tshi vhona u nga a ri khou itela Yehova zwa khwine-khwine, ri tea u humbula uri Yehova ndi ene ane a dzhia phetho ya uri zwa khwinesa zwine ra nga kona u mu itela zwone ndi zwifhio. Arali ra ṋea Yehova zwa khwinesa, u ḓo ri takalela, a ri: “Wo shuma.”—Vhambedzani na Mateo 25:20-23.

6. Ri nga guda mini kha tsumbo ya Maria?

⁶ Zwi ḓo ri lelutshela uri ri takale arali ra livhisa ṱhogomelo kha zwithu zwine ra kona u zwi ita, nṱhani ha zwithu zwine ra si kone u zwi ita. Ṱhogomelani tsumbo ya muṅwe wahashu wa tshifumakadzini ane a pfi Maria, a re na vhulwadze vhune ha ita uri a si kone u ita zwo engedzeaho vhuḓinḓani. U thomani o vha a tshi pfa o tsikeledzea nahone e si tshithu. Fhedzi o mbo ḓi humbula u thusa muṅwe wahashu ane a vha tshivhidzoni tshawe, ane vhulwadze hawe ha si mu tendele u bva mmbeteni. Maria u ri: “Ndo vha ndi tshi huwelela na onoyo wahashu ndi tshi shumisa founu na marifhi. Musi ndi tshi shuma na onoyo wahashu, ndo vha ndi tshi vhuya hayani ndo takala na u fushea ngauri ndo kona u mu thusa.” Na riṋe ri ḓo takala nga ho engedzeaho arali ra livhisa ṱhogomelo kha zwine ra kona u zwi ita, nṱhani ha zwine ra si kone u zwi ita. Fhedzi hu pfi mini arali ri tshi kona u ita zwo engedzeaho kana hu na zwiṅwe zwithu zwine ra zwi konela tshumeloni ya Yehova?

7. Muapostola Petro o ri ṋea nyeletshedzo ifhio?

⁷ Kha vhurifhi ha u thoma he muapostola Petro a vhu ṅwala, o ṱuṱuwedza vhahawe uri vha  shumise vhukoni kana zwifhiwa zwine vha vha nazwo u itela u ṱuṱuwedza vhaṅwe. Petro o ri: “Sa vhashumeli vhe Mudzimu a vha sumbedza vhuthu vhuhulu . . . ni shumelane ni tshi shumisa tshifhiwa tshe na ṋewa.” (1 Pet. 4:10) Ri songo litsha u shumisa vhukoni vhune ra vha naho nga nṱhani ha uri ri khou ofha uri vhaṅwe vha ḓo vha na vivho kana uri vha ḓo kulea nungo. Arali ra ita nga u ralo, ri ḓo vha ri sa khou ṋea Yehova zwoṱhe zwine ra nga kona.

8. U ya nga 1 Vhakorinta 4:6, 7, ndi ngani ri tshi tea u iledza u zuwa nga ha vhukoni vhune ra vha naho?

⁸ Ri tea u shumisa vhukoni vhune ra vha naho, fhedzi ri ṱhogomele uri ri si zuwe ngaho. (Vhalani 1 Vhakorinta 4:6, 7.) Sa tsumbo, ni nga vha ni tshi kona u thoma pfunzo ya Bivhili. Ni tea u shumisa honoho vhukoni vhune na vha naho. Fhedzi ndi zwa ndeme uri ni si zuwe nga nṱhani ha honoho vhukoni. Kha ri ri no vha na nyambedzano yavhuḓi na muṅwe musi ni tsimuni, na thoma pfunzo ya Bivhili. Nahone ni khou ṱoḓa u vhudza tshigwada tsha tsimu tshine na vha khatsho nga ha yeneyo tshenzhelo. Fhedzi musi ni tshi ṱangana navho, na wana muṅwe wahashu a tshi khou vha vhudza uri o tshimbidza magazini. Onoyo wahashu o tshimbidza magazini ngeno inwi no thoma pfunzo ya Bivhili. Ni ḓo ita mini? Ni a zwi ḓivha uri tshenzhelo yaṋu i ḓo vha ṱuṱuwedza, fhedzi ni nga khetha u vha vhudza nga hayo nga murahu ngauri a ni ṱoḓi uri wahashu we a tshimbidza magazini a pfe u nga zwe a zwi ita ndi zwiṱuku. Musi ni tshi ita nga u ralo, ni ḓo vha ni khou sumbedza wahaṋu vhuthu. Fhedzi ni songo vhuya na litsha u shumisa vhukoni vhune na vha naho ha u thoma pfunzo ya Bivhili.

