1. Eheeni enkela oniphwanyiha ohakalala weekhaikhai?

 YEHOVA ontthuna weera hiyo nihakalaleke. Hiyo ninnasuwela eyo mwaha wooweera ohakalala oneerela empari soowiima sa munepa wootteela. (Agal. 5:22) Hiyo noosuwela weera ovaha onnaphwanyiha ohakalala opwaha waakhela, mwa yeeyo, hiyo ninnaphwanya ohakalala naapakaka ele ninweraahu mmutekoni woolaleera ni naakhaviheraka asinna.—Mit. 20:35.

2-3. (a) Moovariha ni Agalata 6:4, itthu heeni piili sinkela onikhavihera ovirelela ohakalala mmutekoni mwa Yehova? (b) Eheeni ninkelaahu woona mpuwa mwa yoosoma ene yeela?

² Murummwa Paulo ohimme weera sookhala itthu piili sineera sinikhavihere ovirelela okhala oohakalala. (Mmusome Agalata 6:4.) Etthu yoopatxera, okhalano sooluluwanya ni otthuna opaka ele ninweeraahu mmutekoni mwa Yehova. Wakhala weera nnoopaka ele ninweraahu hiyo nnoohakalala. (Math. 22:36-38) Yanaaveli, ori ohiilikanxera ni atthu akina. Ninatthuneya omuxukurela Yehova mwaha wa ele hiyo ninweraahu opaka. Nihipwatthaka makhalelo a ekumi ahu, osuwela wahu, naari itthu ikina hiyo ninsuwenlaahu. Aani, sootheene hiyo ninweraahu ninvahiwa ni Yehova. Mene akhala mutthu okhalanne mikhalelo sooreera mmutekoni woolaleera, ninnatthuneya ohakalala ni mutthu owo, mwaha wooweera onnavarela muteko mikhalelo iyo weera anvuwihe Yehova. Ohiya wiittottopela. Nuupuwelaka haawo, khaninrowa winlela waakupha atthu akina, mene nneereke otthuna oxuttera ni atthu awo.

³ Mpuwa mwa yoosoma ene yeela, ninkela woona etthu nintthuneyaahu opaka noonaka weera hiyo noottettheya nihiweraka opaka itthu sootheene hiyo nintthunaahu ompakela Yehova. Nave ninrowa woona moota nneeraahu nivareleke muteko mikhalelo  mikina Yehova onivahaawe mmutekoni mwawe. Ni moota ntakihero naatthu akina ninkelaaya onikhavihera.

4. Eheeni eneera emuttettheihe mutthu ti mutthu a hiyo? Nvahe ntakihero.

⁴ Akina a hiyo pooti onxupa waakhulela weera khaninwera opaka itthu sintxipale ntoko nintthunaahu, mwaha wa eretta naari mwaha wooowuuluvala. Ti yeeyo yaakhumelenle ni Carol. Owo aakhalano eparakha ya ovara muteko nipuro noothowa anamalaleera. Mpuwa mwa ehuhu ene yeele, owo aakhalano eparakha yooweriha soosoma sa Biblya sookwana 35 ni waakhavihera atthu akina wunnuwa moomunepani mpaka oBatiziwa. Mene Carol onvarela muteko muntxipale Yehova, nto owo aavoreiwa ni ahinawera ovenya imaara sintxipale owannyawe. Owo ohimme ha: “mwaha wa ootteettheya waka, miyo nkinwera ovara muteko ntoko asinna akina, mene miyo kinniisoona okhala mukristu oophwanelela ntoko asinna akina. Nto eyo ekhotto kinwanaakano, mwaha wooweera nkinwera opaka itthu ntoko kaatthunaaka.” Carol onnatthuna ompakela Yehova ele onweraawe, nto mwaha wa yeeyo, onnatthuneya omuttottopela. Nroromeleke weera Yehova onnahela mwiitti ele murokora Carol onweraawe opaka.

5. (a) Vaavo nintteettheyaahu nintthuneya wuupuwela eheeni? (b) Moovarihana ni ilataratho, munna aweenre hayi ompakela ele onweraawe Yehova mweekumini mwawe?

