ALATIKE AKO 16
Fiafia ʼi Te Foaki ʼo Te Meʼa Lelei Tukupau Kia Sehova
“Ke tahi vakavakaʼi e te tagata ʼana gaue ʼa ia totonu.”—KAL. 6:4.
KATIKO 37 Tou Tauhi Kia Sehova Mo He Loto Katoa
TE ʼU MANATU FAKANOUNOU a
1. Kotea ʼae ʼe tupu ai totatou fiafia lahi?
ʼE LOTO e Sehova ke tou fiafia. ʼE tou iloʼi te faʼahi ʼaia he ʼe kau te fiafia ki te fua ʼo tona laumalie maʼoniʼoni. (Kal. 5:22) ʼUhi ʼae ʼe lahi age te fiafia moka kita foaki ʼi takita tali, ʼe tou fiafia lahi moka tou gaue kinakina ʼi te minisitelio pea moka tou tokoni ki ʼotatou tehina mo tuagaʼane ʼi he ʼu aluʼaga kehekehe.—Gaue 20:35.
2-3. (1) Ia Kalate 6.4, kotea te ʼu aluʼaga ʼe lua ʼe tokoni mai anai ke tou taupau te fiafia ʼi tatatou gaue maʼa Sehova? (2) Kotea ka tou vakaʼi ʼi te alatike ʼaeni?
2 Ia Kalate 6:4, ʼe palalau ai te apositolo ko Paulo kia aluʼaga ʼe lua ʼe tokoni mai ai ke tou taupau totatou fiafia. (Lau.) ʼUluaki, ʼe tonu ke tou foaki te meʼa ʼe lelei tukupau ʼe tou maʼu kia Sehova. Kapau ʼe tou fai te faʼahi ʼaia, ʼe tou fiafia anai. (Mat. 22:36-38) Lua, ʼe mole tonu ke tou fakatatau ki ʼihi. Tatau aipe pe ʼe tou lava fai he ʼu gaue maʼa Sehova he ʼe tou malolohi, pe neʼe lahi te ʼu ako neʼe tou fai, peʼe tou maʼu ni fealagia, ʼe tonu ke tou fakafetaʼi kia Sehova. ʼE ko ia ʼae neʼe ina foaki mai te ʼu meʼa fuli ʼae ʼe tou maʼu. ʼI te tahi faʼahi, kapau ʼe fua lelei age te ʼu gaue ʼa ʼihi ʼi te faifakamafola, ʼe tonu ke tou fiafia he ʼe natou fakaʼaogaʼi ai ʼonatou fealagia moʼo vikiʼi ʼo Sehova. Kae ʼe mole natou fia fakaha ʼe natou lelei age ʼi ʼihi peʼe ko hanatou manatu pe kia natou. Koia, ʼe mole tou fakataupiepie anai mo natou kae tou ako mai ia natou.
3 ʼI te alatike ʼaeni, ʼe tou vakaʼi anai te faʼahi ka tokoni mai moka tou lotovaivai he ʼe mole tou lava fakahoko te ʼu meʼa ʼae ʼe tou fia fai, ʼi te tauhi ʼae kia Sehova. ʼE tou toe vakaʼi pe ʼe feafeaʼi hatatou fakaʼaogaʼi lelei ʼotatou fealagia, pea mo te ʼu ako ʼe feala ke tou maʼu mai te faʼifaʼitaki ʼa ʼihi.
MOKA FAKATUʼAKOI ʼAU GAUE ʼUHI KO TOU ALUʼAGA
ʼE fiafia ia Sehova ʼi tatatou foaki age te meʼa lelei tukupau ʼi totatou maʼuli katoa (Vaka’i te palakalafe 4-6) b