9. Ri tea u shumisa hani vhukoni vhune ra vha naho?

⁹ Ri songo hangwa uri vhukoni vhune ra vha naho ro tou ṋewa nga Mudzimu. Ndi ngazwo ri tshi tea u vhu shumisa u vhuyedza tshivhidzo, hu si u ḓivhuyedza riṋe vhaṋe. (Vhafil. 2:3) Musi ri tshi shumisa nungo dzashu na vhukoni hashu u itela u ita zwine Mudzimu a zwi funa, ri ḓo takala ngauri ri khou shumisa vhukoni hashu u itela u hulisa Yehova, hu si u ḓivhuyedza riṋe vhaṋe kana u ḓiita vha khwine.

10. Ndi ngani ri songo tea u ḓivhambedza na vhaṅwe?

¹⁰ Arali ra sa ṱhogomela, ri nga thoma u vhambedza zwine riṋe ra kona u zwi ita na zwine muṅwe a si kone u zwi ita. Sa tsumbo, muṅwe wahashu wa tshinnani a nga vha a tshi vhea nyambo dzavhuḓi. Ndi zwe a zwi konela. A nga vhona u nga ene u khwine u fhira muṅwe wahashu wa tshinnani ane a si vhe na vhukoni vhu fanaho na hawe ha u vhea nyambo. Fhedzi  onoyo wahashu a si na honoho vhukoni a nga vha a tshi ṱanganedza vhaeni, a tshi kona u gudisa vhana vhawe kana a tshi fhisea vhuḓinḓani. Ndi zwavhuḓi uri ri na vhahashu vhane vha vha na vhukoni ho fhambananaho, vhane vha shumisa honoho vhukoni u itela u shumela Yehova na u thusa vhaṅwe.

11. Ndi ngani ri tshi tea u edzisa Yesu?

¹¹ Naho ri songo tea u ḓivhambedza na vhaṅwe, ri nga guda zwithu zwinzhi kha vhaṅwe vhashumeli vha Yehova. Muthu ane ra nga guda khae nga maanḓa ndi Yesu. Naho Yesu o vha e si na tshivhi, ri nga guda zwithu zwinzhi kha nḓila ye a vha e ngayo na kha zwe a zwi ita. (1 Pet. 2:21) Musi ri tshi ita zwoṱhe zwine ra nga kona uri ri edzise tsumbo yawe nga vhuronwane, ri ḓo khwinisa nḓila ine ra shumela ngayo Yehova na nḓila ine ra huwelela ngayo.

12-13. Ri nga guda mini kha Khosi Davida?

¹² Ri nga wana tsumbo nnzhi Bivhilini dza vhashumeli vha Yehova vha fhulufhedzeaho vhane ra nga vha edzisa naho vho vha vhe na tshivhi. (Vhahev. 6:12) Ri na tsumbo ya Khosi Davida we Yehova a ri ndi “munna ane a takadza mbilu yanga.” (Mish. 13:22) Fhedzi Davida o vha e na tshivhi nahone o ita vhukhakhi vhuhulu. Naho zwo ralo, u tsumbo yavhuḓi ine ra nga i edzisa. Ndi ngani? Ndi ngauri musi a tshi kaidziwa ho ngo lingedza u ḓiimelela. Nṱhani hazwo, o tenda musi a tshi kaidziwa, a ḓisola nga zwe a ita. Zwenezwo zwo ita uri Yehova a mu hangwele.—Ps. 51:3, 4, 10-12.

