1. მუს მოუღ ჩქინდა დიდ ხიოლ?

 იეჰოვას ოკო, ბედნერეფ ვორდათ. თეშ რაგად თიშენ შემლებნა, ნამდა ხიოლ თიშ წმინდა შურიშ ნაყოფ რე (გალ. 5:22). „შხვაშა ჯგირიშ კეთებას უმოს მეტ ბედნერობა მოუღ, ვინემ აშო მეღებას“, ათეშენ, მუჟამსით ირფელს ვორთუთ ღორონთიშ მსახურებას, ვოხვარუთ და დო ჯიმალეფს (საქ. 20:35).

2, 3. ა) მუჭოთ გალატელეფიშ 6:4-შე ბგებულენთ, ნამ ჟირ მხარე მოხვარნა, ვა ვოდინუათ ხიოლ იეჰოვაშ მსახურებას? ბ) მუს გუვარჩიენთ თე სტატიას?

² გალატელეფიშ 6:4-ის მოციქულ პავლე მიშინუანს ჟირ მხარეს, ნამუთ მოხვარნა, ვა ვოდინუათ ხიოლ (წეკითხით). პირველ რიგის, ჩქინ მიზან ოკო რდას, მუთ შემლებნან არძაშ უჯგუშ გუვაკეთათ იეჰოვაშო. მუჟამსით მუთ შემლებნან არძაშ უჯგუშის ვორთუთ თიშო თენა ბედნერობას მომღანა (მათ. 22:36—38). მაჟია, დუდ შხვეფს ოკო ვეშუდარათ. შილებე მიღდან ჯგირ ჯამრთელობა, ბუნებრივ ნიჭ დო უნარეფ, მარა თე ირფელშენ იეჰოვაშ მარდულეფ ოკო ვორდათ, მუშენდა ირფელ თიშე მიღნა. თეს გეძინელ, მუჟამსით შხვეფ ჩქინდე უმოს უნარიანეფ რენა, ოკო მოხიოლდან, ნამდა თინეფ მუნეფიშ ნიჭის იეჰოვაშ ოდიდებელო ირინუანა დო ვართ ხოლო მუნეფიშ დუდიშ გიმორჩქინაშო ვარდა პირად ინტერესეფშო. თაშ ნამდა, თინეფ კონკურენტეფო მიფრჩქინათინ თიშ მანგიორო, მნიშვნელოვან რე, თანაქრისტიანეფიშ მაგალითშე ქიდიბგურუათ.

³ თე სტატიას ქობძირუნთ, მუჭო შემლებნა გივორჯგინათ გურიშგოტახუას, მუჟამსით ჩქინ შეზღუდულ უნარიშ გურშენ ვეშემლებნა თიშ კეთება, მუთ მოკონა. თეს გეძინელ, გუვარჩიენთ, მუჭო შემლებნა არძაშ უჯგუშო გეგმიბრინუათ ღორონთშე მოჩამილ უნარეფ დო მუ შემლებნა დიბგურუათ შხვეფიშ მაგალითშე.

4. მუქ შილებე გურ გომტახან? ქიმიჸონით მაგალით.

⁴ მინშა იეჰოვაშ ნამთინე მსახურს ოკონ თიზმა ვაკეთებე თიშ მსახურებას ხანშამიშულაშ ვარდა გლახა ჯამრთელობაშ გურშენ. თაშ რდჷ კეროლიშ შემთხვევას. ართ პერიოდის თის უღუდ პატი, იმსახურკო თექ, სოდეთ მაქადაგებელეფიშ საჭიროება რდჷ. თი დროს 35 ბიბლიაშ გურაფას ატარენდჷ; თინეფშე ნამთინექ დუდ მეუძღვინ იეჰოვას დო დინათ. თიშ მსახურებას მართალო ჯგირ შედეგეფ მოჸუნდჷ. უკულ კეროლს ჯამრთელობაშ პრობლემეფქ ქაშუ დო უმენტაშო ჸუდეს რდჷ. თინა იჩიებ: „მართალ რე, მარჩქილე, ნამდა ჩქიმ ლახალაშ გურშენ ვეშემლებ თიზმაშ კეთება, მუზმას შხვეფ ორთნა, მარა იშენით ფიფქრენქ, ნამდა თინეფცალ ართგურ ვა ვორექ. თენა რე ბრძოლა სურვილ დო რეალობაშ შქას, მუდგაშა მანგარ ძნელ გარზებელ რე“. კეროლს ოკო, იეჰოვაშო ნამ შეულებუნ ირფელ გაკეთას. თეშ გურშენ თინა მართალო ოცქვაფალ რე. შემლებნა დარწმუნებულ ვორდათ, ნამდა შხვაშ გაჭირებაშ გურშა მიმაღალარ ღორონთ აფასენს თიშ შურ დო გურს.