4. Kotea ʼae ʼe feala ke fakatupu lotovaivai kia tatou? Tuku mai he faʼifaʼitaki.
4 Ko ʼihi kaugana ʼa Sehova ʼe natou lotovaivai he ʼe mole kei natou lava fakahoko ʼanatou gaue ʼae neʼe natou fai ʼi muʼa atu, ʼuhi kua natou matuʼa peʼe mahahaki. Ko te faʼahi ʼaia neʼe hoko kia Carol. Neʼe alu ʼo tokoni ʼi he koga meʼa ʼe ʼaoga ai he kau faifakamafola. Lolotoga te temi ʼaia, neʼe ina fai ako Tohi-Tapu ʼe 35. Pea neʼe tokoni ki te tokolahi ia natou ʼaia ke natou kaku ki te papitema. Neʼe fua lelei ʼosi tana minisitelio! Pea neʼe mahaki leva, ʼo maʼua ai ke nofo ʼi fale. ʼE ui fenei e Carol: “ ʼE au iloʼi, ʼuhi ko taku mahaki, ʼe mole kei feala haku fai te ʼu gaue ʼae ʼe fai e ʼihi. Kae kia au, ʼe hage mai ʼe mole au agatonu ohage ko natou. Mole kei au lava fakahoko te ʼu gaue fuli ʼae ʼe au loto ke au fai, pea ʼe au lotovaivai ai.” ʼE fia fai e Carole te ʼu meʼa fuli ʼe ina lava fai maʼa Sehova. ʼE ko he faʼahi ʼe tonu ke vikiʼi. ʼE tou tui papau ko totatou ʼAtua manavaʼofa ʼe fiafia ʼi te fai e Carol te ʼu meʼa fuli ʼae ʼe ina lavaʼi.
5. (1) Kotea ʼe tonu ke tou manatuʼi moka ʼe mole kei feala hatatou gaue ohage ko muʼa atu? (2) Neʼe feafeaʼi te haga foaki e te tehina ʼi te pāki te meʼa lelei tukupau ʼi tana tauhi kia Sehova?
5 Kapau ʼi ʼihi temi ʼe ke lotovaivai he ʼe mole kei feala hau gaue ohage ko muʼa atu, pea ke fai te fehuʼi ʼaeni kia koe totonu: ‘Kotea ʼae ʼe loto e Sehova ke au fai?’ ʼE ina loto ke ke foaki age te meʼa ʼae ʼe lelei tukupau, ʼo mulimuli ki tou aluʼaga ʼae ʼi te temi nei. Ohage la ko he tuagaʼane ʼe taʼu 80 ʼe lotovaivai he ʼe mole kei lahi tana faifakamafola ohage ko tona taʼu 40. ʼE ina fai te meʼa ʼae ʼe ina lavaʼi. Kae ʼi tana ia manatu, ʼe mole feʼauga ke leleiʼia e Sehova. Kae koia koa ʼaia? Tou fakakaukauʼi age muʼa, ko te tuagaʼane ʼaia ʼi tona taʼu 40 neʼe ina fai te meʼa ʼae neʼe ina lavaʼi, pea ʼi te temi nei kua taʼu 80, kei hoko atu pe tana fai te meʼa ʼae ʼe ina lavaʼi. ʼO ha mai ai, neʼe hoko atu pe tana foaki te meʼa lelei tukupau. Kapau ʼe tou kamata ui ʼe mole feʼauga te ʼu meʼa ʼe tou fai ke leleiʼia ai tatou e Sehova, tou manatuʼi ʼe ʼa Sehova pe te vakaʼi ʼo te faʼahi ʼaia. Kapau ʼe tou foaki age te meʼa ʼae ʼe lelei tukupau, ʼe ina ui mai anai: “ ʼE lelei ʼosi.”—Vaka’i mo Mateo 25:20-23.
6. Kotea ʼe tou ako mai te faʼifaʼitaki ʼa Maria?
6 ʼE tou fiafia anai moka tou fakakaukauʼi te ʼu meʼa ʼe tou lava fai, kae mole ko te ʼu meʼa ʼe mole tou lavaʼi. Tou vakaʼi te faʼifaʼitaki ʼa te tuagaʼane ko Maria, ʼe mahaki pea ʼe mole kei lahi tana faifakamafola. ʼI te kamata neʼe lotovaivai, pea neʼe manatu ia mole kei hona ʼaoga. Kae neʼe ina manatuʼi te tuagaʼane ʼo tana kokelekasio pea neʼe ina fakatuʼutuʼu ke tokoni ki ai he neʼe takoto mahaki. Neʼe ui fenei e Maria: “Neʼe au fai he ʼu fakatuʼutuʼu ke au alu kio ia, ke ma faifakamafola ʼi te telefoni pea mo faitohi. Neʼe au fiafia tuʼumaʼu pe moka au liliu ki toku ʼapi, he neʼe au tokoni ki toku tehina.” ʼE toe feia pe anai mo tatou, ʼe tou fiafia anai moka tou fakakaukauʼi te ʼu meʼa ʼae ʼe tou lava fai kae mole ko te ʼu meʼa ʼe mole tou lavaʼi. Kae ʼe feafeaʼi leva moka ʼe lahi ʼatatou gaue peʼe fua lelei tatatou minisitelio?
