1. Nuna keehi ufayssiyaabay aybee?

 YIHOOWAY nuuni ufayttanaadan koyees. Ufayssay Yihoowa geeshsha ayyaanaa ayfiyaa macara gidiyo gishshawu, nuuni hegaa eroos. (Gal. 5:22) Ekkiyaagaappe immiyaagee ufayttiyo gishshawu, nuuni loytti haggaaziyo wodenne nu ishantta dumma dumma ogetun maaddiyo wode wozanappe ufayttoos.—Oos. 20:35.

2-3. (a) Galaatiyaa 6:4y yootiyoogaadan, nuuni Yihoowawu haggaaziyoogan ufayttanaadan maaddiya naaˈˈubay aybee? (b) Nuuni ha huuphe yohuwan ay beˈanee?

² Galaatiyaa 6:4y yootiyoogaadan, kiitettida PHawuloosi nuuni ufayttidi deˈanaadan maaddiya naaˈˈubata yootiis. (Nabbaba.) Koyruwan, nuuni danddayiyoogaa keenaa Yihoowawu immana koshshees. Nuuni danddayiyoogaa keenaa ayyo loytti immikko ufayttana. (Maa. 22:36-38) Naaˈˈanttuwan, nuna haratuura geeddarssiyoogaappe naagettana koshshees. Nu payyatettaa, nu loohidobaa woy nu eraa gaasuwan, nuuni oottana danddayiyoobay ayba gidikkonne, Yihoowa galatana koshshees. Nuuni nuussi deˈiya ubbabaa appe ekkida. Qassi amarida ogiyan harati nuuppe haggaazuwan gooba gidikko, eti haratuppe aadhdhiyaaba milatanawu woy banttana siiqanawu bantta eraa goˈettiyoogaa aggidi hegaa Yihoowa sabbanawu goˈettiyo gishshawu nuuni ufayttana koshshees. Qassi nuna haratuura geeddarssiyoogaa aggidi etappe tamaarana koshshees.

³ Nuuni haggaazanawu koyiyoogaa keenaa haggaazana danddayenna gishshawu hidootaa qanxxiyo wode, nuna aybi maaddana danddayiyaakko ha huuphe yohuwan beˈana. Nuuyyo deˈiya imotaa waati loytti goˈettana danddayiyaakko, qassi harati leemiso gidiyoobaappe nuuni tamaarana danddayiyoobaakka beˈana.

4. Nuuppe amaridaageeti hidootaa qanxxanaadan oottana danddayiyaabay aybee? Leemisuwaa yoota.

⁴ Nuuppe amaridaageeti cimatettaa gaasuwan woy harggiyaa gaasuwan, koyiyoogaa keenaa Yihoowayyo haggaazana danddayenna gishshawu hidootaa qanxxoos. Kaaroli hanotaykka hegaa mala. A aassiyaageeti keehi koshshiyoosan kase haggaazaasu. He wode, A 35 Geeshsha Maxaafaa xinaateta xannaˈissaasu, qassi daroti banttana sheedhdhidi xammaqettanaadan maaddaasu. Kaarola haggaazuwan keehi gooba! Guyyeppe, A keehi sahettido gishshawu daro wodiyaa son takkana koshshiis. A hagaadan gaasu: “Harati oottana danddayiyoogaa keenaa ta sahuwaa gaasuwan taani oottana danddayennaagaa erays. SHin taani etaagaadan loˈˈo Kiristtaane gidikke gaada qoppaas. Taani oottana koyiyo ubbabaa oottana danddayikke, qassi hegee taani hidootaa qanxxanaadan oottees.” Kaarola Yihoowayyo oottana danddayiyo ubbabaa oottanawu koyaasu. Hegee keehi galatissiyaaba gidiyoogee qoncce! A baassi danddayettida keenaa oottiyo gishshawu qarettiya nu Xoossay ufayttiyoogaa ammanettana danddayoos.

5. (a) Nuuni oottana koyiyo ubbabaa oottana danddayennaagaa gaasuwan hidootaa qanxxikko ay hassayana koshshii? (b) Misiliyan qonccidaagaadan, issi ishay baassi danddayettida keenan Yihoowayyo aggennan waati haggaazii?