5. ა) მუ ოკო ფშუდან, მუჟამსით მოკონან თიზმა ვა მაკეთებენან თიშ გურშენ გურ მაფნა გოტახილ? ბ) მუჭოთ ილუსტრაციაშე იძირე, მუჭო ომსახურ იეჰოვას ართ ჯიმა, ნამუთ მუთ შეულებუნ თის ორთ მთელ ცხოვრებას?

⁵ მინშა გოკონან თიზმაშ კეთება ვეშეილებნან თიშ გურშენ გურგოტახილ ქორეთ-და, ქოკითხით თქვან დუდის: „მუს ითხინს იეჰოვა ჩქიმდე?“. იეჰოვას ოკო, ასე ნამ შეილებნან თინა აკეთათ. წერმიდგინით თეშნერ სიტუაცია: 80 წანას გინოჩილათირ დას გურ აფჷ გოტახილ, მუშენდა თიზმა ვეშულებ, მუსხით 40 წანერ რდუნ თიმწკუმა შეულებუდ. თინა ფიქრენს, ნამდა, მართალ რე, ნამ შეულებუნ თის ორთჷ, მარა იეჰოვა იშენით ვა რე კმაყოფილ. ქორენო თენა სინამდვილეს თაშ? თე და 40 წანერ რდუნ თიმწკუმა ნამ შეულებუდუნ თის ქართუდ დო ასე, 80 წანას გინოჩილათირ რენ თეშ ხოლო, ნამ შეულებუნ თის ქაკეთენს-და, გიშურს, ნამდა დღას ვემუტებ მაქსიმუმიშ კეთება. იეჰოვაშ გურიშ გახარებელო ჩქინ მსახურება დასაბაღ ვა რენ თეს, ქოფიქრენთ-და, თქვან დუდის ოკო ქუგაშინათ, ნამდა ღორონთ მუ თვითონ გინოჭყვიდუნს, მუ რე დასაბაღ მუშ გურიშ გახარებელო. მუჟამსით ნამ შემლებნან თის ვორთუთ, იეჰოვა მიწინა: „ცქვაფაშ ღირს რექ!“ (ქეშუდარით მათეშ 25:20—23).

6. მუს ბგურაფლენთ მარიაშ მაგალითშე?

⁶ უმოს ადვილო მიბღენთ ხიოლს, მუჟამსით თიშე ფიფქრენთ, მუთ შემლებნა დო ვართ ხოლო თიშე, მუთ ვეშემლებნა. გუვარჩუათ და მარიაშ შემთხვევა, ნამდგას ლახალა ვარზენს საშვალებას, ბრელ გაკეთას იეჰოვაშ მსახურებას. დუდშე თინა დეპრესიას რდჷ დო დუდის უღირსო გინაფლენდჷ, თეშ უმკუჯინუო, გინოჭყვიდ, ქუმუხვარებუდკო დაშა, ნამუთ დალოგინებურ რდჷ. მარია იჩიებ: „მა დუვაგეგმჷ თიწკუმა ართო ტელეფონით დო წერილეფით ქადაგება. თე დაწკუმა ირ მსახურებაშ უკულ ბედნერ დო კმაყოფილ ვორდჷ, მუშენდა ჩქიმ დაშა მოხვარაქ შემალებუ“. ჩქი მეტ ხიოლ მაღვენუნა, მუჟამსით თიშა გინიბღანთ ყურადღებას, მუდგაშ კეთება შემლებნა დო ვართ ხოლო თიშა, მუთ ვეშემლებნა. მარა მუშ რაგად შილებე, მუჟამსით შემლებნა უმოსიშ კეთება ვარდა იეჰოვაშ მსახურებაშ ნამდგარენ სფერო მანგარ ჯგირო გიშმალენა?

