1. Ino raha ten̈a mamparavoravo atsika?

 ATSIKA tiany Jehovah ho ravoravo. Akory ahaizantsika zen̈y? Fotony haravoan̈a io an̈isany vokatrany fan̈ahy masin̈inany. (Gal. 5:22) Ravoravo mare atsika izikoa be atao amy fanompoan̈a ndreky mifen̈y man̈ampy piaramanompo amintsika, amy fomba isankarazany. Man̈amia raha olo baka ny ten̈a mampasambatra tozay mahazo raha baka aminolo.​—Asa. 20:35.

2-3. a) Izikoa zahan̈a Galatianina 6:4, ino raha aroe han̈ampy atsika ho ravoravo fo amy fanompoan̈a Jehovah? b) Ino raha hidinihintsika ato?

² Nikoran̈a raha aroe han̈ampy atsika ho ravoravo fo i apostoly Paoly, amy Galatianina 6:4 ao. (Vakia.) Voanalohany, tanjon̈ontsika: Han̈amia Jehovah ny farany tsara vitantsika. Tokony ho ravoravo atsika izikoa fa man̈amia izy ny raha farany tsara baka amintsika. (Mat. 22:36-38) Faharoe, atsika tsy tokony hampiran̈a ain̈intsika aminolo hafa. Ndray karakory fahasalaman̈antsika, fampiofanan̈a nazontsika, ndreky raha man̈avanan̈a atsika, tokony hankasitraka Jehovah fo atsika amy raha jiaby vitantsika amy fanompoan̈a. Nan̈ino? Fotony baka aminany aby raha tsara jiaby anan̈antsika. Tokony ho ravoravo koa atsika izikoa fa misy rahalahy na ranabavy hafa mahay mandilatra atsika amy karazan̈a fanompoan̈a sasany. Fotony fahaizan̈andro io ampiasaindro hideran̈a Jehovah fa tsy hitadiavan̈a laza na voninahitry baka aminolo. Ke alô sitrany atsika hangala fianaran̈a baka amindro fa tsy hifan̈oesa amindro.

³ Hikoran̈intsika amy lahatsoratra ty ato raha han̈ampy atsika tsy ho rivan̈a izikoa atsika tsy mahavita be amy fanompoan̈a. Hidinihintsika koa fomba mety hampiasantsika fahaizan̈antsika na talentantsika tsarabe, ndreky raha ianarantsika baka amy raha tsara vitanolo.

4. Ino raha mety hamparivan̈a atsika? Man̈ameza ohatra.

⁴ Efa matoe na marary panompony Jehovah sasany, ke efa tsy be eky raha vitandro amy fanompoan̈a. Karaha zen̈y i Carol. Nan̈itatra faritany izy taloha. Mandeha 35 pianatra Baibolinany tamy zen̈y, ary nandroso aby iro jiaby io ke vita fanokan̈anten̈a ndreky batisa aby iro. Karaha ty ho izy: “Haiko ndraiky fa, baka aminy aretin̈inaka mahavy zaho tsy mahavita be eky karaha olo hafa. Kanefa, man̈enjiky zaho fo eritreritrinaka, fotony hitako tsy ampy lay ataoko. Ke nalemy trôko zaho, fotony mbala maro raha tiako hatao amy fanompoan̈a Jehovah kanefa efa tsy vitako eky.” Ten̈a vain̈y derain̈a i Carol, fotony izy tihan̈ano zay vitany amy fanompoan̈a Jehovah. Matoky atsika fa ankasitrahiny Jehovah toetsain̈y tsarany Carol zen̈y, fotony Zan̈aharintsika io farandraha mahay mahinakinaka eky.

5. a) Ino raha mila alaintsika onon̈o izikoa atsika rivan̈a fotony efa tsy mahavita be eky amy fanompoan̈a? b) Koa sary io zahavan̈a, akory an̈aboahany rahalahy araiky fa man̈ano ny farany tsara vitany fo izy amy fanompoan̈a Jehovah?