⁵ Neeni oottana danddayennabaa gaasuwan issi issitoo hidootaa qanxxikko, nena hagaadan oychcha, ‘Yihooway taappe koyiyoobay aybee?’ Neeni haˈˈi oottana danddayiyoobaa oottanaadan Yihooway koyees. Ha hanotaa qoppa. Layttay 80 gidido issi michchiyaa hidootaa qanxxawusu, ayssi giikko, iyyo layttay 40 gidido wode haggaaziyoogaa keenaa haˈˈi haggaazana danddayukku. A baassi danddayettida keenaa oottikkonne, Yihooway hegan ufayttenna gaada qoppawusu. SHin hegee tumee? Ane hagaa qoppa. Ha michchiyaa iyyo layttay 40 gidido wode baassi danddayettida keenaa oottaasu, qassi haˈˈi iyyo layttay 80 gidido wodekka baayyo danddayettida keenaa oottiyoogaa mule aggabeykku. Nuuni Yihoowa ufayssiyaagaa keenaa oottiiddi deˈokko giidi qoppiyoogaa doommikko, bana ufayssiyaabaa kuuyiyay Yihoowa gidiyoogaa nuuni hassayana bessees. Nuuni nuussi danddayettida keenaa oottikko, Yihooway nunan keehi ufayttana.—Maatiyoosa 25:20-23​ra gatta xeella.

6. Maariyi hanotaappe nuuni ay tamaarana danddayiyoo?

⁶ Nuuni oottana danddayennabaa qoppiyoogaa aggidi oottana danddayiyoobaa qoppikko, ufayttoos. Harggiyaa gaasuwan loytta haggaazana danddayenna Maariyo giyo michchiyo qoppa. A koyro unˈˈettaasu, qassi maaddennabadan iyyo siyettiis. Gidikkonne, Maariya hiixaappe denddana danddayenna gubaaˈiyan deˈiya issi michcheebaa qoppada O maaddanawu kuuyaasu. Maariya hagaadan gaasu: Taani iira issippe silkkiyaaninne dabddaabbiyan sabbakanawu hanotaa giigissaas. Nuuni issippe haggaazido wode ubban ufayttaydda so simmays, qassi ta michchiyo maaddidoogankka ufayttays. Oottana danddayennabaa qoppiyoogaa aggidi oottana danddayiyoobaa qoppiyo wode, nuunikka loytti ufayttana danddayoos. Nuuni Yihoowa haggaazuwan kaseppe loytti oottana danddayiyaageeta woy issi issi ginan gooba gididaageeta gidikko shin?

7. Kiitettida PHeexiroosi Kiristtaaneta zorido maaddiya zoree aybee?

⁷ Kiitettida PHeexiroosi ayyaanay denttettin xaafido koyro dabddaabbiyan, ba ishanttussi deˈiya imotaynne eray ayba gidikkonne, eti bantta mala Kiristtaaneta minttettanawu hegaa goˈettanaadan eta zoriis. PHeexroosi hagaadan giis: “Intte huuphiyan huuphiyan Xoossaappe  . . . aaro kehatettaa ekkidoogaadankka, Xoossaa dumma imuwaa loitti gishiyaageetudan, issoi issuwau oottite.” (1 PHe. 4:10) Harati qanaatana woy hidootaa qanxxana danddayoosona gi yayyidi nuussi deˈiya imotaa loytti goˈettennan agganawu mammottana koshshenna. Nuuni mammottikko, nu danddayiyoogaa keenaa Yihoowayyo oottana danddayokko.