⁵ Wakhala weera nyuwo mootteettheya mwaha wooweera khamunwera ovara muteko ntoko mwaavaraahu khalayi, mwiikoheke ha, ‘eheeni Yehova ontthunaawe weera kipake?’ Yehova ontthuna weera—nyuwo mumpakeleke ele munweraanyu. Nkuupuwelani ha: murokora mmoha okalanne iyaakha 80 onnatteettheya mwaha wooweera khanwera ovaraxa muteko woolaleera ntoko aaweeraawe emaara aakhalannaawe iyaakha 40. Naamwi apakaka ele onweraawe, owo onuupuwela weera Yehova khanhakalala ni muteko onvaraawe. Neereke eyo ekhaikhai? Muupuwele ha, waari weera murokora ola oopaka ele aaweeraawe ehuhu aaraweno iyaakha 40, ni anavirelela opaka ele onweraawe va oraaweno iyaakha 80, owo khantonko ohiya ompakela Yehova ele onweraawe. Napatxera wuupuwelela weera ele nnampakelaahu Yehova khenkwana etthu, ninnatthuneya wuupuwelela weera Yehova tosuwenle waari weera ele nimpakaahu ennakwana etthu kapena hooye: Naapakaka ele ninweraahu nroromeleke weera Yehova onnihakalala.—Munwehe-tho Matheyo 25:20-23.

6. Ntakihero na Maria, ninnixuttiha eheeni?

⁶ Ti wookhweya ohakalala wakhala weera ninnawehexexa ele ninweraahu opaka, ohiya ele nihinweraahu opaka. Nkuupuwelelani yookhumelela ya murokora Maria. Owo ookhalano eretta enamootxeeliha ovara muteko woolaleera. Woopatxerani owo aninyoonyiwa ni aniisoona ohikhala muteko. Avinyaka owo aamupuwela murokora a mmulokoni aavoriiwa, nto owo aahuupuwela orowa omukhavihera. Maria ohimme ha: “Miyo kaahireherera weera kilaleereke ni murokora ole ninvarelaka muteko telefooni ni olepa ipaphelo.” “Ni emaara yootheene kaavaraaka wamoha ni murokora ole, kaatthikela owaani kihakalanleene, mwaha woomukhavihera murokora.” Hiyo tho, nnoophwanya ohakalala wakhala weera ninnawehexexa ele hiyo ninweraahu opaka ohiya ele nihinweraahu. Neereke nyuwo munnatthuna waatxeerera muteko anyu naari mookhalano mikhalelo soophwanelela onvarela muteko Yehova?

7. Miruku heeni murummwa Pedru aavanhaawe Akristu?

⁷ Epaphelo yoopatxera ya murummwa Pedru, aawooperera asinna weera evareleke muteko itthu asuwenlaaya weera yaalipihe atthu akina. Pedru ohimme ha: “Mutthu ti mutthu a  nyuwo sawasawa mahala akhenlaiye arumeleke akhwawe, ntoko arumeyi ororomeleya a mahala mantxipale a Muluku.” (1 Ped. 4:10) Hiyo khanintthuneya ohiya ovarela muteko itthu nisuwenlaahu nuupuwelaka weera atthu akina anootteettheya naari anoorowa onikhalela nrima, wuupuwela haawo, khanaarowa onvahaka Yehova ele hiyo ninweraahu.