⁵ Dekorazy ma anao ndraikindraiky fotony efa tsy mahavita be eky anao amy fanompoan̈a? Izikoa zen̈y, diniha ty: ‘Ino ma raha takiany Jehovah aminaka?’ Tiany Jehovah hamezanao izy ny farany tsara vitanao amy zioty. Iritrireta baka ty: Nalemy trôko mare ranabavy araiky efa 80 taon̈o, fotony izy efa tsy mahavita manompo mare karaha taminizy mbala 40 taon̈o. Mihevitry izy fa tsy mamparavoravo Jehovah aby raha vitany amy zioty, ndray izy efa mifen̈y man̈amia ny farany tsara vitany. Marin̈y ankitin̈y ma zen̈y? Diniha baka ty: Efa nifen̈y nan̈amia ny farany tsara vitany ane ranabavy io taminizy 40 taon̈o e! Ary mbala man̈ano zen̈y fo izy, firaka izy 80 taon̈o izioty. Dikanizen̈y, nan̈amia ny farany tsara fo izy letrizay. Ke izikoa atsika komansy mihevitry fa tsy mamparavoravo Jehovah aby fanompoan̈a vitantsika, mila alaintsika onon̈o fa anjarany Jehovah manapakevitry izikoa mamparavoravo izy fanompoan̈antsika sa karakory. Izikoa ny farany tsara vitantsika amezantsika Jehovah, izy miran̈a mivolan̈a amintsika karaha ty: ‘Ten̈a tsara raha natanao!’​—Ampiràn̈a amy Matio 25:20-23.

6. Ino ma raha ianarantsika baka amy tantarany Maria?

⁶ Ho moramora amintsika hahita haravoan̈a amy fanompoan̈a, izikoa atsika mifantoko amy raha mbala vitantsika, fa tsy amy raha tsy ho vitantsika. Diniha baka raha nataony Maria. Marary ranabavy io, ke efa tsy be eky raha vitany amy fanompoan̈a. Tamy voanalohany, nalemy trôko mare izy, fotony izy nieritreritry fa tsisy raha nilavan̈a izy foeky. Kanefa, tsaroany fa misy ranabavy araiky marary koa amy fiangonan̈andro tao. Ranabavy io tsy afaka miala an̈abo fandrian̈a foeky. Ino raha nataony Maria? Nanapakevitry han̈ampy ranabavy io izy. Ho izy: “Nan̈ano randevò hiaraka hitory amy telefaony ndreky amy taratasy zahay. Isaka zahay baka nanompo, ravoravo mare zaho sady afapô koa fa navy tantran̈o, fotony zaho nahavita nan̈ampy rahavaviko io.” Karaha zen̈y koa atsika. Hahaiho ravoravo fo atsika izikoa mifantoko amy raha mbala vitantsika, fa tsy amy raha efa tsy vitantsika eky. Kanefa akory izikoa atsika mbala mahavita be amy fanompoan̈a, na izikoa misy karazan̈a fanompoan̈a sasany man̈avanan̈a atsika mare?

7. Ino torohevitry tsara namezany apostoly Petera iro Kristianin̈y aby io?

⁷ Tamy taratasy voanalohany nisoratiny apostoly Petera, izy nampirisiky iro rahalahiny aby io hampiasa fahaizan̈andro ndreky talentandro hampahirezan̈a piaramanompo amindro. Nivolan̈a izy fa, na ino na ino raha man̈avanan̈a atsika, tokony ‘hampiasaintsika hifanompoan̈a  raha zen̈y, fotony atsika panompo tsara natao han̈ampy olo hahazo hatsaran̈a baka aminy hatsarampan̈ahy miavaka aboakany Zan̈ahary.’ (1 Pet. 4:10) Atsika tsy tokony hisalasala hampiasa fahaizan̈antsika na talentantsika, avio tsy tokony havozo foeky atsika tsao ho be fô atsika olo hafa na ho kivy. Nan̈ino? Fotony atsika koa tsy mampiasa izio, manjary tsy man̈amia Jehovah ny farany tsara baka amintsika edy atsika.

8. Izikoa 1 Korintianina 4:6, 7 zahan̈a, nan̈ino ma atsika tsy tokony hipoera amy fahaizan̈a anan̈antsika?

⁸ Mila ampiasaintsika fahaizan̈a an̈anantsika; fa ndray izy man̈ano zen̈y, mila mitandrin̈y atsika tsao manjary poerapoera. (Vakia 1 Korintianina 4:6, 7.) Mety tsy sarotro aminao iziô mitariky fampianaran̈a Baiboly. Tokony hampiasa fahaizan̈anao zen̈y anao. Kanefa aleva onon̈o fa tsy miran̈a foeky mampiasa fahaizan̈a anan̈ana zen̈y ndreky poerapoera manan̈a izio. Ohatra iziô, ravoravo mare anao tandraraiky izikoa fa baka nanompo, fotony anao nahavita nanomboko fampianaran̈a Baiboly. Efa tsy din̈inao aby hitantara raha zen̈y aminy andiampitory misy anao. Kanefa anao koa fa tafihiaro amindro, nisy ranabavy araiky nitantara fa izy nahavita nan̈apetraka gazety. Nahavita nan̈apetraka gazety izy, fa anao ndraiky nahavita nanomboko fampianaran̈a Baiboly. Ke ino raha hataonao? Direkty anao hitantara raha vitanao koa? Izikoa anao man̈ano zen̈y, mety hihen̈y haravoan̈any ranabavy io. Ke tsara fan̈ahy anao izikoa miambin̈y fotoan̈a hafa vo mitantara fomba nahavitanao nanomboko fampianaran̈a Baiboly io. Ndray zen̈y, aza vôly mitaon̈o olo hianatra Baiboly. Ampiasà fo fahaizan̈a namezany Jehovah anao zen̈y!