7. მუ პრაქტიკულ რჩევა მეჩჷ მოციქულ პეტრექ ქრისტიანეფს?

⁷ ღორონთშე შთაგონებულ პირველ წერილს მოციქულ პეტრექ და დო ჯიმალეფს ელუჩ, ნამდა მუნეფიშ უნარეფ თანამორწმუნეეფიშ გამანგარებელო გეგმირინუესკო. პეტრექ ჭარჷ: „თითოულქ  ნამ ძღვინ მიღითინ, თი ძღვინ გეგმირინეთ ართიანიშ მომსახურებაშო, მუჭოთ ღორონთიშ ბრელნერო გიმორჩქინელ ჭყოლოფაშ ჯგირ მართველეფქ“ (1 პეტ. 4:10). ჩქი ვარია ოკო ვა ფთქუათ ღორონთშე მეღებულ ძღვინიშ სრულას გიმორნაფაშე თიშ შიშით, ნამდა შილებე შხვეფს ენჯარან ვარდა გურქ გუტირხან. თეცალ საქციელით იეჰოვაშო ნამ შემლებნან თინა ვა მაკეთებედეს.

8. მუჭოთ 1 კორინთელეფიშ 4:6, 7-შე იძირე, მუშენ ოკო ვა დიბჭყათ დუდიშ ცქვაფა ჩქინ უნარეფიშ გურშენ?

⁸ ჩქი სრულას ოკო გეგმიბრინუათ ღორონთშე მეღებულ უნარეფ, მარა საჭირო რე, ფრთხილას ვორდათ, ნამდა თეთ დუდიშ ცქვაფა ვა დიბჭყათ (წეკითხით 1 კორინთელეფიშ 4:6, 7). მაგალთო, შილებე განსაკუთრებულო გიშქალედას ბიბლიაშ გურაფაშ დოჭყაფა. მუშო ოკო რაგად, ოკო გეგმირინუე თე უნარ, მარა თით დუდიშ ცქვაფა ოკო ვა დიჭყე. წერმიდგინ, ნამდა ამარდე გიღუდ ჯგირ შემთხვევა, ნამდგას ბიბლიაშ გურაფაქ ქუმაჸუნ დო შურ გოლჷ, მუჟამ უწინქ სქან სამქადაგებლო ჯგუფის თეშ გურშენ. სამქადაგებლო შეხვალამას და იჩიებ მუშ შემთხვევას, მუჭო დუტუ ჟურნალ მობინადრეს. თიქ ჟურნალ დიტუ, სი ბიბლიაშ გურაფა დიჭყჷ. მუჭო მიქციებუქ? გიჩქჷ, ნამდა სქან შემთხვევა ჯგუფის გურშა ელუკინანს, მარა შილებე გინოჭყვიდე, თენა შხვა დროს ქოთქუე, მუშენდა თი დას, ნამდგაქ ჟურნალ დუტუ მობინადრეს, ხიოლ ვემუდინუე დო ვაფიქრებაფუე, ნამდა სქანცალ ჯგირ მაქადაგებელ ვა რე. თეშნერო სიკეთეს გეგმირჩქინანქ. მარა თენა ვა ნიშნენს, ნამდა ბიბლიაშ გურაფეფ ვა დიჭყე. სი გიღჷ ძღვინ დო გეგმირინე თინა!

9. მუჭო ოკო გიმიბრინუათ ჩქინ უნარეფ?