8. Moovarihana ni 1 Akorinto 4:6, 7, mwaha wa heeni nihintthuneyaahu wiittottopa mwaha wa mikhalelo nraahuno?

⁸ Ekhaikhai weera ninnatthuna ovarela muteko osuwela wahu weera ninvarele muteko Yehova, mene hiyo khontthuneya wiittottopa. (Mmusome 1 Akorinto 4:6, 7.) Mwa ntakihero, pooti weeraka nyuwo munnoona okhweya opatxeriha soosoma sa Biblya. Ekhaikhai weera nyuwo onnatthuneya ovarela muteko mukhalelo anyu owo, mene etthu ekina ori wiihima! Muupuweleke weera nyuwo moowera opatxeriha yoosoma ya Biblya moolaleyani, ni munnatthuna waleela asinna a ekhurupu anyu. Nto mwaaphwanya vale asinna, munnamwiiwa murokora uulumaka ni ohakalala mwaha wooweera oowera ovaha eliivuru, mene owo ohiñye ebuukhu ni nyuwo mpatxerinhe yoosoma. Eheeni mwaarowaanyu opaka? Nyuwo moosuwela weera asinna anoorowa olipa ni sookumanano sanyu. Wamureera ohiya othaliha yookumanano anyu eyo weera muthalihe nihuku nikina. Mwaha wooweera pooti omaliha ohakalala wa murokora ole ovanhe eliivuru. Opaka eyo, mwaamoonihera oreera murima. Mene nyuwo khamunrowa ohiya opatxeriha soosoma sa Biblya mwaha wooweera mookhalano mikhalelo iyo, ni muhihiye—ovarela muteko!

9. Ninkela ovarela hayi muteko itthu nisuwenlaahu?

⁹ Aani, ninnatthuneya wuupuwelela itthu ninweraahu opaka, mene ohiya wiittottopela, nto weera naalipihe asinna. (Afil. 2:3) Emaara yeeyo hiyo ninvarihelaahu ikuru sahu ni owera wahu weera ninvarele Yehova, nnookhalano mathowa oohakalala. Mene ohiya weera nintthuna olikana ni atthu akina—nto mwaha wooweera ninvarela muteko osuwela wahu weera ninvuwihe Yehova.

10. Heeni ohikhanlaaya wooreera wiilikanxera ni atthu akina?

¹⁰ Wakhala weera khanniikosoopa, pooti omorela mmuraakhoni mwa wiilikanxera itthu niweeraahu opaka ni itthu atthu akina ahiinweraaya opaka. Mwa ntakihero, munna pooti okhumela nnene aapakaka nyaha mmulokoni. Owo mukhalelo awe wooreera, mene pooti weera wamurimani vawe munna ole onnamuthoriha munna ohinwera opaka nnene nyaha mmulokoni. Nnaamweera munna owo ahiweraka wiiwanyeiha nyaha sawe mmulokoni, nto munna owo  toowaakhela aletto, onnaaxuttiha nnene anamwane awe ni toowilipihera ni muteko woolaleera. Hiyo ninnatthuneya waaxukurela asinna awo arino mikhalelo soohiyana weera evareleke muteko mikhalelo iyo weera envarele Yehova ni yaakhavihere akina!

11. Mwaha wa heeni nintthuneyaahu otthara ntakihero na Yesu?

¹¹ Ekhaikhai weera khontthuneya wiilikanxera ni atthu akina, mene hiyo pooti oxuttera itthu sintxipale ni ntakihero na asinna awo. Ntakihero ntokotoko nintthuneyaahu otthara ti na Yesu. Hiyo khanintthuneya wiilikanxera ni Yesu mwaha wooweera owo aari oohittheka. Mene hiyo pooti oxuttera itthu sintxipale ni mikhalelo owo aakhalannaawe ni makhalelo a ekumi awe. (1 Ped. 2:21) Emaara hiyo nniilipiheraahu otthara ntakihero na Yesu nipakaka ele ninweraahu, ninnakhala akristu ookhumelela nnene ni ninnawera olaleera.

12-13. Eheeni nixuttenraahu ni ntakihero na mwene Davidi?

¹² MBiblyani nnoophwanya matakihero mantxipale aalopwana ni athiyana oororomeleya. (Aheb. 6:12) Nkamuupuweleni mwene Davidi, Yehova aahima woohima sa Davidi eeraka “mulopwana a vamurimani vaka” naari ntoko otaphuleliwa wa Biblya mukina oneera, “mutthu yoowo miyo kimmutthunaaka.” (Mit. 13:22) Mene Davidi aari mutthu aayarinwe ni yoottheka. Naari vaareene hiiho, owo ntakihero nooreera wa hiyo. Mwaha wa heeni? Mwaha wooweera emaara owo attaruxiwaawe khaamakela wiisaakiha. Owo aahaakhulela nttaruxo nne ni aattharuwa mweekhaikhai ni etthu ele owo aapankaawe. Nto mwaha wa yeeyo, Yehova aamulevelela.—Nsal. 51:3, 4, 10-12.