KA ʼE ʼI AI HOU FEALAGIA, “FAKAʼAOGAʼI”
7. Kotea te tokoni neʼe fai e te apositolo ko Petelo ki ʼona tehina mo tuagaʼane?
7 ʼI te ʼuluaki tohi ʼa te apositolo ko Petelo, neʼe ina uga ʼona tehina mo tuagaʼane ke natou fakaʼaogaʼi ʼonatou fealagia moʼo fakalotomalohiʼi te kokelekasio. Neʼe ina tohi fenei: “ ʼO mulimuli ki te ʼu fealagia ʼae neʼe foaki atu kia koutou takitokotahi, ke kotou fakaʼaogaʼi te ʼu fealagia ʼaia moʼo fetokoniʼaki ohage ko he kau tagata tauhi lelei ʼo te ʼofa makehe ʼo te ʼAtua.” (1 Pet. 4:10) Tou fakaʼaogaʼi ʼotatou faiva kae ʼaua naʼa tou tuʼania naʼa fakatupu maheka ki ʼihi peʼe natou lotovaivai ai. He ʼe kapau ʼe tou maʼu te taʼi tuʼania ʼaia, ʼe mole tou foaki anai kia Sehova te meʼa lelei tukupau.
8. ʼO mulimuli kia 1 Kolonito 4:6, 7, he koʼe ʼe mole tonu ke tou fiameʼameʼa moka tou maʼu he fealagia?
8 Ka ʼe ʼi ai hotatou fealagia, tou fakaʼaogaʼi katoa, kae tou tokakaga naʼa tou fiameʼameʼa. (Lau ia 1 Kolonito 4:6, 7.) Ohage la ʼe faigafua kia tatou te kamata ʼo he ʼu ako Tohi-Tapu. ʼE mole tou taʼofi anai te fakaʼaogaʼi ʼo totatou fealagia ʼaia. ʼE ʼi ai te kehekehe ʼi tau fakaʼaogaʼi tou fealagia ʼi hau fiameʼameʼa ʼi te fealagia ʼe ke maʼu. Ohage la neʼe lelei tau faipalalau mo he tahi, ʼo kamata ai hau ako Tohi-Tapu. Kua ke loto la ke ke fakamatala ki tau kiʼi kutuga faifakamafola. Kae ʼi tau fakatahi leva mo natou, ʼe lolotoga fakamatala e he tuagaʼane neʼe ina tuku he nusipepa ki he tahi. Neʼe ina tuku he nusipepa, kae neʼe ke kamata koe he ako Tohi-Tapu. Kotea ʼae ka ke fai? ʼE ke iloʼi ʼe fakalotomalohi ki tau kiʼi kutuga te meʼa ʼae neʼe ke fai. Kae lagi ʼe ke atali anai hoki ke fakamatala ʼi he tahi temi, he ʼe mole ke loto ke puli te fiafia ʼo tou tehina ʼae neʼe ina tuku he nusipepa. ʼE ke fakaha ai tau agalelei. Kae tafito, ke hoko atu tau faiga ʼae ke ke maʼu hau ʼu ako Tohi-Tapu. ʼE ʼi ai tou fealagia, fakaʼaogaʼi.
9. He koʼe ʼe tou fakaʼaogaʼi ʼotatou fealagia?
9 Tou manatuʼi ʼe haʼu ʼotatou fealagia fuli mai te ʼAtua. Koia ʼe tou fakaʼaogaʼi anai moʼo fakalotomalohiʼi te kokelekasio, kae mole tou fakaʼaogaʼi ke tou fiaha. (Flp. 2:3) Kapau ʼe tou fakaʼaogaʼi totatou malohi mo ʼotatou fealagia moʼo fai te finegalo ʼo te ʼAtua, pea ko he tupuʼaga lelei ke tou fiafia. ʼEi, ʼe tou fiafia anai he ʼe tou fakakololiaʼi ia Sehova, kae mole tou fiaha pea mo faiga ke tou maʼoluga age ʼi ʼihi.