9. Akory tokony hampiasantsika fahaizan̈antsika?

⁹ Mila alaintsika onon̈o fa baka amy Zan̈ahary aby fahaizan̈a ndreky talenta jiaby anan̈antsika. Ke tokony hampiasaintsika hankahirezan̈a fiangonan̈a izio, fa tsy raha hahavy atsika hiavaka aminolo jiaby. (Fil. 2:3) Ho ravoravo atsika izikoa angovontsika ndreky fahaizan̈antsika ampiasaintsika han̈anaovan̈a sitrapôny Zan̈ahary. Tsy raha atsika mahavita be mandilatra olo hafa mahavy atsika ho ravoravo, na nohony atsika an̈abon̈abo tozay iro fa, nohony atsika mampiasa fahaizan̈antsika hideran̈a Jehovah.

10. Nan̈ino atsika tsy tokony hampiran̈a ain̈intsika aminolo?

¹⁰ Mety misy raha donko man̈avanan̈a Kristianin̈y araiky. Kanefa, mila mitandrin̈y izy tsao izy manjary tsy man̈itsy fôtiny olo hafa, fotony iro tsy mahay raha hainy io. Hangala ohatra baka atsika. Misy rahalahy araiky farandraha mahay  man̈ano kabaro eky. Zen̈y raha ten̈a man̈avanan̈a izy. Izikoa izy tsy mitandrin̈y, mety tsy han̈isy fôtiny rahalahy araiky tsy mahay man̈ano kabaro izy, an̈aty fônany an̈y. Kanefa ny raha mety ho hisy, raha hafa ny ten̈a man̈avanan̈a rahalahy io fa tsy fan̈anaovan̈a kabaro. Mety mahay mandray vahiny donko izy, na koa vitany tsarabe mampiofan̈a iry zanany, na mety mazoto manompo mare izy. Ke ravoravo mare atsika manan̈a rahalahy ndreky ranabavy maro mahay raha vôn̈ono hampiasa fahaizan̈andro hanompoan̈a Jehovah ndreky han̈ampian̈a piaramanompo!

11. Nan̈ino ma atsika tokony hifen̈y hangala tahaka modeliny Jesosy?

¹¹ Marin̈y fa atsika tsy tokony hampiran̈a ain̈intsika aminolo. Kanefa, maro raha mety ianarantsika baka amy modely tsara ambelandro panompony Zan̈ahary tsy mivadiky aby io. An̈isanizen̈y i Jesosy. Marin̈y fa izy lavorary, fa ndray zen̈y atsika afaka mangala tahaka toetry tsaranany ndreky raha tsara vitany fo. (1 Pet. 2:21) Izikoa atsika mifen̈y mare man̈ano zen̈y erakany vitantsika, hahaiho tsara toetry fo atsika salakady hitombo koa vokatra ho hitantsika amy fanompoan̈a.

12-13. Ino raha ianarantsika baka amy Panjaka Davida?

¹² Amy Volan̈a Zan̈ahary ao ahitantsika tantarany lelahy ndreky viavy maro tsy nivadiky tamy Zan̈ahary. Ndray iro io tsy lavorary, mety alaintsika tahaka fo iro. (Heb. 6:12) Ohatra araiky amy zen̈y iziô Panjaka Davida. Nivolan̈a Jehovah fa ‘lelahy sitrakany fônany’ izy. Misy fandikanteny hafa mandika raha nivolan̈iny Jehovah io karaha ty: “Karazan̈anolo ten̈a ankasitrahiko.” (Asa. 13:22) Kanefa Davida tsy lavorary. Maro fahotan̈a maventy nataony. Ndray zen̈y, izy ten̈a ohatra tsara arehantsika. Nan̈ino? Fotony tsy nankamarinten̈a foeky izy koa fa nahitsy. Nikeny torohevitry namezan̈a izy, baka io nanen̈iny mare izy tamy raha ratsy vitany. Ke zen̈y nahavy Jehovah nan̈ambela hadisovan̈anany.​—Sal. 51:3, 4, 10-12.