8. Koyro Qoronttoosa 4:6, 7y yootiyoogaadan, nu imotan ceeqettiyoogaappe naagettana koshshiyoy aybissee?

⁸ Nuuni nu imotaa loytti goˈettana koshshees, shin hegan otorettennaadan naagettana bessees. (1 Qoronttoosa 4:6, 7 nabbaba.) Leemisuwawu, Geeshsha Maxaafaa xinaatiyaa doomissiyoogan neeni gooba gidana danddayaasa. Neeni he imotaa goˈettana koshshees! SHin neeni hegan ceeqettana koshshennaagaa hassayiyoogee keehippe koshshiyaaba. Neeni mata wode haggaazuwan Geeshsha Maxaafaa xinaatiyaa doomissidoogan ufayttadasa gaada qoppa. Hegaabaa ne haggaazo citawu yootanawu yeemottadasa. Gidikkonne, neeni he citaara gayttiyo wode issi michchiyaa maxeetiyaa immidoogaa etayyo yootawusu. A maxeetiyaa immaasu; qassi neeni xinaatiyaa doomissadasa. Yaatin ne waatuutee? Neeni oottidoban he citan deˈiyaageeti minettanaagaa eraasa. Maxeetiyaa immida michchiyaa neegaa keena gooba gidikke gaada qoppanaadan oottanawu neeni koyenna gishshawu, haroode yootanawu kuuyana danddayaasa. Hegee keha gidiyoogaa bessiyaaba. Gidoppe attin, hanotay ayba gidikkonne Geeshsha Maxaafaa xinaatiyaa doomissiyoogaa aggoppa. Neeyyo deˈiya imotaa goˈetta.

9. Nuuni nu imotaa waati goˈettana koshshii?

⁹ Nuuyyo deˈiya era ubbay Xoossay immido imota gidiyoogaa hassayoos. Nuuni he imotaa haratuppe aadhdhiyaaba milatanawu gidennan, gubaaˈiyaa minttettanawu goˈettana koshshees. (Pili. 2:3) Nuuni nu wolqqaanne eraa Xoossaa sheniyaa polanawu goˈettiyo wode keehi ufayttoos, nu ufayttiyoy haratuppe aadhdhiyo gishshataassa gidennan, he imotaa Yihoowa sabbanawu goˈettiyo gishshataassa.

10. Nuna haratuura geeddarssiyoogee bessennaba gidiyoy aybissee?

¹⁰ Issi uri naagettana xayikko, I gooba gididobaa hara uri gooba gidennabaara geeddarssiyoogaa doommana danddayees. Leemisuwawu, issi ishay dere haasayaa haasayiyoogan keehi gooba gidana danddayees. Hegee I gooba gididoba. Gidoppe attin, haasayaa haasayiyoogan gooba gidenna ishaappe aadhdhays giidi wozanan qoppana danddayees. SHin he ishay imattaa mokkiyoogan, ba naata loohissiyoogan, woy minnidi haggaaziyoogan keehi gooba gidana danddayees. Yihoowayyo haggaazanawunne  harata maaddanawu bantta imotaa goˈettiya gooba gidida daro ishanttinne michchontti deˈiyo gishshawu nuuni A keehi galatoos!

11. Nuuni Yesuusa leemisuwaa kaallanawu baaxetana koshshiyoy aybissee?

¹¹ Nuna haratuura geeddarssiyoogaappe naagettiyoogee koshshiyaaba gidikkonne, Yihoowayyo haggaaziya haratuppe darobaa tamaarana danddayoos. Leemisuwawu, ane Yesuusa hanotaa qoppoos. I wottiyoobi baynnaagaa gidikkonne, A loˈˈo eeshshatuppenne I oottido loˈˈobatuppe nuuni tamaarana danddayoos. (1 PHe. 2:21) Nuuni danddayiyoogaa keenaa A leemisuwaa kaallanawu loytti baaxetikko, Yihoowayyo loytti haggaazoosinne haggaazuwan keehi gooba gidoos.

12-13. Nuuni Kawuwaa Daawitappe ay tamaarana danddayiyoo?

¹² Nuuni Xoossaa Qaalaappe ammanettida attuma asatunne macca asatu taariketa demmana danddayoos; eti nagaranchcha gidikkonne, nuuni eta milatana danddayoos. (Ibr. 6:12) Yihooway ‘ta wozanadan oottiyaagaa’ giido woy hara Geeshsha Maxaafaa birshshettan “tana keehi ufayssiya asa” geetettida Kawuwaa Daawitabaa qoppa. (Oos. 13:22) SHin Daawiti nagaranchcha asa. I gita nagarata oottiis. Yaatikkonne, I nuuyyo loˈˈo leemiso. Aybissi? Ayyo seeray imettido wode, I gaaso shiishshanawu malibeenna gishshataassa. I baassi imettida wolqqaama zoriyaa ekkiis, qassi I oottidoban wozanappe azzaniis. Hegaappe denddidaagan, Yihooway ayyo atto giis.—Maz. 51:3, 4, 10-12.