⁹ რშუდან, ნამდა ჩქინ ნებისმიერ უნარ ღორონთიშ საჩუქარ რე. საჭირო რე, თე უნარეფ კრებაშ საჯგირობუოთ გეგმიბრინუათ დო ვართ ხოლო ჩქინ დუდიშ ოცქვაფალო (ფილ. 2:3). მუჟამსით ჩქინ ენერგიას დო უნარეფს ღორონთიშ ნებაშ შეიოსრულებერო გეგმიბრინუანთ, ხიოლიშ მიზეზ მაღვენუნა. თიშენ ვარ, ნამდა შხვეფიშ უმოს ვაკეთით ვარდა თინეფშე უჯგუშეფო მიკოფრჩქინდით; სინამდვილეს, თიშენ, ნამდა ჩქინ უნარეფით იეჰოვა განვადიდით.

10. მუშენ ვა რე გონივრულ შხვეფშა დუდიშ შედარება?

¹⁰ ფრთხილას ვეჸუაფუნ-და, შილებე პიროვნებაქ მუშ ძალიერ მხარე შხვეფიშ სუსტ მხარეეფს შეუდარას. მაგალთო, შილებე ჯიმა ჯგირ მომხსენებელ რდას. თენა თიშ ძალიერ მხარე რე. შილებე თინა მუშ გურს ჟიშე გინაჯინედას მაჟია ჯიმას, ნამდგას უჭირს მოხსენებეფიშ კეთება, მარა  უღჷ შხვა უნარეფ. მაგალთო, გიმირჩქინანს სტუმარიშ ჸოროფას, ჯგირო გიშალე სქუალეფიშ გურაფა ვარდა შურ დო გურით მსახურენს. მანგარ მარდულეფ ვორეთ, ნამდა პჸუნა ბრელ ნიჭიერ და დო ჯიმა, მით მუნეფიშ უნარეფს იეჰოვაშ მსახურებაშო დო შხვეფიშ მახვარებელო ირინუანა.

11. მუშენ ოკო ვეცადათ იესოშ მაგალითიშ მეჸუნას?

¹¹ მართალ რე, მითინს ოკო ვეშუდარათ დუდ, მარა შემლებნა დიბგურუათ ღორონთიშ ართგურ მსახურეფიშ მაგალითეფშე. მაგალთო, დეფიფქრათ იესოშე. თიშ უმკუჯინუო, ნამდა თინა სრულყოფილ რდჷ, ბრელ მუდგარენიშ გურაფა შემლებნა თიშ ძვირფას თვისებეფშე დო თიშ საქმეეფშე (1 პეტ. 2:21). მუთ უმოსო მივაჸუნუთ იესოშ მაგალითის, თით უმოს უჯგუშო შემალებენა იეჰოვაშ მსახურება დო ქადაგება.

12, 13. მუს ბგურაფლენთ მეფე დავითიშ მაგალითშე?

¹² ბიბლიას ბკითხულენთ ბრელ ართგურ ქომოლკოჩ დო ოსურკოჩიშ გურშენ, მით არასრულყოფილებაშ უმკუჯინუო იშენით ჯგირ მაგალითის ირზენა (ებრ. 6:12). დეფიქრით მეფე დავითშე, მიდგაშე იეჰოვაქ თქუ, ნამდა მიწონუ (საქ. 13:22). დავით ვა რდჷ სრულყოფილ, სინამდვილეს თიქ მუსხირენშა სერიოზულო ჩირთჷ. თეშ უმკუჯინუო, ჯგირ მაგალითის მარზენა, მუშენდა შენიშვნას არზენდესინ, ვაცადუდ დუდიშ გამართლებას. თეშ გინაწონს, ღებულენდჷ მკაცრ რჩევას დო მთელ გურით ნარღენდჷ დაშებულს. შედეგო იეჰოვაქ ქაპატუ თის (ფსალმ. 51:3, 4, 10—12).