¹³ Ri nga guda kha Davida nga u ḓivhudzisa uri: ‘Ndi ita mini musi ndi tshi kaidziwa? Naa ndi a ṱavhanya u tenda uri ndo khakha kana ndi a lingedza u ḓiimelela? Naa ndi a sumba vhaṅwe nga minwe? Naa ndi a lingedza uri ndi si dovhe vhukhakhi hanga?’ Ni nga dovha na ḓivhudzisa dzenedzo mbudziso musi ni tshi vhala nga ha vhaṅwe vhashumeli vha Mudzimu vha fhulufhedzeaho. Naa vho ṱangana na thaidzo dzi fanaho na dzaṋu? Vho sumbedza hani uri vha vhathu vhavhuḓi? Musi ni tshi vhala nga ha muṅwe na muṅwe wavho, ni ḓivhudzise uri: ‘Ndi nga mu edzisa hani?’

14. Ri nga vhuyelwa hani nga u guda kha vhahashu?

¹⁴ Ri nga dovha ra vhuyelwa nga u guda kha vhahashu hu sa londwi miṅwaha yavho. Sa tsumbo, naa tshivhidzoni tshaṋu hu na muthu ane a khou ṱangana na mutsiko wa thangana dza murole, ane a khou tovholwa muṱani kana ane a vha na mutakalo u si wavhuḓi? Naa hu na zwithu zwavhuḓi zwine na nga zwi guda khae? Ni nga guda nḓila ine na nga konḓelela ngayo milingo ine na vha nayo kha tsumbo yawe. Ri a  livhuwa vhukuma ngauri vhenevha vhahashu vha khou ri vhetshela tsumbo yavhuḓi.—Vhahev. 13:7; Yak. 1:2, 3.

15. Ndi nyeletshedzo ifhio ye muapostola Paulo a ri ṋea yone ine ya ḓo ri thusa uri ri shumele Yehova ro takala?

¹⁵ Ri tea u ita zwoṱhe zwine ra nga kona tshumeloni ya Yehova uri hu kone u vha na mulalo na vhuthihi tshivhidzoni. Kha ri ambe nga ha Vhakriste vha u thoma. Vho vha vhe na vhukoni na mishumo yo fhambanaho tshumeloni ya Yehova. (1 Vhakor. 12:4, 7-11) Fhedzi zwenezwo a zwo ngo ita uri vha lwe kana u ṱaṱisana. Nṱhani hazwo, Paulo o vha ṱuṱuwedza uri vha ite zwoṱhe zwine vha nga kona uri vha “fhaṱe muvhili wa Kristo.” Paulo o vhudza Vhaefesa uri: “Musi miraḓo yoṱhe i tshi shuma zwavhuḓi, zwi ita uri muvhili u aluwe na u khwaṱhiswa nga lufuno.” (Vhaef. 4:1-3, 11, 12, 16) Vhe vha ita zwe Paulo a vha vhudza vho ita uri tshivhidzoni hu vhe na vhuthihi na mulalo. Nahone honoho vhuthihi na mulalo zwi hone zwivhidzoni na ṋamusi.

16. Ri tea u ḓiimisela u ita mini? (Vhahevheru 6:10)

¹⁶ Ḓiimiseleni u sa ḓivhambedza na vhaṅwe. Ni gude kha Yesu na u edzisa nḓila ye a vha a tshi ita ngayo zwithu. Ni gude na kha tsumbo dzi re Bivhilini na dza vhahashu vha musalauno. Musi ni tshi ita zwoṱhe zwine na nga kona, ni nga vha na vhungoho ha uri Yehova “o luga, ha nga hangwi mushumo waṋu.” (Vhalani Vhahevheru 6:10.) Bvelani phanḓa ni tshi shumela Yehova no takala nahone ni ḓivhe uri u a takala musi a tshi vhona ni tshi ita zwoṱhe zwine na nga kona u itela u mu takadza.