¹³ Nuna hagaadan oychchiyoogan Daawitappe tamaarana danddayoos: Taassi zoree imettiyo wode taani waatiyaanaa? Ta mooruwaa sohuwaara ammaniyaanaa woy gaaso shiishshanawu maliyaanaa? Haratun gaasoyanawu eesotiyaanaa? Haranttuwaa moorennan agganawu baaxetiyaanaa? Geeshsha Maxaafan etabay odettido hara ammanettida attumaageetubaanne maccaageetubaa neeni nabbabiyo wode, hagaa mala oyshata nena oychchana danddayaasa. Neegaa mala metoy eta gakkidee? Eti bessido loˈˈo eeshshati awugeetee? Issi issi hanotan, nena hagaadan oychcha: ‘Taani ha ammanettida Yihoowa ashkkaraa waata loytta milatana danddayiyaanaa?’

14. Nuuni nu mala Kiristtaanetu hanotaa akeekiyoogan waati goˈettana danddayiyoo?

¹⁴ Nu mala Kiristtaanetu hanotaa akeekiyoogankka nuuni goˈettana danddayoos, eti yelaga woy cima gidana danddayoosona. Leemisuwawu, ne gubaaˈiyan deˈiya metuwaa gencciya ammanettida uraabaa qoppana danddayay? Geella  hegee laggetti iitabawu denttettiyoogaa, so asappe gakkiya yedetaa woy harggiyaa gidana danddayees. Neeni kaallanawu koyiyo loˈˈo eeshshati ha izaawuyyo deˈiyoogaa akeekadii? I woy A leemiso gidiyoobaa akeekiyoogan nena gakkiiddi deˈiya metuwaa waata genccanaakko tamaarana danddayaasa. He ishanttinne michchontti ammanuwan nuuyyo keehi loˈˈo leemiso gidiyo gishshawu nuuni keehi galatoos!—Ibr. 13:7; Yaaq. 1:2, 3.

15. Kiitettida PHawuloosi nuuni Yihoowayyo haggaaziyoogan ubbatoo ufayttanaadan nuna maaddana danddayiya ayba zoriyaa zoridee?

¹⁵ Gubaaˈiyan sarotettaynne issippetettay deˈana mala, nuuni ubbay nuuyyo danddayettida keenaa oottana koshshees. Koyro xeetu layttan deˈida Kiristtaanetubaa qoppa. Etassi dumma dumma imotaynne aawatettay deˈees. (1 Qor. 12:4, 7-11) SHin hegee eti keesettanaadaaninne shaahettanaadan oottibeenna. PHawuloosi nuuni ‘Kiristtoosa bollaa keexxanawu’ koshshiyaabaa oottanaadan nuna ubbaa zoriis. PHawuloosi Efisoonan deˈiya Kiristtaanetuyyo hagaadan giis: “He dumma dumma shaahoti oottanau bessiyaagaa oottiyo wode, kumetta bollai siiquwan dicceesinne bana keexxees.” (Efi. 4:1-3, 11, 12, 16) PHawuloosi yootidobaa oosuwan peeshshiyaageeti sarotettaynne issippetettay deˈanaadan oottidosona; ha wodiyan gubaaˈetun he eeshshata akeekoos.

16. Nuuni waatanawu murttana koshshii? (Ibraawe 6:10)

¹⁶ Nena haratuura geeddarssiyoogaappe naagettanawu murtta. Yesuusappe tamaara, qassi A eeshshata kaallanawu baaxeta. Geeshsha Maxaafan etabay odettido ammanuwan leemiso gidiya asatu taarikiyaappenne ha wodiyan deˈiya Kiristtaanetuppe tamaara. Neeni neessi danddayettida ubbabaa oottiyo wode, Yihooway ‘neeni oottido oosuwaa doganawu worddanchcha gidennaagaa’ ammanettana daddayaasa. (Ibraawe 6:10 nabbaba.) Neeni Yihoowa ufayssanawu wozanappe baaxetiyo baaxiyaa I nashshiyoogaa eriyoogaaninne ayyo haggaaziyoogan ubbatoo ufaytta.