10. Kotea te hele ʼe feala ke tou to ki ai moka tou fakatatau ki ʼihi?
10 ʼAua naʼa tou to ki te hele ʼae ko te fakatatau te faʼahi ʼae ʼe tou malohi ai kae vaivai ai ʼihi. Ohage la ko he tehina ʼe faiva ʼi te faiakonaki. Pea lagi manatu ia ʼe maʼoluga age ʼi he tahi tehina ʼe mole loko malohi ʼi te faʼahi ʼaia. Kae lagi ko te tehina ʼaia ʼe tali kaiga, peʼe ina akoʼi lelei ʼana fanau, peʼe faiva ʼi te faifakamafola. ʼE tou fiafia ʼi te fakaʼaogaʼi e ʼotatou tehina mo tuagaʼane ʼonatou fealagia moʼo tauhi kia Sehova pea mo tokoni ki ʼihi.
KE KE AKO MAI TE FAʼIFAʼITAKI ʼA ʼIHI
11. He koʼe ʼe tonu ke tou faiga ke tou faʼifaʼitakiʼi ia Sesu?
11 Ohage ko tatatou kua ʼosi vakaʼi, ʼe mole tonu ke tou fakatatau ki ʼihi kau atolasio ʼa Sehova. Kae ʼe feala ke tou ako mai ia natou. Ko te faʼifaʼitaki lelei ʼe tonu ke tou mulimuli ki ai ko Sesu. ʼE moʼoni neʼe haohaoa, kae feala pe ke tou faʼifaʼitakiʼi. (1 Pet. 2:21) Kapau ʼe tou faiga ke tou mulimuli ki ʼona kalitate mo tana aga, pea ʼe hikihiki age anai totatou ʼuluagaaga pea ʼe tou liliu anai ko he kau faifakamafola faiva.
12-13. Kotea ʼae ʼe tou ako mai ia Tavite?
12 ʼE tou maʼu ʼi te Folafola ʼa te ʼAtua te faʼifaʼitaki ʼo ni tagata mo fafine neʼe tui, pea logo la tonatou heʼe haohaoa, kae ʼe feala ke tou faʼifaʼitakiʼi. (Hep. 6:12) Ohage la, neʼe ui e Sehova ʼo ʼuhiga mo Tavite: “ ʼE ko he tagata ʼe mulimuli ki toku finegalo.” (Gaue 13:22) Kae ko Tavite neʼe mole haohaoa, neʼe ina fai ni agahala mamafa. Logo la te faʼahi ʼaia, kae neʼe tuku mai e Tavite he faʼifaʼitaki. Ohage la, ʼi tana fakatonutonuʼi e Sehova, neʼe mole faiga ke ina fakatonuhia ia ia. Neʼe ina tali leleiʼi tona tokoniʼi, pea mo fakahemala moʼoni. Koia la ʼaia neʼe fakamolemole ai Sehova kia ia.—Pes. 51:3, 4, 10-12.
13 Ka tou fakakaukauʼi te faʼifaʼitaki ʼa Tavite, tou fai te ʼu fehuʼi ʼaeni: ‘ ʼE au tali feafeaʼi moka fai mai ni tokoni? ʼE au ʼio atu aipe koa ki toku hala, peʼe au kumi takuʼaki? Peʼe au tuku pe au te hala kia natou ʼae? ʼE au faiga koa ke mole au toe fai te hala ʼaia?’ ʼE feala pe ke ke fai te ʼu fehuʼi ʼaia moka ke lau te ʼu fakamatala ʼa ʼihi kaugana ʼa Sehova. Neʼe tatau koa ʼonatou fihifihia mo koe? Ko te ʼu kalitate fea ʼae neʼe natou fakaha? ʼI tau lau he fakamatala, ke ke fai te fehuʼi ʼaeni: ‘ ʼE feafeaʼi haku faʼifaʼitaki te kaugana ʼaia?’