¹³ Naasomaka ntakihero na Davidi, niikoheke makoho ala: ‘kinoonela hayi kaavahiwaka miruku? Keereke miyo koosuwela soottheka saka, naari kinneerera wiisaakiha? Keereke kinnaakhulela soottheka saka naari kinnerera waavaha mathowa atthu akina? Neereke miyo kinniilipihera weera kihitthikele soottheka imoharu?’ Nyuwo pooti wuupuwela makoho oolikana ni ala mwaasomaka sooweereya sa arumeiyi a Yehova akhalayi. Neereke awo aaviriha maxupo oolikana ni awaka? Mikhalelo heeni awo yoonihenraaya miyo kintthuneyaaka otthara? Moota heeni miyo kinrowaaka owera olikana: ‘Ni murumeyi ola ororomeleya a Yehova?’

14. Eheeni ninkelaahu oxuttera ni asinna a muloko ahu?

¹⁴ Hiyo nnoowera oxuttera ni ntakihero na asinna a mmulokoni amiravo ni ale oowuuluvala. Mwa ntakihero, mmuupuwele munna  a muloko anyu onviriha maxupo araaya owo onnaviriha onyesereriwa opaka etthu oxikola—naari veemusini naari-tho, ookhalano maxupo amweekumini mwawe, mikhalelo heeni munna owo onooniheraawe nyuwo muntthunaanyu omutakiha? Mweekhaikhai, matakihero aasinna ni asirokora pooti onikhavihera vantxipale, ni pooti ovarela muteko ele ninxutteraahu ni yaawo weera niwere oviriha maxupo ahu. Mweekhaikhai hiyo, ninnahakalala okhalano aasinna ni asirokora ntoko ntakihero na nroromelo nintthuneyaahu otthara.—Aheb. 13:7; Yak. 1:2, 3.

15. Miruku heeni murummwa Paulo aavanhaawe seiyo sinkela onikhavihera oovirelela onvarela muteko Yehova ni ohakalala?

¹⁵ Mutthu ti mutthu a hiyo ontthuneya okhavihera weera awiihere murettele mmulokoni. Hiyo nintthuneya wuupuwelela ntakihero na akristu oopatxera. Akristu ootheene yaakhalano mikhalelo ni soothanleliwa soohiyana. (1 Akor. 12:4, 7-11) Mene awo khayaatthuna okuphana ni okhala ookawanyeya. Paulo aamooperera mutthu ti mutthu a mmulokoni opake ele onweeraawe weera “yalokihere òttela muteko aya woowunnuwiha erutthu ya Kristu.” Owo aalepa-tho há wa Aefeso: “empari ni empari aya ennakhela ikuru wera yunnuwe ni siso yisunnuwihe mosivelani.” (Aef. 4:1-3, 11, 12, 16) Akristu yaatthanre miruku sa Paulo, yaakhavihera okhaliha murettele ni wiiraana mmulokoni—makristu eekhaikhai a mahukwaano annapaka etthu emoharu.

16. Eheeni nintthuneyaahu opaka? (Aheberi 6:10)

¹⁶ Muhiilikanxereke ni atthu akina, opwaha mwa yeeyo, mwiilipihereke otthara ntakihero na Yesu ni arumeyi akina ororomeleya a Yehova. Pooti okhala akhalayi naari avaanaano. Mpakeke ele munweraanyu muhittiwaleke weera Yehova “kahiyene ohiloka mpaka ottiwala yopanka mwenranyu.” (Mmusome Aheberi 6:10.) Nvireleleke onvarela muteko Yehova moohakalala, musuwelaka weera ninnahakalaliha murima awe naapakaka ele ninweraahu.