¹³ Izikoa anao tihangala fianaran̈a baka amy Davida, man̈ontania ten̈a karaha ty: ‘Man̈ano akory ma zaho izikoa fa amezanolo torohevitry? Ikeko direkty ma raha tsy mety nataoko, sa mifen̈y zaho mankamarinten̈a? Malaky man̈amia tsin̈y olo hafa ma zaho? Mifen̈y mare ma zaho tsy han̈ampody hadisovan̈anaka?’ Mety man̈ontany ten̈a karaha zen̈y anao, izikoa fa mamaky tantarandro lelahy ndreky man̈angy tsy mivadiky aby amy Baiboly ao. Miran̈a ninao ma problemo navoa iro? Ino toetry tsara naboakandro? Isaka anao mamaky tantaranolo araiky  tsy nivadiky, man̈ontania ten̈a karaha ty: ‘Akory hahavy zaho hahavita karaha nataony io?’

14. Ino hatsaran̈a ho azontsika izikoa atsika mangala fianaran̈a baka aminolo finoan̈a araiky amintsika?

¹⁴ Hahazo hatsaran̈a koa anao izikoa mangala fianaran̈a baka aminolo finoan̈a araiky aminao, na tanora zen̈y na matoe. Misy rahalahy na ranabavy ma hainao fa mahavita tsy mivadiky ndray tsy mora raha mavoa izy, ambaka ataony forsenolo han̈ano raha ratsy, na toheriny fianakavian̈a, na tsy salama? Misy toetry tsara ma hitanao aminany ke mba tianao hanan̈ana bebe? Anao koa mandiniky modelinany, ho hitanao koa fomba hiatrefan̈a raha sarotro mitsapa finoan̈anao. Ravoravo mare atsika manan̈a piaramanompo maro salakady tsy mivadiky mety halaintsika tahaka!​—Heb. 13:7; Jak. 1:2, 3.

15. Ino torohevitry namezany apostoly Paoly ke mety man̈ampy atsika ho ravoravo fo koa fa manompo Jehovah?

¹⁵ Izikoa tiantsika hihavan̈a ndreky ho jery araiky olo jiaby amy fiangonan̈a, samby mila man̈amia ny farany tsara baka amintsika aby atsika. Diniha baka raha nandalo tamy taonjato voanalohany. Tsy nitovy fahaizan̈a ndreky fanendren̈a nazondro. (1 Kor. 12:4, 7-11) Fa raha zen̈y tsy nahavy iro hifan̈oesa na hisaratsaraka. Nampirisihiny Paoly iro tsiaraikiaraiky, ‘han̈ano raha hahavy vatan̈any Kristy ho fatatra mare.’ Karaha ty raha nisoratiny Paoly taminy Efesianin̈y: ‘Izikoa miaraka miasa tsarabe rantsambatan̈a tsiaraikiaraiky amy vatan̈a, mitombo tsarabe vatan̈a io ke mahaimatanjaka fo izio nohony fitiavan̈a.’ (Efes. 4:1-3, 11, 12, 16) Iro koa fa nan̈araka raha nivolan̈iny Paoly io, nanjary nihavan̈a ndreky jery araiky fiangonan̈a. Zen̈y koa raha hitantsika amy fiangonan̈antsika avahizo.

16. Tokony ho tapakevitry han̈ino atsika? (Hebreo 6:10)

¹⁶ Tokony ho tapakevitry anao tsy hampiran̈a ain̈inao aminolo. Mangalà fianaran̈a baka amy Jesosy, baka io mifen̈a hangala tahaka toetrinany. Afaka mangala fianaran̈a baka amindro olo tsy nivadiky tantarainy Baiboly ndreky baka amy piaramanompo tsy mivadiky amy zioty koa anao. Izikoa anao tsy vôly man̈amia Jehovah ny farany tsara baka aminao, ‘tsy hadin̈any foeky raha nataonao’, fotony izy ‘tsy man̈ano raha tsy rariny.’ (Vakia Hebreo 6:10.) Mifen̈a fo anao ho ravoravo amy fanompoan̈a ataonao amy Jehovah, fotony ravoravo mare izy mahita anao mifen̈y amy fônao jiaby man̈ano raha mamparavoravo izy.