14. Kotea ʼe tou ako mai ʼotatou tehina mo tuagaʼane?
14 Pea ʼe toe feala pe ke tou toʼo ni ako mai ʼotatou tehina mo tuagaʼane, ʼae kei tupulaga peʼe kua matuʼa. Ohage la, ʼe ʼi ai koa ʼi tau kokelekasio he tahi ʼe ina katakiʼi agatonu tona ʼahiʼahi? ʼE lagi ina tauʼi hana fakaneke ʼi te fale ako, peʼe ko te fakafeagai ʼo tona famili, peʼe ko hona mahaki. ʼE ke tokagaʼi koa he ʼu kalitate ʼe ina maʼu, pea ʼe ke fia faʼifaʼitakiʼi? ʼI tau fakakaukauʼi tana faʼifaʼitaki, ʼe feala ke ke iloʼi ai pe ʼe feafeaʼi hau tauʼi ʼou ʼahiʼahi. Tou fakafetaʼi ki te faʼifaʼitaki lelei ʼe tuku mai e te ʼu tehina mo tuagaʼane ʼaia.—Hep. 13:7; Sakp. 1:2, 3.
KE KE FIAFIA ʼI TAU TAUHI KIA SEHOVA
15. Kotea te tokoni ʼa Paulo neʼe ina fai ki ʼona tehina mo tuagaʼane, pea he koʼe ʼe tou toe fiafia anai mo tatou moka tou mulimuli ki ai?
15 ʼE tou kau fuli ki te taupau ʼo te tokalelei mo te logo tahi ʼo te kokelekasio. Neʼe maʼu e te ʼu ʼuluaki Kilisitiano ni fealagia pea mo ni gaue kehekehe. Kae neʼe mole tupu ai he fakataupiepie mo he felogoi kehekehe. (1 Ko. 12:4, 7-11) Neʼe uga e Paulo ʼona tehina mo tuagaʼane ke natou tahi tokoni ki te “lagalaga ʼo te sino ʼo Kilisito.” Neʼe ina tohi fenei ki te kau Efeso: “Ka gaue lelei te ʼu koga sino takitahi, ʼe tokoni ai ki te tuputupu ʼo te sino katoa, ke malohi ʼi te ʼofa.” (Efe. 4:1-3, 11, 12, 16) Ko natou ʼae neʼe mulimuli ki te tokoni ʼaia ʼa Paulo, neʼe natou taupau te tokalelei mo te logo tahi. Pea ko te ʼu aluʼaga ʼaia ʼe kei maʼu pe ʼi te ʼu kokelekasio ia ʼaho nei.
16. Ka tou lau ia Hepeleo 6:10, kotea ʼe tou fakatotonu anai ke tou fai?
16 Ke ke fakatotonu ke ʼaua naʼa ke fakatatau ki ʼihi. Ako mai ia Sesu pea mo ke faiga ke ke faʼifaʼitakiʼi ʼona kalitate. Ke ke toe ako mai te faʼifaʼitaki ʼo te tui ʼa te ʼu kaugana ʼa Sehova ʼi te Tohi-Tapu, peʼe ko ʼou tehina mo tuagaʼane. Haga foaki te meʼa lelei tukupau, pea ke falala “ ʼe mole heʼe faitotonu te ʼAtua ke ina galoʼi [tau] gaue.” (Lau ia Hepeleo 6:10.) ʼEi, ʼe ina leleiʼia tau faiga ʼae ke ke fakafiafiaʼi tona loto. Koia, ke ke fiafia tuʼumaʼu ʼi tau tauhi kia te ia.
KATIKO 65 Tou Haʼele Ki Muʼa
a ʼE feala ke tou ako fuli mai te faʼifaʼitaki lelei ʼa ʼihi kaugana ʼa Sehova. Kae ʼe mole tonu ke tou fakatatau ki ʼihi, he ʼe feala ke tou fiameʼameʼa ai peʼe tou lotovaivai. ʼE fakaha mai ʼi te alatike ʼaeni pe ʼe feafeaʼi hatatou tekeʼi te hele ʼaia pea ke tou taupau totatou fiafia.
b FAKAMATALA ʼO TE ʼU PĀKI: ʼI tana kei tupulaga, neʼe faʼa gaue te tehina ʼi te Petele. Neʼe ʼohoana leva, pea nā pionie taumatuʼa. Ki muli age neʼe maʼu fanau, pea neʼe ina akoʼi age te faifakamafola ki ʼana fanau. Kua matuʼa leva ʼi te temi nei, kae kei hoko atu pe tana foaki te meʼa lelei tukupau, ʼo faifakamafola ʼaki te faitohi.