¹³ დავითიშ მაგალითიშ დაკვირებათ, ქობკითხათ ჩქინ დუდის: „მუჭო ბღებულენქ რჩევას? ხეთეშე ვაღიარენქო შეცდომას დოვარ ვოცადუქ დუდიშ გამართლებას? შხვეფს ხომ ვეგნვაბრალენქ? ირნერო ქუვოცადუქო, მეტშა ვა დუშვე იგივე შეცდომა?“. მუჟამსით ღორონთიშ შხვა ართგურ მსახურეფიშ გურშენ ბკითხულენთ ბიბლიას, შემლებნა თეცალ კითხვეფშე ხოლო დეფიფქრათ: „მა მიღუნ თიცალ პრობლემა ხომ ვა უღუდ თის ხოლო? მუ ჯგირ თვისებეფ გიმირჩქინ თე დროს? მუჭო შემლებ უჯგუშო ქუვაგურე იეჰოვაშ თე ართგურ მსახურს?“.

14. მუშენ რე ჯგირ, დევეკვირათ თანამორწმუნეეფიშ მაგალითეფს?

¹⁴ ჯგირ იჸუაფ, თანამორწმუნეეფს ხოლო ქიდვეკვირათ, მუჭოთ ახალგაზრდეფს, თეშ ხანშამიშულირეფს. მაგალთო, შეილებნა დეფიქრათ თი ართგურ თანამორწმუნეეფშე, მით ურზუნა შხვადოშხვა პრობლემას, მუნერით რე მუნეფიშ მახანეფიშ გავლენა, ოჯახშე  წინააღმდეგობა ვარდა გლახა ჯამრთელობა. თინეფიშ ნამ ჯგირ თვისება გოკო, სი ხოლო გავითარე? თეცალ თანამორწმუნეეფიშ მაგალითეფშე შილებე ქიდიგურუათ, მუჭო გაურზათ თქვან პრობლემეფს. მანგარ მარდულეფ ვორეთ, ნამდა პჸუნა რწმენაშ ცოცხალ მაგალითეფ, ნამდგას შემლებნა მივაჸუნათ. თენა მართალო ხიოლიშ მიზეზ რე (ებრ. 13:7; იაკ. 1:2, 3).

15. მუ რჩევა მუჩეს პავლე მოციქულქ, ნამუთ ხიოლს მომღანა მსახურებას?

¹⁵ კრებას მშვიდობა დო ართობა ქორდასინ თეშო, არძაქ ნამ შეულებუნ თინა ოკო გაკეთას. გუვარჩუათ პირველ საუკუნეშ ქრისტიანეფიშ მაგალით. თინეფს შხვადოშხვა უნარ დო დანიშნულება უღდეს (1 კორ. 12:4, 7—11). მარა თეშ გურშენ ართიანს კონკურენტეფო ვა უჯინედეს დო ართობა ვა უდინუაფნა. თეშ გინაწონს, პავლე ელუჩანდჷ თითოულს, ნამდა მუთ საჭირო რდუნ, გუკეთებდესკო „ქრისტეშ სხეულიშ“ ართობაშო. პავლექ ეფესოელეფს მეჭარ: „მუჟამსით თითოულ ნაწილ საჭირო რენ თეშ მოქმედენს, სხეულ ირდუ დო იმანგარებ ჸოროფას“ (ეფეს. 4:1—3, 11, 12, 16). მით თაშ იქციებ, მშვიდობა დო ართობას უნწყუნს ხეს, მუდგას ქოთ ვორწყეთ ამდღა ჩქინ კრებეფს.

16. მუშ კეთება ოკო მაფდან გინოჭყვიდილ? (ებრ. 6:10)

¹⁶ გინოჭყვიდილ გაფდან, მითინს ვეშუდარათ თქვან დუდ. თეშ მანგიორო, დიგურეთ იესოშე დო ქეცადით, გევითარათ თიშ თვისებეფ. ქიდეკვირით ქოთ ბიბლიურ დო ქოთ ამდღანერ რწმენაშ მაგალითეფს. ნამ შეილებნან თის ქართუთ-და, დარწმუნებულ რდათ თეშა: „ღორონთ უსამართლო ვა რე, ნამდა გიჭყოლიდუას თქვან ხანდა“ (წეკითხით ებრაელეფიშ 6:10). ვადინუათ ხიოლ იეჰოვაშ მსახურებას დო გიჩქუდან, ნამდა თინა აფასენს თქვან მონდომას.